Je Nɛɛ “Kɔɔyɔɔ” Ni Amuɔ Gbeɔ Mɔ!
“Kulɛ nyɛji gbohii yɛ nɔtɔmɔi kɛ eshai amli, nii ni nyɛnyiɛ yɛ mli sa . . . yɛ kɔɔyɔɔ mli hewalɛ Iɛ nɔ lumɔ Iɛ . . . naa Iɛ.”—EFESOBII 2:1, 2.
1. Kɔɔyɔŋ fitemɔ ebafee nɔ ni gbeɔ adesai yɛ mɛɛ gbɛ nɔ?
KƆƆYƆƆ kpakpa ni aaamu! Kwɛ bɔ ni enɛ haa mɔ he jɔɔ lɛ ehaa yɛ be mli ni mɔ ko ehi tsu ni mumɔ he bɛ jɛmɛ mli lɛ! Shi kɔɔyɔɔŋ fitemɔ ji naagba kpele ŋmɛnɛ yɛ hei ni yɔɔ kpetekpelee po. Ebɔɔ ni afeɔ ashwieɔ kɔɔyɔɔ mli lɛ fa babaoo diɛŋtsɛ yɛ maji pii amli. Lasui ni gbeɔ mɔ, atɔmik lamlu, moawai ni haa helai kɛ moawai krokomɛi ni tsɛŋeɔ mɛi faa kɛtsɔɔ kɔɔyɔɔ mli yɛ be fɛɛ mli. Kɔɔyɔɔ ni haa wala, ni Bɔlɔ ni yɔɔ suɔmɔ lɛ kɛha babaoo lɛ miifee nɔ ni gbeɔ mɔ yɛ be fɛɛ mli yɛ gbɔmɔ fufeemɔ kɛ anyagbafeemɔ hewɔ.
2. Mɛɛ “kɔɔyɔɔ” ni mli ewo muji oshara yɔɔ mli babaoo fe kɔɔyɔɔ ni afite mli ni wɔmuɔ lɛ?
2 Yɛ bɔ ni kɔɔyɔŋ fitemɔ ji oshara diɛŋtsɛ lɛ fɛɛ sɛɛ lɛ, “kɔɔyɔɔ” ni afite mli lɛ eko yɛ ni he yɔɔ oshara fe fɛɛ. Ejeee kɔɔyɔɔ ni akɛ nuklea oshara ni ba Chernobyl (Rusia) aloo Los Angeles, Kalifornia (U.S. Amerika) lɛ kɔɔyɔɔ ni lasu eyi mli obɔ lɛ ewo mli muji lɛ. Dabi, oshara eba akɛ wɔbaamu “kɔɔyɔɔ” ko ni gbeɔ mɔ oya diɛŋtsɛ. Bɔfo Paulo tsi ta yɛ be mli ni ekɛɛ enanemɛi Kristofoi lɛ akɛ: “nyɛ hu ni kulɛ nyɛji gbohii yɛ nyɛtɔmɔi kɛ eshai amli, nii ni nyɛnyiɛ yɛ mli sa yɛ je nɛŋ su lɛ naa, yɛ kɔɔyɔɔ mli hewalɛ lɛ nɔ lumɔ lɛ, ni ji mumɔ ni tsuɔ nii ŋmɛnɛŋmɛnɛ yɛ toigbele bii amli lɛ naa lɛ.”—Efesobii 2:1, 2.
3, 4. (a) Namɔ ji “kɔɔyɔɔ mli hewalɛ lɛ nɔ lumɔ” lɛ? (b) Mɛni hewɔ “kɔɔyɔɔ” ni yɔɔ Efesobii 2:1, 2 lɛ jeee daimonioi ashihilɛ he lɛ?
3 Mɛni ji nɛkɛ “kɔɔyɔɔ” nɛɛ? Paulo tsɔɔ akɛ eyɛ “hewalɛ,” ni akɛ “lumɔ” loo nɔyelɔ ko yeɔ nɔ. Ŋwanejee ko bɛ mɔ ni nɔyelɔ loo lumɔ nɛɛ ji lɛ he. Lɛ ji Satan Abonsam, mɔ ni Yesu Kristo tsɛ lɛ akɛ “je nɛŋ lumɔ” lɛ. (Yohane 12:31) Biblia he nikaselɔi lɛ ateŋ mɛi komɛi ni yoo enɛ lɛ nuɔ he akɛ Paulo ŋɔ wiemɔ ko kɛjɛ Yudafoi loo wɔŋjalɔi anɔ mli ni ewie kɔɔyɔɔ lɛ he akɛ daimonioi ni Abonsam yeɔ amɛnɔ lɛ ashihilɛ he. Biblia shishitsɔɔmɔi babaoo hiɛ jwɛŋmɔ ni tamɔ nɛkɛ. Shi nɛkɛ “kɔɔyɔɔ” nɛɛ jeee “ŋwɛiniiaŋ lɛ” ni “mumɔi fɔji asafoi” lɛ hiɔ lɛ.—Efesobii 6:11, 12.
4 Beni Paulo ŋmaa Kristofoi ni yɔɔ Efeso lɛ, no mli lɛ Satan kɛ edaimonioi lɛ yɛ ŋwɛi lolo, eyɛ mli akɛ amɛyɛ Nyɔŋmɔ duromɔ lɛ sɛɛ. No mli lɛ kpaako abaashɛrɛ amɛ ashwie kɛba shikpɔŋ nɛɛ nɔ he ko. (Kpojiemɔ 12:7-10) Agbɛnɛ hu, kɔɔyɔɔ kɔɔ adesai ahe babaoo fe mumɔŋ bɔɔ nii. No hewɔ lɛ, adesai asafoi lɛ baanu nɔ ni baajɛ Nyɔŋmɔ mlifu tɔ lɛ mli nii ni aaafɔse awo “kɔɔyɔɔ” lɛ mli aba lɛ he yɛ be mli ni aaafɔse naagbee nɔ lɛ ashwie shi lɛ.—Kpojiemɔ 16:17-21.
5. Mɛni ji “kɔɔyɔɔ” ni awieɔ he yɛ biɛ lɛ, ni mɛɛ hewalɛ enaa yɛ gbɔmɛi anɔ?
5 No hewɔ lɛ etamɔ nɔ ni Paulo kɛ kɔɔyɔɔ diɛŋtsɛ, aloo atatuiaŋ nɛɛ tsu nii ekɛfee su aloo pɛsɛmkunya kɛ toigbele diɛŋtsɛ ni gbɔmɛi ni amɛtse amɛhe kɛjɛ Nyɔŋmɔ he lɛ he mfoniri jieɔ lɛ kpo lɛ. No nɔŋŋ ji “mumɔ ni tsuɔ nii ŋmɛnɛŋmɛnɛ yɛ toigbele bii amli lɛ” kɛ “je nɛŋ mumɔ lɛ.” (Efesobii 2:2; 1 Korintobii 2:12) Taakɛ bɔ ni kɔɔyɔɔ diɛŋtsɛ jɛɔ he fɛɛ he, ni wɔmuɔ wɔwoɔ wɔmli be fɛɛ be lɛ, nakai nɔŋŋ hu “je nɛɛ mumɔ lɛ” hu yɛ he fɛɛ he. Egbuɔ shi kɛboteɔ he fɛɛ he, enaa mɛi anɔ hewalɛ, ni ekudɔɔ gbɔmɛi ajwɛŋmɔ kɛ gbɛ ni amɛtsɔɔ nɔ amɛfeɔ amɛnii yɛ be mli ni amɛdiɔ amɛ akɔnɔi, hiɛnɔkamɔi kɛ taomɔ nii asɛɛ kɛjɛɔ fɔmɔ mli aahu kɛyashiɔ gbele mli lɛ.
6. (a) Je nɛɛ “kɔɔyɔɔ” lɛ mli ebɔɔ lɛ mli woɔ wu yɛ mɛɛ gbɛ nɔ, ni eyeɔ mɛi anɔ “hewalɛ” yɛ mɛɛ gbɛ nɔ? (b) Yɛ mɛɛ gbɛ nɔ “kɔɔyɔɔ” ni tamɔ nɛkɛ ni aaamu lɛ baaha mɔ ko akase Abonsam atuatsemɔ gbɛ lɛ?
6 Nɛkɛ eshafeemɔ kɛ atuatsemɔ mumɔ nɛɛ hiɔ adesa weku ni yeee emuu lɛ teŋ diɛŋtsɛ. Yɛ be mli ni amuɔ nɛkɛ “kɔɔyɔɔ” nɛɛ lɛ, ebɔɔ ni yɔɔ mli lɛ mli waa kɛtsɔɔ nɔnyɛɛ kɛ bɔlɛnamɔ he akɔnɔ mli ŋɔɔmɔ ni baa mɔ nɔ lɛ nɔ. No hewɔ lɛ nɔ ni ejɛ mli eba ji “hewalɛ” loo hegbɛ ni ena yɛ gbɔmɛi anɔ. (Okɛto Romabii 6:12-14 he.) Shi Abonsam ji nibii fɔji fɛɛ ashishijelɔ. (Yohane 8:44) No hewɔ lɛ enaa adesai anɔ hewalɛ koni amɛkase lɛ diɛŋtsɛ etuatsemɔ gbɛ lɛ, ni yɛ enɛ hewɔ lɛ, ekanyaa ni ekudɔɔ nɛkɛ akutseiaŋ mumɔ loo “kɔɔyɔɔ” nɛɛ. Akɛ “lumɔ” ni yeɔ nɛkɛ “hewalɛ” nɛɛ nɔ lɛ, Satan kɛ enɛ tsuɔ nii koni ekɛkudɔ gbɔmɛi lɛ ajwɛŋmɔ. Eto emli nibii lɛ gbɛjianɔ bɔ ni eeeha gbɔmɛi lɛ kɛ amɛhe awo heloo lɛ akɔnɔi ahe nitsumɔ kɛ je lɛŋ nibii asɛɛdii mli koni amɛkana be loo susumɔ ko ni amɛkɛle Nyɔŋmɔ ni amɛba amɛhe shi amɛha emumɔ krɔŋkrɔŋ lɛ, “mumɔ ni haa wala” lɛ. (Yohane 6:63) Kɛ aaawie yɛ mumɔŋ lɛ, amɛgboi.
7. (a) Yɛ mɛɛ gbɛ nɔ kulɛ Kristofoi ji “mlifu bii” yɛ be ko mli? (b) Mɛɛ tsakemɔ ba yɛ be mli ni amɛbatsɔmɔ Kristofoi lɛ?
7 Kristofoi hu baje nɛkɛ “hewalɛ” loo kudɔmɔ ni yɔɔ nɛkɛ “kɔɔyɔɔ” ni mli ewo muji nɛɛ kudɔmɔ shishi lɛ shishi dani amɛbakase Nyɔŋmɔ Wiemɔ lɛ mli anɔkwale lɛ, ni amɛje shishi amɛtsake kɛha ejalɛ taomɔ nii lɛ. “Hɛɛ, nomɛi amli wɔ fɛɛ [je lɛŋ bii] hu wɔba wɔjeŋ yɛ sa yɛ wɔheloo akɔnɔi lɛ amli ni wɔtsu nii ni heloo kɛ jwɛŋmɔ sumɔɔ lɛ, ni wɔji mlifu bii yɛ wɔ fɔmɔsu lɛ naa tamɔ mɛi ni eshwɛ lɛ nɔŋŋ.” Shi beni wɔbatsɔmɔ Kristofoi lɛ, wɔkpa je nɛɛ “kɔɔyɔɔ” ni gbeɔ mɔ nɛɛ mumɔ. ‘Wɔshɛ wɔsa jeŋba lɛ naa gbɔmɔ momo ni efite yɛ shishiumɔ sɛɛdii lɛ anaa lɛ wɔfɔ, ni wɔwo mumɔ hee lɛ ni abɔɔ yɛ Nyɔŋmɔ suɔmɔnaa nifeemɔ naa yɛ anɔkwale jalɛ kɛ hetsemɔ mli lɛ.’—Efesobii 2:3; 4:22-24.
8. Shihilɛ ni wɔyɔɔ mli ŋmɛnɛ lɛ tamɔ be mli ni Israel maŋ lɛ yɔɔ ŋa lɛ nɔ lɛ nɔŋŋ yɛ mɛɛ gbɛ nɔ.
8 Oshara ni yɔɔ bianɛ lɛ ji akɛ, yɛ be mli ni wɔjo foi kɛjɛ je nɛɛ atatuiaŋ ni mli ewo muji lɛ mli lɛ, nɔ ko baalaka wɔ ni wɔyabote mli ekoŋŋ. Naa wɔ, ni wɔbote “naagbee be” lɛ mli vii ni wɔdamɔ jeŋ hee lɛ agbo naa tuuŋtu. (Daniel 12:4) Yɛ anɔkwale mli lɛ, wɔsumɔɔɔ ni wɔnine anyɛ shi yɛ tsɔne ni akɛdu Israelbii lɛ ni no nɔŋŋ akɛaadu wɔ lɛ mli. Yɛ be mli ni atsɔ naakpɛɛ gbɛ nɔ ajie amɛ kɛjɛ Mizraim ni amɛyashɛ Shiwoo Shikpɔŋ lɛ husui anaa sɛɛ lɛ, akpekpei abɔ bafee mɛi ni ‘apelenee amɛ yɛ ŋa lɛ nɔ.” Mɛni hewɔ? Ejaakɛ amɛteŋ mɛi komɛi batsɔmɔ wɔŋjalɔi, mɛi krokomɛi batsɔmɔ ajwamaŋbɔlɔi, ni mɛi krokomɛi hu ka Yehowa kɛtsɔ huhuuhu wiemɔ kɛ saji ahe wiemɔ nɔ. Paulo ma sane titri nɛɛ nɔ mi beni ekɛɛ akɛ: “Shi afee amɛ enɛɛmɛi fɛɛ, ni akɛto okadi aha wɔ, ni aŋma ni aŋɔbɔ wɔ kɔkɔ, wɔ mɛi ni je lɛ naagbeei lɛ enina wɔ lɛ.”—1 Korintobii 10:1-11.
9. (a) Te wɔɔfee tɛŋŋ wɔhi je lɛ mli ni kɛlɛ wɔfeŋ efa hu? (b) Mɛni esa akɛ wɔfee koni je nɛɛ kɔɔyɔɔ ni ebɔle je lɛ he ni gbeɔ mɔ lɛ akagbala wɔ kɛmiibote enɔ mli?
9 Yesu sɔle yɛ ekaselɔi lɛ ahe akɛ: “Amɛjɛɛɛ je lɛ mli taakɛ bɔ ni mi hu mijɛɛɛ je lɛ mli lɛ. Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ efɔŋ lɛ mli.” (Yohane 17:14, 15) Yehowa baabu wɔhe, shi efoŋ afabaŋ ewoŋ wɔhe, ni etsɔŋ naakpɛɛ gbɛ nɔ hu ekɛtsiŋ wɔnaa kɛjɛŋ je nɛɛ “kɔɔyɔɔ” lɛ he. (Hiob 1:9, 10) No hewɔ lɛ, kaa loo sane ni mli wa ni ka wɔnɔ lɛ ji ni wɔhi Satan je lɛ mli ni kɛlɛ wɔkafee efa hu, ni “kɔɔyɔɔ” ni mli ewo muji lɛ abɔle wɔhe, ni kɛlɛ wɔkamu enɛ hu. Kɛ wɔkane je lɛŋ woji, wɔkwɛ etɛlivishin aloo wɔtee ehiɛtserɛjiemɔ hei lɛ, eka shi faŋŋ akɛ wɔkɛ je lɛ “kɔɔyɔɔ” lɛ baakpe. Yɛ be mli ni bɔ fɛɛ bɔ ni eji lɛ wɔkɛ je lɛŋ bii baana sharamɔ kɛ—yɛ nitsumɔ he, yɛ skul, kɛ hei krokomɛi lɛ—esa akɛ wɔha wɔhiɛ ahi wɔhe nɔ koni wɔkaha je nɛɛ “kɔɔyɔɔ” ni gbeɔ mɔ ni ebɔle wɔhe kɛkpe lɛ miigbala wɔ kɛmiibote enɔ mli.—1 Korintobii 15:33, 34.
10, 11. (a) Abaanyɛ ni akɛ Yehowa mumɔŋ paradeiso lɛ ni wɔyɔɔ mli lɛ ato “ashɛreee zigarɛt he” he yɛ mɛɛ gbɛ nɔ? (b) Mɛni esa akɛ wɔfee kɛ wɔyoo je nɛɛ “kɔɔyɔɔ” lɛ akɛ eetswa kɛmiiba wɔnɔ lɛ.
10 Wɔbaanyɛ ni wɔkɛ shihilɛ ni wɔyɔɔ mli lɛ ato mɔ ni ta niyeli he ni yɔɔ “zigaret shɛremɔ” he kɛ “ashɛreee zigaret” he. Akɛ Kristofoi ni yɔɔ Yehowa mumɔŋ paradeiso lɛ, wɔyɛ “ashɛreee zigaret” he lɛ ni wɔkɛ je nɛɛ mumɔ lɛ teŋ jɛkɛ naakpa. Yɛ anɔkwale mli lɛ, wɔjeŋ gbɛ wɔtaŋ shi yɛ “zigaret shɛremɔ” he lɛ. Enɛ baafee buului asane. Shi mɛni baa yɛ be babaoo mli yɛ be mli ni wɔyɔɔ niyeli he lɛ fa ni ji “ashɛreee zigaret” he lɛ? Kɔɔyɔɔ ni mli ewo muji ni eyi obɔ kɛ zigaret lasu lɛ hoɔ kɛbaa ni wɔnuɔ efu lɛ! Kɛ enɛ balɛ nakai lɛ, ani wɔnuɔ he akɛ kɔɔyɔɔ ni mli ewo muji lɛ ŋɔɔ? Aloo wɔkɛ oyaiyeli shiɔ jɛmɛ?
11 Shi mɛni ofeɔ yɛ be mli ni je nɛɛ “kɔɔyɔɔ” lɛ mli lasu loo efu lɛ baa he ni oyɔɔ lɛ? Ani ofeɔ onii oya bɔni afee ni otsi ohe kɛjɛ hewalɛ fɔŋ nɛɛ mli? Kɛ ohi jɛmɛ ni omu enɛ owo omli lɛ, ŋwanejee ko bɛ he akɛ ebaasa osusumɔi ahe. Kɛ osɛɛ tsɛ yɛ jɛmɛ ni otee nɔ omu “kɔɔyɔɔ” ni tamɔ nɛkɛ lɛ, ehaa okpɛlɛɔ nɔ ni yaa nɔ lɛ nɔ. Agbɛnɛ hu, be baashɛ ni lasu lɛ loo efu lɛ jeee nɔ ni onyaŋeɔ dɔŋŋ shi moŋ ebafeɔ nɔ ni lakaa bo, nɔ ni haa otɔɔ, ni heloo lɛ sumɔɔ. Ebaanyɛ eha teemɔŋ akɔnɔ ko ni oobɔ mɔdɛŋ ni oye nɔ lɛ mli awo wu.
12. Mɛni ataoɔ kɛ wɔɔnyɛ wɔkwa jɛ nɛɛ “kɔɔyɔɔ” lɛ fai ni anyɛɛɛ ayoo amɛ oya lɛ ni aaatswa kɛba wɔnɔ lɛ?
12 Nibii komɛi ni fiteɔ kɔɔyɔŋ yɛ je nɛɛ “kɔɔyɔɔ” lɛ mli ni gbeɔ mɔ ni jeee nɔ ni anyɛɔ ayooɔ amɛ oya, taakɛ bɔ ni nibii diɛŋtsɛ ni fiteɔ wɔ kɔɔyɔɔ diɛŋtsɛ nɛɛ mli tamɔ kɔɔyɔɔ fɔŋ loo ebɔɔ lɛ hu jeee nɔ ni anyɛɔ anuɔ ehe fu loo anyɛɔ akɛsaa naa hu lɛ. No hewɔ lɛ oshara lɛ ji akɛ, wɔnyɛŋ wɔyoo ‘lasu ni gbeɔ mɔ’ nɛɛ kɛyashi be mli ni amɛaaye wɔnɔ. No hewɔ lɛ ehe miihia ni wɔhiɛ ahi wɔhe nɔ koni je nɛɛ su ni ŋmɛɔ nɔ fɛɛ nɔ gbɛ aloo toi ni egboɔ yɛ Nyɔŋmɔ jalɛ taomɔ nii ahe lɛ miigbala wɔ kɛmiibote egbele tsɔne lɛ mli. Paulo wo enanemɛi Kristofoi lɛ hewalɛ akɛ “nyɛwiea nyɛtsɔɔtsɔɔa nyɛhe gbi fɛɛ gbi . . . koni akɛ esha shishiumɔ lɛ akawaje nyɛteŋ mɔ ko.”—Hebribii 3:13; Romabii 12:2.
Mɛni Feɔ Je Nɛɛ “Kɔɔyɔɔ” Lɛ?
13. (a) Mɛni ji je nɛɛ “kɔɔyɔɔ” lɛ su ko ni esa akɛ wɔtsi wɔhe kɛjɛ he? (b) Yɛ mɛɛ gbɛ nɔ anaa faŋŋ akɛ nɛkɛ “kɔɔyɔɔ” nɛɛ esa Yehowa webii lɛ ekomɛi ahe?
13 Mɛni ji sui komɛi ni egbɛ eshwa ni wɔbaanyɛ wɔkɛ wɔhe awo mli po dani wɔyoo enɛ, yɛ bɔ ni je nɛɛ “kɔɔyɔɔ” lɛ naa mɛi anɔ hewalɛ waa lɛ hewɔ. Ekome ji ahoshwibɔɔ he nibii ni adɔɔ he kɛyaa he lɛ. Jwɛŋmɔ ni je nɛɛ hiɛ yɛ bɔlɛnamɔ kɛ jeŋba he lɛ ebɔle wɔ fɛɛ wɔhe. Mɛi pii kɛɔ akɛ: ‘Nɔ fɔŋ ko bɛ ajwamaŋbɔɔ, bii ni afɔɔ beni aboteko gbalashihilɛ mli kɛ nuu kɛ nuu ni kɛ amɛhe feɔ yakayaka nii lɛ mli. Nɔ ni afɔɔ feemɔ nɔŋŋ ji nɔ ni wɔfeɔ lɛ.’ Ani je nɛɛ “kɔɔyɔɔ” aloo emumɔ lɛ hu esa Yehowa webii ahe? Nɔ ni yɔɔ mɔbɔ ji akɛ, yɛ 1986 sɔɔmɔ afi lɛ mli lɛ, ashwie mɛi 37,426 kɛjɛ Kristofoi asafo lɛ mli, ni amɛteŋ mɛi ni fa ji mɛi ni ashwie amɛ yɛ bɔlɛnamɔ mli jeŋba shara hewɔ. Ni yibɔ nɛɛ fataaa mɛi ni fa po ni aka amɛ yɛ ahoshwibɔɔ hewɔ shi ashwieee amɛ yɛ amɛtsuitsakemɔ diɛŋtsɛ hewɔ lɛ ahe.—Abɛi 28:13.
14. Mɛni hewɔ Kristofoi komɛi kpalaŋɔ kɛjɛɔ jeŋba he, ni amɛkpoɔ mɛɛ Ŋmalɛ mli ŋaawoo?
14 Mɛni baa yɛ mɛi ni kɛ amɛhe haa bɔlɛnamɔ mli jeŋba shara lɛ gbɛfaŋ? Kɛ anɔkwalei ni kɔɔ he lɛ je kpo lɛ, yɛ bei babaoo mli lɛ anaa ni amɛje shishi amɛmiimu je nɛɛ “kɔɔyɔɔ” ni gbeɔ mɔ lɛ. Amɛŋmɛ gbɛ koni je lɛŋ sui lɛ aha amɛba tɛi ni nɔkwɔlɔ ni amɛfolɔ amɛshwie shi amɛha amɛhe lɛ ashi. Akɛ nɔkwɛmɔ nɔ lɛ, amɛbaaje shishi amɛkwɛ sinii ni yɛ afii komɛi ni eho lɛ amli lɛ amɛkwɛŋ lɛ. Nɔ ni ehiii kwraa lɛ, amɛbaakwɛ video nɔ nibii ni ehiii kwraa kɛha Kristofonyo lɛ yɛ shia. Jeŋba shara he nibii ni akɛshwɛɔ nɛkɛ lɛ teɔ shi ewoɔ Ŋmalɛ naa famɔ nɛɛ: “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ, akatsi ta tete yɛ nyɛteŋ taakɛ bɔ ni sa mɛi krɔŋkrɔŋi, kɛ hiɛgbejia nitsumɔ kɛ yakayaka wiemɔ kɛ fɛoyeli hu ni esaaa lɛ.”—Efesobii 5:3, 4.
15. Kaa ni baa ni haa akɛ bɔlɛnamɔ mli jeŋba shara loo ahoshwibɔɔ feɔ shwɛmɔ lɛ baanyɛ aje shishi fiofio yɛ mɛɛ gbɛ nɔ?
15 Eji anɔkwale akɛ ekolɛ obaakpoo jwɛŋmɔ ni mɔ ko kɛaaba akɛ oha abɔ ajwamaŋ lɛ amrɔ nɔŋŋ. Shi te ofeɔ onii ohaa tɛŋŋ yɛ be mli ni mɔ ni okɛ lɛ tsuɔ nii, aloo okɛ lɛ yaa skul lɛ aaabɔ mɔdɛŋ ni ekɛ bo abɔ aloo ebɔ mɔdɛŋ ni ekɛ bo ashwɛ babaoo ni etara ogbɔmɔtso lɛ he yɛ gbɛi komɛi anɔ aloo ni eeefɔ bo nine akɛ okɛlɛ aje kpo lɛ? Belɛ je nɛɛ “kɔɔyɔɔ” lɛ mli lasu loo lamɔ lɛ eko eba ogbɛ nɔ. Ani oŋmɛɔ gbɛ koni akɛ bo ashwɛ yɛ nɛkɛ gbɛ nɔ, ni owo enɛ feemɔ he hewalɛ? Yɛ amaniɛbɔi pii ni nine eshɛ nɔ kɛjɛ onukpai aŋɔɔ lɛ amli lɛ, anaa akɛ efɔŋ feemɔ lɛ jeɔ shishi fiofio yɛ gbɛi ni tamɔ nɛkɛ nɔ. Je lɛŋ nyo ni ji nuu baanyɛ akɛɛ Kristofonyo yoo akɛ: “Ohe efee fɛo ŋmɛnɛ waa!” Enɛ baafee nɔ ni baaŋɔɔ yoo nɛɛ naa, titri lɛ kɛ eji yoo ni ekome eyɔɔ. Nɔ ni hiɛdɔɔ yɔɔ mli babaoo hu lɛ, mɛi komɛi eteee shi amɛwooo mɔdɛŋ ni mɛi komɛi bɔɔ akɛ amɛkɛ amɛniji aaamɔmɔ amɛgbɔmɔtso lɛ hei komɛi lɛ. Amɛfeɔ amɛnii tamɔ nɔ ni amɛsumɔɔɔ, ni kɛlɛ enɛ feɔ fafaafai, ni enɛ woɔ jeŋnyo lɛ hewalɛ koni eya nɔ yɛ nɔ ni efeɔ lɛ mli. Kɛji akɛ ahoshwibɔɔ sui ni tamɔ nɛkɛ ni akɛbaa Kristofonyo yoo lɛ nɔ lɛ tee nɔ nakai, tamɔ kɔɔyɔɔ ni mli ewo muji ni tswaa kɛbaa egbɛ nɔ lɛ mɛni? Esa akɛ ekɛ shiŋŋfeemɔ akɛɛ nuu lɛ akɛ esumɔɔɔ nakai ni eŋmɛŋ gbɛ ni egbala ejwɛŋmɔ kɛba enɔ nakai. Shi kɛji akɛ etee nɔ emu kɔɔyɔɔ ni tamɔ nɛkɛ lɛ, eshitee kɛ woo lɛ baakumɔ. Abaanyɛ agbala lɛ kɛbote jeŋba shara mli, aloo ekolɛ gbalashihilɛ ni jwɛŋmɔ bɛ mli lɛ mli.—Okɛto Abɛi 5:3-14; 1 Korintobii 7:39 he.
16. Mɛni ataoɔ bɔni afee ni wɔtsɔmɔ “Kristo ŋmajee kpakpa”?
16 No hewɔ lɛ okɛ oyaiyeli akpoo je nɛɛ jeŋba shara he “kɔɔyɔɔ” ni gbeɔ mɔ lɛ. Ni oooŋmɛ gbɛ ni omu efu ni lakaa mɔ lɛ ni no aaaha okɛ ahorabɔɔ aba Yehowa gbɛi lɛ kɛ egbɛjianɔtoo lɛ nɔ lɛ, tsɔ nɔ ko ni jeɔ ŋma moŋ oha Nyɔŋmɔ kɛtsɔ osui kɛ ojeŋba ni Nyɔŋmɔ gbeyeishemɔ yɔɔ mli lɛ nɔ. Paulo wie lɛ yɛ nɛkɛ gbɛ nɔ: “Ejaakɛ Kristo ŋmajee kpakpa ji wɔ ha Nyɔŋmɔ yɛ mɛi ni ahereɔ amɛyiwala lɛ kɛ mɛi ni laajeɔ lɛ fɛɛ mli. Mɛnɛɛmɛi lɛ, wɔji gbele ŋma ni jeɔ kɛyaa gbele mli ha amɛ; shi mɛi krokomɛi lɛ, wɔji wala ŋma ni jeɔ kɛyaa wala mli ha amɛ.” (2 Korintobii 2:15, 16) Kɛji akɛ mɔ ko gbe Kristofoi agbɛ lɛ he guɔ lɛ, mɛni? (1 Petro 4:1-5) Ha je lɛ aya nɔ anyiɛ egbɛ lɛ nɔ ni ekpa eyibii gbohii lɛ yɛ shiai ni mli egbala, bii ni afɔɔ ni tsɛmɛi bɛ he, bɔlɛnamɔ mli helai tamɔ AIDS, kɛ henumɔŋ kɛ gbɔmɔtsoŋ piŋmɔi sɔrɔtoi babaoo lɛ mli. Jeee akɛ obaaye ohe kɛjɛ piŋmɔi babaoo mli kɛkɛ, shi moŋ obaana Nyɔŋmɔ hiɛ duromɔ. Agbɛnɛ, kɛ hoo lɛ, mɛi komɛi baana ojeŋba kpakpa lɛ kɛ Maŋtsɛyeli lɛ he sanekpakpa lɛ ni oshiɛɔ lɛ ni eeefee amɛ fɛo ni enɛ aaagbala amɛ kɛaaba “wala ŋma ni jeɔ kɛyaa wala mli” lɛ he.
Je Nɛɛ Hesaamɔ Sui Ahe “Kɔɔyɔɔ” Lɛ
17. Yɛ mɛɛ gbɛ nɔ atadewoo kɛ hesaamɔ baanyɛ ajie lɛ kpo akɛ je nɛɛ mumɔ lɛ ena mɔ ko nɔ hewalɛ?
17 Je nɛɛ “kɔɔyɔɔ” lɛ fa ko kɔɔ atadewoo kɛ hesaamɔ sui ahe. Mɛi pii yɛ je lɛŋ ni saa amɛhe koni amɛha amɛhe afee akɔnɔ yɛ bɔlɛnamɔ mli. Gbekɛbii po miisumɔ ni amɛsaa amɛhe ni ana amɛ akɛ onukpai, amɛmiima bɔlɛnamɔ nɔ mi. Ani nɛkɛ “kɔɔyɔɔ” loo su ni egbɛ eshwa nɛɛ esa ohe? Ani osaa ohe koni ohe afee mɛi fɛo, okɛlaka mɛi, okɛ gbala hii loo yei ajwɛŋmɔ yɛ gbɛ ni esaaa nɔ? Kɛji nakai lɛ, okɛ la miishwɛ. “Kɔɔyɔɔ” ni tamɔ nɛkɛ ni ooomu lɛ baatsi omumɔŋ hiɛshikamɔ lɛ, suɔmɔ ni oyɔɔ akɛ oooha ohe atse lɛ naa. (Mika 6:8) Mɛi ni yɔɔ je lɛ mumɔ lɛ baatsi abɛŋkɛ bo. Amɛbaatsɔ onifeemɔi anɔ amɛnu shishi akɛ ofee klalo akɛ okɛ ohe aaabɔ amɛhe yɛ ahoshwibɔɔ mli. Shi mɛni hewɔ esa akɛ oje shishi yɛ nɛkɛ gbɛ nɔ kɛtsɔ “kɔɔyɔɔ” nɛɛ ni oooŋmɛ gbɛ ni elaka bo ni ofee nɔ ni ehiii yɛ Nyɔŋmɔ hiɛ lɛ nɔ?
18. Yɛ mɛɛ gbɛ nɔ kaimɔ ni wɔɔkai yɛ be fɛɛ mli akɛ wɔdamɔ Yehowa najiaŋ lɛ baanyɛ aye abua wɔ ni wɔhala atadewoo kɛ hesaamɔ sui ni sa?
18 Kɛ wɔɔfee mɛi ni yɔɔ hiɛshikamɔ lɛ, no etsɔɔɔ akɛ wɔsaa wɔhe kɛ atadei ni ewo muji loo eyɔɔ basaa aloo wɔfee wɔhe mɛi ni anyaŋeɔ. Susumɔ gbɛ ni Yehowa Odasefoi lɛ ateŋ mɛi ni fa lɛ tsɔɔ nɔ amɛsaa amɛhe aloo amɛwoɔ amɛ atadei lɛ he. Amɛkpooɔ je lɛ sui yɛ atadewoo kɛ hesaamɔ ni ehiii kwɛmɔ lɛ, ni amɛjieɔ amɛhe kpo akɛ mɛi ni sa, amɛhaa ehiɔ amɛjwɛŋmɔ mli akɛ amɛji sɔɔlɔi ni damɔɔ Je Muu Fɛɛ Maŋtsɛ ni ji Yehowa najiaŋ. Ha je momo lɛ awie ashi amɛ hesaamɔ yɛ hiɛshikamɔ mli lɛ, amɛŋmɛŋ gbɛ ni je nɛɛ sui lɛ aha amɛba amɛ-Kristofoi lɛ ataomɔ nii lɛ ashi kɔkɔɔkɔ. Paulo ŋma akɛ: “No hewɔ lɛ miikɛɛ ni miima nɔ mi yɛ Nuŋtsɔ lɛ mli akɛ nyɛkanyiɛ tamɔ bɔ ni jeŋmajiaŋbii krokomɛi lɛ hu nyiɛɔ yɛ amɛyaka jwɛŋmɔ lɛ mli lɛ dɔŋŋ . . . Nɔ ko nɔ ko efeee amɛ hiɛgbele dɔŋŋ hewɔ lɛ amɛŋɔ amɛhe amɛha nyenyeŋtswibɔɔ, ni amɛkɛ hiɛjoomɔ tsuɔ nyaŋemɔ nii fɛɛ kwa.” (Efesobii 4:17-19) Kristofonyo ni eda yɛ mumɔŋ lɛ baasaa ehe yɛ hiɛshikamɔ mli, enyiɛŋ tamɔ bɔ ni jeŋmajiaŋbii lɛ nyiɛɔ lɛ.—1 Timoteo 2:9, 10.
19. Yɛ be mli ni wɔsusu je nɛɛ “kɔɔyɔɔ” lɛ fai titrii enyɔ lɛ ahe lɛ, mɛni ji nɔ ni ebaka shi faŋŋ yɛ oshara ni yɔɔ mu ni wɔɔmu enɛ lɛ he lɛ?
19 Kɛbashi amrɔ nɛɛ, nɔ ni wɔsusu he ji je nɛɛ “kɔɔyɔɔ” lɛ sui sɔrɔtoi enyɔ pɛ, shi wɔtsɔ hiɛ wɔna momo akɛ nɛkɛ “kɔɔyɔɔ” nɛɛ yeɔ wɔmumɔŋ hewalɛnamɔ awui waa. Wɔbaasusu “kɔɔyɔɔ” ni gbeɔ mɔ ni Abonsam kɛ egbɛjianɔtoo lɛ haa etswaa kɛbaa Kristofoi anɔ, kɛ hiɛnɔkamɔ akɛ amɛbaakpɛlɛ nɔ lɛ fai krokomɛi ni eshwɛ lɛ ahe yɛ nikasemɔ ni nyiɛ sɛɛ lɛ mli. Kwɛ bɔ ni ehe hiaa akɛ wɔɔkwa “kɔɔyɔɔ” ni tamɔ nɛkɛ, ejaakɛ je nɛɛ mumɔ lɛ ni wɔɔhe wɔwo wɔmli lɛ tamɔ ni wɔmiimu gbele lamɔi!a
[Shishigbɛ niŋmai]
a Ajie kɛjɛ September 15, 1987 The Watchtower lɛ mli.
Te Obaaha Hetoo Oha Tɛŋŋ?
◻ Mɛni ji je nɛɛ “kɔɔyɔɔ” Iɛ, ni namɔ yeɔ nɔ?
◻ Mɛɛ “hewalɛ” je nɛɛ “kɔɔyɔɔ” lɛ yɔɔ yɛ gbɔmɛi anɔ Iɛ?
◻ Mɛni hewɔ abaanyɛ akɛɛ akɛ Kristofoi yɛ “ashɛreee zigarɛt he” lɛ?
◻ Te aaafee tɛŋŋ ni je nɛɛ “kɔɔyɔɔ” Iɛ aaana Yehowa webii anɔ hewalɛ yɛ ahoshwibɔɔ he nibii ni akɛshwɛɔ Iɛ gbɛfaŋ?
◻ Yɛ mɛɛ gbɛ nɔ hiɛshikamɔ baanyɛ aye abua wɔ ni wɔkwa je nɛɛ “kɔɔyɔɔ” lɛ ni aaana wɔnɔ hewalɛ yɛ hesaamɔ kɛ atadewoo gbɛfaŋ Iɛ?
[Mfoniri ni yɔɔ baafa 8]
Ani ookpoo je nɛɛ “kɔɔyɔɔ” ni gbeɔ mɔ Iɛ mumɔ Iɛ?
[Mfoniri ni yɔɔ baafa 11]
Mɛni ofeɔ kɛ je nɛɛ “kɔɔyɔɔ” Iɛ tswa kɛba ogbɛ nɔ?