Hemɔkɛyeli Tsamɔ—Ani Ejɛ Nyɔŋmɔ?
NUU lɛ he eye aaahu afi 38. Yesu bi lɛ akɛ: “Oosumɔ akɛ ohe awao lo?” Kɛ oji nuu nɛɛ ani okɛ oyaiyeli ekɛŋ akɛ hɛɛ? Yesu kɛɛ lɛ akɛ: “Tee shi, wo osa lɛ, ni onyiɛ!” Mɛni jɛ nakai wiemɔi lɛ amli ba? “Ni amrɔ lɛ gbɔmɔ lɛ he wa lɛ, ni ewo esaa lɛ, ni enyiɛ.”—Yohane 5:5-9.
Nɛkɛ ŋwɛi tsamɔ nɛɛ ji naakpɛɛ nibii pii ni Yesu fee be mli ni ehiɛ eshikpɔŋ nɔ sɔɔmɔ nitsumɔ lɛ mli lɛ ateŋ ekome. (Mateo 11:4, 5) Hemɔkɛyeli tsalɔi kɛɔ akɛ Nyɔŋmɔ miifee tsamɔi ni tamɔ nɛkɛ ŋmɛnɛ, ni mɛi akpei abɔ ni kɛɔ akɛ atsa amɛ lɛ ni efi amɛsɛɛ lɛ yeɔ enɛ he odase.
Sɔrɔtofeemɔi Ni Hiɛdɔɔ Yɔɔ Mli
Biblia lɛ kasemɔ jieɔ sɔrɔtofeemɔi babaoo ni hiɛdɔɔ yɔɔ mli ni yɔɔ tsamɔi ni abɔ he amaniɛ yɛ Biblia lɛ mli lɛ kɛ nɔ ni abɔɔ he amaniɛ akɛ hemɔkɛyeli tsalɔi feɔ ŋmɛnɛ lɛ mli. Akɛ nɔkwɛmɔ nɔ lɛ, Yesu kɛ ekaselɔi lɛ heee shika ko kɛjɛɛɛ mɛi ni amɛtsaa amɛ lɛ adɛ. Yesu tsɔɔ akɛ,“Yaka nyɛna, yaka nyɛŋɔ-haa!” (Mateo 10:8) No hewɔ lɛ, amɛnyiɛɔ nɔkwɛmɔ nɔ ni Elisha, ni kpoo akɛ eeehe nikee nii kɛaajɛ nuu ko ni atsɛɔ lɛ Naeman ni Elisha tsa ekpiti lɛ ŋɔɔ lɛ sɛɛ. (2 Maŋtsɛmɛi 5:1,14-16) No hewɔ lɛ, kɛ hemɔkɛyeli tsalɔi he shika kɛjɛ amɛtsamɔi lɛ ahewɔ lɛ, amɛkuɔ nɛkɛ Ŋmalɛ mli nɔkwɛmɔ nii nɛɛ mli.
Nɔ ni sa kadimɔ hu ji akɛ, helai ni atsa yɛ Biblia bei lɛ amli lɛ fɛɛ ji nɔ ni afee ni ba amrɔ nɔŋŋ aloo yɛ be kukuo pɛ mli. Bɔfo Petro na nuu ko ni “ji obubuafo kɛjɛ enyɛ musuŋ,” ni ekɛɛ nuu lɛ akɛ: “Yesu Kristo, Nazaretnyo lɛ gbɛi amli lɛ, tee shi ni onyiɛ!” Ni sane lɛ tee nɔ akɛ: “Ni amrɔ lɛ nɔŋŋ enaji kɛ etalɔi lɛ amli walɛ; ni ehuru edamɔ shi ni ebɔi nyiɛmɔ.” (Bɔfoi lɛ Asaji 3:1-8) Bo diɛŋtsɛ kanemɔ nɔkwɛmɔ nii krokomɛi yɛ Bɔfoi lɛ Asaji 5:15, 16 kɛ 14:8-10 oha bo diɛŋtsɛ ohe.
Shi ŋmɛnɛŋmɛnɛ beaŋ hemɔkɛyeli tsamɔi lɛ heɔ gbii, otsii, aloo nyɔji po dani enyɛɔ etsuɔ nii! Nɔ ni sa kadimɔ hu ji anɔkwale ni eji akɛ hemɔkɛyeli tsalɔi gbalaa amɛjwɛŋmɔ kɛyaa gbɔmɔtso lɛ he nii ni nyɛɛɛ atsu enitsumɔi dɔŋŋ lɛ anɔ, tamɔ shwilamɔ, kuumɔ aloo toimuu—helai ni yɛ bei komɛi amli lɛ, edamɔ jwɛŋmɔ lɛ henilee nɔ. Datrɛfonyo ko ni ji Paul Brand kɛɛ: “Kɛ gbɔmɔtso lɛ he nii ko he eba sane—naji ni bɛ, hiŋmɛi loo yitsɔi nɛkɛ lɛ—naakpɛɛ nibii komɛi nyɛɛɛ atsa.” Shi Yesu tsa “hela fɛɛ hela kɛ hejaramɔ fɛɛ hejaramɔ,” ni helai ni saa gbɔmɔtso lɛ he nii sɔrɔtoi ahe lɛ hu fata he, tamɔ nine ni egbo nɛkɛ.—Mateo 9:35; Marko 3:3-5.
‘Obɛ Hemɔkɛyeli!’
Nɔ ni yɔɔ mɔbɔ ji akɛ, mɛi pii ni he yeɔ waa yaa ‘tsamɔi ahe tafaa’ nɛɛ ashishi ni amɛkuɔ amɛsɛɛ amɛbaa shia ni amɛhelai lɛ amli ewo wu. Hemɔkɛyeli tsalɔi tsɔɔ mli akɛ helai ni amɛnyɛɛɛ amɛtsa nɛɛ jɛ ‘Hemɔkɛyeli ni amɛbɛ!’ Shi enɛ tamɔ shishiumɔ. Taakɛ Dr. William Nolen kɛɛ lɛ: “Hemɔkɛyeli tsalɔ lɛ ekpɛlɛɛɛ gbɛnaa nii ni bakaa enɔ kɛ etsamɔ lɛ yeee omanye lɛ nɔ, taakɛ tsofatsɛmɛi diɛŋtsɛ feɔ lɛ. Masumɔ ni magba mli makɛɛ akɛ, masumɔ ni majie minaa nɛkɛ kɛ mikɛ helatsɛ ni minyɛɛɛ matsa lɛ lɛ kpe.”
Nyɔŋmɔ gbalɔi lɛ, loo Yesu, loo Yesu kaselɔi lɛ ejieee amɛnaa akɛ mɔ ni he yeɔ ni amɛnyɛɛɛ amɛtsa lɛ lɛ bɛ hemɔkɛyeli. Eji anɔkwale akɛ hemɔkɛyeli ni mɛi pii bɛ hewɔ lɛ, mɛi ni baa koni atsa amɛ lɛ ayi faaa. Shi yɛ mɛi ni ba lɛ agbɛfaŋ lɛ, atsa amɛ kwraa kɛmɔ shi!—Marko 6:5, 6.
Yɛ anɔkwale mli lɛ, atsa gbɔmɛi po ni bɛ hemɔkɛyeli. Naeman, ni ji Aram asraafoiatsɛ lɛ nɔ lɛ ji nɔkwɛmɔ nɔ, ejaakɛ eji mɔ ni heee yeee akɛ abaanyɛ atsa ekpiti lɛ yɛ gbɛ ni gbalɔ Elisha fa lɛ lɛ nɔ. Etsamɔ lɛ sɛɛ dani ekpɛlɛ nɔ akɛ: “Naa, kpaako dani mina mile akɛ Nyɔŋmɔ ko Nyɔŋmɔ bɛ shikpɔŋ nɛɛ nɔ fɛɛ, akɛ ja Israel kɛkɛ. (2 Maŋtsɛmɛi 5:11-13, 15) No hewɔ lɛ hemɔkɛyeli tsalɔi anaajiemɔ fɛlɛfɛlɛ lɛ gbeɔ shi kwraa.
Tsamɔ—Nikee Nii Ni Eho Etee
Shi ani ejeee anɔkwale akɛ naakpɛɛ nikee nii ni ji helatsamɔ yɛ mra be mli Kristofoi lɛ ateŋ? (1 Korintobii 12:9) Hɛɛ, yiŋtoo komɛi yɛ ni no hewɔ akɛ nakai naakpɛɛ nibii lɛ ha yɛ no be lɛŋ lɛ. Heloo naa Israel maŋ lɛ hi shi afii akpe kɛ ohai enumɔ akɛ Nyɔŋmɔ maŋ ni ehala; shi akpoo Israel yɛ wɔ-Ŋmɛnɛŋmɛnɛ Beaŋ klɛŋklɛŋ afi oha lɛ mli yɛ hemɔkɛyeli ni ebɛ hewɔ ni akɛ Kristofoi asafo hee lɛ to enajiaŋ. Yelikɛbuamɔ ni ekaaa ni baawaje amɛhemɔkɛyeli he miihia nakai mra be mli Kristofoi lɛ koni aha je lɛ ayoo akɛ Yehowa Nyɔŋmɔ ji mɔ ni fiɔ amɛsɛɛ.
No hewɔ lɛ, naakpɛɛ nikee nii, ni helatsamɔ hu fata he ji nɔ ni akɛha Kristofoi asafo lɛ ni kpaako eje shishi lɛ. Enɛɛmɛi batsɔmɔ “okadi” kɛha mɛi ni heee yeee lɛ akɛ nɔ ni abaadamɔ nɔ akɛtswa mɛi ni heɔ yeɔ lɛ ahemɔkɛyeli (1 Korintobii 14:22) Shi, yɛ nɔ ni miihe ashɛ afi akpei enyɔ sɛɛ lɛ, Kristo jamɔ jeee abifao dɔŋŋ. (Okɛto 1 Korintobii 13:9-13 he.) Agbe Biblia lɛ naa jeeŋmɔ ni aja akpekpei abɔ aha. No hewɔ lɛ anɔkwale Kristofoi ni yɔɔ ŋmɛnɛ lɛ baanyɛ agbala mɛi ni heee yeee lɛ ajwɛŋmɔi kɛba emli baafai lɛ anɔ ni amɛkɛfi nɔ ni amɛtsɔɔ lɛ sɛɛ. Naakpɛɛ nifeemɔi ahe ehiaaa dɔŋŋ.
Paulo tee nɔ etsɔɔ akɛ nakai nikee nii ni fe adesai ahewalɛ lɛ “sɛɛ baafo.” (1 Korintobii 13:8) Akɛ nikee nii nɛɛ haa tɛɛ aloo yɛ be mli ni Kristo Yesu bɔfoi lɛ diɛŋtsɛ yɔɔ jɛmɛ lɛ nɔ. (Bɔfoi lɛ Asaji 8:18-20; 10:44-46; 19:6) Yɛ bɔfoi lɛ agbele sɛɛ lɛ, nakai naakpɛɛ nikee nii lɛ sɛɛ fo.
The Cyclopedia of Biblical, Theological, and Ecclesiastical Literature ni McClintock kɛ Strong fee lɛ (Kpo VI, baafa 320) kɛɔ akɛ “eji wiemɔ ni anyɛɛɛ aje he ŋwane akɛ yɛ bɔfoi lɛ agbele sɛɛ klɛŋklɛŋ afi oha lɛ mli lɛ wɔnuuu mra be mli Kristofoi lɛ anaakpɛɛ nifeemɔi lɛ ahe dɔŋŋ.”
Nɔ Hewɔ Ni Esa Akɛ Wɔkwɛ Jogbaŋŋ
Yesu Kristo bɔ kɔkɔ akɛ be baashɛ ni mɛi pii baakɛɛ lɛ akɛ: “Nuŋtsɔ, Nuŋtsɔ, ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛi nibii pii yɛ lo?” Ni Yesu baakɛɛ amɛ akɛ: “mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!” (Mateo 7:22, 23) Belɛ mɛni ji nɔ ni kɛ omanye ni akɛɛ amɛyeɔ yɛ “hewalɛ nibii pii” ni amɛnyɛɔ amɛfeɔ lɛ baa, kɛ ejeee Nyɔŋmɔ mumɔ lɛ?
Ekomɛi yɛ ni shishiumɔ diɛŋtsɛ ji nɔ ni baa enɛ mli. Akɛ nɔkwɛmɔ nɔ lɛ, The Herald ni ji Zimbabwe adafitswaa wolo ko bɔ amaniɛ akɛ hemɔkɛyeli tsalɔi ko ni ehe gbɛi tswa adafi babaoo akɛ etsa gbɔmɛi etɛ ko helai. Adafitswaa wolo lɛ kpa enɛ he mama akɛ eji shishiumɔ: “Gbekɛbii lɛ ateŋ mɔ kome nuuu nii ni enyɛɛɛ ewie lolo hu; gbekɛbii nɛɛ ateŋ mɔ kroko lɛ hu ka he eji mumui ni nuuu nii; ni yoo kome lɛ hu ni eji toimulɔ lɛ, nuuu nii lolo.”
Yɛ bei komɛi amli lɛ, hemɔkɛyeli tsamɔ bafeɔ tamɔ nɔ ko ni haa helatsɛ lɛ he jɔɔ lɛ kɛkɛ yɛ be mli ni etsaaa lɛ. Yɛ ekrokomɛi amli lɛ—titri yɛ he ni etsɛɔ dani tsamɔ lɛ diɛŋtsɛ jeɔ kpo lɛ—ebafeɔ tamɔ nɔ ni gbɔmɔtso lɛ diɛŋtsɛ miitsa ehe. Yɛ wolo ni ji Science and the Paranormal lɛ mli lɛ, Dr. William Nolen kɛɛ akɛ “aaafee helatsɛmɛi ni ba [tsofatsɛ diɛŋtsɛ] ŋɔɔ lɛ ateŋ mɛi oha fɛɛ mli 80 helai lɛ nyɛɔ etsaa ehe—ni ji akɛ helai komɛi ni amɛhe baanyɛ awa amɛ amrɔ nɔŋŋ kɛjɛ mli.” No hewɔ lɛ, beni be shwieɔ mli lɛ, hemɔkɛyeli tsalɔ lɛ baanyɛ akɛɛ akɛ lɛ ji mɔ ni ha tsamɔ lɛ ba ni ekɛ yijiemɔ lɛ aha lɛ diɛŋtsɛ ehe.
Yɛ naagbee lɛ, Biblia lɛ bɔɔ kɔkɔ akɛ “Satan diɛŋtsɛ yaa nɔ etsakeɔ ehe etsɔɔ la bɔfo” bɔni afee ni ekɛshishiu mɛi. (2 Korintobii 11:14) Yɛ 2 Tesalonikabii 2:9, 10 lɛ, Paulo tee nɔ etsɔɔ mli lolo akɛ: “Mɔ hu ni ebaa lɛ mli lɛ, eeeba kɛ Satan nitsumɔ ni mli wa yɛ amale hewɔ lɛ kɛ okadii kɛ naakpɛɛ nii fɛɛ mli. Kɛ nii ni ejaaa gbɛ fɛɛ ni akɛshishiuɔ mɛi ni laajeɔ lɛ.” No hewɔ lɛ, kwɛmɔ jogbaŋŋ! Yɛ bei babaoo mli lɛ, hemɔkɛyeli tsamɔi lɛ kɛ daimonioi ahewalɛ tsuɔ nii! Paulo bɔ kɔkɔ akɛ: “Misumɔɔɔ akɛ nyɛkɛ daimonioi bɔɔ naanyo. Nyɛnyɛŋ [Yehowa] kpulu lɛ kɛ daimonioi akpulu lɛ nyɛnu shikome.”—1 Korintobii 10:20, 21.
Beni Kristofonyo Ko He Yeɔ Lɛ
Eji anɔkwale akɛ, kɛ mɔ ko he miiye lɛ, naakpɛɛ tsamɔ baanyɛ afee nɔ ni eeesumɔ. Shi kadimɔ akɛ bɔfo Paulo naanyo nitsulɔ Epafrodito he baye ni shwɛ fioo ni kulɛ egbo. (Filipibii 2:25-27) Paulo naanyo ni bɛŋkɛ lɛ kpaakpa Timoteo hu “he yeɔ kpitiokpitio.” (1 Timoteo 5:23) Ni kɛlɛ, Paulo tsɔɔɔ naakpɛɛ gbɛ nɔ etsaaa nɛkɛ hii enyɔ nɛɛ ateŋ mɔ ko hela. Ni beni tsofafeemɔ he bahia Paulo diɛŋtsɛ lɛ, eka shi faŋŋ akɛ eha Luka, “tsofatsɛ ni asumɔɔ lɛ” ni kɛ lɛ faa gbɛ lɛ ye bua lɛ.—Kolosebii 4:14.
Nakai nɔŋŋ hu ŋmɛnɛ, Kristofonyo ni he yeɔ lɛ baanyɛ atao tsofatsɛ ni he esa, ni ekwa ehe ni ekɛaawo tsamɔi ni daimonioi kɛbaa loo shishiumɔ ni egbɛ eshwa shikpɔji pii anɔ ŋmɛnɛ lɛ mli. Ebaanyɛ esɔle hu, jeee ni atsa ehela lɛ yɛ naakpɛɛ gbɛ nɔ, shi moŋ, kɛha nilee ni akɛtsu hela lɛ he nii. (Yakobo 1:5) Ebaanyɛ ekpa fai hu koni Yehowa “atsɔmɔ lɛ yɛ hela saa nɔ.”—Lala 41:4.
Abaanyɛ akpɛlɛ nɔ moŋ akɛ ejeɔ mɔ nijiaŋ wui waa kɛ tsofafeemɔ mli nilee nyɛɛɛ atsa hela pɔtɛɛ ko. Ni kɛlɛ, kɛ Kristofonyo ko he miiye lɛ, esa akɛ ebɔ mɔdɛŋ ni “eyoo nii ni hi titri lɛ,” ni ekaŋmɛ gbɛ ni egbɔmɔtsoŋ hewalɛnamɔ miiha emumɔŋ nibii anɔ kwraa. (Filipibii 1:10) Ebaanyɛ eha hiɛnɔkamɔ yɛ Nyɔŋmɔ Maŋtsɛyeli lɛ shishi, nɔ mli ni ‘mɔ ko ekɛŋ akɛ egbɔjɔ’ lɛ awaje lɛ.—Yesaia 33:24; 65:17-19.
Eji anɔkwale akɛ jalɛ jeŋ hee lɛ mli hiɛnɔkamɔ lɛ yɛ sɛɛnamɔ kwraa fe hemɔkɛyeli tsalɔi ashiwoi ni nɔ ko nɔ ko bɛ mli lɛ. Susumɔ Peter, shwilafo ko ni yɔɔ Akumadan, yɛ Ghana lɛ he. Ekɛ afii 26 kpa mumɔŋ sɔlemɔi loo hemɔkɛyeli tsamɔi asɔlemɔi sɔrɔtoi amli kɛ hiɛnɔkamɔ akɛ ebaana nii. Shi hemɔkɛyeli tsalɔ ko nyɛɛɛ agbele ehiŋmɛi. Kɛkɛ ni yɛ be mli ni eyaa hemɔkɛyeli tsamɔ sɔlemɔ nɛɛ lolo lɛ ekɛ Yehowa Odasefoi kpe.
Odasefoi lɛ jɛ Biblia lɛ mli amɛtsɔɔ mli amɛha lɛ akɛ abaatsa helai sɔrɔtoi fɛɛ yɛ Nyɔŋmɔ Maŋtsɛyeli lɛ shishi. Enɛ gbele Peter shishinumɔ hiŋmɛi. Akɛni ehiɛ esɔ Biblia mli anɔkwale ni yɔɔ naakpɛɛ lɛ hewɔ lɛ, ebatsɔ Nyɔŋmɔ Maŋtsɛyeli lɛ he be fɛɛ shiɛlɔ ni esɔmɔ nakai fe afii etɛ! Eeekpa be mli ni “aaagbele shwilafoi ahiŋmɛi, ni aaagbele toimulɔi atoii” diɛŋtsɛ lɛ gbɛ.—Yesaia 35:5, 6.
Yɛ Nyɔŋmɔ Wiemɔ lɛ yelikɛbuamɔ naa lɛ, akpeiakpei abɔ hu eye amɛhe kɛjɛ hemɔkɛyeli tsalɔi amli hekɛnɔfɔɔ ni ejaaa lɛ mli.
[Mfoniri ni yɔɔ baafa 5]
Hemɔkɛyeli tsalɔi nyɛɛɛ atsa helai ni saa gbɔmɔtso he nii ahe lɛ
[Mfonirii ni yɔɔ baafa 7]
Kristofonyo ni he yeɔ lɛ sɔleɔ ebiɔ hewalɛ koni enyɛ emɔ mli
Agbɛnɛ ekwɛɔ jeŋ hee Iɛ gbɛ ni mɔ ko ekɛŋ akɛ ‘mihe miiye’ lɛ