Tsɔsemɔ Ni Baanyɛ Awo Hejɔlɛ Yibii
“Shi tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ ni, shi dɔlɛ nɔ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.”—HEBRIBII 12:11.
1, 2. (a) Taakɛ Hebribii 12:9-11 tsɔɔ lɛ, mɛni ji nɔ ni Nyɔŋmɔ jɛɔ esuɔmɔ mli ekɛhaa? (b) Mɛni ji tsɔsemɔ he nɔkwɛmɔ nɔ kome ko, ni mɛni baanyɛ ajɛ enɛ mli aba?
SUSUMƆ ogbekɛbiiashi gbii lɛ ahe. Ani obaanyɛ okai bɔ ni ofɔlɔi tsɔse bo lɛ? Wɔteŋ mɛi pii kaiɔ. Bɔfo Paulo kɛ enɛ tsu nii akɛ nɔkwɛmɔ nɔ yɛ be mli ni ewieɔ tsɔsemɔ ni jɛ Nyɔŋmɔ ŋɔɔ lɛ he lɛ, taakɛ wɔkaneɔ yɛ Hebribii 12:9-11 lɛ.
2 Nyɔŋmɔ tsɔsemɔ akɛ tsɛ, ni baanyɛ asa wɔmumɔŋ shihilɛ he lɛ baanyɛ aba yɛ gbɛi sɔrɔtoi anɔ. Ekome ji gbɛjianɔ ni eto koni ashwie gbɔmɛi ni sumɔɔɔ akɛ amɛhiɔ shi yɛ Nyɔŋmɔ tɛi ni efolɔ eshwie shi lɛ anaa, aloo ni amɛbuuu akɛ amɛaafee nakai lɛ kɛjɛ Kristofoi asafo lɛ mli lɛ. No hewɔ lɛ, kɛ akã mɔ ko waa nakai lɛ, eeenyɛ etsake etsui ni ekpale kɛba. Yɛ nakai feemɔ mli lɛ, etsɔseɔ anɔkwafoi lɛ asafo lɛ hu kɛ shishinumɔ akɛ amɛkaseɔ bɔ ni ehe hiaa akɛ amɛaahi shi yɛ tɛi ni Nyɔŋmɔ efolɔ eshwie shi ni nɔkwɔlɔ lɛ anaa lɛ.—1 Timoteo 1:20.
3. Mɛni mɛi feɔ yɛ shwiemɔ ni ashwieɔ mɔ ko kɛjɛɔ asafo lɛ mli lɛ he?
3 Shi mɔ ko baawie akɛ, ‘Ani ejeee nɔ ni naa wa tsɔ akɛ aaashwie mɔ ko ni agbɛnɛ akpoo akɛ akɛ mɔ ni ashwie lɛ lɛ aaawie?’ Jwɛŋmɔ ni tamɔ nɛkɛ je kpo yɛ saneyeli he ko sane mli nyɛsɛɛ nɛɛ ni kɔɔ yoo ko ni efɔlɔi ni ji Odasefoi lɛ tsɔse lɛlɛ he. Ashwie efɔlɔi lɛ kɛjɛ asafo lɛ mli. Shi ashwieee nɛkɛ obalayoo nɛɛ kɛjɛɛɛ mli, shi ejɛ esuɔmɔ mli egbala ehe shi kɛjɛ asafo lɛ he kɛtsɔ woloŋmaa nɔ akɛ ekɛ asafo lɛ ebɔɔɔ dɔŋŋ. No hewɔ lɛ, abɔ asafo lɛ amaniɛ kɛkɛ akɛ ejeee Yehowa Odasefoi lɛ ateŋ mɔ kome dɔŋŋ. Etsi ehe kɛtee, shi afii komɛi asɛɛ lɛ, eku esɛɛ ni ena akɛ asafo lɛ mli Odasefoi lɛ kɛ lɛ ewieee. No hewɔ lɛ, ekɛ sane lɛ tee saneyeli he. Mɛni jɛ mli ba, ni te enɛ baasa ohe aha tɛŋŋ? Bɔni afee ni onu sane lɛ shishi jogbaŋŋ lɛ, nyɛhaa wɔkwɛa nɔ ni Biblia lɛ kɛɔ yɛ shwiemɔ ni ashwieɔ mɔ ko kɛjɛɔ asafo lɛ mli lɛ he sane nɛɛ he.
Mɛni Hewɔ Shidaamɔ Ni Yɔɔ Shiŋŋ Nɛkɛ?
4. Mɛni baa mɛi komɛi anɔ yɛ asafo lɛ mli yɛ be kɛ bei amli? (Galatabii 6:1; Yuda 23)
4 Anɔkwale Kristofoi babaoo fiɔ Nyɔŋmɔ kɛ jalɛ mlai lɛ asɛɛ yɛ anɔkwayeli mli. (1 Tesalonikabii 1:2-7; Hebribii 6:10) Yɛ be kɛ bei amli lɛ, mɔ ko duɔ gbɛ kɛjɛɔ anɔkwale gbɛ lɛ nɔ. Akɛ nɔkwɛmɔ nɔ lɛ, yɛ yelikɛbuamɔ ni Kristofoi onukpai kɛbaaha lɛ lɛ fɛɛ sɛɛ lɛ, ebaanyɛ eku Nyɔŋmɔ mlai amli ni etsakeee etsui. Aloo ebaanyɛ ekpoo hemɔkɛyeli kɛtsɔ apasa tsɔɔmɔi aloo kɛtsɔ bɔ ni eeekɛɛ akɛ ekɛ asafo lɛ ebɔɔɔ dɔŋŋ nɔ. Kɛkɛ lɛ mɛni abaafee? Nɛkɛ nibii nɛɛ ba yɛ be mli ni bɔfoi lɛ po yɔɔ wala mli lɛ; no hewɔ lɛ, nyɛhaa wɔkwɛa nɔ ni amɛŋma yɛ enɛ he.
5, 6. (a) Mɛɛ ŋaawoo ni nilee yɔɔ mli wɔyɔɔ yɛ be mli ni wɔtsuɔ mɛi ni efee esha ni hiɛdɔɔ yɔɔ mli ni amɛtsakeee amɛtsui lɛ ahe nii lɛ? (Mateo 18:17) (b) Mɛɛ sanebimɔi wɔkɛkpeɔ?
5 Beni nuu ko ni yɔɔ Korinto asafo lɛ mli lɛ ba jeŋba gbonyo ko ni etsakeee etsui lɛ, Paulo kɛɛ asafo lɛ akɛ: “Kɛji mɔ ko ni atsɛɔ lɛ nyɛmi lɛ ji ajwamaŋbɔlɔ loo hiɛjoolɔ loo wɔŋjalɔ loo mɔjɛlɔ loo daatɔɔlɔ loo amimyelɔ lɛ, lɛ lɛ nyɛkɛ lɛ akayea nii tete.” (1 Korintobii 6:11-13) Nakai nɔŋŋ hu ebaaba mɛi ni kwaa hemɔkɛyeli lɛ anɔ, tamɔ Himeneo: “Gbɔmɔ ko ni kɛ mligbalamɔ baa lɛ, kɛ obɔ lɛ kɔkɔ shikome kɛ shii enyɔ lɛ, kwa lɛ; ejaakɛ ole akɛ mɔ ko ni yɔɔ nakai lɛ, eje eŋɛlɛ nɔ. ni efeɔ esha.” (Tito 3:10, 11; 1 Timoteo 1:19, 20) Nɛkɛ kpoomɔ nɛɛ baafee nɔ ni sa hu, kɛha mɔ fɛɛ mɔ ni kpooɔ asafo lɛ: “Wɔteŋ amɛjɛ amɛtee, shi kɛlɛ amɛjeee wɔteŋ mɛi komɛi, ejaakɛ wɔteŋ mɛi komɛi ji amɛ kulɛ amɛkɛ wɔ hi shi; shi amɛtee bɔni afee ni amɛjie amɛhe shi akɛ jeee amɛ fɛɛ amɛji wɔteŋ mɛi komɛi.”—1 Yohane 2:18, 19.
6 Hiɛnɔkamɔ yɛ akɛ mɔ ni tamɔ nɛkɛ baatsake koni aku sɛɛ ahe lɛ ekoŋŋ. (Bɔfoi lɛ Asaji 3:19) Shi dani enɛ aaaba lɛ, ani Kristofoi baanyɛ ni amɛkɛ lɛ abɔ yɛ gbɛ fioo ko nɔ, aloo ehe miihia ni akpoo lɛ kwraa? Kɛji nakai lɛ, mɛni hewɔ?
Afo lɛ Ashɛ Afɔ Kwraa?
7. Esa akɛ wɔjeŋba afee sɔrɔto yɛ eshafeelɔi akui enyɔ komɛi ahe yɛ mɛɛ gbɛ nɔ?
7 Kristofoi tsiii amɛhe kɛjɛɛɛ gbɔmɛi ahe. Wɔkɛ wɔ akutseiaŋbii nanemɛi nitsulɔi, nanemɛi skulbii kɛ mɛi krokomɛi bɔɔ, ni wɔyeɔ amɛ odase kɛji akɛ amɛteŋ mɛi komɛi ji ‘ajwamaŋbɔlɔi, hiɛjoolɔi, shishiulɔi, loo wɔŋjalɔi.’ Paulo ŋma akɛ wɔnyɛŋ wɔkwa amɛ kwraa, ‘kɛ jeee nakai lɛ, esa akɛ wɔje kpo kɛjɛ je lɛŋ hu.’ Shi etsɔɔ mli akɛ, eyɛ sɔrɔto yɛ mɔ ni ji “nyɛmi” ni baahi shi nakai lɛ he: “Kɛji mɔ ko ni atsɛɔ lɛ nyɛmi [ni etsɔ ehe kɛtee gbɛi ni tamɔ nɛkɛ nɔ] lɛ, nyɛkɛ lɛ akayea nii tete.”—1 Korintobii 5:9-11; Marko 2:13-17.
8. Mɛɛ ŋaawoo bɔfo Yohane kɛha yɛ kwamɔ loo kpoomɔ ni wɔɔkpoo mɛikrokomɛi lɛ he?
8 Wɔnaa ŋaawoo kroko ni ma bɔ ni esa akɛ Kristofoi akwa gbɔmɛi ni tamɔ nɛkɛ kwraa lɛ nɔ mi yɛ bɔfo Yohane niŋmai lɛ amli: “Mɔ fɛɛ mɔ ni tɔɔ ni ehiii Kristo tsɔɔmɔ lɛ mli lɛ, ebɛ Nyɔŋmɔ . . . Kɛ mɔ ko ba nyɛŋɔɔ ni ehiɛɛɛ nɛkɛ tsɔɔmɔ nɛɛ lɛ, nyɛkaherea lɛ kɛbaa nyɛwe, ni nyɛkafalaa lɛ tete; ejaakɛ mɔ ni falaa lɛ lɛ, [Hela, khaiʹro] ekɛ lɛ feɔ ekome yɛ enitsumɔi fɔji lɛ amli.”a—2 Yohane 9-11.
9, 10. (a) Mɛni baa nɔtɔlɔi ni tsakeee amɛtsui lɛ anɔ yɛ Israel, ni mɛni hewɔ? (b) Esa akɛ wɔnu gbɛjianɔtoo ni yɔɔ ŋmɛnɛ ni akɛtsuɔ mɛi ni ashwieɔ amɛ kɛjɛɔ asafo lɛ mli akɛni amɛtsakeee amɛtsui lɛ he wɔha tɛŋŋ? (2 Petro 2:20-22)
9 Mɛni hewɔ shidaamɔ ni yɔɔ shiŋŋ nɛkɛ sa kɛha ŋmɛnɛ po lɛ? Ojogbaŋŋ, susumɔ famɔ ni mli wa akɛ afo mɔ ashɛ afɔ ni yɔɔ Nyɔŋmɔ Mla ni ekɛha Israel lɛ mli lɛ he. Agbeɔ mɛi ni jɛɔ amɛsuɔmɔ mli amɛfeɔ esha ni mli wa lɛ yɛ saji sɔrɔtoi amli. (3 Mose 20:10; 4 Mose 15:30, 31) Kɛ eba lɛ nɛkɛ lɛ, mɛi krokomɛi, ni ji wekumɛi po nyɛŋ ni amɛkɛ mla mlikulɔ ni egbo nɛɛ awie dɔŋŋ. (3 Mose 19:1-4; 5 Mose 13:1-5; 17:1-7) Eyɛ mli akɛ amɛye anɔkwale moŋ, shi Israelbii ni hi shi yɛ nakai blema bei Iɛ amli lɛ ji adesai kɛ henumɔi ni tamɔ wɔ nɔ lɛ nɔŋŋ, amɛle akɛ Nyɔŋmɔ ja ni eyɛ suɔmɔ ni akɛ e-Mlai lɛ buɔ amɛjeŋba kɛ mumɔŋ hetsemɔ he. No hewɔ lɛ amɛbaanyɛ amɛkpɛlɛ nɔ akɛ egbɛjianɔtoo akɛ afo efɔŋfeelɔi ashɛ afɔ lɛ ja kɛjɛ shishijee ni eji nii kpakpa kɛ sane ni ja.—Hiob 34:10-12.
10 Wɔbaanyɛ wɔna nɔmimaa akɛ Nyɔŋmɔ gbɛjianɔtoo akɛ Kristofoi kɛ mɔ ni ashwie lɛ akɛni etsakeee etsui kɛjɛɛɛ enɔshafeemɔ mli lɛ hewɔ lɛ akabɔ lɛ ji hebuu nii ni jwɛŋmɔ yɔɔ mli kɛha wɔ. “No hewɔ lɛ nyɛjiea masha momo lɛ, koni nyɛtsɔmɔ ma hee, tamɔ bɔ ni ma akpiti ji nyɛ lɛ.” (1 Korintobii 5:7) Kɛ wɔkpoo gbɔmɛi ni amɛje gbɛ amɛtsi amɛhe kɛjɛ asafo lɛ he lɛ, ebuɔ Kristofoi ahe kɛjɛɔ hemɔkɛyeli kwalɔi ni hiɛ esɔɔɔ nii lɛ ajwɛŋmɔi kɛ wiemɔi ni amɛkɛshiɔ mɛi lɛ aha—Hebribii 12:15, 16.
Ni Wekumɛi Hu?
11, 12. (a) Mɛni baa Israelnyo wekunyo ko nɔ beni afo efɔŋfeelɔ ko ashɛ afɔ lɛ? (b) Feemɔ toiboo mli sɛɛnamɔi lɛ ahe nɔkwɛmɔ nɔ.
11 Eka shi faŋŋ akɛ Nyɔŋmɔ le akɛ ejalɛ mlai ni kɔɔ efɔŋfeelɔi ni afolɔɔ amɛ ashɛrɛɔ afɔɔ lɛ he nitsumɔ lɛ saa wekumɛi ahe yɛ be babaoo mli. Taakɛ atsi ta yɛ yiteŋ gbɛ lɛ, kɛ afo Israelnyo ko ni efee efɔŋ lɛ ashɛ afɔ lɛ, ekɛ eweku lɛ naaa bɔlɛ ko dɔŋŋ. Yɛ anɔkwale mli lɛ, kɛ binuu ko ji daatɔɔlɔ loo fulɔ lɛ, esa akɛ efɔlɔi lɛ kɛ lɛ aba kojolɔi lɛ ahiɛ, kɛji akɛ etsakeee etsui lɛ, esa akɛ efɔlɔi lɛ afata he ni agbe lɛ, ‘afo nɔ ni ehiii lɛ ashɛ afɔ kɛjɛ Israel.’ (5 Mose 21:18-21) Obaanyɛ oyoo akɛ enɛ efeŋ mlɛo kɛhaŋ amɛ. Agbɛnɛ hu susumɔ bɔ ni efɔŋfeelɔ lɛ nyɛmimɛi hii, nyɛmimɛi yei, loo eniimɛi kɛ naamɛi baanu he aha lɛ he. Ni kɛlɛ, amɛ anɔkwayeli kɛha amɛ-Nyɔŋmɔ ni ja lɛ ni amɛkɛyeɔ weku suɔmɔ hiɛ lɛ baanyɛ afee yiwalaheremɔ nii aha amɛ.
12 Kaimɔ Kora sane lɛ, eji hiɛnyiɛlɔ yɛ atua ni atse ashi Nyɔŋmɔ hiɛnyiɛmɔ kɛtsɔ Mose nɔ lɛ mli. Yehowa kojo sane lɛ yɛ jalɛ naa, ni ena akɛ esa akɛ Kora agbo. Shi awo mɛi ni yeɔ anɔkwale lɛ fɛɛ ŋaa akɛ: “Nyɛtsia nyɛhe oya kɛjɛa nɛkɛ gbɔmɛi fɔji nɛɛ abui lɛ ahe, ni nyɛkataa amɛ nɔ ko nɔ ko he, koni akakpata nyɛhiɛ yɛ amɛhe esha lɛ fɛɛ ahewɔ!” Wekumɛi ni ekpɛlɛɛɛ Nyɔŋmɔ kɔkɔbɔɔ lɛ nɔ lɛ kɛ atuatselɔi lɛ gboi. Shi Kora wekumɛi lɛ ateŋ mɛi komɛi kɛ nilee hala akɛ amɛbaaye Yehowa anɔkwale, ni enɛ here amɛyiwala, ni amɛna wɔsɛɛ be mli jɔɔmɔi lɛ eko.—4 Mose 16:16-33; 26:9-11; 2 Kronika 20:19.
13. Te Kristofoi anɔkwafoi baafee amɛnii amɛha tɛŋŋ kɛji akɛ ashwie weku kɔkrɔɔ lɛ mli nyo ko kɛjɛ asafo lɛ mli aloo ekɛɛ ekɛ ehe ebɔɔɔ asafo lɛ he dɔŋŋ lɛ?
13 Ni aaafɔ mɔ ko ashɛ afɔ kɛaajɛ Kristofoi asafo lɛ mli lɛ kɛ amrɔ gbele baaa. No hewɔ lɛ, weku tsakpaa lɛ yaa nɔ. No hewɔ lɛ, nuu ni ashwieɔ lɛ loo ekɛɔ akɛ ekɛ asafo lɛ ebɔɔɔ dɔŋŋ lɛ baanyɛ aya nɔ ahi shia kɛ e-Kristofonyo ŋa kɛ ebii anɔkwafoi lɛ. Bulɛ kɛha Nyɔŋmɔ kojomɔi lɛ kɛ asafo lɛ nifeemɔ lɛ baatsirɛ ŋa lɛ kɛ bii lɛ ni amɛyoo akɛ wu lɛ etsɔ egbɛ nɔ etsake mumɔŋ tsakpaa ni ka amɛteŋ lɛ. Kɛlɛ, akɛni shwiemɔ ni ashwie lɛ kɛjɛ asafo lɛ mli lɛ kɛ la tsakpaa loo gbalashihilɛ wekukpaa ni ka amɛteŋ lɛ baaa naagbee hewɔ lɛ, weku mli hedɔɔ kɛ nifeemɔi baanyɛ aya nɔ.
14. Mɛɛ ŋwɛi ŋaawoo esa akɛ wɔkɛtsu nii yɛ be mli ni wɔkɛ wekunyo ko ni yɔɔ weku kɔkrɔɔ lɛ sɛɛ ni ashwie lɛ kɛjɛ asafo lɛ mli aloo ekɛɛ ekɛ ehe ebɔɔɔ asafo lɛ he dɔŋŋ lɛ yeɔ lɛ?
14 Shi shihilɛ lɛ yɛ sɔrɔto kɛji akɛ mɔ ni ashwie lɛ loo ekɛɛ ekɛ asafo lɛ ebɔɔɔ dɔŋŋ lɛ ji wekunyo ko ni bɛ shia lɛ mli aloo ejeee weku kɔkrɔɔ lɛ mli nyo. Ebaahi ni akɛ nakai wekunyo lɛ akabɔ kwraa. Kɛji akɛ weku lɛ mli saji komɛi po yɛ ni esa akɛ akɛ lɛ akpe yɛ he lɛ, abaaba enɛ shi ni afee yɛ be fioo ko pɛ mli, bɔ ni ekɛ ŋwɛi shishitoo mla nɛɛ baakpa gbee: “Kɛji mɔ ko ni atsɛɔ lɛ nyɛmi lɛ ji ajwamaŋbɔlɔ loo hiɛjoolɔ [aloo eye esha kroko he fɔ kwraa lɛ], . . . nyɛkɛ lɛ akayea nii tete.”—1 Korintobii 5:11.
15. Wekumɛi baanyɛ akudɔ henumɔi yɛ shihilɛi ni tamɔ nɛkɛ mli yɛ mɛɛ gbɛ nɔ? (Lala 15:1-5; Marko 10:29, 30)
15 Anuɔ shishi akɛ enɛ baawa yɛ henumɔi kɛ weku mli tsakpaa hewɔ, tamɔ suɔmɔ ni niimɛi kɛ naamɛi yɔɔ kɛha amɛnabii lɛ nɛkɛ. Ni kɛlɛ, enɛ ji anɔkwayeli kɛha Nyɔŋmɔ he kaa, taakɛ Nyɛmiyoo ni aŋɔ ewiemɔ awie yɛ baafa 26 lɛ jaje. Mɔ fɛɛ mɔ ni nuɔ awerɛho kɛ dɔlɛ ni wekunyo ni ashwie lɛ lɛ kɛba lɛ he lɛ baanyɛ ana miishɛjemɔ kɛ hewalɛwoo kɛtsɔ nɔkwɛmɔ nɔ ni Kora wekumɛi lɛ ateŋ mɛi komɛi kɛfɔ shi lɛ nɔ.—Lala 84:11-13.b
Saneyeli He Kojomɔ Lɛ
16-18. Mɛɛ yiŋ akpɛ yɛ saneyeli he ko sane ni atsɔ hiɛ atsi ta lɛ mli, ni mɛɛ jwɛŋmɔ kroko saneyeli he lɛ kɛfata he amɛha?
16 Wɔbaasumɔ ni ole nɔ ni jɛ mli ba yɛ saneyeli kojomɔ ni ‘kɔɔ yoo ko ni hao akɛni etsutsu hefatalɔi lɛ kɛ lɛ ewieee dɔŋŋ yɛ be mli ni ehala akɛ eeekwa hemɔkɛyeli lɛ ni ekɛ asafo lɛ ebɔɔɔ dɔŋŋ lɛ hewɔ.
17 Dani sane lɛ aaaya kojomɔ he lɛ, maŋ lɛ kpokpaa wulu nɔ saneyeli he lɛ bu lɛ fɔ. Kojomɔ lɛ damɔ jwɛŋmɔ ni ahiɛ akɛ saneyeli he lɛ kɛ amɛhe wooo sɔlemɔ ko mli tsɔsemɔ he saji amli lɛ nɔ. Kɛkɛ ni ebi ni aye sane lɛ ekoŋŋ. Maŋ saneyeli he ni kwɛɔ saji amli ekoŋŋ lɛ kɛ kojolɔi lɛ fɛɛ kpa gbee yɛ Klɛŋklɛŋ Tsakemɔ (ni yɔɔ U.S. Amerika Maŋ Nɔkwɛmɔ Gbɛjianɔtoo Mli) lɛ hegbɛi anɔ: “Akɛni shwiemɔ ni ashwieɔ mɔ lɛ ji Yehowa Odasefoi lɛ ahemɔkɛyeli lɛ fa hewɔ lɛ, wɔnaa akɛ ‘heyeli kɛ nitsumɔ’ he gbɛjianɔtoo ni yɔɔ U.S. Amerika Maŋ Nɔkwɛmɔ Gbɛjianɔtoo Mli lɛ . . . eŋmɛɛɛ lɛ gbɛ akɛ eye bem. Mɛi ni faa amɛhe lɛ yɛ hegbɛ yɛ maŋ nɔkwɛmɔ gbɛjianɔtoo lɛ mli akɛ amɛkpoo loo amɛkwa mɔ ko. No hewɔ lɛ, wɔmiima nɔ mi” akɛ klɛŋklɛŋ kojomɔ ni kpokpaa wulu saneyeli he lɛ kɛha lɛ ja.
18 Saneyeli he lɛ tee nɔ amɛtsɔɔ amɛjwɛŋmɔ lɛ mli akɛ: “Kwamɔ loo kpoomɔ ni akpoɔ mɔ ko lɛ ji nifeemɔ ni Yehowa Odasefoi lɛ kɛ amɛhe ewo mli yɛ bɔ ni amɛtsɔɔ Biblia mli wolo kpo lɛ shishi lɛ hewɔ, ni wɔnyɛŋ wɔku sɛɛ wɔtsɔɔ no shishi yɛ gbɛ kroko nɔ. . . . Mɛi ni faa amɛhe lɛ yɛ hegbɛ akɛ amɛtsuɔ amɛjamɔ mli hemɔkɛyelii lɛ ahe nii. . . . Saneyeli hei lɛ efɔɔɔ wekukpaa ni ka sɔlemɔ lɛ mli bii (tsutsu sɔlemɔ lɛ mli bii) lɛ awekukpaa mlibotemɔ. Akɛ hegbɛ ni da haa sɔlemɔi lɛ kɛ amɛkɛ tsɔsemɔ ha emli bii aloo tsutsu sɔlemɔ lɛ mli bii. Wɔkɛ [tsutsu U.S. Amerika Saneyeli He Wulu] lɛ Kojolɔ Jackson kpaa gbee akɛ ‘esa akɛ jamɔ mli nifeemɔi ni kɔɔ hemɔkɛyeli lɛ mli bii nɛɛ ahe lɛ afee nɔ ni yeɔ ehe—aye ehe kwraa yɛ nɔ fɛɛ nɔ mli.’ Sɔlemɔ ni [yoo] nɛɛ to eyiŋ akɛ ekɛ emli bii lɛ ebɔɔɔ dɔŋŋ lɛ emu sane naa akɛ amɛsumɔɔɔ ni amɛkɛ lɛ hu bɔɔ dɔŋŋ. Wɔheɔ wɔyeɔ akɛ amɛyɛ hegbɛ ni amɛhalaa nifeemɔ ni tamɔ nakai.”
19, 20. Mɛni hewɔ mɔ ni ashwie lɛ kɛjɛ asafo lɛ mli lɛ nyɛŋ ana shika mli sɛɛnamɔ ko kɛjɛ asafo lɛ ŋɔɔ yɛ saneyeli he lɛ?
19 Saneyeli he ni kwɛɔ saji amli ekoŋŋ lɛ kpɛlɛ nɔ akɛ kɛji akɛ yoo nɛɛ hao akɛni etsutsu hefatalɔi lɛ ehala akɛ amɛkɛ lɛ egbaaa sane dɔŋŋ lɛ, “gbɛ ni aaaŋmɛ lɛ ni eba asafo lɛ mli ekoŋŋ yɛ henumɔ pilamɔi loo nibii ni bɛ faŋŋ hewɔ lɛ baatsi Yehowa Odasefoi anaa ni amɛjɛ heyeli mli amɛtsu amɛjamɔ he nii ni enɛ baate shi awo maŋ nɔkwɛmɔ he gbɛjianɔtoo lɛ. . . . Maŋ nɔkwɛmɔ he gbɛjianɔtoo lɛ hegbɛ ni ekɛha yɛ jamɔ mli heyeli mli lɛ biɔ ni akpɛlɛ awui ni enɛ eye [yoo] nɛɛ nɔ lɛ nɔ akɛ nyɔmɔwoo ni sa jogbaŋŋ ni ewoɔ koni akɛbaa jamɔ mli sɔrɔtofeemɔ ni maŋ bii fɛɛ naa mliŋɔɔmɔ lɛ yi.” Nɛkɛ yiŋkpɛɛ ni akɛha nɛɛ mli ewa waa moŋ kɛjɛ be mli ni akɛha nɛɛ. Yɛ mɛɛ gbɛ nɔ? Yɛ sɛɛ mli lɛ, yoo lɛ kɛ sane lɛ yafɔ saneyeli he wulu ni kwɔ fe fɛɛ yɛ shikpɔŋ lɛ nɔ lɛ hiɛ koni amɛbo esane lɛ toi ni amɛtsake yiŋ ni akpɛ ashi lɛ lɛ. Shi yɛ November 1987 mli lɛ, U.S. Amerika Saneyeli He Wulu lɛ kpoo akɛ eeefee nakai.
20 No hewɔ lɛ, sane ni he hiaa nɛɛ maa nɔ mi akɛ mɔ ni ashwie lɛ kɛjɛ asafo lɛ mli aloo ni ekɛɛ ekɛ asafo lɛ ebɔɔɔ dɔŋŋ lɛ nyɛŋ ana nɔ ko kɛjɛ Yehowa Odasefoi adɛŋ yɛ saneyeli he yɛ kwa ni amɛkwa lɛ lɛ hewɔ.c Akɛni asafo lɛ miitsu gbɛtsɔɔmɔ ni yeɔ emuu ni wɔ fɛɛ wɔbaanyɛ wɔkane kɛjɛ Nyɔŋmɔ Wiemɔ lɛ mli ni wɔtsu he nii hewɔ lɛ, gbɔmɔ lɛ miinu he akɛ elaaje nibii pii, ni lɛ diɛŋtsɛ enifeemɔi ha eba enɔ nakai.
Tsɔsemɔ—Ehe Baa Sɛɛnamɔ Kɛhaa Mɛi Pii
21. Mɛni hewɔ pɛpɛɛpɛ ni aaaŋmɛ yɛ saji amli he hiaa yɛ mɛi ni ashwie amɛ kɛjɛ asafo lɛ mli lɛ ahe lɛ?
21 Kɛ mɛi komɛi ni yɔɔ asafo lɛ sɛɛ nu akɛ ashwie mɔ ko lɛ, efɔɔ kaa akɛ amɛnuɔ he amɛhaa nɔfɔŋfeelɔ lɛ ni nyɛɛɛ ekɛ Kristofoi asafo lɛ mli bii lɛ agba sane dɔŋŋ lɛ. Shi ani henumɔ ni tamɔ nɛkɛ lɛ jeee nɔ ni ajieɔ lɛ kpo yɛ gbɛ ni ejaaa nɔ? Susumɔ sɛɛnamɔi babaoo ni nɔfɔŋfeelɔ lɛ kɛ mɛi krokomɛi anine baanyɛ ashɛ nɔ lɛ he okwɛ.
22, 23. Feemɔ bɔ ni ehe hiaa kɛ sɛɛnamɔ ni yɔɔ Nyɔŋmɔ toi ni aaabo yɛ bɔ ni wɔsusuɔ mɛi ni ashwie amɛ kɛjɛ asafo lɛ mli lɛ ahe wɔhaa lɛ he lɛ he nɔkwɛmɔ nɔ.
22 Akɛ nɔkwɛmɔ nɔ lɛ, wɔkadiɔ Lynette wiemɔ ni kɔɔ bɔ ni ehala akɛ ekɛ enyɛmiyoo Margaret ni ashwie lɛ lɛ ‘aaafo naanyobɔɔ mli kwraa’ lɛ yɛ baafa 26. Lɛ kɛ ewekumɛi Kristofoi lɛ ‘heɔ yeɔ akɛ Yehowa gbɛ lɛ ji nɔ ni hi fe fɛɛ.’ Ni nakai eji!
23 Yɛ sɛɛ mli lɛ, Lynette nyɛmiyoo lɛ kɛɛ akɛ: ‘Eji osusu shwiemɔ lɛ he akɛ nɔ ko ni etsiii kulɛ, mile akɛ minyɛŋ mato gbɛjianɔ koni maku misɛɛ koni ahe mi oya kɛba asafo lɛ mli taakɛ mifee lɛ. Bɔ ni afɔɔ mɔ ashɛɔ afɔɔ kwraa kɛjɛɔ suɔlɔi kɛ asafo lɛ he lɛ tee henumɔ kɛ suɔmɔ ni mli wa ni mina akɛ matsake mitsui lɛ shi yɛ mimli. Miyoo bɔ ni migbɛ lɛ ji efɔŋ kwraa ha kɛ bɔ ni eji hiɛdɔɔ sane akɛ matsɔ misɛɛ maha Yehowa lɛ.’
24. Yɛ mɛɛ gbɛ nɔ bɔ ni nyɛmiyoo ko fee enii yɛ shwiemɔ ko he lɛ na lɛ kɛ mɛikrokomɛi anɔ hewalɛ?
24 Yɛ sane kroko hu mli lɛ, ashwie Laurie fɔlɔi kɛjɛ asafo lɛ mli. Ni kɛlɛ, ekɛɛ: ‘Mikpaaa bɔ ni mikɛ amɛ bɔɔ lɛ, shi moŋ miha etee hiɛ. Beni be shwieɔ mli lɛ, mibafee mɔ ni efɔɔɔ shiɛmɔ yaa. Mibashɛ he ni miyaaa kpee po.’ Kɛkɛ ni mikane nikasemɔ ni aŋma ni yɔɔ December 1, 1981 kɛ January 1, 1982 Buu-Mɔɔ lɛ mli ni maa ŋaawoo ni yɔɔ 1 Korintobii 5:11-13 kɛ 2 Yohane 9-11 lɛ nɔ mi lɛ. Eŋma akɛ ‘Etamɔ nɔ ni akpɛ la ko awo mimli.’ ‘Mile akɛ ehe baahia ni mafee tsakemɔi komɛi. Mibanu Mateo 10:34-36 lɛ shishi jogbaŋŋ agbɛnɛ. Miyiŋkpɛɛ lɛ jeee nɔ ni eeefee mlɛo kɛha miweku lɛ akɛ amɛaakpɛlɛ nɔ, ejaakɛ mibinuu lɛ eye afii enumɔ, lɛ pɛ ji nuu, amɛsumɔɔ lɛ waa diɛŋtsɛ.’ Ale jogbaŋŋ akɛ naanyobɔɔ ni tamɔ nɛkɛ ni aaalaaje lɛ baasa fɔlɔi lɛ atsuii ahe waa diɛŋtsɛ, taakɛ eba yɛ Margaret gbɛfaŋ lɛ. Ni kɛlɛ, tsɔsemɔ lɛ ye bua Laurie: ‘Mikɛ mihe ewo sɔɔmɔ nitsumɔ lɛ mli ekoŋŋ. Migbalashihilɛ kɛ miweku lɛ mli ewa yɛ mitsakemɔ lɛ hewɔ, nakai hu miji.’
25. Mɛni ji jwɛŋmɔ ni mɔ ni ahe lɛ kɛba asafo lɛ mli ekoŋŋ lɛ na yɛ Nyɔŋmɔ tsɔsemɔ he?
25 Aloo susumɔ mɔ ni ashwie lɛ kɛjɛ asafo lɛ mli ni yɛ sɛɛ mli lɛ ahe lɛ ekoŋŋ lɛ henumɔi nɛɛ ahe. Sandi ŋma akɛ: ‘Masumɔ ni mada nyɛ shi yɛ saji ni yeɔ buaa ni tswaa mɔ emaa shi [ni atsi ta yɛ yiteŋgbɛ nɛɛ] ni kɔɔ kamɔ kɛ shwiemɔ he lɛ hewɔ. Mina miishɛɛ akɛ Yehowa sumɔɔ ewebii babaoo hewɔ lɛ, ekwɛɔ koni aha egbɛjianɔtoo le he atse. Nɔ ni bafeɔ tamɔ nɔ ko ni naa wa kɛhaa mɛi ni yɔɔ sɛɛgbɛ lɛ he miihia ni eji nii ni suɔmɔ hu yɔɔ mli ni esa akɛ afee. Miida shi akɛ wɔŋwɛi Tsɛ lɛ yɛ suɔmɔ ni eji Nyɔŋmɔ ni kɛ sane keɔ.’
26. Mɛɛ jalɛ yibii baanyɛ ajɛ tsɔsemɔ ni aaakpɛlɛ nɔ lɛ mli aba? (Lala 94:10, 12)
26 No hewɔ lɛ, wɔ-Nyɔŋmɔ lɛ ni biɔ akɛ ashwie efɔŋfeelɔ ni tsakeee etsui lɛ kɛjɛ asafo lɛ mli lɛ hu jɛɔ suɔmɔ mli etsɔɔ akɛ abaanyɛ ahe eshafeelɔ lɛ kɛba Kristofoi asafo lɛ mli ekoŋŋ kɛji akɛ etsake etsui ni eku esɛɛ. (Mɔ ni kɛɛ ekɛ asafo lɛ ebɔɔɔ dɔŋŋ lɛ hu baanyɛ abi koni ebatsɔ asafo lɛ mli nyo ekoŋŋ.) Ye no sɛɛ lɛ, Kristofoi ni baajie amɛsuɔmɔ kpo amɛtsɔɔ lɛ lɛ baashɛje emii. (2 Korintobii 2:5-11; 7:8-13) Yɛ anɔkwale mli lɛ, etamɔ bɔ pɛ ni Paulo ŋma lɛ: “Shi tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ ni, shi dɔlɛ nɔ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.—Hebribii 12:11.d
[Shishigbɛ niŋmai]
a Yohane kɛ wiemɔ khaiʹro ni eji ŋamɔ tamɔ “oje koo” aloo “hɛlo” tsu nii yɛ biɛ. (Bɔfoi lɛ Asaji 15:23; Mateo 28:9) Ekɛ wiemɔ a·spaʹzo·mai (taakɛ eyɔɔ kuku 13) ni eshishi ji “aloo mɔ atuu aloo aŋa mɔ aloo ahere lɛ lɛ” ni tsɔɔ akɛ akɛ miishɛɛ diɛŋtsɛ miiŋa lɛ, kɛ atuu po ni alooɔ mɔ lɛ tsuuu nii yɛ biɛ. (Luka 10:4; 11:43; Bɔfoi lɛ Asaji 20:1, 37; 1 Tesalonikabii 5:26) No hewɔ lɛ gbɛtsɔɔmɔ ni yɔɔ 2 Yohane 11 lɛ baanyɛ atsɔɔ akɛ akɛ ŋamɔ tamɔ “hɛlo” akatsɛ mɛi ni tamɔ nakai.—Kwɛmɔ The Watchtower, July 15, 1985, baafa 31.
b Kɛha wekunyo ko ni aaashwie lɛ kɛaajɛ asafo lɛ mli lɛ he susumɔ lolo lɛ, kwɛmɔ December 1, 1981 Buu-Mɔɔ lɛ baafai 11-15.
c Eyɛ mli akɛ aŋkroaŋkroi komɛi kɛ saji ni tamɔ nɛkɛ eba saneyeli he lɛ hiɛ moŋ, shi saneyeli he ko ebuko Yehowa Odasefoi fɔ yɛ gbɔmɛi ni amɛshwieɔ amɛ ni damɔ Biblia lɛ nɔ lɛ da.
d Ajie kɛjɛ April 15, 1988 Watchtower lɛ mli yɛ baafa 26.
Saji Otii Ni Esa Akɛ Akai
◻ Mɛɛ gbɛi anɔ nɛkɛ shwiemɔ ni ashwieɔ mɔ ko kɛjɛɔ asafo lɛ mli lɛ baanyɛ afee etsɔsemɔ yɛ?
◻ Mɛni hewɔ Kristofonyo jeŋba yɛ mɛi ni ashwie amɛ kɛjɛ asafo lɛ mli lɛ yɔɔ sɔrɔto yɛ jeŋba ni ehiɛ yɛ eshafeelɔi ni yɔɔ je lɛ mli lɛ ahe lɛ?
◻ Mɛɛ ŋmalɛ mli gbɛtsɔɔmɔ esa akɛ aha ahi jwɛŋmɔ mli kɛji akɛ ashwie wekunyo ko po?
◻ Te saneyeli he ni akɛ sane bafɔ amɛhiɛ koni aye ekoŋŋ Iɛ mu sane ko ni mɔ ni kɛɛ ekɛ asafo lɛ ebɔɔɔ dɔŋŋ Iɛ kɛba lɛ naa amɛha tɛŋŋ?
◻ Mɛni wɔbaanyɛ wɔkase kɛjɛ nɔ ni aŋkroaŋkroi komɛi wie yɛ shwiemɔ he lɛ mli?
[Wiemɔ ni akɔ ni akɛmiitsu nii ni yɔɔ baafa 25]
“Wɔhe ni wɔɔtse kwraa akɛ wɔkɛ [minyɛmiyoo ni ashwie Iɛ kɛjɛ asafo lɛ mli] Margaret ebɔŋ kwraa lɛ ka wɔ anɔkwayeli kɛha Yehowa gbɛjianɔtoo lɛ ekwɛ. Eha wɔweku lɛ na hegbɛ koni wɔtsɔɔ akɛ Yehowa gbɛ lɛ ji nɔ ni hi fe fɛɛ lɛlɛŋ.”—Lynette.
[Akrabatsa ni yɔɔ baafa 29]
Shwiemɔ—Mɛni Jɛɔ Mli Baa?
Ŋleshi yinɔsane ŋmalɔ Edward Gibbon ŋma yɛ bɔ ni esa akɛ ashwie mɔ kɛ nɔ ni jɛɔ shwiemɔ mli baa yɛ be ni bɛŋkɛ bɔfoi lɛ abe lɛ he lɛ he: “Eji hegbɛ ni ja ni gbɛjianɔtoi fɛɛ yɔɔ akɛ amɛaashwie mɛi ni kpoɔ loo amɛkuɔ amɛmlai ni akpa gbee yɛ nɔ ni ato ama shi lɛ nɔ lɛ kɛjɛɔ amɛ asafoŋ ni afoɔ Iɛ kɛjɛ emli sɛɛnamɔi fɛɛ he. . . Nɔ ni jɛɔ shwiemɔ ni ashwieɔ mɔ ko lɛ mli baa lɛ ji shikpɔŋ nɛɛ nɔ nɔ kɛ agbɛnɛ mumɔŋ nɔ. Kristofonyo ni ajaje enɛ ashwie enɔ Iɛ kɛ anɔkwafoi lɛ naaa nɔ ko feemɔ mli gbɛfaŋnɔ dɔŋŋ. Afoɔ jamɔ mli kɛ teemɔŋ naanyobɔɔ mli tsakpaa fɛɛ mli.”