Yehowa Ehiɛ Mimli Akɛ Naanyo

Taakɛ Maria Hombach gba lɛ

AKƐ gbekɛyoo fioo ni miye afii ekpaa lɛ, mikase Germanbii alala ni ji: “Ani ole ŋulamii abɔ ni yɔɔ ŋwɛi ni efee bluu lɛ mli? . . . Nyɔŋmɔ, ni ji Nuŋtsɔ lɛ ekane fɛɛ, ni ekome folo po elajeee, . . . ele bo hu, ni esumɔɔ bo jogbaŋŋ.” (Atsɔɔ shishi kɛjɛ German wiemɔ mli.) Miila lala nɛɛ gbi ko ni minyɛ kɛɛ mi akɛ: “Ele bo ni esumɔɔ bo hu.” Kɛjɛ nɛkɛ be nɛɛ nɔ kɛyaa lɛ, Nyɔŋmɔ batsɔ tamɔ naanyo diɛŋtsɛ kɛha mi. Mito miyiŋ akɛ mi hu masumɔ lɛ. Enɛ ba dani klɛŋklɛŋ jeŋ ta lɛ je shishi beni wɔyɔɔ Bad Ems yɛ Lahn Faa lɛ masɛi lɛ.

No sɛɛ afii nyɔŋma kɛ kpawo, yɛ gbɛhamɔ be ko mli yɛ 1924 lɛ, mikɛ gbekɛyoo ko ni ji mitipɛŋ kpe. Eji Biblia Kaselɔi ni ale amɛ ŋmɛnɛ akɛ Yehowa Odasefoi lɛ ateŋ mɔ kome. Wɔkɛ otsii ejwɛ je ŋwane waa yɛ jamɔ he. Kɛkɛ ni “hɛl” he sane lɛ te shi. Ebi mi akɛ: “Okɛ alɔŋte ni hiɛ ka woŋ flɔnɔɔ ni edɔ mli, ani obaanyɛ ofee nakai?” Sanebimɔ nɛɛ hɛlɛ mi shi tamɔ srawa gbamɔ, ni miyoo akɛ ashishiu mi kɛ hiɛshishwiemɔ. Agbɛnɛ mikase nɔ fɛɛ nɔ ni kɔɔ Nyɔŋmɔ he​—bɔ ni etamɔ, yɛ anɔkwale mli lɛ nɔ fɛɛ nɔ ni misumɔɔ ni male yɛ ehe kɛjɛ be mli ni mi ji gbekɛ!

Kɛha mi lɛ etamɔ nɔ ni miyana “jwetri ni aŋɔtee yɛ abɔɔ mli.” (Mateo 13:44) Beni miku sɛɛ mitee shia lɛ, mikɛ miishɛɛ tee mikutseiaŋbii lɛ aŋɔɔ, mitsui miifɛ akɛ mana hegbɛ ni magba amɛ nibii heei ni mikase lɛ. Yɛ no sɛɛ etsɛɛɛ lɛ, mifa kɛtee Germany maŋ ni yɔɔ wuoyigbɛ ni ji Sindelfingen, he ni Biblia Kaselɔi akuu ko ni mɛi 20 yɔɔ jɛmɛ lɛ mli. Mikɛ mihe yabɔ amɛhe yɛ ekaa naa yɛ nɛkɛ sanekpakpa nitsumɔ nɛɛ mli yɛ shia kɛ shia.

Klɛŋklɛŋ be mli ni minu gbɛgbamɔ sɔɔmɔ lɛ he ji 1929, yɛ be mli ni nyɛminuu gbɛfalɔ ko haa maŋshiɛmɔ lɛ. Ebi mɔ ni baasumɔ ni etsɔ gbɛgbalɔ. Kɛkɛ ni miwo minine nɔ. Kɛji akɛ nɛkɛ kɛ nɛkɛ bɛ kɛha mi. Mitsui kɛɛ: “Naa mi, tsu mi!”​—Yesaia 6:⁠8.

Amrɔ nɔŋŋ pɛ kɛkɛ ni mikpa ofis nitsumɔ ni mitsuɔ lɛ yɛ October 1, 1929, ni mije gbɛgbamɔ krɛdɛɛ sɔɔmɔ lɛ shishi, taakɛ atsɛɔ lɛ ŋmɛnɛ lɛ, yɛ Germany wuoyi-anaigbɛ Wɔkɛ oyaiyeli kɛ mlihilɛ tɛo anɔkwale dumɔ wui ni yɔɔ woji ni akala mli lɛ yɛ Limburg, yɛ Bonn, yɛ majimaji ateŋ lɛji ni baa Cologne lɛjiadaamɔ he lɛ.​—Jajelɔ 11:⁠1.

Nyɔŋmɔ Naanyobɔɔ ni Minine Shɛ Nɔ

Beni Adolf Hitler to eyiwalɛ nɔyeli lɛ yɛ Germany yɛ 1933 lɛ, kɛkɛ ni ehe bahia ni mashi gbɛgbamɔ sɔɔmɔ lɛ ni maku misɛɛ maya Bad Ems. Etsɛɛɛ ni nɔyelɔi lɛ yoo akɛ mifɔɔɔ oshiki yɛ oshikifɔɔ be lɛ mli. Gbii enyɔ komɛi asɛɛ lɛ, polisifoi enyɔ ba mishia amɛbakwɛ mitsu mli. Nɔ ni yɔɔ tsu lɛ koŋ ji kɛŋtɛŋ ko ni wɔtsɛrɛɔ jwɛi wɔwoɔ mli ni bei fioo nɛ ni mishɛrɛ nanemɛi Odasefoi lɛ adrɛs sɔrɔtoi fɛɛ miwo mli lɛ. Miyanaaa be ni mikɛbaatsi jwɛi nɛɛ mashwie! Polisifoi lɛ kwɛ nɔ fɛɛ nɔ mli​—ja nɛkɛ kɛŋtɛŋ nɛɛ pɛ.

Kwɛ bɔ ni mihiɛ esɔ akɛ minyɛmiyoo Anna hu ekpɛlɛ anɔkwa Nyɔŋmɔ lɛ kɛbɔɔ akɛ eshieŋtsɛ lɛ nɔ. Mikɛ lɛ fɛɛ tee maŋ ni ji Freudenstadt lɛ mli yɛ 1934 ni wɔkɛ henɔkwɛmɔ jogbaŋŋ bɔi woji ni akɛkaseɔ Biblia lɛ jaa. Gbi ko lɛ, beni wɔyɔɔ gbɛhamɔ mli lɛ, wɔkɛ oyaiyeli tsɔ oketeke mli wɔtee wɔmaŋ ni ji Bad Ems, ni wɔkɛ oyaiyeli ja woji bibii lɛ adeka obɔ ni naa shɛɔ 240 lɛ yɛ oyaiyeli mli ni wɔlaaje. Bɔ ni Gestapo ni ji German polisifoi lɛ haoɔ wɔ yɛ Freudenstadt sɔŋŋ hewɔ lɛ enɛ tsirɛ wɔ ni wɔfa kɛtee maŋ kroko mli, ni yɛ 1936 lɛ, wɔtee Stuttgart. Jɛmɛ ji he ni miyatao nyɛmimɛi ni kwɛɔ sɔɔmɔ nitsumɔ lɛ nɔ yɛ teemɔŋ lɛ yɛ​—ni amrɔ nɔŋŋ pɛ kɛkɛ ni akɛ “nitsumɔ” ha mi akɛ mitsu. Minine shɛɔ woji ni mfonirii yɔɔ nɔ ni ŋamɔ wiemɔi yɔɔ sɛɛ lɛ anɔ yɛ bei fɛɛ mli. Yɛ anɔkwale mli lɛ, amɛji shɛɛ saji ni aŋɔtee. Minitsumɔ ni akɛwo midɛŋ ji ni mikɛya teemɔ he ko yɛ maŋtiase lɛ mli. Bɔ ni afee ni mikɛ nitsumɔ nɛɛ akawo oshara mli lɛ, akɛɛ mi akɛ mikaja woji lɛ eko kwraa. Nɔ fɛɛ nɔ tee nɔ fɛfɛo aahu kɛyashi August 1938.

Gbi ko lɛ, minine shɛ wolo ko nɔ ni miifa mi akɛ miyadamɔ sɔlemɔtsu ko ni ale jogbaŋŋ ko hiɛ, gbɛkɛnaashi ko. Ni minine baashɛ saji krokomɛi anɔ yɛ jɛmɛ. Mitee he ni wɔbaakpe yɛ lɛ. No mli lɛ duŋ ewo. Nuu ko jie ehe kpo etsɔɔ mi akɛ atsɛɔ lɛ Julius Riffel. Mile gbɛi nɛɛ, akɛ eji nyɛminuu anɔkwafo ko ni tsuɔ nii yɛ teemɔŋ lɛ. Ekɛ oyaiyeli kɛɛ mi akɛ mifa gbɛ kɛya Bad Ems yɛ gbi ko nɔ bɔ ni afee ni mikɛ mɔ ko ayakpe. Amrɔ nɔŋŋ pɛ kɛkɛ ni elaaje.

Shi beni mishɛ Bad Ems lɛ, mina akɛ Gestapo lɛ ni ji German polisifoi lɛ pɛ mɛɔ mi. Mɛni etɔtɔ? Nuu ni mikɛkpe yɛ sɔlemɔtsu lɛ hiɛ lɛ​—ji tsutsu nyɛminuu ko ni jɛ Dresden, Hans Müller, ni le nɔ fɛɛ nɔ ni kɔɔ wɔteemɔŋ nitsumɔ ni yaa nɔ yɛ Germany lɛ he ni agbɛnɛ eje shishi ekɛ Gestapo lɛ efee ekome​—ni lɛ ji mɔ ni etsɔ tsɔne ni tamɔ nɛkɛ eha mi lɛ. Shi eyeee omanye. Dani enɛ aaaba lɛ, minyɛ kɛɛ mi akɛ ena tsui hela fioo ko, ni mi hu miŋma lɛ wolo akɛ maba ni mabasara lɛ yɛ Bad Ems yɛ be ko mli. Yɛ miishɛɛ mli lɛ, enɛ kɛ “nitsumɔ ni akɛwo midɛŋ” lɛ yakpa gbee, ni woji ni wɔŋmala nɛɛ tsɔ naajiemɔ nɔ kɛha mi yɛ sɛɛ mli beni ayeɔ misane lɛ. Yɛ naakpɛɛ gbɛ nɔ lɛ, aŋmɛɛ mihe. Hɛɛ, yɛ February 1989, beni atsi minaa yɛ gbokɛlɛfoi atsuŋ nyɔji enumɔ kɛ fa sɔŋŋ lɛ, agbɛnɛ aha miye mihe ekoŋŋ!

Enaanyobɔɔ lɛ Nɔheremɔ

Yɛ anɔkwale mli lɛ, mitooo gbɛjianɔ akɛ mahi shi akɛ mɔ ni tsuuu nɔ ko, titri lɛ akɛni minyɛmimɛi lɛ ateŋ mɛi pii miina nɔ yɛ gbokɛlɛfoi aŋsraiaŋ aloo amɔmɔ amɛ yɛ hei krokomɛi nɛɛ.

Beni amɔmɔ Germany nyɛmimɛi onukpai ni akɛ sɔɔmɔ nitsumɔ ewo amɛdɛŋ lɛ yɛ Müller yelikɛbuamɔ naa lɛ, Ludwig Cyranek bafee mɔ ni akɛ mumɔŋ niyenii jaa lɛ wo edɛŋ. Kulɛ nyɛminuu nɛɛ ji tsutsu Betel nitsulɔ yɛ Magdeburg, ni aŋmɛɛ ehe kɛjɛ gbokɛlɛfoi atsuŋ etsɛko ni ebasara mi yɛ Bad Ems. Ekɛɛ: “Ba ni wɔtee Maria! Ha ni wɔya nɔ wɔtsu nii.” Ekɛ mi ba Stuttgart ekoŋŋ he ni mibana heloo gbɛfaŋ nitsumɔ yɛ lɛ. Shi minitsumɔ diɛŋtsɛ, ni je shishi yɛ March 1939 lɛ ji ni maja Buu-Mɔɔ lɛ woji tɛtrɛbii ni akwɛ nɔ akala lɛ adekai obɔbɔ yɛ Stuttgart kɛ ehewɔ maji lɛ amli. Odasefoi krokomɛi kɛ amɛhe wo nɛkɛ nitsumɔ nɛɛ mli yɛ ekaa naa.

Beni be shwieɔ mli lɛ, Nyɛminuu Cyranek tsu nii yɛ maŋ nɛɛ kooyi-bokagbɛ lɛ fɛɛ. Akɛni aatao Odasefoi lɛ ashihilɛ he hewɔ lɛ, ehe bahia ni ekwɛ ehe nɔ jogbaŋŋ ni yɛ bei komɛi amli po lɛ ewɔɔ kooi amli. Oketekei ni yaa oya lɛ kɛ lɛ baa Stuttgart yɛ be kɛ bei amli, ni etsɔɔ mi amaniɛbɔi krɛdɛɛi ni kɔɔ bɔ ni shihilɛ lɛ yɔɔ yɛ Germany lɛ he. Miŋmaa woji kɛkɛ, ni mikɛ nɛkɛ shɛɛ saji nɛɛ hɔlɔɔ mli kɛ iŋki ni akɛŋmalaanii shi anaaa niŋmaai lɛ kɛkɛ lɛ mikɛ adrɛs kroko ewo nɔ kɛmaje kɛtee Netherlands Betel shia lɛ.

Nɔ ni yɔɔ mɔbɔ ji akɛ, nyɛminuu kroko hu batsɔ sɛɛgbɛtsɔɔlɔ kɛ hiɛnɔkamɔ akɛ ebaajo tsuŋwoo naa foi. Afi sɛɛ lɛ, etsɔɔ nyɛmimɛi ni yɔɔ Stuttgart kɛ hei krokomɛi lɛ asɛɛ gbɛ eha Gestapo lɛ. Yɛ February 6, 1940 lɛ, amɔmɔ wɔ. Ludwig Cyranek tee he ni Müller yɔɔ lɛ yɛ Dresden​—ni eesusu akɛ Müller ka he eji naanyo Odasefonyo​—ni amɔ lɛ yɛ jɛmɛ. Yɛ sɛɛ mli lɛ abu nyɛminuu Cyranek gbele fɔ ni akɛ lema fo eyi yɛ July 3, 1941.a

Wɔhenyɛlɔi lɛ he ye agbɛnɛ akɛ amɛfite wɔnitsumɔ ni yaa nɔ yɛ Germany lɛ fɛɛ. Shi ato gbɛjianɔ momo koni akɛkwɛ ni anɔkwale nu lɛ aya nɔ aho, kɛji akɛ eba shi kwraa ni eeho kɔikɔi po. Akɛ nɔkwɛmɔ nɔ lɛ, kuu ni yɔɔ Holzgerlingen lɛ nyɛ amɛto gbɛjianɔ ni amɛkɛ amɛhe wo sɔɔmɔ nitsumɔ lɛ mli aahu kɛyashi ta lɛ naagbee yɛ 1945.

Ekwaaa Enanemɛi lɛ Kɔkɔɔkɔ

Awo Anna kɛ mi kɛ nyɛmimɛi yei anɔkwafoi komɛi tsuŋ yɛ Stuttgart tsuŋwoo he lɛ. Mifɔɔ gbokɛlɛfoi ni ayiɔ amɛ lɛ ahe numɔ. Ni aaaha okome ohi shi yɛ he ko banee ni ofeee nɔ ko nɔ ko lɛ ji niiashikpamɔ ko ni yɔɔ gbeyei. Shi akɛni Kristofoi akpeei ejeee wɔsɛɛ ni wɔka he wɔji obalaŋtai lolo hewɔ lɛ, wɔnyɛɔ wɔkaiɔ Buu-Mɔɔ lɛ mli saji lɛ fɛɛ. Yɛ enɛ hewɔ lɛ, wɔhemɔkɛyeli lɛ tee nɔ edamɔ shi kpɛŋŋ ni wɔnyɛ wɔŋmɛ wɔtsui shi.

Gbi ko lɛ, Gestapo hii enyɔ jɛ Dresden amɛba amɛbatsɛ mi kɛ minaanyo gbokɛlɛfonyo Gertrud Pfisterer (amrɔ nɛɛ Wulle) koni abibii wɔ saji. Bɔ ni afɔɔ feemɔ ji akɛ ahaa gbokɛlɛfoi faa gbɛ yɛ oketekei ni wooo foi tsɔ lɛ anɔ, ni enɛ heɔ gbii babaoo. Shi ashi oketeke nɔ tsu muu aha wɔyi enyɔ lɛ yɛ oketeke ni he yɔɔ oya nɔ, yɛ anɔkwale ni eji akɛ oketeke lɛ tsui krokomɛi lɛ fɛɛ eyimɔ obɔbɔ lɛ fɛɛ sɛɛ. Asraafoi lɛ kɛɛ: “Nyɛhe miihia wɔ tsɔ. Wɔsumɔɔɔ ni nyɛje wɔdɛŋ.”

Beni wɔshɛ Dresden lɛ pɛ kɛkɛ ni Gestapo lɛ kɛ nyɛmi ni ji etɛ ni lɛ hu ekwa hemɔkɛyeli lɛ badamɔ wɔhiɛ. Miyoo akɛ nɔ ko etɔtɔ, no hewɔ lɛ mifee diŋŋ, ni miŋaaa lɛ po. Kɛkɛ ni akɛ mi badamɔ nuu ko ni kwɔ ni agbɛnɛ eda ni ewo asraafoi atade hiɛ: sɛɛgbɛtsɔɔlɔ Müller, ni mikɛ lɛ kpe yɛ sɔlemɔtsu lɛ hiɛ lɛ. Mishi tsu lɛ mli ni mikɛɛɛ nɔ ko. Gestapo lɛ naaa nɔ ko kɛjɛɛɛ miŋɔɔ.

Nɛkɛ sɛɛgbɛtsɔɔlɔi nɛɛ ateŋ mɔ fɛɛ mɔ naagbee batsɔ efɔŋ. Taakɛ Nazibii lɛ kɛɛ lɛ, amɛsumɔɔ sɛɛgbɛtsɔɔmɔ lɛ, shi jeee sɛɛgbɛtsɔɔlɔ lɛ. Akɛ mɛi etɛ lɛ fɛɛ tee tawuu he yɛ bokagbɛ ni amɛkuuu amɛsɛɛ amɛbaaa dɔŋŋ. Kwɛ bɔ ni eyɔɔ sɔrɔto yɛ mɛi ni eŋmɛɛɛ amɛkɛ Nyɔŋmɔ kɛ ewebii lɛ ateŋ naanyobɔɔ lɛ he lɛ gbɛfaŋ! Nyɛmimɛi anɔkwafoi lɛ babaoo, ni amɛteŋ mɛi komɛi ji Erich Frost kɛ Konrad Franke, ni na amanehulu babaoo yɛ Nuŋtsɔ lɛ hewɔ ni yɛ sɛɛ mli lɛ amɛbatsɔmɔ nitsumɔ he nine lɛ nɔkwɛlɔi yɛ Germany lɛ ku amɛsɛɛ kɛjɛ yiwaa ni tamɔ la kɛ flɔnɔɔ lɛ mli amɛba shweshweeshwe.b

Akɛni Gestapo lɛ ni yɔɔ Stuttgart lɛ​—mii eshɛ amɛhe waa yɛ nɔ ni “amɛmɔ” lɛ he hewɔ lɛ​—amɛbi amɛnanemɛi ni yɔɔ Dresden lɛ yɛ 1940 mli akɛ amɛku sɛɛ amɛkɛ wɔ abaha amɛ. Amɛbaakojo wɔ yɛ Germany wuoyigbɛ. Shi eka shi faŋŋ akɛ Gestapo lɛ ni yɔɔ kooyigbɛ lɛ kɛ wuoyigbɛ lɛ ateŋ bɛ jogbaŋŋ, no hewɔ lɛ Dresden asraafoi lɛ kpoo enɛ, ni yɛ enɛ hewɔ lɛ mɛi ni yɔɔ Stuttgart lɛ ba ni amɛbagbala wɔ diɛŋtsɛ kɛtee. Agbɛnɛ mɛni? Gbɛfaa ni kɛ wɔ yaa he ni ayaawo wɔ tsuŋ yɛ lɛ bafee gbɛfaa ko ni yɔɔ miishɛɛ yɛ Elbe faa lɛ toi; wɔnako tsei kɛ baa ŋmɔŋ kɛ agbɛnɛ ŋwɛi fɛfɛo ni efee bluu nɛɛ yɛ be kakadaŋŋ mli yɛ wɔtsuŋwoo lɛ hewɔ. Taakɛ eji yɛ tsutsu lɛ, wɔ kome pɛ wɔyɔɔ oketeke tsu kome mli, ni aŋmɛ wɔ gbɛ po koni wɔla Maŋtsɛyeli lalai. Beni wɔtsake oketekei lɛ, wɔnine shɛ niyenii nɔ yɛ oketeke shidaamɔ he lɛ niyeli he lɛ. Bo lɛ susumɔ enɛ he, kɛjɛ leebi lɛ bodobodo fioo ko pɛ wɔye, ni agbɛnɛ naa enɛ!

Akɛ misane lɛ tee saneyeli he yɛ Stuttgart yɛ September 17, 1940. Akɛni miŋmaa ni mijaa Ludwig Cyranek woji lɛ hewɔ lɛ, mibɔ gbɔmɛi ni yɔɔ maŋsɛɛ shikpɔji lɛ anɔ lɛ amaniɛ yɛ nitsumɔ ni wɔtsuɔ yɛ teemɔŋ lɛ kɛ wɔyiwaa lɛ he. Enɛ ji maŋjwaa nitsumɔ ni da fe fɛɛ, ni nɔ ni fataa he baa ji gbele. No hewɔ lɛ ebafee tamɔ naakpɛɛ sane akɛ mi, ni miji hefalɔ titri yɛ Stuttgart lɛ, aaawo mi tsuŋ afii etɛ kɛ fa pɛ akɛ mɔ ni hiɔ he ko banee ni ahaaa mɔ ko abɛŋkɛ lɛ! Eka shi faŋŋ akɛ, Gestapo onukpa ni atsɛɔ lɛ Schlipf ni na wɔ mɔbɔ ni ehenilee gba enaa hu lɛ kɛ ehe wo enɛ mli. Etsi ta be ko akɛ enyɛɛɛ ewɔ yɛ “gbekɛbii yei” nɛɛ ahewɔ. Eji saneyeli lɛ ba yɛ Dresden kulɛ, minaŋ lɛ mlɛo nɛkɛ.

Naanɔ Naanyobɔɔ Mli Sɛɛnamɔ

Eyɛ mli akɛ niyenii ni wɔyeɔ yɛ gbokɛlɛfoi atsuŋ lɛ hi fioo fe gbokɛlɛfoi aŋsraiaŋ nɔ lɛ moŋ, shi mita loo babaoo ni mibatsɔ wuwui kɛkɛ. Afi 1940 kɛyashi 1942 ho, ni yɛ bei komɛi amli lɛ misusuɔ akɛ: ‘Kɛ awoo tsuŋ ni ajie bo sɛɛ lɛ, akɛbo yaa gbokɛlɛfoi aŋsraŋ he ni okɛ onyɛmimɛi yei baakpe yɛ ni ehe ebahiaŋ ni eshwɛ okome too dɔŋŋ.’ Mileee nɔ ni yaa nɔ yɛ jɛmɛ lɛ he nɔ ko kwraa.

Bulɔi lɛ anaa kpɛ amɛhe kwraa yɛ be mli ni wolo ni mifɔlɔi ni ji Katolekbii lɛ ŋma akɛ aŋmɛɛ mihe lɛ akpɛlɛ nɔ lɛ. (Mi diɛŋtsɛ mitee nɔ mikpɔo shii abɔ akɛ mifeee nii ni tamɔ nɛkɛ.) Yɛ be mli ni ashɛrɛ minanemɛi heyelilɔi awo gbokɛlɛfoi aŋsraiaŋ lɛ, mi​—ni awo mi tsuŋ akɛ maŋjwalɔ ni eŋmɛɛɛ sane he ni akɛsaa kwraa lɛ​—abaajie mi ni aha maye mihe yɛ gbɛ ni yɔɔ mlɛo ni tamɔ nɛkɛ nɔ! No hewɔ lɛ miyɛ mihe ekoŋŋ yɛ 1943 ni no hewɔ lɛ mibaje gbɛhe mli, ni manyɛ ni mikɛ henɔkwɛmɔ jogbaŋŋ akɔlɔ teokrase woji kɛjɛ Holzgerlingen kɛya hei. Kɛ mikwɛ woji nɛɛ anɔ miŋmala eko lɛ, mikɛbɔɔ thermos flask ni kɔfe eyi mli obɔ lɛ tsɛŋsi lɛ mli ni mikɛyahaa nyɛmimɛi ni shia yɔɔ Rhine Faa lɛ he lɛ kɛ Germany Anaigbɛ lɛ. Minyɛ mitsu nii ni agbaaa minaa kɛjɛ nakai be lɛ mli aahu kɛyashi ta lɛ naagbee. Yɛ sɛɛ mli lɛ mibale akɛ nanemɛi polisi onukpai komɛi ni nine shɛ woji ni wieɔ shiɔ wɔ lɛ nɔ lɛ tsuuu he nii ejaakɛ amɛkɛhaaa Gestapo lɛ.

Ni yɛ 1945 sɛɛ hu? Mitsui shwe akɛ matsɔ gbɛgbalɔ ekoŋŋ ni amrɔ nɔŋŋ bɔ ni manyɛ. Nɔ ni mikpaaa gbɛ kwraa ji klɛŋklɛŋ ninefɔɔ ko ni minine shɛ nɔ. Milako da akɛ abaafɔ nine atsɛ mi akɛ miba ni mibatsu nii yɛ Betel yɛ Wiesbaden!

Ni kɛjɛ March 1, 1946 kɛbaa nɛɛ, jɛmɛ ji he ni miyɔɔ, yɛ Betel, (amrɔ nɛɛ Selters/Taunus) . Mitsu nii yɛ miishɛɛ mli afii babaoo yɛ nitsumɔ he lɛ tsutsu nitsumɔ he nine nɔkwɛlɔ Konrad Franke shishi. Mitsu nii hu yɛ nitsumɔ hei krokomɛi yɛ jɛmɛ nɔŋŋ, akɛ nɔkwɛmɔ nɔ lɛ, yɛ niiahefɔmɔ he lɛ. Amrɔ nɛɛ po, beni miyɛ afi 87 nɛɛ, mikɛ ŋmɛlɛtswai babaoo tsuɔ nii yɛ jɛmɛ daa otsi mikotaa papaŋi. Kɛ obashɛra shi yɛ Betel pɛŋ lɛ, belɛ wɔna wɔhe da.

Mina gbɛ miye mibua gbɔmɛi babaoo koni amɛmɔ anɔkwale lɛ mli, ni minyɛ kɛ miheloo gbɛfaŋ nyɛmiyoo fata he. Miyoo akɛ minyɛ wiemɔi, “ni ele ni esumɔɔ bo hu” lɛ efee anɔkwale, taakɛ bɔ ni Lalatsɛ lɛ wiemɔi nɛɛ hu ji anɔkwale lɛ, “Ni lɛ eeehiɛ omli.” (Lala 55:23) Mɛɛ miishɛɛ efee kɛha mi nɛkɛ akɛ masumɔ Yehowa yɛ be mli ni ehiɛɔ mimli akɛ enaanyo lɛ!

[Shishigbɛ niŋmai]