Bɔ Ni Ooofee Oye Omanye Yɛ Gbɛgbamɔ Nitsumɔ Lɛ Mli

ANI gbɛgbamɔ sɔɔmɔ lɛ ji oshihilɛ be mli nitsumɔ? Kɛ oji gbɛgbalɔ, aloo be fɛɛ Maŋtsɛyeli jajelɔ lɛ, ŋwanejee ko bɛ he akɛ oosumɔ ni oye omanye. Omanyeyeli lɛ biɔ babaoo fe ni okɛ be aaatsu nitsumɔ diɛŋtsɛ ko he nii. Esa akɛ mɔ ni yeɔ omanye lɛ akpɛlɛ tsɔsemɔ nɔ ni eya nɔ eha emɔdɛŋbɔɔi loo nyɛmɔi aya hiɛ.

Belɛ te aaafee tɛŋŋ ni jeee akɛ ya kɛkɛ oooya nɔ ofee gbɛgbalɔ shi moŋ oya ohiɛ yɛ oshihilɛ be mli nitsumɔ nɛɛ mli? Sanebimɔi titrii babaoo yɛ ni obaanyɛ osusu he.

Te Wekukpaa ni ka Mi kɛ Nyɔŋmɔ Teŋ lɛ Mli wa ha Tɛŋŋ?

Nibii ni he hiaa fe fɛɛ ni haa ayeɔ omanye akɛ gbɛgbalɔ lɛ ateŋ ekome ji ni mɔ ana ekɛ Yehowa Nyɔŋmɔ teŋ wekukpaa ni bɛŋkɛ kpaakpa mli ŋɔɔmɔ. Wɔbaanyɛ wɔkase nii kɛjɛ Lalatsɛ David ŋɔɔ yɛ enɛ gbɛfaŋ. Ekpa fai akɛ: “Yehowa, tsɔɔmɔ mi ogbɛi lɛ, ha male otempɔŋi lɛ! Ha manyiɛ onɔkwale lɛ mli, ni otsɔɔ mi nii; ejaakɛ bo ji miyiwalaheremɔ Nyɔŋmɔ lɛ, bo gbɛ mikwɛɔ daa nɛɛ.”​—Lala 25:​4, 5.

David kɛ ehe fɔ ‘eyiwalaheremɔ Nyɔŋmɔ lɛ nɔ’ kwraa. Eesumɔ ni Yehowa atsɔɔ lɛ nii ni ‘eha ele E-gbɛi lɛ.’ Ani onuuu bɔ ni David shweɔ waa akɛ eeesa Nyɔŋmɔ hiɛ lɛ he? Enɛ fe nɔ ko ni ashweɔ ni ji hiɛaŋhiɛaŋ nɔ kɛkɛ, ejaakɛ David kɛɛ: “Bo gbɛ mikwɛɔ daa nɛɛ.”

Shi te obafee tɛŋŋ ni ohiɛ wekukpaa ni bɛŋkɛ kpaakpa ni akɛ Yehowa naa nɛkɛ lɛ mli? Kadimɔ akɛ nɔ ni wɔtsɔ hiɛ wɔsusu he nɛɛ ji David wiemɔi yɛ sɔlemɔ mli. Hɛɛ, sanegbaa kɛtsɔ sɔlemɔ nɔ lɛ ji mɔ kɛ Nyɔŋmɔ teŋ wekukpaa kpakpa lɛ shishitoo diɛŋtsɛ. Ni wɔbaanyɛ wɔna miishɛɛ yɛ le ni wɔle akɛ ehe ehiaaa ni wɔkɛ wɔ ŋwɛi Tsɛ lɛ ato be dani wɔkɛ lɛ awie lɛ hewɔ. Wɔbaa nyɛ wɔbɛŋkɛ lɛ be fɛɛ be. Taakɛ David kɛɛ lɛ: “Bo mibolɔɔ mitsɛo daa jenamɔ!” (Lala 86:⁠3) Nyɔŋmɔ diɛŋtsɛ Bi lɛ po ni nyiɛ shikpɔŋ nɛɛ nɔ akɛ gbɔmɔ ni yeɔ emuu lɛ yoo akɛ enyɛŋ eye omanye ni e-Tsɛ lɛ yelikɛbuamɔ bɛ mli. Yesu kɛ lɛ wieɔ yɛ sɔlemɔ mli yɛ gbi muu fɛɛ mli​—leebi mra, kɛ shwane kɛ agbɛnɛ kɛmiibote gbɛkɛ mli.​—Marko 1:​35; Luka 11:1; 6:⁠12.

Akɛ Kristofoi lɛ, kɛji akɛ wɔɔye omanye yɛ wɔsɔɔmɔ lɛ mli lɛ, belɛ ehe miihia ni wɔnyiɛ Yesu nɔkwɛmɔ nɔ lɛ sɛɛ. (Hebribii 5:⁠7) Yɛ sɔlemɔ he lɛ, Kristofonyo yoo ko ni efee gbɛgbalɔ fe afii 80 lɛ tsɔɔ bɔ ni lɛ diɛŋtsɛ lɛ enuɔ he lɛ mli yɛ nɛkɛ gbɛ nɔ: “Mina akɛ kɛji akɛ maye omanye akɛ gbɛgbalɔ lɛ, belɛ sɔlemɔ he miihia mi. Eye ebua mi ni minyɛ mikɛ mihe efɔ Yehowa nɔ kwraa, ni miyoo akɛ minyɛŋ maje mi diɛŋtsɛ mihewalɛ mli mafee. Mibiɔ Yehowa ni eye ebua mi be fɛɛ be koni matsa nɔ.”

Hɛɛ, bɔni afee ni oye omanye yɛ gbɛgbamɔ sɔɔmɔ lɛ mli lɛ, ehe miihia ni wekukpaa ni mli wa aka okɛ Yehowa teŋ, okɛ ohe afɔ enɔ kwraa kɛtsɔ sɔlemɔ nɔ. Shi, nɔ ni nyiɛ sɛɛ nɛɛ ji sanebimɔ kroko ni he hiaa ni wɔɔbi wɔhe.

Te Suɔmɔ ni Miyɔɔ Kɛhaa Mɛi Krokomɛi lɛ Dalɛ Yɔɔ Tɛŋŋ?

Gbɛgbamɔ ji suɔmɔ kpojiemɔ. Mɛni hewɔ? Ejaakɛ be fɛɛ sɔɔmɔ lɛ biɔ he kɛ afɔleshaa mumɔ. Akɛ gbɛgbalɔ lɛ, okɛ obe kɛ onyɛmɔ miiha be fɛɛ be koni okɛye obua mɛi krokomɛi. Shi kɛ ooonyɛ oya nɔ ofee enɛ lɛ, esa akɛ ona mɛi krokomɛi ahiamɔ nii ahe miishɛɛ diɛŋtsɛ. Beni Yesu yɔɔ shikpɔŋ nɛɛ nɔ lɛ, ejie suɔmɔ ni tamɔ nɛkɛ kpo etsɔɔ gbɔmɛi. Akɛ nɔkwɛmɔ nɔ lɛ, be shɛ ni ekɛ kaselɔi lɛ pɛ miiya he ko banee ko koni “amɛyajɔɔ amɛhe fioo.” Shi, asafoi lɛ tsɔ hiɛ amɛyashɛ jɛmɛ. “Ni beni Yesu kpeleke lɛ, ena mɛi babaoo, ni emusuŋ tsɔ lɛ yɛ amɛ hewɔ, ejaakɛ amɛtamɔ tooi ni bɛ kwɛlɔ; ni ebɔi amɛ nibii pii tsɔɔmɔ.”​—Marko 6:​30-34.

Akɛ gbɛgbalɔi, taakɛ Yesu ji lɛ, esa akɛ wɔna suɔmɔ ni mli kwɔ wɔha gbɔmɛi. Suɔmɔ nɛɛ kanyaa wɔ koni wɔkɛ wɔhe aha amɛ. Taakɛ woloŋmalɔ ko kɛɛ Yesu be ko lɛ: “Lɛ [Nyɔŋmɔ] suɔmɔ kɛjɛ tsui fɛɛ kɛ nilee fɛɛ kɛ susuma fɛɛ kɛ nyɛmɔ fɛɛ mli, kɛ naanyo suɔmɔ tamɔ bɔ ni mɔ sumɔɔ lɛ diɛŋtsɛ ehe lɛ, efe shaa afɔlei kɛ afɔlei fɛɛ.” (Marko 12:33) Nɛkɛ wiemɔi nɛɛ yeɔ ebuaa wɔ ni wɔyɔseɔ akɛ jeee nɔ ni wɔfeɔ yɛ wɔsɔɔmɔ lɛ mli lɛ pɛ ji nɔ ni he hiaa shi moŋ nɔ hewɔ ni wɔfeɔ nakai lɛ.

Akɛ gbɛgbalɔ lɛ, okɛ bei pii woɔ shiɛmɔ kɛ kaselɔ-feemɔ nitsumɔ lɛ mli fe bɔ ni mɛi pii feɔ. Shi okɛ gbɔmɛi pii kpeɔ. Te onuɔ he yɛ amɛhe ohaa tɛŋŋ? Gbɛgbalɔ ko kɛɛ: “Mile akɛ suɔmɔ ji Nyɔŋmɔ mumɔ lɛ yibii lɛ eko. No hewɔ lɛ eji enɛ bɛ kulɛ mihiŋ anɔkwale lɛ mli kwraa, ni mitsiii omanye po ni maye akɛ gbɛgbalɔ lɛ ta. Suɔmɔ haa migbalaa mijwɛŋmɔ kɛyaa gbɔmɛi anɔ, miyɔseɔ amɛ hiamɔ nii, ni mihiɛ sɔɔ kɛ gbɔmɛi lɛ here suɔmɔ ni tamɔ nɛkɛ nɔ. Shi, bei shɛɔ ni abaaka suɔmɔ ni oyɔɔ kɛhaa gbɔmɛi lɛ akwɛ, yɛ amɛsubaŋi loo jeŋbai komɛi ahewɔ. Ni no mli titri esa akɛ mabɔ mɔdɛŋ ni mabo toi ni mato mitsui shi yɛ.”

Ani nɛkɛ ji bɔ ni onuɔ he yɛ gbɔmɛi ni yɔɔ shikpɔŋkuku lɛ mli lɛ ahe? Bɔni afee ni ofee gbɛgbalɔ ni yeɔ omanye lɛ, esa akɛ osumɔ gbɔmɛi. (1 Tesalonikabii 2:​6-8) Bɔni afee ni ofee mɔ ni enitsumɔ mɔɔ shi akɛ gbɛgbalɔ lɛ, be he gbɛjianɔtoo kpakpa hu he miihia. No hewɔ lɛ bi ohe akɛ:

Ani Miyɛ Be he Gbɛjianɔtoo ni Ŋmɛɔ Pɛpɛɛpɛ?

Bɔni afee ni oya nɔ yɛ be fɛɛ sɔɔmɔ lɛ mli yɛ omanyeyeli mli lɛ, esa akɛ gbɛgbalɔ lɛ afee mɔ ni toɔ enibii ahe gbɛjianɔ jogbaŋŋ. Kɛ obɛ be he gbɛjianɔtoo bo diɛŋtsɛ lɛ, gbɛgbamɔ baaje onijiaŋ wui. Shi, ni oyɔɔ be he gbɛjianɔtoo kpakpa ni ŋmɛɔ bo gbɛ koni okɛ be ni fa ko awo shiɛmɔ nitsumɔ lɛ mli lɛ jeee nɔ fɛɛ nɔ ni kɔɔ he.

Be he gbɛjianɔtoo ni ŋmɛɔ pɛpɛɛpɛ he miihia. Ani oyɛ eko? Obaanyɛ obi bo diɛŋtsɛ ohe akɛ: Ani mikɛ be ni sa miiha sɔɔmɔ nitsumɔ lɛ fai lɛ eko fɛɛ eko? Ani manyɛ makɛɛ akɛ miibɔ mɔdɛŋ waa koni minine ashɛ gbɔmɛi ni yɔɔ shikpɔŋkuku lɛ mli lɛ fɛɛ nɔ? Ani miifee tsakemɔi ni he hiaa lɛ yɛ mibe he gbɛjianɔtoo lɛ mli bɔni afee ni maku sɛɛ maya shia lɛ mli ekoŋŋ kɛ minaaa gbɔmɛi lɛ? Ani mifeɔ sɛɛsaramɔi ni mɔɔ shi? Yesu kɛɛ: “No hewɔ lɛ nyɛyaa ni nyɛyafea gbɔmɛi lɛ kaselɔi . . . ni nyɛtsɔɔ amɛ nii.” (Mateo 28:​19, 20, New World Translation.) Shiɛmɔ kɛ nitsɔɔmɔ lɛ fɛɛ fata wɔ sɔɔmɔ nitsumɔ lɛ he. Ani omii shɛɔ ohe yɛ woji ni okɛhaa lɛ pɛ he, aloo okuɔ osɛɛ oyaa mɛi ni jieɔ miishɛɛ kpo lɛ aŋɔɔ, kɛ amɛkpɛlɛ Biblia wolo ko nɔ aloo amɛkpɛlɛɛɛ nɔ? Yɛ ekukufoo mli lɛ, ani ooha sɛɛnamɔ miiba obe he?

Ani Miji Tsɔɔlɔ ni Yaa Ehiɛ?

No ji sanebimɔ kroko ni he hiaa. Paulo ŋma yɛ 2 Timoteo 4:2 (NW) akɛ: “Shiɛmɔ wiemɔ lɛ, ka he, deka yɛ jio, deka bɛ jio, . . . yɛ tsuishitoo kɛ nitsɔɔmɔ he ŋaa mli.” Bɔni afee ni wɔshiɛ wiemɔ lɛ, yɛ asafo lɛ mli loo yɛ esɛɛ hu lɛ, gbɛgbalɔi ni yeɔ omanye lɛ bɔɔ mɔdɛŋ koni amɛna nitsɔɔmɔ he ŋaa. Mɛni hewɔ Paulo tsɛɔ nitsɔɔmɔ akɛ ŋaa lɛ? Ejaakɛ nitsɔɔmɔ biɔ hesaa kɛ fɔ ni afɔɔ feemɔ.

Te ooofee tɛŋŋ oha ohesaa akɛ tsɔɔlɔ lɛ aya hiɛ? Bɔfo Paulo haa hetoo: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ.” (1 Timoteo 4:15) Hɛɛ, esa akɛ gbɛgbalɔi atuu be amɛwo teemɔŋ Biblia kasemɔ, enɔ jwɛŋmɔ kɛ ehe susumɔ mli. Nɔ ni fata enɛ he ji ŋaawoi ni anaa yɛ woji tamɔ Reasoning From the Scriptures, Wɔ Maŋtsɛyeli Sɔɔmɔ, kɛ Theocratic Ministry School Guidebook lɛ mli lɛ ni akɛaatsu nii.a

Bɔni afea ni oye omanye yɛ gbɛgbamɔ sɔɔmɔ lɛ mli lɛ, hiɛmɔ wekukpaa ni ka okɛ Yehowa Nyɔŋmɔ teŋ lɛ mli. Enɛ hu baakanya bo ni ona ni ojie suɔmɔ ni mli kwɔ kpo otsɔɔ gbɔmɛi. Shi, bɔni afee ni ojie suɔmɔ ni tamɔ nɛkɛ po lɛ, jeee akɛ esa akɛ osusu bei abɔ ni okɛwoɔ sɔɔmɔ lɛ mli lɛ pɛ he, shi moŋ esa akɛ sɛɛnamɔ aba obe lɛ he. Yɛ mɛɛ gbɛ nɔ? Kɛtsɔ mɔdɛŋbɔɔ ni he hiaa ni okɛaawo mli koni onine ashɛ gbɔmɛi babaoo nɔ bɔ ni ooonyɛ ni okɛ Maŋtsɛyeli lɛ he sane lɛ aha amɛ. Yɛ naagbee lɛ, yaa nɔ ni oya ohiɛ akɛ tsɔɔlɔ kɛtsɔ gbɛi sɔrɔtoi ni atsɔɔ nɔ abɛŋkɛɔ gbɔmɛi lɛ yɛ sɔɔmɔ nitsumɔ lɛ mli ni oookase nɔ kɛ agbɛnɛ mɔdɛŋbɔɔ ni okɛaakase Biblia lɛ koni oha ohe asa yɛ onitsɔɔmɔ he ŋaa lɛ mli.

[Shishigbɛ niŋmai]