Ekomefeemɔ Ni Aaaba Wekui Amli Yɛ South Afrika Ni Mli Egbala Lɛ Mli

Taakɛ Merlyn Mehl gba lɛ

SOUTH Afrikanyo ji mi, aloo taakɛ akɛleɔ wɔ lɛ South Afrikanyo ni esoro ehewolo nɔ su ji mi. Professor loo tsɔɔlɔ nukpa . . hu ji mi yɛ University of the Western Cape, maŋ lɛ mli univɛsiti ni mɛi diji fa yɛ mli lɛ. Mitsɔ datrɛfonyo yɛ jeŋ nibii ahe mlai ahe nilee mli. Yehowa Odasefoi lɛ ateŋ mɔ ko ji mi yɛ afii 20 ni eho nɛɛ amli. No hewɔ lɛ shihilɛi sɔrɔtoi enyɔ nɛɛ mli te nɔ ni eye ebua mi ni mikpa wekui amli gbeekpamɔ shi yɛ nɛkɛ maŋ ni bei kɛ nɔmɔ yɔɔ mli nɛɛ mli?

Bɔ ni Mida yɛ South Afrika

Atsɔɔ bɔ ni Cape Town ni yɔɔ Afrika shishigbɛ tɔɔ lɛ ji lɛ mli akɛ ‘shikpɔŋ lɛ nɔ ŋshɔ nine loo cape ni yɔɔ fɛo fe fɛɛ.’ Akɛ oookwɛ ŋulamii yɛ gbɛkɛ ni atatu bɛ yɛ Cape Town lɛ ji nɔ ko ni kanyaa mɔ diɛŋtsɛ. Be ko beni mifeɔ nakai lɛ, mikai akɛ mibi minaanyo ko akɛ: “Mɛni ji nɔ ni enɛɛmɛi fɛɛ tsɔɔ? Yɛ anɔkwale mli lɛ esa akɛ etsɔɔ nɔ ko; shi anuuu nɔ ko nɔ ko shishi yɛ biɛ. Mɛni hewɔ esa akɛ gbɔmɛi akwɛ hiɛaŋ babaoo nɛkɛ ni amɛkɛte shi amɛwo mɛi krokomɛi? Mɛni hewɔ nibii eŋmɛɛɛ pɛpɛɛpɛ nɛkɛ?”

Kɛ afɔ bo yɛ South Afrika pɛ kɛkɛ lɛ ohiɛ baa ohe nɔ yɛ hiɛaŋkwɛmɔ nɔ kɛjɛɔ shishijee afii amli. Wekui amli naagbai loo haomɔ yɛ be fɛɛ be. Gbekɛbiiashi tɔɔ ajɛɔ agbalaa gbɔmɛi amli ni akɛ amɛwekui tsɛɔ amɛ. South Afrika mlai tsɛɔ wɔweku lɛ akɛ “mɛi tsuji.” Akɛ gbekɛbii lɛ, atsɔɔ wɔ akɛ mɛi yɛji lɛ ji mɛi ni nyɛɔ wɔnɔ ni akɛ wɔfata mɛi ni anyɛɔ amɛnɔ lɛ ahe. No hewɔ lɛ, akɛni yɛ be mli ni wɔdaraa lɛ, wekui sɔrɔtoi ni aaahi he kome tamɔ yɛ skul loo kwasafoŋ shihilɛ mli bɛ kwraa ‘hewɔ lɛ, anuɔ shishi akɛ akɛ jwɛŋmɔ gbonyo kwɛɔ mɛi ni jɛ wekui krokomɛi amli lɛ. Kɛha wɔ lɛ, etamɔ nɔ ni mɛi yɛji lɛ naa nɔ fɛɛ nɔ ni hi ​—ni shiai, hegbɛi, kɛ skulyaa fata he. “Apartheid,” ni eji wekui amligbalamɔ yɛ mla naa lɛ bafee wiemɔ ni ahiɔ fe fɛɛ yɛ wɔwiemɔi amli.

Aha wɔweku lɛ shi shia ni wɔyɔɔ mli yɛ akutsoŋ ni wekui sɔrɔtoi sɔrɔtoi yɔɔ jɛmɛ ni afɔ mi kɛ minyɛmiyoo yɛ jɛmɛ lɛ dani migbe mishishijee skul lɛ naa. Mɛni hewɔ? Yɛ mla ko ni atsɛɔ lɛ Group Areas Act ni ŋmɛɔ gbɛ ni akɛ he ko pɔtɛɛ aha weku kome lɛ hewɔ. Wɔfa kɛtee he kroko, ni wɔyahi jɛmɛ afii babaoo dani abajaje akɛ jɛmɛ hu ji “mɛi yɛji ashikpɔŋ.” Kɛkɛ ni wɔfa ekoŋŋ.

Yɛ jalɛsaneyeli ni bɛ nɛɛ hewɔ lɛ, mifɔlɔi kɛ agbɛnɛ mitsɔɔlɔi wo mi hewalɛ koni mikase nii waa yɛ skul. Amɛsane lɛ ji: “Esa akɛ otsɔɔ mɔyɛŋ lɛ akɛ ohi fe lɛ.” Enɛ na hewalɛ yɛ misubaŋ nɔ yɛ skul. Eyɛ mli akɛ mihiɛ gboɔ nii waa moŋ, shi misumɔɔ ni makase nii. Nɔ fɛɛ nɔ kanemɔ he mibe babaoo. No hewɔ lɛ, migbe skul naa akɛ nikaselɔi ni le nii fe fɛɛ yɛ maŋ lɛ mli lɛ ateŋ mɔ kome. No hewɔ lɛ eja gbɛ akɛ maya univɛsiti. Akɛni minyaa jeŋ nilee kɛ akɔntaabuu kasemɔ he hewɔ lɛ, ewaaa akɛ makpɛ miyiŋ akɛ matsa minikasemɔ nɔ koni mana jweremɔ nɔ yɛ jeŋ nilee, kɛ jeŋ nibii ahe mlai ahe nilee kɛ akɔntaabuu he nilee mli akɛ nibii titrii ni mikaseɔ.

Kɛjɛ 1960 (ni ji afi nɔ ni mije univɛsiti shishi lɛ) kɛkɛ ni Separate Universities Act lɛ bɔi nitsumɔ, ni ehe bahia ni maya univɛsiti ni afee aha miwekubii lɛ pɛ. Awieɔ nikaselɔi ni yaa nɛkɛ univɛsitii sɔrɔtoi nɛɛ amli lɛ ahe waa. Migbeɔ naa kɛ omanyeyeli afi fɛɛ afi ni yɛ naagbee lɛ minine shɛ jeŋ nilee kɛ nuklea he nikasemɔ mli jweremɔ nɔ lɛ nɔ, ni enɛ gbala mɛi pii ajwɛŋmɔ kɛba minɔ titri lɛ akɛni ahala mi akɛ miyatsɔɔ nii yɛ University of the Western Cape​—ni ji klɛŋklɛŋ nikaselɔ ni ji mɔ tsuru ni ahala lɛ kɛtee jɛmɛ lɛ hewɔ.

Ni kɛlɛ, mihao waa yɛ shihilɛ ni tamɔ nɛkɛ mli. Nɔ ni ji hetoo diɛŋtsɛ kɛha nɔ ni wala shihilɛ tsɔɔ lɛ elaaje mi: Mɛni ji yiŋtoo ni yɔɔ enɛɛmɛi fɛɛ sɛɛ? Sanegbaa ni tee nɔ yɛ mi kɛ minaanyo lɛ teŋ, taakɛ mitsi ta yɛ yiteŋ gbɛ lɛ tee nɔ yɛ nɛkɛ be nɛɛ mli.

Aha Misanebimɔi lɛ Ahetoo

Kɛbashi nɛkɛ be nɛɛ mli lɛ, no mli lɛ gbɛfaŋnɔ fioo ko pɛ jamɔ ena yɛ mishihilɛ mli. Beni miji gbekɛ lɛ, mitee Anglican Sɔlemɔ lɛ, ni awaje mi beni miye afii 16. Shi minaaa hetoo ko maha misanebimɔi lɛ. No hewɔ lɛ beni midaa lɛ, sɔlemɔ ni miyaa lɛ ba shi, ni yɛ naagbee lɛ mikpa.

Gbi ko lɛ mitee minaanyo ko ni mikɛ lɛ tee univɛsiti lɛ shia. Eŋa, ni ji Julia, kɛ Biblia lɛ tsu nii ni ekɛtsɔɔ mi akɛ hetoo yɛ kɛha maŋkwramɔŋ kɛ weku mligbalamɔi ahe naagbai lɛ, ni jeee South Afrika nɔ lɛ pɛ, shi moŋ jeŋ muu lɛ fɛɛ nɔ. Minaa kpɛ mihe ni miyiŋ bɔi mi kɔshikɔshi feemɔ. Shi mihe wolo ni ji Basis for Belief in a Righteous New World lɛ, ni mitee shia, ni mije ekanemɔ shishi akɛ miitao male nɔ ni yɔɔ mli kɛkɛ.

Beni atswaa maŋkɛ ŋmɛji enyɔ lɛ, no mli lɛ miikane wolo lɛ lolo! Naa naataomɔi ni jwɛŋmɔ yɔɔ mli ni tsɔɔ nɔ hewɔ ni Biblia lɛ ji anɔkwale, nɔ hewɔ ni anyɛɔ akɛ he fɔɔ egbalɛi anɔ, loo nɔ hewɔ ni adesai yɔɔ haomɔ babaoo mli nɛkɛ, nɔ hewɔ ni 1914 ji be ni sa kadimɔ nakai, nɔ hewɔ ni esa akɛ wɔna hiɛnɔkamɔ yɛ shikpɔŋ nɔ jalɛ nibii agbɛjianɔtoo hee ko mli. Esa akɛ enɛ afee anɔkwale!

Enɔ jetsɛremɔ lɛ, miku misɛɛ mitee minaanyo lɛ shia. Mibi eŋa lɛ akɛ: “Ani oyɛ woji krokomɛi ni tamɔ nɛkɛ?” Miku sɛɛ mitee shia ni mihiɛ woji babaoo ni kɔɔ Biblia mli tsɔɔmɔi, Daniel kɛ Kpojiemɔ gbalɛi lɛ amlitsɔɔmɔ, nɔ ni gbii ekpaa nibɔɔ lɛ tsoɔ kɛ babaoo, babaoo diɛŋtsɛ. Nɔ ni he hiaa titri lɛ, amɛtsɔɔ akɛ he ko he ko bɛ Biblia lɛ mli ni abaanyɛ adamɔ nɔ ajie hiɛaŋkwɛmɔ yɛ weku mli lɛ kpo, ejaakɛ “Nyɔŋmɔ jeee mɛi ahiɛaŋkwɛlɔ.” (Bɔfoi lɛ Asaji 10:34) Mikane woji lɛ fɛɛ. Naa hetoi kɛha sanebimɔi ni egba minaa yɛ be fɛɛ mli lɛ. Yɛ be mli ni mije gbɛ mikase nii aahu afi lɛ, abaptisi mi akɛ Yehowa Odasefoi lɛ ateŋ mɔ kome. Enɛ ba nɔ yɛ November 21, 1967.

Akɛ asafo loo gbɛjianɔtoo lɛ, Yehowa Odasefoi lɛ jeee mɛi ni gbalaa weku mli ni amɛkɛ amɛhe wooo maŋkwramɔ mli. Amɛkɛ anɔkwayeli kɛ sɛɛfimɔ haa nɔyeli kome pɛ, Nyɔŋmɔ Maŋtsɛyeli lɛ. Kɛha amɛ lɛ, mɔ ko shidaamɔ yɛ gbɔmɛi ateŋ lɛ jeee nɔ ko ni he hiaa kwraa. Shi yɛ South Afrika lɛ, naagbai yɛ be fɛɛ mli yɛ weku mli saji ahe. Yɛ nakai Group Areas Act lɛ hewɔ lɛ, asafoi lɛ hu mli egbala amɛfee wekui loo bɔ ni amɛhewolo nɔ su yɔɔ yɛ hei ni amɛyɔɔ lɛ hewɔ. No hewɔ lɛ nyɛmimɛi ni yɔɔ Claremont Congregation he ni miyaa lɛ ateŋ mɛi ni fa ji mɛi tsuji. Mɛi yɛji fioo ni yaa jɛmɛ lɛ ji maŋsɛɛ sanekpakpashiɛlɔi loo hii ni ji onukpai ni yɔɔ asafo lɛ mli.

Yɛ afii nɛɛ fɛɛ mli lɛ, mikaa he mikaiɔ saji enyɔ ko ni ba ni tsɔɔ bɔ ni ewa akɛ mɔ ko aaagbala ehe shi kɛaajɛ nɛkɛ weku mli sui nɛɛ ahe lɛ. Yɛ kpee bei amli lɛ, nɔ ni mɛi yɛji lɛ fɔɔ feemɔ ji ni amɛya cafeteria liamɔ ni ato lɛ hiɛ, amɛheɔ amɛniyenii, kɛkɛ lɛ amɛ pɛ amɛtee amɛyatara he ko banee amɛyɛ nii, yɛ be mli ni wɔteŋ mɛi ni eshwɛ lɛ damɔ shi ni wɔmiimɛ. Enɛ hao mi waa. Nɔ ni Odasefoi ni ji mɛi yɛji lɛ fɔɔ feemɔ ji ni amɛkɛ amɛŋamɛi atsɔɔ tamɔ nɛkɛ: “Misuɔlɔ, naa Merlyn. Eekase Biblia lɛ.” “Merlyn, naa miŋa, nyɛmiyoo nɛkɛ-kɛ-nɛkɛ.” Amɛkɛ miklɛŋklɛŋ gbɛi tsɛɔ mi, yɛ be mli ni mi lɛ, esa akɛ matse amɛ “nyɛmiyoo” loo “nyɛminuu.” Enɛ woɔ mi mlila!

Kɛkɛ ni mibɔi nibii ahe susumɔ. Naagba lɛ ji akɛ osusuɔ yɛ be fɛɛ mli akɛ mɔ kroko lɛ moŋ ji mɔ ni kɛ weku mligbalamɔ baa. Ni kɛlɛ esa akɛ South Afrika shihilɛ ni kɛ ehe kpaaa gbee nɛɛ asa mɔ fɛɛ mɔ ni hiɔ biɛ lɛ he. Eji anɔkwale, ehe miihia ni Odasefoi ni ji mɛi yɛji lɛ atsu nii waa ni amɛsaa bɔ ni amɛkɛ mɛi krokomɛi ni jeee mɛi yɛji yeɔ haa lɛ. Shi nakai nɔŋŋ sa akɛ mi hu mafee. Biblia lɛ kɛ ŋaawoo kpakpa haa yɛ enɛ he: “Kaaha omumɔ mli miifu oya, ejaakɛ mlifu lɛ kwashiai amiinaa eyɔɔ.” (Jajelɔ 7:⁠9) Hɛɛ, esa akɛ mabɔ mɔdɛŋ koni mikaha mimli miifu babaoo koni mikana mɛi krokomɛi ahe jwɛŋmɔ fɔŋ mra yɛ nɔ ni minaa lɛ pɛ hewɔ yɛ weku mligbalamɔi anaa.

Esa akɛ matsi ta hu akɛ shihilɛ hu ni yɔɔ maŋ lɛ mli lɛ etsake saŋŋ kɛjɛ nakai be lɛ mli. Tsutsu lɛ, mɛi yɛji fioo ko pɛ aŋmɛɔ amɛ gbɛ ni amɛfutuɔ wekui krokomɛi yɛ amɛjamɔ mli, ni esa akɛ amɛ pɛ amɛyɛ nii yɛ banee mli. Shi ebɛ lɛ nakai dɔŋŋ.

Shi nɔ ni fe fɛɛ lɛ, naa gbɛjianɔtoo loo asafo ko ni emlibii kɛ amɛhe yeɔ yɛ heyeli mli, ni amɛhereɔ amɛhe kɛbaa amɛshiai, ni amɛtsɛɔ amɛhe nyɛminuu kɛ nyɛmiyoo ni nakai hu amɛtsɔɔ! Amɔ nɛkɛ anɔkwalei nɛɛ amli shiŋŋ ejaakɛ edamɔ Biblia mli shishitoo mlai anɔ. No hewɔ lɛ kɛji akɛ weku mli bei te shi lɛ​—ni South Afrika lɛ eji nii ni baa be fɛɛ be lɛ​—anɔkwalei nɛɛ ahe susumɔ baa mihenumɔi ashi yɛ be fɛɛ mli. Beni afii lɛ hoɔ lɛ, minyɛ mikase gbɛ ni matsɔ nɔ ni mikɛ Biblia mli Shishitoo mlai atsu nii jogbaŋŋ ni mi diɛŋtsɛ lɛ mina toiŋjɔlɛ yɛ mimli yɛ nɛkɛ weku mligbalamɔi amli saji nɛɛ ahe. Shi esa akɛ mɔ ko atsu he nii!

Be Fɛɛ Sɔɔmɔ Lɛ

Mibaptisimɔ lɛ sɛɛ etsɛɛɛ kwraa ni minu he akɛ ehe miihia ni maha misɔɔmɔ lɛ aya hiɛ. Mibɛ ŋa ni gbɛnaa nii fioo ko pɛ jwere minɔ, no hewɔ lɛ mije daa gbɛgbamɔ shishi yɛ October 1, 1968. Enɛ kɛ hoofeemɔ fioo ba ejaakɛ no tsɔɔ akɛ esa akɛ mashi univɛsiti lɛ ni maŋmɛɛ nɔ ni mɛi pii susuɔ akɛ eji heloo gbɛfaŋ nitsumɔ ni hiɛ gbɛi kɛ shika lɛ he. Adafitswaa wolo ko ni tsi minifeemɔ nɛɛ ta lɛ kɛ wiemɔ lɛ ba akɛ: “Jeŋ Nilelɔ Kpanaa Miiya Ayashiɛ Biblia.” Etsɛɛɛ ni mibɔi Biblia mli nikasemɔi nyɔŋma loo nɔ ni fe nakai ni mikɛ gbɔmɛi sɔrɔtoi loo wekui sɔrɔtoi feɔ lɛ feemɔ. Nɛkɛ gbɔmɛi nɛɛ ateŋ mɛi enyɔ na baptisimɔ yɛ kpee kome ko shishi, ni yɛ kpee ni nyiɛ sɛɛ ba lɛ, mɛi ejwɛ; kɛkɛ ni kpawo, ni ebɔi nɔtsaramɔ.

Yɛ September 17, 1969 lɛ, mikɛ Julia, Odasefonyo lɛ ni ha mina anɔkwale lɛ bote gbalashihilɛ mli. No mli lɛ ekɛ ewu egbala mli jeeŋmɔ yɛ mla naa kɛ Ŋmalɛ naa. Enɛ tsɔɔ akɛ mina weku amrɔ nɔŋŋ, ejaakɛ eyɛ gbekɛbii hii enyɔ, John kɛ Leon. Wɔkpɛ wɔyiŋ akɛ wɔbaaya nɔ yɛ gbɛgbamɔ sɔɔmɔ lɛ mli bei abɔ ni wɔɔnyɛ, ni enɛ fee shifimɔ kpakpa kɛha gbekɛbii hii lɛ, ni eye ebua mi ni wɔye omanye yɛ gbalashihilɛ mli kɛ nɛkɛ gbekɛbii hii enyɔ nɛɛ.

Afii 70 lɛ shishijee mli ji be ni miishɛɛ yɔɔ mli waa akɛ aaahi be fɛɛ sɔɔmɔ lɛ mli, taakɛ nɛkɛ niiashikpamɔi nɛɛ tsɔɔ lɛ. Beni wɔshiɛɔ kɛjɛɔ shia kɛyaa shia lɛ, wɔkɛ awura ko ni atsɛɔ lɛ Annabel kpe. Amrɔ nɔŋŋ ni ehe wolo ni ji Anɔkwale ni kɛ Mɔ Yaa Naanɔ Wala Mli Lɛ kɛ Biblia kome. (Yɛ sɛɛ mli lɛ wɔna wɔle akɛ shika ni eyɔɔ loo eshwɛ yɛ ehe lɛ fɛɛ ekɛhe woji lɛ​—ni ehe bahia ni mɔ ni haa lɛ miliki lɛ aku esɛɛ aba ebahe eshika yɛ otsi kroko mli!) Kɛjɛ shishijee lɛ, ebɔɔ mɔdɛŋ esaa ehe jogbaŋŋ kɛhaa daa otsi Biblia mli nikasemɔ lɛ yɛ ebifao ni he ejɔɔɔ lɛ fɛɛ sɛɛ. . Agbɛnɛ eje shishi egba eweku lɛ nɔ ni ekaseɔ lɛ he sane. Etsɛɛɛ ni ewu, Billy, fata he kɛba kpeei. Annabel fɔlɔi to alfabeta lɛ naa amɛkɛwo amɛbii enumɔ lɛ gbɛi. Enyɛmiyoo Beattie je nikasemɔ shishi. Charlie kɛ eŋa sumɔŋ ni ashi amɛ yɛ sɛɛ. Daphne hu tsɔɔ miishɛɛ, ni Edna kɛ ewu bafata he. Ŋmɛnɛ nakai weku muu lɛ fɛɛ etee nɔ esɔmɔ yɛ anɔkwayeli mli afii babaoo. Hii lɛ ji onukpai loo asafoŋ sɔɔlɔi, ni yei lɛ ateŋ mɛi pii miisɔmɔ akɛ gbɛgbalɔi.

Agbɛnɛ Stanley hu yɛ. Wɔkɛ lɛ kpe yɛ shia-kɛ-shia nitsumɔ lɛ mli, Ju shwane ko yɛ fɛibe mli lɛ naagbee shia ni wɔtee. Shi kwɛ bɔ ni ehere wɔ eha! Eŋa lɛ fɔ nine etsɛ wɔ, ni wɔnu he amrɔ nɔŋŋ akɛ naa nuu ni sheɔ Nyɔŋmɔ gbeyei. Yɛ anɔkwale mli lɛ, esɔle koni ena yelikɛbuamɔ ni ekɛnu Biblia lɛ shishi etsɛko. Wɔ klɛŋklɛŋ sanegbaa lɛ kɔɔ Triniti tsɔɔmɔ lɛ he. Be mli ni wɔkɛ lɛ esusu saji ahe aaafee ŋmɛlɛtswaa kome lɛ, efee tamɔ enu shishi. Enɔ otsi lɛ, ekɛ nɛkɛ wiemɔi nɛɛ here wɔ: “Nyɛsane lɛ ja. Mikane ‘Kpaŋmɔ Hee’ lɛ fɛɛ ni minaaa Triniti yɛ he ko he ko. Mitee koni mayabi osɔfo lɛ nɔ hewɔ ni elaka mi. Esumɔɔɔ ni ekɛ mi wieɔ, no hewɔ lɛ mikɛ wolo kotokui ni mikɛbiɔ shika kɛjɛɔ sɔlemɔ lɛ mlibii krokomɛi adɛŋ lɛ ha lɛ.” Enɛɛmɛi fɛɛ tee nɔ ni eheko wolo kome po kɛjɛko wɔdɛŋ! Eesumɔ ni eba kpeei, ni wɔwo lɛ shi akɛ wɔbaaba ni wɔkɛ lɛ aya. Shi nakai Hɔgbaa lɛ wɔkpe sɛɛ aaafee minitii enumɔ. Wɔkɛ lɛ kpe ni eta baisikle nɔ eeya kpee lɛ shishi! Ekɛɛ akɛ: “Misusu akɛ nyɛhiɛ ekpa minɔ.” Wɔkɛ lɛ kase nii shii etɛ yɛ otsi mli, ni abaptisi lɛ yɛ be mli ni wɔkɛ lɛ kpe klɛŋklɛŋ kwraa lɛ sɛɛ nyɔji etɛ pɛpɛɛpɛ. Stanley kɛ ekaa ni eyɔɔ kɛjɛ shishijee lɛ esɔmɔ aahu afii pii bianɛ.

Julia kɛ mi bu naa akɛ yɛ afii lɛ fɛɛ mli lɛ, wɔna hegbɛ wɔye wɔbua gbɔmɛi aaafee 50 ni amɛbatsɔmɔ Yehowa Odasefoi.

Sɛɛkuu Kɛmiiya Heloo Gbɛfaŋ Nitsumɔ Nɔ

Yɛ be mli ni wɔsɔmɔ yɛ gbɛgbamɔ sɔɔmɔ lɛ mli afii ejwɛ sɛɛ lɛ, wɔshika fɛɛ ta. Shihilɛ lɛ mli ewa, ni gbekɛbii hii lɛ miidara. No hewɔ lɛ wɔkɛ dɔlɛ kɛ shishashaomɔ kpɛ wɔyiŋ akɛ wɔbaashi be fɛɛ sɔɔmɔ lɛ. Enɛ ba mli yɛ September 1972. Mɛni ekoŋŋ? Afi sɛɛ, yɛ January 1, 1974 lɛ, miku misɛɛ mitee univɛsiti lɛ akɛ tsɔɔlɔ beni gbɛhe ko ba yɛ jeŋ nibii ahe mlai ahe nilee kasemɔ mli lɛ. Enɛ tsɔɔ tsakemɔi babaoo kɛ agbɛnɛ wɔhe nɔ ni wɔɔkwɛ jogbaŋŋ koni wɔkalaaje wɔhemɔkɛyeli. Shi akɛni Julia fi misɛɛ waa hewɔ lɛ, minyɛ mifee tsakemɔi lɛ. Eye ebua waa ni eha wɔnyɛ wɔkɛ wɔhe wo sɔɔmɔ lɛ kɛ asafoŋ nibii amli​—ni wɔkɛtee nɔ ‘wɔtao maŋtsɛyeli lɛ tsutsu.’​—Mateo 6:⁠33.

Akɛni aabi ni univɛsiti tsɔɔlɔi fɛɛ akase nii kɛtsɔ nibii amlipɛimɔ nɔ hewɔ lɛ, sanebimɔ ni kɔɔ nuklea nibii ahe nikasemɔ he lɛ te shi ekoŋŋ. Mina akɛ ewa waa kɛha mi akɛ mapɛi nibii amli yɛ nɛkɛ gbɛ nɔ maha kuu fioo ko pɛ yɛ be mli ni mikɛ mibe tsu nii yɛ univɛsiti lɛ sɛɛ mikɛtsɔɔ gbɔmɛi anɔkwale ni yɔɔ Biblia lɛ mli lɛ. Etamɔ nɔ ko ni sɛɛnamɔ bɛ he akɛ okɛ ohe awo nibii amlipɛimɔ mli yɛ efeemɔ pɛ kɛkɛ hewɔ. Ni agbɛnɛ, nuklea he nikasemɔ kɛ emlipɛimɔ baanyɛ afee nɔ ni akɛbaatsu tawuu nibii ahe nii, ni enɛ kɛ naagbai ni kɔɔ Kristofoi ahe ni amɛkɛwooo maŋ saji amli he lɛ baaba.​—Yesaia 2:​2-4.

Yɛ South Afrika lɛ, univɛsiti ni tamɔ nɛkɛ ni ji Western Cape nɔ lɛ yɛ nikaselɔi babaoo ni atsɛɔ amɛ “mɛi ni ebɔɔɔ mɔdɛŋ.” Amɛbaa univɛsiti lɛ ni amɛsako amɛhe jogbaŋŋ yɛ skul kpakpa ni amɛnaaa loo ohia mli nibii krokomɛi ahewɔ. No etsɔɔɔ akɛ amɛbɔɔɔ mɔdɛŋ​—hegbɛ pɛ kɛkɛ ni amɛnako. No hewɔ lɛ afii 13 nɛ ni mitsu nii yɛ univɛsiti lɛ ni miitao bɔ ni nikasemɔ wa kɛhaa nɛkɛ nikaselɔi nɛɛ lɛ mli ni miito gbɛjianɔ kroko miiha amɛ yɛ nitsɔɔmɔ mli. Nɛkɛ nibii amlipɛimɔ nɛɛ eha mina jweremɔ nɔ kroko yɛ jeŋ nibii ahe mlai ahe nikasemɔ ni kɔɔ tsɔsemɔ he lɛ mli ni eha awo minɔ akɛ professor loo nilelɔ kpanaa. Nibii amlipɛimɔ he gbɛjianɔtoo yɛ ekomefeemɔ mli nɛɛ miiya nɔ U.S. Amerika kɛ Israel nikasemɔ he wuji loo univɛsitii amli. Eyɛ miishɛɛ akɛ akɛ nibii ni wɔnaa yɛ nɛkɛ nibii amlipɛimɔ nɛɛ mli lɛ aaato Yehowa Odasefoi anitsɔɔmɔ gbɛi lɛ ahe.

Nikasemɔ ko ni Professor Reuven Feuerstein kɛ enanemɛi nitsulɔi ni yɔɔ Israel lɛ kɛba lɛ ji nɔ ni atsɛɔ lɛ akɛ Mediated Learning Experience. Nɔ ni yɔɔ nɛkɛ nikasemɔ nɛɛ mli ji akɛ jeee akɛ gbekɛbii ajwɛŋmɔŋ nyɛmɔ yaa hiɛ kɛtsɔɔ nibii ni jɛɔ sɛɛ ni kanyaa amɛ henumɔŋ lɛ pɛ nɔ kɛkɛ, shi moŋ kɛtsɔɔ adesa ko ni ji teŋdamɔlɔ ni tsɔɔ nɔ ni kanyaa amɛ lɛ shishi ehaa amɛ lɛ nɔ. Kɛ afeee lɛ nakai lɛ, gbekɛbii nyɛɛɛ aha amɛjwɛŋmɔŋ nyɛmɔ aya hiɛ bɔ ni amɛaanyɛ.

Yehowa Odasefoi maa nɔ ni esa akɛ fɔlɔ lɛ atsu akɛ shishijee gbekɛ lɛ tsɔselɔ nɔ mi. Odasefoi ni ji fɔlɔi kɛ ŋmɛlɛtswai babaoo pɛiɔ woji ni yeɔ buaa Biblia lɛ kasemɔ kɛ emli mfonirii amli kɛ amɛbii, amɛbiɔ amɛ saji yɛ nɔ ni amɛnaa lɛ ahe ni amɛyeɔ amɛbuaa amɛ koni amɛnu nɔ ni Biblia mli saji lɛ tsɔɔ lɛ shishi. Jeee akɛ amɛmaa daa otsi Biblia lɛ kasemɔ nɔ mi kɛkɛ shi moŋ daa tsɔsemɔ, titri lɛ, yɛ Biblia mli shishitoo mlai amli. (5 Mose 6:​6-8) Nɔ ni atao mli ana yɛ yiteŋ gbɛ nɛɛ miitao atsɔɔ akɛ yɛ nakai feemɔ mli lɛ fɔlɔi miiha amɛbii anilee aya hiɛ diɛŋtsɛ.

Constructivism aloo nibii atswaa kɛ shimaa ji nikasemɔ kroko ni tsɔɔ akɛ nitsɔɔmɔ jeee ni aajie tsɔɔlɔ lɛ jwɛŋmɔ mli saji awo nikaselɔ lɛ jwɛŋmɔ mli kɛkɛ. Shi moŋ, mɔ fɛɛ mɔ tswaa nɔ ni enaa loo enuɔ loo ekpaa shi lɛ emaa shi lɛ diɛŋtsɛ. No hewɔ ni gbɔmɛi enyɔ baanyɛ abo sane ko toi, shi ehaa amɛsanenaamuu feɔ sɔrɔto lɛ. Kɛ mɛi komɛi baanyɛ akase nii jogbaŋŋ ni emɔ shi lɛ, esa akɛ amɛtsu nɔ ni amɛnuɔ lɛ hu he nii jogbaŋŋ amɛ diɛŋtsɛ.

Yehowa Odasefoi akpeei woɔ enɛ feemɔ diɛŋtsɛ he hewalɛ. Aakpa gbɛ akɛ mɔ fɛɛ mɔ baatsɔ hiɛ asaa ehe yɛ nɔ ni abaasusu he lɛ he kɛjɛ wolo lɛ mli dani eba. Yɛ kpee lɛ diɛŋtsɛ shishi lɛ, ahaa toibolɔi lɛ diɛŋtsɛ wieɔ yɛ nibii sɔrɔtoi ni amɛsaa amɛhe yɛ he lɛ nɔ. Yɛ nɛkɛ gbe nɔ lɛ, jeee akɛ aawo mɛi ahewalɛ koni amɛjaje nɔ ni amɛkase lɛ pɛ kɛkɛ, shi moŋ ni amɛna mɛi krokomɛi ahesaamɔ lɛ he sɛɛ.

Kompiuta ni akɛkaseɔ nii ni ba lɛ hu ji nɔ ko ni ajie yi akɛ nɔ ni abaatsɔ nɔ ni mɔ ko kɛtsɔse lɛ diɛŋtsɛ ehe. Ni kɛlɛ, Biblia kasemɔ he nitsumɔ ni Odasefoi lɛ etsu he nii afii babaoo yɛ gbɔmɛi lɛ ashiai amli lɛ eye omanye fe nakai! Tsɔselɔ kome baanyɛ atsɔɔ mɔ kome, mɛi enyɔ loo mɛi etɛ nii (yɛ bei komɛi amli lɛ babaoo) koni amɛsusu nɔ ko ni akala ni damɔ Biblia mli sane ko nɔ ni nikaselɔ lɛ etsɔ hiɛ esaa ehe yɛ mli lɛ he. Awoɔ nikaselɔ lɛ hewalɛ ni etsɔɔ bɔ ni enuɔ shishi ehaa lɛ mli, kuku fɛɛ kuku, kɛkɛ lɛ asusu enɛ he ​—lɛlɛŋ eji mɔ diɛŋtsɛ Biblia kasemɔ. Akɛni akɛ Shishitoo mlai ahe tsɔsemɔ ni tamɔ nɛkɛ tsuɔ nii diɛŋtsɛ hewɔ lɛ, ebɛ naakpɛɛ mɔ akɛ Yehowa Odasefoi shwereɔ taakɛ bɔ ni amɛfeɔ lɛ. Ni kɛlɛ, ehe ehiaaa ni amɛkase nɛkɛ shishitoo mlai nɛɛ kɛjɛ univɛsiti. Amɛnaa kɛjɛɔ jɛɛhe ni nɔ kwɔ​—Biblia lɛ mli.​—Mateo 28:​19, 20; Yohane 6:⁠45.

Wekui Amli Gbeekpamɔ Bayeɔ Wekui Amli Bei Najiaŋ

Afii nyɔŋmai enyɔ eho oya kɛjɛ be mli ni mibatsɔ Yehowa Odasefoi lɛ ateŋ mɔ kome. John kɛ Leon, mibanumai lɛ edara, abaptisi amɛ ni amɛmiisɔmɔ yɛ anɔkwayeli mli. Afɔ wɔbinuu Graeme yɛ 1976. Eji hegbɛ hu akɛ wɔɔtsɔse lɛ yɛ anɔkwale lɛ gbɛ lɛ nɔ. Ajɔɔ wɔweku lɛ, ejaakɛ Julia enyɛ ekɛ ehe ewo gbɛgbamɔ sɔɔmɔ lɛ mli ekoŋŋ, yɛ be mli ni mi hu mifeɔ gbɛgbalɔi awalɔ kɛ hooo lɛ shii etɛ yɛ afi lɛ mli. Weku mli bei etee nɔ babaoo agbɛnɛ yɛ South Afrika. Mɔ ko naa enɛ kɛtsɔɔ nibii ni aŋmalaa yɛ gbogboi ahe lɛ nɔ ni anuɔ he yɛ kɔɔyɔɔŋ. Ni kɛlɛ, yɛ nɛkɛ weku mli gbeekpamɔ ni bɛ nɛɛ fɛɛ sɛɛ lɛ, ŋmɛnɛŋmɛnɛ beaŋ naakpɛɛ nii miiya nɔ. Akɛni nɔyeli lɛ mlai eba mlai ni kɔɔ naanyobɔɔ he lɛ shi hewɔ lɛ, Yehowa Odasefoi nyɛɔ amɛkpeɔ yɛ ekomefeemɔ mli yɛ faŋŋ mli yɛ heyeli mli, titri lɛ yɛ amɛkpeei wuji ashishi. Minaa gbɛfaŋnɔ yɛ gbɛjianɔ ni atoɔ ahaa kpeei ni wekui sɔrɔtoi fɛɛ kpeɔ yɛ shishi nɛɛ eko mli. Wɔnaa bɔ ni weku mligbalamɔ ni bɛ tsuɔ nii yɛ biɛ, gbɔmɛi ni akɛ Biblia mli tɛi ni afolɔ ashwie shi ni nɔ kwɔlɔ etsɔse amɛ yɛ be mli ni amɛnaaa hewolo nɔ su akɛ eko fe eko! Biɛ ji he ni onaa bɔ ni gbɔmɛi naa mɛi krokomɛi amɛhaa yɛ mligbɛ, jeee bɔ ni amɛhewolo nɔ su yɔɔ.

Ŋmɛnɛ, Yehowa Odasefoi pɛ ji anɔkwa jeŋ muu fɛɛ adesai aweku ni efee ekome lɛ. Etsɛŋ, yɛ enibii agbɛjianɔtoo hee lɛ mli lɛ, Yehowa “baatsumɔ hiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” Mikɛ minyɛmimɛi hii kɛ yei akpekpei abɔ ni yɔɔ jeŋ muu fɛɛ lɛ miikpa nakai jeŋ hee ni yɔɔ fɛo ni ja ni weku mligbalamɔ bɛ mli lɛ gbɛ.​—Kpojiemɔ 21:3-5.