Okɛ Onii Ni Oyɔɔ Lɛ Awo Yehowa Hiɛ Nyam
‘MIBƐ nii; gbekɛ kɛkɛ ji mi ni nibii fioo ko pɛ miyɔɔ.’ ‘Miyaaa skul kɛshɛɛɛ shɔŋŋ; mɛni manyɛ maha Yehowa?’ Miyɛ naatsii nɔ ko ni mli wa waa; esa akɛ Yehowa ashi mi kɛkɛ.’ ‘Mida yɛ afii amli; ekpe sɛɛ tsɔ kɛha mi akɛ matao nii.’
Ani susumɔi tamɔ enɛɛmɛi baa ojwɛŋmɔ mli yɛ be mli ni osusuɔ sane nɛɛ yitso lɛ he lɛ? Shi kɛlɛ, ekolɛ oyɛ nii fe bɔ ni osusuɔ. Kaimɔ Nuŋtsɔ Yesu wiemɔi ni ekɛ asafo ni yɔɔ Smirna lɛ wie lɛ: “Mile onitsumɔi lɛ kɛ omanehulu lɛ kɛ ohia lɛ—shi kɛlɛ niiatsɛ jio.” (Kpojiemɔ 2:9) Yesu etsɔ hiɛ ewie yɛ Gɔŋ nɔ Shiɛmɔ lɛ mli akɛ: “Nyɛkabɔa jwetri nyɛhaa nyɛhe yɛ shikpɔŋ lɛ nɔ . . . Shi nyɛbɔa jwetri nyɛhaa nyɛhe yɛ ŋwɛi . . . Shi he ni nyɛjwetri yɔɔ lɛ, jɛi nyɛtsui aaahi.” (Mateo 6:19-21) Ani wɔ Nuŋtsɔ lɛ wiemɔi nɛɛ haa ohiɛnɔkamɔ mli waa? Hɛɛ, ekolɛ oyɛ nɔ ko yɛ omli ni wɔŋwɛi Tsɛ, Yehowa, kɛ e-Bi lɛ buɔ akɛ nɔ ko ni jara wa waa. Nyɛhaa wɔtaoa mli.
Obalaŋtaiaŋ Agbojee Lɛ—Hewalɛ kɛ Ekaa
Mɛɛ gbɛ nɔ obalaŋta aaatsɔ ekɛ sɔɔmɔ ni sɛɛnamɔ yɔɔ he aha Yehowa yɛ? Abɛi 20:29 maa nɔ mi ehaa wɔ akɛ obalaŋtai yɛ ninamɔ ko ni nɔ kwɔ waa—gbɔmɔtsoŋ hewalɛ. Kwɛ bɔ ni ehaa mɔ naa miishɛɛ akɛ eeena obalaŋta ko ni etuu ehewalɛ kɛ ebalaŋtaiaŋ hefɛo fɛɛ eha wɔ-Nyɔŋmɔ lɛ sɔɔmɔ.
Nyɛhaa wɔgbelea yinɔsane mli baafai lɛ kɛyaa 1930 afi lɛ ashishijee mli yɛ be mli ni obalaŋtai babaoo nu anɔkwale ni yɔɔ Biblia lɛ mli lɛ he lɛ. Mɔ ko ni eye afii 16 ma wolo ni akɛkaseɔ Biblia ni atsɛɔ lɛ Creation, ni Watch Tower Asafo lɛ ŋma lɛ. Beni ekaneɔ kɛshɛɔ yitso ni ji “The New Creation” (Adebɔɔ Hee Lɛ) he, ni ekane henɔjɔɔmɔ he sane lɛ, no mli lɛ ena nɔ ni etaoɔ ni ekɛ ewala afee. Amrɔ nɔŋŋ kɛkɛ ni ejɔɔ ehe nɔ eha Bɔlɔ ofe lɛ. Afi ni nyiɛ sɛɛ lɛ, ekane wolo kroko hu, Vindication (Book One), ni ekase hegbɛ ni ka shi akɛ eeenyɛ ena gbɛfaŋnɔ yɛ Nyɔŋmɔ gbɛi lɛ kɛ ejeŋ muu fɛɛ maŋtsɛyeli lɛ hefamɔ mli lɛ he nii. Nɛkɛ adafitswaa nɛɛ kanya shwee ko yɛ emli akɛ efee be fɛɛ sɔɔlɔ. Nakai afi lɛ nɔŋŋ mli lɛ, eŋma gbɛbimɔ wolo ni aha lɛ gbɛgbamɔ hegbɛi, ni étsa nɔ yɛ be fɛɛ sɔɔmɔ lɛ mli aahu kɛbashi ŋmɛnɛ. Eyɛ mli akɛ amrɔ nɛɛ etipɛŋfoi lɛ ateŋ mɛi babaoo egbe amɛ shikpɔŋ nɔ sɔɔmɔ lɛ naa moŋ, shi mɛi ni eshwɛ lɛ ateŋ mɛi babaoo tsɔɔ susuma muu fɛɛ mli hetuu-kɛhamɔ mumɔ kɛhaa wɔŋwɛi Tsɛ lɛ.
Ani obalaŋtai Kristofoi lɛ hu jieɔ nɛkɛ su ni he yɔɔ sɛɛnamɔ nɛɛ kpo ŋmɛnɛ? Hɛɛ, amɛfeɔ nakai! Yearbook mli amaniɛbɔi tsɔɔ akɛ asafo babaoo ko ni amɛyifalɛ tamɔ ŋwɛi bɔ miifata gbɛgbalɔi lɛ ahe. (Lala 110:3) Philippines bɔ amaniɛ akɛ daa gbɛgbalɔi ni yɔɔ jɛmɛ lɛ fɛɛ mli oha mlijaa 13 ji mɛi ni yeko afii 20. Ani enɛ ji anɔkwale yɛ hei krokomɛi? Hɛɛ, nakai eji. Akɛ nɔkwɛmɔ nɔ lɛ, niiamlitaomɔ ko ni afee yɛ ŋshɔkpɔi bibii ni ji Trinidad kɛ Tobago lɛ tsɔɔ akɛ gbɛgbalɔi heei 282 kɛ amɛhe wo sɔɔmɔ lɛ mli kɛjɛ September 1, 1986 kɛbashi September 30, 1988. Yɛ yibɔ nɛɛ fɛɛ mli lɛ, mɛi 48 ji mɛi ni yeko afii 20. Ani obaasumɔ ni onu gbɔmɛi nɛɛ ateŋ mɔ kome wiemɔi?
Naa Charmaine Francis. Ekɛɛ akɛ: “Kɛjɛ be mli ni miji abifao beebe lɛ, mifɔlɔi kɛ mi wie Yehowa sɔɔmɔ kɛ anɔkwa ni wɔɔya nɔ wɔye lɛ lɛ he. Be fɛɛ be ni mifɔlɔi aaabi mi akɛ kɛji amɔmɔ amɛ awo tsuŋ yɛ maŋtsɛyeli lɛ shiɛmɔ hewɔ lɛ, mɛni mafee lɛ, mikɛɔ akɛ, ‘Masɔmɔ Yehowa.’ Mijɔɔ mihe nɔ beni miye afii 13, ni abaptisi mi beni miye afii 14. Yɛ no sɛɛ nɔŋŋ lɛ, be fɛɛ be ni abaaha skul gbɛ lɛ, mikɛ mihe woɔ gbɛgbalɔi awalɔi sɔɔmɔ lɛ mli. Yɛ 1983 mli lɛ, mikɛ mihe wo daa gbɛgbamɔ sɔɔmɔ lɛ mli. Yɛ klɛŋklɛŋ afi ni misɔmɔ akɛ gbɛgbalɔ lɛ mli lɛ, mina miishɛɛ waa akɛ maye mabua shianyɛ ko ni ebatsɔ Yehowa sɔɔlɔ. Amrɔ nɛɛ mifeɔ Biblia mli nikasemɔi nɛɛhu. Amɛteŋ mɔ kome miisaa ehe kɛha baptisimɔ, ni mɛi etɛ kroko baa kpeei.”
Agbɛnɛ, obalaŋtai, ani nyɛkɛ wɔ kpaaagbee akɛ nyɛ hu nyɛyɛ nɔ ko ni jara wa waa ni nyɛkɛbaawo Yehowa hiɛ nyam? Lɛlɛŋ, nyɛyɛ nibii nakai! Eyɛ mli akɛ ekolɛ amrɔ nɛɛ nyɛbɛ be fɛɛ sɔɔmɔ lɛ mli moŋ, shi nyɛbaanyɛ nyɛwo Yehowa hiɛ nyam yɛ shihilɛi ni nyɛyɔɔ mli lɛ amli. Ekolɛ nyɛyɛ afii babaoo ni jwere nyɛhiɛ ni nyɛkɛbaaya skul lolo. Shi kɛlɛ, nyɛyɛ hegbɛ ko ni jara wa waa ni nyɛkɛaajie Yehowa yi nyɛtsɔɔ nyɛtsɔɔlɔi kɛ klasbii lɛ. Christian Kalloo, ni eye afii nyɔŋma lɛ kɛ lɛ diɛŋtsɛ ewolo ni ji Life—How Did It Get Here—By Evolation or by Creation? lɛ tee skul. Mɛni jɛ mli ba? Ekɛ wolo nɛɛ ekomekomei kpawo ha mɛi ni yɔɔ nakai saneyitso lɛ he miishɛɛ lɛ. Ekɛ ekome hu ha yɛ shia-kɛ-shia sɔɔmɔ lɛ mli. Bo hu obaanyɛ ofee nakai nɔŋŋ.—Okɛto Mateo 21:15, 16 he.
Wɔ Tsɔɔlɔ Kpeteŋkpele lɛ Tsɔɔ Wɔ Nii
Gbalɔ Yesaia wie akɛ: “Nuŋtsɔ Yehowa eha mi nikaselɔi alilɛi.” Ekɛ yijiemɔ ha Yehowa yɛ enyɛmɔ ni ekɛwieɔ lɛ hewɔ. Esaa eŋma Yehowa shiwoo nɛɛ hu akɛ: “Mimumɔ ni yɔɔ onɔ lɛ, kɛ miwiemɔi lɛ ni mikɛwo onaa lɛ, ejeŋ odaaŋ kɛ oseshibii adaaŋ kɛ oseshibii aseshibii adaaŋ.” (Yesaia 50:4; 59:21) Taakɛ bɔ ni hii ni amɛleee wojiaŋ ni amɛji mɛi foji kɛkɛ lɛ batsɔmɔ Yesu bɔfoi ni Nyɔŋmɔ fee amɛ nilelɔi yɛ mumɔŋ nibii amli lɛ, nakai nɔŋŋ Yehowa efee mɛi foji ni yɔɔ ŋmɛnɛ lɛ hu nilelɔi.
Yearbook ni je kpo yɛ 1986 lɛ hiɛ amaniɛbɔɔ ni woɔ mɔ hewalɛ kɛha mɛi ni etee skul fioo pɛ aloo mɛi ni eyaaa eko kwraa lɛ fɛɛ. Yɛ maji babaoo amli lɛ, Yehowa Odasefoi toɔ nikanemɔ kɛ niŋmaa he gbɛjianɔ bɔni afee ni atsɔɔ mɛi ni edara lɛ nikanemɔ. Kwɛ bɔ ni Yehowa ejɔɔ nakai mɛi lɛ! Kɛje 1962 kɛbashi 1984 mli lɛ, mɛi 19,238 tee amɛhiɛ waa yɛ nikanemɔ kɛ niŋmaa ni amɛkaseɔ lɛ mli yɛ Nigeria, ni amrɔ nɛɛ amɛnyɛɔ amɛkaneɔ Biblia lɛ diɛŋtsɛ amɛhaa amɛhe kɛ agbɛnɛ hu mɛi ni amɛyeɔ amɛ odase lɛ. Mɛɛ jɔɔmɔ babaoo amɛna nɛkɛ! Nyɛminuu ko bɔ mɔdɛŋ waa akɛ ebatsɔ nikanelɔi lɛ atsɔɔlɔ yɛ esafo lɛ mli.
Agbɛnɛ hu susumɔ Ezekiel Ovbiagele niiashikpamɔ lɛ he okwɛ. Beni abaptisi lɛ yɛ 1940 lɛ, no mli lɛ enyɛɛɛ wolo ekane. Beni ekase nikanemɔ sɛɛ lɛ, etee ehiɛ waa kɛyashɛ he ni enyɛ ekɛ ehe wo gbɛgbamɔ mli, ni yɛ sɛɛ mli lolo, yɛ 1953 mli lɛ, ahala lɛ akɛ nɔkwɛlɔ gbɛfalɔ.
Afi ko bɛ ni kɛ mɔ ye ni etsiɔ enaa yɛ nikasemɔ mli. Ekolɛ mɛi komɛi baatsɛ blema abɛ nɛɛ sɛɛ: “Onyɛŋ otsɔɔ gbee momo ŋaa gbɛi heei!” Enɛ baanyɛ afee anɔkwale yɛ gbeei ahe, shi gbɔmɛi jeee kooloi. Mɛi ni edara yɛ afii mli lɛ po baanyɛ, ni amɛkaseɔ nii hu kɛji amɛmiitao ni amɛle Yehowa ni amɛsɔmɔ lɛ lɛ. Ekolɛ obaale mɛi komɛi ni amɛfee nakai. Akɛ nɔkwɛmɔ nɔ lɛ, awo Alice Okon ni jɛ Nigeria lɛ hewalɛ ni ekane Biblia lɛ koni ele hiɛnɔkamɔ ni ekɛhaa lɛ he nii; ekpɛlɛ nɔ nakai ni ena hiɛnɔkamɔ ni ka wɔhiɛ lɛ mli miishɛɛ. Beni eye afii 80 lɛ, no mli lɛ edako fe bɔ ni eeenyɛ ekase nii. Ani osusuɔ akɛ eha Yehowa tsui nya? Eji niiatsɛ yɛ hemɔkɛyeli mli. Abɛi 3:14 maa nɔ mi ehaa wɔ akɛ kɛ wɔyɛ nilee lɛ, “no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ.” Kɛji mɔ ko nyɛɔ ewieɔ anɔkwale lɛ pɛpɛɛpɛ kɛmɔɔ shi lɛ, ewiemɔi lɛ bafeɔ tamɔ “shika akutui yɛ jwiɛtɛi kpanyai amli.”—Abɛi 25:11; Kolosebii 3:16.
Niiatsɛ yɛ Hemɔkɛyeli kɛ Nitsumɔi Kpakpai Amli Eyɛ Mli Akɛ Eba Gbɔmɔtsoŋ Hewalɛ
Mɔ ko ni afɔ lɛ kɛ gbɔmɔtsoŋ nyɛmɔ mli fatɔɔ ko lɛ nijiaŋ baaje wui waa yɛ be mli ni edaa ni ebanaa eleɔ shihilɛ ni eyɔɔ mli nɛɛ lɛ. Ni ebaanyɛ efee shihilɛ ko po ni ehiɛ kpaŋ nɔ kɛ mɔ lɛ bote gbɔmɔtsoŋ fatɔɔ shihilɛ nɛɛ mli yɛ be mli ni eda lɛ. Ani hiɛnɔkamɔ ko bɛ kɛha mɛi ni yɔɔ shihilɛ ni tamɔ nɛkɛ mli lɛ? Dabi, ebaanyɛ egbele gbɛ ni yaa naanɔ wala mli kɛha amɛ.
Beni awuɔ Jeŋ Ta I lɛ, Edward Stead fee he ko ni ekwɛɔ mɛi akpɔŋɔi yɛ ni awoɔ lɛ nyɔmɔ yɛ maŋ bibioo ni ji Arvada, yɛ Wyoming, U.S. Amerika, ni eŋa hu fee gbɔiatoo he bibioo ko. Bɔ ni Spanish flu hela ni he yɔɔ gbeyei lɛ na hewalɛ yɛ enɔ lɛ ha hela ni haa mɔ talɔiaŋ fuɔ lɛ mɔ lɛ, ni eha etalɔi amli wawai ni enɛ ha egbɔmɔtso dɔrɔ tamɔ bɔ ni efeɔ yɛ edade sɛi ni etaa mli lɛ pɛpɛɛpɛ. Eyɛ mli akɛ enyɛɛɛ ehe nɔ ko efee moŋ, shi enyɛɔ ewieɔ ni efɔɔ eniji fioo. Yɛ be babaoo mli lɛ esusu akɛ ebaagbe ehe. Kɛkɛ ni ebana anɔkwale lɛ, ni ekɛ ekaa fua lɛ atuu.
Klɛŋklɛŋ kwraa lɛ, eyataa gbɔiatoo he lɛ shinaa lɛ naa ni ekɛ gbɔi lɛ wieɔ ehemɔkɛyeli hee ni ena lɛ he. Enyɛɔ etsiɔ eniji bɔ ni sa ni enyɛɔ egbeleɔ Biblia kasemɔ he wolo mli ni ekɛtsɔɔ mɛi ni waa amɛboɔ lɛ toi lɛ. Mɛi ni hiɛ sɔ emɔdɛŋbɔɔ lɛ ateŋ mɛi komɛi tsɛɔ lɛ kɔɔyɔɔŋ lɛlɛ kudɔlɔ helatsɛ lɛ. Sɛɛ mli lɛ, ekpɛ eyiŋ akɛ kɛji akpɛ tsu krɛdɛɛ ko yɛ kar ni akpa sɛɛ lɛ eko nɔ aha lɛ lɛ, ebaanyɛ eshiɛ yɛ maji krokomɛi amli. Afee enɛ, ni ekɛ afi babaoo eshiɛ yɛ gbɛ ni ekaaa nɛɛ nɔ, ni efa gbɛ ni naa shɛɔ shitoi akpei abɔ yɛ Wyoming kɛ Texas teŋ, ni gbɛgbalɔi obalaŋtai enyɔ loo etɛ fataa ehe ni amɛkwɛɔ enɔ. Ebafee ekaawoo kɛha mɛi fɛɛ ni le lɛ lɛ yɛ be sɛɛjɛkɛmɔ ni ekɛhi shi lɛ fɛɛ mli.
Kɛji gbɔmɔtsoŋ nyɛmɔ mli fatɔɔ ko haa onijiaŋ jeɔ wui lɛ, ofainɛ kanemɔ sane ni yɔɔ November 15, 1986 The Watchtower lɛ mli yɛ baafai 22-5 lɛ. Hii fɛɛ ni atsi amɛ tã yɛ jɛmɛ lɛ ji onukpai, mumɔŋ ŋaawolɔi, mɛi ni he esa akɛ amɛaashɛje amɛnyɛmimɛi ni ekolɛ amɛgbɔmɔtsei eye emuu shi ehe miihia ni atswa amɛ ama shi yɛ mumɔŋ lɛ amii. Kwɛ bɔ ni amɛji niiatsɛmɛi yɛ Nyɔŋmɔ hiɛ!—1 Timoteo 6:18.
Esterleta Dick, ni eye afii 63 lɛ kɛ afii 16 ehi shi akɛ Odasefonyo ni abaptisi lɛ. Eshwila yɛ 1978, shi ekɛ afii enyɔ ni eho lɛ esɔmɔ akɛ daa gbɛgbalɔ. Te fee tɛŋŋ ni enyɛ efee enɛ hu? Ojogbaŋŋ, lɛ diɛŋtsɛ ebaaha hetoo.
Ekɛɛ: “Gbi ko lɛ, obalaŋta gbɛgbalɔ ko bi mi akɛ: ‘Nyɛmiyoo Dick, oshɛɔ otii ni mamɔ ohiɛ akɛ gbɛgbalɔi awalɔ lɛ he be fɛɛ be. Mɛni hewɔ okaaa akɛ ooofee daa gbɛgbalɔ?’”
Esterleta yashe gbeyei akɛ ebaafee naatsii nii kɛha nyɛmimɛi lɛ, shi ekai bɔ ni kpokpaa nɔkwɛlɔ lɛ wo hewalɛ ni akɛ he awo gbɛgbamɔ sɔɔmɔ lɛ mli lɛ. Nyɛmiyoo lɛ kɛɛ: “Mije shishi nɔŋŋ, ni amrɔ nɛɛ miye afii enyɔ yɛ gbɛgbamɔ sɔɔmɔ lɛ mli. Miyeɔ odase yɛ gbɛjegbɛi anɔ ni miyɛ sɛɛsaramɔi ni fa bɔ ni sa. Nɔ ni fe fɛɛ lɛ, mifeɔ shia Biblia mli nikasemɔi ekpaa. Yɛ mɛɛ gbɛ nɔ? Dani maya shiatsɛ lɛ saramɔ lɛ, mihaa akaneɔ nii ni wɔbaakase lɛ kɛ ŋmalɛi ni atsɛ yɛ mli lɛ fɛɛ ahaa mi yɛ shia, koni manyɛ mawie yɛ nikasemɔ lɛ shishi. Mi-Biblia kaselɔi lɛ ateŋ mɛi etɛ fataa mihe kɛyaa kpeei, ni abaptisi mɔ kome.”
Mɔ Fɛɛ Mɔ Baanyɛ ‘Awo Edɛŋ Obɔ’ Kɛ Nikeenii
Ani mumɔŋ nibii pɛ anyɛɔ akɛkeɔ? Dabi, beni Maŋtsɛ David ni hi shi yɛ blema lɛ saa nibii ni akɛbaama sɔlemɔ tsu lɛ, ebi akɛ: “Ni agbɛnɛ namɔ yɔɔ he tsui akɛ eeewo edɛŋ obɔ eha Yehowa ŋmɛnɛ?” (1 Kronika 29:5) Mɔ fɛɛ mɔ baanyɛ afee nakai. Nakai nɔŋŋ ŋmɛnɛ, gbekɛbii kɛ onukpai, mɛi ni yɔɔ gbɔmɔtsoŋ hewalɛ kɛ mɛi ni bɛ eko fɛɛ baasumɔ ni amɛjɛ amɛtsuiŋ amɛkɛ heloonaa nibii abake koni akɛlɛɛ Maŋtsɛyeli lɛ he nibii amli. Abaanyɛ afee enɛ kɛtsɔ nitsumɔ he nine ni yɔɔ omaŋ lɛ nɔ aloo kɛtsɔ asafo ni oyɔɔ mli lɛ nɔ. Yɛ nɛkɛ gbɛ nɔ lɛ, mɔ fɛɛ mɔ baanyɛ aye abua ni akɛwo shika nyɔmɔ ni akɛtsuɔ nii koni akwɛ ni ashiɛ sanekpakpa lɛ yɛ shikpɔŋ muu lɛ fɛɛ nɔ lɛ, yɛ bɔ ni enyɛmɔ ji lɛ naa. Eji hegbɛ ni mɔ ko naa.—2 Korintobii 9:8-12.
Ni nɔ ni he hiaa fe fɛɛ lɛ, oyɛ mumɔŋ ninamɔ ni obaanyɛ okɛwo Yehowa hiɛ nyam. Mɛi ni darako lɛ yɛ obalaŋtaiaŋ ekaa kɛ hewalɛ. Mɛi ni ekaseko nii lɛ baanyɛ akase bɔ ni amɛaafee amɛkɛ amɛnaabui awo yibii amɛha Yehowa. Mɛi ni yɔɔ gbɔmɔtsoŋ hewalɛ mli fatɔɔi lɛ baanyɛ aya hiɛ ni amɛtee hiɛ hu yɛ jwɛŋmɔŋ, nilee mli, kɛ shishinumɔ mli aahu akɛ jeee Yehowa yijielɔi yɛ be fɛɛ mli kɛkɛ amɛji, shi moŋ amɛji ŋaawolɔi kɛ tookwɛlɔi hu yɛ Kristofoi asafo lɛ mli. Ani obɛ nii babaoo fe bɔ ni osusuɔ akɛ oyɔɔ lɛ? No hewɔ lɛ, okɛ onii ni oyɔɔ lɛ awo Yehowa hiɛ nyam.—Hebribii 13:15, 16.