Yehowa Sa Naanɔ Yijiemɔ
“Majɔɔo gbi fɛɛ gbi, ni mala majie ogbɛi lɛ yi daa kɛaatee naanɔ!”—145:2, New World Translation.
1. Mɛni hewɔ David yɔɔ nibii babaoo ni eeenyɛ edamɔ nɔ ejie Yehowa yi lɛ?
YEHOWA tsulɔ anɔkwafo David yɛ nibii pii ni eeedamɔ nɔ ejie Nyɔŋmɔ yi. Nɛkɛ blema Israel maŋtsɛ ni ale lɛ jogbaŋŋ nɛɛ le Yehowa dalɛ kɛ emlihilɛ lɛ ni eyɔseɔ akɛ E-maŋtsɛyeli lɛ ji naanɔ nɔ. Ŋwɛi Flooflonyo lɛ sa yijiemɔ akɛni ehaa nɔ fɛɛ nɔ ni hiɛ ka tɔɔ kɛ nii ni etaoɔ kɛ mɔbɔnalɛ ni ekpa mli eha etsuji anɔkwafoi lɛ hewɔ.
2. (a) Te ato Lala 145 naa aha tɛŋŋ? (b) Mɛɛ sanebimɔi wɔbaasusu he?
2 David kɛ yijiemɔ ni tamɔ nɛkɛ ha Nyɔŋmɔ yɛ Lala 145 lɛ mli. Ato lala nɛɛ naa koni ekuku fɛɛ kuku kɛ Hebri alfabɛta ni ato naa lɛ aje shishi, eyɛ mli akɛ ashi ekome (nun) yɛ mli. Bɔ ni akɛ alfabɛta lɛ to naa aha nɛɛ ye bua koni akai lala lɛ. Lala 145 jieɔ Yehowa yi, taakɛ eji yɛ wiemɔi nɛɛ amli lɛ: “Majie oyi gbi fɛɛ gbi, ni mala majie ogbɛi lɛ yi daa kɛaatee naanɔ!” (Lala 145:2) Shi nɛkɛ lala nɛɛ baanyɛ asa wɔhe yɛ mɛɛ gbɛ nɔ? Mɛni ebaanyɛ efee kɛha wekukpaa ni ka wɔkɛ Nyɔŋmɔ teŋ lɛ? Bɔni afee ni wɔle lɛ, klɛŋklɛŋ lɛ nyɛhaa wɔsusua kuku 1 kɛyashi 10 he.
Yehowa Dale lɛ Anyɛɛɛ Shishi Ana
3. Taakɛ David ji lɛ, mɛɛ nyɔmɔ wɔhiɛ ‘wɔ-Nyɔŋmɔ ni ji Maŋtsɛ’ lɛ ni mɛni hewɔ?
3 David ji maŋtsɛ, shi eyoo akɛ Yehowa ji maŋtsɛ yɛ enɔ, akɛ: “Makafoo, mi-Nyɔŋmɔ, maŋtse, ni majie ogbɛi lɛ yi daa kɛaatee naanɔ!” (Lala 145:1) Yehowa Odasefoi kɛ woo ni tamɔ nakai nɔŋŋ woɔ Nyɔŋmɔ gbɛi lɛ nɔ ni amɛjieɔ yi yɛ jeŋ muu fɛɛ. Wɔnuɔ he akɛ wɔshihilɛ hiɔ yɛ be mli ni wɔkɛ wɔhe woɔ nitsumɔ ni tamɔ nɛkɛ mli lɛ. Taakɛ David ji lɛ, wɔfeɔ toiboo ni wɔbaa wɔhe shi wɔhaa Yehowa akɛ ‘wɔ-Nyɔŋmɔ kɛ Maŋtsɛ.’ Ni mɛni hewɔ esaaa akɛ wɔfeɔ nakai? Lɛ ji “Naanɔ Maŋtsɛ.” (Kpojiemɔ 15:3, NW) David Kpeteŋkpele, Yesu Kristo, ni yeɔ nɔ kɛjɛɔ ŋwɛi Zion Gɔŋ lɛ nɔ kɛjɛ 1914 lɛ kɛ heshibaa ni afeɔ ahaa Yehowa, Naanɔ Maŋtsɛ lɛ he nɔkwɛmɔ nɔ ni nɔ bɛ haa wɔ.
4. Te wɔɔfee tɛŋŋ ‘wɔjɔɔ Nyɔŋmɔ gbɛi’ lɛ?
4 David kɛɛ akɛ ‘ebaajɔɔ Nyɔŋmɔ gbɛi’ (ebaajie yi). Te aaafee tɛŋŋ ni adesa ko kɛkɛ aaanyɛ afee enɛ? Kɛfata nibii krokomɛi ahe lɛ, akɛ aaajɔɔ mɔ ko lɛ tsɔɔ akɛ owieɔ mɔ lɛ he ekpakpa. Ni wɔɔjɔɔ Nyɔŋmɔ gbɛi lɛ tsɔɔ akɛ wɔyɛ suɔmɔ ni mli wa kɛha lɛ kɛ egbɛi krɔŋkrɔŋ ni ji Yehowa lɛ. Wɔwieee huhuuhu wɔshiii Nyɔŋmɔ, wɔtaooo ehe tɔmɔ, wɔjeee emlihilɛ lɛ he ŋwane kɔkɔɔkɔ. Kɛ wɔyɛ su ni tamɔ nɛkɛ, ni wɔjɔɔ wɔhe nɔ wɔha Yehowa ni wɔhiɛ wɔ emuuyeli mli akɛ e-Dasefoi ni abaptisi amɛ lɛ, no dani wɔɔnyɛ ni wɔkɛ David akɛɛ akɛ ‘wɔbaajɔɔ Nyɔŋmɔ gbɛi lɛ kɛatee naanɔ.’ Kɛ wɔhi Nyɔŋmɔ suɔmɔ lɛ mli lɛ, wɔnine baashɛ enikee nii ni ji naanɔ wala nɔ, ni wɔbaana hegbɛ wɔjɔɔ Yehowa kɛya naanɔ.—Yuda 20, 21.
5. Esa akɛ bɔ ni wɔshweɔ akɛ wɔjɔɔ Yehowa “gbi fɛɛ gbi” lɛ ana wɔnɔ hewalɛ yɛ mɛɛ gbɛ nɔ?
5 Kɛji akɛ wɔsumɔɔ wɔ Wala-Halɔ lɛ lɛlɛŋ lɛ, wɔkɛ David baakɛɛ akɛ: “Majɔɔo gbi fɛɛ gbi, ni mala majie ogbɛi lɛ yi kɛaatee naanɔi anaanɔ.” (Lala 145:2, NW) Kwɛ bɔ ni gbi ko baafee shwɛm aha kɛji akɛ wɔjɔɔɔ Nyɔŋmɔ! Ekaba gbi ko gbi ko akɛ wɔbɛ deka aloo wɔkɛ wɔhe ewo heloo gbɛfaŋ nibii amli sɔŋŋ hewɔ lɛ wɔnyɛɛɛ wɔwie wɔŋwɛi Tsɛ lɛ he jogbaŋŋ loo ni wɔɔsɔle wɔha lɛ daa gbi. Yesu miitsɔɔ akɛ esa akɛ wɔsɔle daa gbi yɛ be mli ni ekɛɛ yɛ sɔlemɔ nɔkwɛmɔ nɔ lɛ mli akɛ: “Ha wɔ wɔŋmɛnɛ gbi nɛɛ wɔ daa ŋmaa” lɛ. (Luka 11:3, NW) Mɛi pii ni yɔɔ be fɛɛ sɔɔmɔ lɛ mli lɛ jieɔ Nyɔŋmɔ yi daa gbi yɛ be mli ni amɛkɛ amɛhe woɔ Kristofoi asɔɔmɔ nitsumɔ lɛ mli lɛ. Shi bɔ fɛɛ bɔ ni shihilɛ ni wɔyɔɔ mli lɛ ji lɛ, esa akɛ wɔtsuii atsirɛ wɔ ni wɔjie Nyɔŋmɔ yi yɛ gbɛ ko nɔ daa gbi. Ni bo lɛ susumɔ enɛ he okwɛ! Akɛ Yehowa Odasefoi ni amɛjɔɔ amɛhe nɔ kɛ naanɔ wala he hiɛnɔkamɔ lɛ, wɔyɛ hegbɛ kpeteŋkpele diɛŋtsɛ ni wɔkɛaajie egbɛi lɛ yi kɛaatee naanɔ.—Yohane 17:3.
6. Mɛni hewɔ Yehowa “sa yijiemɔ babaoo” nakai lɛ?
6 Wɔyɛ nɔ ni wɔɔdamɔ nɔ wɔjie Nyɔŋmɔ yi gbi fɛɛ gbi, ejaakɛ David kɛfata he akɛ: “Yehowa da ni esa yijiemɔ babaoo, ni edalɛ lɛ anyɛɛɛ shishi ana!” (Lala 145:3) Yehowa da aahu akɛ mɔ ko kɛlɛ yeee egbɔ, ni enɔyeli lɛ ji kwraa nɔ. Ehe bahia ni Babilon Maŋtsɛ Nebukadnezar akpɛlɛ nɔ akɛ: “Mɔ ko bɛ ni aaatswa [Nyɔŋmɔ] enine afɔ aloo ni eeekɛɛ lɛ akɛ: ‘Mɛni ofeɔ nɛɛ?’” (Daniel 4:34, 35) Yehowa “ehe yɛ gbeyei fe nyɔŋmɔi lɛ fiaa.” ( Lala 96:4) Ŋwanejee ko bɛ he akɛ “esa yijiemɔ babaoo.” Mɛni hewɔ, ejaakɛ yijiemɔ wiemɔi ni nɔkwɔlɔ tsɔ bɛ kɛha Yehowa kɛ aajie eyi! Naanɔ yijiemɔ ni sɛɛ efooo sa lɛ.
7. Mɛni yeɔ odase akɛ Nyɔŋmɔ “dalɛ lɛ anyɛɛɛ shishi ana”?
7 Yehowa “dalɛ lɛ anyɛɛɛ shishi ana.” Yɛ bɔ ni edalɛ ji yɛ gbɔmɔtsoŋ lɛ fɛɛ sɛɛ lɛ, edalɛ lɛ damɔ nɔ Nyɔŋmɔ ni eji lɛ nɔ. Hɛɛ, nibii ni ebɔ lɛ yɛ naakpɛɛ tsɔ fe bɔ ni wɔɔnyɛ wɔnu shishi, ni wɔ diɛŋtsɛ lɛ, ‘abɔ wɔ yɛ naakpɛɛ gbɛ nɔ.’ (Lala 139:14; Hiob 9:10; 37:5) Shi kɛfata enibɔɔ nitsumɔi lɛ ahe lɛ, kwɛ bɔ ni ekɛ agbojee kudɔɔ ehe ehaa! Eyeɔ eshiwooi anɔkwa ni ejɛɔ esuɔmɔ mli ejieɔ eyiŋtoi akpo. Ni kɛlɛ, wɔnyɛŋ wɔle nɔ fɛɛ nɔ ni kɔɔ Nyɔŋmɔ he. Wɔbaanyɛ wɔya nɔ wɔdara yɛ ehe nilee, enibɔɔ, kɛ eyiŋtoi amli yɛ yinɔi fɛɛ mli.—Romabii 11:33-36.
Kafomɔ Yehowa Nitsumɔi Lɛ
8. (a) Yɛ mɛɛ gbɛ nɔ ‘yinɔ kome ekafo Yehowa nitsumɔi lɛ etsɔɔ yinɔ kokro yɛ? (b) Kɛ wɔtsɔɔ wɔbii nibii ni kɔɔ Yehowa nitsumɔi kɛ enifeemɔi ahe lɛ, eka shi faŋŋ akɛ te amɛaasusu ejamɔ he amɛha tɛŋŋ? (d) Akɛ “yinɔ” ni yɔɔ miishɛɛ lɛ, mɛni shwɛɛnii ni afɔ amɛ mu lɛ efee?
8 Abaanyɛ awie babaoo ni akɛjie wɔ-Nyɔŋmɔ kpeteŋkpele lɛ ni anyɛɛɛ ana edalɛ lɛ shishi lɛ yi aahu akɛ enɛ tsirɛ David ni ekɛɛ: “Yinɔ kome aaakafo onitsumɔi lɛ atsɔɔ yinɔ kroko, ni amɛaajaje ohewalɛ nitsumɔi lɛ amɛtsɔɔ.” (Lala 145:4) Adesai ayinɔi ni etsara nɔ eba lɛ ejie Yehowa nitsumɔi lɛ ayi ni amɛkai enaakpɛɛ nitsumɔi wuji lɛ. Mɛɛ hegbɛ enɛ ji akɛ wɔɔgba enɛɛmɛi wɔtsɔɔ mɛi ni wɔkɛ amɛ feɔ shia Biblia mli nikasemɔi lɛ! Akɛ nɔkwɛmɔ nɔ lɛ, wɔbaanyɛ wɔkɛɛ amɛ akɛ Nyɔŋmɔ bɔ nibii fɛɛ. (1 Mose 1:1–2:25; Kpojiemɔ 4:11) Wɔbaanyɛ wɔwie enaakpɛɛ nitsumɔi yɛ be mli ni ejie Israelbii lɛ kɛjɛ Mizraim nyɔŋyeli mli, ni eye ebua amɛ ni amɛye Kanaan nɔyelɔi lɛ anɔ kunim, ehere amɛyiwala kɛjɛ amɛseshi ni ekolɛ amɛaabule eshishi kwraa yɛ blema Persia lɛ kɛ babaoo he wɔtsɔɔ amɛ. (2 Mose 13:8-10; Kojolɔi 4:15; Ester 9:15-17) Ni ani enɛ tsirɛɛɛ wɔ koni wɔgba wɔbii Yehowa nitsumɔi kɛ enifeemɔi? Kɛ wɔkɛ tsɔsemɔ ni tamɔ nɛkɛ ha wɔbii ni amɛna bɔ ni wɔkɛ miishɛɛ sɔmɔɔ Nyɔŋmɔ lɛ, eka shi faŋŋ akɛ amɛbaasusu ejamɔ ni amɛkɛaaha lɛ lɛ he akɛ miishɛɛ nɔ ni amɛbaadara yɛ ‘Yehowa he nyamɔ ni ji amɛhewalɛ’ lɛ mli. (Nehemia 8:10; Lala 78:1-4) Shwɛɛnii ni afɔ amɛ mu lɛ ji Yehowa Odasefoi ni afɔ amɛ mu lɛ amiishɛɛ “yinɔ” kome ni jieɔ Nyɔŋmɔ nitsumɔi lɛ ayi amɛtsɔɔ “asafo babaoo” lɛ ni ji yinɔ kome ni baahi Paradeiso shikpɔŋ lɛ nɔ lɛ fa lɛ.—Kpojiemɔ 7:9.
9. Yɛ be mli ni wɔsusuɔ Nyɔŋmɔ nitsumɔi kɛ enaakpɛɛ nifeemɔi lɛ ahe lɛ, mɛni nɔ mi enɛ baanyɛ ama aha wɔ?
9 Yɛ be mli ni wɔsusuɔ Nyɔŋmɔ nitsumɔi kɛ enifeemɔi wuji lɛ ahe lɛ, wɔnaa nɔmimaa waa akɛ “Yehowa gbɛi kpeteŋkple lɛ hewɔ lɛ ekwaŋ emaŋ lɛ.” (1 Samuel 12:22; Lala 94:14) Yɛ be mli ni wɔkɛ kaai, tɔlɛ, kɛ yiwaai kpeɔ lɛ, wɔbaanyɛ wɔfee dioo ni wɔna hekɛnɔfɔɔ akɛ “Nyɔŋmɔ toiŋjɔlɛ lɛ” baabu wɔtsuii kɛ wɔjwɛŋmɔŋ nyɛmɔi ahe. (Filipibii 4:6, 7, NW) No hewɔ lɛ kwɛ bɔ ni esa jogbaŋŋ ha akɛ wɔɔgba mɛi krokomɛi wɔŋwɛi Tsɛ lɛ ni yɔɔ suɔmɔ ni buɔ mɔ he lɛ he saji!
10. Mɛni fata Yehowa “naakpɛɛ nitsumɔi” lɛ ahe, ni amɛnɔ jwɛŋmɔ he baa sɛɛnamɔ kɛhaa wɔ yɛ mɛɛ gbɛ nɔ?
10 Esa akɛ wɔhe be ni wɔjwɛŋ Yehowa agbojee kɛ enitsumɔi ahe, ejaakɛ David kɛfata he akɛ: “Majwɛŋ anunyam lɛ dalɛ kɛ agbojee kɛ onaakpɛɛ nitsumɔi lɛ ahe.” (Lala 145:5) Nyɔŋmɔ agbojee lɛ yɛ gbeyei ni eko kɛ lɛ yeee egbɔ. (Hiob 37:22; Lala 148:13) No hewɔ lɛ, David ha Yehowa anunyam kɛ egbojee lɛ fee nɔ ni esusuɔ he. Lalatsɛ lɛ hu susu Nyɔŋmɔ “naakpɛɛ nitsumɔi” lɛ ahe. Nɔ ni fata enɛ he ji ŋwɛi jalɛsaneyeli ni ekɛbaatsu nii ni ekɛkpata efɔŋfeelɔi lɛ ahiɛ ni ebaa mɛi ni sheɔ Nyɔŋmɔ gbeyei lɛ ayi taakɛ efee yɛ Nu Afua lɛ mli lɛ. (1 Mose 7:20-24; 2 Petro 2:9) Saji ni tamɔ enɛɛmɛi anɔ jwɛŋmɔ wajeɔ wekukpaa ni ka wɔkɛ Yehowa teŋ lɛ ni eyeɔ ebuaa wɔ koni wɔgba mɛi krokomɛi egbojee kɛ enaakpɛɛ nitsumɔi lɛ ahe sane. Awaje Yesu koni enyɛ edamɔ kaai ahiɛ yɛ gbii 40 ni eye yɛ ŋa lɛ nɔ lɛ mli kɛtsɔ nibii ni ŋwɛi ni agbele naa lɛ kɛba ejwɛŋmɔ mli ni ejwɛŋ nomɛi anɔ lɛ nɔ. (Mateo 3:13–4:11) No hewɔ lɛ ewie Yehowa agbojee kɛ enaakpɛɛ nitsumɔi lɛ ahe etsɔɔ mɛi krokomɛi.
11. (a) Mɛni hewɔ Yeriko maŋ lɛ mlibii lɛ she gbeyei lɛ? (b) Mɛɛ su nɛkɛ Yehowa Odasefoi kɛwieɔ “Nyɔŋmɔ nitsumɔi ni yɔɔ gbeyei lɛ ahewalɛ lɛ ahe” yɛ.
11 Kɛ wɔwie Nyɔŋmɔ agbojee kɛ enitsumɔi ahe lɛ, wɔkanyaa mɛi krokomɛi ni amɛ hu amɛwie he. David kɛɛ: “Gbɔmɛi aaagba onitsumɔi ni yɔɔ gbeyei lɛ ahewalɛ lɛ he sane, ni majaje odalɛ lɛ matsɔɔ.” (Lala 145:6) Rahab wie gbeyei ni mɔmɔ Yeriko maŋ lɛ mlibii beni amɛnu bɔ ni Yehowa jie Israelbii lɛ yɛ Ŋshɔ Tsuru lɛ mli ni eha amɛye Amorbii amaŋtsɛmɛi enyɔ lɛ anɔ kunim lɛ he. Eka shi faŋŋ akɛ awie “nitsumɔi ni yɔɔ gbeyei” nɛɛ ahe yɛ Yeriko. (Yoshua 2:9-11) Ni eka shi faŋŋ akɛ “amanehulu kpeteŋkpele” ni baa lɛ baafee nɔ ni woɔ mɔ he gbeyei. (Mateo 24:21) Shi nibii ni woɔ gbɔmɛi ni amɛtsi amɛhe kɛjɛ Nyɔŋmɔ he lɛ ahe gbeyei lɛ kanyaa “Yehowa gbeyeishemɔ” yɛ jalɛ tsuii amli, gbeyei ni asheɔ lɛ yɛ gbɛ ni ja nɔ. (Abɛi 1:7) Yehowa Odasefoi kɛ su loo mumɔ ni gbeyeishemɔ ni tamɔ nɛkɛ yɔɔ mli wieɔ Nyɔŋmɔ hewalɛi ni ejieɔ lɛ kpo lɛ ahe sane. Naakpɛɛ-Nitsulɔ kpeteŋkple lɛ he sane ji sanegbaa titri ni yaa nɔ yɛ mɛi ni afɔ amɛ mu lɛ kɛ amɛshikpɔŋ nɔ nanemɛi lɛ ateŋ! Ni yiwaa po etsiii amɛ gbɛ koni amɛkagba Yehowa “dalɛ” lɛ kɛ nibii nɛɛ ahe sane amɛtsɔɔ mɛi krokomɛi.—Bɔfoi lɛ Asaji 4:18-31; 5:29.
Jiemɔ Yehowa Yi yɛ Emlihilɛ lɛ Hewɔ
12. Mɛɛ gbɛ nɔ Yehowa mlihilɛ lɛ haa ‘wɔwieɔ ehe’ yɛ?
12 Nyɔŋmɔ sa yijiemɔ, ni jeee yɛ edalɛ lɛ pɛ hewɔ, shi moŋ yɛ emlihilɛ kɛ jalɛ nifeemɔ hewɔ. No hewɔ lɛ, David kɛɛ: “Amɛaawie omlihilɛ kpeteŋkpele lɛ kaimɔ lɛ he, amɛaala ojalɛ lɛ he lala.” (Lala 145:7) Yehowa mlihilɛ lɛ da aahu akɛ wɔkɛ miishɛɛ wiemɔi ‘wieɔ he.’ Yɛ Hebri wiemɔ mli lɛ, jwɛŋmɔ lɛ tamɔ nu ni hoɔ yɔɔ kɛjɛɔ nu hiŋmɛi mli. No hewɔ lɛ, eba akɛ Yehowa yijiemɔ ni tamɔ hiɛsɔɔ aaaho yɔɔ kɛaajɛ wɔnaa tamɔ nu ni etue. (Abɛi 18:4) Israel hiɛ kpa Yehowa mlihilɛ lɛ nɔ, ni enɛ ye amɛ awui yɛ mumɔŋ. (Lala 106:13-43) Wɔkɛfee nakai, shi moŋ nyɛhaa shidaa ahoa kɛjɛa wɔtsuii amli koni mɛi krokomɛi atsake amɛtsui yɛ be mli ni amɛkase amɛle bɔ ni Yehowa hi kɛha e-Dasefoi ni amɛjɔɔ amɛhe nɔ amɛha lɛ lɛ.—Romabii 2:4.
13. Esa akɛ ŋwɛi jalɛsaneyeli kɛ jalɛ nifeemɔ ana mɛɛ hewalɛ yɛ wɔnɔ?
13 Ŋwɛi jalɛ nifeemɔ kɛ jalɛsaneyeli kpojiemɔ babaoo hu tsirɛɔ wɔ koni wɔkɛ mlifilimɔ abolɔ. Kɛ wɔnuɔ he yɛ nɛkɛ gbɛ nɔ lɛ, jeee Nyɔŋmɔ Maŋtsɛyeli lɛ klɛŋklɛŋ pɛ wɔbaatao, shi moŋ ejalɛ lɛ hu. Wɔbaasumɔ ni wɔjeŋba ajie Yehowa yi. Hɛɛ, wɔbaafee Maŋtsɛyeli lɛ he jajelɔi daa ejaakɛ wɔyɛ babaoo feemɔ yɛ Nyɔŋmɔ sɔɔmɔ mli. Wɔ yijiemɔ kɛha Yehowa lɛ efeŋ nɔ ni aaafu yɛ gbonyo bu ni efee dioo lɛ mli.—Mateo 6:33; 1 Korintobii 15:58; Hebribii 10:23.
Mɔbɔnalɔ Ji Yehowa
14. Mɛɛ odaseyeli yɔɔ ni tsɔɔ akɛ “durolɔ kɛ mɔbɔnalɔ ji Yehowa?
14 Yɛ be mli ni etsɛɔ Nyɔŋmɔ sui krokomɛi ni sa yijiemɔ kɛfataa he lɛ, David kɛɛ: “Durolɔ kɛ mɔbɔnalɔ ji Yehowa, emli fuuu mra, ni emɔbɔnalɛ fa.” (Lala 145:8) Nyɔŋmɔ ji durolɔ kɛ shishinumɔ akɛ ehi kwraa ni efeɔ ejurɔ. (Mateo 19:17; Yakobo 1:5) Efeɔ nibii kpakpai po ehaa mɛi ni sɔmɔɔɔ lɛ lɛ. (Bɔfoi lɛ Asaji 14:14-17) Yehowa naa mɔbɔ hu, ni eyɛ musuŋtsɔlɛ, “ekaiɔ akɛ su kɛkɛ ji wɔ.” Ekuuu ehiɛ eshwieee tsui ni ekumɔ nɔ aloo ni ekɛwɔ aaaye yɛ wɔhe eshai lɛ anaa, shi enaa mɔbɔ babaoo fe adesa tsɛ ni yɔɔ suɔmɔ fe fɛɛ. (Lala 51:17; 103:10-14) Ejaakɛ yɛ emɔbɔnalɛ kpeteŋkple lɛ kpojiemɔ mli lɛ, etsu esuɔmɔ Bi lɛ kɛba koni ebagbo kɛha wɔ koni akpata wɔ kɛ Nyɔŋmɔ teŋ, koni wɔkɛ eduromɔ lɛ asa wɔnaa!—Romabii 5:6-11.
15. Mɛni hewɔ abaanyɛ akɛɛ akɛ Yehowa Nyɔŋmɔ “mli fuuu mra” ni “emɔbɔnalɛ fa” hu lɛ?
15 Wɔŋwɛi Tsɛ lɛ mli fuuu mra. Ejieee emlifu fɛɛ kpo. Yehowa “mɔbɔnalɛ fa.” Hebri wiemɔ ni akɛtsu nii yɛ biɛ lɛ tsɔɔ mlihilɛ ni jɛɔ suɔmɔ mli ni kɛ ehe kpɛtɛɔ nɔ ko. Efeɔ nakai aahu kɛyashiɔ be mli ni yiŋtoo hewɔ ni efeɔ nakai lɛ baa mli. Shishitsɔɔmɔ kroko ni tamɔ nakai ji ‘anɔkwa suɔmɔ.’ Kɛfata nibii krokomɛi ahe lɛ, ajieɔ Nyɔŋmɔ mɔbɔnalɛ loo anɔkwa suɔmɔ lɛ kpo yɛ kpɔmɔ, yibaamɔ, hebuu, jiemɔ kɛmiijɛ haomɔ mli kɛ heyeli kɛmiijɛ esha mli kɛtsɔ kpɔmɔ nɔ lɛ nɔ lɛ mli nifeemɔi anɔ. (Lala 6:5; 25:8; 31:17, 22; 40:12; 61:7; 119:88, 159; 143:12; Yohane 3:16) Anɔkwale ni eji akɛ Yehowa kɛ Harmagedon baaa yɛ ‘ŋwɛi ta’ lɛ sɛɛ nɔŋŋ lɛ haa gbɔmɛi babaoo naa yiwalaheremɔ, eji ŋwɛi mɔbɔnalɛ kpeteŋkple lɛ kpojiemɔ.—Kpojiemɔ 12:7-12; 2 Petro 3:15.
16. Yehowa efee mɔ ni “hi ha mɛi fɛɛ” yɛ mɛɛ gbɛ nɔ?
16 Yɛ Nyɔŋmɔ mɔbɔnalɛ lɛ hewɔ lɛ, abaanyɛ akɛɛ akɛ eyɛ tsui ni da. David jaje akɛ: “Yehowa hi ha mɛi fɛɛ, ni emusuŋ tsɔɔ lɛ yɛ enitsumɔi lɛ fɛɛ he.” (Lala 145:9) Hɛɛ, Nyɔŋmɔ hi kɛha Israelbii lɛ. Yɛ enɛ hewɔ lɛ, “ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nyɔŋmɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mateo 5:43-45) Yehowa wo “seshi” ko ni baatsɔ jɔɔmɔ he shi yɛ Eden. Yɛ sɛɛ mli lɛ ekɛɛ Abraham akɛ: “Oseshi lɛ nɔ aaatsɔ ajɔɔ shikpɔŋ lɛ nɔ jeŋmaji fɛɛ.” (1 Mose 3:15; 22:18) Ni Nyɔŋmɔ ejurɔfeemɔ lɛ fa aahu akɛ yɛ nɛkɛ “naagbee be” nɛɛ mli lɛ, mɔ fɛɛ mɔ ‘baanyɛ aba ni ebayɛ wala nu lɛ yaka.’ (Daniel 12:4; Kpojiemɔ 22:17) Yehowa miisumɔ ni efee bɔɔ nii ni yɔɔ jwɛŋmɔ lɛ fɛɛ ekpakpa, ni esa akɛ ejurɔ ni efeɔ lɛ agbala wɔ kɛbɛŋkɛ ehe kpaakpa.
17. Yɛ mɛɛ gbɛ nɔ Yehowa ‘musuŋ tsɔɔ lɛ yɛ enitsumɔi lɛ fɛɛ he?
17 Yehowa “musuŋ tsɔɔ lɛ yɛ enitsumɔi lɛ fɛɛ he,” kɛ shishinumɔ akɛ etoɔ gbɛjianɔ babaoo kɛhaa adesai kɛ kooloi fɛɛ. “Lɛ ehaa heloo fɛɛ niyenii.” (Lala 136:25; 147:9) Nyɔŋmɔ wooo niiatsɛmɛi ahiɛ nyam ni ekuuu ehiɛ eshwieee mɛi ni anaanaa amɛnɔ lɛ anɔ, ewooo henɔwolɔi anɔ ni ebuuu heshibalɔi akɛ amɛjeee fɛifɛi, ejieee buului ayi ni ebaaa nilelɔi ashi. Eshafeelɔi feɔ nakai, shi jeee wɔŋwɛi Tsɛ musuŋtsɔlɔ lɛ. (Lala 102:17; Zefania 3:11, 12; Jajelɔ 10:5-7) Ni kwɛ bɔ ni Nyɔŋmɔ musuŋtsɔlɛ, ejurɔfeemɔ kɛ eduromɔ lɛ da ha akɛni eha yiwalaheremɔ fee nɔ ni nine baanyɛ ashɛ nɔ kɛtsɔ esuɔmɔ Bi lɛ kpɔmɔ afɔleshaa lɛ nɔ lɛ!—1 Yohane 4:9, 10.
Mɛi Krɔŋkrɔŋi lɛ Jieɔ Yehowa Yi
18. (a) Nyɔŋmɔ nitsumɔi lɛ ‘daa lɛ shi’ yɛ mɛɛ gbɛ nɔ? (b) Mɛɛ be mli nɛkɛ esa akɛ nɔ ko atsirɛ wɔ ni wɔda Yehowa shi?
18 Nyɔŋmɔ sa yijiemɔ kɛmiijɛ he fɛɛ he. Taakɛ David wie he lɛ: “Yehowa, onitsumɔi lɛ fɛɛ aaadao shi, ni omɛi krɔŋkrɔŋi lɛ aaajie oyi!” (Lala 145:10) Nyɔŋmɔ nibɔɔ nitsumɔi ‘daa lɛ shi,’ taakɛ bɔ ni shia ko ni ama lɛ jogbaŋŋ lɛ jieɔ emalɔ lɛ yi, ni kpulu loo sunii ni yɔɔ fɛo jieɔ efeelɔ ni he esa lɛ yi lɛ. (Okɛto Hebribii 3:4; Yesaia 29:16; 64:8 he.) Bɔ ni Yehowa nibɔɔ nitsumɔi lɛ yɔɔ naakpɛɛ sɔŋŋ hewɔ lɛ, enɛ tsirɛ ŋwɛibɔfoi kɛ adesai fɛɛ koni amɛjie eyi. Ŋwɛibɔfoi ni ji Nyɔŋmɔ bii lɛ kɛ miishɛɛ kɛ oshebɔɔ bolɔ beni eto shikpɔŋ lɛ shishi lɛ. (Hiob 38:4-7) David kɛɛ akɛ ‘ŋwɛi jajeɔ Nyɔŋmɔ anunyam ni atatui gbaa eninenaa nitsumɔi lɛ.’ (Lala 19:1-7) Wɔ hu wɔbaanyɛ wɔda Yehowa shi kɛ wɔna ni laalɔɔ miifiliki yɛ ŋwɛi aloo ofrote miitumɔ yɛ ŋmeŋmei ni jwɛifɔ eha nɔ lɛ anɔ lɛ. (Hiob 39:26; Salomo Lalai 2:17) Yijiemɔ sa yɛ be mli ni wɔkpaa ŋmaa loo wɔkɛ wɔnanemɛi eye nii ni wɔtɔrɔ lɛ. (Lala 72:16; Abɛi 15:17)Wɔgbɔmɔtsei ni abɔ amɛ yɛ naakpɛɛ gbɛ nɔ lɛ hu baakanya yijiemɔ kɛ hiɛsɔɔ kɛha Nyɔŋmɔ.—Lala 139:14-16.
19. Namɛi ji “mɛi krɔŋkrɔŋi” lɛ, ni mɛni amɛfeɔ?
19 Ŋmɛnɛ, Yehowa “mɛi krɔŋkrɔŋi” lɛ ni ji mɛi ni akɛ mumɔ efɔ amɛ mu ni yɔɔ shikpɔŋ nɔ lɛ jɔɔ lɛ. Amɛwieɔ ehe ekpakpa ni amɛshweɔ koni amɛna ni aafee esuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ. (Mateo 6:9, 10) Yɛ be mli ni mɛi ni afɔ amɛ mu lɛ gbaa mɛi krokomɛi Nyɔŋmɔ naakpɛɛ nitsumɔi lɛ, asafo babaoo lɛ hu hereɔ nɔ kɛ yifalɛ. Amɛkɛ emɛi krɔŋkrɔŋi ni afɔ amɛ mu lɛ sɔmɔɔ yɛ ekaa naa akɛ Maŋtsɛyeli lɛ jajelɔi. Ani hiɛsɔɔ miitsirɛ bo koni ona Nyɔŋmɔ yijiemɔ nitsumɔ nɛɛ mli gbɛfaŋnɔ daa?
20. (a) Abaatse Yehowa gbɛi lɛ he yɛ mɛɛ gbɛ nɔ? (b) Mɛɛ sanebimɔi eshwɛ ni wɔbaasusu he yɛ Lala 145?
20 Akɛ Yehowa Odasefoi lɛ, wɔtamɔ David yɛ yijiemɔ ni wɔkɛhaa Nyɔŋmɔ lɛ mli. Kɛha wɔ lɛ, Yehowa gbɛi krɔŋkrɔŋ lɛ hetsemɔ kɛ eyijiemɔ ji saji ni he hiaa wɔ babaoo. Akɛni Nyɔŋmɔ Maŋtsɛyeli lɛ baatsuu gbɛi krɔŋkrɔŋ lɛ he hewɔ lɛ, nɛkɛ Biblia mli tsɔɔmɔ ni ji Maŋtsɛyeli lɛ ji sanekpakpa lɛ ni wɔjajeɔ lɛ fa titri. Ani Lala 145 kɛ mumɔŋ shishinamɔ haa bo yɛ enɛ gbɛfaŋ? Mɛni ji nɔ ni Lala nɛɛ fa ni eshwɛ lɛ he susumɔ baajie lɛ kpo? Mɛɛ gbɛi krokomɛi anɔ hu etsɔɔ yɛ akɛ Yehowa sa naanɔ yijiemɔ?
Mɛni Ji Ohetooi?
◻ Te wɔɔfee tɛŋŋ wɔjɔɔ Yehowa gbɛi lɛ?
◻ Mɛni ji Nyɔŋmɔ nitsumɔi ni sa yijiemɔ Iɛ ekomɛi?
◻ Te wɔbaafee wɔnii wɔha tɛŋŋ kɛ wɔhiɛ sɔɔ Yehowa ejurɔfeemɔi Iɛ?
◻ Ajie Nyɔŋmɔ musuŋtsɔlɛ kpo yɛ mɛɛ gbɛi anɔ?
[Mfoniri ni yɔɔ baafa 12]
Ani ogbaa obii Yehowa nifeemɔi wuji lɛ ahe sane taakɛ fɔlɔi ni sheɔ Nyɔŋmɔ gbeyei yɛ blema Israel lɛ fee lɛ?
[Mfoniri ni yɔɔ baafa 15]
Taakɛ shia loo tsu ni ama lɛ jogbaŋŋ lɛ jieɔ tsumalɔ Iɛ yi Iɛ, nakai nɔŋŋ Yehowa nibɔɔ nitsumɔi Iɛ jieɔ E-yi