Jeee Pɛsɛmkunya Amɛkɛhere Nyɔŋmɔ Suɔmɔ Lɛ Nɔ
“Esa akɛ amɛjie Yehowa yi yɛ mlihilɛ kɛ enaakpɛɛ nii ni etsuɔ ehaa gbɔmɛi abii lɛ ahewɔ.”—LALA 107:8.
1. Mɛɛ gbɛ nɔ bɔfo Yohane ma bɔ ni suɔmɔ su ji lɛ nɔ mi eha yɛ eklɛŋklɛŋ wolo lɛ mli?
“NYƆŊMƆ lɛ suɔmɔ ni.” Kwɛ bɔ ni shishinumɔ yɔɔ nakai wiemɔ lɛ ahe ha! Ŋwanejee ko bɛ he akɛ no hewɔ ni bɔfo Yohane nu he akɛ esa akɛ eti mli yɛ eklɛŋklɛŋ wolo lɛ mli lɛ. (1 Yohane 4:8, 16) Jeee akɛ Yehowa Nyɔŋmɔ ji suɔmɔ kɛkɛ, shi moŋ ejieɔ suɔmɔ kpo, ni eji suɔmɔ ni eye emuu hu.
2. Mɛɛ gbɛi anɔ Nyɔŋmɔ jie suɔmɔ kpo, yɛ bɔ ni ebɔ nuu kɛ yoo ni esaa he ko eha amɛ lɛ mli yɛ?
2 Susumɔ suɔmɔ ni Nyɔŋmɔ jie lɛ kpo yɛ gbɛ ni etsɔ nɔ ebɔ wɔ lɛ he okwɛ. David hiɛsɔɔ wiemɔi lɛ sa jogbaŋŋ diɛŋtsɛ. Akɛ lalatsɛ ni mumɔ tsirɛɔ lɛ lɛ, ekɛɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ.” (Lala 139:14) Bɔni afee ni wɔhi shi yɛ gbɔmɔtsoŋ hewalɛnamɔ kɛ miishɛɛ mli lɛ, Nyɔŋmɔ tsɔ wɔ henumɔi enumɔ—ninamɔ, ninumɔ, naasaa, nii ŋmajee loo fu, kɛ wɔgbɔmɔtsoŋ henumɔ nɔ ekɛ nibii ni baaha wɔ miishɛɛ ni sɛɛ efooo eduro wɔ. Mɛɛ nii ni yɔɔ fɛo wɔnaa yɛ adebɔɔ mli nibii ni ebɔle wɔhe lɛ amli nɛkɛ! Kwɛ bɔ ni tsei kɛ kooloi sɔrɔtoi abɔ lɛ ahe yɔɔ naakpɛɛ ha, kɛ wɔwieee adesai asui kɛ amɛhe nibii sɔrɔtoi lɛ eko kwraa po he lɛ! Nyɔŋmɔ kɛ aduawai, baibai, kɛ niyenii krokomɛi ni wɔbaanya he fe fɛɛ lɛ hu efata he koni wɔnine ashɛ nɔ. (Lala 104:13-16) Yiŋtoo kpakpa hewɔ ni bɔfo Paulo kai blema Listra maŋbii lɛ akɛ Nyɔŋmɔ “feɔ ejurɔ, ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmaa kɛ miishɛɛ woɔ nyɛtsuiiaŋ obɔ.”—Bɔfoi lɛ Asaji 14:17.
3. Mɛɛ hewalɛi ni yɔɔ naakpɛɛ ji nɔ ni Nyɔŋmɔ kɛduro wɔ?
3 Agbɛnɛ susumɔ jɔɔmɔi fɛɛ ni jɛɔ weku mli miishɛɛ shihilɛ mli baa lɛ he okwɛ. Nɔ ni fe fɛɛ lɛ, susumɔ miishɛɛ ni wɔnyɛɔ wɔnaa yɛ wɔjwɛŋmɔ kɛ henumɔŋ hewalɛi ni wɔyɔɔ lɛ ahewɔ lɛ he okwɛ: yiŋsusumɔ, nii ahe jwɛŋmɔ, nii kaimɔ, henilee, kɛ titri lɛ hewalɛ ni wɔyɔɔ akɛ wɔɔja nɔ ko—ni fɛɛ haa wɔnɔ kwɔɔ kwraa fe kooloi lɛ; ni nakai nɔŋŋ esaaa ni wɔkuɔ wɔhiɔ wɔshwieɔ miishɛɛ ni lala baanyɛ aha wɔ lɛ hu nɔ. Enɛɛmɛi kɛ nikeenii krokomɛi babaoo lɛ fɛɛ ji suɔmɔ ni Nyɔŋmɔ yɔɔ kɛha wɔ lɛ kpojiemɔ.
4. Mɛɛ Nyɔŋmɔ suɔmɔ lɛ kpojiemɔi ji nɔ ni adesai ena kɛjɛ be mli ni amɛ klɛŋklɛŋ fɔlɔi lɛ tɔ̃ lɛ kɛbashi bianɛ?
4 Ŋwanejee ko kwraa bɛ he akɛ Adam kɛ Hawa na nibii babaoo amli miishɛɛ yɛ amɛshihilɛ ni eye emuu lɛ mli yɛ Eden abɔɔ lɛ mli. (1 Mose 2:7-9, 22, 23) Shi beni amɛkpoo ni amɛkɛ hiɛjoomɔ here odaseyeli fɛɛ ni tsɔɔ ŋwɛi suɔmɔ ni amɛnaa mli miishɛɛ lɛ nɔ lɛ, ani Nyɔŋmɔ shɛ adesai aweku lɛ efɔ kwraa? Dabi kwraa! Ekɛ oyaiyeli to gbɛjianɔ amrɔ nɔŋŋ koni ekɛjaje nibii ni ejaaa ni jɛ wɔ klɛŋklɛŋ fɔlɔi lɛ atɔmɔ lɛ mli ba lɛ fɛɛ. (1 Mose 3:15) Yehowa jie suɔmɔ kpo hu kɛtsɔ etsui shi ni eto eha Adam seshibii ni yeee emuu lɛ nɔ. (Romabii 5:12) Kɛyashi mɛɛ be? Aaafee afii 6,000 sɔŋŋ kɛbashi ŋmɛnɛ! Ni Nyɔŋmɔ jieɔ suɔmɔ kpo titri yɛ bɔ ni ekɛ etsuji yeɔ haa lɛ mli. Wiemɔi nɛɛ ji anɔkwale lɛlɛŋ: “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, ni hiɛɔ mɔbɔnalɛ mli ehaa mɛi akpei abɔ, ni ŋɔɔ tɔmɔ kɛ efɔŋ kɛ esha efaa.”—2 Mose 34:6, 7.
5. Mɛɛ gbɛ nɔ Yehowa jie tsuishitoo ni suɔmɔ yɔɔ mli kpo yɛ bɔ ni ekɛ Israel maŋ lɛ ye ha lɛ mli?
5 Hɛɛ, tsuishitoo ni Yehowa Nyɔŋmɔ jie kpo etsɔɔ yɛ bɔ ni ekɛ Israelbii lɛ ye ha kɛjɛ be mli ni ejie amɛ kpo akɛ jeŋ maŋ yɛ Sinai Gɔŋ lɛ shishi kɛyashi be mli ni amɛgba afa ni no nyɛ enɔ ni eshɛrɛ amɛ eshwie kwraa lɛ da waa diɛŋtsɛ. Taakɛ wɔkaneɔ yɛ 2 Kronika 36:15, 16 lɛ: “Shi Yehowa, amɛtsɛmɛi a-Nyɔŋmɔ lɛ tsuɔ ebɔfoi kɛbaa amɛŋɔɔ, eteɔ shi leebi maŋkpa etsuɔ amɛ, ejaakɛ emusuŋ tsɔɔ lɛ yɛ emaŋ lɛ kɛ eshihilɛ he lɛ hewɔ. Shi amɛ lɛ, Nyɔŋmɔ bɔfoi lɛ ahe fɛo moŋ amɛyeɔ, ni amɛgbeɔ ewiemɔi lɛ ahe guɔ ni amɛliɔ egbalɔi lɛ aahu kɛyashi beyinɔ ni Yehowa mlifu te shi wo emaŋ lɛ ni tsabaa ko bɛ dɔŋŋ.” Shi mɛi ni jeee pɛsɛmkunya amɛkɛhere Yehowa Nyɔŋmɔ suɔmɔ lɛ nɔ lɛ hu yɛ. Nyɛhaa wɔpɛia nɛkɛ mɛi aŋkroaŋkroi nɛɛ ekomɛi ashihilɛ mli wɔkwɛa, koni wɔna bɔ ni fee ni amɛnyɛ amɛfee nakai lɛ. Enɛ baafee shishitoo nɔ ni wɔɔtsɔ nɔ wɔtsɔɔ bɔ ni wɔ diɛŋtsɛ hu wɔɔhere Yehowa suɔmɔ lɛ nɔ wɔha yɛ gbɛi ni anyɛɔ atsuɔ he nii nɔ.
Bɔ ni Mose Here nɔ yɛ Gbɛ ni Pɛsɛmkunya bɛ Mli Nɔ
6. Mɛɛ gbɛi anɔ Mose nɔkwɛmɔ nɔ lɛ sa kadimɔ jogbaŋŋ yɛ, ni mɛɛ gbɛhei amli ena Nyɔŋmɔ suɔmɔ lɛ yɛ?
6 Mose ji mɔ ni kɛ pɛsɛmkunya hereee Nyɔŋmɔ suɔmɔ lɛ nɔ lɛ he nɔkwɛmɔ nɔ ko ni ekaaa. Mɛɛ hegbɛi jwere Mose hiɛ nɛkɛ akɛ Farao biyoo lɛ kɛ lɛ aaafee ebinuu! Shi ehala “moŋ akɛ ekɛ Nyɔŋmɔ maŋ lɛ ana amanehulu, fe nɔ ni eeeye esha mli ŋɔɔmɔ be fioo ko lɛ; [ejaakɛ] ebuɔ Kristo hewɔ ahorabɔɔ lɛ akɛ nii babaoo fe Mizraim jwetrii lɛ.” (Hebribii 11:25, 26) Yɛ be ko mli lɛ, Mose miitao ni kulɛ ekpɔ̃ enyɛmimɛi, Israelbii lɛ kɛjɛ Mizraimbii anyɔŋyeli shishi. Shi amɛhiɛ esɔɔɔ mɔdɛŋ ni ebɔɔ ni efee enɛ lɛ, ni nakai nɔŋŋ hu jeee be ni Nyɔŋmɔ eto kɛha amɛkpɔmɔ ji enɛ. (Bɔfoi lɛ Asaji 7:23-29) Shi kɛlɛ, afii nyɔŋmai abɔ komɛi asɛɛ lɛ yɛ Mose hemɔkɛyeli kɛ shwe ni eshweɔ akɛ eeeye ebua enyɛmimɛi lɛ ni pɛsɛmkunya bɛ mli hewɔ lɛ, Yehowa ha lɛ hewalɛ ni ekɛfee naakpɛɛ nibii pii, ni enyiɛ Israelbii lɛ ahiɛ afii 40 sɔŋŋ akɛ E-gbalɔ, kojolɔ, mlawolɔ, kɛ teŋdamɔlɔ. Mose na niiashikpamɔi babaoo ni tsɔɔ suɔmɔ ni Yehowa yɔɔ kɛha lɛ kɛ enanemɛi Israelbii lɛ, yɛ hegbɛi ni esɔmɔ yɛ mli nɛɛ amli.
7. Te Mose here Nyɔŋmɔ suɔmɔ lɛ kpojiemɔi lɛ anɔ eha tɛŋŋ?
7 Te Mose here Nyɔŋmɔ suɔmɔ kɛ eduromɔ ni esaaa wɔ lɛ nɔ eha tɛŋŋ? Ani ‘ehe Yehowa duromɔ ni esaaa wɔ lɛ yakatswaa?’ (2 Korintobii 6:1) Efeee nakai kɔkɔɔkɔ! Mose here suɔmɔ ni Yehowa jie kpo etsɔɔ lɛ lɛ nɔ yɛ gbɛ ni pɛsɛmkunya bɛ mli nɔ kɛtsɔ ehe fɛɛ ni etuu eha Nyɔŋmɔ lɛ nɔ. Ekwɛ Yehowa gbɛ yɛ bei fɛɛ mli ni ena ekɛ e-Feelɔ lɛ teŋ wekukpaa ko ni mli wa waa. Kwɛ bɔ ni Nyɔŋmɔ wie Mose he kɛ bulɛ ni mli kwɔ ha beni ekaa Aaron kɛ Miriam hiɛ yɛ wiemɔ ni amɛwie amɛshi amɛnyɛmi lɛ hewɔ lɛ! Hɛɛ, Yehowa kɛ Mose wie “naabu kɛ naabu” ni eha ena “Yehowa subaŋ lɛ.” (4 Mose 12:6-8) Yɛ hegbɛi babaoo ni Mose na lɛ fɛɛ sɛɛ lɛ, etee nɔ ehi shi akɛ mɔ ni he jɔ fe fɛɛ yɛ adesai ateŋ ni etsu Yehowa famɔi lɛ ahe nii, ni “nakai efee.”—2 Mose 40:16; 4 Mose 12:3.
8. Mɛɛ gbɛ nɔ Mose tsɔɔ yɛ akɛ etuu ehe eha Nyɔŋmɔ yɛ anɔkwale mli?
8 Mose tsɔɔ hu akɛ etuu ehe eha Nyɔŋmɔ yɛ gbɛ ni pɛsɛmkunya bɛ mli nɔ kɛtsɔ ehiɛ ni dɔɔ yɛ Yehowa gbɛi, kɛ ehe tsemɔ, kɛ anɔkwa jamɔ he lɛ nɔ. No hewɔ lɛ, Mose kɛ omanyeyeli kpa Yehowa fai shii enyɔ sɔŋŋ koni ejie mɔbɔnalɛ kpo etsɔɔ Israel ejaakɛ Nyɔŋmɔ gbɛi ebaje sane lɛ mli. (2 Mose 32:11-14; 4 Mose 14:13-19) Beni Israelbii lɛ kɛ amɛhe yawo tsinabi ni amɛfee lɛ wɔŋ lɛ jamɔ mli lɛ, Mose jie ekaa ni eyɔɔ kɛha anɔkwa jamɔ lɛ kpo kɛtsɔ nɛkɛ tsɛmɔ nɛɛ nɔ: “Namɔ yɔɔ Yehowa gbɛfaŋ? Mɔ lɛ aba miŋɔɔ!” Yɛ no sɛɛ lɛ, Mose kɛ mɛi ni fata ehe lɛ gbe wɔŋjalɔi lɛ ateŋ mɛi 3,000. Kɛkɛ ni, ekɛ afii 40 sɔŋŋ damɔ huhuuhu-wielɔi kɛ atuatselɔi lɛ anaa. Ŋwanejee ko kwraa be he akɛ Mose here Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ, ni ekɛfee nɔkwɛmɔ nɔ kpakpa efɔ shi eha wa ŋmɛnɛ.—2 Mose 32:26-28; 5 Mose 44:7,
David Nɔheremɔ Fɛfɛo Lɛ
9. (a) Mɛɛ gbɛ nɔ David here Yehowa Nyɔŋmɔ suɔmɔ lɛ nɔ yɛ? (b) Mɛɛ gbɛ nɔ wɔɔtsɔ wɔkɛ wɔ nibii ni jara wala awo Yehowa hiɛ nyam yɛ, taakɛ David fee lɛ?
9 Biblia mli gbɔmɔ kroko ni fee nɔkwɛmɔ nɔ kpakpa yɛ bɔ ni ehere Nyɔŋmɔ suɔmɔ lɛ nɔ ni pɛsɛmkunya bɛ mli ni sa kadimɔ waa hu ji lalatsɛ David, Israel maŋtsɛ ni ji enyɔ lɛ. Ekaa ni eyɔɔ kɛha Yehowa gbɛi lɛ tsirɛ lɛ koni ekɛ Filistinyo obalaŋ ni tswaa mpoa, Goliat, mɔ ni Yehowa ha David ye enɔ kunim lɛ ayawu. (1 Samuel 17:45-51) Nakai ekaa lɛ nɔŋŋ tsirɛ David koni ekɛ kpaŋmɔ adeka lɛ aba Yerusalem. (2 Samuel 6:12-19) Ni ani shwe ni David shweɔ akɛ eeema sɔlemɔ tsu eha Yehowa lɛ jeee ekaa kɛ hiɛsɔɔ ni eyɔɔ kɛha Nyɔŋmɔ suɔmɔ kɛ ejurɔfeemɔ lɛ kpojiemɔ kroko? Yɛ anɔkwale mli lɛ nakai eji. Nakai hegbɛ lɛ ni akɛhaaa David lɛ haaa enijiaŋ aje wui yɛ nitsumɔ lɛ ni eeeha eya hiɛ ni ewo Yehowa hiɛ nyam kɛtsɔ shika tsuru, jwiɛtɛi, kɛ tɛi kpakpai ni jara wa waa ni ekɛbaha lɛ nɔ. (2 Samuel 7:1-13; 1 Kronika 29:2-5) Esa akɛ bɔ ni ahereɔ Nyɔŋmɔ suɔmɔ lɛ nɔ yɛ gbɛi ni pɛsɛmkunya bɛ mli nɔ lɛ atsirɛ wɔ ni ‘wɔkɛ wɔnii ni jara walɛ awo Yehowa hiɛ nyam’ kɛtsɔ nii ni wɔkɛ heloonaa nibii ni wɔyɔɔ lɛ aaatsu koni wɔkɛlɛɛ Maŋtsɛyeli lɛ he nibii amli lɛ nɔ.—Abɛi 3:9, 10; Mateo 6:33.
10. Gbɛ ni David kɔ lɛ sa kasemɔ yɛ mɛɛ gbɛi komɛi anɔ?
10 Eyɛ mli akɛ David tɔ̃ tɔmɔi ni hiɛdɔɔ yɔɔ he moŋ, shi yɛ ewala beaŋ fɛɛ lɛ, ehi shi akɛ ‘mɔ ko ni Yehowa tsui nyaa ehe.’ (1 Samuel 13:14; Bɔfoi lɛ Asaji 13:22) Elalai lɛ eyi obɔ kɛ Nyɔŋmɔ suɔmɔ lɛ he hiɛsɔɔ wiemɔi. The International Standard Bible Encyclopedia lɛ kɛɔ akɛ David “eyi obɔ kɛ shidaa babaoo fe mɔ fɛɛ mɔ ni atsi egbɛi ta yɛ Ŋmalɛ Krɔŋkrɔŋ lɛ mli.” Lalatsɛ Asaf kɛɛ akɛ Nyɔŋmɔ “ehala etsulɔ David, ni efa lɛ kɛjɛ tooi atsũiaŋ. Ekpala lɛ . . . kɛba, koni ebalɛ Yakob ni ji emaŋ lɛ kɛ Israel ni ji egbɛfaŋnɔ lɛ. Ni ele amɛ yɛ etsuiŋ emuuyeli lɛ naa.” (Lala 78:70-72) Lɛlɛŋ, gbɛ ni David kɔ lɛ sa kɛha wɔ akɛ wɔɔkase.
Yesu Kristo, Wɔ Nɔkwɛmɔ nɔ Ni Yeɔ Emuu Lɛ
11, 12. Mɛɛ gbɛ nɔ Yesu tsɔɔ yɛ akɛ etuu ehe eha Nyɔŋmɔ kwraa?
11 Yɛ anɔkwale mli lɛ, Yesu Kristo ji Ŋmalɛ mli nɔkwɛmɔ nɔ ni fe fɛɛ ni tsɔɔ nuu ni here, Nyɔŋmɔ suɔmɔ lɛ nɔ yɛ gbɛ ni pɛsɛmkunya bɛ mli nɔ. Mɛni enɛ tsirɛ Yesu ni efee? Klɛŋklɛŋ kwraa lɛ, enɛ kanya lɛ ni ekɛ hetuu-kɛhamɔ kwraa aha Yehowa. Ŋwanejee ko bɛ he akɛ Yesu tuu ehe fɛɛ eha Nyɔŋmɔ kwraa kɛmɔ shi. Hiɛsɔɔ ni eyɔɔ kɛha eŋwɛi Tsɛ lɛ suɔmɔ kɛ ejurɔfeemɔ lɛ tsirɛ lɛ koni efee mumɔŋ gbɔmɔ diɛŋtsɛ. Ena ekɛ Nyɔŋmɔ teŋ wekukpaa ni mli wa ni bɛŋkɛ kpaakpa. Yesu ji mɔ ko ni sɔleɔ, ni esumɔɔ ni ekɛ eŋwɛi Tsɛ lɛ awie. Wɔkaneɔ shii abɔ ni Yesu miisɔle. Yɛ be ko mli lɛ, eye jenamɔ muu fɛɛ ni ekɛmiisɔle. (Luka 3:21, 22; 6:12; 11:1; Yohane 17:1-26) Yɛ Nyɔŋmɔ suɔmɔ lɛ nɔheremɔ mli lɛ, Yesu hi shi yɛ anɔkwale ni eji akɛ ‘jeee aboloo kɛkɛ haa gbɔmɔ yi naa wala, shi moŋ wiemɔ fɛɛ wiemɔ ni jɛɔ Yehowa daaŋ’ lɛ naa. Yɛ anɔkwale mli lɛ, e-Tsɛ lɛ suɔmɔnaa nifeemɔ ji niyenii kɛha lɛ. (Mateo 4:4; Yohane 4:34) Ani esaaa ni wɔhereɔ Nyɔŋmɔ suɔmɔ lɛ nɔ yɛ gbɛ ni tamɔ nɛkɛ nɔ, ni wɔkɛ hetuu-kɛhamɔ fɛɛ aha lɛ?
12 Yɛ be mli ni Yesu hereɔ Nyɔŋmɔ suɔmɔ lɛ nɔ yɛ gbɛ ni pɛsɛmkunya bɛ mli nɔ lɛ, egbala jwɛŋmɔ kɛba e-Tsɛ kɛ Nyɔŋmɔ lɛ nɔ yɛ bei fɛɛ mli. Beni mɔ ko tsɛ Yesu akɛ “Tsɔɔlɔ Kpakpa” lɛ, ekpɛlɛɛɛ nɔ, shi moŋ ekɛɛ lɛ akɛ: “Mɔ kpakpa ko bɛ akɛ ja mɔ kome, lɛ ji Nyɔŋmɔ.” (Luka 18:18, 19) Yesu ma nɔ mi shii abɔ akɛ lɛ diɛŋtsɛ etooo eyiŋ efeee nɔ ko. Ehaaa hegbɛ ko kwraa ni eeena akɛ ekɛwo e-Tsɛ lɛ hiɛ nyam lɛ aŋmɛɛ lɛ, ni eje esɔlemɔ he nɔkwɛmɔ lɛ shishi kɛ nɛkɛ faikpamɔ nɛɛ yɛ gbɛ ni sa jogbaŋŋ nɔ akɛ: “Ha ogbɛi lɛ he atse.” Esɔle akɛ: “Ataa, wo ogbɛi lɛ hiɛ nyam!” Ni beni eshwɛ fioo ni ebaagbo lɛ, Kristo kɛɛ e-Tsɛ akɛ: “Mi lɛ miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni oŋɔha mi tsumɔ lɛ, migbe naa lɛ.” (Mateo 6:9; Yohane 12:28; 17:4) Belɛ eyɛ faŋŋ akɛ, esa akɛ wɔtao akɛ wɔɔwo Yehowa hiɛ nyam, yɛ Nyɔŋmɔ suɔmɔ lɛ nɔheremɔ mli, ni wɔsɔle kɛha egbɛi krɔŋkrɔŋ lɛ hetsemɔ.
13. Mɛɛ gbɛ nɔ Nyɔŋmɔ suɔmɔ lɛ kanya Yesu koni efee enii yɛ?
13 Agbɛnɛ, ofainɛ kadimɔ gbɛ ni ji enyɔ ni Nyɔŋmɔ suɔmɔ lɛ nɔheremɔ yɛ gbɛ ni pɛsɛmkunya bɛ mli nɔ lɛ kanya Yesu yɛ. Eha esumɔ jalɛ ni enyɛ efɔŋfeemɔ, taakɛ agba afɔ shi yɛ Lala 45:8 lɛ. (Hebribii 1:9) “Ehe tse, ni efɔŋ ko bɛ ehe, ni ehe bɛ kpa ko, ni etse ehe kɛjɛ eshafeelɔi ahe.” (Hebribii 7:26) Yesu tswa mɛi ni kɛ amale folɔ enaa lɛ mpoa akɛ amɛtsɔɔ esha ni efee lɛ yɛ faŋŋ, shi amɛnyɛɛɛ nakai amɛfee. (Yohane 8:46) Bɔ ni enyɛɔ efɔŋfeemɔ lɛ ha eshwie Nyɔŋmɔ-jalɔi hiɛjoolɔi lɛ kɛjɛ sɔlemɔ we lɛ shii enyɔ sɔŋŋ ni ekɛtsuu he. (Mateo 21:12, 13; Yohane 2:13-17) Ni kwɛ bɔ ni Yesu wie eshi jamɔ mli hiɛnyiɛlɔi osatofoi lɛ waa eha, akɛ ekɛɛ amɛ po akɛ amɛjɛ Abonsam mli!—Mateo 6:2, 5, 16; 15:7-9; 23:13-32; Yohane 8:44.
14. Mɛɛ gbɛ nɔ Yesu kɛ ekaselɔi lɛ ye yɛ, yɛ Yehowa suɔmɔ lɛ nɔheremɔ mli?
14 Anyɛɔ anaa gbɛ kroko ni Nyɔŋmɔ suɔmɔ lɛ tsɔ nɔ ekanya Yesu lɛ yɛ bɔ ni ekɛ ebɔfoi lɛ kɛ kaselɔi krokomɛi lɛ ye ha lɛ mli. Kwɛ bɔ ni ena suɔmɔ, tsuishitoo, kɛ mlihilɛ eha amɛ! Ekolɛ amɛkɛ akaŋshii ni baka amɛteŋ lɛ po baaha eye awerɛho, yɛ be mli ni amɛtaoɔ saji anaa yɛ mɔ ni ji onukpa yɛ amɛteŋ aahu kɛyashi gbɛkɛnaashi beni atsɔɔ esɛɛ gbɛ po lɛ. (Luka 22:24-27) Ni kɛlɛ, Yesu tsɔɔ yɛ bei fɛɛ mli akɛ eŋmɛɔ etsui shi ni eyɛ heshibaa yɛ etsui mli tɔɔ. (Mateo 11:28-30) Lɛlɛŋ, Yuda tsɔɔ Yesu sɛɛ gbɛ, ni Petro kwa lɛ shii etɛ sɔŋŋ, ni bɔfoi krokomɛi lɛ fɛɛ jo foi beni gbɔmɛi asafo babaoo lɛ ba ni amɛbamɔ lɛ lɛ. Shi no haaa ekɛ dɔlɛ awo emli aloo edɔ amɛ ona. Te wɔfeɔ tɛŋŋ wɔleɔ enɛ? Ojogbaŋŋ, beni esaa eyafata bɔfoi lɛ ahe ekoŋŋ yɛ egbohiiashitee lɛ sɛɛ lɛ, Yesu kaaa amɛhiɛ nyanyaanya yɛ amɛhe ni amɛŋmɛɛ amɛha gbeyeishemɔ lɛ hewɔ. Shi moŋ, eshɛje amɛmii ni ewo amɛ hewalɛ kɛha Maŋtsɛyeli lɛ he sɔɔmɔ nitsumɔ ni ka amɛhiɛ lɛ.—Yohane 20:19-23.
15. Yesu sɔmɔ yɛ gbɔmɛi aheloo naa hiamɔ nii ahe yɛ gbɛ ni pɛsɛmkunya bɛ mli nɔ yɛ mɛɛ gbɛ nɔ?
15 Nyɛhaa wɔsusua gbɛ kroko ni Yesu Kristo tsɔ nɔ ehere Nyɔŋmɔ suɔmɔ lɛ nɔ yɛ gbɛ ni pɛsɛmkunya bɛ mli nɔ lɛ he. Efee nakai kɛtsɔ ehe ni ekɛsha afɔle yɛ mɛi krokomɛi ahewɔ, aahu kɛyashi sɛŋmɔtso nɔ gbele ni yɔɔ hiɛgbele kɛ jaramɔ lɛ nɔ. (Filipibii 2:5-8) Yesu sɔmɔ yɛ adesai aheloo naa hiamɔ nii ahewɔ kɛtsɔ naakpɛɛ gbɛ nɔ ni etsɔ elɛ mɛi babaoo kɛ mɛi pii ahelai ni etsa lɛ hu nɔ. (Mateo 14:14-22; 15:32-39) Ekɛ mɛi krokomɛi ahilɛ ye klɛŋklɛŋ gbɛhe yɛ lɛ diɛŋtsɛ enɔ najiaŋ be fɛɛ be. No hewɔ ni enyɛ ekɛɛ akɛ: “Osɔi yɛ bui, ni ŋwɛi loofɔji yɛ tsui; shi gbɔmɔ Bi lɛ bɛ he ni ekɛ eyitso tsɔleɔ” lɛ. (Mateo 8:20) Yesu nu Nyɔŋmɔ mumɔ lɛ nitsumɔ he yɛ be mli ni ehoɔ kɛjɛɔ emli ni ekatsaa mɛi yɛ naakpɛɛ gbɛ nɔ lɛ. Shi ebɔɔɔ mɔdɛŋ akɛ ekɛ hewalɛ ni eyɔɔ ni nɔ kwɔ fe adesai anɔ lɛ aaatsu nii kɛha eheloo gbɛfaŋ sɛɛnamɔi, taakɛ yɛ be mli ni yoo ko ni la eho lɛ afii 12 sɔŋŋ lɛ ta etadei lɛ ahe yɛ hemɔkɛyeli mli ni aha ehe wa lɛ lɛ. (Marko 5:25-84) Kɛfata he lɛ, Yesu kɛ hewalɛ ni ‘nɔ kwɔ fe adesai anɔ lɛ tsuuu nii yɛ lɛ diɛŋtsɛ egbɛfaŋ gbi ko gbi ko.—Okɛto Mateo 4:2-4 he.
16. Mɛɛ gbɛi anɔ Kristo sɔmɔ yɛ gbɔmɛi amumɔŋ hiamɔ nii ahe yɛ?
16 Eyɛ mli akɛ Yesu tsu gbɔmɛi lɛ aheloo naa hiamɔ nii ahe nii yɛ gbɛ ni pɛsɛmkunya bɛ mli nɔ kɛtsɔ amɛhelai ni etsa kɛ naakpɛɛ gbɛ ni etsɔ nɔ elɛ amɛ lɛ nɔ moŋ, shi nɔ ni kanya lɛ yɛ eshikpɔŋ nɔ sɔɔmɔ nitsumɔ lɛ mli ji ni eshiɛ Nyɔŋmɔ Maŋtsɛyeli lɛ he sanekpakpa lɛ, ni etsɔɔ nii, kɛ agbɛnɛ hu koni efee kaselɔi. Yɛ naakpɛɛ tsamɔi ni etsu he nii lɛ fɛɛ sɛɛ lɛ, abaleee lɛ akɛ Tsofafeelɔ Kpeteŋkpele loo Naakpɛɛ-Nifeelɔ lɛ, shi moŋ akɛ Tsɔɔlɔ Kpakpa lɛ. (Mateo 4:23, 24; Marko 10:17) Yesu tsɛ lɛ diɛŋtsɛ ehe akɛ Tsɔɔlɔ, taakɛ bɔ ni ekaselɔi lɛ kɛ ehenyɛlɔi po tete tsɛ lɛ lɛ. (Mateo 22:16; 26:18; Marko 9:38) Ni mɛɛ anɔkwalei etsɔɔ nɛkɛ, taakɛ eyɔɔ yɛ e-Gɔŋ nɔ Shiɛmɔ lɛ mli lɛ! (Mateo 5:1–7:29) Kwɛ bɔ ni ebɛbuai loo sanenaatsɔɔmɔ lɛ sa jogbaŋŋ ha, ni kwɛ bɔ ni egbalɛi mli abɛbuai kɛ gbalɛi krokomɛi lɛ sa kadimɔ jogbaŋŋ ha! Ŋwanejee ko bɛ he akɛ no hewɔ ni be ko beni atsu asraafoi ni amɛyamɔ Yesu kɛba lɛ, ni amɛnyɛɛɛ amɛmɔ lɛ lɛ!—Yohane 7:45, 46.
17. (a) Mɛɛ gbɛ nɔ Yesu fee suɔmɔ he nɔkwɛmɔ nɔ ni yeɔ emuu efɔ shi eha wɔ yɛ? (b) Mɛni abaasusu he yɛ nikasemɔ ni nyiɛ sɛɛ lɛ mli?
17 Belɛ sanebimɔ ko bɛ he akɛ, Yesu Kristo fee nɔkwɛmɔ ni yeɔ emuu yɛ bɔ ni wɔɔhere nibii ni tsɔɔ suɔmɔ ni Nyɔŋmɔ yɔɔ kɛha wɔ lɛ nɔ yɛ gbɛ ni pɛsɛmkunya bɛ mli nɔ eha wɔ. Yesu ha eŋwɛi Tsɛ lɛ ye klɛŋklɛŋ gbɛhe yɛ eshihilɛ kɛ nibii ni enyaa he lɛ amli. Yɛ anɔkwale mli lɛ, esumɔɔ jalɛ, ni ekɛ ebɔfoi lɛ kɛ kaselɔi krokomɛi lɛ ye yɛ suɔmɔ mli, ni ekɛ ewala be fɛɛ tsu nii ni ekɛsɔmɔ yɛ gbɔmɛi amumɔŋ kɛ heloonaa hiamɔ nii ahewɔ. Yɛ naagbee lɛ, Yesu gbe esɔɔmɔ nitsumɔ lɛ naa kwraa kɛtsɔ ewala ni ekɛha akɛ kpɔmɔ nɔ lɛ nɔ. (Mateo 20:28) Shi wɔ hu? Eji anɔkwale akɛ, wɔyeee emuu, tamɔ Mose kɛ David. Shi kɛlɛ, gbɛi komɛi ni anyɛɔ atsuɔ he nii yɛ ni wɔɔnyɛ wɔtsɔ nɔ wɔkase wɔ Nɔkwɛmɔ Nɔ lɛ ni wɔkɛhere nibii ni jieɔ Nyɔŋmɔ suɔmɔ lɛ kpo etsɔɔ lɛ nɔ yɛ gbɛ ni pɛsɛmkunya bɛ mli nɔ, taakɛ nikasemɔ ni nyiɛ sɛɛ lɛ baatsɔɔ lɛ.
Te Obaaha Hetoo Oha Tɛŋŋ?
◻ Mɛni hewɔ ni abaanyɛ akɛɛ akɛ “Nyɔŋmɔ lɛ, suɔmɔ ni” Iɛ?
◻ Mɛɛ gbɛ nɔ Mose here Nyɔŋmɔ suɔmɔ Iɛ kpojiemɔi Iɛ anɔ yɛ?
◻ Mɛɛ gbɛi anɔ David here Yehowa Nyɔŋmɔ suɔmɔ Iɛ nɔ yɛ?
◻ Mɛɛ nɔkwɛmɔ nɔ Yesu Kristo fee efɔ shi yɛ Nyɔŋmɔ suɔmɔ Iɛ nɔheremɔ mli?
[Mfoniri ni yɔɔ baafa 10]
Ani ole bɔ ni Mose here Nyɔŋmɔ suɔmɔ Iɛ nɔ eha?
[Mfonirii ni yɔɔ baafa 12, 13]
Yesu here Nyɔŋmɔ suɔmɔ lɛ nɔ kɛtsɔ mɛi krokomɛi ni eye ebua yɛ mumɔŋ kɛ heloo gbɛfaŋ kɛ ewala ni ekɛha akɛ kpɔmɔ nɔ lɛ nɔ