Jeŋ Muu Fɛɛ Miishɛɛ Ko
“NAA, mitsuji lɛ aaala kɛ tsuijurɔ.” (Yesaia 65:14) Nɛkɛ ji bɔ ni Yehowa kɛɛ kɛtsɔ egbalɔ Yesaia nɔ, ni kwɛ bɔ ni ewiemɔi nɛɛ naa amɛmlibaa yɛ naakpɛɛ gbɛ nɔ yɛ Yehowa Odasefoi ateŋ ha! Nɛgbɛ tsuijurɔ ni amɛnaa lɛ jɛɔ kɛbaa? Kɛjɛ Yehowa Nyɔŋmɔ ni amɛjaa lɛ yɛ ekomefeemɔ mli lɛ ŋɔɔ. Lɛ ji “miishɛɛ Nyɔŋmɔ” lɛ, ni mɛi ni jaa lɛ lɛ ‘amli filiɔ amɛ yɛ Yehowa mli.’ (1 Timoteo 1:11, NW; Zakaria 10:7) Nɛkɛ miishɛɛ mli ni amɛjɛ amɛtuu amɛhe amɛha nɛɛ feɔ amɛ ekome akɛ jeŋmaŋ kome yɛ be mli ni amɛshiɛɔ Maŋtsɛyeli lɛ he sanekpakpa lɛ ni amɛkɛ gbee ni wa ni kpeleɔ jeŋ muu fɛɛ jieɔ amɛ-Nyɔŋmɔ lɛ yi lɛ.—Kpojiemɔ 7:9, 10.
“Miishɛɛ ni Mɔ ko Nyɛŋ Ashɔ̃ yɛ Midɛŋ”
Yɛ anɔkwale mli lɛ, Nyɔŋmɔ gbɛi lɛ kɛ Maŋtsɛyeli lɛ shiɛmɔ lɛ ji miishɛɛ jɛɛhe ko ni sɛɛ efooo kɛha Yehowa Odasefoi. (Marko 13:10) Amɛhereɔ lalatsɛ lɛ wiemɔi lɛ anɔ: “Nyɛshwaa nyɛfɔa egbɛi krɔŋkrɔŋ lɛ nɔ; mɛi ni taoɔ Yehowa sɛɛ gbɛ lɛ atsui anyɔ amɛmli.”—Lala 105:3.
Yɛ bei babaoo mli lɛ, amɛyeɔ gbɛtsii nii anɔ kunim ni amɛfeɔ enɛ. Yɛ Spain lɛ, Isidro jɔɔ ehe nɔ eha Yehowa, ni eetao ni ekɛ mɛi krokomɛi agba E-he sane. Shi tsɔne kudɔlɔ ji lɛ, ni be fioo pɛ enaa, ni efaa gbɛ kakadaŋŋ yɛ nyɔɔŋ teŋ ni ewɔɔ yɛ jetsɛremɔ mli. Isidro miitao ni eye enanemɛi tsɔne kudɔlɔi krokomɛi lɛ odase, shi mɛɛ gbɛ nɔ eeetsɔ efee enɛ?
Ekɛ redio bibioo ko ni atsɛɔ lɛ CB (ni ji maŋbii aredio) ni ebaanyɛ ewie ewo mli ni egbɛɛ yɛ tsɔne kudɔlɔi krokomɛi atsɔnei amli lɛ eko wo etsɔne lɛ mli. Kɛkɛ ni ena akɛ akɛ enɔ kpaai lɛ ekome, nɔ ni ji 13 lɛ efɔɔɔ nitsumɔ tsɔ, no hewɔ lɛ ekpɛ eyiŋ akɛ ekɛ hegbɛ nɛɛ baatsu nii. Shi kɛlɛ, beni ekɛɛ tsɔne kudɔlɔi krokomɛi lɛ klɛŋklɛŋ kwraa akɛ ekɛ amɛ baagba Biblia lɛ he sane yɛ CB redio lɛ nɔ lɛ, amɛnyaaa he tsɔ. Shi mɛi komɛi bo lɛ toi. Wiemɔ lɛ gbɛ shwa, ni nakai Spainbii tsɔne kudɔlɔi lɛ ateŋ mɛi pii gbele amɛ redioi lɛ kɛtee kpaa 13 lɛ nɔ. Nyɛsɛɛ nɛɛ, Isidro na ele akɛ kɛ hooo lɛ amɛteŋ mɔ kome miito gbɛjianɔ ni eha e-Biblia kasemɔ lɛ aya hiɛ.
Yɛ Italia lɛ, nuu ko nu Yehowa Odasefoi lɛ ahe kɛtsɔ sanegbaa ni ekɛ mɔ kroko na yɛ bɔs mli lɛ nɔ. Eŋa kɛ amɛ kpe kɛtsɔ amɛnaanyo ko nɔ. Amɛyi enyɔ lɛ fɛɛ amɛkase Biblia lɛ ni amɛmiishwe ni amɛkɛ mɛi krokomɛi aja nɔ ni amɛkase lɛ. Amɛhe miitswa shi aahu akɛ nuu lɛ kpoo gbɛhe ni aha lɛ yɛ nitsumɔ mli lɛ ni eŋa hu kpa nitsumɔ ni etsuɔ ni enaa nyɔmɔwoo babaoo yɛ mli lɛ hu bɔni afee ni amɛnyɛ amɛkɛ be babaoo agba Maŋtsɛyeli lɛ he sanekpakpa lɛ amɛtsɔɔ mɛi krokomɛi. Ani sɛɛnamɔ ejɛ mli eba? Hɛɛ. Nuu lɛ kɛɔ akɛ: “Kɛjɛ be mli ni wɔbale anɔkwale lɛ nɛɛ, mikɛ miŋa ena miishɛɛ akɛ wɔɔye wɔbua mɛi 20 ni amɛbana Nyɔŋmɔ yiŋtoi lɛ ahe anɔkwale nilee. Kɛ je na ni miku misɛɛ mitee shia yɛ be mli ni mitsu nii yɛ Yehowa sɔɔmɔ mli yɛ gbi lɛ mli lɛ, eji anɔkwale akɛ, minuɔ he akɛ etɔ mi. Shi miyɛ miishɛɛ, ni midaa Yehowa shi akɛ eha mi miishɛɛ ni mɔ ko nyɛŋ ashɔ̃ yɛ midɛŋ.”
“Kɛyashi Shikpɔŋ lɛ Naagbee Hei Lɛ”
Mɛi ni yɔɔ nakai Nyɔŋmɔ maŋ ni yɔɔ miishɛɛ lɛ mli lɛ jieɔ ekaa ni tamɔ nakai nɔŋŋ kpo yɛ he fɛɛ he ni amɛyɔɔ, “kɛyashi shikpɔŋ lɛ naagbee hei lɛ” po tɔɔ. (Bɔfoi lɛ Asaji 1:8) Hei fioo ko pɛ yɔɔ ni jɛkɛ fe Greenland kooyigbɛ. Ni kɛlɛ, Ilulissat asafo bibioo, ni gbɔmɛi 19 yɔɔ mli lɛ yɛ jɛmɛ, aaafee shitoi 200 kɛyaa Arctic Liamɔ klokloo lɛ kooyigbɛ. Amɛshiɛɔ sanekpakpa ni nakai Italiabii hefatalɔi lɛ shiɛɔ lɛ nɔŋŋ, ni amɛna miishɛɛ waa akɛ nyɛsɛɛ afi lɛ amɛna ni abaptisi Greenlandbii kpawo akɛ amɛhenɔjɔɔmɔ kɛha Yehowa lɛ he okadi.
Anjinee yɛ nakai miishɛɛ lɛ nɔŋŋ eko yɛ Mauritius ŋshɔkpɔ ni yɔɔ hulu liamɔi lɛ amli yɛ Indian Ocean ŋshɔ lɛ mli, aaafee shitooi akpei abɔ kɛjɛ Greenland lɛ. Kɛjɛ shishijee lɛ, nibii amli wa waa kɛha Anjinee. Yɛ Mauritius lɛ, Kristofoi akpeei ni ayaa kɛ shiɛmɔ ni ashiɛɔ Nyɔŋmɔ he sane yɛ faŋŋ mli lɛ jeee nitsumɔi ni abuɔ akɛ esa akɛ obalayoo ni boteko gbalashihilɛ mli ni eji Indianyo Hindunyo lɛ kɛ ehe woɔ mli. Shi Anjinee mia ehiɛ. Amrɔ nɛɛ, kɛjɛ be mli ni ekɔ e-Kristofoi agbɛ nɛɛ sɛɛ afii nɛɛhu lɛ, ewekumɛi lɛ ateŋ mɛi komɛi hu miikase Biblia lɛ.
Esa akɛ atsi Emilio hu ta yɛ nibii ni kɔɔ Anjinee he lɛ mli, yɛ je lɛŋ afa kroko kwraa hu, yɛ Honduras. Emilio nu ni enanemɛi nitsulɔi miigba Biblia lɛ he sane yɛ nitsumɔ he, ni ebi ni amɛha efata sanegbaa lɛ he. Enyɛɛɛ wolo ekane, shi kɛlɛ ekɛ miishɛɛ bo toi yɛ be mli ni akaneɔ Biblia mli ŋmalɛi lɛ. Yɛ be mli ni Kristofoi anɔkwalei lɛ gbuɔ kɛyaa etsui mli lɛ, Emilio kpa ejeŋba shara shihilɛ lɛ ni ekpa daatɔɔ shɛii lɛ hu. Yehowa Odasefoi tsɔɔ lɛ nikanemɔ kɛ niŋmaa, ni amrɔ nɛɛ eji sɔɔlɔ yɛ Nyɔŋmɔ maŋ ni yɔɔ miishɛɛ lɛ mli.
Aaafee shitooi akpei abɔ yɛ Honduras kooyi-anaigbɛ lɛ, Eskimo yoo ko ni yɔɔ Alaska lɛ kase nakai Kristofoi anɔkwale kome lɛ nɔŋŋ. Nɛkɛ obalayoo nɛɛ yɛ akrowa ko ni etse ehe banee mli, ni gbɛ pɛ ni etsɔɔ nɔ ekɛ Yehowa Odasefoi lɛ bɔɔ ji kɛtsɔ woloŋmaa nɔ. No hewɔ lɛ etsɔ woloŋmaa nɔ ekase anɔkwale lɛ, ni ebi esanebimɔi lɛ kɛtsɔ woloŋmaa nɔ, ni amrɔ nɛɛ ekɛ enanemɛi miija nɔ ni ele lɛ kɛ ekaa. Nɔkwɛmɔ nii ni tamɔ enɛɛmɛi baanyɛ aku abɔ he shii abɔ ni esɛɛ efooo. Yɛ je lɛŋ he fɛɛ he lɛ, mɛi ni yɔɔ heshibaa tsui lɛ miiba koni “amɛbasɔmɔ Yehowa kɛ miishɛɛ.”—Lala 100:2.
‘Nyɛsumɔa Nyɛhe’
Nɔ kome ni gbalaa mɛnɛɛmɛi fɛɛ ji suɔmɔ ni yɔɔ Nyɔŋmɔ maŋ ni yɔɔ miishɛɛ lɛ mli lɛ. Yesu kɛɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Anaa Kristofoi asuɔmɔ yɛ nɛkɛ anɔkwa Kristofoi nɛɛ adaa gbi shihilɛ mli, ni titri lɛ yɛ oshara bei amli.
Yɛ Afrika maŋ ko mli, he ni dɔlɛ sane kome ji akɛ, atsi Yehowa Odasefoi anitsumɔ naa yɛ lɛ, nu hɔmɔ ni naa wa waa ko te shi. Gbɔmɛi akpei nyɔŋma gboi, ni tsina kui ahiɛ kpata. Mɛɛ gbɛ nɔ Odasefoi lɛ tsɔ amɛje mli? Kɛtsɔ tsei ashishifai kɛ paya wu ni ahoo ni amɛyeɔ lɛ nɔ! Shi amɛ amanehulu lɛ ba shi yɛ naakpɛɛ gbɛ nɔ, beni kɛtsɔ Nyɔŋmɔ yelikɛbuamɔ nɔ lɛ, aŋmɛ Odasefoi ni yɔɔ maji krokomɛi anɔ lɛ gbɛ koni amɛkɛ yelikɛbuamɔ nibii sɔrɔtoi ni tsiimɔ shɛɔ tɔn 25 abaha amɛ yɛ be mli ni amɛhiɛ kãaa nɔ lɛ. Yɛ anɔkwale mli lɛ, yɛ naatsii lɛ fɛɛ sɛɛ lɛ, aha asraafoi bu nɛkɛ yelikɛbuamɔ nibii nɛɛ ahe koni amɛkwɛ ni eyashɛ shweshweeshwe!
Lɛlɛŋ, nakai Afrikabii Odasefoi lɛ na miishɛɛ kɛteke nɔ akɛ amɛnine aaashɛ nɛkɛ odaseyeli ni tsɔɔ suɔmɔ ni amɛnyɛmimɛi lɛ yɔɔ kɛha amɛ lɛ nɔ yɛ be mli ni amɛnaa Yesaia wiemɔi nɛɛ amlibaa diɛŋtsɛ lɛ: “Naa, Yehowa nine efoko kuku ni enyɛɛɛ yiwala ehere, ni asaŋ etoii hu tsimɔko ni enuuu nii.”—Yesaia 59:1.
Maŋ ko ni Yɔɔ Toiŋjɔlɛ
Agbalaa mɛi ni hiɛ tsujurɔ lɛ hu kɛbaa Nyɔŋmɔ maŋ ni yɔɔ miishɛɛ lɛ mli ejaakɛ emlibii lɛ eshi je nɛŋ gbɛi ni haa akɛ he wuuɔ tai lɛ ni ‘amɛkɛ amɛklantei esɔ̃ kɔii.’ (Yesaia 2:4) Yɛ El Salvador lɛ, nuu ko ni tsutsu ko lɛ eji asraafonyo lɛ shia eyi obɔ kɛ esraafoi anitsumɔ lɛ mli kaimɔ nibii. Shi beni ekɛ Yehowa Odasefoi bɔi Biblia lɛ kasemɔ lɛ, ebɔi toiŋjɔlɛ nibii ahe miishɛɛ namɔ. Yɛ naagbee lɛ, ejie nibii ni kɔɔ tawuu he lɛ fɛɛ kɛjɛ eshia lɛ ni ekɛ ehe wo shiɛmɔ nitsumɔ lɛ mli kɛ ekaa.
Beni mɛi ni teɔ shi woɔ nɔyeli hegbɛi lɛ baŋɔ amɛ akrowa lɛ, amɛmɔ lɛ akɛ gboklɛfonyo—ni eka shi faŋŋ akɛ mɔ ko eyajie lɛ shi akɛ mɔ ko ni etsu asraafoi anitsumɔ dã. Shi kɛlɛ, etsɔɔ mli akɛ, ejeee asraafonyo dɔŋŋ, shi moŋ eji Yehowa Odasefoi lɛ ateŋ mɔ kome. Maŋ hiɛ atuatselɔi nɛɛ folɔ enaa akɛ eyɛ tuŋtɛi yɛ shia, shi ni amɛyakwɛ eshia lɛ fɛɛ kɛkpe lɛ, anaaa eko kwraa yɛ jɛmɛ. Kɛkɛ ni mɔ ni nyiɛ atuatselɔi lɛ ahiɛ lɛ bi akrowa lɛ mlibii lɛ ehe saji. Wiemɔ ko ni sa kadimɔ waa ji akɛ: “Nyiɛmɔ kɛkɛ enyiɛ kɛyaa kɛbaa yɛ gbɛjegbɛ lɛ nɔ ni eeshiɛ yɛ Biblia lɛ he daa gbi.” Enɛ ha amɛŋmɛɛ nuu lɛ he. Ŋwanejee ko bɛ he akɛ ekaa ni eyɔɔ lɛ here eyiwala.
Amaniɛbɔɔ ko ni jɛ Afrika maŋ ko mli lɛ wieɔ asraafoi enyɔ komɛi ni kɛ Yehowa Odasefoi kase Biblia lɛ ahe. Amɛteŋ mɔ kome sɔmɔ akɛ maŋ lɛŋ asraafoi lɛ ateŋ mɔ ko, ni mɔ kroko lɛ wuu eha mɛi ni tseɔ atua lɛ. Yɛ naagbee lɛ, mɛi enyɔ lɛ fɛɛ kpɛ amɛyiŋ akɛ “amɛkɛ amɛklantei aaasɔ̃ kɔii” ni amɛkpa asraafoi anitsumɔ lɛ. Beni amɛtee Kristofoi akpeei klɛŋklɛŋ kwraa lɛ, asraafonyo ni wuuɔ eshiɔ nɔyeli lɛ bi mɔ kroko lɛ akɛ: “Mɛni otaoɔ yɛ biɛ?” Eha hetoo akɛ: “Ni bo hu, mɛni otaoɔ yɛ biɛ?” “Kɛkɛ ni,” taakɛ amaniɛbɔɔ lɛ tee nɔ lɛ, “amɛfua amɛhe, ni amɛfofoi kɛ miishɛɛ sɔŋŋ ejaakɛ agbɛnɛ amɛbaanyɛ amɛfee ekome kɛhi shi yɛ toiŋjɔlɛ mli.” Shi ŋwanejee ko bɛ he akɛ nɛkɛ hii ni tsutsu ko lɛ amɛji asraafoi nɛɛ sɔle amɛha Nyɔŋmɔ akɛ: “Jiemɔ mi kɛjɛ la he fɔyeli mli, bo Nyɔŋmɔ ni ji miyiwalaheremɔ Nyɔŋmɔ, ni mililɛi aaala ajie ojalɛ yi!”—Lala 51:16.
“Okwɛ Mimanehulu Lɛ”
“Mimli aaafili mi ni manya yɛ omɔbɔnalɛ lɛ mli, ejaakɛ okwɛ mimanehulu lɛ, ni ole misusuma hehiamɔ lɛ.” (Lala 31:8) Nɛkɛ ji bɔ ni lalatsɛ lɛ sɔle, ni mɛi pii amli filiɔ amɛ ŋmɛnɛ, ejaakɛ Nyɔŋmɔ Wiemɔ lɛ yeɔ ebuaa amɛ ni amɛnyɛɔ amɛkpeeɔ amɛ amanehului lɛ anaa. Yehowa Odasefoi ni yɔɔ France lɛ ateŋ mɔ kome kɛ yoo ko ni yeɔ jwɛŋmɔŋ nɔnyɛɛ hela kaseɔ nii. Nɛkɛ yoo nɛɛ etee helatsamɔ he ni kwɛɔ mɛi ni yeɔ jwɛŋmɔŋ hela lɛ aŋɔɔ be babaoo, shi enɛ yeee buaaa lɛ. Beni yoo nɛɛ bɔi enikasemɔ lɛ sɛɛ otsi pɛ lɛ, jwɛŋmɔ he datrɛfonyo lɛ bi lɛ akɛ: “Ani onuɔ nɔ ni nɛkɛ yoo nɛɛ jɛɔ Biblia lɛ mli etsɔɔ bo lɛ shishi jogbaŋŋ lɛlɛŋ?” No hewɔ lɛ, otsi ni nyiɛ sɛɛ lɛ, Odasefonyo lɛ tee datrɛfonyo lɛ nitsumɔ he lɛ ni ekɛ yoo lɛ yakase Biblia lɛ yɛ lɛ diɛŋtsɛ ehiɛ.
Beni amɛgbe nikasemɔ lɛ naa lɛ, jwɛŋmɔ he datrɛfonyo lɛ kɛɛ Odasefonyo lɛ akɛ: “Mikɛ afii babaoo esusu helatsɛmɛi ni mikwɛɔ amɛ lɛ ajamɔi ahe waa diɛŋtsɛ, shi mina akɛ yelikɛbuamɔ diɛŋtsɛ ko jɛɛɛ jamɔi lɛ eko eko mli baaa. Shi kɛlɛ, nibii yɛ sɔrɔto yɛ nyɛnɔ lɛ gbɛfaŋ. Mrs. P——baa biɛ shii enyɔ yɛ otsi mli ni ebanaa mi, ni ewoɔ mi nyɔmɔ yɛ he. Ni kɛlɛ, kɛtsɔ o-Biblia mli nitsɔɔmɔ kɛ ŋaawoo kpakpa lɛ nɔ lɛ, ootsu nitsumɔ kpakpa waa ko ni oheee he nyɔmɔwoo hu. Eeya ehiɛ waa diɛŋtsɛ. Yaa nɔ nakai nɔŋŋ, ni miima nɔ mi miiha bo akɛ maye mabua bo be fɛɛ be ni yelikɛbuamɔ he baahia bo.”
Biblia lɛ kɛɔ akɛ: “Ajɔɔ maŋ ni le tɛtrɛmaŋtɛrɛ gbɛɛmɔ lɛ! Yehowa, ohiɛ kpɛmɔ lɛ mli amɛnyiɛɔ; ogbɛi lɛŋ amɛmli filiɔ amɛ yɛ daa jenamɔ.” (Lala 89:16, 17) Yehowa Odasefoi lɛ ateŋ mɔ fɛɛ mɔ le akɛ nɛkɛ lala nɛɛ ji anɔkwale. Jeŋ muu fɛɛ bolɔmɔ ko ni miitsɔɔ miishɛɛ jɛɔ amɛdaaŋ kɛhaa Yehowa yijiemɔ. Ni mɛi pii miijɛ jeŋmaji lɛ amli kɛmiiba lolo koni amɛbafata amɛhe kɛjie Nyɔŋmɔ yi. Mɛni hewɔ okɛ ohe ebɔɔɔ amɛhe ni bo hu ona nakai miishɛɛ lɛ eko oha bo diɛŋtsɛ ohe?
[Mfoniri ni yɔɔ baafa 7]
Yehowa Odasefoi ni yɔɔ Europa Bokagbɛ lɛ amli filiɔ amɛ agbɛnɛ yɛ heyeli hee ni amɛna ni amɛnine shɛɔ “Buu-Mɔɔ” lɛ nɔ yɛ amɛ diɛŋtsɛ amɛmaŋ wiemɔi amli ni amɛkase lɛ hewɔ