Nyɛwoa Bi Lɛ, Yehowa Najiaŋdamɔlɔ Nukpa Lɛ Hiɛ Nyam
“Mɔ ni wooo Bi lɛ hiɛ nyam lɛ wooo Tsɛ lɛ ni tsu lɛ lɛ hu hiɛ nyam.”—YOHANE 5:23, New World Translation.
1. Mɛɛ gbɛ nɔ Kristendom hemɔkɛyeli yɛ Triniti lɛ mli lɛ wooo Yesu hiɛ nyam yɛ?
ŊMƐNƐ mɛi pii yɛ Kristendom ni amɛkɛɔ akɛ amɛwoɔ Yesu Kristo hiɛ nyam, shi kɛlɛ nɔ ni amɛfeɔ lɛ kɛ enɛ kpaaa gbee kwraa. Yɛ mɛɛ gbɛ nɔ? Ojogbaŋŋ, mɛi pii kɛɔ akɛ Yesu ji Nyɔŋmɔ Ofe lɛ, ni akɛ Nyɔŋmɔ, ni ji nibii fɛɛ a-Bɔlɔ lɛ ba shikpɔŋ nɔ ni ebahi shi ni egbo akɛ adesa. Nɛkɛ shishinumɔ nɛɛ yɛ Triniti tsɔɔmɔ, ni ji Kristendom shishijee tsɔɔmɔ lɛ mli. Shi kɛ Triniti lɛ ji amale, ni yɛ anɔkwale mli lɛ, Yesu baa shi fe Nyɔŋmɔ ni eyɛ eshishi hu lɛ, ani wekukpaa ni ka ekɛ Nyɔŋmɔ teŋ ni atsɔɔ yɛ gbɛ ni ejaaa nɔ nɛɛ haŋ Yesu werɛ aho ehe? Lɛlɛŋ, ebaabu nɛkɛ amale ni atsɔɔ nɛɛ akɛ nɔ ni wooo lɛ diɛŋtsɛ kɛ nibii fɛɛ ni etsɔɔ lɛ hiɛ nyam.
2. Mɛɛ gbɛ nɔ Ŋmalɛi lɛ tsɔɔ yɛ faŋŋ mli akɛ Yesu baa shi fe Nyɔŋmɔ ni eyɛ eshishi hu yɛ?
2 Anɔkwale lɛ ji akɛ, Yesu ekɛɛɛ yɛ be ko mli akɛ lɛ ji Nyɔŋmɔ, shi ewie ehe shii abɔ akɛ eji “Nyɔŋmɔ Bi.” Ehenyɛlɔi lɛ po kpɛlɛ enɛ nɔ. (Yohane 10:36; 19:7) Yesu hiɛ yɛ ehe nɔ be fɛɛ be akɛ eeewo Tsɛ lɛ nɔ ni eba ehe shi eha Lɛ, taakɛ lɛ diɛŋtsɛ ekɛɛ lɛ: “Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ; ejaakɛ nibii fɛɛ ni No feɔ lɛ, nomɛi nɔŋŋ ni Bi lɛ hu feɔ. Mi diɛŋtsɛ minyɛŋ miyiŋ mato mafee nɔ ko . . . ejaakɛ mitaooo nɔ ni mi diɛŋtsɛ misumɔɔ, shi moŋ nɔ ni Tsɛ lɛ ni tsu mi lɛ sumɔɔ.” Agbɛnɛ hu, ekɛɛ akɛ: “Eŋɔɔ mijɛ, ni lɛ etsu mi.” Ekɛɛ hu akɛ: “Nyɔŋmɔ ŋɔɔ mijɛ miba.” (Yohane 5:19, 30; 7:28, 29; 8:42) Yesu ewieee he yɛ be ko mli po akɛ lɛ ji Nyɔŋmɔ aloo ekɛ lɛ yeɔ egbɔ. No hewɔ lɛ ni aaatsɔɔ nɔ ko ni tamɔ nɛkɛ lɛ wooo Yesu hiɛ nyam.
Gbɛi Krokomɛi Anɔ ni Mɛi Komɛi Wooo Yesu Hiɛ Nyam Yɛ
3. (a) Mɛni Kristendom mlibii lɛ ateŋ mɛikomɛi kpooɔ yɛ Yesu he ni amɛkɛwooo ehiɛ nyam lɛ? (b) Mɛɛ odaseyeli Yesu kɛha yɛ shihilɛ mli ni ehi dani ebatsɔ adesa lɛ he?
3 Nɔ ni yɔɔ naakpɛɛ ji akɛ, mɛi komɛi yɛ Kristendom ŋmɛnɛ ni gbeɔ Yesu he guɔ kɛtsɔ kpɛlɛmɔ ni amɛkpɛlɛɛɛ akɛ ehi shi dani ebatsɔ adesa lɛ nɔ. Shi kɛlɛ, ja wɔkpɛlɛ nɔ akɛ Yesu jɛ ŋwɛi eba shikpɔŋ nɔ diɛŋtsɛ dani wɔɔnyɛ wɔje shishi wɔwo ehiɛ nyam yɛ gbɛ kpakpa nɔ. Yesu diɛŋtsɛ wie shii abɔ akɛ ehi shi dani ebatsɔ adesa. Ekɛɛ: “Ni mɔ ko ekwɔko kɛyako ŋwɛi, akɛ ja mɔ ni jɛ ŋwɛi kpleke shi lɛ, gbɔmɔ Bi lɛ ni yɔɔ ŋwɛi lɛ.” Sɛɛ mli lɛ ejaje akɛ: “Mi ji aboloo ni hiɛ ka ni jɛ ŋwɛi ba lɛ; . . . Shi kɛji nyɛna gbɔmɔ Bi lɛ miiya ŋwɛi he ni eyɔɔ sa lɛ, no hu?” Kɛ agbɛnɛ hu: “Nyɛ lɛ nyɛjɛ shishi nɛɛ, mi lɛ mijɛ ŋwɛi; . . . Lɛlɛŋ, lɛlɛŋ, miikɛɛ nyɛ akɛ: Miyɛ dani Abraham yɔɔ.” (Yohane 3:13; 6:51, 62; 8:23, 58) Yesu wie eshihilɛ dani ebatsɔ adesa lɛ hu he yɛ sɔlemɔ ni esɔle eha eŋwɛi Tsɛ lɛ gbi gbɛkɛ ni atsɔɔ esɛɛ gbɛ lɛ mli.—Yohane 17:5.
4. (a) Mɛɛ gbɛ kroko nɔ mɛikomɛi wooo Yesu hiɛ nyam yɛ? (b) Mɛɛ odaseyeli esa akɛ efa bɔ ni eeeha ana akɛ eji anɔkwale akɛ Yesu ehi shihilɛ mli lɛlɛŋ, ni mɛni hewɔ?
4 Mɛi komɛi po yɛ Kristendom ni amɛshɛɔ shɔŋŋ akɛ amɛkpɛlɛɛɛ nɔ akɛ Yesu ji mɔ ko ni hi shi yɛ yinɔsane mli, akɛ ehi shi akɛ gbɔmɔ adesa. Kɛji ehiko shi lɛlɛŋ lɛ, no lɛ shishinumɔ ko bɛ he akɛ wɔɔsusu nɔ hewɔ ni esa akɛ wɔwo ehiɛ nyam kɛ gbɛ nɔ ni wɔɔtsɔ wɔfee nakai lɛ he. Ni kɛlɛ esa akɛ nibii babaoo ni mɛi kɛ amɛhiŋmɛii na ni abaa yi yɛ Ŋmalɛi lɛ amli nɛɛ afee odaseyeli ni fa ni maa bɔ ni ŋwanejee ko bɛ he akɛ Yesu hi shihilɛ mli lɛlɛŋ lɛ nɔ mi. (Yohane 21:25) Enɛ ji anɔkwale, titri lɛ akɛni mra be mli Kristofoi tsɔɔ nibii ni kɔɔ Yesu he lɛ yɛ bei babaoo mli ni enɛ kɛ amɛwala diɛŋtsɛ kɛ heyeli ni amɛyɔɔ lɛ wo oshara mli lɛ hewɔ. (Bɔfoi lɛ Asaji 12:1-4; Kpojiemɔ 1:9) Shi kɛlɛ, yɛ nɔ ni esɛɛnyiɛlɔi lɛ ŋma yɛ ehe lɛ sɛɛ lɛ, ani abaanyɛ atsɔɔ faŋŋ akɛ Yesu hi shihilɛ mli lɛlɛŋ?
5, 6. Yɛ Ŋmalɛi lɛ asɛɛ lɛ, mɛni yinɔsane mli odaseyeli tsɔɔ yɛ shihilɛ mli diɛŋtsɛ ni Yesu Kristo hi lɛ he?
5 The New Encyclopaedia Britannica (1987) lɛ jajeɔ akɛ: “Saji ni aŋmala ni hiɛ amɛhe lɛ yeɔ he odase akɛ yɛ blema bei amli lɛ, mɛi ni teɔ shi woɔ Kristo jamɔ lɛ po ejeee yinɔsane mli gbɔmɔ ni Yesu ji lɛ he ŋwane.” Mɛni ji nɛkɛ saji ni hiɛ amɛhe nɛɛ ekomɛi? Taakɛ Yudanyo woloŋlelɔ Joseph Klausner tsɔɔ lɛ, mra be mli Talmud niŋmai lɛ odaseyeli lɛ nɛkɛ yɛ. (Jesus of Nazareth, baafa 20) Agbɛnɛ hu Yudafonyo yinɔsaneŋmalɔ Josephus ni hi shi yɛ klɛŋklɛŋ afii oha lɛ mli lɛ odaseyeli hu lɛ yɛ. Akɛ nɔkwɛmɔ nɔ lɛ, etsɔɔ bɔ ni atswia Yakobo tɛ lɛ mli, ni etsɛ lɛ akɛ “Yesu mɔ ni atsɛɔ lɛ Kristo lɛ nyɛminuu lɛ.”—Jewish Antiquities, XX, [ix, 1].
6 Kɛfata he lɛ, mra be mli Romabii yinɔsaneŋmalɔi lɛ hu adesayeli lɛ yɛ, titri lɛ Tacitus ni abuɔ lɛ waa lɛ nɔ lɛ nɛkɛ. Eŋma nii yɛ afii ohai enyɔ lɛ shishijee mli yɛ “kuu ni anyɛɔ amɛ yɛ amɛnihii nii lɛ ahewɔ, ni maŋbii lɛ tsɛɔ amɛ Kristofoi lɛ. Christus [Kristo], ni gbɛi [Kristofonyo] lɛ na eshishijee kɛjɛ emli lɛ na nɔ waa yɛ Tiberio nɔyeli be lɛ mli yɛ wɔ amralofoi lɛ ateŋ mɔ kome dɛŋ.” (The Annals, XV, XLIV) Yɛ be mli ni ebuɔ odaseyeli ni tsɔɔ akɛ Yesu ji yinɔsane mli gbɔmɔ lɛ akɛ nɔ ni fa babaoo lɛ, Frenchnyo nilelɔ kɛ jeŋba he ŋaawolɔ ni hi shi yɛ afii ohai 18 lɛ mli, Jean-Jacques Rousseau ye he odase akɛ: “Ayeee Socrates yinɔsane, ni etamɔ nɔ ni mɔ ko mɔ ko ejeee he ŋwane lɛ, he odase babaoo tamɔ bɔ ni ayeɔ Yesu Kristo nɔ he odase lɛ.”
Yiŋtoi Ahewɔ ni Awoɔ Bi lɛ Hiɛ Nyam Lɛ
7. (a) Mɛɛ Ŋmalɛ mli odaseyeli ko nyɛɔ wɔnɔ ni wɔwo Yesu Kristo hiɛ nyam lɛ? (b) Mɛɛ gbɛ nɔ Yehowa ewo e-Bi lɛ hiɛ nyam lolo yɛ?
7 Agbɛnɛ wɔba sane ni kɔɔ Yesu Kristo hiɛ nyam ni wɔɔwo lɛ he lɛ nɔ. Anyɛɔ anaa gbɛnaa nii ni ka esɛɛnyiɛlɔi lɛ anɔ akɛ amɛwo ehiɛ nyam lɛ yɛ ewiemɔi ni yɔɔ Yohane 5:22, 23 (NW) lɛ: “Ejaakɛ Tsɛ lɛ tete ekojooo mɔ ko, shi moŋ etuu kojomɔ lɛ ewo Bi lɛ dɛŋ; koni mɛi fɛɛ awo Bi lɛ hiɛ nyam tamɔ bɔ ni amɛwoɔ Tsɛ lɛ hiɛ nyam lɛ. Mɔ ni wooo Bi lɛ hiɛ nyam lɛ, ewooo Tsɛ lɛ ni tsu lɛ lɛ hu hiɛ nyam.” Kɛjɛ Kristo gbohiiashitee lɛ sɛɛ kɛbaa nɛɛ, Yehowa ewo e-Bi lɛ hiɛ nyam kɛshɛ he ni nɔ kwɔ po nɔ, ‘ni ekɛ anunyam kɛ woo efi lɛ akekre yɛ gbele mli amanehulu ni ena lɛ hewɔ.’ (Hebribii 2:9; 1 Petro 3:22) Ni akɛ nɔ ni he hiaa fe fɛɛ lɛ, wɔyɛ yiŋtoi ni wɔɔdamɔ nɔ wɔwo Yesu hiɛ nyam yɛ mɔ ni eji kɛ nɔ ni efee lɛ fɛɛ hewɔ.
8. Mɛɛ anɔkwalei krɛdɛɛi komɛi ni kɔɔ Yesu he lɛ hewɔ ni esa akɛ wɔwo ehiɛ nyam lɛ?
8 Yesu Kristo sa woo ejaakɛ lɛ, akɛ Logos loo Wiemɔ lɛ ji mɔ ni Yehowa wieɔ kɛtsɔɔ enɔ ni mɔ ko kɛ lɛ yeee egbɔ. Anaa faŋŋ kɛjɛɔ Ŋmalɛi lɛ amli akɛ sabala ni ji “Wiemɔ lɛ” kɔɔ Yesu he dani eba shikpɔŋ nɔ kɛ agbɛnɛ yɛ be mli ni ekwɔ kɛtee ŋwɛi lɛ sɛɛ hu. (Yohane 1:1; Kpojiemɔ 19:13) Ewieɔ lɛ diɛŋtsɛ ehe yɛ Kpojiemɔ 3:14 lɛ akɛ “Nyɔŋmɔ nibɔɔ lɛ shishijee lɛ.” Jeee akɛ eji “bɔɔnii fɛɛ ateŋ kromɔ bi” kɛkɛ, shi moŋ akɛ “bi koome lɛ,” lɛ pɛ ji mɔ ni Yehowa Nyɔŋmɔ diɛŋtsɛ bɔ lɛ tɛɛ. (Kolosebii 1:15; Yohane 3:16) Kɛfata he lɛ, “lɛ enɔ atsɔ afee nibii fɛɛ, ni ashiii lɛ afeee nɔ ko nɔ ko ni afee.” (Yohane 1:3) No hewɔ lɛ, kɛ wɔkane yɛ 1 Mose 1:26 akɛ Nyɔŋmɔ kɛɛ akɛ, “Nyɛhaa wɔfea gbɔmɔ yɛ wɔsubaŋ nɔ, tamɔ wɔhenɔ” lɛ, Logos loo Wiemɔ lɛ fata nakai wiemɔ “wɔ” lɛ he. Eka shi faŋŋ akɛ, yɛ anɔkwale ni eji akɛ beni Yesu yɔɔ shihilɛ mli dani ebatsɔ adesa lɛ, no mli lɛ ena hegbɛ ni yɔɔ nyam akɛ ekɛ Yehowa Nyɔŋmɔ aaafee ekome yɛ nibɔɔ mli lɛ haa efeɔ mɔ ko ni sa hiɛnyamwoo kpele.
9. Mɛni hewɔ ni wɔmuɔ sane naa akɛ Yesu ji bɔfo nukpa Mikael lɛ, ni mɛɛ gbɛ nɔ Mikael wo Yehowa hiɛ nyam yɛ Mose gbonyo lɛ he yɛ?
9 Yesu Kristo sa mɔ ni awoɔ ehiɛ nyam babaoo ejaakɛ lɛ ji Yehowa bɔfo nukpa. Mɛni nɔ wɔdamɔɔ ni wɔmuɔ sane naa nakai lɛ? Ojogbaŋŋ, wiemɔ “onukpa” ni shishi ji “mɔ otu” lɛ tsɔɔ akɛ bɔfo nukpa kome pɛ yɔɔ. Nyɔŋmɔ Wiemɔ lɛ wieɔ ehe ni ekɛkɔɔ Nuŋtsɔ Yesu Kristo ni atee lɛ shi kɛjɛ gbohii ateŋ lɛ he. Wɔkaneɔ akɛ: “Ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfo nukpa gbee kɛ Nyɔŋmɔ tɛtrɛmaŋtɛrɛ aaajɛ ŋwɛi akpleke shi, ni gbohii ni yɔɔ Kristo mli lɛ tsutsu aaate shi.” (1 Tesalonikabii 4:16) Nɛkɛ ŋwɛibɔfo nukpa nɛɛ yɛ gbɛi, taakɛ wɔkaneɔ yɛ Yuda 9 lɛ: “Shi bɔfo nukpa Mikael lɛ, beni ekɛ abonsam kojoɔ ni ekɛ lɛ taa naa yɛ Mose gbonyo lɛ hewɔ lɛ, ekaaa loomɔ kojomɔ ko kɛ enɔ fɔɔ, shi moŋ ekɛɛ: ‘Kã Nuŋtsɔ lɛ [Yehowa] aaakã ohiɛ.’” Akɛni eshiii Yehowa sɛɛ ni eeeka akɛ ekɛ kojomɔ aaaba Abonsam nɔ hewɔ lɛ, Yesu tsɔ nɛkɛ gbɛ nɔ ewo eŋwɛi Tsɛ lɛ hiɛ nyam.
10. (a) Mɛɛ gbɛ nɔ Mikael nyiɛɔ hiɛ ni awuɔ ta yɛ Nyɔŋmɔ Maŋtsɛyeli lɛ gbɛfaŋ yɛ? (b) Mɛɛ nitsumɔ Mikael tsu he nii yɛ Israel maŋ lɛ gbɛfaŋ?
10 Bɔfo nukpa Mikael wuɔ ta yɛ Nyɔŋmɔ Maŋtsɛyeli lɛ gbɛfaŋ, ni enyiɛɔ hiɛ ni akɛtsuɔ ŋwɛi he kɛjɛɔ Satan kɛ edaimonioi lɛ fɛɛ ahe. (Kpojiemɔ 12:7-10) Ni gbalɔ Daniel kɛɔ akɛ ‘edamɔɔ shi ehaa Nyɔŋmɔ webii lɛ.’ (Daniel 12:1) No hewɔ lɛ, etamɔ nɔ ni Mikael ji “Nyɔŋmɔ bɔfo lɛ ni nyiɛ Israel ta lɛ hiɛ lɛ,” ni akɛ lɛ ji mɔ ni Nyɔŋmɔ kɛtsu nii ni ekɛ ewebii lɛ aba Shiwoo Shikpɔŋ lɛ nɔ lɛ. Nyɔŋmɔ fa akɛ: “Kwɛmɔ ohe ni ahi yɛ ehiɛ, ni obo egbee toi; kaawo emli la; . . . ejaakɛ migbɛi yɛ emli.” (2 Mose 14:19; 23:20, 21) Ŋwanejee ko bɛ he akɛ Yehowa bɔfo nukpa lɛ naa Nyɔŋmɔ webii krɛdɛɛ ni egbɛi ka amɛnɔ lɛ ahe miishɛɛ babaoo. Nɔ ni sa jogbaŋŋ ji akɛ ebaye ebua bɔfo kroko ni atsu lɛ ni ebashɛje gbalɔ Daniel mii, ni daimonio ko ni he wa eyawo antɛo ni eetsi lɛ gbɛ lɛ. (Daniel 10:13) No hewɔ lɛ nilee yɛ mli akɛ aaamu sane naa akɛ ŋwɛibɔfo ni kpata Sanherib tatsɛmɛi 185,000 lɛ ahiɛ lɛ jeee mɔ ko mɔ ko fe Mikael, bɔfo nukpa lɛ.—Yesaia 37:36.
11. Mɛɛ shihilɛ gbɛ ni Yesu kɔ yɛ shikpɔŋ nɔ hewɔ ni esa akɛ wɔwo ehiɛ nyam lɛ?
11 Jeee akɛ Yesu Kristo sa mɔ ni awoɔ ehiɛ nyam yɛ mɔ ni eji lɛ hewɔ kɛkɛ, shi moŋ esa akɛ wɔwo ehiɛ nyam yɛ nɔ ni efee lɛ hu hewɔ. Akɛ nɔkwɛmɔ nɔ lɛ, lɛ pɛ ji gbɔmɔ adesa ni hi shihilɛ ni eye emuu mli. Abɔ Adam kɛ Hawa akɛ mɛi ni eye emuu, shi amɛ emuuyeli lɛ sɛɛ etsɛɛɛ. Shi kɛlɛ, Yesu hi shi akɛ ‘anɔkwafo, mɔ ni he bɛ kpa ko, ni etse ehe kɛjɛ eshafeelɔi ahe,’ yɛ nibii fɛɛ ni Abonsam nyɛ ekɛba enɔ kɛtsɔ kaai kɛ yiwaai anɔ lɛ fɛɛ sɛɛ. Yɛ fɛɛ mli lɛ, “efeee esha, ni asaŋ anaaa apasa ko yɛ edaaŋ.” No hewɔ lɛ enyɛ etswa mɛi ni teɔ shi woɔ lɛ lɛ mpoa akɛ: “Nyɛteŋ namɔ kaa mi yɛ esha ko hewɔ?” Amɛteŋ mɔ kome po nyɛɛɛ! (Hebribii 7:26; 1 Petro 2:22; Yohane 8:46) Ni akɛni ehiɛ emuuyeli mli ni esha bɛ ehe hewɔ lɛ, Yesu bu eŋwɛi Tsɛ lɛ bem akɛ jeŋ muu fɛɛ maŋtsɛ yɛ gbɛ ni ja nɔ ni eha Abonsam tsɔ amalelɔ ni aba lɛ shi hu.—Abɛi 27:11.
12. (a) Mɛɛ gbɔmɔ nɛkɛ Yesu ji, ni mɛni efee ni mɛɛ amanehulu ena yɛ mɛi krokomɛi ahewɔ? (b) Mɛni hewɔ ni obaakɛɛ akɛ esa akɛ wɔwo Yesu hiɛ nyam yɛ nɔ ni efee kɛ amanehulu ni ena lɛ hewɔ lɛ?
12 Esa akɛ wɔwo Yesu Kristo hiɛ nyam, jeee akɛni ehi shi akɛ mɔ ko ni eye emuu, ni esha bɛ ehe lɛ kɛkɛ, shi moŋ akɛni eji gbɔmɔ kpakpa, mɔ ni jeee hiɛjoolɔ, ni ekɛ ehe shaa afɔle lɛ hewɔ. (Okɛto Romabii 5:7 he.) Esɔmɔ yɛ gbɔmɛi amumɔŋ kɛ heloo naa hiamɔ nii ahe ni etɔɔɔ lɛ. Mɛɛ ekaa ejie lɛ kpo yɛ e-Tsɛ we lɛ he nɛkɛ, ni mɛɛ tsuishitoo ejie kpo etsɔɔ nɛkɛ yɛ be mli ni ekɛ ekaselɔi lɛ yɔɔ lɛ! Mɛɛ piŋmɔ mli ekpɛlɛ nɔ akɛ eeebote nɛkɛ yɛ e-Tsɛ suɔmɔnaa nifeemɔ hewɔ! Biblia lɛ wieɔ ehejaramɔ yɛ Getsemane abɔɔ lɛ mli lɛ he akɛ: “Ni beni ehe jaraa lɛ lɛ, eha esɔlemɔ lɛ mli wa. Ni ehe latsaa tsɔ tamɔ Ia kulibii ni tserɛɔ shwieɔ shi.” Hɛɛ, “eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle.” (Luka 22:44; Hebribii 5:7) Kwɛ bɔ ni gbalɔ Yesaia gba ehejaramɔ lɛ efɔ shi jogbaŋŋ ha yɛ Yesaia 53:3-7!
13. Mɛɛ nɔkwɛmɔ nɔ fɛfɛo Yesu fee efɔ shi eha wɔ yɛ eŋwɛi Tsɛ lɛ hiɛ nyam ni ewo lɛ mli?
13 Esa akɛ wɔwo Yesu hiɛ nyam hu yɛ nɔkwɛmɔ nɔ kpakpa ni efee efɔ shi eha wɔ yɛ eŋwɛi Tsɛ lɛ hiɛnyamwoo mli lɛ hewɔ. Enyɛ ekɛɛ yɛ gbɛ ni ja nɔ akɛ: “Miiwo mi-Tsɛ.” (Yohane 8:49) Ekɛ ewiemɔi kɛ enifeemɔi fɛɛ wo Yehowa Nyɔŋmɔ hiɛ nyam yɛ bei fɛɛ mli. No hewɔ lɛ, beni etsa nuu ko lɛ, sane ni yɔɔ Biblia lɛ mli kɛɔ akɛ, jeee akɛ gbɔmɛi lɛ wo Yesu hiɛ nyam kɛkɛ, shi moŋ “amɛwo Nyɔŋmɔ hiɛ nyam” hu. (Marko 2:12) No hewɔ lɛ, Yesu baanyɛ ekɛɛ eŋwɛi Tsɛ lɛ yɛ sɔlemɔ mli, yɛ eshikpɔŋ nɔ sɔɔmɔ nitsumɔ lɛ naagbee akɛ: “Mi lɛ miwo ohiɛ nyam yɛ shikpɔŋ lɛ nɔ, akɛni nitsumɔ ni oŋɔha mi tsumɔ lɛ, migbe naa lɛ.”—Yohane 17:4.
Nɔ ni Efee Eha Wɔ
14. Mɛni Yesu gbele lɛ nyɛ etsu eha wɔ ni haa efeɔ mɔ ni esa akɛ wɔwo ehiɛ nyam lɛ?
14 Ni kwɛ bɔ ni esa akɛ wɔwo Yesu Kristo hiɛ nyam babaoo wɔha yɛ nibii fɛɛ ni efee eha wɔ lɛ hewɔ! Egbo yɛ wɔhe eshai lɛ ahewɔ koni anyɛ asaa wɔkɛ Yehowa Nyɔŋmɔ teŋ ekoŋŋ. Yesu wie yɛ lɛ diɛŋtsɛ ehe akɛ: “Gbɔmɔ Bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ lɛ.” (Mateo 20:28) No hewɔ lɛ, egbele lɛ haa nɔ fɛɛ nɔ ni Maŋtsɛyeli lɛ baanyɛ afee aha wɔ adesai lɛ baa mli: wala ni gbele bɛ mli yɛ ŋwɛi kɛha 144,000 ni feɔ eyemforo kuu lɛ kɛ naanɔ wala yɛ paradeiso shikpɔŋ nɔ kɛha mɛi akpekpei abɔ krokomɛi ni hiɛ amɛhemɔkɛyeli kɛ toiboo mli yɛ kaai ashishi lɛ hu.—Lala 37:29; Kpojiemɔ 14:1-3; 21:3, 4.
15. Mɛni ji nɔkwɛmɔ nɔ kome ni tsɔɔ bɔ ni Yesu jie e-Tsɛ lɛ su kpo etsɔɔ wɔ?
15 Esa akɛ wɔwo Yesu Kristo hiɛ nyam hu, ejaakɛ, akɛ Tsɔɔlɔ Kpeteŋkpele lɛ, ejie e-Tsɛ lɛ suɔmɔnaa nii kɛ esui akpo etsɔɔ wɔ kwraa kɛmɔ shi. Akɛ nɔkwɛmɔ nɔ lɛ, ewie bɔ ni e-Tsɛ lɛ mli hi ha, ni ehaa hulu tsoɔ ehaa mɛi kpakpai kɛ mɛi fɔji fɛɛ, ni nugbɔ hu nɛɔ haa amɛ lɛ he, yɛ e-Gɔŋ nɔ Shiɛmɔ lɛ mli, ni etsɔɔ mli akɛ: “No hewɔ lɛ nyɛhia kɛwulaa shi, tamɔ bɔ ni nyɛ-Tsɛ ni yɔɔ ŋwɛi lɛ hi kɛwula shi lɛ.”—Mateo 5:44-48.
16. Te bɔfo Paulo wie gbɛ ni Yesu kɔ ni sa woo lɛ he jogbaŋŋ eha tɛŋŋ?
16 Bɔfo Paulo wie gbɛ ni Yesu kɔ ni sa hiɛnyamwoo lɛ he jogbaŋŋ beni eŋma nɛkɛ lɛ: “Mɔ ni Nyɔŋmɔ su lɛŋ eyɔɔ moŋ, shi esusuuu shɔ ni eeeshɔ enɛ he, ni ji akɛ, esa akɛ ekɛ Nyɔŋmɔ aye egbɔ. Dabi, shi moŋ ejie yɛ ehe efɔ shi, ni eŋɔ tsulɔ su efɔ enɔ, ni ebahi gbɔmɛi adesai asu lɛ mli. Ni nɔ ni fe fɛɛ lɛ, beni ena ehe yɛ gbɔmɛi asu lɛ mli lɛ, eba ehe shi ni ebo toi kɛtee gbele mli tɔɔ, hɛɛ, kɛtee sɛŋmɔtso nɔ gbele mli tete.”—Filipibii 2:5-8, NW.
Gbɛ nɔ ni Wɔɔtsɔ Wɔwo Bi lɛ Hiɛ Nyam
17, 18. Mɛɛ gbɛi sɔrɔtoi anɔ wɔɔnyɛ wɔtsɔ wɔwo Yesu Kristo hiɛ nyam yɛ?
17 Akɛni ŋwanejee ko bɛ he akɛ esa akɛ wɔwo Yesu Kristo hiɛ nyam hewɔ lɛ, ekɛ wɔ baa sanebimɔ nɛɛ he akɛ: Mɛɛ gbɛ nɔ wɔɔtsɔ wɔwo Bi lɛ hiɛ nyam yɛ? Wɔfeɔ nakai kɛtsɔɔ hemɔkɛyeli ni wɔjieɔ lɛ kpo yɛ ekpɔmɔ afɔleshaa lɛ mli lɛ nɔ, ni wɔmaa nakai hemɔkɛyeli lɛ nɔ mi kɛtsɔɔ nibii ni he hiaa ni wɔɔfee yɛ heshwamɔ, tsuitsakemɔ, henɔjɔɔmɔ kɛ baptisimɔ mli lɛ nɔ. Kɛ wɔbɛŋkɛ Yehowa yɛ sɔlemɔ mli yɛ Yesu gbɛi amli lɛ, wɔwoɔ Yesu hiɛ nyam. Wɔwoɔ ehiɛ nyam hu kɛ wɔbo ewiemɔi nɛɛ atoi lɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ.” (Mateo 16:24) Wɔwoɔ Yesu Kristo hiɛ nyam hu kɛ wɔbo gbɛtsɔɔmɔi ni ekɛha akɛ wɔya nɔ wɔtao Nyɔŋmɔ Maŋtsɛyeli lɛ kɛ ejalɛ lɛ tsutsu lɛ toi lɛ, ni wɔwoɔ ehiɛ nyam kɛ wɔbo famɔ ni ekɛha akɛ wɔkɛ wɔhe awo kaselɔ-feemɔ nitsumɔ lɛ mli lɛ toi lɛ. Agbɛnɛ, wɔwoɔ Yesu hiɛ nyam hu kɛ wɔjie nyɛmimɛi asuɔmɔ ni ekɛɛ akɛ no baakadi enɔkwa sɛɛnyiɛlɔi fɛɛ lɛ kpo lɛ.—Mateo 6:33; 28:19, 20; Yohane 13:34, 35.
18 Kɛfata he lɛ, wɔwoɔ Bi lɛ hiɛ nyam kɛtsɔ egbɛi ni wɔɔkɔ wɔfɔ wɔnɔ, ni wɔtsɛɔ wɔhe “Kristofoi” lɛ nɔ, kɛ agbɛnɛ kɛtsɔ shi ni wɔɔhi yɛ nakai gbɛi lɛ naa kɛtsɔ wɔjeŋba kpakpa nɔ lɛ nɔ. (Bɔfoi lɛ Asaji 11:26; 1 Petro 2:11, 12) Bɔfo Petro kɛɛ akɛ esa akɛ wɔnyiɛ Yesu nanemaa hei lɛ asɛɛ kpaakpa. (1 Petro 2:21) Kɛ wɔkase lɛ yɛ wɔjeŋba fɛɛ mli yɛ nɛkɛ gbɛ nɔ lɛ, wɔwoɔ ehiɛ nyam hu. Ni eka shi faŋŋ akɛ, kɛ wɔye Kristo gbele lɛ Kaimɔ lɛ daa afi lɛ, wɔkɛ woo krɛdɛɛ ko haa lɛ.—1 Korintobii 11:23-26.
19, 20. (a) Mɛɛ nyɔmɔwoi Yesu yɔɔ kɛha esɛɛnyiɛlɔi lɛ amrɔ nɛɛ kɛ wɔsɛɛ be mli hu, yɛ ehiɛ nyam ni amɛwoɔ lɛ hewɔ? (b) Mɛɛ hekɛnɔfɔɔ wɔbaanyɛ wɔna yɛ Bi lɛ gbɛfaŋ?
19 Mɛɛ nyɔmɔwoo Yesu yɔɔ kɛha ekaselɔi lɛ yɛ gbɛ ni amɛkɔɔ ni woɔ ehiɛ nyam nɛɛ hewɔ? Ekɛɛ akɛ: “Lɛlɛŋ, miikɛɛ nyɛ akɛ: Mɔ ko bɛ ni eshi eshia loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo abɔɔi yɛ mi kɛ sanekpakpa lɛ hewɔ, ni enaŋ shiai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ abɔɔi toi oha yɛ benɛbe nɛɛ mli beebe, kɛ yiwalɛ hu, ni jeŋ ni baaba lɛŋ hu eeena naanɔ wala.”—Marko 10:29, 30.
20 Belɛ eyɛ faŋŋ akɛ, kɛ wɔkɛ wɔhe sha afɔle yɛ Yesu hewɔ lɛ, ebaakwɛ koni wɔna nyɔmɔwoo. Yesu woɔ wɔ shi akɛ: “Hewɔ lɛ mɔ fɛɛ mɔ ni gbaa mli tsiɔ migbɛi ta yɛ gbɔmɛi ahiɛ lɛ, mi hu magba mli matsi eta yɛ mi-Tsɛ ni yɔɔ ŋwɛi lɛ hiɛ.” (Mateo 10:32) No hewɔ lɛ, taakɛ bɔ ni ŋwɛi Tsɛ lɛ woɔ mɛi ni woɔ ehiɛ nyam lɛ ahiɛ nyam lɛ, wɔyɛ hekɛnɔfɔɔ akɛ Yehowa Bi koome lɛ hu baakase e-Tsɛ lɛ yɛ enɛ gbɛfaŋ, taakɛ Bi lɛ feɔ yɛ saji krokomɛi amli lɛ.
◻ Mɛɛ gbɛ nɔ Kristendombii pii wooo Bi lɛ hiɛ nyam yɛ?
◻ Mɛɛ odaseyelii Yesu kɛha yɛ shihilɛ mii ni ehi dani ebatsɔ adesa lɛ he?
◻ Mɛni ji yiŋtoi ni wɔyɔɔ ni wɔdamɔɔ nɔ wɔwo Yesu hiɛ nyam lɛ ekomɛi?
◻ Mɛni ji gbɛi komɛi ni wɔɔtsɔ nɔ wɔwo Yesu hiɛ nyam?
Yesu hiɛ nyam ni wɔwoɔ lɛ kɛ mɛɛ sɛɛnamɔi baa?
[Nikasemɔ lɛ he Sanebimɔi]