Nyɛhia Shi Akɛ Mɛi ni He Wa yɛ Hemɔkɛyeli Mli!
Tito Wolo lɛ Mli Saji Otii
KRISTOFOI asafoi ni yɔɔ Mediteranea ŋshɔkpɔ ni ji Kreta nɔ lɛ ebafee mɛi ni mumɔŋ nɔkwɛmɔ he hiaa amɛ. Namɔ baanyɛ aye abua amɛ? Paulo naanyo nitsulɔ Tito! Eyɛ ekaa, ehe esa kɛha nitsɔɔmɔ, ebɔɔ nitsumɔi kpakpai ahe mɔdɛŋ, ni ehe wa yɛ hemɔkɛyeli mli.
Paulo yasara Kreta yɛ eklɛŋklɛŋ tsuŋwoo Iɛ kɛ nɔ ni ji enyɔ yɛ Roma lɛ teŋ. Eshi Tito yɛ ŋshɔkpɔ lɛ nɔ koni ejaje nibii komɛi ni ehala asafoŋ onukpai. Abaabi ni Tito aka apasa tsɔɔlɔi ahiɛ ni eto okadi kpakpa hu efɔ shi. Ajie enɛɛmɛi fɛɛ kpo yɛ Paulo wolo ni eŋma eyaha Tito, ekolɛ nɔ ni ekɛmaje kɛjɛ Makedonia yɛ afi 61 kɛ 64 Ŋ.B. lɛ teŋgbɛ lɛ mli. Bɔfo lɛ ŋaawoo lɛ kɛ nitsumɔ baanyɛ aye abua ŋmɛnɛŋmɛnɛ beaŋ nɔkwɛlɔi kɛ nanemɛi heyelilɔi ni amɛfee mɛi ni sheee gbeyei ni yɔɔ ekãa, ni he wa yɛ mumɔŋ.
Mɛni Ataoɔ yɛ Nɔkwɛlɔi Adɛŋ?
Ehe bahia ni ahala nɔkwɛlɔi ni atsu naagbai komɛi ni hiɛdɔɔ yɔɔ mli lɛ he nii. (Tit 1:1-16) Kɛ aaahala mɔ ko akɛ nɔkwɛlɔ lɛ, belɛ esa akɛ mɔ lɛ afee mɔ ni anaŋ ehe sane ko ata, mɔ ni toɔ okadi kpakpa yɛ lɛ diɛŋtsɛ kɛ eweku shihilɛ hu mli, gbɔfeelɔ, mɔ ni ŋmɛɔ pɛpɛɛpɛ, kɛ mɔ ni yeɔ ehe nɔ. Esa akɛ etsɔɔ nɔ ni ji anɔkwale ni ebɔ kɔkɔ ni ekã mɛi ni toɔ nibii ni ejaaa lɛ ahiɛ. Ekaafeemɔ he miihia ejaakɛ esa akɛ aku mɛi ni nyiɛɔ basabasa lɛ anaa ni amɛfee dioo. Ni nakai enɛ ji titri yɛ mɛi ni jɛ ketiafolɔi lɛ ateŋ lɛ ahe, ejaakɛ amɛbutu shiai muji fɛɛ. Kɛ asafoi lɛ aaanyɛ ahi mumɔŋ hewalɛ mli lɛ belɛ kamɔ ni mli wa he miihia. Ŋmɛnɛ, ekaafeemɔ he miihia nɔkwɛlɔi ni ji Kristofoi koni amɛkã mɛi ni amɛbɔ kɔkɔ, koni amɛkɛ nakai feemɔ atswa asafo lɛ amɛma shi.
Okɛ Tsɔɔmɔ ni Tsaa Mɔ Iɛ Atsu Nii
Tito kɛ mumɔŋ tsɔɔmɔ ni tsaa mɔ Iɛ baaha. (Tit 2:1-15) Mɛi ni amɛdara yɛ afii amli lɛ ato okadi kpakpa yɛ hiɛshikamɔ, hiɛdɔɔ, jwɛŋmɔ ni mli ka shi, hemɔkɛyeli, suɔmɔ, kɛ tsuishiŋmɛɛ mli. Esa akɛ yeimeji lɛ aba amɛjeŋ bɔ ni “sa mɛi krɔŋkrɔŋi.” Akɛ “mɛi ni tsɔɔ nii kpakpai” lɛ, amɛbaanyɛ amɛye amɛbua obalayei lɛ ni amɛna amɛnitsumɔi akɛ ŋamɛi kɛ nyɛmɛi lɛ ahe jwɛŋmɔ kpakpa. Obalahii Iɛ ajwɛŋmɔ mli aka shi, ni tsuji aba amɛhe shi amɛha amɛnuŋtsɔmɛi yɛ gbɛ ni aaawula Nyɔŋmɔ tsɔɔmɔ lɛ nɔ. Esa akɛ Kristofoi fɛɛ akpoo nibii ni tsɔɔ Nyɔŋmɔ gbeyeishemɔ ni abɛ ni amɛkɛ jwɛŋmɔŋ hetsemɔ ahi nibii agbɛjianɔtoo nɛɛ mli yɛ be mli ni amɛmɛɔ Nyɔŋmɔ kɛ Yesu Kristo anunyam kpojiemɔ lɛ, “mɔ ni ŋɔ lɛ diɛŋtsɛ ehe eha yɛ wɔnajiaŋ, koni ekpɔ wɔ kɛjɛ nɔtɔmɔ fɛɛ mli, ni etsuu wɔhe efee lɛ diɛŋtsɛ emaŋ krɔŋŋ ni hiɛ dɔɔ yɛ nitsumɔi kpakpai ahe lɛ.” Nyɛhaa wɔ hu ‘wɔwulaa Nyɔŋmɔ tsɔɔmɔ lɛ’ kɛtsɔ ŋaawoo ni tsaa mɔ nɛɛ kɛ nitsumɔ nɔ.
Paulo naagbee ŋaawoo lɛ kɛ mumɔŋ hewalɛnamɔ baa. (Tit 3:1-15) Esa akɛ aba he shi yɛ gbɛ ni sa nɔ aha nɔyelɔi ni ana saneshishinumɔ. Kristofoi yɛ naanɔ wala he hiɛnɔkamɔ lɛ, ni esa akɛ ama Paulo wiemɔi lɛ anɔ mi ni akɛwo amɛ hewalɛ ni amɛjwɛŋmɔ ahi nitsumɔi kpakpai anɔ. Esa akɛ akwa kwashiai aŋwanejee kɛ nɔmɔ yɛ Mla lɛ he, ni mɔ ni kɛ mligbalamɔ baa ni abɔ lɛ kɔkɔ shii enyɔ ni ekpaaa lɛ akwa lɛ. Yɛ be mli ni onukpai kɛ ŋaawoo ni tamɔ nɛkɛ tsuɔ nii lɛ, amɛ kɛ amɛnanemɛi heyelilɔi lɛ ahe baawa yɛ hemɔkɛyeli lɛ mli.
[Akrabatsa/Mfoniri ni yɔɔ baafa 22]
Amɛkatsɔmɔ Daatɔlɔi: Eyɛ mli akɛ esaaa akɛ yei tsɔɔ nii yɛ asafo lɛ mli moŋ, shi yei onukpai lɛ baanyɛ atsɔɔ obalayei lɛ anii yɛ teemɔŋ. Shi kɛ yei onukpai nɛɛ ahe aaasa yɛ enɛ mli lɛ, belɛ esa akɛ amɛbo Paulo wiemɔi lɛ atoi: “Yeimeji hu nakai nɔŋŋ, akɛ amɛba amɛjeŋ bɔ ni sa mɛi krɔŋkrɔŋi lɛ; amɛkawie mɛi ahe, amɛkatsɔmɔ daatɔlɔi, amɛfee mɛi ni tsɔɔ nii kpakpai.” (Tito 2:1-5; 1 Timoteo 2:11-14) Yɛ nɔ ni jɛɔ daatɔɔ mli baa lɛ hesusumɔ hewɔ lɛ, esa akɛ nɔkwɛlɔi, asafoŋ sɔɔlɔi kɛ yeimeji ahiɛ aka shi, ni amɛkɛ amɛhe akawo daanumɔ babaoo mli. (1 Timoteo 3:2, 3, 8, 11) Esa akɛ Kristofoi fɛɛ akpoo daatɔɔ ni ehe miihia ni amɛtsi amɛhe kɛjɛ daa ni wa numɔ he be mli ni amɛkɛ amɛhe ewo “nitsumɔ krɔŋkrɔŋ” ni ji sanekpakpa lɛ shiɛmɔ mli lɛ.—Romabii 15:16; Abɛi 23:20, 21.