Kwɛ Bɔ Ni Mɛi Ni He Jɔ Lɛ Yɔɔ Miishɛɛ Ha!
“Miiishɛɛ ji mɛi ni he jɔ lɛ, shi amɛaahi shikpɔŋ lɛ nɔ.”—MATEO 5:5, New World Translation.
1. Mɛni ji mlijɔlɛ ni Yesu wie he yɛ e-Gɔŋ nɔ Shiɛmɔ lɛ mli lɛ?
YESU Kristo kɛɛ yɛ e-Gɔŋ nɔ Shiɛmɔ lɛ mli akɛ: “Miishɛɛ ji mɛi ni he jɔ lɛ, shi amɛaahi shikpɔŋ lɛ nɔ.” (Mateo 5:5, NW) Nɛkɛ hejɔlɛ, loo humifeemɔ nɛɛ jeee osato kpoofeemɔ ko ni akɛha hiɛ, ni nakai nɔŋŋ hu ejeee fɔmɔ su ko ni anaa kɛkɛ. Shi moŋ eji mligbɛ hejɔlɛ kɛ toiŋjɔlɛ ni atsuɔ he nii, titri lɛ yɛ Yehowa Nyɔŋmɔ suɔmɔnaa nii kɛ egbɛtsɔɔmɔ nɔkpɛlɛmɔ naa. Yɛ anɔkwale mli lɛ, mɛi ni he jɔ lɛ nuɔ amɛhe ni amɛkɛfɔɔ Nyɔŋmɔ nɔ lɛ he waa ni enɛ jeɔ kpo yɛ jeŋba ni he jɔ ni ajieɔ lɛ kpo atsɔɔ nanemɛi ni ji adesai lɛ mli.—Romabii 12:17-19; Tito 3:1, 2.
2. Mɛni hewɔ Yesu kɛɛ mɛi ni he jɔ lɛ yɔɔ miishɛɛ lɛ?
2 Yesu kɛɛ mɛi ni he jɔ lɛ yɛ miishɛɛ ejaakɛ amɛbaahi shikpɔŋ lɛ nɔ. Akɛ Nyɔŋmɔ Bi ni yeɔ emuu ni he jɔ lɛ, Yesu ji shikpɔŋ lɛ Gboshiniyelɔ Titri. (Lala 2:8; Mateo 11:29; Hebribii 1:1, 2; 2:5-9) Shi akɛ Mesia ni ji “gbɔmɔ bi” lɛ, esa akɛ ena hefatalɔi nɔyelɔi yɛ eŋwɛi Maŋtsɛyeli lɛ mli. (Daniel 7:13, 14, 22, 27) Akɛ Kristo “nanemɛi niyelɔi” lɛ, mɛi ni afɔ amɛ mu ni he jɔ nɛɛ baana egboshiniyeli yɛ shikpɔŋ nɔ lɛ mli gbɛfaŋnɔ. (Romabii 8:17) Gbɔmɛi krokomɛi ni he jɔ tamɔ gwantɛŋi hu baana naanɔ wala mli ŋɔɔmɔ yɛ Paradeiso yɛ Maŋtsɛyeli lɛ nɔyeli he ni yɔɔ shikpɔŋ nɔ lɛ mli. (Mateo 25:33, 34, 46; Luka 24:43) Nakai gbɛkpamɔ lɛ haa amɛnaa miishɛɛ waa diɛŋtsɛ.
3. Mɛɛ nɔkwɛmɔ nɔ Nyɔŋmɔ kɛ Kristo fee yɛ mlijɔlɛ he?
3 Gboshiniyelɔ Titri ni he jɔ lɛ nine shɛɔ shikpɔŋ lɛ nɔ kɛjɛɔ e-Tsɛ, Yehowa, hejɔlɛ he nɔkwɛmɔ nɔ ni fe fɛɛ lɛ ŋɔɔ. Kwɛ shii abɔ ni Ŋmalɛi lɛ kɛɔ akɛ Nyɔŋmɔ “toɔ tsui, ni [e]mɔbɔnalɛ kɛ anɔkwale fa pii”! (2 Mose 34:6; Nehemia 9:17; Lala 86:15) Eyɛ hewalɛ kpeteŋkpele, shi ejieɔ humifeemɔ kpo aahu akɛ ejalɔi nyɛɔ amɛbɛŋkɛɔ lɛ ni amɛsheee gbeyei. (Hebribii 4:16; 10:19-22) Nyɔŋmɔ Bi lɛ ni ‘he jɔ ni baa ehe shi kɛjɛɔ etsui mli lɛ,’ tsɔɔ ekaselɔi lɛ ni amɛfee mɛi ni he jɔ. (Mateo 11:29; Luka 6:27-29) Nɔ ni nyiɛ sɛɛ ji, nɛkɛ Nyɔŋmɔ kɛ e-Bi lɛ tsuji ni he jɔ nɛɛ kase ni amɛŋma yɛ “Kristo mlijɔlɛ kɛ kpoofeemɔ” lɛ he.—2 Korintobii 10:1; Romabii 1:1; Yakobo 1:1, 2; 2 Petro 1:1.
4. (a) Taakɛ Kolosebii 3:12 tsɔɔ lɛ, mɛni ji nɔ ni mɛi ni he jɔ lɛlɛŋ lɛ efee? (b) Mɛɛ sanebimɔi esa akɛ wɔsusu he?
4 Ŋmɛnɛ hu, ehe miihia ni Kristofoi ni afɔ amɛ mu lɛ kɛ amɛ shikpɔŋ nɔ nanemɛi lɛ fɛɛ afee mɛi ni he jɔ. Akɛni amɛshɛrɛ efɔŋ fɛɛ kɛ kutumpɔo fɛɛ kɛ osato kɛ hetsɛmɔi kɛ mɛi ahe wiemɔi fɛɛ amɛshwie hewɔ lɛ, Nyɔŋmɔ mumɔ krɔŋkrɔŋ lɛ eye ebua amɛ koni amɛtsɔmɔ gbɔmɛi heei ‘yɛ mumɔ ni kanyaa amɛjwɛŋmɔ lɛ mli.’ (Efesobii 4:22-24; 1 Petro 2:1, 2) Awoɔ amɛ hewalɛ ni amɛwo “musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.” (Kolosebii 3:12) Shi mɛni krɛdɛɛ yɔɔ mlijɔlɛ loo hejɔlɛ mli? Mɛni hewɔ sɛɛnamɔ yɔɔ mɔ ni he jɔ ni aaaji lɛ mli lɛ? Ni su nɛɛ baanyɛ aha wɔna miishɛɛ yɛ mɛɛ gbɛ nɔ?
Mlijɔlɛ loo Hejɔlɛ Yɔsemɔ Jogbaŋŋ
5. Te abaanyɛ atsɔɔ mlijɔlɛ mli aha tɛŋŋ?
5 Mɔ ni he jɔ lɛ yɛ kpoo yɛ nifeemɔ kɛ subaŋ mli. Yɛ Biblia shishitsɔɔmɔi komɛi amli lɛ, atsɔɔ wiemɔ-su-tsɔɔmɔ, pra·ysʹ shishi akɛ “humi,” “mli jɔ,” “he jɔ,” kɛ “kpoo-feemɔ.” Yɛ woloŋlelɔi a-Hela mli lɛ, abaanyɛ akɛ wiemɔ-su-tsɔɔmɔ pra·ysʹ ato kɔɔyɔɔ ni tswaa blɛoo loo wiemɔ ni mli jɔ he. Ebaanyɛ etsɔɔ mɔ ni ji durolɔ hu. Woloŋlelɔ W. E. Vine kɛɛ: “Nii ni [gbɛi pra·yʹtes] lɛ tsuɔ lɛ kɔɔ Nyɔŋmɔ he titri klɛŋklɛŋ kwraa. Nakai su loo mumɔ lɛ mli wɔkpɛlɛɔ bɔ ni E-kɛ wɔ yeɔ haa lɛ nɔ yɛ akɛ ehi lɛ, ni yɛ enɛ hewɔ lɛ wɔjeee he ŋwane loo wɔteee shi wɔwooo; ekɔɔ wiemɔ tapeinophrosunē [heshibaa] he kpaakpa.”
6. Mɛni hewɔ abaanyɛ akɛɛ akɛ mlijɔlɛ jeee gbɔjɔmɔ loo feetɔ-feemɔ lɛ?
6 Hejɔlɛ loo mlijɔlɛ etsɔɔɔ gbɔjɔmɔ. Woloŋlelɔ William Barclay ŋma akɛ: “Mlijɔlɛ yɛ praus mli, shi nɔ ni yɔɔ mlijɔlɛ nɛɛ sɛɛ ji hewalɛ ni tamɔ dade.” Ebiɔ hewalɛ dani mɔ ko he ajɔ. Akɛ nɔkwɛmɔ nɔ lɛ, hewalɛ he miihia koni mɔ ko afee mɔ ni he jɔ yɛ mlilawoo shishi aloo yɛ be mli ni awaa wɔ yi lɛ. Nyɔŋmɔ Bi, Yesu Kristo, ni he jɔ lɛ to okadi kpakpa efɔ shi yɛ enɛ mli. “Mɔ ni beni ajɛɔ lɛ lɛ, ejɛɛɛ mɔ ko etooo najiaŋ, beni enaa amanehulu lɛ, elomɔɔɔ mɔ ko, shi moŋ etu esane ewo mɔ ni kojoɔ yɛ jalɛ naa lɛ [Yehowa Nyɔŋmɔ] dɛŋ.” (1 Petro 2:23) Taakɛ Yesu ni he jɔ lɛ ji lɛ, wɔbaanyɛ wɔna hekɛnɔfɔɔ akɛ Nyɔŋmɔ kɛ mɛi ni jɛɔ wɔ ni amɛwaa wɔ yi lɛ baaye. (1 Korintobii 4:12, 13) Wɔbaanyɛ wɔfee kpoo, taakɛ Stefano ni awaa lɛ yi lɛ fee lɛ, ni wɔyɔse akɛ kɛji wɔyeɔ anɔkwale lɛ, Yehowa baawaje wɔ ni ehaŋ ni nɔ ko aye wɔ awui kɛya naanɔ.—Lala 145:14; Bɔfoi lɛ Asaji 6:15; Filipibii 4:6, 7, 13.
7. Mɛni Abɛi 25:28 tsɔɔ yɛ mɔ aŋkro ni bɛ mlijɔlɛ lɛ he?
7 Yesu he jɔ, ni kɛlɛ ejie hewalɛ kpo yɛ shi ni edamɔ shiŋŋ kɛha nɔ ni ja lɛ mli. (Mateo 21:5; 23:13-39) Mɔ fɛɛ mɔ ni hiɛ “Kristo jwɛŋmɔ” lɛ baatamɔ lɛ yɛ enɛ mli. (1 Korintobii 2:16) Kɛ mɔ ko jeee mɔ ni he jɔ lɛ, belɛ etamɔɔɔ Kristo. Shi moŋ etamɔ bɔ ni atsɔɔ mli aha nɛɛ: “Mɔ ni nyɛɛɛ emumɔ nɔ aye lɛ, etamɔ maŋ ni akumɔ ni gbogbo bɛ he.” (Abɛi 25:28) Gbɔmɔ ni tamɔ nɛkɛ ni he ejɔɔɔ lɛ baaha susumɔi gbohii ni baaha efee nii yɛ gbɛi ni esaaa nɔ lɛ atutua lɛ. Yɛ be mli ni Kristofonyo ni he jɔ lɛ jeee feetɔ lɛ, kɛlɛ ele akɛ “naajɔlɛ hetoo kuɔ mlila naa; shi wiemɔ ni wa teeɔ mlifu shi.”—Abɛi 15:1.
8. Mɛni hewɔ ebɛ mlɛo akɛ mɔ ko aaafee mɔ ni he jɔ lɛ?
8 Ebɛ mlɛo akɛ mɔ ko aaafee mɔ ni he jɔ, ejaakɛ wɔna emuu ni ayeee kɛ esha akɛ gboshinii (Romabii 5:12) Kɛ wɔji Yehowa tsuji lɛ, belɛ wɔkɛ mumɔi fɔji asafoi ni baaka wɔhejɔlɛ lɛ amɛkwɛ kɛtsɔ yiwaa nɔ lɛ ena ta. (Efesobii 6:12) Ni wɔteŋ mɛi pii tsuɔ nii yɛ mɛi ni yɔɔ jeŋ ni ka Abonsam hewalɛ mli lɛ subaŋ gbonyo lɛ eko lɛ ateŋ. (1 Yohane 5:19) No hewɔ lɛ te wɔɔfee tɛŋŋ wɔna hejɔlɛ loo mlijɔlɛ?
Bɔ Ni Ooofee Ona Hejɔlɛ loo Mlijɔlɛ Su
9. Mɛɛ jwɛŋmɔ ni akɛkwɛɔ nii baaye ebua wɔ ni wɔna mlijɔlɛ?
9 Nɔmimaa ni damɔ Biblia nɔ akɛ aabi ni wɔjie mlijɔlɛ loo hejɔlɛ kpo lɛ baaye abua wɔ ni wɔna su nɛɛ. Esa akɛ wɔtsu nii daa gbi koni wɔna mlijɔlɛ su nɛɛ. Kɛ jeee nakai lɛ, wɔbaatamɔ gbɔmɛi ni susuɔ hejɔlɛ loo mlijɔlɛ he akɛ eji gbɔjɔmɔ lɛ, ni wɔbaasusu akɛ nɔ ni baajɛ omanye ni mɔ ko aaaye lɛ mli aba ji henɔwomɔ, keketee ni aaafee, kɛ yiwalɛ po. Shi Nyɔŋmɔ Wiemɔ lɛ wieɔ eshiɔ henɔwomɔ, ni abɛbua ko ni nilee yɔɔ mli kɛɛ: “Mɔ ni naa mɔbɔ lɛ, lɛ diɛŋtsɛ esusuma ejurɔ efeɔ; shi mɔ ni yi wa lɛ, epiiɔ lɛ diɛŋtsɛ eheloo tete.” (Abɛi 11:17; 16:18) Gbɔmɛi tsiɔ amɛhe kɛjɛɔ gbɔmɔ ni yi wa ni bɛ mɔbɔnalɛ lɛ he, kɛji akɛ amɛfeɔ nakai titri lɛ koni ekatsɔ eyiwalɛ nifeemɔ kɛ mlijɔlɛ ni ebɛ lɛ nɔ eeye amɛ awui po.
10. Mɛni esa akɛ wɔba wɔhe shi wɔha kɛ wɔɔnyɛ wɔfee mɛi ni he jɔ?
10 Kɛ wɔɔnyɛ wɔfee mɛi ni he jɔ lɛ, belɛ esa akɛ wɔba wɔhe shi wɔwo Nyɔŋmɔ mumɔ krɔŋkrɔŋ loo enifeemɔ hewalɛ lɛ kudɔmɔ shishi. Taakɛ Yehowa ha shikpɔŋ lɛ nyɛ ewo yibii loo aduawai ni ayeɔ lɛ, nakai nɔŋŋ hu ehaa etsuji woɔ mumɔ lɛ yibii, ni hejɔlɛ loo mlijɔlɛ fata he lɛ. Paulo ŋma akɛ: “Shi mumɔ lɛ yibii ji suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli. Enɛɛmɛi lɛ mla ko eguuu.” (Galatabii 5:22, 23) Hɛɛ, mlijɔlɛ ji Nyɔŋmɔ mumɔ lɛ yibii ni mɛi ni saa ehiɛ lɛ jieɔ lɛ kpo lɛ eko. (Lala 51:11, 12) Ni mɛɛ tsakemɔi mlijɔlɛ kɛbaa nɛkɛ! Akɛ nɔkwɛmɔ nɔ lɛ: Nuu ko yɛ ni ebuuu nii ni atsɛɔ lɛ Tony ni nɔɔ atswɛrɛ, ni tswaa mɛi ojo, ni hɔɔ tsofai fɔji, ni ji mɛi ni taa moto saikle lɛ ahiɛnyiɛlɔ, ni awoɔ lɛ tsuŋ hu. Shi akɛni Nyɔŋmɔ mumɔ krɔŋkrɔŋ lɛ ye ebua lɛ ni ena Biblia lɛ he nilee hewɔ lɛ, etsake etsɔ Yehowa tsulɔ ni he jɔ. Tony sane nɛɛ bɛ naakpɛɛ. Belɛ mɛni mɔ ko baanyɛ afee kɛji akɛ mlijɔlɛ ni abɛ efee esu kɛ baŋ lɛ fa titri?
11. Mɛni sɔlemɔ tsuɔ yɛ mlijɔlɛ ni wɔɔna lɛ mli?
11 Sɔlemɔ ni jɛ tsuiŋ kɛha Nyɔŋmɔ mumɔ lɛ kɛ eyibii ni ji mlijɔlɛ lɛ baaye abua wɔ ni wɔna su nɛɛ. Ehe baahia ni “wɔya nɔ wɔbi,” taakɛ Yesu kɛɛ lɛ, ni Yehowa Nyɔŋmɔ baaha wɔ nibimɔ lɛ hetoo. Yɛ be mli ni etsɔɔ akɛ tsɛmɛi ni ji adesai kɛ nibii kpakpai haa amɛbii lɛ, Yesu kɛɛ: “Belɛ kɛji nyɛ ni nyɛji mɛi fɔji [eshafeelɔi] lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehaŋ mɛi ni biɔ lɛ lɛ!” (Luka 11:9-13) Sɔlemɔ baanyɛ aye abua ni eha mlijɔlɛ afee wɔsubaŋ lɛ fa ko ni hiɔ shi daa—su ni yeɔ buaa wɔ ni haa wɔ kɛ mɛi ni wɔkɛ amɛ bɔɔ lɛ naa miishɛɛ.
12. Mɛni hewɔ ha ni wɔɔha ahi wɔjwɛŋmɔ mli akɛ adesai yeee emuu lɛ baaye abua wɔ ni wɔfee mɛi ni he jɔ lɛ?
12 Ni wɔɔkai akɛ adesai yeee emuu lɛ baanyɛ aye abua wɔ ni wɔhe ajɔ. (Lala 51:7) Wɔnyɛŋ wɔsusu nii ahe loo wɔfee nii yɛ emuuyeli mli, taakɛ bɔ ni mɛi krokomɛi nyɛŋ afee lɛ, no hewɔ lɛ esa akɛ wɔnu he wɔha amɛ ni wɔkɛ amɛ aye yɛ gbɛ ni wɔbaasumɔ akɛ amɛfee wɔ lɛ nɔ. (Mateo 7:12) Esa akɛ le ni wɔle akɛ wɔ fɛɛ wɔtɔ̃ɔ lɛ aha wɔfee mɛi ni kɛ sane keɔ ni kɛ mɛi krokomɛi yeɔ yɛ mlijɔlɛ naa. (Mateo 6:12-15; 18:21, 22) Yɛ fɛɛ sɛɛ lɛ, ani wɔdaaa shi akɛ Nyɔŋmɔ jieɔ suɔmɔ kɛ mlijɔlɛ kpo etsɔɔ wɔ?—Lala 103:10-14.
13. Mɛɛ gbɛ nɔ aaatsɔ aye abua wɔ ni wɔna mlijɔlɛ kɛ wɔkpɛlɛ nɔ akɛ Nyɔŋmɔ bɔ gbɔmɛi akɛ mɛi ni yeɔ amɛhe lɛ?
13 Ni wɔɔkpɛlɛ nɔ akɛ Nyɔŋmɔ bɔ gbɔmɛi akɛ mɛi ni yeɔ amɛhe lɛ hu baaye abua wɔ ni wɔhe ajɔ loo wɔna mlijɔlɛ. Enɛ eŋmɛɛɛ mɔ ko gbɛ ni eku ehiɛ eshwie Yehowa mlai anɔ bɔ ni esumɔɔ, shi moŋ eŋmɛɔ gbɛ koni sɔrɔto-feemɔ aba nibii ni ewebii sumɔɔ, kɛ nɔ ni amɛtaoɔ loo amɛtaooo lɛ amli. No hewɔ lɛ esa akɛ wɔkpɛlɛ nɔ akɛ gbɛnaa nii kaaa mɔ ko nɔ akɛ etsɔ gbɔmɔ pɔtɛɛ ko ni wɔbaasusu akɛ no ji nɔ ni hi fe fɛɛ. Su ni tamɔ nɛkɛ baaha wɔfee mɛi ni he jɔ.
14. Yɛ mlijɔlɛ gbɛfaŋ lɛ mɛni esa akɛ efee wɔfaishitswaa?
14 Wɔfaishitswaa akɛ wɔŋmɛŋ mlijɔlɛ he lɛ baaye abua wɔ ni wɔya nɔ wɔdi su ni tamɔ nɛkɛ sɛɛ. Wɔhe shi ni wɔba wɔha Yehowa mumɔ lɛ koni ena wɔnɔ hewalɛ lɛ kɛ tsakemɔ ba bɔ ni wɔjwɛŋɔ wɔhaa lɛ mli. (Romabii 12:2) Mumɔ ni he jɔ ni tamɔ Kristo nɔ lɛ yeɔ ebuaa wɔ bianɛ koni etsi wɔnaa ni wɔkɛ wɔhe akawo “nyenyeŋtswibɔi, akɔnɔi, daatɔi, shwɛmɔi, fufeemɔi, kɛ wɔŋjamɔi ni ahiɔ lɛ amli.” Esaaa akɛ wɔŋmɛɛɔ mlijɔlɛ he yɛ shika, kwasafoŋ shihilɛ, loo yɛ yiŋtoo kroko hewɔ, aloo akɛni gbɔmɛi jɛ́ɔ wɔ yɛ wɔ-Nyɔŋmɔ gbeyeishemɔ su he lɛ hewɔ. (1 Petro 4:3-5) Esaaa akɛ wɔŋmɛɔ gbɛ koni nɔ ko aha wɔkɛ wɔhe awo “heloo lɛ nitsumɔi” amli, ni no ha wɔlaaje wɔmlijɔlɛ lɛ, ni Nyɔŋmɔ Maŋtsɛyeli ni wɔnine aaashɛ nɔ lɛ loo ejɔɔmɔi lɛ amli ŋɔɔmɔ ni wɔɔna lɛ miije wɔdɛŋ. (Galatabii 5:19-21) Nyɛhaa wɔshwea hegbɛ ni wɔna akɛ wɔɔfee Nyɔŋmɔ mlijɔlɛ bii lɛ be fɛɛ be, kɛ wɔji mɛi ni afɔ amɛ mu aha ŋwɛi shihilɛ loo mɛi ni yɔɔ shikpɔŋ nɔ shihilɛ he hiɛnɔkamɔ hu lɛ. Yɛ enɛ hewɔ lɛ, nyɛhaa wɔsusua mlijɔlɛ mli sɛɛnamɔi komɛi ahe.
Mlijɔlɛ Mli Sɛɛnamɔi
15. Taakɛ Abɛi 14:30 tsɔɔ lɛ, mɛni hewɔ nilee yɔɔ mli akɛ wɔɔfee mɛi ni he jɔ lɛ?
15 Gbɔmɔ ni he jɔ lɛ yɛ tsuiŋ, jwɛŋmɔŋ, kɛ gbɔmɔtsoŋ mlijɔlɛ. Nakai ni, ejaakɛ ekɛ ehe wooo bei amli, emli wooo la yɛ mɛi krokomɛi anifeemɔi ahe, aloo ni ekɛ yeyeeyefeemɔ ni baaa shi aaapiŋ ehe. Mlijɔlɛ yeɔ ebuaa lɛ koni eye ehenumɔi anɔ, ni enɛ he yɛ sɛɛnamɔ yɛ jwɛŋmɔŋ kɛ gbɔmɔtsoŋ. Abɛi lɛ eko kɛɔ akɛ: “Tsui ni mli jɔ lɛ, gbɔmɔtso lɛ yiwala ni.” (Abɛi 14:30) Mlijɔlɛ ni bɛ baanyɛ ekɛ mlifu ni baanyɛ atee la ni haa tsui lɛ tswaa kpalakpala fe nine shi, aloo ni eeeha musuŋ naagbai, fɛ̃fɛ̃, hiŋmɛi helai kɛ naagbai krokomɛi aba. Kristofonyo ni he jɔ lɛ naa sɛɛnamɔi pii amli ŋɔɔmɔ, ni nɔ ni fata he ji “Nyɔŋmɔ toiŋjɔlɛ” ni buɔ etsui kɛ jwɛŋmɔŋ nyɛmɔi ahe lɛ. (Filipibii 4:6, 7, NW) Kwɛ bɔ ni eji nilee gbɛ akɛ wɔɔfee mɛi ni he jɔ!
16-18. Mlijɔlɛ saa wekukpaa ni ka wɔkɛ mɛi krokomɛi ateŋ lɛ he yɛ mɛɛ gbɛ nɔ?
16 Mlijɔlɛ loo hejɔlɛ su haa wekukpaa ni ka wɔkɛ mɛi krokomɛi ateŋ lɛ yaa hiɛ. Ekolɛ su ni wɔhiɛ be ko ji ni wɔwie saji ahe aahu kɛyashi be mli ni wɔnine aaashɛ nɔ ni wɔtaoɔ lɛ nɔ. Ekolɛ gbɔmɛi amli fu wɔ ejaakɛ wɔbɛ heshibaa kɛ mlijɔlɛ. Esaaa akɛ efeɔ wɔ naakpɛɛ kɛ wɔkɛ wɔhe wo béi sɔrɔtoi amli yɛ shihilɛi ni tamɔ nɛkɛ shishi. Shi, abɛ ko kɛɔ akɛ: “Kɛ lai ta lɛ, la gboɔ, ni kɛ ablɛbiwielɔ bɛ lɛ, béi sɛɛ foɔ. Bɔ ni ŋai yɔɔ ha lasrɛmi, ni lai yɔɔ ha la lɛ, nakai nɔŋŋ hebéilɔ haa béi mli waa.” (Abɛi 26:20, 21) Kɛ wɔji mɛi ni he jɔ, ‘ni wɔtsiii lai wɔwooo la mli’ ni wɔwooo mɛi krokomɛi amlifu lɛ, no lɛ wekukpaa kpakpa baaka wɔkɛ amɛ teŋ.
17 Eka shi faŋŋ akɛ gbɔmɔ ni he jɔ lɛ baanyɛ ana nanemɛi kpakpai. Gbɔmɛi naa ekɛbɔɔ he miishɛɛ ejaakɛ ehiɛ jwɛŋmɔ kpakpa, ni ewiemɔi amli jɔ ni eŋɔɔ tamɔ wo. (Abɛi 16:24) Enɛ ji anɔkwale yɛ Yesu ni nyɛ ewie nɛkɛ lɛ he: “Nyɛwoa mipã lɛ nyɛfoa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.” (Mateo 11:29, 30) Yesu bɛ keketee, ni epã lɛ enyɛɛɛ mɔ nɔ. Ekɛ mɛi ni baa eŋɔɔ lɛ yeɔ jogbaŋŋ, ni eshɛjeɔ amɛmii yɛ mumɔŋ. Nakai shihilɛ lɛ tamɔ, yɛ be mli ni wɔkɛ naanyo Kristofonyo ni he jɔ lɛ bɔɔ lɛ.
18 Mlijɔlɛ haa nanemɛi heyelilɔi sumɔɔ wɔsane. Ŋwanejee ko bɛ he akɛ, Kristofoi ni yɔɔ Korinto lɛ ateŋ mɛi pii bɛŋkɛɔ Paulo ejaakɛ ekɛ amɛ ye yɛ “Kristo mlijɔlɛ kɛ kpoofeemɔ lɛ” naa. (2 Korintobii 10:1) Eka shi faŋŋ akɛ Tesalonikabii lɛ hu tsi bɛŋkɛ Paulo, ejaakɛ eji tsɔɔlɔ ni he jɔ ni yɔɔ kpoo. (1 Tesalonikabii 2:5-8) Sanebimɔ ko bɛ nii babaoo ni Efeso onukpai lɛ ekase kɛjɛ Paulo ŋɔɔ lɛ he ni amɛsumɔɔ lɛ waa hu. (Bɔfoi lɛ Asaji 20:20, 21, 37, 38) Ani ojieɔ mlijɔlɛ ni haa mɛi sumɔɔ osane lɛ kpo?
19. Yɛ mɛɛ gbɛ nɔ mlijɔlɛ yeɔ ebuaa Yehowa webii koni amɛhi gbɛhe mli ni amɛyɔɔ yɛ egbɛjianɔtoo lɛ mli lɛ?
19 Mlijɔlɛ su yeɔ buaa Yehowa webii koni amɛba amɛhe shi ni amɛhi amɛgbɛhe yɛ egbɛjianɔtoo lɛ mli. (Filipibii 2:5-8, 12-14; Hebribii 13:17) Mlijɔlɛ tsiɔ wɔ gbɛ koni wɔkatao anunyam ni damɔ henɔwomɔ ni Nyɔŋmɔ hiɔ nɔ lɛ. (Abɛi 16:5) Gbɔmɔ ni he jɔ lɛ susuuu ehe akɛ enɔ kwɔ fe enanemɛi heyelilɔi, ni ebɔɔɔ mɔdɛŋ akɛ eeefe amɛ ni ekɛgba amɛ naa. (Mateo 23:11, 12) Shi moŋ, ekpɛlɛɔ eshafeemɔ su ni eyɔɔ mli lɛ kɛ bɔ ni Nyɔŋmɔ kpɔmɔ nɔ he gbɛjianɔtoo lɛ he hiaa lɛ lɛ nɔ.
Mlijɔlɛ kɛ Miishɛɛ Baa
20. Mlijɔlɛ saa weku shihilɛ he yɛ mɛɛ gbɛ nɔ?
20 Esa akɛ Nyɔŋmɔ tsuji fɛɛ akai akɛ mlijɔlɛ ji emumɔ lɛ yibii lɛ eko ni kɛ miishɛɛ baa. Akɛ nɔkwɛmɔ nɔ lɛ, akɛni Yehowa webii jieɔ sui ni tamɔ suɔmɔ kɛ mlijɔlɛ kpo hewɔ lɛ, anaa wekui ni yɔɔ miishɛɛ babaoo yɛ amɛteŋ. Kɛ wu kɛ ŋa kɛ amɛhe ye yɛ mlijɔlɛ naa lɛ, amɛbii lɛ daraa yɛ shihilɛ ni yɔɔ kpoo mli, jeee yɛ weku ni wieɔ wiemɔi ni wa ni feɔ enii keketee mli. Yɛ be mli ni tsɛ lɛ kɛ mlijɔlɛ woɔ ebii aŋaa lɛ, enɛ naa amɛjwɛŋmɔi ni darako lɛ anɔ hewalɛ kpakpa, ni eka shi faŋŋ akɛ mlijɔlɛ su baafee amɛsu kɛ baŋ lɛ fa. (Efesobii 6:1-4) Mlijɔlɛ su yeɔ ebuaa wumɛi koni amɛya nɔ amɛsumɔ amɛŋamɛi. Eyeɔ ebuaa ŋamɛi koni amɛba amɛhe shi amɛha amɛwumɛi ni etsirɛɔ gbekɛbii koni amɛfee toiboo amɛha amɛfɔlɔi. Mlijɔlɛ hu haa weku lɛ mlibii naa eshaifaa su ni kɛ miishɛɛ baa lɛ.—Kolosebii 3:13, 18-21.
21. Mɛni ji ŋaawoo ni bɔfo Paulo kɛha yɛ Efesobii 4:1-3 lɛ mli nɔ titri?
21 Weku kɛ aŋkroaŋkroi ni he jɔ haa miishɛɛ baa asafoi ni amɛyɔɔ mli lɛ amli. No hewɔ lɛ, ehe miihia ni Yehowa webii abɔ mɔdɛŋ waa ni amɛfee mɛi ni he jɔ. Ani oofee nakai? Bɔfo Paulo kpa enanemɛi Kristofoi ni afɔ amɛ mu lɛ fai akɛ amɛnyiɛ bɔ ni sa amɛŋwɛi tsɛmɔ lɛ, ni amɛfee nakai yɛ “heshibaa jwɛŋmɔ kɛ humifeemɔ fɛɛ mli, ni nyɛkɛ tsuishitoo ahiɛhiɛ nyɛhe yɛ suɔmɔ mli, ni nyɛbɔ mɔdɛŋ ni nyɛto mumɔ ekomefeemɔ lɛ yɛ hejɔlɛ kpaa lɛ mli.” (Efesobii 4:1-3) Esa akɛ Kristofoi ni yɔɔ shikpɔŋ nɔ shihilɛ he hiɛnɔkamɔ lɛ hu ajie mlijɔlɛ kɛ sui krokomɛi ni Nyɔŋmɔ gbeyeishemɔ yɔɔ mli lɛ kpo. Enɛ ji nifeemɔ gbɛ ni kɛ anɔkwa miishɛɛ baa. Miishɛɛ lɛlɛŋ ji mɛi ni he jɔ lɛ!
Te Obaaha Hetoo Oha Tɛŋŋ?
◻ Mɛni hewɔ mɛi ni he jɔ lɛ yɔɔ miiishɛɛ Iɛ?
◻ Ni mɔ ko aaafee mɔ ni he jɔ lɛ tsɔɔ mɛni?
◻ Te aaafee tɛŋŋ ana mlijɔlɛ?
◻ Mɛni ji mlihilɛ mli sɛɛnamɔi komɛi?