Shika Ni Akɛfaa Nanemɛi Kristofoi

PEDRO kɛ Carlos ji nanemɛi kpakpai.a Amɛji nanemɛi Kristofoi, ni amɛwekui lɛ kɛ amɛhe naa naanyobɔɔ kpakpa mli ŋɔɔmɔ. No hewɔ lɛ beni shika he miihia Carlos kɛha enitsumɔ lɛ, Pedro shashaooo shi kwraa akɛ ekɛ shika lɛ aaafa lɛ. Pedro tsɔɔ mli akɛ, “akɛni wɔji nanemɛi kpakpai hewɔ lɛ egbaaa minaa.”

Shi yɛ nyɔji enyɔ pɛ sɛɛ lɛ, Carlos nitsumɔ lɛ fite, ni shika ni ewoɔ lɛ sɛɛ fo. Pedro naa kpɛ ehe beni enu akɛ Carlos kɛ shika ni efa yɛ edɛŋ lɛ mli nɔ ni fa yawo nyɔji ni ehiɛ ni kɔɔɔ nitsumɔ lɛ he lɛ, ni eshwɛ nɔ ni eshwɛ lɛ mli. Pedro tsui enyɔɔɔ emli yɛ gbɛ ni atsɔ nɔ aye sane lɛ he yɛ afi muu ni akɛkwɛ sane lɛ kɛ ehe woji ni aŋmala lɛ fɛɛ sɛɛ. Yɛ ehiɛnɔkamɔ ni fee yaka nɛɛ hewɔ lɛ, Pedro kɛ sane lɛ tee saneyeli he, ni eha awo Carlos​—enaanyo kɛ nyɛmi Kristofonyo lɛ​—tsuŋ.b Ani gbɛ ni atsɔ nɔ afee nii nɛɛ ja lo? Wɔbaakwɛ.

Gbeekpamɔ kɛ shishinumɔ ni baaa yɛ shika-faa he lɛ ji saji titrii ni fɔɔ nanemɛi ateŋ fitemɔ yɛ gbɔmɛi ni yɔɔ je lɛŋ fɛɛ lɛ ateŋ. Yɛ bei komɛi amli lɛ enyɛɔ efiteɔ nanemɛi Kristofoi ateŋ po. Maji pii yɛ ni ewa akɛ aaanyɛ afa shika yɛ shikatoo hei lɛ, no hewɔ lɛ nɔ ni gbɔmɛi ni taoɔ shika afa kɛha nitsumɔ ko lɛ fɔɔ feemɔ ji ni amɛyatao eko yɛ nanemɛi kɛ wekumɛi aŋɔɔ. Shi Pedro kɛ Carlos niiashikpamɔ ni miishɛɛ bɛ mli lɛ tsɔɔ akɛ, kɛ mɔ ni yafaa shika lɛ kɛ mɔ ni kɛ eshika faa lɛ fɛɛ enyiɛɛɛ Biblia mli shishitoo mlai asɛɛ gbagbalii lɛ, naagbai ni hiɛdɔɔ yɔɔ mli baanyɛ ate shi. Belɛ mɛni ji gbɛ kpakpa ni abaanyɛ atsɔ nɔ atsu naanyo Kristofonyo ni biɔ ni afa lɛ shika lɛ nibimɔ lɛ he nii?

Osharai ni Yɔɔ Shikafaa He lɛ Ni Aaasusu He

Biblia lɛ wooo shikafaa ni he ehiaaa lɛ he hewalɛ. Bɔfo Paulo wo ŋaa akɛ: “Nyɛkahiɛa mɔ ko mɔ ko nyɔmɔ akɛ ja suɔmɔ ni nyɛkɛaasumɔ nyɛhe lɛ.” (Romabii 13:⁠8) No hewɔ lɛ, dani okɛ ohe aaawo nyɔmɔ mli lɛ, susumɔ osharai ni yɔɔ nakai feemɔ mli lɛ ahe. (Okɛto Luka 14:28 he.) Ani ehe miihia diɛŋtsɛ akɛ ofa shika? Ani sane lɛ ji nɔ ni okɛbaakwɛ bo kɛ oweku lɛ? (1 Timoteo 5:⁠8) Aloo ekɔɔ hiɛjoomɔ he kɛyashɛɔ he ko​—ekolɛ oosumɔ ni ohi ogbɔjɔ shihilɛ?​—1 Timoteo 6:​9, 10.

Nɔ kroko ni sa kadimɔ jogbaŋŋ ji kɛji akɛ nyɔmɔ ni ohiɛ lɛ baanyɛ onɔ ni okɛ ŋmɛlɛtswai babaoo atsu nii ni ekolɛ oku ohiɛ oshwie kpeei kɛ sɔɔmɔ nitsumɔ lɛ nɔ. Agbɛnɛ, ani obaanyɛ okɛ mɔ ko shika awo oshara mli diɛŋtsɛ? Ni kɛ nitsumɔ lɛ fite hu? Kaimɔ akɛ, “mɔ fɔŋ faa nii ni ewooo nyɔmɔ.”​—Lala 37:⁠21.

‘Anɔkwale’ ni Wɔkɛ Mɛi ni Faa Wɔ Shika lɛ ‘Aaawie’

Yɛ be mli ni osusu nɛkɛ nibii nɛɛ ahe lɛ, ekolɛ obaanu he akɛ shika ni ooofa ni okɛtsu nii lɛ he miihia lolo. Kɛji akɛ onyɛŋ ona yɛ shikatoo he ko lɛ, ejeee efɔŋ akɛ ooobi onaanyo Kristofonyo ko eko, ejaakɛ abiɔ nanemɛi anii yɛ fimɔ bei amli, taakɛ Yesu wie he yɛ Luka 11:5 lɛ. Kɛlɛ esa akɛ mɔ lɛ amia ehiɛ ni “[e]wie anɔkwale.” (Efesobii 4:25) Okɛ anɔkwayeli atsɔɔ nɔ ni hɔ sane lɛ sɛɛ lɛ fɛɛ mli​—ni osharai ni yɔɔ he fata he, kɛ nɔ ni eeefee akɛ enyɛŋ eba lɛ po. Ni kaaha omli fu kɛji akɛ mɔ ni baafa bo shika lɛ miibi saji titrii komɛi babaoo bɔni afee ni ekɛna nɔmimaa akɛ ena sane lɛ mli faŋŋ.c

Ani ebaafee anɔkwale ni awieɔ akɛ aaafa shika yɛ yiŋtoo ko hewɔ, ni agbɛnɛ akɛ shika lɛ ayatsu nɔ kroko? Dabi. Latin-Amerika shikatolɔ ko tsɔɔ mli akɛ: “Shikatoo he lɛ baafo shika ni ekɛfaa bo lɛ mli, ni kɛ owooo onyɔmɔ lɛ amrɔ nɔŋŋ lɛ, amɛbaabi hewalɛ loo famɔ kɛjɛ kojomɔ he ni amɛshɔ̃ onibii yɛ odɛŋ.” Kɛ akɛ shika fa kɛ yiŋtoo akɛ ebaaha nitsumɔ ko ana sɛɛnamɔ babaoo lɛ, ni okɛaatsu yiŋtoo kroko he nii lɛ fiteɔ nɔmimaa ni mɔ ni kɛ shika lɛ fa bo lɛ yɔɔ akɛ abaanyɛ awo shika lɛ ekoŋŋ lɛ. Eji anɔkwale akɛ, osheŋ kojomɔ he ni akɛo aaaya ni agbala otoi akɛni oofa kɛmiijɛ naanyo Kristofonyo ko dɛŋ lɛ gbeyei. Ni kɛlɛ, “nifalɔ lɛ, mɔ ni fa lɛ lɛ tsulɔ ji lɛ,” ni gbɛnaa nii ka onɔ akɛ oye lɛ anɔkwale.​—Abɛi 22:⁠7.

Mla Kpakpa lɛ kɛ Nitsumɔ yɛ Jarayeli Mli

Yesu kɛɛ: “Nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.” ( Mateo 7:12) Kwɛ bɔ ni ehe hiaa akɛ akɛ nɛkɛ mla nɛɛ aaatsu nii kɛ akɛ naanyo heyelilɔ ko miitsu nii lɛ! Akɛ nɔkwɛmɔ nɔ lɛ, te obaafee onii oha tɛŋŋ kɛ nyɛmi ko haaa bo shika ni obiɔ lɛ? Ani obaanu he akɛ efite nyɛnaanyobɔɔ lɛ? Aloo okɛ bulɛ baaha hegbɛ ni eyɔɔ akɛ eeekpoo nɔ ni obiɔ lɛ, ni oyoo akɛ eshika lɛ he baahia lɛ aloo ebaasusu osharai ni yɔɔ mli lɛ ahe akɛ eji hiɛdɔɔ sane fe bɔ ni osusuɔ he lɛ? Ebaanyɛ ni ekɛ anɔkwayeli abi sane yɛ nyɛmɔ ni oyɔɔ ni okɛ shika lɛ aaatsu nii jogbaŋŋ lɛ he. Yɛ sane ni tamɔ nɛkɛ mli lɛ, ha ni ehaaa bo shika lɛ baafee nɔ ni sa kɛ nɔ ni suɔmɔ yɔɔ mli.​—Abɛi 27:⁠6.

Kɛ naanyo ko kpɛlɛ nɔ akɛ ebaafa bo shika ko lɛ, esa akɛ atsɔɔ ehe nibii lɛ fɛɛ mli fitsofitso yɛ niŋmaa mli, ni atsɔɔ shika ni afa lɛ, nɔ ni akɛbaatsu, nibii ni akɛbaadamɔ shika lɛ sɛɛ, bɔ ni abaafee awo shika lɛ kɛ be mli ni abaawo. Yɛ saji nɛɛ ekomɛi amli lɛ ebaafee nɔ ni jwɛŋmɔ yɔɔ mli po akɛ aaatao mlalelɔ ni eŋmala loo ekwɛ kpaŋmɔ ni nyɛfee nɛɛ mli ni akɛwo mla shishi. Bɔ fɛɛ bɔ ni eji lɛ, kɛ nyɛna nyɛkɛ nyɛwao naa gbɛi wo kpaŋmɔ lɛ shishi pɛ lɛ, “nyɛhaa nyɛ wiemɔ Hɛɛ afea Hɛɛ, nyɛ Dabi, afea Dabi.” (Mateo 5:​37, NW) Kaaku ohiɛ oshwie ejurɔ ni onaanyo lɛ efeeo lɛ nɔ kɛtsɔ gbɛnaa nii ni ka onɔ ni oootsu he nii oha lɛ lɛ ni obuŋ lɛ akɛ ehe ehiaaa tamɔ bɔ ni ooofee oha shikatoo he ko lɛ.

Mɛi ni Kɛ Shika Faa ni Kwɛɔ Jogbaŋŋ

Ni kɛ mɔ ko ba akɛ ofa lɛ shika hu? Babaoo damɔ shihilɛi ni kɔɔ he lɛ nɔ. Akɛ nɔkwɛmɔ nɔ lɛ, Kristofonyo nyɛmi ko baanyɛ abɔ nyɔmɔ kwraa ni jeee lɛ tɔmɔ lɛ jɛ. Kɛ oyɛ hegbɛ ni okɛaafee nakai lɛ, belɛ Kristofoi asuɔmɔ baatsirɛ bo koni ‘oha lɛ nibii ni he hiaa egbɔmɔtso lɛ.’​—Yakobo 2:​15, 16.

Kwɛ bɔ ni efeŋ nɔ ni suɔmɔ yɔɔ mli akɛ oootsɔ haomɔ ni eba nyɛmi nɛɛ nɔ lɛ nɔ ohe hekpa yɛ shihilɛ ni tamɔ nɛkɛ mli! Yesu wo hewalɛ akɛ: “Nyɛsumɔa nyɛ henyɛlɔi, ni nyɛfea ejurɔ ni nyɛfaa ni nyɛhiɛ kaaa nɔ ko nɔ dɔŋŋ.”​—Luka 6:​35; okɛto 3 Mose 25:​35-38 he.

Shi kɛ aabio kɛkɛ ni okɛ shika awo nitsumɔ ko mli aloo okɛ nɔ ko adamɔ shika ko sɛɛ hu? Afɔɔ nɛkɛ saji nɛɛ ahe nitsumɔ akɛ shika nitsumɔi. Biblia lɛ woɔ hewalɛ ni akwɛ he nɔ jogbaŋŋ, ni ewoɔ ŋaa akɛ: “Kaafee ohe mɛi ni taraa dɛŋ lɛ eko, loo mɛi ni damɔɔ nyɔji anaa lɛ.”​—Abɛi 22:⁠26.

Akɛni nɛkɛ sane lɛ ji hewɔ lɛ, klɛŋklɛŋ lɛ esa akɛ ole kɛji akɛ obaanyɛ okɛ oshika awo mli. Ani ebaaha obɔ nyɔmɔ kɛji akɛ nitsumɔ lɛ fite aloo mɔ ni fa shika lɛ nyɛɛɛ awo nɔ ni efa lɛ yɛ be ni sa mli? Kɛ obaanyɛ okɛ shika lɛ afa ni sɛɛnamɔ baajɛ mli aba lɛ, belɛ oyɛ hegbɛ akɛ onaa he sɛɛ kɛtsɔ hekpa ni sa ni ooobi yɛ oshika lɛ he lɛ hewɔ. (Okɛto Luka 19:​22, 23 he.) Abɛi 14:15 bɔɔ kɔkɔ akɛ: “Mɔ ni nako jwɛŋmɔ lɛ eheɔ wiemɔ fɛɛ wiemɔ eyeɔ; shi hiɛtɛlɔ leɔ enane naa kwɛmɔ.” Nitsumɔtsɛmɛi komɛi ni hiɛ etɛ lɛ shɛ henɔkwɛmɔ jogbaŋŋ amɛfɔ beni amɛkɛ nanemɛi Kristofoi tsuɔ nii. Hekpa babaoo ni awoɔ lɛ elaka mɛi komɛi ni eha amɛkɛ shika ewo nitsumɔi amli ni amɛsusuuu he ni enɛ eha amɛlaaje amɛshika kɛ naanyobɔɔ ni ka amɛkɛ amɛnanemɛi Kristofoi ateŋ lɛ.

Nɔ ni yɔɔ miishɛɛ lɛ, shikatolɔi fɔɔ nibii etɛ ni haa amɛleɔ bɔ ni oshara yɔɔ shika ko ni akɛaafa he lɛ he susumɔ: (1) mɔ ni biɔ shika lɛ subaŋ, (2) kɛ ebaanyɛ ewo nyɔmɔ lɛ, kɛ (3) bɔ ni enitsumɔ lɛ yɔɔ ha. Ani ebafeŋ ‘jwɛŋmɔ ni hi’ akɛ oooŋmɛ saji okwɛ nakai nɔŋŋ yɛ be mli ni osusuɔ oshika ni okɛ tɔlɛ ena lɛ ni okɛaafa mɔ ko lɛ he lɛ?​—Abɛi 3:⁠21.

Akɛ nɔkwɛmɔ nɔ lɛ, te ale nyɛmi ni biɔ shika lɛ jogbaŋŋ aha tɛŋŋ? Ani ale lɛ akɛ anɔkwafo kɛ mɔ ni anyɛɔ akɛ he fɔɔ enɔ aloo eyɛ basabasa ni ebɛ shiŋŋ? (Okɛto 1 Timoteo 3:7 he.) Kɛji akɛ eesumɔ ni elɛɛ enitsumɔ lɛ mli lɛ, ani etsu he nii yɛ omanyeyeli mli aahu kɛbashi he ni eshɛ nɛɛ? (Luka 16:10) Kɛ jeee nakai lɛ, yelikɛbuamɔ diɛŋtsɛ ni akɛaaha lɛ koni enyɛ ekwɛ eshika nɔ jogbaŋŋ lɛ moŋ baaye abua babaoo yɛ sɛɛ mli fe ni aaafa lɛ shika ni enyɛŋ he nii etsu.

Nɔ kroko ji nyɛmi lɛ nyɛmɔ ni ekɛaawo nyɔmɔ lɛ. Shika enyiɛ baa edɛŋ? Mɛɛ nyɔmɔ ehiɛ? Jwɛŋmɔ yɛ mli akɛ eeegbele nɔ fɛɛ nɔ hiɛ etsɔɔ bo. Ni kɛlɛ, esa akɛ Kristofoi asuɔmɔ hu atsu nii. Akɛ nɔkwɛmɔ nɔ lɛ, ekolɛ obaasumɔ ni oha nyɛmi lɛ kɛ nɔ ko ni abaanyɛ ahɔɔ adamɔ shika ni okɛfaa lɛ lɛ sɛɛ. Mose Mla lɛ bu mɔ ko nii ni ekɛlɛɔ ehe loo nibii ni eyɔɔ ni aaashɔ yɛ edɛŋ koni akɛdamɔ shika ni akɛfa mɔ lɛ sɛɛ lɛ fɔ. (5 Mose 24:​6, 10-12) No hewɔ lɛ, South Amerika nyɛmi nuu ko ni ji nitsumɔtsɛ lɛ kɛɛ akɛ ekɛ shika ni shɛɔ nibii ni nyɛmi lɛ yɔɔ ni abaanyɛ ahɔɔ lɛ fa baaha. Etsɔɔ mli akɛ: “Misusuuu enitsumɔ dadei loo eshia he akɛ nibii ni abaanyɛ ahɔɔ. Misumɔŋ ni mashwie minyɛmi lɛ kɛjɛ eshia ni mashɔ eshia yɛ edɛŋ koni minine ashɛ mishika lɛ nɔ ekoŋŋ.”

Yɛ naagbee lɛ, esa akɛ okɛ nilee asusu shihilɛ mli ni nitsumɔ sɔrɔtoi ni yɔɔ he ni oyɔɔ lɛ yɔɔ mli lɛ he. “Naagbee gbii” lɛ amli wɔyɔɔ lɛ, be mli ni gbɔmɛi aaatsɔmɔ “shika suɔlɔi, . . . sɛɛgbɛtsɔɔlɔi.” (2 Timoteo 3:​1-4) Yɛ be mli ni onaanyo kɛ onyɛmi lɛ baanyɛ afee anɔkwafo lɛ, ekolɛ jeee nakai enitsumɔ mli hefatalɔi, mɛi ni tsuɔ nii haa lɛ, kɛ mɛi ni etsuɔ nii ehaa amɛ lɛ ji. Akɛ Kristofonyo lɛ, enyɛŋ ni ekɛ ehe awo nyɔɔŋ-nihamɔ kɛ amale mli​—ŋaa ni mɛi ni ekɛ amɛ shiɔ akaŋ yɛ nitsumɔ mli lɛ baanyɛ atsɔ nɔ ni amɛkɛna nii lɛ. Nɔ ni esa akɛ asusu he hu ji nii ni “be kɛ shihilɛ mli nibii ni baa trukaa ni alee” fiteɔ. (Jajelɔ 9:​11, NW) Guɔyeli nibii ajara baanyɛ aba shi trukaa. Nibii ajara ni yaa ŋwɛi baanyɛ afite nitsumɔ ko aloo eba oshika-tso muu lɛ shi. Juu, osharai, nibii ni ajeɔ gbɛ afiteɔ, kɛ pilamɔi hu ji nibii ni esaaa ni yaa nɔ yɛ nitsumɔi amli. Esa akɛ osusu nibii nɛɛ fɛɛ he yɛ oyiŋkpɛɛ lɛ mli.

Nine ni Nyɛɔ Shi

Yɛ bei komɛi amli lɛ, yɛ henɔkwɛmɔ jogbaŋŋ lɛ fɛɛ sɛɛ lɛ, Kristofonyo ko bafeɔ mɔ ni nyɛɛɛ awo enyɔmɔ lɛ. Esa akɛ Mla Kpakpa lɛ atsirɛ lɛ koni ekɛ mɔ ni fa lɛ shika lɛ agba he sane be fɛɛ be. Ekolɛ nyɔmɔwoo lɛ baafee bibii yɛ be ko mli. Ni kɛlɛ, esaaa akɛ Kristofonyo lɛ nuɔ he akɛ shika bibii ni ewoɔ lɛ haa eyeɔ ehe koni ekamia ehiɛ ni etsu egbɛnaa nii ahe nii. (Lala 15:⁠4) Gbɛnaa nii ka mɔ ni kɛ shika faa ni eji Kristofonyo lɛ nɔ akɛ ejie suɔmɔ kpo. Kɛji akɛ enuɔ he akɛ ashishiu lɛ lɛ, ebaanyɛ ekɛ ŋaawoo ni yɔɔ Mateo 18:​15-17 lɛ atsu nii.

Saneyeli he ni akɛ sane nɛɛ aaaya taakɛ eji yɛ Pedro sane lɛ ni atsi ta kɛjɛ shishijee lɛ mli lɛ efeŋ nɔ ni aaawo he ŋaa. Bɔfo Paulo kɛɛ: “Nto kɛ nyɛteŋ mɔ ko kɛ enaanyo na sane ko lɛ, ejeɔ gbɛ ekɛ lɛ yayeɔ sane yɛ mɛi ni jaaa Nyɔŋmɔ lɛ aŋɔɔ, shi ekɛlɛ eyaaa mɛi krɔŋkrɔŋi lɛ aŋɔɔ? . . . Aso bɔ ni ji nɛɛ, akɛ nilelɔ kome folo bɛ nyɛteŋ, mɔ ni aaanyɛ enyɛmimɛi ateŋ ekojo? Shi moŋ mɔ kɛ enyɛmi yaa kojomɔ he yɛ mɛi ni heee yeee lɛ aŋɔɔ po? Enɛ lɛ nyɛto kpa momo, akɛni nyɛkɛ nyɛhe yeyeɔ saji saji lɛ. Mɛɛba nyɛhaaa aye nyɛ amim moŋ? Mɛɛba nyɛhaaa ashishiu nyɛ moŋ?”​—1 Korintobii 6:​1-7.

Shihilɛi komɛi baanyɛ ahi shi​—tamɔ nitsumɔ mli hefatalɔi ni heee yeee, je lɛŋ bii ni haa mɔ guɔyeli nibii, loo inshurans he saji​—ni tamɔ nɔ ni ebiɔ ni atsu enɛ he nii yɛ saneyeli he loo kɛtsɔ nɔyeli lɛ najiaŋdamɔlɔi komɛi anɔ. Shi yɛ saji lɛ titri mli lɛ, Kristofonyo lɛ baasumɔ ni elaaje shika ko moŋ fe ni eeegbe asafo lɛ he guɔ kɛtsɔ saneyeli he ni ekɛ enyɛmi aaaya yɛ shika ni efa ni enyɛɛɛ ewo hewɔ lɛ nɔ.

Abaanyɛ akwa shihilɛi ni mli wawai yɛ saji lɛ babaoo mli. Yɛ mɛɛ gbɛ nɔ? Dani okɛ shika aaafa nyɛmi loo ooofa shika yɛ nyɛmi ko dɛŋ lɛ, ha ohiɛ ahi naagbai ni yɔɔ mli lɛ nɔ. Okɛ henɔkwɛmɔ jogbaŋŋ kɛ nilee atsu nii. Nɔ ni fe fɛɛ lɛ, “nyɛfea nyɛnii fɛɛ” ni nitsumɔ mli saji fɛɛ fata he lɛ “yɛ suɔmɔ mli.”​—1 Korintobii 16:⁠14.

[Shishigbɛ niŋmai]