Kristo Nyɛɔ Mlakwamɔ—Ani Ofeɔ Nakai?
“Osumɔɔ jalɛ, ni onyɛɔ mlakwamɔ. No hewɔ ni Nyɔŋmɔ, ni ji o-Nyɔŋmɔ lɛ kɛ mliflimɔ mu fɔo fe ohefatalɔi lɛ.”—HEBRIBII 1:9, New World Translation
1. Yɛ jalɛnifeemɔ ni wɔɔsumɔ lɛ sɛɛ lɛ, mɛni hu ataoɔ yɛ Yehowa Nyɔŋmɔ anɔkwa tsuji fɛɛ adɛŋ?
YEHOWA tsuji anɔkwafoi fɛɛ sumɔɔ lɛ kɛ amɛtsui, susuma, jwɛŋmɔ, kɛ hewalɛ fɛɛ. (Marko 12:30) Amɛmiisumɔ ni amɛha Yehowa tsui anyɔ emli kɛtsɔ emuuyeli mli ni amɛaahiɛ nɔ. (Abɛi 27:11) Dani amɛaafee nakai lɛ, jeee akɛ esa akɛ amɛsumɔ jalɛ nifeemɔ kɛkɛ, shi esa akɛ amɛnyɛ mlakwamɔ hu. Amɛ Nɔkwɛlɔ, Yesu Kristo hu fee nakai nɔŋŋ. Ni awie yɛ ehe akɛ: “Osumɔɔ jalɛ, ni onyɛɔ mlakwamɔ.”—Hebribii 1:9, NW.
2. Mɛni fata mlakwamɔ he?
2 Mɛni ji mlakwamɔ? Eji esha, taakɛ bɔfo Yohane tsɔɔ beni eŋma akɛ: “Mɔ fɛɛ mɔ ni feɔ esha lɛ, eefee mlatɔmɔ nii hu; ni esha lɛ mlatɔmɔ ni.” (1 Yohane 3:4) Mɔ ni ji mlatɔlɔ lɛ, “mla etsiii enaa loo ekudɔɔɔ lɛ.” (Webster’s Ninth New Collegiate Dictionary) Nɔ ni fata mlakwamɔ he ji nɔ fɛɛ nɔ ni ehiii, efɔŋ, nɔ ni bɛ jeŋba, nɔ ni efite, ni yeee anɔkwa. Kɛ akwɛ je lɛ mli lɛ, anaa akɛ mlakwamɔ egbɛ eshwa waa fe be fɛɛ ni eho. Ŋwanejee ko bɛ he akɛ “jaramɔ bei” ni bɔfo Paulo gba fɔ shi yɛ 2 Timoteo 3:1-5 lɛ mli wɔyɔɔ nɛɛ. Yɛ mlakwamɔ nɛɛ fɛɛ hewɔ lɛ, kwɛ bɔ ni ehi jogbaŋŋ akɛ aaafa wɔ akɛ wɔnyɛ efɔŋ fɛɛ efɔŋ! Akɛ nɔkwɛmɔ nɔ lɛ, akɛɔ wɔ akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ!” (Lala 97:10) Nakai nɔŋŋ wɔkaneɔ akɛ: “Nyɛnyɛa nɔ fɔŋ, ni nyɛsumɔa nɔ kpakpa.”—Amos 5:15.
Nyɛɛ Sɔrɔtoi Etɛ Lɛ
3-5. Mɛɛ gbɛi sɔrɔtoi etɛ nɔ akɛ wiemɔ “nyɛɛ” etsu nii yɛ Nyɔŋmɔ Wiemɔ lɛ mli?
3 Ákɛ anyɛ nɔ ko lɛ tsɔɔ mɛni? Akɛ ‘nyɛɛ’ tsuɔ nii yɛ gbɛi sɔrɔtoi etɛ nɔ yɛ Nyɔŋmɔ Wiemɔ lɛ mli. Nyɛ̃ɛ ni hetsɛ̃ kanyaa lɛ ni taoɔ ni eye nɔ ni enyɛ̃ɔ lɛ awui lɛ yɛ. Esa akɛ Kristofoi akwa nyɛ̃ɛ ni tamɔ nɛkɛ. No kanya Kain ni egbe enyɛmi Habel jalɔ lɛ. (1 Yohane 3:12) Enɛ hu ji nyɛ̃ɛ ni jamɔ mli hiɛnyiɛlɔi lɛ yɔɔ kɛha Yesu Kristo lɛ.—Mateo 26:3, 4.
4 Agbɛnɛ hu, akɛ wiemɔ “nyɛ̃ɛ” lɛ tsuɔ nii yɛ Ŋmalɛi lɛ amli kɛ shishinumɔ ni tsɔɔ suɔmɔ ni faaa tsɔ. Akɛ nɔkwɛmɔ nɔ lɛ, Yesu kɛɛ: “Kɛji mɔ ko miiba miŋɔɔ ni enyɛɛɛ etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei kɛ lɛ diɛŋtsɛ esusuma hu tete lɛ, enyɛŋ etsɔ mikaselɔ.” (Luka 14:26) Eka shi faŋŋ akɛ Yesu miitsɔɔ kɛkɛ akɛ suɔmɔ ni wɔyɔɔ kɛha mɛnɛɛmɛi lɛ akafa fe suɔmɔ ni wɔyɔɔ kɛha lɛ lɛ. Yakob ‘nyɛɔ Lea,’ shi nɔ ni no tsɔɔ kɛkɛ ji akɛ esumɔɔ Rahel fe bɔ ni esumɔɔ lɛ.—1 Mose 29:30, 31.
5 Agbɛnɛ wiemɔ “nyɛ̃ɛ” ni wɔsusuɔ he titri yɛ biɛ lɛ shishinumɔ hu yɛ. Jwɛŋmɔ ni yɔɔ enɛ sɛɛ lɛ tsɔɔ bɔ ni asumɔɔɔ mɔ ko loo nɔ ko kwraa loo ahiɔ mɔ ko jogbaŋŋ ha akɛ wɔsumɔɔɔ ni wɔkɛ mɔ lɛ loo nii lɛ naa nɔ ko feemɔ kwraa. Awieɔ enɛ he yɛ Lala 139 akɛ “nyɛ̃ɛ kpakpa.” David kɛɛ yɛ jɛmɛ akɛ: “Yehowa, aso mɛi ni nyɛ̃ɔo lɛ mikanyɛ amɛ? Mɛi ni teɔ shi woɔo lɛ, mikanyɛ amɛ? Minyɛ̃ɔ amɛ nyɛ̃ɛ kpakpa, ni mibuɔ amɛ mihenyɛlɔi.”—Lala 139:21, 22.
Nɔ Hewɔ ni Esa akɛ Wɔnyɛ Mlakwamɔ
6, 7. (a) Mɛni hewɔ titri esa akɛ wɔnyɛ mlakwamɔ lɛ? (b) Mɛni ji yiŋtoo ni ji enyɔ ni mli wa ni no hewɔ esa akɛ wɔnyɛ mlakwamɔ lɛ?
6 Mɛni hewɔ esa akɛ wɔnyɛ mlakwamɔ? Yiŋtoo lɛ ekome ji ni wɔna bulɛ wɔha wɔhe kɛ henilee kpakpa. Nɛkɛ gbɛ nɔ pɛ wɔɔtsɔ wɔna wɔkɛ Yehowa, wɔ ŋwɛi Tsɛ ni yɔɔ suɔmɔ ni ja lɛ teŋ wekukpaa kpakpa. David to okadi kpakpa efɔ shi yɛ enɛ gbɛfaŋ, taakɛ wɔbaanyɛ wɔna kɛtsɔ Lala 26 kanemɔ nɔ lɛ. Akɛ nɔkwɛmɔ nɔ lɛ, ekɛɛ: “Minyɛ̃ɔ efɔŋfeelɔi agwabɔɔ lɛ, ni mikɛ mɛi fɔji hu taraaa shi.” (Lala 26:5) Esa akɛ suɔmɔ ni wɔyɔɔ kɛha Nyɔŋmɔ kɛ jalɛnifeemɔ lɛ akanya wɔ ni wɔna jalɛ mlifu —hɛɛ, nyɛ̃ɛ—kɛha nibii fɛɛ ni ejaaa ni mla eŋmɛɛɛ gbɛ yɛ ehiɛ, ni mɛi ni booo Yehowa toi ni amɛnyɛ̃ɔ lɛ lɛ amlakwamɔ nifeemɔi lɛ hu fata he. Agbɛnɛ hu, esa akɛ wɔnyɛ mlakwamɔ yɛ ahorabɔɔ ni ekɛbaa Nyɔŋmɔ gbɛi lɛ nɔ lɛ hewɔ.
7 Yiŋtoo kroko hewɔ ni esa akɛ Yehowa webii anyɛ efɔŋ ji akɛ eyɛ oshara ni eyeɔ awui waa. Mɛni baajɛ nii ni wɔduɔ yɛ heloo naa, ni ji akɛ mlakwamɔ ni wɔduɔ lɛ mli aba? Paulo bɔ kɔkɔ akɛ: “Nyɛkalakaa nyɛhe: Nyɔŋmɔ lɛ aliii lɛ yaka. Ejaakɛ nɔ pɛ ni gbɔmɔ duɔ lɛ, no nɔŋŋ ebaakpa hu. Ejaakɛ mɔ ni duɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni duɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.” (Galatabii 6:7, 8) No hewɔ lɛ esaaa akɛ wɔkɛ mlakwamɔ naa nɔ ko feemɔ kwraa. Yɛ anɔkwale mli lɛ, ehe miihia ni wɔnyɛ mlakwamɔ fɛɛ yɛ wɔ diɛŋtsɛ wɔhilɛ kɛ jwɛŋmɔŋ toiŋjɔlɛnamɔ hewɔ.
Mɛi ni Nyɛɔ Mlakwamɔ Lɛ
8. Namɔ to okadi ni hi fe fɛɛ efɔ shi yɛ mlakwamɔ ni anyɛɔ lɛ mli, ni mɛɛ ŋmalɛi tsɔɔ enɛ?
8 Nyɔŋmɔ toɔ okadi kpakpa ni hi fe fɛɛ efɔɔ shi ehaa bɔɔ nii fɛɛ ni yɔɔ nilee yɛ mlakwamɔ ni aaanyɛ lɛ mli. Emli woɔ la ewoɔ mlakwamɔ yɛ gbɛ ni ja nɔ, ni e-Wiemɔ lɛ kɛɔ akɛ: “Nibii ekpaa Yehowa nyɛ̃ɔ, ni nɔ ni ji kpawo lɛ ji enihii nii: hewoo hiŋmɛii, apasa lilɛi, kɛ niji ni shwieɔ la ni eye bem shi, tsui ni shwieɔ eyiŋ jwɛŋmɔi fɔji, naji ni he yɔɔ oya kɛ foijee kɛ efɔŋ mli yaa, amale odaseyelɔ ni foɔ sane etãa, kɛ mɔ ni woɔ nyɛmimɛi ateŋ bei.” Wɔ kaneɔ hu akɛ: “Yehowa gbeyeishemɔ ji akɛ anyɛ efɔŋ; hewoo kɛ hetsɔɔmɔ kɛ jeŋba fɔŋ kɛ kutumpɔo naabu lɛ, miinyɛ.” (Abɛi 6:16-19; 8:13) Agbɛnɛ akɛɔ wɔ akɛ: “Shi mi Yehowa lɛ, misumɔɔ jalɛ saneyeli, minyɛ̃ɔ ojotswaa kɛ nɔshafeemɔ.”—Yesaia 61:8.
9, 10. Mɛɛ gbɛ nɔ Yesu tsɔɔ yɛ akɛ enyɛɔ mlakwamɔ?
9 Yesu Kristo kase e-Tsɛ lɛ yɛ mlakwamɔ ni enyɛ̃ɔ lɛ mli. No hewɔ lɛ wɔkaneɔ akɛ: “Osumɔɔ jalɛ ni onyɛɔ efɔŋfeemɔ; hewɔ lɛ Nyɔŋmɔ ni ji o-Nyɔŋmɔ lɛ kɛ mlifilimɔ mu lɛ efɔo fe onanemɛi lɛ.” (Hebribii 1:9) Yesu to okadi efɔ shi eha wɔ yɛ nɛkɛ nyɛ̃ɛ nɛɛ mli. Etsɔɔ bɔ ni enyɛɔ mlakwamɔ ha lɛ kɛtsɔ mɛi ni jeɔ gbɛ amɛtsuɔ enɛ he nii lɛ—apasa jamɔ mli hiɛnyiɛlɔi lɛ, ahe mama ni ekpa nɔ. Ewie eshi amɛ shii abɔ akɛ osatofoi. (Mateo, yitso 23) Yesu kɛɛ amɛ yɛ be kroko hu mli akɛ: “Nyɛ lɛ, nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.” (Yohane 8:44) Yesu jie bɔ ni enyɛɔ mlakwamɔ ha lɛ kpo kɛyashɛ he ni ekɛ egbɔmɔtsoŋ hewalɛ diɛŋtsɛ po wo mli, shii enyɔ ni ekɛshwie jamɔ mli osatofoi hiɛjoolɔi lɛ kɛjɛ sɔlemɔwe lɛ.—Mateo 21:12, 13; Yohane 2:13-17.
10 Yesu tsɔɔ bɔ ni enyɛ̃ɔ mlakwamɔ kɛ eshafeemɔ ha lɛ kɛtsɔ ehe ni etsi kɛjɛ he kwraa lɛ nɔ. No hewɔ lɛ, ebaanyɛ ebi mɛi ni teɔ shi woɔ lɛ lɛ akɛ: “Nyɛteŋ namɔ buɔ mi fɔ yɛ eshafeemɔ ko he?” (Yohane 8:46, NW) Yesu “he tse, ni efɔŋ ko bɛ ehe, ni ehe bɛ kpa ko, ni etse ehe kɛjɛ eshafeelɔi ahe.” (Hebribii 7:26) Yɛ be mli ni Petro maa enɛ nɔ mi lɛ, eŋma akɛ, Yesu “efeee esha ni anaaa apasa yɛ edaaŋ.”—1 Petro 2:22.
11. Mɛɛ Ŋmalɛ mli nɔkwɛmɔ nii wɔyɔɔ ni tsɔɔ adesai ni yeee emuu ni nyɛɔ mlakwamɔ?
11 Shi Yesu ji gbɔmɔ ni yeɔ emuu. Ani wɔyɛ Ŋmalɛ mli nɔkwɛmɔ nii ni kɔɔ adesai ni yeee emuu ni na nyɛɛ diɛŋtsɛ amɛha mlakwamɔ lɛ ahe? Wɔyɛ eko diɛŋtsɛ! Akɛ nɔkwɛmɔ nɔ lɛ, Mose kɛ enanemɛi Levibii lɛ na nyɛɛ kpele amɛha wɔŋjamɔ kɛtsɔ wɔŋjalɔi 3,000 ni amɛgbe amɛ yɛ Yehowa famɔ naa lɛ nɔ. (2 Mose 32:27, 28) Pinehas jie bɔ ni enyɛɔ mlakwamɔ waa lɛ kpo kɛtsɔ akpɔlɔ ni ekɛgbe ajwamaŋbɔlɔi enyɔ lɛ nɔ.—4 Mose 26:7, 8.
Nyɛɛ ni Ayɔɔ Kɛha Mlakwamɔ lɛ Kpojiemɔ
12. (a) Mɛɛ gbɛ nɔ wɔɔtsɔ wɔjie mlakwamɔ ni wɔnyɛɔ lɛ kpo wɔtsɔɔ yɛ? (b) Mɛni ji gbɛi komɛi ni wɔɔtsɔ nɔ wɔkwa mlakwamɔ susumɔi?
12 Kɛ wɔba wɔbe nɛɛ mli hu lɛ, te wɔɔfee tɛŋŋ wɔjie nyɛɛ ni wɔyɔɔ kɛha mlakwamɔ lɛ kpo? Kɛtsɔ wɔsusumɔi, wiemɔi kɛ nifeemɔi ni wɔɔkudɔ loo wɔye nɔ lɛ nɔ. Ehe miihia ni wɔna su ni kɔɔ nibii ni tswaa mɔ emaa shi lɛ ahesusumɔ yɛ be mli ni nɔ ko pɔtɛɛ bɛ wɔjwɛŋmɔŋ ni wɔsusuɔ he lɛ ahe. Kɛ wɔhiɛ tsɛ̃ nyɔɔŋ lɛ, eeenyɛ eba akɛ wɔbaasusu nibii ni ejaaa he, ekolɛ mlifu ko ni ka shi lɛ hesusumɔ loo ni wɔkɛ wɔhe aaawo bɔlɛnamɔ mli akɔnɔi komɛi ahesusumɔ mli. Kaaŋmɛ nibii ni tamɔ nɛkɛ gbɛ, shi moŋ okɛ ohe awo susumɔi ni sɛɛnamɔ yɔɔ he lɛ amli. Akɛ nɔkwɛmɔ nɔ lɛ, bɔɔ mɔdɛŋ ni okase ŋmalɛi, miishɛɛi sɔrɔtoi nɛɛhu lɛ kɛ mumɔ lɛ yibii nɛɛhu lɛ owo oyitsoŋ. (Mateo 5:3-12; Galatabii 5:22, 23) Ani obaanyɛ otsi bɔfoi nyɔŋma kɛ enyɔ lɛ agbɛi ata? Ani ole Kitai Nyɔŋma lɛ? Mɛɛ asafoi kpawo aŋmala woji ayaha amɛ yɛ Kpojiemɔ lɛ? Maŋtsɛyeli Lalai ni wɔɔkase wɔwo wɔyitsoŋ lɛ hu haa wɔjwɛŋmɔ hiɔ nibii ni ji anɔkwale, nibii ni adɔɔ he, ni ja, ni he tse, ni asumɔɔ, ni yɔɔ gbɛi kpakpa, kɛ jeŋba kpakpa, kɛ yijiemɔ nɔ.—Filipibii 4:8.
13. Ni wɔɔnyɛ mlakwamɔ lɛ baaha wɔnyɛ mɛɛ wiemɔ nɛkɛ?
13 Agbɛnɛ wɔtsɔɔ akɛ wɔnyɛɔ mlakwamɔ kɛtsɔ wiemɔ sha fɛɛ wiemɔ sha ni wɔɔtsi wɔhe kɛaaje he lɛ nɔ. Jɛ lɛŋ bii pii nyaa yakayaka fɛoyelii atoiboo kɛ wiemɔ he, shi esaaa akɛ Kristofoi sumɔɔ akɛ amɛaabo toi po. Shi moŋ esa akɛ wɔtsi wɔhe kɛjɛ he ni wɔkwa wɔhe ni wɔkɛaawo sanegbaa ko ni baa shi nɛkɛ mli. Kɛ wɔnyɛɛɛ wɔshi jɛmɛ lɛ, kɛ hoo lɛ esa akɛ wɔkɛ wɔhiɛ atsɔɔ akɛ wɔnyɛɔ wiemɔ ni tamɔ nɛkɛ. Ehe miihia ni wɔbo ŋaawoo fɛfɛo nɛɛ toi: “Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi, ni akɛduro mɛi ni nuɔ lɛ.” (Efesobii 4:29) Esaaa akɛ wɔbuleɔ wɔhe kɛtsɔɔ wiemɔi ni he tseee lɛ wiemɔ loo etoiboo nɔ.
14. Mlakwamɔ ni wɔnyɛɔ lɛ baabu wɔhe kɛjɛ mɛɛ nitsumɔ kɛ nitsumɔ mli nifeemɔi ahe?
14 Esa akɛ wɔkudɔ bɔ ni wɔnyɛɔ mlakwamɔ wɔhaa lɛ hu wɔshi eshafeemɔ sui fɛɛ. Mlakwamɔ ni wɔnyɛɔ lɛ hu baaye abua wɔ ni wɔje kaa ni aaaha wɔŋmɛɛ saji ahe ni wɔkɛsaa lɛ hu mli. Anɔkwa Kristofoi kɛ esha efeee amɛsubaŋ. (Okɛto 1 Yohane 5:18 he.) Akɛ nɔkwɛmɔ nɔ lɛ, esa akɛ wɔnyɛ nitsumɔ mli nifeemɔi ni etsɔɔɔ anɔkwayeli lɛ fɛɛ. Ŋmɛnɛ, anyɛ Yehowa Odasefoi ateŋ mɛi pii anɔ koni amɛfee nibii ni tsɔɔ anɔkwa ni ayeee amɛha amɛ nitsumɔtsɛmɛi, shi amɛkpoo nakai feemɔ. Kristofoi miisumɔ po ni amɛnitsumɔ aje amɛdɛŋ fe ni amɛaafee nɔ ko ni baafite amɛhenilee ni Biblia etsɔse lɛ lɛ. Agbɛnɛ hu, wɔmiisumɔ ni wɔtsɔɔ bɔ ni wɔnyɛɔ mlakwamɔ wɔhaa lɛ kɛtsɔ gbɛjegbɛi anɔ mlai ni wɔkuŋ mli kɛ shishiumɔ ni wɔkɛ wɔhe woŋ mli beni esa akɛ wɔwo too loo nihemɔ he too ko lɛ nɔ.—Bɔfoi lɛ Asaji 23:1; Hebribii 13:18.
Bɔlɛnamɔ he Mujianii ni Wɔɔnyɛ
15. Adesai ni abɔ amɛ kɛ henumɔŋ tsakpaai ni mli wa lɛ tsu mɛɛ yiŋtoi kpakpai komɛi ahe nii?
15 Akɛ Kristofoi lɛ, esa akɛ wɔje gbɛ wɔnyɛ mujianii fɛɛ ni kɔɔ bɔlɛnamɔ he. Nyɔŋmɔ tsu yiŋtoi kpakpai enyɔ ko he nii kɛtsɔ henumɔ ni mli wa ni haa akɛ he kpɛtɛɔ mɔ ni ebɔ ewo adesa mli lɛ nɔ. Ekwɛ koni adesai aweku lɛ shishi akabule, ni eto miishɛɛnamɔ he gbɛjianɔ ni suɔmɔ yɔɔ mli hu. Gbɔmɛi ohiafoi, mɛi ni leee woloŋ, loo mɛi ni nibii komɛi eje amɛdɛŋ yɛ gbɛ kroko ko nɔ lɛ po baanyɛ ana miishɛɛ babaoo yɛ gbalashihilɛ wekukpaa mli. Shi Yehowa efo husui ewo he ni abaanyɛ ana wekukpaa nɛɛ mli miishɛɛ kɛyata lɛ he. Esa akɛ akɛ bulɛ aha husui ni ajɛ ŋwɛi atsɔɔ nɛɛ.—1 Mose 2:24; Hebribii 13:4.
16. Mɛni esa akɛ efee wɔsubaŋ yɛ bɔlɛnamɔ mli hiɛtserɛjiemɔi kɛ nifeemɔi ni he tseee lɛ ahe?
16 Kɛji akɛ wɔnyɛɔ mlakwamɔ lɛ, wɔkɛ hiɛdɔɔ baakwa bɔlɛnamɔ mli nifeemɔi ni he tseee lɛ kɛ hiɛtserɛjiemɔ ni ekpɔtɔ lɛ fɛɛ. No hewɔ lɛ, wɔbaatsi wɔhe kɛjɛ woji wuji, woji tɛtrɛbii, kɛ adafitswaa woji ni fiteɔ jeŋba lɛ fɛɛ akanemɔ he. Nakai nɔŋŋ hu kɛji akɛ wɔnyɛɔ mlakwamɔ lɛ, wɔkwɛŋ nibii ni wɔnaa ni he tseee lɛ, kɛ yɛ televishin nɔ loo sini mli, aloo yɛ shwɛmɔ he ko. Kɛ wɔna akɛ aajie nɔ ko yɛ televishin lɛ nɔ ni baafite mɔ jeŋba lɛ, esa akɛ wɔhe afee oya ni wɔgbe televishin lɛ amrɔ nɔŋŋ aloo esa akɛ wɔna ekãa ni wɔshi he ni ajieɔ loo afeɔ nɔ ko ni tamɔ nɛkɛ yɛ lɛ. Nakai nɔŋŋ hu mlakwamɔ ni wɔnyɛɔ lɛ baaha wɔkwa lalai ni teeɔ mɔ henumɔi ashi kɛtsɔɔ emli wiemɔi loo bɔ ni egbɛɛɔ ehaa lɛ nɔ. Wɔsumɔŋ akɛ wɔɔna saji ni fiteɔ jeŋba lɛ he nilee ko, shi moŋ ‘wɔbaatsɔmɔ gbekɛbii yɛ efɔŋ gbɛfaŋ, ni kɛlɛ mɛi ni edara yɛ amɛshishinumɔ nyɛmɔŋ.’—1 Korintobii 14:20.
17. Mɛɛ ŋaawoo ni Kolosebii 3:5 kɛhaa baanyɛ aye bua wɔ ni wɔhi shi akɛ mɛi ni jeŋba he tse?
17 Awoɔ wɔ ŋaa yɛ gbɛ ni sa jogbaŋŋ nɔ akɛ: “Nyɛgbea nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, mlila, akɔnɔ fɔŋ.” (Kolosebii 3:5) Ŋwanejee ko bɛ he akɛ, ehe miihia ni wɔtsɔ gbɛ ni yɔɔ keketee nɔ wɔto gbɛjianɔ wɔha wɔhe kɛ wɔɔya nɔ wɔtswa wɔfai shi akɛ wɔɔhi shi yɛ jeŋba ni he tse mli. The Expositor’s Bible Commentary lɛ wie yɛ Hela feemɔ wiemɔ, “nyɛgbea” ni yɔɔ Kolosebii 3:5 lɛ he akɛ: “Etsɔɔ akɛ jeee akɛ wɔbaanyɛ loo wɔye nifeemɔi kɛ subaŋi fɔji anɔ kɛkɛ. Esa akɛ wɔtsumɔ loo wɔjie shihilɛ gbɛ momo lɛ kɛya kwraa. ‘Akpata hiɛ kwraa’ baanyɛ atsɔɔ hewalɛ ni yɔɔ mli lɛ mli jogbaŋŋ. . . . Feemɔ wiemɔ lɛ shishinumɔ kɛ hewalɛ ni yɔɔ gbee ni akɛwie lɛ mli lɛ tsɔɔ mɔ diɛŋtsɛ nifeemɔ kɛ faishitswaa kɛ hewalɛ ni piŋmɔ yɔɔ mli.” No hewɔ lɛ, esa akɛ wɔkwa bɔlɛnamɔ he mfonirii loo woji akɛ nii ni oshara yɔɔ he, nɔ ko ni tsɛŋeɔ mɔ, hela ni kɛ gbele baa, ejaakɛ nakai eji yɛ jeŋba kɛ mumɔŋ fɛɛ. Kristo wie nɔ ko ni tamɔ nakai nɔŋŋ beni ekɛɛ akɛ afo nine, loo nane, loo afa hiŋmɛi po ashɛ afɔ kɛ eetɔtɔ mɔ ko nane lɛ.—Marko 9:43-48.
Ni Wɔɔnyɛ Apasa Jamɔ kɛ Hemɔkɛyeli Kwamɔ
18. Mɛɛ gbɛ nɔ wɔɔtsɔ wɔjie bɔ ni wɔnyɛɔ jamɔ mli mlakwamɔ lɛ kpo yɛ?
18 Agbɛnɛ hu, taakɛ Yesu jie bɔ ni enyɛɔ mlakwamɔ kpo kɛtsɔ Nyɔŋmɔ jalɔi osatofoi lɛ ahe mama ni ekpa lɛ nɔ lɛ, nakai nɔŋŋ hu ŋmɛnɛ Yehowa Odasefoi miijie bɔ ni amɛnyɛɔ jamɔ mli mlakwamɔ yɛ osatofeemɔ mli ha lɛ fɛɛ kpo. Yɛ mɛɛ gbɛ nɔ? Kɛtsɔ Biblia kasemɔ he woji ni amɛjaa ni kpaa Babilon Kpeteŋkpele lɛ he mama lɛ nɔ koni ana bɔ ni eji diɛŋtsɛ, jamɔŋ ajwamaŋ. Kɛ wɔnyɛɔ osato jamɔŋ mlakwamɔ diɛŋtsɛ lɛ, wɔbaafee shiŋŋ yɛ Babilon Kpeteŋkpele lɛ, jeŋ apasa jamɔ maŋtsɛyeli lɛ he mama kpamɔ lɛ mli. Wɔbaafee nakai yɛ gbɔmɛi ni yɔɔ tsuijurɔ ni eshwila amɛhiŋmɛii ni eha amɛhi mumɔŋ nyɔŋyeli mli lɛ hewɔ. Bɔ ni wɔnyɛɔ Babilon Kpeteŋkpele lɛ mlakwamɔ lɛ babaoo lɛ, nakai nɔŋŋ hu wɔkɛ wɔhe baawo Maŋtsɛyeli sɔɔmɔ lɛ he nibii sɔrɔtoi lɛ fɛɛ mli kɛ ekaa babaoo.—Mateo 15:1-3, 7-9; Tito 2:13, 14; Kpojiemɔ 18:1-5.
19. Te esa akɛ wɔsusu hemɔkɛyeli kwalɔi ahe wɔha tɛŋŋ, ni mɛni hewɔ?
19 Gbɛnaa nii akɛ wɔnyɛ mlakwamɔ lɛ hu kɔɔ hemɔkɛyeli kwalɔi anifeemɔi fɛɛ he. Esa akɛ su ni wɔhiɛ yɛ hemɔkɛyeli kwalɔi ahe lɛ atamɔ David nɔ lɛ, mɔ ni kɛɛ akɛ: “Yehowa, aso mɛi ni nyɛɔo lɛ, mikanyɛ amɛ? Mɛi ni teɔ shi woɔo lɛ mikanyaŋe amɛ? Minyɛɔ amɛ nyɛɛ kpakpa, ni mibuɔ amɛ mihenyɛlɔi.” (Lala 139:21, 22) Ŋmɛnɛŋmɛnɛ beaŋ hemɔkɛyeli kwalɔi lɛ eyafata “mlakwamɔ gbɔmɔ lɛ” ni ji Kristendom osɔfoi lɛ ahe. (2 Tesalonikabii 2:3) Akɛ Yehowa Odasefoi anɔkwafoi lɛ, wɔkɛ amɛ bɛ nɔ ko nɔ ko feemɔ. Akɛni wɔyeee emuu hewɔ lɛ, wɔtsuii baanyɛ awie ashi wɔnyɛmimɛi lɛ yɛ gbɛ ni waaa kwraa nɔ. Akɛ aŋkroaŋkroi lɛ, gbɔmɛi ni yeee emuu feɔ “tsulɔ anɔkwafo kɛ nilelɔ” lɛ. (Mateo 24:45-47) Shi kuu nɛɛ yeɔ anɔkwa ni amɛji nilelɔi. Hemɔkɛyeli kwalɔi maa nyɛmimɛi ni nyiɛɔ asafo lɛ hiɛ lɛ afatɔɔi loo nɔ ni tamɔ tɔmɔi anɔ mi. Nɔ ni baaha wɔhi shi shweshweeshwe ji ni wɔkwa hemɔkɛyeli kwalɔi alakamɔ wiemɔi ni tamɔ ebɔɔ, ni yɛ anɔkwayeli mli lɛ nakai eji hu lɛ.—Romabii 16:17, 18.
20, 21. Te aaamu yiŋtoi ahewɔ ni anyɛɔ mlakwamɔ lɛ naa aha tɛŋŋ?
20 Wɔna akɛ mlakwamɔ eyi je lɛ mli obɔ, ni enɛ kɛ esha nyiɛ. Efaaa pɛ kɛkɛ akɛ wɔɔsumɔ jalɛnifeemɔ; esa akɛ wɔnyɛ mlakwamɔ hu. Mɛi ni ashwie amɛ kɛjɛ Kristofoi asafo lɛ mli lɛ ateŋ mɛi komɛi susu akɛ amɛsumɔɔ jalɛ-nifeemɔ, shi amɛnaaa nyɛɛ babaoo amɛhaaa mlakwamɔ. Wɔna nɔ hewɔ ni esa akɛ wɔnyɛ mlakwamɔ lɛ hu. Wɔnyɛŋ wɔna henilee kpakpa kɛ bulɛ kɛha wɔhe akɛ ja wɔfee nakai. Kɛfata he lɛ, mlakwamɔ tsɔɔ anɔkwa ni wɔyeee Yehowa Nyɔŋmɔ. Ni mlakwamɔ haa wɔkpaa yibii ni jooɔ diɛŋtsɛ—amanehulu, jeŋba fitemɔ, kɛ gbele.
21 Wɔna bɔ ni wɔtsɔɔ akɛ wɔnyɛɔ mlakwamɔ lɛ hu. Wɔfeɔ nakai kɛtsɔɔ anɔkwa ni ayeee, bɔlɛnamɔ mli jeŋba shara, loo hemɔkɛyeli kwamɔ ni wɔkɛnaaa nɔ ko nɔ ko feemɔ lɛ nɔ. Akɛni wɔmiisumɔ ni wɔna Yehowa bembuu lɛ mli gbɛfaŋnɔ, ni wɔmiishwe ni wɔha etsui anya hewɔ lɛ, jeee akɛ jalɛnifeemɔ pɛ esa akɛ wɔsumɔ ni wɔfee ekãa yɛ esɔɔmɔ mli, shi esa akɛ wɔnyɛ mlakwamɔ hu, taakɛ wɔ Hiɛnyiɛlɔ kɛ Tatsɛ-Nukpa, Yesu Kristo fee lɛ.
Te Obaaha Hetoo Oha Tɛŋŋ?
◻ Ŋmalɛi lɛ kɛ wiemɔ ni ji “nyɛɛ” tsuɔ nii yɛ mɛɛ gbɛ nɔ?
◻ Mɛni ji yiŋtoo kpakpai komɛi ahewɔ ni esa akɛ wɔnyɛ mlakwamɔ lɛ?
◻ Mɛɛ nɔkwɛmɔ nii kpakpai ni kɔɔ mɛi ni nyɛ mlakwamɔ lɛ ahe lɛ wɔyɔɔ?
◻ Mɛɛ gbɛ nɔ wɔɔtsɔ wɔjie nyɛɛ ni wɔyɔɔ kɛha mlakwamɔ lɛ kpo yɛ?
[Mfoniri ni yɔɔ baafa 8]
Yesu tsuu sɔlemɔwe lɛ he ejaakɛ enyɛɔ mlakwamɔ
[Mfoniri ni yɔɔ baafa 10]
Kɛ wɔnyɛɔ mlakwamɔ lɛ, wɔbaatsi wɔhe kɛjɛ bɔlɛnamɔ mli hiɛtserɛjiemɔi ni fiteɔ jeŋba lɛ he