Wɔhiɛ ni Aaasɔ Nikeenii ni jara Wa ni ji Wala Lɛ

WALA​—mɛɛ nii ni jara wa waa po nɛ! Kɛ wɔbɛ wala lɛ, wɔnyɛŋ nɔ ko kwraa wɔfee. Ni kɛji elaaje lɛ, anyɛŋ atsɔ adesai agbɛ ko kwraa nɔ akɛba dɔŋŋ. Kɛji wɔwala yaje oshara mli lɛ, wɔfeɔ nɔ fɛɛ nɔ ni wɔɔnyɛ, bɔni afee ni wɔkɛbaa yi. Ni bei komɛi po lɛ, mɛi komɛi yataoɔ yelikɛbuamɔ ni fe adesai anɔ yɛ jaramɔ bei amli!

Ehaa wɔkaiɔ Biblia mli sane ko ni ba ni kɔɔ lɛlɛ ko ni kɛ ahum ni naa wa waa kpe yɛ ŋshɔ hiɛ lɛ he lɛ. Beni eheɔ ejwa agbɛnɛ lɛ, “amlakui lɛ she gbeyei, ni mɔ fɛɛ mɔ bolɔ tsɛ enyɔŋmɔ.” Sɛɛ mli lɛ, amɛ fɛɛ amɛbolɔ amɛtsɛ anɔkwa Nyɔŋmɔ lɛ, amɛkɛɛ: “Ao, Yehowa, wɔmiikpao fai, kaaha wɔhiɛ miikpata.” Biblia mli sane lɛ kɛɔ hu akɛ: “Ni amɛjie lɛlɛ lɛ mli nii amɛwo ŋshɔŋ, koni efee flɛflɛ eha amɛ.”​—Yona 1:​4-6, 14; Okɛto Bɔfoi lɛ Asaji 27:​18, 19 he.

Nakai amlakui lɛ efee klalo po akɛ amɛkɛ amɛheloonaa nibii ni amɛsumɔɔ waa lɛ baasha afɔle yɛ mɔdɛŋ ni amɛbɔɔ akɛ amɛaahere amɛyiwala lɛ mli. Wɔbaanyɛ wɔto heloonaa nibii anajiaŋ​—shi jeee wala. Ni akɛni wɔkɛ henumɔ ko buɔ wɔwala akɛ ejara wa waa hewɔ lɛ, ehaa wɔtsiɔ wɔhe kɛjɛɔ oshara he. Wɔyeɔ nii, wɔwoɔ atade, ni wɔkwraa wɔgbɔmɔtsei. Wɔtaoɔ tsofafeemɔ hu kɛ wɔhe miiye.

Shi yɛ fɛɛ sɛɛ lɛ, wala Halɔ lɛ biɔ babaoo yɛ wɔdɛŋ fe wɔhebuu mli henumɔi ni wɔtsuɔ he nii lɛ kɛkɛ. Ejaakɛ, wala ji nikeenii ko ni jara wa waa, ni ejɛ Mɔ ni he hiaa fe fɛɛ yɛ jeŋ muu lɛ fɛɛ mli lɛ diɛŋtsɛ ŋɔɔ. Ani esaaa akɛ wɔjɛɔ anɔkwa hiɛsɔɔ ni wɔyɔɔ kɛha Nihalɔ lɛ kɛ nikeenii lɛ fɛɛ mli wɔbuɔ wala akɛ ejara wa waa? Ni ani bulɛ ni wɔɔna wɔha mɛi krokomɛi awala hu lɛ fataaa enɛ he?

Belɛ, esaaa akɛ efeɔ wɔ naakpɛɛ akɛ nɔ ni fata Mla ni Yehowa Nyɔŋmɔ kɛha Israel maŋ lɛ he hu ji kitai ni ato he gbɛjianɔ koni akɛbaa mɛi krokomɛi awala kɛ hewalɛnamɔ yi. (2 Mose 21:​29; 5 Mose 22:⁠8) Nakai nɔŋŋ esa akɛ Kristofoi ni yɔɔ ŋmɛnɛ lɛ hu ahiɛ ahi amɛhe nɔ yɛ gbɔmɔtsoŋ shweshweeshwe feemɔ he. Akɛ nɔkwɛmɔ nɔ lɛ, kɛji nyɛyɛ gbekɛbii yɛ shia lɛ, ani nyɛkɛ anyagba-feemɔ ŋmɛɔ nibii bibii tamɔ ashinaoi, aklotiai, aloo nibii krokomɛi ni naa ba, ni baanyɛ aye gbekɛ ko awui kɛji ekɛmiishwɛ aloo ekɛwo edaaŋ ni emi lɛ ahe nyɛshwieɔ shi kɛkɛ? Ani akɛ tsofai ni ebɔɔ yɔɔ amɛmli, loo tsofai foji po fɛɛ toɔ he ni gbekɛbii anine shɛŋ nɔ? Kɛji nu shwie shikpɔŋ lɛ, ani ohe feɔ oya ni otsumɔɔ koni okɛtsi oshara ni eeenyɛ ekɛba lɛ naa? Ni kɛji sarawa hewalɛ nibii ni nyɛyɔɔ lɛ fite lɛ, ani oyasaa amrɔ nɔŋŋ? Ani osaa otsɔne he nɔ fɛɛ nɔ be fɛɛ be? Ani okudɔɔ tsɔne kɛ hiɛshikamɔ? Kɛji obuɔ bɔ ni wala jara wa ha lɛ lɛlɛŋ lɛ, no lɛ ebaatsirɛ bo ni otsɔ hiɛ oto nibii ahe ŋaa bɔ ni sa yɛ enɛɛmɛi kɛ nibii krokomɛi ni tamɔ nakai fɛɛ mli.

Shi mɔbɔ sane ji akɛ, mɛi komɛi ebuuu amɛ diɛŋtsɛ amɛwala tete po. Akɛ nɔkwɛmɔ nɔ lɛ, namɔ yɔɔ ŋmɛnɛ ni eleee akɛ zigaret shɛremɔ ehiii haaa gbɔmɔtso lɛ? Ní kɛlɛ, mɛi akpekpei abɔ etsɔmɔ nyɔji amɛha nɛkɛ su nɛɛ, ni be fɛɛ be ni amɛgbalaa nɛkɛ lasu ni ebɔɔ yɔɔ mli nɛɛ amɛwoɔ amɛmli lɛ, belɛ amɛ gbɔmɔtsoŋ hewalɛ nɔ miigbɔ. Mɛi krokomɛi kɛ tsofai tsuɔ nii yɛ gbɛ fɔŋ nɔ, ni mɛi krokomɛi hu, dãa, ni amɛkɛmiiye amɛ diɛŋtsɛ amɛhe awui. AIDS ji hela ko ni miigbe mɛi babaoo, ni anako enaa tsabaa ko. Shi kulɛ mɛi babaoo baanyɛ atsi amɛhe kɛjɛ nakai hela lɛ namɔ he kɛji amɛtsi amɛhe kɛjɛ bɔlɛnamɔ mli jeŋba shara, kɛ tsofai fɔji komɛi kɛ nitsumɔ, kɛ la ni abaagbala awo amɛmli lɛ he. Mɛɛ mɔbɔ sane nɛ, akɛ abɛ hiɛsɔɔ ko kwraa kɛha wala!​—Romabii 1:​26, 27; 2 Korintobii 7:⁠1.

Abaanyɛ Afee Tsakemɔ!

Mɛi ni hiɛ sɔɔ amɛ-Bɔlɔ Kpeteŋkpele, Yehowa lɛ yɛ yiŋtoo ni mli wa ni amɛaadamɔ nɔ amɛbu wala akɛ ejara wa. Wala ji edɛŋ nikeenii ko ni yɔɔ krɔŋkrɔŋ. No hewɔ lɛ amɛsumɔɔ ni amɛfee tsakemɔi fɛɛ ni he hiaa lɛ bɔni afee ni amɛnyɛ amɛbu lɛ akɛ Nyɔŋmɔ dɛŋ nikeenii. Susumɔ Kwaku, ni ji tsɔɔlɔ ko ni jɛ Ghana lɛ niiashikpamɔ nɛɛ he okwɛ. Kulɛ eji mɔ ko ni tɔɔ daa waa, ni ekɛmiikpata ewala hiɛ yakatswaa.

Kwaku kaiɔ akɛ: “Mika akɛ manyɛ miŋa nɔ ni ebu mi, ni bei pii kɛji mitɔ daa lɛ, ekɛ béi shɛii kɛ nɔmɔ tete po baa. Akɛni mikɛ mihe woɔ daatɔɔ nɛɛ mli babaoo hewɔ lɛ, be fɛɛ be nɛɛ, mishika eta, ni bei babaoo ji nɔ ni mikɛshishiuɔ mɛi ni mikɛnaa shika kɛhaa miweku lɛ kwɛmɔ. Shishinumɔ yɛ he akɛ, enɛ haa miŋa mli fuɔ waa diɛŋtsɛ. Be fɛɛ be ni mishika baata (ni efɔɔ baa nakai daa hu) lɛ, mifeɔ nɔ fɛɛ nɔ ni manyɛ ni mikɛtsa daatɔɔ su nɛɛ nɔ. Be ko lɛ, mishɛ shɔŋŋ aahu akɛ miye shika ni mihe kɛjɛ gbekɛbii ni mitsɔɔ amɛ nii lɛ adɛŋ ni mikɛbaaha koni aŋmala amɛgbɛi ni amɛnyɛ amɛfee skulbii akaa lɛ hu. Mikɛ nakai shika lɛ yanu dãa, ni mihe dãa lɛ eko miha mɛi ni mikɛnuɔ daa lɛ hu. Etsɛɛɛ kɛkɛ ni gbi ni mikɛbaabu akɔntaa lɛ bashɛ. Kɛ jeee tsɔɔlɔ nukpa lɛ ni kɛ ehe wo sane lɛ mli mra kulɛ, minitsumɔ fite kwraa.

“Mishihilɛ bafite kwraa. Mihiɛ gbo, shi etsɛɛɛ kɛkɛ mi miye nakai hiɛgbele lɛ nɔ. Kɛkɛ ni mibɔi susumɔ akɛ magbe mi diɛŋtsɛ mihe ejaakɛ minu he akɛ mitsɔ yaka gbɔmɔ yɛ mishihilɛ mli. Shi kɛlɛ, minyɛɛɛ makpa dãa lɛ numɔ hu. Shi gbi ko beni miyatɔ waa yɛ daanumɔ he ko, ni mikɛ mihe wo nɔmɔ ko mli ni atsu mi nɔ ko lɛ, ni ehɛle mi shi kɛ dɔlɛ babaoo akɛ bɔ ni misumɔɔ daanumɔ waa nɛɛ, gbi ko lɛ no nɔŋŋ baagbe mi.

“Nakai beaŋ fɛɛ lɛ, Yehowa Odasefoi fɔɔ wɔshia lɛ baa yɛ be kɛ bei amli, ni amɛmiibɔ mɔdɛŋ ni amɛha wɔna Biblia lɛ he miishɛɛ. Kɛji wɔna akɛ amɛmiiba lɛ, mikɛ miŋa fɛɛ teeɔ amɛ ejaakɛ wɔsusuɔ akɛ amɛbaagba wɔnaa. Shi, gbi ko lɛ, mikpɛ miyiŋ akɛ mana amɛ mɔbɔ ni mabo amɛ toi kɛkɛ. Etsɛɛɛ kɛkɛ ni Biblia lɛ kasemɔ gbele mihiŋmɛii ni mibale naanɔ shihilɛ yɛ Nyɔŋmɔ nibii agbɛjinɔtoo hee lɛ mli lɛ he gbɛkpamɔ ni yɔɔ naakpɛɛ lɛ. Beni miyaa nɔ mikaseɔ Biblia lɛ kɛtsɔ Yehowa Odasefoi ayelikɛbuamɔ nɔ lɛ, belɛ hiɛsɔɔ ni miyɔɔ kɛha Yehowa akɛ wɔ-Wala-Halɔ kɛ agbɛnɛ kɛha enikeenii ni ji wala lɛ hu miiya hiɛ, ni nakai nɔŋŋ mihiɛ basɔ bɔ ni anyɛɔ atsuɔ Biblia lɛ ŋaawoo he nii lɛ hu jogbaŋŋ. Enɛ tee nɔ ewo mi hewalɛ waa koni masaa mishihilɛ. Shi efeemɔ bɛ mlɛo, ejaakɛ esa akɛ maya nɔ mate shi mawo daanumɔ lɛ kɛ minanemɛi ni mikɛyaa tsutsu lɛ hu. Yehowa, sɔlemɔ Toibolɔ lɛ na mitsuiŋ faishitswaa lɛ ni ebo mi toi.a

“Eyɛ mli akɛ miŋa jeee Yahowa Odasefoi ateŋ mɔ ko moŋ, shi amrɔ nɛɛ ebuɔ mi kɛ mijamɔ lɛ waa diɛŋtsɛ yɛ tsakemɔ kpele ni enaa yɛ mishihilɛ kɛ wɔgbalashihilɛ lɛ mli lɛ hewɔ. Ehe ehiaaa ni wɔshia lɛ mlibii lɛ abakpata nɔmɔ ni mikɛ miŋa nɔɔ dɔŋŋ, ejaakɛ wɔkpa nɔmɔ. Mibuɔ jwɛŋmɔŋ toiŋjɔlɛ ni minaa mli ŋɔɔmɔ bianɛ lɛ waa. Eka shi faŋŋ akɛ, kɛji wɔhiɛ sɔ Yehowa Nyɔŋmɔ akɛ wɔ-Wala-Halɔ, ni wɔkpɛlɛ bɔ ni esusuɔ wala jarawalɛ he lɛ nɔ, ni wɔbo gbɛtsɔɔmɔ ni ekɛhaa yɛ bɔ ni esa akɛ wɔhi shi wɔha lɛ toi lɛ, no pɛ baaha wɔshihilɛ afee nɔ ni sɛɛnamɔ yɔɔ he.”

Naanɔ Wala he Hegbɛ ni Nyɔŋmɔ Kɛha Lɛ

Yehowa Odasefoi eye amɛbua mɛi akpei abɔ, tamɔ Kwaku koni ‘amɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.’ (Efesobii 4:24) Jeee amrɔ nɛɛ wala ni amɛyɔɔ mli lɛ kɛkɛ amɛhiɛ ebasɔ, shi moŋ naanɔ wala yɛ shikpɔŋ nɔ paradeiso shihilɛ mli he hiɛnɔkamɔ ni amɛyɔɔ lɛ hu. Biblia lɛ woɔ shi akɛ, shikpɔŋ lɛ nɔ bii lɛ ateŋ mɔ ko ehiŋ hɔmɔ shihilɛ mli dɔŋŋ yɛ nakai Paradeiso ni Nyɔŋmɔ diɛŋtsɛ kɛbaaba lɛ mli, ejaakɛ “Yehowa Zebaot aaaŋmɛ okpɔlɔ . . . aha majimaji fɛɛ, fɔ nii kɛ wein kpakpa, fɔ nii kɛ wuiaŋ fɔ.”​—Yesaia 25:⁠6.

Amrɔ nɛɛ, eyɛ mli akɛ wala ji nikeenii ko ni yɔɔ naakpɛɛ moŋ, shi ehiɔ shi be kukuoo kɛkɛ. Gbele ka mɔ fɛɛ mɔ hiɛ, ni kwɛ bɔ ni gbele yeɔ awui waa ehaa! Ni ookwɛ ni mɔ ko ni osumɔɔ lɛ lɛ aaalaaje kɛjɛ hiɛkalɔi ateŋ kɛyaje gbonyo bu ni mli efee dioo lɛ mli lɛ yɛ awerɛho waa, kɛji wɔɔwie he kuku po kɛkɛ. Shi Yehowa shiwoo nɛɛ baaba mli yɛ Nyɔŋmɔ Maŋtsɛyeli, ni Kristo yeɔ nɔ lɛ shishi akɛ: “Gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”​—Kpojiemɔ 21:⁠4.

Yɛ nakai beaŋ lɛ, abaakpã nikeenii ni ji wala lɛ mli yɛ naakpɛɛ gbɛ nɔ. Mɛi ni baana yiwalaheremɔ kɛtsɔ naagbee amanehulu lɛ mli yɛ shikpɔŋ nɛɛ nɔ lɛ baana hegbɛ amɛbote wala ni yeɔ emuu mli. Kɛkɛ lɛ, Yehowa Nyɔŋmɔ baatsɔ gbohiiashitee, ni ji wala mli ni ekɛ mɛi aaaba ekoŋŋ lɛ nɔ esaa eha mɛi ni ewɔ yɛ gbele mli lɛ enikeenii ni jara waa nɛɛ. (Yohane 5:​24, 28, 29) Enɛ baafee wɔsuɔlɔi kɛ blemabii ni sheɔ Nyɔŋmɔ gbeyei ni amɛgboi lɛ asɛɛkuu kɛbaa ekoŋŋ!

Ani enɛ fɛɛ hi tsɔ fe bɔ ni eeenyɛ efee anɔkwale? Dabi, ejaakɛ “nɔ ko nɔ ko bɛ ni Nyɔŋmɔ nyɛɛɛ afee.”​—Luka 1:​31; Okɛto Hiob 42:2 he.

Kɛfata he lɛ, Yehowa Nyɔŋmɔ diɛŋtsɛ eha adesai sɛɛdaamɔ nɔ ni maa nɔ mi akɛ nɛkɛ nibii nɛɛ fɛɛ baaba mli. Yɛ mɛɛ gbɛ nɔ? Kɛtsɔ mɔ ni etsui sumɔɔ fe fɛɛ, e-Bi koome, Yesu Kristo ni ekɛ lɛ sha afɔle, koni ebakpɔ wɔ kɛjɛ esha kɛ gbele mli lɛ nɔ. Romabii 8:32 maa nɔ mi kɛhaa wɔ akɛ: “Mɔ nɔŋŋ [Yehowa Nyɔŋmɔ] ni kamaaa wɔ lɛ diɛŋtsɛ e-Bi lɛ, shi moŋ eŋɔ lɛ eha yɛ wɔ fɛɛ wɔnajiaŋ lɛ, ani eŋɔŋ nibii fiaa efataŋ he ekeŋ wɔ?” Biblia lɛ kɛɔ wɔ akɛ nɔ ni baafata enɛ he ji adesai ahe ni abaatsuu kɛjɛ jeŋba mli fitemɔ he, kɛ jiemɔ hu ni abaajie jalɛsane ni ayeee, yiwalɛi, kɛ awuiyelii fɛɛ kɛya. (Yesaia 11:⁠9) Ebaŋ lɛ akɛ abaabu wala akɛ nɔ ko ni jara waaa dɔŋŋ.

Amrɔ nɛɛ wala nyɛɔ efeɔ nɔ ni miishɛɛ yɔɔ mli kɛ̃, yɛ shihilɛ ni yeee emuu nɛɛ po shishi. Namɔ yɔɔ ni baakɛɛ akɛ enaaa niyenii ŋmajee he miishɛɛ, kɛ kɔɔyɔɔ ŋanii yɛ latsaa be mli, aloo gɔŋ fɛfɛo ko ni nɔ kwɔ jogbaŋŋ, hulu shinyɔɔ fɛfɛo, faa ni miiho blɛoo, fɔfɔi fɛfɛji ni anaa amɛkwɛmɔ he miishɛɛ, lala ni aala kɛ ŋɔɔmɔ, aloo loofɔji alalai he miishɛɛ? Shi mɛɛ fioo. Susumɔ he okwɛ, ákɛ te shihilɛ lɛ baafee aha tɛŋŋ kɛji oona nibii nɛɛ amli ŋɔɔmɔ kɛmiiya naanɔ?

Belɛ, ani nilee yɛ mli akɛ wɔɔshɛ hegbɛ ni jara wa waa ni ji naanɔ wala shihilɛ nɛɛ wɔfɔ yɛ be kukuoo ko mli ŋɔɔmɔ, ni shihilɛ ni jwɛŋmɔ bɛ mli, ni ŋmɛɔ nɔ fɛɛ nɔ gbɛ nɛɛ baaha wɔna lɛ hewɔ? (Okɛto Hebribii 11:25 he. ) Biblia lɛ woɔ wɔ hewalɛ yɛ nilee mli ‘koni wɔwalabe ni eshwɛ nɛɛ, wɔkahi shi wɔha gbɔmɛi asuɔmɔnaa nii dɔŋŋ, shi moŋ kɛha Nyɔŋmɔ suɔmɔnaa nii.’ (1 Petro 4:⁠2) Wɔkɛ miishɛɛ miiwo bo hewalɛ, hɛɛ, wɔmiiwo bo ekaa, ni ofee nakai kɛtsɔ Nyɔŋmɔ Wiemɔ, ni ji Biblia lɛ kasemɔ nɔ, koni okɛ​—nibii ni okaseɔ lɛ hu atsu nii. (Yohane 13:17) Kɛtsɔ nakai gbɛ nɔ lɛ, obaaná akɛ Yehowa, Nyɔŋmɔ ni ekpakpa-feemɔ kɛ mɔbɔnalɛ eyi lɛ obɔ, ni baanyɛ ekɛ naanɔ wala awo bo nyɔmɔ lɛ teŋ wekukpaa kpakpa!

[Shishigbɛ niŋmai]

[Mfoniri ni yɔɔ baafa 5]

Ani oshihilɛ gbɛ tsɔɔ hiɛsɔɔ ni oyɔɔ kɛha wala?

[Mfoniri ni yɔɔ baafa 7]

Nyɔŋmɔ jeŋ hee lɛ baaha wɔna shihilɛ mli miishɛɛ nibii amli ŋɔɔmɔ kɛya naanɔ!