Henaabuamɔi Ni Akɛjieɔ Hiɛtserɛ​—Na Emli Sɛɛnamɔi Lɛ Amli Ŋɔɔmɔ, Kwa Emli Osharai Lɛ

“Nɔ kpakpa ko bɛ ha gbɔmɔ fe enɛ, akɛ eye ni enu ni eha esusuma aye nii kpakpai amli ŋɔɔmɔ yɛ edeŋmegbomɔ lɛ mli.”​—JAJELƆ 2:⁠24.

 1. Nyɔŋmɔ gbɛtsɔɔmɔ yeɔ ebuaa ewebii yɛ hiɛtserɛjiemɔ he yɛ mɛɛ gbɛi anɔ?

YEHOWA gbɛtsɔɔmɔ kɛ sɛɛnamɔi pii bahaa etsuji. Wɔbaanyɛ wɔna enɛ yɛ hiɛtserɛjiemɔ mli. Egbɛtsɔɔmɔ yeɔ buaa Kristofoi koni amɛkwa nibii ni afeɔ kɛtekeɔ nɔ yɛ adesai asusumɔ mli. Nyɔŋmɔi ajalɔi komɛi ni feɔ keketee yɛ hesaamɔ kɛ jeŋba mli lɛ susuɔ akɛ miishɛɛnamɔi fɛɛ lɛ esha ni. Ni yɛ gbɛ kroko hu nɔ lɛ, mɛi pii diɔ miishɛɛnamɔi asɛɛ kɛ enɛ po teɔ shi woɔ Yehowa mlai kɛ eshishitoo taomɔ nii.​—Romabii 1:​24-27; 13:​13, 14; Efesobii 4:​17-19.

 2. Mɛɛ mra be mli nɔ ko tsɔɔ bɔ ni Nyɔŋmɔ susuɔ hiɛtserɛjiemɔ he ehaa?

² Shi Nyɔŋmɔ webii hu? Mɛi ni jeɔ Biblia lɛ kasemɔ shishi lɛ ateŋ mei pii naa kpɛɔ amɛhe kɛ amɛkase akɛ Nyɔŋmɔ je gbɛ ebɔ gbɔmɛi koni amɛna shihilɛ mli ŋɔɔmɔ. Ekɛ nitsumɔ wo wɔ klɛŋklɛŋ fɔlɔi lɛ adɛŋ ni amɛtsu​—shi jeee nɔ ni nyɛɔ mɔ nɔ kɛ deŋmegbomɔ ni ekadi adesai pii ni yeee emuu lɛ ashihilɛ lɛ. (1 Mose 1:​28-30) Susumɔ gbɛi kpakpai sɔrɔtoi babaoo ni mɛi fɛɛ ni hiɔ shikpɔŋ nɔ paradeiso mli lɛ baana mli ŋɔɔmɔ lɛ he okwɛ. Feemɔ bɔ ni amɛmiishɛɛ baafa aha yɛ be mli ni amɛkwɛɔ kooloi ni hiɛ wa ni yeee awui dɔŋŋ lɛ kɛ shia kooloi sɔrɔtoi ni abaana amɛ daa gbi lɛ he mfoniri okwɛ! Ni kwɛ niyenii kpakpai ni amɛbaana kɛjɛ tsei “ni kɛ akwɛ ni aaaba mɔ tsine ni amɛhi ha yeli hu” lɛ amli!​—1 Mose 2:9; Jajelɔ 2:⁠24.

 3-5. (a) Esa akɛ hiɛtserɛjiemɔ atsu mɛɛ yiŋtoo he nii? (b) Mɛni hewɔ wɔbaanyɛ wɔna nɔmimaa akɛ Nyɔŋmɔ ejeee Israelbii lɛ anajiaŋ wui yɛ miishɛɛ ni amɛaana he lɛ?

³ Yɛ anɔkwale mli lɛ, abaanyɛ asusu nakai nifeemɔi lɛ ahe akɛ hiɛtserɛjiemɔ, ni eyiŋtoo yɛ Paradeiso lɛ baatamɔ bɔ ni eji bianɛ lɛ nɔŋŋ: ni ekanya mɔ hewalɛnamɔ ni efee ehee ekoŋŋ kɛha nitsumɔi krokomɛi ni woɔ yibii. Kɛ hiɛtserɛjiemɔ tsu enɛ lɛ, ehe baa sɛɛnamɔ. Ani enɛ tsɔɔ akɛ anɔkwa jalɔi baanyɛ ato gbɛjianɔ yɛ amɛshihilɛ mli kɛha hiɛtserɛjiemɔ yɛ be mli ni jeee Paradeiso mli po wɔyɔɔ lɛ? Hɛɛ. Insight on the Scriptures lɛ wieɔ hiɛtserɛjiemɔ ni tee nɔ yɛ Yehowa blema webii ateŋ le he akɛ:

⁴ ‘Awieee Israelbii lɛ anaaŋmɔlɔwoo kɛ miishɛɛnamɔ nibii ahe pii yɛ Biblia mli niŋmaai amli. Ni kɛlɛ, etsɔɔ akɛ esa akɛ abu enɛɛmɛi akɛ nɔ ni hi ni asumɔɔ kɛ ekɛ maŋ lɛ mli jamɔŋ shishitoo mlai kpaa gbee. Amɛhejɔɔmɔ nibii titrii ji saŋkui ni atswaa, lalai, jooi, sanegbaa, kɛ agbɛnɛ shwɛmɔi komɛi. Asumɔɔ abɛbuai kɛ sanebimɔi ni amɛshishitsɔɔmɔ wa ni abiɔ lɛ waa.’​—Kojolɔi 14:​12.​—Kpo 1, baafa 102.

⁵ Beni David ku esɛɛ yɛ kunimyeli mli lɛ, Hebri yei kɛ bɛji kɛ miji shwɛ́ yɛ enɛ hewɔ (Hebri, sa-chaq’). (1 Samuel 18:​6, 7) Hebri wiemɔ lɛ shishinumɔ diɛŋtsɛ ji “aŋmɔ,” ni shishitsɔɔmɔi komɛi wieɔ “yei ni mli efili amɛ” he. (Byington, Rotherham, The New English Bible) Beni awóɔ Kpaŋmɔ Adeka lɛ, “David kɛ Israel we lɛ fɛɛ shwɛ́ yɛ Yehowa hiɛ, amɛtswiaa diibɔɔtso saŋkui sɔrɔtoi.” Mikal, David ŋa lɛ kwɛɛɛ nii yɛ gbɛ ni ŋmɛɔ pɛpɛɛpɛ nɔ, ejaakɛ ete shi ewo bɔ ni David kɛ ehe ewo hiɛtserɛjiemɔ nifeemɔi lɛ amli lɛ. (2 Samuel 6:​5, 14-20) Nyɔŋmɔ gba fɔ shi akɛ nomii ni kuɔ amɛsɛɛ kɛjɛɔ Babilon lɛ hu kɛ amɛhe baawo nyamɔ nifeemɔi ni tamɔ nɛkɛ mli.​—Yeremia 30:​18, 19; 31:4; okɛto Lala 126:2 he.

 6. Te Kristofoi a-Hela Ŋmalɛi lɛ yeɔ ebuaa wɔ yɛ bɔ ni wɔsusuɔ hiɛtserɛjiemɔ he wɔhaa lɛ mli ehaa tɛŋŋ?

⁶ Esa akɛ wɔ hu wɔbɔ mɔdɛŋ ni wɔŋmɛ pɛpɛɛpɛ yɛ hiɛtserɛjiemɔ mli. Akɛ nɔkwɛmɔ nɔ lɛ, ani wɔle akɛ Yesu jeee mɔ ni hiɛɔ ehe dɛŋdɛŋ ni ekwa nɔ fɛɛ nɔ ni ŋɔɔ? Ehe be ni ekɛye niyenii ni ŋɔɔ, yɛ “okpɔlɔ kpeteŋkpele” ni Levi ŋmɛ lɛ shishi. Ni beni mɛi ni buɔ amɛhe jalɔi lɛ wie shi lɛ akɛ eeye nii ni eenu daa lɛ, Yesu kpoo amɛsusumɔi kɛ amɛgbɛi lɛ. (Luka 5:​29-31; 7:​33-36) Kaimɔ hu akɛ etee yookpeemɔ shishi ni eye ebua hu yɛ nakai nifeemɔ lɛ shishi. (Yohane 2:​1-10) Yesu nyɛ bi Yuda tsi ta akɛ Kristofoi yɛ “suɔmɔ niyenii,” eka shi faŋŋ akɛ eji niyenii kɛha mɛi ni ehia amɛ lɛ koni amɛna niyenii kɛ naanyobɔɔ kpakpa mli ŋɔɔmɔ.​—Yuda 12.

Henaabuamɔi ni Akɛjieɔ Hiɛtserɛ yɛ Ebe kɛ Egbɛhe

 7. Nyɔŋmɔ Wiemɔ lɛ woɔ hewalɛ ni aŋmɛ pɛpɛɛpɛ yɛ hiɛtserɛjiemɔ he yɛ mɛɛ gbɛ nɔ?

⁷ Jajelɔ 10:19 wieɔ ‘aboloo ni haa nitsulɔi ŋmɔɔ kɛ wein ni haa mɔ mii shɛɔ ehe’ lɛ he ekpakpa. Enɛ etsɔɔɔ akɛ hiɛtserɛjiemɔ ji efɔŋ loo ehiii diɛŋtsɛ, aloo jeee nakai? Ni kɛlɛ nakai wolo lɛ nɔŋŋ kɛɔ akɛ: “Nɔ fɛɛ nɔ yɛ ebe ni ato, . . . yaafo be yɛ, ni ŋmɔlɔ be yɛ; yarafeemɔ be yɛ, ni joo be yɛ.” (Jajelɔ 3:​1, 4) Hɛɛ, yɛ be mli ni Biblia lɛ ebuuu hiɛtserɛjiemɔ ni sa lɛ fɔ lɛ, ekɛ kɔkɔbɔɔi,haa wɔ. Nɔ ni fata enɛɛmɛi ahe ji ni aha hiɛtserɛjiemɔ ahi egbɛhe yɛ ebe kɛ efalɛ naa. Ebɔɔ wɔ kɔkɔ hu yɛ osharai ni baa shii abɔ yɛ gbɔmɛi ahenaabuamɔi ni dara tsɔ lɛ ashishi lɛ he.​—2 Timoteo 3:⁠4.

 8, 9. Mɛni hewɔ esa akɛ be ni wɔyɔɔ mli nɛɛ kɛ nitsumɔ ni Nyɔŋmɔ kɛwo wɔdɛŋ lɛ asa hiɛtserɛjiemɔ he lɛ?

⁸ Wɔkadi akɛ Yudafoi lɛ ni kuɔ amɛsɛɛ kɛjɛɔ Babilon​—ni yɔɔ nitsumɔ ni wa ni amɛbaatsu lɛ​—kɛ amɛhe baawo miishɛɛ hejɔɔmɔ mli. Ni kɛlɛ, Yeremia etsɔ ehiɛ ewie akɛ ‘etaŋ hefɛoyelɔi agwabɔɔ mli ni emli afili lɛ yɛ jɛmɛ.’ (Yeremia 16:17) Akɛ ŋwɛi nitsumɔ ko ewo edɛŋ akɛ ekɛ toigbalamɔ ko ni baa lɛ he shɛɛ sane aha, no hewɔ lɛ enɛ jeee be ni ato ni ekɛaaha emli afili lɛ.

⁹ Ŋmɛnɛ, akɛ nitsumɔ ewo Kristofoi adɛŋ ni amɛjaje Nyɔŋmɔ shɛɛ sane ni kɔɔ hiɛnɔkamɔ he lɛ, koni agbɛnɛ amɛjaje ekojomɔi ni ekɛshiɔ Satan yiwalɛ gbɛjianɔtoo lɛ. (Yesaia 61:​1-3; Bɔfoi lɛ Asaji 17:​30, 31) Belɛ esa akɛ efee faŋŋ akɛ esaaa akɛ wɔhaa hiɛtserɛjiemɔ feɔ nɔ titri yɛ wɔshihilɛ mli. Wɔbaanyɛ ni wɔkɛ ŋoo fioo loo nɔ ko ni akɛwoɔ nii amli ni haa niyenii ko ŋɔɔ lɛ afee enɛ he nɔkwɛmɔ nɔ. Ani okɛ ŋoo nɛɛ loo nii ni akɛwoɔ niyenii amli ni haa eŋɔɔ lɛ babaoo baawo mli koni efa fe niyenii lɛ po? Dabi kwraa. Nɔ ni kɛ Yesu wiemɔi ni yɔɔ Yohane 4:34 lɛ kɛ Mateo 6:33 lɛ kpaa gbee lɛ, esa akɛ nɔ ni he hiaa wɔ titri​—wɔ niyenii diɛŋtsɛ lɛ​—afee Nyɔŋmɔ suɔmɔnaa nii ni wɔɔfee. No hewɔ lɛ hiɛtserɛjiemɔ bafeɔ tamɔ nii ni akɛwoɔ niyenii mli koni eŋɔɔ. Esa akɛ eha mɔ he ajɔ lɛ ni eya hiɛ, jeee ni eha etɔlɛ ni eye enɔ.

10. Mɛni hewɔ esa akɛ wɔ fɛɛ wɔku sɛɛ wɔpɛi be ni wɔkɛwoɔ wɔhiɛtserɛjiemɔ mli lɛ mli ekoŋŋ lɛ?

¹⁰ Wa ni osusu enɛ he: Ani mɛi pii ewieŋ akɛ amɛkɛ amɛbe kɛ amɛjwɛŋmɔ woɔ hiɛtserɛjiemɔ mli yɛ hiɛshikamɔ mli? Kɛ amɛnuuu he nakai lɛ, amɛbaafee tsakemɔi. Ani enɛ etsɔɔɔ akɛ esa akɛ wɔteŋ mɔ fɛɛ mɔ amɛ fioo ni ekɛ hiɛdɔɔ asusu gbɛhe ni hiɛtserɛjiemɔ yɔɔ diɛŋtsɛ yɛ wɔshihilɛ mli lɛ he? Ani ekolɛ etsɔ gbɛ ni yɔɔ nigii nɔ ebatsɔ nɔ ko titri yɛ wɔshihilɛ mli? Akɛ nɔkwɛmɔ nɔ lɛ, ani wɔgbeleɔ TV lɛ amrɔ nɔŋŋ ni wɔɔshɛ shia? Ani wɔna su ko ni ji be babaoo ni wɔɔto wɔha hiɛtserɛjiemɔ daa otsi, tamɔ yɛ Sohaa gbɛkɛ loo Hɔɔ gbɛkɛ? Ani wɔhiɛnɔkamɔ feɔ yaka, kɛ be ni wɔto wɔha wɔhe nɛɛ shɛ, ni wɔna akɛ wɔyɛ shia ni wɔtoko hiɛtserɛjiemɔ ko he gbɛjianɔ lɛ? Sanebimɔi enyɔ ni fata he nɛ: Yɛ henaabuamɔ ko sɛɛ lɛ, ani wɔnaa akɛ wɔwɔɔɔ mra kwraa loo wɔfa gbɛ ketee shɔŋŋ tsɔ akɛ eha etɔ wɔ waa, ekolɛ wɔgbɔjɔ tsɔ akɛ wɔnyɛɛɛ ni wɔkɛ wɔhe awo Kristofoi asɔɔmɔ nitsumɔ lɛ mli aloo ni wɔɔtsu nɔ kpakpa ko yɛ wɔheloonaa nitsumɔ mli? Kɛ enɛ baa wɔ hiɛtserɛjiemɔ mli loo efɔɔ kaa yɛ be kɛ bei amli lɛ, belɛ miishɛjemɔ nii ni ŋmɛɔ pɛpɛɛpɛ ni sa lɛlɛŋ nɛ?​—Okɛto Abɛi 26:​17-19 he.

11. Mɛni hewɔ bɔ ni wɔjieɔ wɔhiɛtserɛ wɔhaa lɛ ni wɔɔkwɛ mli ekoŋŋ lɛ sa lɛ?

¹¹ Ebaahi hu akɛ wɔɔpɛi wɔ hiɛtserɛjiemɔ lɛ mli wɔkwɛ. Nyɔŋmɔ tsuji ni wɔji lɛ etsɔɔɔ doo akɛ wɔ hiɛtserɛjiemɔ lɛ sa. Susumɔ nɔ ni bɔfo Paulo ŋma eyaha Kristofoi ni afɔ amɛ mu lɛ he: “Efa ha wɔ akɛ wala be ni eho momo lɛ mli lɛ, wɔtsu jeŋmajiaŋbii lɛ atsui naa nii . . . ni wɔba wɔjeŋ yɛ nyenyeŋtswibɔɔi, akɔnɔi, daatɔɔi, shwɛmɔi, fufeemɔi, kɛ wɔŋjamɔi ni ahiɔ lɛ amli.” (1 Petro 4:⁠3) Jeee akɛ ekɛ ewao miitsɔɔ amɛhiɛ, loo efolɔ enyɛmimɛi lɛ anaa akɛ amɛmiikase nɔ ni mɛi ni yɔɔ je lɛ mli lɛ feɔ lɛ. Ni kɛlɛ, Kristofonyo lɛ hiɛ ni aaahi ehe nɔ (yɛ no beaŋ kɛ ŋmɛnɛ fɛɛ) lɛ he miihia, ejaakɛ mɔ ko baanyɛ agbee hiɛtserɛjiemɔ ni yeɔ mɔ awui lɛ he oshara lɛ mli yɛ gbɛ ni waaa kwraa nɔ.​—1 Petro 1:2; 2:1; 4:7; 2 Petro 2:⁠13.

Ha Ohiɛ Ahi Tsɔnei ni Duɔ Mɔ lɛ Anɔ

12. Mɛɛ tsɔne loo oshara 1 Petro 4:3 maa nɔ mi?

¹² Mɛɛ tsɔne nɛkɛ esa akɛ wɔha wɔhiɛ ahi nɔ lɛ? Ojogbaŋŋ, Petro tsĩ “daatɔɔi, shwɛmɔi, fufeemɔi” ata. Germannyo saji ahe wielɔ ko tsɔɔ mli akɛ Hela wiemɔi ni akɛtsu nii lɛ “kɔɔ henaabuamɔi kɛha daanumɔ yɛ okpɔlɔŋmɛɛi ashishi he.” Swiss woloŋlelɔ ko ŋma akɛ nakai nifeemɔi lɛ ji nɔ ni afɔɔ feemɔ yɛ nakai blema bei lɛ amli: “Etsɔɔ akɛ bɔ ni atsɔɔ mli aha lɛ kɔɔ henaabuamɔi ni aje gbɛ ato he gbɛjianɔ loo gbɔmɛi akui ni hiɛgbejianii ni atsi ta lɛ yaa nɔ yɛ amɛteŋ lɛ ahe.”

13. Daa ni wa ni anuɔ yɛ henaabuamɔi ashishi lɛ efee nii ni tsɔɔ mɛi atsɔne yɛ mɛɛ gbɛ nɔ? (Yesaia 5:​11, 12)

¹³ Daa ni wa ni anuɔ yɛ gbɔmɛi ahenaabuamɔi wuji ashishi lɛ etsɔ mɛi pii atsɔne ni edu amɛ. Biblia lɛ eteee shi ewooo daa ni wa ni anuɔ yɛ hiɛshikamɔ mli, efeee nakai. Akɛ nɔ ni yeɔ enɛ he odase lɛ, Yesu fee wein yɛ yookpeemɔ okpɔlɔŋmɛɛ ko shishi yɛ Kana. Eka shi faŋŋ akɛ mɔ ko ni nuɔ daa kɛtekeɔ nɔ bɛ jɛmɛ, ejaakɛ Yesu kɛ Nyɔŋmɔ ŋaawoo akɛ akafutu daatɔlɔi lɛ baatsu nii. (Abɛi 23:​20, 21) Shi susumɔ emlitsɔɔmɔ nɛɛ he okwɛ: Piafonyo ni kwɛɔ okpɔlɔŋmɛɛ lɛ nɔ lɛ kɛɛ akɛ yɛ okpɔlɔŋmɛɛ komɛi ashishi lɛ akɛ wein kpakpa lɛ haa klɛŋklɛŋ, ‘ni beni gbɔmɛi lɛ etɔrɔ lɛ, no dani akɛ nɔ ni eŋɔɔɔ lɛ baa.’ (Yohane 2:10) No hewɔ lɛ Yudafoi lɛ fɔɔ daatɔrɔmɔ yɛ yookpeemɔi ashishi yɛ he ni wein fa babaoo yɛ kɛha mɛi fɛɛ lɛ.

14. Mɛɛ gbɛi anɔ Kristofonyo ni tsɛɔ mɛi loo ehereɔ gbɔi lɛ baatsɔ nɔ aku oshara ni daa ni wa ni anuɔ lɛ kɛbaaba lɛ naa?

¹⁴ No hewɔ lɛ, Kristofoi komɛi ni hereɔ gbɔi lɛ ekpɛ amɛyiŋ akɛ kɛ amɛkɛ wein, beer, loo daa ni wa baaha lɛ, belɛ amɛ diɛŋtsɛ amɛbaakwɛ nɔ ni akɛhaa amɛgbɔi lɛ loo amɛnuɔ lɛ nɔ. Kɛ kuu lɛ da fe bɔ ni mɔ ni tsɛɔ mɛi lɛ baanyɛ akwɛ nɔ, tamɔ Yudafoi ayookpeemɔi ni atsi ta lɛ, daa ni wa ni fa ni yɔɔ jɛmɛ lɛ baanyɛ ekɛ oshara aba. Mɔ ko baanyɛ aba jɛmɛ ni enyɛ eye ehe nɔ ekɛye daa ni wa numɔ nɔ kunim. Obaanyɛ oyoo akɛ daa ni wa ni akɛhaa kɛkɛ ni atooo he ŋaa lɛ baanyɛ aka lɛ ni ekɛ ehe awo mli fe nine ni efite shihilɛ lɛ kɛha mɔ fɛɛ mɔ. Nɔkwɛlɔ ko ni ji tsɛ hu yɛ Germany wie akɛ eweku lɛ naa naanyobɔɔ kpakpa ni akɛ nanemɛi heyelilɔi naa yɛ henaabuamɔi ashishi lɛ he sɛɛ waa. Shi ekɛfata he akɛ, kɛ akɛ beer ha kɛkɛ ni naatsii ko bɛ mli lɛ, naagbai baanyɛ afa.

15. Te aaafee tɛŋŋ ana gbɛtsɔɔmɔ kpakpa yɛ henaabuamɔi ashishi?

¹⁵ Kana yookpeemɔ lɛ yɛ “piafonyo” ni kwɛɔ nɔ. (Yohane 2:⁠8) Enɛ etsɔɔɔ akɛ kɛ weku ko etsɛ kuu ko kɛba amɛshia kɛha niyeli loo kɛha naanyobɔɔ be kuku ko lɛ, esa akɛ amɛhala nɔkwɛlɔ. Wu lɛ ji mɔ ni baakwɛ nɔ ni yaa nɔ lɛ nɔ. Shi kɛji akɛ kuu lɛ feɔ wekui enyɔ pɛ loo nɔ ni da fioo jio, esa akɛ efee faŋŋ akɛ mɔ ko yɛ ni kwɛɔ nɔ ni yaa nɔ lɛ nɔ. Fɔlɔi pii kwɛɔ enɛ mli kɛ afɔ amɛ binuu loo biyoo nine kɛtee henaabuamɔ ko shishi. Amɛbiɔ mɔ ni tsɛɔ mɛi lɛ ni amɛleɔ mɔ ni baakwɛ nɔ ni baaya nɔ lɛ fɛɛ nɔ, kɛ ebaahi jɛmɛ kɛjɛ shishijee kɛyashi naagbee. Fɔlɔi ni ji Kristofoi po etsake amɛbe he gbɛjianɔtoo mli koni amɛhi jɛmɛ koni onukpai kɛ gbekɛbii fɛɛ ana naanyobɔɔ kpakpa mli ŋɔɔmɔ.

16. Mɛni ji nibii ni esa akɛ asusu he jogbaŋŋ yɛ henaabuamɔi lɛ adaramɔ hewɔ?

¹⁶ Buu Mɔɔ Asafo lɛ nitsumɔ he nine ni yɔɔ Canada lɛ bɔ amaniɛ akɛ: “Onukpai saŋŋ enu ŋaawoo ni kɔɔ henaabuamɔi ni aaaha efee nɔ ni nine baakpele he lɛ shishi akɛ etsɔɔ akɛ henaabuamɔi ni da yɛ yookpeemɔ okpɔlɔŋmɛɛi ashishi lɛ kuɔ nakai ŋaawoo lɛ mli. Amɛmu sane naa akɛ, kɛ awo wɔ ŋaa ni wɔha wɔhenaabuamɔi kɛha hiɛtserɛjiemɔ lɛ afee fioo, nɔ ni wɔnine baakpele he lɛ, belɛ ebaafee tɔmɔ akɛ gbɔmɛi 200 loo 300 aaabua amɛhe naa yɛ yookpeemɔ okpɔlɔŋmɛɛ shishi.”a Yɛ nɔ najiaŋ ni wɔɔma yibɔ ko ni wɔ diɛŋtsɛ wɔsumɔɔ nɔ mi keketee lɛ, nɔ titri ni esa akɛ wɔkwɛ lɛ jogbaŋŋ ji henaabuamɔ lɛ nɔkwɛmɔ kpakpa, ni mɛi abɔ ni baaba jɛmɛ lɛ kɔɔɔ he eko. Wein ni Yesu kɛha lɛ tsɔɔ akɛ mɛi ni fa diɛŋtsɛ ba Kana yookpeemɔ lɛ shishi, shi eka shi faŋŋ akɛ akwɛ nɔ jogbaŋŋ. Okpɔlɔŋmɛɛi komɛi ni ba yɛ no beaŋ lɛ tamɔɔɔ nakai; ekolɛ amɛyifalɛ haaa anyɛ akwɛ nɔ jogbaŋŋ. Kɛ henaabuamɔ lɛ da lɛ, nakai nɔŋŋ naagba lɛ hu daa, ejaakɛ ewaaa akɛ mɛi ni he waaa, ni sumɔɔ ni amɛfee nii kɛteke nɔ lɛ aaajie amɛhe kpo. Kɛ mɔ ko bɛ ni kwɛɔ henaabuamɔi ni tamɔ nɛkɛ nɔ lɛ, amɛkɛ nifeemɔi ni esaaa baa.​—1 Korintobii 10:​6-8.

17. Te aaafee tɛŋŋ ajie pɛpɛɛpɛ ni Kristofoi ŋmɛɔ lɛ kpo beni atoɔ henaabuamɔ he gbɛjianɔ lɛ?

¹⁷ Nɔ ni fata henaabuamɔ ni akwɛɔ nɔ jogbaŋŋ lɛ he ji egbɛjianɔtoo kɛ hesaamɔ. Enɛ biii ni ato saneyitso ni gbalaa mɔ jwɛŋmɔ he ŋaa, koni efee sɔrɔto ni akaiɔ, ni ekolɛ etamɔ je lɛŋ bii akpee kɛha hiɛtserɛjiemɔ, tamɔ henaabuamɔ ni awoɔ atadei sɔrɔtoi sɔrɔtoi ni asaa he tamɔ kakamotobii. Ani ooonyɛ osusu Israelbii anɔkwafoi ni hi shi yɛ Shiwoo Shikpɔŋ lɛ nɔ lɛ ahe, ni amɛmiito hiɛtserɛjiemɔ he gbɛjianɔ, ni eshishi lɛ mɔ fɛɛ mɔ baasaa ehe tamɔ wɔŋjalɔi ni yɔɔ Mizraim lɛ loo shikpɔŋ kroko nɔ bii lɛ he okwɛ? Ani amɛbaato ajwamaŋbɔɔ he jooi loo lalai ni yɔɔ hoo ni no ehe gbɛi yɛ wɔŋjalɔi lɛ ateŋ lɛ he gbɛjianɔ? Lalai kɛ jooi heei ni no mli lɛ ehe gbɛi yɛ Mizraim lɛ tsɔ amɛ tsɔne yɛ Sinai Gɔŋ lɛ shishi. Wɔle bɔ ni Nyɔŋmɔ kɛ etsulɔ Mose ni eda lɛ susu nakai hiɛtserɛjiemɔ lɛ he amɛha. (2 Mose 32:​5, 6, 17-19) No hewɔ lɛ, esa akɛ mɔ ni hereɔ gbɔi loo mɔ ni kwɛɔ henaabuamɔ kɛha hiɛtserɛjiemɔ ko nɔ lɛ asusu he ni ele akɛ ani abaala ni abaajo lo; ni kɛji nakai ni lɛ, esa akɛ ekwɛ ni ekɛ Kristofoi ashishitoo mlai akpa gbee.​—2 Korintobii 6:⁠3.

18, 19. Mɛni wɔbaanyɛ wɔkase kɛjɛ Yesu ni akpee lɛ kɛtee yookpeemɔ shishi lɛ mli, ni te wɔɔfee tɛŋŋ ni wɔkɛ enɛ atsu nii?

¹⁸ Naagbee lɛ, wɔkaiɔ akɛ ‘akpee Yesu kɛ ekaselɔi lɛ kɛtee yookpeemɔ lɛ shishi.’ (Yohane 2:⁠2) Wɔŋɔ lɛ akɛ, mɔ aŋkro ko loo weku ko ni ji Kristofoi baanyɛ asara mɛi krokomɛi ni amɛye be ni ŋɔɔ ni haa mɔ nane mɔɔ shi loo etswaa mɔ maa shi. Shi kɛha henaabuamɔi ni ajeɔ gbɛ atoɔ he gbɛjianɔ lɛ, niiashikpamɔ tsɔɔ akɛ, kɛ atsɔ hiɛ ale mɛi ni baaba lɛ, eyeɔ ebuaa ni ekuɔ naagbai anaa. Onukpa ko ni yɔɔ Tennessee, U.S. Amerika, ni etsɔse bihii kɛ biyei ni yɔɔ be-fɛɛ sɔɔmɔ lɛ mli lɛ ma bɔ ni enɛ he hiaa ha lɛ nɔ mi. Dani ekɛ eŋa aaakpɛlɛ ninefɔɔ ko nɔ, aloo eŋmɛ ebii agbɛ ni amɛya lɛ, etsɔɔ hiɛ ebiɔ mɔ ni fɔɔ nine nɛɛ akɛ ani etsɔ hiɛ ehala mɛi ni baa lɛ. Ebuɔ eweku lɛ he kɛjɛɔ tsɔnei loo osharai ni mɛi komɛi egbee mli yɛ henaabuamɔi ni atsɛɔ mɔ fɛɛ mɔ kɛbaa shishi, kɛha niyeli loo, shwɛmɔ, loo kpɔiaŋgbɔlemɔ, tamɔ bɔɔl-tswaa nɛkɛ lɛ he.

¹⁹ Yesu wooo hewalɛ ni afɔ wekumɛi, tsutsu nanemɛi, loo tipɛŋfoi, loo mɛi ni yɔɔ nii ni tamɔ amɛ pɛ nine kɛba henaabuamɔi ashishi. (Luka 14:​12-14; okɛto Hiob 31:​16-19; Bɔfoi lɛ Asaji 20:​7-9 he.) Kɛ osusu mɛi ni obaafɔ nine otsɛ amɛ lɛ ahe jogbaŋŋ lɛ, ehi akɛ okɛ Kristofoi ni amɛye afii sɔrɔtoi ni yɔɔ shihilɛi sɔrɔtoi amli aaafata he. (Romabii 12:​13; Hebribii 13:⁠2) Amɛteŋ mɛi fioo ko baanyɛ afee mɛi ni he waaa yɛ mumɔŋ kɛ mɛi heei ni Kristofoi ni amɛdara yɛ mumɔŋ ni amɛkɛ amɛ bɔɔ nɛkɛ lɛ he baaba sɛɛnamɔ aha amɛ​—Abɛi 27:⁠17.

Hiɛtserɛjiemɔ Yɛ Egbɛhe

20, 21. Mɛni hewɔ hiɛtserɛjiemɔ baanyɛ ana gbɛhe ni sa yɛ wɔshihilɛi amli lɛ?

²⁰ Akɛ gbɔmɛi ni sheɔ Nyɔŋmɔ gbeyei lɛ, esa akɛ wɔfee mɛi ni nyaa wɔhiɛtserɛjiemɔ he kɛ mɛi ni susuɔ ehilɛ hu he, ni ákɛ wɔŋmɛɔ pɛpɛɛpɛ yɛ be ni wɔkɛwoɔ mli lɛ mli. (Efesobii 2:​1-4; 5:​15-20) Mɔ ni mumɔ tsirɛ lɛ ni ŋma Jajelɔ lɛ nu he nakai: “Kɛkɛ ni mikafo miishɛɛ; ejaakɛ ekpakpa ko bɛ ha gbɔmɔ yɛ hulu shishi nɛɛ, fe nɔ ni eeeye nii ni enu ni ena miishɛɛ; ni enɛ nɔŋŋ [baafata] ehe yɛ edeŋme ni egbo lɛ mli, yɛ ewala gbii fɛɛ ni Nyɔŋmɔ eha lɛ yɛ hulu shishi nɛɛ lɛ mli.” (Jajelɔ 8:15) Miishɛɛnamɔ ni ŋmɛɔ pɛpɛɛpɛ tamɔ nɛkɛ baanyɛ aha gbɔmɔtso lɛ he ajɔ lɛ, ni ebaaye ebua ni eku naagbai kɛ nijiaŋwujeei ni fa babaoo yɛ ŋmɛnɛŋmɛnɛ gbɛjianɔtoo nɛɛ mli lɛ naa.

²¹ Akɛ nɔkwɛmɔ nɔ lɛ, Austria gbɛgbalɔ ko ŋma wolo eyaha eblema naanyo ko akɛ: “Wɔkpojee lɛ ŋɔɔ nyɛsɛɛ gbi lɛ. Wɔyi aaafee 50 yiŋ akɛ wɔmiiya kpaakpo bibioo ko ni bɛŋkɛ Ferlach maŋ lɛ naa. Nyɛminuu B​—nyiɛ gbɛfaa lɛ hiɛ, ni nɔ ni yɔɔ etsɔne lɛ mli ji looshãa latɛi etɛ, sɛii ni akotaa, okpɔlɔi, kɛ table tennis okpɔlɔ po. Wɔna miishɛɛ babaoo. Nyɛmi yoo ko hiɛ saŋku ni etswaa yɛ edɛŋ, no hewɔ lɛ wɔla Maŋtsɛyeli lalai babaoo. Nyɛmimɛi onukpai kɛ gbekɛbii fɛɛ nya naanyobɔɔ lɛ he.” Ekaiɔ hiɛtserɛjiemɔ ni akwɛ nɔ jogbaŋŋ ni osharai komɛi tamɔ daanumɔ ni tekeɔ nɔ kɛ ahoshwibɔɔ bɛ mli nɛɛ jogbaŋŋ diɛŋtsɛ.​—Yakobo 3:​17, 18.

22. Yɛ be mli ni wɔnaa hiɛtserɛjiemɔ mli ŋɔɔmɔ lɛ mɛɛ kɔkɔbɔɔ esa akɛ wɔteŋ mɔ fɛɛ mɔ aha ehi wɔjwɛŋmɔ mli?

²² Paulo woɔ wɔ hewalɛ ni wɔkwɛ jogbaŋŋ koni wɔkaŋmɛɛ wɔhe wɔha heloo ni yeee emuu lɛ mli akɔnɔi lɛ, ni wɔkato gbɛjianɔ ko hu ni kɛ wɔ baabote kaai amli. (Romabii 13:​11-14) Nɔ ni fata he ji gbɛjianɔ ni atoɔ ahaa hiɛtserɛjiemɔ. Kɛ wɔkɛ eŋaawoo lɛ to enɛ he lɛ, wɔbaanyɛ wɔkwa shihilɛi komɛi ni eha mɛi krokomɛi eyasha shi yɛ mumɔŋ lɛ. (Luka 21:​34-36; 1 Timoteo 1:19) Shi moŋ, wɔkɛ nilee baahala hiɛtserɛjiemɔ kpakpa ni baaye abua wɔ ni wɔhiɛ wekukpaa ni ka wɔkɛ Nyɔŋmɔ teŋ lɛ mli. Kɛkɛ lɛ wɔbaana hiɛtserɛjiemɔ ni abaanyɛ abu lɛ akɛ Nyɔŋmɔ nikeenii kpakpai lɛ ateŋ ekome lɛ he sɛɛ.​—Jajelɔ 5:⁠18.

[Shishigbɛ niŋmai]

Mɛni Wɔkase?

◻ Mɛɛ jwɛŋmɔ ni ŋmɛɔ pɛpɛɛpɛ wɔnaa yɛ Biblia lɛ mli yɛ hiɛtserɛjiemɔ ni anaa mli ŋɔɔmɔ lɛ gbɛfaŋ?

◻ Mɛni hewɔ esa akɛ asusu be kɛ nɔ ni akɛjieɔ hiɛtserɛ lɛ he waa lɛ?

◻ Mɛni ji nibii komɛi ni Kristofonyo ni hereɔ gbɔi lɛ baanya afee ni ekɛku nibii ni aaanyɛ etsɔ mɔ ko tsɔne lɛ naa?

◻ Mɛni hiɛtserɛjiemɔ baanyɛ atsu aha Kristofoi, kɛji esa ni eŋmɛɔ pɛpɛɛpɛ?

[Mfoniri ni yɔɔ baafa 18]

Gbɛnaa nii ka mɔ ni tsɛɔ mɛi loo ekwɛɔ hiɛtserɛjiemɔ nɔ lɛ nɔ akɛ ekwɛ koni nɔ ko akatsɔ gbɔi lɛ eko tsɔne ni ekɛ oshara ba