Amɛmiina Anɔkwa Miishɛɛ yɛ “Paradeiso”

Paradeiso! Nakai wiemɔ lɛ baa jwɛŋmɔ mli yɛ bei babaoo mli kɛ gbɔmɛi susu Hawaii he​—ni yɛ yiŋtoo kpakpa hu hewɔ. Nɔ ni fa babaoo yɛ biɛ ji kɔɔyɔŋ tsakemɔi ni bɛ keketee, atatuiaŋ ni efee bluu, akokooshi tsei ni miikpa kɛmiiya kɛmiiba, kɔɔyɔɔ ni mli jɔ ni haa mɔ he jɔɔ lɛ, kɛ ŋshɔ kɛ enaa shia babaoo​—nibii ni mɛi pii baasusu akɛ amɛtamɔ paradeiso mli nibii.

Nɛkɛ nibii nɛɛ egbala mɛi pii kɛjɛ shɔŋŋ kɛ hei ni bɛŋkɛ fɛɛ. Amɛjɛ Asia, Pasifik, Amerika maji lɛ anɔ, kɛ hei tamɔ Caribbean ŋshɔkpɔi lɛ anɔ kɛ Europa amɛba. Mɛi pii ebahi biɛ koni amɛna ekɔɔyɔŋ tsakemɔ ni bɛ keketee afi muu lɛ he sɛɛ. Mɛi komɛi hu ba ni amɛmiitao shika ​—kɛ miishɛɛ hu. Nɔ ni ejɛ mli eba ji gbɔmɛi ni jɛ maji kɛ wekui sɔrɔtoi amli ni amɛfutu, kɛ kusumii sɔrɔtoi ni yɔɔ fɛo kɛ jamɔ mli hemɔkɛyelii.

Shi nɔ kroko hu yɛ shihilɛ lɛ mli. Taakɛ bɔ ni shikpɔŋ lɛ nɔ hei sɔrɔtoi babaoo ni yɔɔ fɛo ji lɛ, awuiyeli, tsofai fɔji kɛ nitsumɔ, efɔŋfeemɔ, mujiwoo, kɛ naagbai sɔrɔtoi babaoo ni baa adesa weku lɛ nɔ ni he ni mɔ ko hiɔ lɛ kɔɔɔ he eko lɛ miihao Hawaii. Yɛ gbɔmɛi ni kuɔ amɛhiɛ amɛshwieɔ nii anɔ kɛ pɛsɛmkunya hewɔ lɛ, Hawaii ŋshɔkpɔi lɛ miilaaje bɔ ni eyɔɔ fɛo ha yɛ adebɔɔ naa lɛ fiofio. Gbɔmɛi miisumɔ paradeiso, shi jeee mɛi fɛɛ ni hiɔ biɛ lɛ jwɛŋɔ loo kɛ hoo lɛ amɛsumɔɔ ni amɛha ŋshɔkpɔi nɛɛ ahi nakai paradeiso shihilɛi lɛ amli. Ebiɔ babaoo fe adebɔɔ mli nii ni yɔɔ fɛo kɛ kɔɔyɔŋ tsakemɔ kpakpa dani ana paradeiso.

Shi gbɔmɛi akuu ko ni amɛyifalɛ miiya hiɛ yɛ biɛ, ni amɛmiina anɔkwa miishɛɛ yɛ paradeiso shihilɛi nɛɛ amli. Amɛji gbɔmɛi aŋkroaŋkroi ni miikpɛlɛ Biblia mli anɔkwale nɔ ni amɛkɛ Nyɔŋmɔ shiwoo ni yɔɔ naakpɛɛ nɛɛ miito amɛtsui mli: “Miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ.” Nɛkɛ gbɔmɛi nɛɛ kɛ miishɛɛ miikwɛ wɔsɛɛ be yɛ be mli ni amɛhaa bɔfo Petro wiemɔi nɛɛ hiɔ amɛjwɛŋmɔ mli lɛ: “Yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (Yesaia 65:​17; 2 Petro 3:13) Namɛi ji nɛkɛ gbɔmɛi nɛɛ? Te fee tɛŋŋ ni amɛbakase hiɛnɔkamɔ ni yɔɔ naakpɛɛ ni yɔɔ Biblia lɛ mli lɛ he nii? Ni mɛɛ tsakemɔi eba amɛshihilɛi amli?

Aye Gbele Gbeyeishemɔ nɔ Kunim

Isabel kɛ ewu George jɛ Filipines. Atsɔse yoo lɛ koni enyiɛ efɔlɔi ajamɔ ni ji Roma Katolek jamɔ lɛ sɛɛ, eyɛ mli akɛ ekwɛko Biblia lɛ mli da. Atsɔɔ Isabel akɛ adesa susuma lɛ gbooo. Mɛni efee yɛ nɛkɛ apasa tsɔɔmɔ nɛɛ he? Esheɔ gbele gbeyei waa ejaakɛ jwɛŋmɔ ni ehiɛ ji fu ni aaafu lɛ hiɛkalɔ yɛ adeka mli yɛ shikpɔŋ sũ mli, ni akɛɛ esusuma lɛ nyɛɛɛ ajo foi kɛjɛ mli. Shi, 1973 mli Isabel kɛ Yehowa Odasefoi je Biblia lɛ kasemɔ shishi. Beni ekase akɛ adesa susuma lɛ jeee nɔ ni gbooo ni ákɛ Nyɔŋmɔ baakpata gbele hiɛ kɛtsɔ gbohiiashitee nɔ lɛ, ena miishɛɛ babaoo ni enu he akɛ ehe ejɔ lɛ. (Ezekiel 18:​4, 20; Yohane 5:​28, 29) Biblia mli anɔkwale lɛ na enɔ hewalɛ babaoo akɛ etee ehiɛ oyayaayai

Ni George hu? Lɛ hu etaa shi beni akaseɔ Biblia lɛ, shi kɛ yiŋtoo akɛ ebaatsɔɔ akɛ Odasefoi lɛ etɔ̃. Shi enaaa tɔmɔ ko yɛ nɔ ni atsɔɔ lɛ kɛ eŋa lɛ he. Yɛ anɔkwale mli lɛ, beni amɛje nikasemɔ lɛ shishi etsɛɛɛ ni lá he sane lɛ te shi. Kɛbashi nɛkɛ be nɛɛ mli fɛɛ lɛ, George sumɔɔ niyenii ni akɛ lá efee. Shi beni ena akɛ Biblia lɛ wieɔ eshiɔ la ni ayeɔ lɛ yɛ faŋŋ mli lɛ, ekpa niyenii ni la yɔɔ mli lɛ yeli. (1 Mose 9:​3, 4; 3 Mose 17:​10-12; Bɔfoi lɛ Asaji 15:​28, 29) Etee nɔ ekɛ ehe wo Biblia lɛ kasemɔ mli, ni emii shɛ ehe akɛ yɛ naagbee lɛ ena anɔkwale lɛ. Ŋmɛnɛ, George, Isabel, kɛ amɛbii ejwɛ miina anɔkwa miishɛɛ mli ŋɔɔmɔ yɛ tɛi ni Nyɔŋmɔ efolɔ eshwie shi ni amɛhiɔ shi yɛ naa lɛ hewɔ.

Anɔkwa Kristojamɔ Gbala Amɛ

Japannyo ko ni atsɛɔ lɛ George kɛ eŋa Portugalnyo ni atsɛɔ lɛ Lillian lɛ yɛ amɛ afii nyɔŋmai ekpaa mli. Afɔ mɛi enyɔ lɛ fɛɛ yɛ Hawaii ni atsɔse amɛ yɛ jɛmɛ. Akɛni George fɔlɔi kɛ jamɔ tsɔseee lɛ hewɔ lɛ, ekɛ hiɛdɔɔ ko tsuuu jamɔ he nii. Ni kɛlɛ, eheɔ Nyɔŋmɔ nɔ eyeɔ. Shi Lillian fɔlɔi tsɔse lɛ yɛ amɛjamɔ mli, akɛ Roma Katoleknyo.

Eyɛ mli akɛ George jeee mɔ ni kaneɔ Biblia lɛ pii ko tsɔ moŋ, shi aaafee afi 30 nɛ ni ebɔi Buu-Mɔɔ lɛ kɛ Awake! woji tɛtrɛbii lɛ kanemɔ. No hewɔ lɛ ele Biblia lɛ he nii babaoo. Shi, akɛni eshɛreɔ zigaret ni enuɔ daa waa hewɔ lɛ, tsakemɔ yɛ eshihilɛ mli lɛ fee shɔ̃ɔ. Beni afii lɛ hoɔ lɛ, George tee nɔ ekane woji tɛtrɛbii lɛ ni ebaa Kristofoi akpeei yɛ Maŋtsɛyeli Asa lɛ nɔ yɛ be kɛ bei amli. Mɛni hewɔ? Ejaakɛ, taakɛ ewie lɛ, “osatofoi diɛŋtsɛ ji jamɔi krokomɛi lɛ,” yɛ nibii gbohii pii ni abuɔ amɛ fɔ yɛ Biblia lɛ mli lɛ ni amɛkpɛlɛɔ nɔ koni afee lɛ hewɔ. Enyɛ ena akɛ Yehowa Odasefoi yɛ sɔrɔto.

Mɛni gbala George ŋa Lillian ni etu ehe eha lɛ kɛtee Nyɔŋmɔ Wiemɔ lɛ mli anɔkwale lɛ he yɛ be mli ni ehe shi waa yɛ efɔlɔi lɛ ajamɔ mli lɛ? Ojogbaŋŋ, eheloonaa nyɛmi yoo ko fɔ lɛ nine kɛtee kpeei yɛ Maŋtsɛyeli Asa lɛ nɔ. Lillian kɛɛ, “minya miishɛɛ weku shihilɛ kɛ naanyobɔɔ ŋmɔlɔ babaoo lɛ he waa.” Bɔ ni ena suɔmɔ diɛŋtsɛ ni ajie lɛ kpo yɛ Yehowa webii ateŋ lɛ tsɔ̃ eyiŋ akɛ enɛ ji anɔkwale lɛ. (Yohane 13:​34, 36) Ekpɛlɛ Biblia lɛ kasemɔ nɔ, ni yɛ naagbee lɛ ejɔɔ ehe nɔ eha Yehowa Nyɔŋmɔ, ni abaptisi lɛ yɛ be mli ni abaptisi ewu lɛ sɛɛ nyɔji fioo ko.

George shɛreee zigaret ni etɔɔɔ daa dɔŋŋ, ni Lillian eshɛrɛ ejamɔ mli amagai lɛ fɛɛ eshwie. Akɛni amɛtsuii amli eyimɔ obɔbɔ kɛ suɔmɔ hewɔ lɛ, amɛmiigba nɔ ni amɛkase lɛ amɛmiitsɔɔ mɛi, ni amɛnabii 25 kɛ nanakansowai 4 lɛ fata he. Bo lɛ kwɛmɔ amɛhiɛ, ni okwɛ bɔ ni George kɛ Lillian mii eshɛ amɛhe amɛha lɛ!

Nine Shɛ Miishɛɛ kɛ Toiŋjɔlɛ Nɔ

Patrick, Irishnyo ko ni hiɛ efa kɛ eŋa Yuda yoo, Nina fɛɛ fa kɛjɛ U.S. Amerika wuoyi-anaigbɛ kɛba Hawaii. Tsutsu lɛ, amɛ fɛɛ amɛhi shi akɛ gbɔmɛi ni mla ko efiii amɛ yɛ tsofai fɔji kɛ nitsumɔ, jamɔ mli kaa-kɛ-kwɛmɔi, kɛ jeŋba shara mli. Amɛkɛ afii pii hi teemɔŋ kuu ko mli, ni amɛmiibɔ mɔdɛŋ ni amɛnine ashɛ hiɛ-ni-yɔɔ he nɔ ni nɔ kwɔ nɔ kɛtsɔ tsofai kɛ nitsumɔ, nɔ̃ nɔjwɛŋmɔ, kɛ amɛteemɔŋ tsɔɔlɔ loo guru lɛ nɔ. Yɛ be ni sa mli lɛ, awuŋayeli, bei, kɛ ŋwanejeei ni yaa nɔ be fɛɛ be yɛ kuu lɛ mlibii ni kɛɔ akɛ amɛnine eshɛ ‘hiɛ-ni-yɔɔ he nɔ ni nɔ kwɔ nɔ’ lɛ ha eje Patrick tsine. Eshi kuu lɛ ni eku esɛɛ kɛtee Hawaii, he ni tsutsu ko lɛ eyɔɔ lɛ, kɛ hiɛnɔkamɔ akɛ enine baashɛ jwɛŋmɔŋ toiŋjɔlɛ nɔ. Yɛ no sɛɛ lɛ, Patrick tsɔ Nina ni no mli lɛ eji ehemɔ lɛ yiŋ koni ebasara lɛ. Yɛ naagbee lɛ amɛbote gbalashihilɛ mli ni amɛhi Hawaii.

Nina kɛ Patrick kpaaa gbɛ akɛ toiŋjɔlɛ kɛ miishɛɛ ni amɛtaoɔ lɛ baaya ayagbe naa kɛ Yehowa Odasefoi ni amɛkɛ amɛ aaakase Biblia lɛ. Nina ni eshihilɛ be mli fɛɛ lɛ eheee Nyɔŋmɔ nɔ eyeee lɛ je shishi akɛ mɔ ni nine miishɛ Biblia mli hetooi ni haa mɔ tsui nyɔɔ emli yɛ esanebimɔi ni enuuu shishi tamɔ nɔ hewɔ ni efɔŋ feemɔ yɔɔ, kɛ nɔ hewɔ ni nibii gbohii baa gbɔmɛi kpakpai anɔ lɛ nɔ. Nakai nɔŋŋ anɔkwale ni Patrick kɛ afii nyɔŋma etao lɛ hu ba naagbee kɛ miishɛɛ. Etsɛɛɛ ni nɔ ni ekɛ Nina kaseɔ kɛjɛɔ Biblia lɛ mli lɛ bɔi amɛshihilɛ tsakemɔ. Yɛ be mli ni amɛkɛ be kakadaŋŋ epele he waa lɛ, Patrick nyɛ eye etawa shɛremɔ ni eka ehe lɛ nɔ kunim. Aaafee afi nyɔŋma nɛ, ni ekɛ eŋa ehi shi yɛ jeŋba hetsemɔ mli yɛ Nyɔŋmɔ taomɔ nii anaa. Amɛkɛ tsui krɔŋŋ kɛ henilee ni mli tse keŋkeŋ miina toiŋjɔlɛ ni amɛtaoɔ lɛ mli ŋɔɔmɔ.

Afɔleshaai kɛ Nyɔmɔwoi

“Nyɛpelea agbo fintɔɔ lɛ mlibote he, ejaakɛ miikɛɛ nyɛ akɛ, mɛi pii aaatao mli abote, shi amɛnyɛŋ.” (Luka 13:24) Nakai Yesu Kristo wiemɔi lɛ tsɔɔ faŋŋ akɛ, ákɛ aaasɔmɔ Nyɔŋmɔ ni ahi shi yɛ Ŋmalɛ naa taomɔ nii anaa lɛ bɛ mlɛo. Jeee akɛ esa akɛ mɔ fɛɛ mɔ ni sumɔɔ ni efee nakai lɛ amia ehiɛ ni ekɛ mɔdɛŋbɔɔ ni sa awo mli kɛkɛ, shi esa akɛ ekɛ nibii asha afɔle bɔ ni sa. Nakai enɛ ji diɛŋtsɛ yɛ aŋkroaŋkroi ni atsi amɛ ta yɛ sane nɛɛ mli lɛ ahe. Shi kwɛ bɔni awo amɛ nyɔmɔ babaoo yɛ naakpɛɛ gbɛ nɔ aha!

Akɛ nɔkwɛmɔ nɔ lɛ, susumɔ Patrick kɛ Nina ni atsi amɛ ta etsɛko lɛ ahe. Amɛfee tsakemɔi wuji kɛjɛ shihilɛ ni haa amɛnaa shika babaoo lɛ mli kɛtee be-fɛɛ Kristofoi asɔɔmɔ nitsumɔ ni amɛkɛ heloo gbɛfaŋ nitsumɔ ni akɛ be fã tsuɔ yeɔ buaa no lɛ mli. Ni kɛlɛ, amɛheɔ amɛyeɔ akɛ mumɔŋ sɛɛnamɔi lɛ fa kwraa fe heloo gbɛfaŋ nibii fɛɛ ni amɛkɛsha afɔle lɛ. Ni amɛyɛ miishɛɛ diɛŋtsɛ.

Yɛ afi ni amɛye lɛ hewɔ lɛ, tsakemɔi ni George kɛ Lillian fee lɛ eyafeee nɔ ni yɔɔ mlɛo. Kristofoi akpeei kɛ sɔɔmɔ nitsumɔ lɛ mli ni amɛkɛ amɛhe aaawo lɛ biɔ be, sane nɔjwɛŋmɔ, kɛ gbɔmɔtsoŋ mɔdɛŋbɔɔ. Shi nɔ ni ha amɛna miishɛɛ babaoo moŋ ji akɛ, amɛ gbɔmɔtsoŋ hewalɛnamɔ etee hiɛ, ni abaanyɛ atsɔɔ bɔ ni amɛshihilɛ ji bianɛ akɛ nɔ ni hewalɛ yɔɔ mli, shihilɛ ni eyi obɔ, kɛ nɔ ni miishɛɛ yɔɔ mli.

Yɛ George kɛ Isabel gbɛfaŋ lɛ, kaa ni ka amɛhiɛ ni fe fɛɛ ji tsɔsemɔ ni amɛkɛaaha amɛbii ni amɛye amɛbua amɛ kɛba wala gbɛ lɛ nɔ. Ebiɔ be kɛ mɔdɛŋbɔɔ babaoo dani aha gbekɛbii ejwɛ asaa amɛhe amɛha Kristofoi akpeei aloo ni amɛaaha amɛfata amɛhe yɛ Kristofoi asɔɔmɔ nitsumɔ lɛ mli. Be ko shɛ ni nɔnyɛɛ babaoo lɛ ha George kɛ Isabel ku amɛhiɛ amɛshwie gbɛnaa nii ni jwere amɛnɔ akɛ fɔlɔi lɛ anɔ. Shi Biblia mli maŋshiɛmɔ ko ni eyitso ji “He kɛ Afɔleshaa Mumɔ lɛ ni Aaawaje lɛ Ekoŋŋ” lɛ kanya amɛ koni amɛbɔ mɔdɛŋ waa fe tsutsu lɛ, ni amɛkɛ kwɛmɔ kɛ tsɔsemɔ fɛɛ ni he hiaa lɛ aha amɛbii lɛ ‘koni amɛkɛ amɛ aba Yehowa tsɔsemɔ kɛ ŋaawoo mli.’ Ajɔɔ mɔdɛŋbɔɔ ni tamɔ nɛkɛ nɔ babaoo diɛŋtsɛ.​—Efesobii 6:⁠4.

Jeee bɔ ni jɛmɛ shikamɔ yɔɔ fɛo ha, loo bɔ ni ekɔɔyɔŋ hi ha, loo ogbɔjɔ miishɛɛ shihilɛ lɛ ji nɔ ni kɛ anɔkwa miishɛɛ bahaa nɛkɛ aŋkroaŋkroi nɛɛ kɛ mɛi krokomɛi pii lɛ. Shi moŋ nilee ni amɛna akɛ amɛkɛ amɛwala miitsu nii taakɛ Nyɔŋmɔ suɔmɔnaa nifeemɔ ji, ni amɛmiihi shi yɛ tɛi ni e-Wiemɔ ni ji Biblia lɛ efolɔ eshwie lɛ anaa. (Jajelɔ 12:13) Agbɛnɛ, anɔkwa miishɛɛ teɔ shi yɛ amɛtsuii amli yɛ be mli ni amɛsusuɔ miishɛɛ be ni no mli lɛ ato paradeiso shihilɛ yɛ shikpɔŋ muu lɛ fɛɛ nɔ lɛ he lɛ.​—Luka 23:⁠43.

[Mfoniri ni yɔɔ baafa 25]

George, lsabel, kɛ amɛbii lɛ naa miishɛɛ yɛ Biblia lɛ kanemɔ mli

[Mfoniri ni yɔɔ baafa 26]

George kɛ Lillian naa miishɛɛ yɛ Kristofoi asɔɔmɔ nitsumɔ lɛ mli

[Mfoniri ni yɔɔ baafa 27]

Patrick kɛ Nina miina anɔkwa toiŋjɔlɛ mli ŋɔɔmɔ yɛ Yehowa sɔɔmɔ mli