Hiɛnɔkamɔ​—Hebuu Nɔ Ni He Hiaa Yɛ Jeŋ Ni Miishɛɛ Bɛ Mli Ko Mli

Korea gbekɛ nuu fioo ko miisumɔ ni eye ebua enyɛ koni etsɔ enaanyo kɔlegi nikaselɔ ko yiŋ yɛ bɔ ni ehe hiaa ni ana wɔsɛɛ be he hiɛnɔkamɔ he. Akɛni ekai nɔkwɛmɔ nɔ ko ni akɛha ni enu yɛ Kristofoi akpee ko shishi lɛ hewɔ lɛ, ebi nikaselɔ lɛ kɛji akɛ ebaaye ebua lɛ koni enu abɛbua ko shishi. Obalayoo lɛ kpɛlɛ nɔ. Kɛkɛ ni ekɛɛ: “Wekui enyɔ yɛ. Ohiafoi ji wekui enyɔ lɛ fɛɛ. Nugbɔ miinɛ waa, ni amɛtsũi enyɔ lɛ fɛɛ miidu waa. Weku kome bɛ miishɛɛ kwraa, ni amɛwie huhuuhu yɛ amɛtsu ni duɔ waa nɛɛ hewɔ. Shi weku kroko lɛ yɛ miishɛɛ yɛ be mli ni amɛtsaraa amɛtsu ni duɔ lɛ yiteŋ lɛ. Mɛni hewɔ sɔrɔto-feemɔ agbo yɔɔ wekui enyɔ nɛɛ ateŋ lɛ?” Obalayoo fioo lɛ kɛ miishɛɛ ha hetoo akɛ eleee. Kɛkɛ ni gbekɛ nu lɛ kɛɛ: “Ojogbaŋŋ, weku ni ji enyɔ lɛ yɛ miishɛɛ ejaakɛ amɛnine eshɛ adafitswaa nɔ kɛjɛ nɔyeli lɛ dɛŋ akɛ abaaha amɛ shia hee. No hewɔ lɛ amɛyɛ hiɛnɔkamɔ. No ji sɔrɔtofeemɔ lɛ!”

GBEKƐ NUU lɛ abɛbua lɛ tsɔɔ anɔkwale ko ( ni mli ka shi faŋŋ mli: Hiɛnɔkamɔ tsakeɔ bɔ ni wɔnuɔ shihilɛ he wɔhaa, ni bei pii lɛ yɛ bɔ ni wɔshihilɛ yɔɔ lɛ fɛɛ sɛɛ. Taakɛ eji yɛ wekui enyɔ ni etsɔɔ mli lɛ gbɛfaŋ lɛ, ehe hiaa ni wɔteŋ mɛi pii atsɔ kaai amli yɛ shihilɛ mli ​—helai amli naagbai, shika mli haomɔi, wekui amli naagbai, awuiyeli, kɛ kaai krokomɛi babaoo mli. Bei pii lɛ wɔnyɛɛɛ wɔha naagbai nɛɛ alaaje tamɔ bɔ ni wɔnyɛŋ wɔfa ni ahum ko ni tswaa aje he ni wɔyɔɔ lɛ. No hewɔ lɛ wɔnuɔ nijiaŋwujee he, akɛ eshwɛ wɔkome too​—yɛ kukufoo mli lɛ, wɔnyɛɛɛ nɔ ko kwraa wɔfee. Nɔ ni fiteɔ sane lɛ kwraa lɛ, ekolɛ atsɔɔ wɔ yɛ sɔlemɔ lɛ mli akɛ eshafeelɔi pii yɛ ni hiɛnɔkamɔ ko bɛ kɛha amɛ, ni ekolɛ nɔ ni baanyɛ afata he ji mɔ ko toi ni aaagbala kɛya naanɔ.

Awie akɛ, nɔ ni kɛ nɔnyɛɛ baa ji yelikɛbuamɔ ni anuɔ he akɛ abɛ kɛ hiɛnɔkamɔ ni anuɔ he akɛ abɛ. Shi wɔbaanyɛ wɔjie nɛkɛ nibii nɛɛ ateŋ ekome kɛya; ehe ehiaaa ni wɔteŋ mɔ ko afee mɔ ni bɛ hiɛnɔkamɔ. Ni hiɛnɔkamɔ diɛŋtsɛ baanyɛ afee tawuu nii ni hi fe fɛɛ ni akɛaatsi nɔ ni eshwɛ ni ji bɔ ni anuɔ he akɛ abɛ yelikɛbuamɔ lɛ naa. Kɛ wɔyɛ hiɛnɔkamɔ lɛ, wɔbaanyɛ wɔdamɔ shihiIɛ mli kaai lɛ anaa kɛ kpoofeemɔ kɛ tsui ni nyɔɔ mɔ mli fe ni wɔɔya nɔ wɔtswia shi kɛ mɔbɔ shihilɛ. Hɛɛ, hiɛnɔkamɔ ji hebuu nɔ ni he hiaa diɛŋtsɛ.

Ani nɔ ni akɛɔ nɛɛ haa oyiŋ feɔ bo kɔshikɔshi? Ani hiɛnɔkamɔ yɛ hewalɛ nakai aahu ekɛ enyɛɔ ekɛ sɔrɔtofeemɔ ni tamɔ nakai baa? Ni ani wɔteŋ mɔ fɛɛ mɔ baanyɛ ana hiɛnɔkamɔ ni anyɛɔ akɛ he fɔɔ nɔ?

Tamɔ Dadefai

Aje shishi aayoo hewalɛ kpele ni hiɛnɔkamɔ yɔɔ lɛ yɛ tsofa-feemɔ he nikasemɔ mli. Mɔ ko ni je Nazi Gbɔmɛi Ahiɛ kpatamɔ lɛ mli, nɔnyɛɛ he nikaselɔ kpanaa, Dr. Shlomo Breznitz jaje akɛ, yɛ shihilɛ mli naagbai pii amli lɛ, “nɔnyɛɛ baa kɛjɛɔ bɔ ni wɔtsɔɔ bɔ ni amɛwa ha lɛ mli wɔhaa lɛ mli, shi jeee taakɛ naagbai lɛ ji diɛŋtsɛ. Hiɛnɔkamɔ baa naagbai loo nɔnyɛɛ lɛ atsiimɔ shi.” Sane ko ni aŋma yɛ The Journal of the American Medical Association mli lɛ kɛɛ hiɛnɔkamɔ ji “tsofa ko ni yɔɔ hewalɛ waa.” American Health wolo tɛtrɛɛ lɛ bɔ amaniɛ akɛ: “Ayɛ helatsɛmɛi ahe nɔkwɛmɔ nii babaoo, titri lɛ mɛi ni yeɔ kansa hela lɛ, ni kɛ nɔ ko ha amɛlaaje hiɛnɔkamɔ pɛ kɛkɛ lɛ amɛshihilɛ kɛ amɛhela lɛ mli ewo wu​—aloo kɛ amɛna nɔ ko hee ni haa amɛ hiɛnɔkamɔ pɛ kɛkɛ lɛ amɛshihilɛ lɛ etsake efee nɔ ni hi.”​—Okɛto Abɛi 17:22 he.

Biblia kaselɔi le kɛjɛ blema bɔ ni hiɛnɔkamɔ he hiaa ha. Bɔfo Paulo wo Kristofoi hewalɛ yɛ 1 Tesalonikabii 5:8 akɛ: “Nyɛhaa wɔhiɛ akaa shi, . . . ni wɔbumɔ dadefai ni ji yiwalaheremɔ nɔhiɛkamɔ [hiɛnɔkamɔ] lɛ.” “Yiwalaheremɔ nɔhiɛkamɔ” lɛ tamɔ dadefai yɛ mɛɛ gbɛ nɔ?

Susumɔ nɔ ni dadefai tsuɔ lɛ he. Biblia bei amli asraafonyo lɛ buɔ dadefai loo akɔɔble fai ni akɛ toohetsɔi loo toohe wolo loo mama ehɔ mli. Dadefai lɛ buɔ eyitso he kɛjɛɔ gaimlibii ni filikiɔ, tsokpotii ni afɔɔ, kɛ tawuu mli klantei ni akɛfoɔ mɔ lɛ ahe. Belɛ, eka shi faŋŋ akɛ asraafoi ní sumɔŋ akɛ amɛaabumɔ dadefai lɛ ayi faaa, kɛ amɛyɛ eko. Shi dadefai ni abumɔɔ lɛ etsɔɔɔ akɛ anyɛŋ aye asraafonyo lɛ nɔ kunim, aloo kɛ akɛ nɔ ko tswa eyitso lɛ enuuu he; shi moŋ, dadefai haa nɔ ni tswaa nɔ lɛ kpalaŋɔ moŋ fe ni eeeye lɛ awui.

Taakɛ dadefai buɔ yitso he lɛ, nakai nɔŋŋ hiɛnɔkamɔ hu buɔ jwɛŋmɔ lɛ he. Ekolɛ hiɛnɔkamɔ haŋ wɔnyɛ wɔjie haomɔ fɛɛ haomɔ loo nibii ni fiteɔ lɛ kɛjɛ wɔjwɛŋmɔ mli tamɔ nɔ ni amɛjeee nɔ ko. Shi hiɛnɔkamɔ haa wɔnyɛɔ wɔdamɔɔ haomɔi loo nibii ni fiteɔ lɛ anaa ni eyeɔ ebuaa wɔ koni ekaye wɔjwɛŋmɔ, henumɔ, loo mumɔŋ hewalɛ awui.

Eka shi faŋŋ akɛ nuu anɔkwafo Abraham bú nɛkɛ okadi-feemɔ mli dadefai nɛɛ. Yehowa kɛɛ lɛ akɛ ekɛ ebinuu Isak ayasha afɔle. (1 Mose 22: 1, 2) Kwɛ bɔ ni ewaaa kwraa akɛ Abraham aaahao waa kɛyabote nijiaŋwujee mli, henumɔ ni ekolɛ eeeha etse Nyɔŋmɔ hiɛ atua. Mɛni bu ejwɛŋmɔ he kɛjɛ nɛkɛ henumɔi nɛɛ ahe? Hiɛnɔkamɔ ji nɔ titri. Taakɛ Hebribii 11:19 tsɔɔ lɛ, “ebu akɛ Nyɔŋmɔ yɛ hewalɛ ni ekɛaatee lɛ [Isak] shi kɛaajɛ gbohii ateŋ tete.” Nakai nɔŋŋ hu hiɛnɔkamɔ ni Hiob yɔɔ yɛ gbohiiashitee mli lɛ ye bua ni ebu ejwɛŋmɔ he kɛjɛ dɔlɛ ni ekolɛ no aaaha elomɔ Nyɔŋmɔ lɛ he. (Hiob 2:​9, 10; 14:13-15) Yesu Kristo hu na hewalɛ kɛ jwɛŋmɔŋ toiŋjɔlɛ yɛ wɔsɛɛ be he hiɛnɔkamɔ ni miishɛɛ yɔɔ mli ni eyɔɔ lɛ hewɔ yɛ piŋmɔ gbele lɛ fɛɛ sɛɛ. (Hebribii 12:⁠2) Hekɛnɔfɔɔ ni ayɔɔ akɛ Nyɔŋmɔ efeŋ efɔŋ kɔkɔɔkɔ, efeŋ mɔ ni ewiemɔ baaa mli lɛ ji nɔ ni anɔkwa hiɛnɔkamɔ damɔ nɔ.​—Hebribii 11:⁠1.

Nɔ ni Adamɔɔ nɔ Anaa Anɔkwa Hiɛnɔkamɔ

Taakɛ hemɔkɛyeli ji lɛ, anɔkwa hiɛnɔkamɔ damɔ anɔkwa saji, nii ni yɔɔ diɛŋtsɛ, kɛ anɔkwale nɔ. Enɛ baaha mɛi komɛi anaa akpɛ amɛhe. Taakɛ niŋmalɔ ko wie he lɛ, “etamɔ nɔ ni mɛi pii susuɔ akɛ hiɛnɔkamɔ ji buului agbɛ ni atsɔɔ nɔ akpoɔ anɔkwale.” Ni kɛlɛ, anɔkwa hiɛnɔkamɔ jeee miishɛɛ loo shweremɔ ni awo shi yɛ he ni atsi ato, hemɔkɛyeli ni ŋɔɔmɔ bɛ mli, akɛ wɔnine baashɛ nɔ fɛɛ nɔ ni wɔsumɔɔ lɛ nɔ, aloo akɛ abaana wɔ naagbai bibii lɛ fɛɛ anaa tsabaa aha wɔ. Shihilɛ mli nibii ni yɔɔ diɛŋtsɛ lɛ haa nɛkɛ yaka yiŋsusumɔi ni yɔɔ ŋmɔlɔ nɛɛ fɛɛ feɔ efolo.​—Jajelɔ 9:⁠11.

Hiɛnɔkamɔ diɛŋtsɛ lɛ yɛ sɔrɔto. Ebaa kɛjɛɔ nilee mli, jeee nɔ ni ashweɔ ni ana mli. Susumɔ weku ni ji enyɔ ni yɔɔ abɛbua ni awie he kɛjɛ shishijee lɛ mli lɛ he okwɛ. Mɛɛ hiɛnɔkamɔ osusuɔ akɛ amɛbaana kɛ ale amɛ nɔyeli lɛ akɛ nɔyeli ni yeee eshiwoi anɔ lɛ? Shi, shiwoo lɛ kɛ odaseyeli ni tsɔɔ akɛ anyɛɔ akɛ he fɔɔ enɔ lɛ baanyɛ aha weku lɛ ana nɔdaamɔ nɔ kɛha hiɛnɔkamɔ ni ma shi shiŋŋ.

Nakai nɔŋŋ hu Yehowa Odasefoi ni yɔɔ ŋmɛnɛ lɛ yɛ hiɛnɔkamɔ ni akɛkpɛtɛ nɔyeli ko he kpaakpa​—Nyɔŋmɔ Maŋtsɛyeli lɛ. Maŋtsɛyeli nɛɛ ji nɔ ni hɔ Biblia mli shɛɛ sane lɛ teŋ tuuŋtu. Afii akpekpei abɔ nɛ ni efee hiɛnɔkamɔ jɛɛhe kɛha yei kɛ hii, tamɔ Abraham. (Hebribii 11:10) Nyɔŋmɔ ewo shi akɛ ebaatsɔ e-Maŋtsɛyeli lɛ nɔ ekɛ jeŋ gbɛjianɔtoo momo ni ekpɔtɔ nɛɛ aba naagbee koni ekɛ ehee aba. (Romabii 8:​20-22; 2 Petro 3:13) Maŋtsɛyeli hiɛnɔkamɔ nɛɛ ji nɔ ni yɔɔ diɛŋtsɛ, ejeee lamɔ. Ejɛɛhe​—Yehowa Nyɔŋmɔ, Jeŋ Muu Fɛɛ Nuŋtsɔ Maŋtsɛ lɛ​—kɛ wɔɔwie ni jeee sane he wɔwoɔ lɛ, ji mɔ ni anyɛŋ akɛ efɔŋ ko afolɔ enaa. Nɔ ni he hiaa wɔ pɛ ji ni wɔpɛi Nyɔŋmɔ adebɔɔ ni anaa nɛɛ mli koni wɔna akɛ eyɛ shihilɛ mli, ni akɛ eyɛ hewalɛ babaoo ni ekɛaaha eshiwoi fɛɛ aba mli. (Romabii 1:20) Nɔ ni he hiaa ni wɔfee pɛ ji ni wɔpɛi bɔ ni ekɛ adesai yeɔ haa lɛ mli koni wɔna akɛ ewiemɔ efeee efolo ni ebaaa mli.​—Yesaia 55:⁠11.

Shi nɔ ni yɔɔ mɔbɔ ji akɛ, mɛi ni kɛɔ akɛ amɛji Kristofoi lɛ ateŋ mɛi pii ahiɛ ekpa anɔkwa hiɛnɔkamɔ nɛɛ nɔ. Nyɔŋmɔ jamɔ he nikaselɔ Paul Tillich kɛɛ yɛ shiɛmɔ wiemɔ ko ni ekɛha nyɛsɛɛ nɛɛ mli akɛ: “[Mra be mli] Kristofoi lɛ kase bɔ ni afeɔ amɛɔ naagbee be lɛ. Shi fiofio lɛ amɛbakpa mɛ ni amɛɔ nɛɛ. . . . Gbɛkpamɔ kɛha shihilɛ hee yɛ shikpɔŋ nɔ lɛ mli bagbɔjɔ, eyɛ mli akɛ mɔ fɛɛ mɔ sɔleɔ yɛ he yɛ Nuŋtsɔ lɛ Sɔlemɔ lɛ mli​—“Afee osuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ!”

Mɛɛ oshara nɛ! Gbɔmɛi akpekpei abɔ, akpekpei toi akpei abɔ po ni hiɛnɔkamɔ he hiaa amɛ waa lɛ bɛ eko, ni kɛlɛ eyɛ kɛha amɛ yɛ gbɛ ni waaa kwraa nɔ yɛ amɛ diɛŋtsɛ amɛ Bibliai lɛ amli. Kwɛmɔ shihilɛ gbonyo ni yɔɔ lɛ! Akɛni hiɛnɔkamɔ kpakpa ko bɛ ni baabu amɛjwɛŋmɔ he hewɔ lɛ, ani eyɛ naakpɛɛ akɛ “jwɛŋmɔ ni esaaa” ni efee yeyeeye aaaha mɛi pii kɛ jeŋba shara kɛ awuiyeli awo je lɛ mli fɛɛ muji? (Romabii 1:28) Ehe miihia waa akɛ wɔkwɛ ni wɔkagbee tsɔne ni tamɔ nɛkɛ mli. Ni wɔɔshɛ hiɛnɔkamɔ dadefai lɛ wɔfɔ moŋ lɛ, ehe miihia ni wɔwaje lɛ be fɛɛ be.

Bɔ ni Ooofee Otswa Ohemɔkɛyeli Oma Shi

Gbɛ ni hi fe fɛɛ ni atsɔɔ nɔ atswaa hemɔkɛyeli amaa shi ji ni ayoo ejɛɛhe, Yehowa Nyɔŋmɔ. Okɛ hiɛdɔɔ akase e-Wiemɔ ni ji Biblia lɛ. Romabii 15:4 kɛɔ akɛ: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ Ŋmalɛi lɛ amli miishɛjemɔ lɛ ana hiɛnɔkamɔ.”

Agbɛnɛ hu, esa akɛ wɔna nɔmimaa akɛ wɔhiɛnɔkamɔ kɛha wɔsɛɛ be lɛ jeee nɔ ko ni asusuɔ kɛkɛ ni bɛ mli. Esa akɛ wɔha efee nɔ ni yɔɔ diɛŋtsɛ yɛ wɔjwɛŋmɔi amli. Ani oyɛ hiɛnɔkamɔ akɛ ooohi shi kɛya naanɔ yɛ Paradeiso yɛ shikpɔŋ nɔ? Ani obaasumɔ ni okɛ osuɔlɔi ni amɛgboi lɛ akpe kɛ atee amɛ shi kɛba shikpɔŋ nɔ? Kɛji nakai ni lɛ, ani ofeɔ ohe mfoniri akɛ oyɛ jɛmɛ diɛŋtsɛ yɛ nakai be lɛ mli? Akɛ nɔkwɛmɔ nɔ lɛ, Yesaia 65:​21, 22 wieɔ bɔ ni mɔ fɛɛ mɔ baama lɛ diɛŋtsɛ etsu loo eshia ni ehi mli lɛ he. Ani obaanyɛ oŋamɔ ohiŋmɛii ni osusu bɔ ni ota oshia hee lɛ yiteŋ ni ootsu nii yɛ jɛmɛ, ni okɛ plɛkoo miikala naagbee ziŋele lɛ he okwɛ? Bo lɛ susumɔ bɔ ni okwɛɔ ohe fɛɛ kɛkpeɔ yɛ otsuinaa kɛ nitsumɔ lɛ fɛɛ sɛɛ lɛ he okwɛ. Tsumaa he hoo-feemɔ lɛ eba shi; owoɔ ohiɛ nɔ ni okwɛɔ shikpɔŋ lɛ beni shwane susumai lɛ shwieɔ nɔ lɛ. Kɔɔyɔɔ ni tswaa blɛoo ŋmãii haa tsei lɛ kpaa blɛoo kɛyaa kɛbaa ni ehaa ohe jɔɔ bo kɛjɛɔ nitsumɔ lɛ mli dɔlɛ loo latsa lɛ he. Onuɔ gbekɛbii aŋmɔlɔ ni efutu loofɔji alalai ahe yɛ otoiŋ. Onuɔ osuɔlɔi asanegbaa he yɛ shia lɛ mli.

Miishɛɛ be ni tamɔ nɛkɛ hesusumɔ lɛ jeee efolo; shi moŋ eji gbalɛ ni baaba mli diɛŋtsɛ lɛ nɔjwɛŋmɔ (2 Korintobii 4:18) Babaoo ni nakai gbɛkpamɔ lɛ ji nɔ ni yɔɔ diɛŋtsɛ kɛha bo lɛ, babaoo hu ohiɛnɔkamɔ akɛ obaahi jɛmɛ lɛ mli waa ji no. Hiɛnɔkamɔ ni anaa faŋŋ ni yɔɔ shiŋŋ nɛkɛ lɛ baabu ohe kɛjɛ henumɔ ni ooona ni aaaha ‘ohiɛ agbo sanekpakpa lɛ he’ ni eha ojo mɛi krokomɛi ni ooogba amɛ sane nɛɛ lɛ naa foi lɛ he. (Romabii 1:16) Nɔ ni tamɔɔɔ nakai lɛ, obaasumɔ ni ‘oshwa yɛ hiɛnɔkamɔ lɛ mli’ taakɛ Paulo fee lɛ, kɛtsɔ hekɛnɔfɔɔ ni okɛaagba mɛi krokomɛi lɛ nɔ.​—Hebribii 3:⁠6.

Babaoo yɛ ni fe naanɔ wɔsɛɛ be ni kɛ hiɛnɔkamɔ haa mɛi kɛkɛ. Hiɛnɔkamɔ jɛɛhei yɛ amrɔ nɛɛ hu. Yɛ mɛɛ gbɛ nɔ? Afii ohai enumɔ Ŋ.B. Roma maŋ onukpa ko ni atsɛɔ lɛ cassiodorus kɛɛ: “Mɔ ni yɔseɔ sɛɛnamɔi ni eba momo lɛ naa wɔsɛɛ be mli sɛɛnamɔi ahe hiɛnɔkamɔ.” Wiemɔi ni nilee yɔɔ mli nɛ! Mɛɛ miishɛjemɔ wɔbaana yɛ wɔsɛɛ be mli jɔɔmɔi ahe shiwoo lɛ mli kɛ wɔhiɛ esɔɔɔ wɔ ŋmɛnɛŋmɛnɛ beaŋ jɔɔmɔi lɛ?

Sɔlemɔ hu tswaa hiɛnɔkamɔ emaa shi bianɛ po. Kɛfata wɔsɛɛ be mli sɔlemɔ ni wɔfeɔ lɛ he lɛ, esa akɛ wɔsɔle yɛ amrɔ nɛɛ hiamɔ nii ahe hu. Ekolɛ wɔhiɛnɔkamɔ kɛ wɔsɔlemɔ ji ni wekukpaa kpakpa aba wɔkɛ wɔweku lɛ mlibii kɛ nanemɛi Kristofoi ateŋ, aloo wɔsɔleɔ yɛ wɔ mumɔŋ niyenii ni baanyiɛ sɛɛ lɛ he, loo kɛha wɔ heloo naa hiamɔ nii po ni wɔnine aaashɛ nɔ. (Lala 25:4; Mateo 6:11) Hiɛnɔkamɔi ni tamɔ nɛkɛ ni wɔkɛaawo Yehowa dɛŋ lɛ baaye abua wɔ ni wɔŋmɛ wɔtsui shi gbi fɛɛ gbi. (Lala 55:23) Yɛ be mli ní wɔyaa nɔ wɔŋmɛɔ wɔtsui shi lɛ, wɔtsuishiŋmɛɛ lɛ diɛŋtsɛ po baawaje hiɛnɔkamɔ dadefai lɛ.​—Romabii 5:​3-5.

Ni Wɔɔna Gbɔmɛi Ahe Jwɛŋmɔ Kpakpa

Jwɛŋmɔ ni susuuu nibii kpakpai ahe lɛ tamɔ ŋkanale yɛ hiɛnɔkamɔ dadefai lɛ he. Enyɛ ekpeɔ loo eyeɔ lɛ, ni fiofio lɛ ebaanyɛ eha dadefa lɛ afee nɔ ni sɛɛnamɔ bɛ he. Ani okase ole bɔ ni ooofee oyɔse jwɛŋmɔ ni ejaaa koni owuu oshi enɛ? Kaaha jwɛŋmɔ ni ejaaa ni ahiɛ akɛ jwɛŋmɔ kpakpa ni abɛ yɛ mɛi ahe kɛ amɛhe wiemɔ fɔŋ tamɔ nilee pɛpɛɛpɛ lɛ miilaka bo. Yɛ anɔkwale mli lɛ jwɛŋmɔ kpakpa ni mɔ ko bɛ biii ni ana nilee fioo po.

Ewaaa kwraa akɛ wɔɔna wɔnanemɛi gbɔmɛi ahe jwɛŋmɔ fɔŋ akɛ sɛɛnamɔ ko bɛ amɛhe. Mɛi komɛi yɛ ni yɛ tsutsu niiashikpamɔi ni kɛ piŋmɔ ba amɛnɔ lɛ hewɔ lɛ, amɛbɛ hiɛnɔkamɔ ko akɛ amɛnine aaashɛ yelikɛbuamɔ loo miishɛjemɔ nɔ kɛjɛ gbɔmɛi adɛŋ dɔŋŋ. No hewɔ lɛ amɛkwɛɔ jogbaŋŋ koni amɛkayagbee shihilɛ ni tamɔ nɛkɛ mli ekoŋŋ. Amɛbaashashao shi po akɛ amɛaaya Kristofoi onukpai aŋɔɔ kɛha yelikɛbuamɔ yɛ amɛnaagbai amli.

Biblia lɛ yeɔ ebuaa wɔ koni wɔŋmɛ pɛpɛɛpɛ yɛ bɔ ni wɔsusuɔ gbɔmɛi ahe wɔhaa lɛ mli. Eji anɔkwale akɛ jwɛŋmɔ bɛ mli akɛ wɔkɛ wɔhiɛnɔkamɔi fɛɛ aaafɔ gbɔmɛi anɔ. (Lala 146:​3, 4) Shi onukpai sɔmɔɔ akɛ ‘gbɔmɛi ateŋ nikeenii’ ni jɛ Yehowa ŋɔɔ yɛ Kristofoi asafo lɛ mli. (Efesobii 4:​8, 11) Amɛji Kristofoi ni yɔɔ niiashikpamɔ ni kɛ anɔkwayeli sumɔɔ ni amɛtsɔmɔ tamɔ “abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa.”​—Yesaia 32:⁠2.

Mɛi krokomɛi pii hu yɛ Kristofoi asafo lɛ mli ni susuɔ hiɛnɔkamɔ jɛɛhe ni amɛaatsɔmɔ lɛ he waa. Susumɔ amɛteŋ mɛi akpei ohai abɔ ni amrɔ nɛɛ amɛsɔmɔɔ akɛ nyɛmɛi, tsɛmɛi, nyɛmimɛi yei, nyɛmimɛi hii, kɛ bii kɛha mɛi ni amɛbɛ amɛ diɛŋtsɛ amɛwekui lɛ ahe okwɛ; susumɔ mɛi abɔ ni tamɔ nanemɛi ni “kpɛtɛɔ mɔ gbagbalii fe nyɛmi” kɛhaa mɛi ni ebote haomɔ mli lɛ ahe okwɛ.​—Abɛi 18:24: Marko 10:⁠30,

Kɛji akɛ osɔle oha Yehowa kɛha yelikɛbuamɔ lɛ, kaaŋmɛɛ ohiɛnɔkamɔ he. Benɛ ekolɛ eha osɔlemɔ lɛ hetoo momo; onukpa ko loo Kristofonyo ko ni eda yɛ mumɔŋ efee klalo akɛ eeeye ebua bo bianɛ kɛ oha ele ohiamɔ nii lɛ. Hiɛnɔkamɔ ni ŋmɛɔ pɛpɛɛpɛ ni anaa yɛ gbɔmɛi amli lɛ buɔ wɔhe kɛjɛɔ wɔhe shi ni wɔɔgbala kɛaajɛ mɔ fɛɛ mɔ he ni wɔtse wɔhe wɔyahi he ko banee, ni kɛ pɛsɛmkunya kɛ jeŋba ni esaaa aaaba lɛ he.​—Abɛi 18:⁠1.

Agbɛnɛ, kɛ naagba ko ka wɔkɛ wɔnaanyo heyelilɔ ko teŋ lɛ, esaaa akɛ wɔtsuɔ he nii kɛ jwɛŋmɔ gbonyo ni tamɔ nɔ ni hiɛnɔkamɔ ko kwraa bɛ mli. Fɛɛ sɛɛ lɛ, “suɔmɔ . . . hiɛ kaa nii fɛɛ nɔ.” (1 Korintobii 13:​4-7) Bɔɔ mɔdɛŋ ni ona nyɛmimɛi hii kɛ yei Kristofoi lɛ taakɛ Yehowa naa amɛ lɛ​—kɛ hiɛnɔkamɔ. Gbalamɔ ojwɛŋmɔ kɛya amɛsui kpakpai lɛ anɔ, esa akɛ ohe amɛ oye, ni ogbala ojwɛŋmɔ kɛya naagbai lɛ anaa tsabaa ní ooona nɔ. Hiɛnɔkamɔ ni tamɔ nɛkɛ buɔ wɔhe kɛjɛɔ ŋwanejeei kɛ naataomɔi ni he baaa sɛɛnamɔ kɛhaaa mɔ ko lɛ ahe.

Kaaŋmɛɛ ohe oha hiɛnɔkamɔ ni bɛ je ni gboɔ nɛɛ mli lɛ kɔkɔɔkɔ. Hiɛnɔkamɔ yɛ​—kɛha wɔnaanɔ wɔsɛɛ be kɛ tsabaa hu kɛha wɔ amrɔ nɛɛ naagbai lɛ. Ani obaamɔ hiɛnɔkamɔ mli? Kɛ Wɔbũ yiwalaheremɔ hiɛnɔkamɔ lɛ tamɔ dadefai lɛ, no lɛ Yehowa tsulɔ ko efeŋ mɔ ni bɛ yelikɛbuamɔ nɔ​—ni bɔ ni shihilɛ lɛ mli wa waa ha lɛ kɔɔɔ he eko. Kɛji akɛ wɔ diɛŋtsɛ lɛ wɔŋmɛɛɛ he lɛ, nɔ ko nɔ ko bɛ ŋwɛi loo shikpɔŋ nɔ ni baanyɛ ashɔ̃ hiɛnɔkamɔ ni Yehowa kɛha wɔ lɛ kɛjɛ wɔdɛŋ.​—Okɛto Romabii 8:​38, 39 he.