Biblia Shikpɔŋ He Nilee Ani Eja?

HULU lɛ nyɔ shi yɛ Palestina etsɛko. Afi lɛ ji 1799. Beni French Asraafoi lɛ enyiɛ gbi ni emli dɔlɛ lɛ naa wa lɛ sɛɛ lɛ, amɛbɔ ŋsara yɛ he ko, ni Napoléon, tatsɛnukpa lɛ ka ebuu mli eejɔɔ ehe. Etsuji lɛ ateŋ mɔ kome kɛ kɛnɛrɛ ni asũ miikane French Biblia ko waa.

Eka shi faŋŋ akɛ enɛ tee nɔ shii abɔ yɛ Napoléon tafaa be yɛ Palestina lɛ mli. Ekai ni eŋma yɛ sɛɛ mli akɛ: “Beni wɔbɔ ŋsara yɛ nakai blema maji ni etsɔmɔ amaŋfɔi lɛ amli lɛ, amɛkaneɔ Ŋmalɛ daa gbɛkɛnaashi . . . Bɔ ni nibii lɛ jejee amɛhe kɛ bɔ ni nibii ni atsɔɔ mli lɛ ji anɔkwale ha lɛ yɛ faŋŋ: amɛsa nɛkɛ maŋ nɛɛ yɛ afii ohai abɔ kɛ tsakemɔi babaoo lɛ fɛɛ sɛɛ.”

Yɛ anɔkwale mli lɛ, ewaaa kɛhaaa mɛi ni faa gbɛ kɛyaa Boka Teŋgbɛ lɛ akɛ amɛkɛ Biblia mli saji aaato ŋmɛnɛŋmɛnɛ gbii nɛɛ amli hei ni maji lɛ yɔɔ lɛ ahe. Dani French Asraafoi lɛ aaaye Mizraim nɔ lɛ, no mli lɛ nɔ ko fioo pɛ gbɔi le yɛ nakai blema shikpɔŋ lɛ he. Kɛkɛ ni jeŋ nilelɔi kɛ woloŋlelɔi, ni Napoléon kɛ amɛ eba Mizraim lɛ je shishi akɛ amɛaajie tsutsu Mizraim anunyam kɛ agbojee lɛ kpo amɛtsɔɔ je lɛ. Enɛ eha efee mlɛo akɛ aaafee “nyɔjiahiɛmɔ shɛii” ni anyɛ lsraelbii lɛ anɔ awo mli be ko lɛ he mfoniri ​—2 Mose 1:​13, 14.

Gbi ni akpɔ amɛ kɛjɛ Mizraim lɛ gbɛkɛnaashi mli lɛ, lsraelbii lɛ bua amɛhe naa yɛ Rameses ni no sɛɛ lɛ amɛnyiɛ kɛtee “ŋa lɛ naa.” (2 Mose 12:​37; 13:20) Biɛ ji he ni Nyɔŋmɔ fã akɛ “amɛdɔ amɛyi ni amɛyabɔ ŋsara . . . yɛ ŋshɔ lɛ naa.” Atsɔɔ nifeemɔ ni yɔɔ naakpɛɛ nɛɛ shishi akɛ “amɛdu gbɛ yɛ shikpɔŋ lɛ nɔ,” ni Mizraim maŋtsɛ lɛ kɛ esraafoi kɛ tashwiilii 600 tiu amɛ koni amɛyamɔmɔ amɛtsutsu tsuji nɛɛ ekoŋŋ.​—2 Mose 14:​1-9.

Gbɛfaa kɛ Mizraim Shimɔ Lɛ

Taakɛ Josephus, Ŋ.B. klɛŋklɛŋ afii oha lɛ mli yinɔsaneŋmalɔ lɛ tsɔɔ lɛ, Mizraim asraafoi lɛ shwie lsraelbii lɛ kɛtee “he ko bibioo” ni amɛdu amɛ yɛ “gɔŋ loo tɛsaa somromoo ko ni anyɛɛɛ atsɔ jɛmɛ kɛje kpo lɛ kɛ ŋshɔ lɛ teŋ.” Anyɛɛɛ ale he pɔtɛɛ ni lsraelbii lɛ fo Ŋshɔ Tsuru lɛ yɛ lɛ kɛ nɔmimaa ŋmɛnɛ moŋ. Shi ewaaa akɛ aaajɛ gɔŋ ko ni kwɛɔ Ŋshɔ Tsuru lɛ kooyigbɛ lɛ yiteŋ afee nii ni ba nɛɛ he mfoniri yɛ jwɛŋmɔ mli. Nɔ ko ni gbalaa mɔ jwɛŋmɔ ji akɛ, atsɛɔ gɔŋ lɛ akɛ Jebel ‘Atagah, ni eshishi ji “Yiwalaheremɔ Gɔŋ.” Nɔ ni ka nɛkɛ gɔŋ nɛɛ kɛ Ŋshɔ Tsuru lɛ teŋ ji ŋa fioo ko ni naa yamuaa yɛ he ni ŋmeŋmei bibii lɛ boteɔ ŋshɔ lɛ mli yɛ lɛ ahe. Nɔ ni yɔɔ Ŋshɔ Tsuru lɛ afa gbɛ kroko ji shia ŋa teŋ shikpɔŋ kpakpa ni nuhiŋmɛii pii yɔɔ nɔ, ni atsɛɔ lɛ ‘Ayun Musa, ni eshishi ji “Mose nu bui.” Shikpɔŋ ni yɔɔ ŋshɔ ni yɔɔ hei enyɔ nɛɛ shishi lɛ kpelekeɔ shi kɛyaa shishi fiofio, shi yɛ hei krokomɛi lɛ enyɔɔ shi trukaa kɛyaa aaafee ninetalɔi 30 kɛmiiya 60.

Kristendom jamɔ he nikaselɔi ni bɛ hemɔkɛyeli lɛ ebɔ mɔdɛŋ akɛ amɛaagbe naakpɛɛ nii ni Nyɔŋmɔ fee beni eha Ŋshɔ Tsuru lɛ mli gba koni lsraelbii lɛ anyɛ ajo foi kɛtsɔ shikpɔŋ gbiŋ nɔ lɛ he guɔ. Amɛkɛɛ nɔ ni tee nɔ nɛɛ ba yɛ he ko ni ŋmɔtɔ ko ni yɔɔ Ŋshɔ Tsuru lɛ kooyigbɛ yɔɔ lɛ gbɛ. Shi enɛ ejaaa yɛ Biblia mli saji ni aŋmala ashwie shi, ni tsɔɔ shii abɔ akɛ amɛfo Ŋshɔ Tsuru lɛ yɛ he ni nui pii yɔɔ ni baanyɛ ashiu Farao kɛ etabilɔi lɛ fɛɛ, hɛɛ ni emi amɛ fɛɛ lɛ naa.​—2 Mose 14:​26-31; Lala 136:​13-15; Hebribii 11:⁠29.

Sinai Ŋa Kpalanaa Lɛ

Atsɔɔ shihilɛi ni wa ni anaa yɛ Sinai shikpɔŋ ni ŋshɔ miihe abɔle he lɛ nɔ lɛ mli faŋŋ yɛ Biblia mli saji ni tsɔɔ Israel tsomlomɔ yɛ ŋa lɛ nɔ lɛ mli. (5 Mose 8:15) No hewɔ lɛ, ani maŋ muu fɛɛ baanyɛ abua amɛhe naa yɛ Sinai Gɔŋ lɛ shishi ni akɛ Nyɔŋmɔ Mla aha amɛ koni yɛ sɛɛ mli lɛ ni “amɛgbala amɛhe shi ni amɛya damɔ sɛɛ flɛŋŋ”? (2 Mose 19:​1, 2; 20:18) Ani gbɛ ni da bɔ ni sa yɛ ni aaaha gbɔmɛi ayifalɛ ni shɛɔ aaafee akpekpei etɛ atsi amɛhe nɛkɛ?

Afii ohai 19 lɛ mli gbɛfalɔ kɛ Biblia he nilelɔ, Arthur Stanley, yasara he ni Sinai Gɔŋ lɛ yɔɔ lɛ ni etsɔɔ nɔ ni ekɛ ekuu lɛ na beni amɛkwɔ Ras Safsafa gɔŋ lɛ akɛ: “Bɔ ni ena wɔnɔ hewalɛ eha, taakɛ ebaa mɔ fɛɛ mɔ ni ena ni etsɔɔ mli lɛ nɔ lɛ ba amrɔ nɔŋŋ, trukaa. . . . Naa ŋa ni tamɔ wuɔfɔ su ni mli kwɔ voo ni lɛɛ waa ni kpelekeɔ shi kɛyaa tɛsaai kɛ amɛnaa gɔgɔmee lɛ ashishi tɔŋŋ . . . Kɛ asusu bɔ ni ŋa kɛ gɔŋ tsamɔi nɛɛ eko bɛ nɛkɛ he nɛɛ kwraa lɛ he lɛ, ebafeɔ odaseyeli ni he hiaa waa yɛ anɔkwale ni nɔ ni agba nɛɛ ji lɛ he, akɛ aaana ŋa kɛ gɔŋ tsamɔ ko ni tamɔ nɛkɛ, ni akɛ yɛ blema Sinai niiaŋ gbɛ nɔŋŋ.”

Shiwoo Shikpɔŋ Lɛ

Beni Israel etsomlo yɛ ŋa lɛ nɔ afii 40 lɛ, Mose tsɔɔ bɔ ni shikpɔŋ ni amɛbaabote nɔ lɛ yɔɔ ha lɛ mli: “Yehowa o-Nyɔŋmɔ lɛ kɛo miiya shikpɔŋ kpakpa nɔ, shikpɔŋ ni faai kɛ nu bui kɛ kpaakpoi yɔɔ nɔ, ni amɛjɛɔ jɔɔi kɛ gɔji lɛ amli amɛhoɔ.”​—5 Mose 8:⁠7.

Etsɛɛɛ ni ana bɔ ni nɛkɛ shiwoo nɛɛ ji anɔkwale loo eja ha lɛ yɛ be mli ni maŋ muu lɛ fɛɛ ​—hii, yei, gbekɛbii, kɛ gbɔi​—bua amɛhe naa yɛ Shekem jɔɔ ni jɛmɛ yɔɔ frɔ̃frɔ̃, yɛ Ebal Gɔŋ lɛ kɛ Gerizim Gɔŋ lɛ teŋ lɛ. Akutsei ekpaa damɔ Gerizim Gɔŋ lɛ shishi. Akutsei ekpaa ni shwɛ lɛ hu bua amɛhe naa yɛ jɔɔ lɛ afa kroko yɛ Ebal Gɔŋ lɛ shishi, koni amɛbo ŋwɛi jɔɔmɔi ni maŋ muu lɛ fɛɛ baana mli ŋɔɔmɔ kɛ amɛbo Yehowa Mla toi, kɛ loomɔi ni baaba amɛnɔ kɛ amɛyeee Nyɔŋmɔ Mla lɛ nɔ lɛ. (Yoshua 8:​33- 35) Shi ani gbɛ ni da yɛ bɔ ni aaaha maŋ muu lɛ fɛɛ aho jɔɔ ni elɛɛɛ nɛɛ mli? Ni te fee tɛŋŋ ni amɛ fɛɛ amɛnu ni ŋmɛnɛŋmɛnɛ beaŋ tsɔnei ni awieɔ awoɔ mli ni gbɛɛɔ bɛ jɛmɛ lɛ?

Yehowa Nyɔŋmɔ baanyɛ atsɔ naakpɛɛ gbɛ nɔ aha Levibii lɛ agbeei ada ni eya shɔŋŋ. Shi etamɔ nɔ ni naakpɛɛ nii ni tamɔ nɛkɛ he ehiaaa. Nibii ni baaha gbee agbɛɛ ni eya shɔŋŋ yɛ jɔɔ nɛɛ mli lɛ hi jogbaŋŋ. Afii ohai 19 lɛ mli Biblia he nilelɔ Alfred Edersheim ŋma akɛ: “Gbɛfalɔi fɛɛ kpɛlɛɔ saji enyɔ ko nɔ: 1. Akɛ ewaŋ kwraa akɛ aaanu wiemɔ fɛɛ wiemɔ ni awieɔ kɛjɛɔ jɔɔ lɛ mli lɛ faŋŋ yɛ Ebal kɛ Gerizim gɔji lɛ anɔ. 2. Akɛ nɛkɛ gɔji enyɔ nɛɛ ha lsraelbii lɛ fɛɛ na shidaamɔ he ni da.”

Afii ohai 19 lɛ mli Biblia he nilelɔ kroko, William Thomson, tsɔɔ eniiashikpamɔ yɛ nakai jɔɔ lɛ mli lɛ mli yɛ ewolo, The Land and the Book lɛ mli akɛ: “Mibolɔ koni mikɛbo gbeejijemɔ lɛ toi, ni misusu bɔ ni eeeji eha beni Levibii ni gbee yaa shɔŋŋ lɛ jaje akɛ . . . ’Alomɔ nuu ni feɔ amaga ni ashwie, ni ji nihii nii kɛha Yehowa lɛ.’ Kɛ AMEN! agbo ni enɔheremɔ lɛ naawalɛ shɛɔ toi nyɔŋma, ni jɛ asafo babaoo nɛɛ agbeei ni teɔ shi ni lɛɛɔ, ni jijeɔ kɛjɛɔ Ebal kɛyaa Gerizim, kɛ agbɛnɛ kɛjɛ Gerizim kɛmiiba Ebal lɛ mli lɛ.”​—Okɛto 5 Mose 27:​11-15 he.

Yezreel Jɔɔ Lɛ

Nɔ ni yɔɔ Shekem kooyigbɛ ji jɔɔ kroko ni baa nii babaoo, nɔ ni kwɔɔ kɛjɛɔ ŋshɔ lɛ ŋɛlɛ nɔ kɛyaboteɔ ŋa agbo ko nɔ lɛ. Atsɛɔ nɛkɛ shikpɔŋ nɛɛ fɛɛ akɛ Yezreel Jɔɔ, akɛ Yezreel maŋtiase lɛ gbɛi tsɛ́ biɛ. Nɔ ni yɔɔ jɔɔ lɛ kooyigbɛ ji Galilea gɔji lɛ, he ni Yesu maŋ, Nazaret yɔɔ lɛ. George Smith tsɔɔ mli yɛ ewolo, The Historical Geography of the Holy Land lɛ mli akɛ: “Nazaret kã he ko ni baa shi yɛ ŋmeŋmei ateŋ; shi kɛ okwɔ kɛtee nɛkɛ he ni baa shi nɛɛ pɛ lɛ, . . . mɛni po okɛ ohiŋmɛi naa nɛɛ! [Yezreel Jɔɔ lɛ] ka ohiɛ nɛɛ, kɛ emli . . . tawuu hei . . . Eji Kpaŋmɔ Momo lɛ yinɔsane he shikpɔŋ he mfoniri.”

Nɛkɛ jɔɔ nɛɛ mli shitsalɔi ni taoɔ blema nibii ahe nilee tsa maŋtsɛyeli maŋtiasei ni Israel ye nɔ kunim yɛ Yoshua gbii lɛ amli, tamɔ Tanak, Megido, Yokneam, kɛ ekolɛ Kedesh ni etsɔmɔ amaŋfɔ koikoi lɛ yɛ. (Yoshua 12:​7, 21, 22) Nɛkɛ he nɛɛ nɔŋŋ, yɛ Kojolɔ Barak kɛ Kojolɔ Gideon gbii lɛ amli lɛ, Yehowa tsɔ naakpɛɛ gbɛ nɔ ejie ewebii kɛjɛ henyɛlɔi amaji ni he wa waa lɛ adɛŋ.​—Kojolɔi 5:​1, 19- 21; 6:​33; 7:⁠22.

Afii ohai abɔ sɛɛ lɛ, Maŋtsɛ Yehu ta okpɔŋɔ nɔ kɛtsɔ jɔɔ nɛɛ mli ni ekwɔ kɛtee Yezreel maŋ lɛ mli koni eyatsu Yehowa fɔbuu kojomɔ he nii eshi Izebel kɛ Ahab we ni amɛkwa Yehowa lɛ. Ewaaa akɛ aaajɛ buu-he ni yɔɔ Yezreel lɛ nɔ ana Yehu asraafoi ni bɛŋkɛɔ ni amɛkɛ amɛ teŋ jɛkɛmɔ aaafee shitooi 12 lɛ. No hewɔ lɛ, Maŋtsɛ Yehoram baanyɛ ana be babaoo ni ekɛtsu klɛŋklɛŋ bɔfo ni ta okpɔŋɔ nɔ kɛ mɔ ni ji enyɔ, koni yɛ naagbee lɛ, Israel Maŋtsɛ Yoram kɛ Yuda Maŋtsɛ Ahazia amia ni amɛtara amɛshwiilii amli ni amɛkɛ Yehu ayakpe dani eshɛ Yezreel maŋ lɛ mli. Shi Yehu gbe Yoram amrɔ nɔŋŋ. Ahazia jo foi, shi apila lɛ yɛ sɛɛ mli ni eyagbo yɛ Megido. (2 Maŋtsɛmɛi 9:16-27) George Smith ŋma yɛ tawuu hei ni tamɔ nɛkɛ ni yɔɔ yiteŋgbɛ nɛɛ he akɛ: “Esa kadimɔ jogbaŋŋ akɛ nɔ ko nɔ ko bɛ saji ni agba lɛ amli . . . ni tsɔɔ nɔ ko ni nyɛŋ aba mli nakai yɛ shikpɔŋ he nilee gbɛfaŋ.”

Ŋwanejee ko bɛ he akɛ Yesu fɔɔ nɛkɛ Yezreel Jɔɔ nɛɛ kwɛmɔ ni ejwɛŋɔ miishɛɛ kunimyelii ni etee nɔ yɛ jɛmɛ lɛ ahe, akɛni ele akɛ lɛ, akɛ shiwoo Mesia lɛ, ji mɔ ni afa akɛ ebaaha Yoshua Kpeteŋkpele lɛ, Barak Kpeteŋkpele lɛ, Gideon Kpeteŋkpele lɛ, kɛ Yehu Kpeteŋkpele lɛ nitsumɔ lɛ aba mli koni ekɛbu Yehowa jeŋ muu fɛɛ maŋtsɛyeli lɛ bem lɛ. Yɛ anɔkwale mli lɛ, Biblia lɛ kɛ Megido, ni ji maŋ ni he hiaa fe fɛɛ yɛ tawuu mli yɛ nɛkɛ jɔɔ nɛɛ mli lɛ tsuɔ nii ekɛfeɔ he ni abaawuu Nyɔŋmɔ ta ni ji Harmagedon (ni eshishi ji “Megido Gɔŋ”) lɛ yɛ lɛ he mfoniri. Enɛ baafee jeŋ muu fɛɛ tawuu, ni emli ni Yesu Kristo, akɛ maŋtsɛmɛi a-Maŋtsɛ lɛ baakpata Nyɔŋmɔ kɛ Kristofoi asafo lɛ, ni ji Nyɔŋmɔ webii diɛŋtsɛ lɛ ahenyɛlɔi fɛɛ hiɛ.​—Kpojiemɔ 16:​16; 17:⁠14.

Biblia lɛ gbaa akɛ Yudafoi ni mli ewo la ni yɔɔ Nazaret lɛ bɔ mɔdɛŋ be ko akɛ amɛaashɛ Yesu kɛjɛ “gɔŋ ni amɛmaŋ lɛ ma nɔ lɛ naa” amɛfɔ ejɔɔ lɛ mli koni egbo. (Luka 4:29) Nɔ ko ni gbalaa mɔ jwɛŋmɔ ji tɛsaa somromoo ko ni ekɛlɛ ji ninetalɔi 40 ni yɔɔ ŋmɛnɛŋmɛnɛ beaŋ Nazaret maŋ lɛ wuoyi-anaigbɛ ni sane ni ba nɛɛ baanyɛ aba yɛ jɛmɛ. Yesu jo foi kɛjɛ ehenyɛlɔi lɛ adɛŋ, ni Biblia lɛ kɛfataa he akɛ, “ni eba Kapernaum.” (Luka 4:​30, 31) Yɛ anɔkwale mli lɛ, Kapernaum maŋ lɛ, ni yɔɔ Galilea Ŋshɔ lɛ masɛi lɛ, yɛ shikpɔŋ kwraa.

Enɛɛmɛi kɛ nibii krokomɛi babaoo ni atsɔɔ mli lɛ eha mɛi krokomɛi, ni Napoléon fata he etsɔɔ bɔ ni amɛnaa ekpɛ amɛhe amɛha yɛ bɔ ni Biblia shikpɔŋ he nilee ja ha lɛ hewɔ. Thomson ŋma yɛ The Land and the Book lɛ mli akɛ: “Shikpɔŋ lɛ shikamɔ kɛ enɔ nibii ni [Biblia] lɛ wieɔ he lɛ fa waa, ni fɛɛ ja jogbaŋŋ kɛmɔ shi.” Stanley wie yɛ wolo, Sinai and Palestine lɛ mli akɛ: “Gbeekpamɔ ni baa yinɔsane ni aŋma afɔ shi lɛ kɛ adebɔɔ mli nibii ni atsitsii ta lɛ amli be fɛɛ be yɛ Kpaŋmɔ Momo lɛ kɛ Ehee lɛ fɛɛ mli lɛ nyɛŋ afee nii ni mɔ ko nyɛŋ ayɔse.”

Bɔ ni Biblia lɛ mli saji ni kɔɔ shikpɔŋ lɛ he nilee he lɛ ja yɛ naakpɛɛ gbɛ nɔ ha lɛ ji odaseyeli kome pɛ ni tsɔɔ akɛ ejeee wolo ni adesai ŋmala. Atsɔ hiɛ akala Buu-Mɔɔ lɛ sɔrɔtoi etɛ ni Biblia mli saji ni tamɔ enɛ nɔŋŋ yɔɔ mli. Wɔmiifɔ bo nine ni ohe eko koni ona emli saji sɔrɔtoi etɛ lɛ akanemɔ he sɛɛ.

[Shikpɔŋ he mfoniri ni yɔɔ baafa 7]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

VALLEY OF JEZREEL

Jezreel

Nazareth

Taanach

Megiddo

Jokneam

Kedesh

N

SEA OF GALILEE

GREAT SEA

miles

kilometers

5

10

10

20

[He ni Sane lɛ Jɛ]

Edamɔ shikpɔŋ he mfoniri ni Pictorial Archive (Near Eastern History) Est. kɛ Survey of Israel yɔɔ he hegbɛ lɛ nɔ.

[Mfoniri ni yɔɔ baafa 5]

Israel nine shɛ Mla lɛ nɔ yɛ Sinai Gɔŋ lɛ nɔ

[He ni Sane lɛ Jɛ]

Pictorial Archive (Near Eastern History) Est.