Kristofoi Aweku Lɛ Feɔ Amɛnii Kutuu
“Shi, anyɛmimɛi, miikpa nyɛfai . . . akɛ . . . nyɛ fɛɛ nyɛyitsoŋ kɛ nyɛjwɛŋmɔ afee ekome.”—1 KORINTOBII 1:10.
1. Mɛni ji shihilɛ ni yɔɔ yɛ ekomefeemɔ he yɛ wekui pii amli?
ANI oweku lɛ efee ekome? Aloo etamɔ nɔ ni mɔ fɛɛ mɔ ekɔ lɛ diɛŋtsɛ egbɛ? Ani nyɛfeɔ ekome kɛfeɔ nii? Aloo nyɛ fɛɛ nyɛfɔɔɔ he kome hilɛ yɛ be kome mli? Wiemɔ “weku” lɛ diɛŋtsɛ tsɔɔ shia mli bii ni efee ekome.a Ni kɛlɛ, jeee wekui fɛɛ efee ekome. Britania tsɔɔlɔ nukpa ko tee nɔ aahu ni ewie akɛ: “Yɛ nɔ najiaŋ ni eeefee nɔdaamɔ nɔ kɛha adesai ashihilɛ gbɛjianɔtoo kpakpa lɛ, weku lɛ . . . ji miishɛɛ ni wɔnaaa lɛ fɛɛ jɛɛhe.” Ani enɛ ji anɔkwale yɛ oweku lɛ he? Kɛ nakai lɛ, ani esa akɛ ehi shi nakai?
2. Mɛɛ Biblia mli gbɔmɛi komɛi yeɔ odase akɛ amɛjɛ wekui kpakpai amli?
2 Bei pii lɛ, weku ekomefeemɔ loo emligbalamɔ damɔɔ ehiɛnyiɛmɔ nɔ, ekɔɔɔ he eko kɛ ejɛɔ fɔlɔi enyɔ loo fɔlɔ kome pɛ ŋɔɔ. Yɛ Biblia bei amli lɛ, wekui ni efee ekome ni kɛ amɛhe woɔ jamɔ mli kutuu lɛ naa Yehowa dɛŋ jɔɔmɔi. Enɛ fee anɔkwale yɛ blema Israel, he ni Yefta biyoo lɛ, Samson, kɛ Samuel ateŋ mɔ fɛɛ mɔ ye he odase yɛ gbɛi sɔrɔtoi anɔ akɛ ejɛ weku ni sheɔ Nyɔŋmɔ gbeyei mli lɛ. (Kojolɔi 11:30-40; 13:2-25; 1 Samuel 1:21-23; 2:18-21) Yɛ mra be mli Kristofoi abeaŋ lɛ, Timoteo, ni ji Paulo hefatalɔ anɔkwafo yɛ Paulo maŋsɛɛ sanekpakpa shiɛmɔ gbɛfaai lɛ ekomɛi amli lɛ naa Lois kɛ enyɛ Eunike tsɔse lɛ kɛ Hebri Ŋmalɛi lɛ ahe nilee. Mɛɛ kaselɔ kɛ maŋsɛɛ sanekpakpa shiɛlɔ ni sa kadimɔ waa po ebatsɔ nɛkɛ!—Bɔfoi lɛ Asaji 16:1, 2; 2 Timoteo 1:5; 3:14, 15; kwɛmɔ Bɔfoi lɛ Asaji 21:8, 9 hu.
Mɛni Hewɔ Esa Akɛ Afee Nii Kutuu?
3-4 (a) Mɛɛ sui esa akɛ ana yɛ weku ni efee ekome mli? (b) Mɛɛ gbɛ nɔ shia ko aaatsɔ afe he ni awɔɔ kɛkɛ?
3 Mɛni hewɔ sɛɛnamɔ yɔɔ he akɛ wekui afee amɛnii kutuu lɛ? Ejaakɛ etswaa shishinumɔ kɛ bulɛ emaa shi yɛ amɛteŋ. Yɛ nɔ najiaŋ ni wɔɔtsi wɔhe banee kɛjɛ mɛi krokomɛi ahe lɛ, wɔbɛŋkɛɔ wɔhe kpaakpa ni wɔkɛ sɛɛfimɔ haa wɔhe. Sane ko ni je kpo nyɛsɛɛ nɛɛ yɛ Family Relations wolo lɛ mli lɛ wie akɛ: “Mfoniri ko ni yɔɔ faŋŋ bɔ ni sa eje kpo, ni miitsɔɔ sui titrii komɛi ni anaa yɛ ‘wekui ni mli wa’ lɛ ahe. Nɛkɛ sui nɛɛ ekomɛi ji amɛhe ni amɛtuu amɛha amɛhe kɛ hiɛsɔɔ ni amɛjieɔ kpo amɛtsɔɔ amɛhe, ekomefeemɔ, sanegbaa kpakpa, nyɛmɔ ni akɛtaoɔ naagbai anaa tsabaa, kɛ mumɔŋ shihilɛ ni mli wa waa.”
4 Kɛji nɛkɛ sui nɛɛ yɛ weku ko mli lɛ, shia lɛ ebafeee tamɔ pɛtrol hɔɔmɔ he dɔŋŋ, he ni awaa ni aheɔ pɛtrol yɛ kɛkɛ. Efe shia folo ko kɛkɛ. Eji he ko ni yɔɔ hiɛmɛɛ ni gbalaa weku lɛ mli bii kɛbaa jɛmɛ. Eji abobaahe ni miishɛɛ kɛ suɔmɔ, mlihilɛ, kɛ shishinumɔ yɔɔ jɛmɛ. (Abɛi 4: 3, 4) Eji buu ni anaa weku ekomefeemɔ yɛ mli, shi jeee nyɔŋmɔŋkrakro shihilɛ he ni bei kɛ mligbalamɔ yɔɔ jɛmɛ. Shi mɛɛ gbɛ nɔ atsɔɔ anaa shihilɛ ni tamɔ nɛkɛ?
Kutuu Feemɔ yɛ Weku Nikasemɔ Mli
5. Mɛni wɔkɛtsuɔ nii koni wɔkɛkase anɔkwa jamɔ?
5 Wɔkaseɔ Yehowa anɔkwa jamɔ kɛtsɔɔ wɔ niiahesusumɔ jwɛŋmɔ, aloo ‘niiahesusumɔ hewalɛ’ lɛ nɔ. (Romabii 12:1) Esaaa ni henumɔi ni wɔnaa trukaa, tamɔ nɔ ni shiɛmɔ wiemɔi ni mli wa kɛ TV nɔ jamɔ kui kɛ naadɔkɔmɔ wiemɔi kanyaa lɛ lɛ kudɔɔ wɔjeŋba. Shi moŋ, Biblia lɛ kɛ Biblia kasemɔ woji ni “tsulɔ anɔkwafo kɛ nilelɔ” lɛ kɛhaa wɔ lɛ kasemɔ daa, kɛ enɔjwɛŋmɔ ji nɔ ni kanyaa wɔ. (Mateo 24:45) Ni wɔ Kristofoi anifeemɔi jɛɔ Kristo jwɛŋmɔ ni wɔnaa yɛ shihilɛ fɛɛ shihilɛ loo kaa fɛɛ kaa ni aaate shi lɛ he lɛ mli baa. Yɛ nakai shishinumɔ naa lɛ, Yehowa ji wɔ Nitsɔɔlɔ Kpeteŋkpele.—Lala 25:9; Yesaia 54:13; 1 Korintobii 2:16.
6. Mɛɛ jeŋ muu fɛɛ weku nikasemɔ he nɔkwɛmɔ nɔ ko wɔyɔɔ?
6 Weku Biblia mli nikasemɔ lɛ tsuɔ gbɛfaŋnɔ ni he hiaa waa he nii yɛ Kristofoi aweku fɛɛ weku mli. Mɛɛ be nyɛfeɔ nyɛ weku nikasemɔ? Kɛji nyɛshi ni nyɛtooo he gbɛjianɔ, aloo nyɛto nyɛyiŋ akɛ kɛ eyɛ mli aahu lɛ, kɛkɛ lɛ nyɛfee shikome trukaa lɛ, no lɛ etsɔɔ akɛ, belɛ nyɛfeee kwraa. Kutuu ni nyɛaafee yɛ weku nikasemɔ mli lɛ biɔ be he gbɛjianɔ ni nyɛaato. Kɛkɛ lɛ mɔ fɛɛ mɔ le gbi kɛ ŋmɛlɛtswaa pɔtɛɛ nɔ ni akpaa gbɛ akɛ amɛaahi shia koni amɛna weku lɛ mumɔŋ ekomefeemɔ lɛ mli gbɛfaŋnɔ. Jeŋ muu fɛɛ Betel weku lɛ mli bii ni amɛyi fa fe 12,000 lɛ le akɛ amɛfeɔ amɛweku nikasemɔ lɛ Ju gbɛkɛ. Kwɛ bɔ ni ehi jogbaŋŋ kɛha nɛkɛ Betel nitsulɔi ni kɛ amɛhe eha nɛɛ akɛ amɛaakai akɛ amɛ fɛɛ amɛmiikase nɔ kometoo lɛ nɔŋŋ beni gbi lɛ baa naagbee lɛ, yɛ Pasifik ŋshɔkpɔi lɛ anɔ kɛ New Zealand, kɛ agbɛnɛ kɛtsa nɔ kɛtee Australia, Japan, Taiwan, Hong Kong, no sɛɛ lɛ, kɛtsɔ Asia, Afrika, kɛ Europa, kɛ naagbee lɛ kɛtee Amerika maji lɛ amli. Eyɛ mli akɛ shitooi akpei abɔ kɛ wiemɔi babaoo egbala amɛteŋ moŋ, shi nɛkɛ weku nikasemɔ nɛɛ haa Betel weku lɛ mli bii nuɔ kutuu-feemɔ ko he yɛ amɛteŋ. Bo hu obaanyɛ ona nakai henumɔ lɛ eko yɛ gbɛ bibioo nɔ, kɛtsɔ oweku nikasemɔ lɛ nɔ.—1 Petro 2:17; 5:9.
7. Taakɛ Petro tsɔɔ lɛ, te esa akɛ wɔbu anɔkwale wiemɔ lɛ wɔha tɛŋŋ?
7 Bɔfo Petro woɔ wɔ ŋaa akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ni afɔ bianɛ, koni nyɛdara yɛ mli kɛna yiwalaheremɔ, kɛji nyɛsa nyɛnaa akɛ Nuŋtsɔ lɛ mli hi lɛ.” (1 Petro 2:2, 3) Mɛɛ mfoniri fɛfɛo Petro kɛ nɛkɛ wiemɔi nɛɛ feɔ nɛkɛ! Ekɛ Hela feemɔ-wiemɔ e·pi·po·theʹsa·te tsu nii, ni taakɛ Linguistic Key to the Greek New Testament lɛ tsɔɔ lɛ, ejɛ wiemɔ ko ni shishi ji “ni ashwe nɔ ko namɔ, asumɔ ni aná, ni atao” mli. Etsɔɔ bɔ ni ataoɔ nakai nii lɛ waa. Ani okadi bɔ ni kooloo bi kɛ hehiamɔ taoɔ enyɛ fufɔnaa kɛ bɔ ni abifao tsui nyɔɔ emli ehaa kɛ eeye enyɛ fufɔ lɛ? Esa akɛ wɔna suɔmɔ ni tamɔ nakai wɔha anɔkwale wiemɔ lɛ. Hela wiemɔ he nilelɔ William Barclay wie akɛ: “Kɛha anɔkwa Kristofonyo lɛ, Nyɔŋmɔ wiemɔ lɛ kasemɔ jeee deŋmegbomɔ shi moŋ eji miishɛɛ, ejaakɛ ele akɛ jɛmɛ etsui baana niyenii kpakpa ni eshweɔ lɛ yɛ.”
8. Mɛɛ kaa weku yitso lɛ kɛkpeɔ yɛ weku nikasemɔ lɛ feemɔ mli?
8 Weku nikasemɔ lɛ kɛ sɔ̃ wulu ko bafɔɔ weku yitso lɛ nɔ. Esa akɛ ekwɛ ni mɔ fɛɛ mɔ ana nikasemɔ lɛ he miishɛɛ, ni mɔ fɛɛ mɔ anyɛ ekɛ ehe awo mli hu. Esaaa ni gbekɛbii lɛ nuɔ he akɛ mɛi ni edara lɛ ahewɔ pɛ afeɔ nikasemɔ lɛ. Bɔ ni nikasemɔ lɛ mɔɔ shi ehaa lɛ he miihia kwraa fe nii abɔ ni anyɛɔ akaseɔ. Ha Biblia lɛ afee wolo ni amɛsumɔɔ. Kɛ ebaahi lɛ, ye obua obii lɛ ni amɛfee Palestina shikpɔŋ lɛ nɔ hei ni nibii ni asusuɔ he lɛ ba yɛ lɛ ahe mfoniri yɛ amɛjwɛŋmɔ mli. Esa akɛ awo mɔ fɛɛ mɔ hewalɛ ni lɛ diɛŋtsɛ etao saji amli ni ekɛ weku lɛ agba nɔ ni ekase lɛ he sane. Yɛ nɛkɛ gbɛ nɔ lɛ, gbekɛbii lɛ hu ‘baadara yɛ Yehowa hiɛ.’—1 Samuel 2:20, 21.
Kutuu-Feemɔ yɛ Sanekpakpa Jajemɔ Mli
9. Mɛɛ gbɛ nɔ aaatsɔ aha shiɛmɔ nitsumɔ lɛ afee weku niiashikpamɔ ni haa anaa miishɛɛ?
9 Yesu kɛɛ: “Ni ja ashiɛ sanekpakpa lɛ atsɔɔ jeŋmaji fɛɛ da.” (Marko 13:10) Nakai wiemɔi lɛ haa Kristofonyo fɛɛ Kristofonyo ni yɔɔ ekaa lɛ nitsumɔ—akɛ ejaje sanekpakpa lɛ, ni ekɛ mɛi krokomɛi agba Nyɔŋmɔ Maŋtsɛyeli nɔyeli lɛ he sane. Enɛ ni nyɛaafee kutuu akɛ weku lɛ baanyɛ afee niiashikpamɔ ni woɔ mɔ hewalɛ ni yɔɔ miishɛɛ hu. Nyɛmɛi kɛ tsɛmɛi naa miishɛɛ waa yɛ bɔ ni amɛbii nyɛɔ amɛshiɛɔ sanekpakpa lɛ amɛhaa lɛ mli. Gbalashihilɛ mli hefatalɔi komɛi ni hiɛ bihii etɛ ni eye kɛjɛ afii 15 kɛyashi 21 lɛ gba akɛ amɛfataa amɛbii lɛ ahe daa yɛ maŋ shiɛmɔ nitsumɔ lɛ mli daa Shɔ shwane kɛ́ amɛjɛ skul amɛba, kɛ agbɛnɛ daa Hɔɔ leebi hu. Tsɛ lɛ wie akɛ: “Wɔtsɔɔ amɛ nɔ ko be fɛɛ be. Ni wɔkwɛɔ akɛ be fɛɛ be nɛɛ efeɔ niiashikpamɔ ni amɛnaa he miishɛɛ, ni woɔ amɛ hewalɛ hu.”
10. Fɔlɔi ahe baanyɛ aba sɛɛnamɔ aha amɛbii yɛ shiɛmɔ nitsumɔ lɛ mli yɛ mɛɛ gbɛ nɔ?
10 Ni aaatsu nii kutuu akɛ weku yɛ shiɛmɔ kɛ nitsɔɔmɔ mli lɛ baanyɛ awo yibii babaoo. Bei komɛi lɛ mɛi kɛ jwɛŋmɔ kpakpa boɔ gbekɛ lɛ shiɛmɔ wiemɔ kuku ni mli ka shi faŋŋ lɛ toi. No sɛɛ lɛ, Mami loo Papa yɛ ni baaye ebua kɛ ehe miihia. Fɔlɔi baanyɛ amɛkwɛ akɛ amɛbii lɛ miina tsɔsemɔ kɛmiiya hiɛ, koni no aha amɛtsɔmɔ sɔɔlɔi “ni hiɛ gbooo, ni jaa anɔkwale wiemɔ lɛ mli pɛpɛɛpɛ.” Shiɛmɔ kutuu yɛ nɛkɛ gbɛ nɔ nyɛɔ ehaa fɔlɔi naa hegbɛ amɛkɛkwɛɔ amɛbi lɛ su, bɔ ni ewiemɔ nyɛɔ emɔɔ shi ehaa, kɛ subaŋi kpakpai ni ejieɔ lɛ kpo yɛ shiɛmɔ nitsumɔ lɛ mli. Kɛ amɛto gbɛjianɔ ni amɛkɛtsu nii daa lɛ, amɛnaa amɛbi lɛ nɔyaa ni amɛkɛ tsɔsemɔ ni yaa nɔ daa kɛ hewalɛwoo haa lɛ koni ewaje ehemɔkɛyeli. Nakai beaŋ nɔŋŋ hu lɛ, gbekɛbii lɛ naa akɛ amɛfɔlɔi feɔ nɔkwɛmɔ nii kpakpai yɛ shiɛmɔ nitsumɔ lɛ mli. Yɛ nɛkɛ jaramɔ yɛ yiwalɛ bei nɛɛ amli lɛ, nitsumɔ akɛ weku ni efee ekome ni mɔ fɛɛ mɔ susuɔ enaanyo he lɛ baanyɛ ekɛ shweshweeshwe feemɔ po aha yɛ hei ni awuiyeli fa babaoo yɛ.—2 Timoteo 2:15; Filipibii 3:16.
11. Mɛni baanyɛ afite ekaa ni gbekɛ lɛ yɔɔ kɛha anɔkwale lɛ yɛ gbɛ ni waaa kwraa nɔ?
11 Gbekɛbii nyɛɔ amɛnaa subaŋi enyɔ yɛ onukpai ahe yɛ gbɛ ni waaa kwraa nɔ. Kɛ fɔlɔi lɛ ejieee suɔmɔ diɛŋtsɛ kpo yɛ anɔkwale lɛ kɛ shia-kɛ-shia sɔɔmɔ nitsumɔ lɛ he lɛ, no lɛ anyɛŋ akpa gbekɛbii lɛ agbɛ akɛ amɛaafee mɛi ni yɔɔ ekaa. Enɛ hewɔ lɛ, fɔlɔ ni yɔɔ gbɔmɔtsoŋ hewalɛ, shi gbɛfaŋnɔ pɛ ni enaa yɛ shiɛmɔ nitsumɔ lɛ mli ji daa otsi Biblia mli nikasemɔ ni ekɛ gbekɛbii lɛ feɔ lɛ kɛ shihilɛi ni enaŋ he miishɛɛ baakpe kɛji ebii nɛɛ dara.—Abɛi 22:6; Efesobii 6:4.
12. Mɛɛ gbɛ nɔ wekui komɛi aaatsɔ ana jɔɔmɔ krɛdɛɛ kɛjɛ Yehowa dɛŋ?
12 Sɛɛnamɔ ni yɔɔ ‘yitsoŋ kɛ jwɛŋmɔ ni feɔ ekome’ lɛ mli ji akɛ ekolɛ weku lɛ nyɛɔ efeɔ ekome koni kɛ hoo kwraa lɛ amɛteŋ mɔ ko anyɛ asɔmɔ akɛ be-fɛɛ gbɛgbalɔ sɔɔlɔ yɛ asafo lɛ mli. Wekui pii feɔ enɛ yɛ je lɛŋ hei sɔrɔtoi fɛɛ, ni amɛ fɛɛ amɛnaa jɔɔmɔ kɛjɛɔ amɛteŋ mɔ ni sɔmɔɔ akɛ gbɛgbalɔ lɛ niiashikpamɔi kɛ enitsumɔ ni mɔɔ shi jogbaŋŋ lɛ mli.—2 Korintobii 13:11; Filipibii 2:1-4.
Kutuu-Feemɔ yɛ Naagbai Ahe Nitsumɔ Mli
13, 14. (a) Mɛɛ shihilɛi komɛi baanyɛ asa gbeekpamɔ he yɛ weku lɛ mli? (b) Mɛɛ gbɛ nɔ abaanyɛ atsɔ atsu weku naagbai ahe nii?
13 Wɔ fɛɛ wɔyajeɔ nɔnyɛɛ ko shishi, yɛ nɛkɛ jaramɔ bei ni ji “haomɔ” kɛ “oshara” be nɛɛ mli. (2 Timoteo 3:1, Revised Standard Version; Phillips) Wɔkɛ naagbai kpeɔ yɛ nitsumɔ he, yɛ skul, yɛ gbɛjegbɛi anɔ, kɛ agbɛnɛ yɛ shia diɛŋtsɛ po. Mɛi komɛi naa nɔ yɛ helai aloo yɛ henumɔŋ naagbai komɛi ni sɛɛ etsɛ hewɔ, ni bei komɛi lɛ ekɛ béi kɛ shishinumɔ ni bɛ baa weku lɛ mli. Mɛɛ gbɛ nɔ abaatsɔ atsu shihilɛi ni tamɔ nɛkɛ he nii? Kɛtsɔ mɔ fɛɛ mɔ he ni eeetse banee lɛ nɔ? Kɛtsɔ mɔ he ni eeetsi, yɛ be mli ni amɛyɔɔ shia kome mli po lɛ nɔ? Dabi. Yɛ no najiaŋ lɛ, esa akɛ wɔwie wɔhaomɔi lɛ ahe ni wɔbi yelikɛbuamɔ. Ni nɛgbɛ hi kɛha enɛ feemɔ fe weku kɔkrɔɔ ni suɔmɔ yɔɔ mli lɛ mli?—1 Korintobii 16:14; 1 Petro 4:8.
14 Taakɛ datrɛfonyo fɛɛ datrɛfonyo le lɛ, hela naatsii hi fe etsamɔ. Nakai nɔŋŋ eji anɔkwale yɛ weku mli naagbai hu ahe. Bei pii lɛ, sanegbaa ni jɛɔ tsuiŋ nyɛɔ etsiɔ naagbai anaa koni ekatsɔ hiɛdɔɔ sane. Ni kɛ naagba ni yɔɔ hiɛdɔɔ te shi po lɛ, abaanyɛ atsu he nii ni ana naa po, kɛ́ weku muu lɛ fɛɛ susuɔ Biblia shishitoo mlai ni ekɔɔ he lɛ ahe. Bei pii lɛ, anyɛɔ atsakeɔ béi ni etsɔɔ miishɛɛ wekukpaa kɛtsɔ Paulo wiemɔi ni yɔɔ Kolosebii 3:12-14 lɛ kɛ nitsumɔ nɔ, akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo; ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe. . . . Nyɛwoa suɔmɔ ni ji emuuyeli kpaa lɛ.”
Kutuu-Feemɔ yɛ Hiɛtserɛjiemɔ Mli
15, 16. (a) Mɛɛ su ko esa akɛ ekadi Kristofoi awekui? (b) Mɛɛ gbɔmɛi nɛkɛ jamɔi komɛi haa mɛi komɛi batsɔmɔɔ, ni mɛni hewɔ?
15 Miishɛɛ Nyɔŋmɔ ji Yehowa, ni miishɛɛ sane hu ji anɔkwale lɛ—nɔ ni haa adesai hiɛnɔkamɔ. Kɛfata he lɛ, mumɔ lɛ yibii lɛ ekome ji miishɛɛ. Nɛkɛ miishɛɛ nɛɛ yɛ sɔrɔto kwraa yɛ be kukuoo mli mlifilimɔ ni foidalɔ ko naa yɛ akaŋshii mli kunimyeli hewɔ lɛ he. Eji mligbɛ miishɛɛ henumɔ ni mli kwɔ ni hiɔ shi daa, ni hoɔ kɛtekeɔ nɔ yɛ tsui lɛ mli, ni jɛɔ wekukpaa ni bɛŋkɛ kpaakpa ni akɛ Yehowa naa lɛ mli baa. Eji miishɛɛ ni damɔ mumɔŋ nibii kpakpai kɛ wekukpaa ni tswaa mɔ emaa shi nɔ.—Galatabii 5:22; 1 Timoteo 1:11.
16 No hewɔ lɛ, akɛ Yehowa Odasefoi Kristofoi lɛ, wɔbɛ yiŋtoo ko ni wɔɔdamɔ nɔ wɔfee kusuu loo mɛi ni sumɔɔɔ shwɛmɔ. Jamɔi komɛi haa amɛmli bii feɔ nakai ejaakɛ amɛhemɔkɛyeli lɛ maa susumɔi gbohii anɔ mi. Ni nɔ ni jɛɔ amɛtsɔɔmɔi amli baa ji jamɔ ni mɛi anii yɔɔ mɔbɔ yɛ mli, ni miishɛɛ bɛ mli, ni Biblia fiii sɛɛ ni eŋmɛɛɛ pɛpɛɛpɛ hu. Amɛhaaa ana miishɛɛ wekui yɛ Nyɔŋmɔ sɔɔmɔ mli. Yesu na akɛ hiɛtserɛjiemɔ kɛ hejɔɔmɔ he hiaa. Akɛ nɔkwɛmɔ nɔ lɛ, be ko lɛ, efɔ̃ ekaselɔi lɛ anine akɛ amɛha aya ‘ŋa lɛ nɔ he ko banee, koni amɛyajɔɔ amɛhe fioo.’—Marko 6:30-32; Lala 126:1-3; Yeremia 30:18, 19.
17, 18. Mɛɛ gbɛi ni hi Kristofoi awekui baanyɛ atsɔ nɔ ajɔɔ amɛhe yɛ?
17 Nakai nɔŋŋ ehe hiaa ni wekui hu ana be kɛha hejɔɔmɔ. Fɔlɔ ko wie ebii ahe akɛ: “Wɔshwɛɔ shwɛmɔi ni yɔɔ miishɛɛ kutuu—wɔyaa ŋshɔnaa, wɔyatswaa bɔɔl yɛ bɔɔltswaa he, ni wɔtoɔ shisheramɔ he gbɛjianɔ kɛyaa gɔji lɛ anɔ. Bei komɛi lɛ, wɔkɛ gbi kome tsuɔ nii kutuu akɛ ‘gbɛgbamɔ gbi’ yɛ shiɛmɔ mli; kɛkɛ lɛ wɔŋmɛ okpɔlɔ kɛ niyenii krɛdɛɛ ko, ni wɔnyɛɔ wɔkeɔ wɔhe nibii sɔrɔtoi po.”
18 Ŋaawooi krokomɛi ni fɔlɔi baanyɛ asusu he hu ji weku lɛ hiɛtserɛjiemɔ yɛ kooloi akwɛmɔ hei, kɛ shwɛmɔ hei, blema nibii atoohei, kɛ hei krokomɛi ni kwɛmɔ yɔɔ miishɛɛ. Koo mli shisheramɔ, loofɔji akwɛmɔ, kɛ abɔɔ feemɔ ji nifeemɔi ni abaanyɛ ana mli ŋɔɔmɔ kutuu. Fɔlɔi baanyɛ awo amɛbii ahewalɛ hu ni amɛkase saŋkui sɔrɔtoi ni akɛtswaa lala lɛ atswaa, aloo amɛkase hiɛtserɛjiemɔ nitsumɔ ko. Eka shi faŋŋ akɛ, fɔlɔi ni ŋmɛɔ pɛpɛɛpɛ lɛ baato be ni amɛkɛ amɛbii ashwɛ. Kɛ wekui shwɛɔ kutuu lɛ, eka shi faŋŋ akɛ amɛbaahi shi kutuu hu!
19. Mɛɛ ŋmɛnɛŋmɛnɛ beaŋ nifeemɔ ko baanyɛ aye weku lɛ awui?
19 Nɔ ni obalaŋtai pii sumɔɔ ŋmɛnɛ ji ni amɛtsi amɛhe kɛjɛ weku lɛ he ni amɛfee nɔ ni amɛsumɔɔ yɛ hiɛtserɛjiemɔ gbɛfaŋ. Eyɛ mli akɛ tɔmɔ ko bɛ hiɛtserɛjiemɔ nitsumɔ ko ni obalaŋta ko aaakase aloo lɛ diɛŋtsɛ emiishɛɛ namɔ he moŋ, shi ebafeŋ nilee gbɛ akɛ aaaha nɛkɛ nibii ni anaa he miishɛɛ nɛɛ agbala okɛ weku lɛ mli bii ni eshwɛ lɛ ateŋ kwraa. Shi moŋ, wɔmiisumɔ ni wɔkɛ shishitoo mla ni Paulo jaje nɛɛ atsu nii, akɛ: “Nyɛteŋ mɔ fɛɛ mɔ akafo enɔ mli, shi efo enaanyo nɔ mli.”—Filipibii 2:4.
20. Kpeei bibii kɛ kpeei wuji baanyɛ afee miishɛɛ bei yɛ mɛɛ gbɛ nɔ?
20 Kwɛ miishɛɛ ni eji kɛha wɔ fɛɛ kɛ́ wɔna wekui ni amɛtara shi kutuu yɛ kpeei wuji kɛ kpeei bibii ashishi! Yɛ nakai gbɛ nɔ lɛ, bii ni edara lɛ nyɛɔ amɛyeɔ amɛbuaa mɛi ni darako lɛ. Gbɛjianɔtoo ni tamɔ nɛkɛ haaa obalaŋtai lɛ atsi amɛhe ni amɛyatara sɛɛ sɛii lɛ anɔ kɛkɛ, ni amɛbooo kpee lɛ shishi wiemɔi ni yaa nɔ lɛ toi jogbaŋŋ. Gbɛfaa kɛmiiya loo kɛmiiku sɛɛ kɛmiijɛ kpeei ashishi hu baanyɛ afee miishɛɛ kɛ́ abi weku lɛ he ni amɛsumɔɔ ni atsɔ, hei ni amɛsumɔɔ ni amɛkwɛ yɛ gbɛ lɛ nɔ, kɛ he ni amɛsumɔɔ ni amɛhi. Feemɔ bɔ ni eeefee miishɛɛ be yɛ Yesu gbii amli kɛha wekui akɛ amɛaafa gbɛ kutuu kɛya Yerusalem lɛ he mfoniri okwɛ!—Luka 2:41, 42.
Jɔɔmɔi ni Jɛɔ Kutuu-Feemɔ Mli Baa
21. (a) Te wɔɔfee tɛŋŋ wɔbɔ mɔdɛŋ wɔye omanye yɛ gbalashihilɛ mli? (b) Mɛni ji ŋaawoo kpakpai ejwɛ kɛha gbalashihilɛ ni hiɔ shi daa?
21 Gbalashihilɛi ni eye omanye kɛ wekui ni efee ekome lɛ anamɔ efeko mlɛo dã, ni ebaaa lɛ nakai trukaa hu. Mɛi komɛi naa akɛ ‘nibii aheŋmɛɛmɔ’ feɔ mlɛo kɛhaa amɛ, ni amɛkɛ gbalamlitsemɔ fiteɔ gbala lɛ, ni amɛkaa akɛ amɛaaje shishi ekoŋŋ. Shi, bei pii lɛ nakai naagbai lɛ nɔŋŋ jieɔ amɛhe kpo ekoŋŋ yɛ gbalashihilɛ ni ji enyɔ loo etɛ lɛ po mli. Hetoo ni hi jogbaŋŋ ji Kristofoi anɔ̃ lɛ: Bɔɔ mɔdɛŋ akɛ oooye omanye kɛtsɔ Biblia shishitoo mlai ni ji suɔmɔ kɛ bulɛ kɛ nitsumɔ nɔ. Wekui ni efee ekome lɛ damɔɔ mumɔ ni haa anaa mli ahaa mɛi krokomɛi lɛ nɔ, nɔ ni pɛsɛmkunya bɛ mli. Gbalashihilɛ he ŋaawolɔ ko kɛ gbɛ kuku ko ni baaha gbalashihilɛ ahi shi daa ha. Eŋma akɛ: “Nibii ejwɛ ni he hiaa waa ni anaa yɛ wekui kpakpai fɛɛ amli ji bɔ ni asumɔɔ ni abo toi, nyɛ ni anyɛɔ akpaa fai, nyɛ ni anyɛɔ akɛ henumɔŋ sɛɛfimɔ ni tsaa nɔ daa haa, kɛ bɔ ni asumɔɔ ni ajɛ suɔmɔ mli akɛ niji atara he.” Nakai nibii ni he hiaa lɛ baanyɛ aha gbalashihilɛ ahi shi daa lɛlɛŋ ejaakɛ edamɔ Biblia shishitoo mlai kpakpai anɔ.—1 Korintobii 13:1-8; Efesobii 5:33; Yakobo 1:19.
22. Mɛɛ sɛɛnamɔi komɛi jɛɔ weku ni efee ekome lɛ mli baa?
22 Kɛ wɔnyiɛ Biblia lɛ ŋaawoo sɛɛ lɛ, wɔbaana nɔdaamɔ nɔ ni yɔɔ shiŋŋ kɛha weku ni efee ekome, ni wekui ni efee ekome lɛ ji shishitoo nɔ kɛha asafo ni efee ekome ni he wa waa yɛ mumɔŋ. Kɛtsɔ no nɔ lɛ, wɔbaana jɔɔmɔi babaoo kɛjɛ Yehowa dɛŋ beni wɔkɛ yijiemɔ babaoo haa lɛ yɛ ekomefeemɔ mli lɛ.
[Shishigbɛ niŋmai]
a “Family [weku] jɛ L[atin] wiemɔ familia mli, klɛŋ[klɛŋ] lɛ shia kpeteŋkpele ko mli tsuji kɛ nyɔji, no sɛɛ lɛ shia lɛ diɛŋtsɛ kɛ nuŋtsɔ, nuŋtsɔyoo, gbekɛbii—kɛ nitsulɔi lɛ.”—Origins—A Short Etymological Dictionary of Modern English, ni Eric Partridge ŋma.
Ani Okaiɔ?
◻ Mɛni hewɔ ehe yɔɔ sɛɛnamɔ akɛ wekui afee amɛnii kutuu lɛ?
◻ Mɛni hewɔ daa weku Biblia nikasemɔ he hiaa waa lɛ?
◻ Mɛni hewɔ ehi jogbaŋŋ akɛ fɔlɔi aaafata amɛbii ahe yɛ shiɛmɔ nitsumɔ lɛ mli lɛ?
◻ Mɛni hewɔ eyeɔ ebuaa akɛ ooosusu naagbai ahe yɛ weku kɔkrɔɔ lɛ mli lɛ?
◻ Mɛni hewɔ esaaa akɛ Kristofoi awekui anii feɔ mɔbɔ ni amɛnaaa miishɛɛ?
[Mfoniri yɛ baafa 17]
Ani nyɛweku lɛ feɔ ekome kɛyeɔ nii, kɛ hoo Iɛ shikome kutuu?
[Mfoniri ni yɔɔ baafa 18]
Esa akɛ weku hiɛtserɛjiemɔi afee hejɔɔmɔ kɛ miishɛɛ