Mikome Shi Akwako Mi Kɔkɔɔkɔ

TAAKƐ ADA LEWIS GBA

Misumɔɔ ni mikome mahi shi be fɛɛ be. Miji mɔ ko ni mikpɛɔ miyiŋ shiŋŋ hu—bei komɛi lɛ mɛi krokomɛi tsɛɔ lɛ kuɛŋtimɔ—yɛ nɔ fɛɛ nɔ ni mifeɔ mli. Mile bɔ ni eyɔɔ mlɛo hu akɛ aaawie ashi nɔ fɛɛ nɔ, ni nɛkɛ su nɛɛ eha mina naagbai aahu yɛ afii abɔ ni eho lɛ mli fɛɛ.

KƐLƐ, midaa Yehowa Nyɔŋmɔ shi akɛ ekpooo mi yɛ gbɔjɔmɔi ni yɔɔ mihe nɛɛ ahewɔ. Kɛtsɔ e-Wiemɔ lɛ kasemɔ nɔ lɛ, minyɛ mitsake misu ni enɛ eha minyɛ misɔmɔ yɛ e-Maŋtsɛyeli lɛ he nibii ahe yɛ afii 60 ni eho lɛ mli. Kɛjɛ migbekɛbiiashi tɔ̃ɔ lɛ, miji mɔ ko ni sumɔɔ okpɔŋɔi, ni bei pii lɛ, Nyɔŋmɔ yelikɛbuamɔ ni mikɛkudɔɔ mi-kuɛŋtimɔ su lɛ haa mikaiɔ bɔ ni abaanyɛ akɛ manyofɛlɛ atsu nii ni akɛkudɔ okpɔŋɔ lɛ.

Afɔ mi yɛ kpaakpo bluu fɛfɛo ko masɛi yɛ Mount Gambier yɛ South Australia yɛ afi 1908. Mifɔlɔi yɛ tsinai ni aŋaa amɛfufɔ akɛfeɔ mliki, ni miji biyoo nukpa yɛ bii kpaanyɔ ateŋ. Wɔtsɛ gbo beni wɔ fɛɛ wɔdarako kwraa. Enɛ kɛ nitsumɔ wulu diɛŋtsɛ, ni ji kooloi lɛ akwɛmɔ bafɔ̃ minɔ, ejaakɛ esa akɛ minyɛmimɛi hii onukpai enyɔ lɛ ashi shia ni amɛyatsu nii koni amɛna shika kɛha weku lɛ. Kooloi akwɛmɔ nɛɛ ji nitsumɔ ni wa waa, ni tɔlɛ kɛ deŋmegbomɔ babaoo yɛ mli.

Biblia Mli Anɔkwale lɛ Namɔ Klɛŋklɛŋ Kwraa

Wɔweku lɛ yaa Presbyterian Sɔlemɔ lɛ, ni wɔji mɛi ni yaa sɔlemɔ daa ni wɔkɛ wɔhe woɔ nɔ fɛɛ nɔ mli. Mibatsɔ Hɔgbaa-skul tsɔɔlɔ, ni mibanu he akɛ eji gbɛnaa nii ni hiɛdɔɔ yɔɔ he waa akɛ matsɔɔ gbekɛbii lɛ nɔ ni miheɔ miyeɔ akɛ eja yɛ mumɔŋ kɛ jeŋba mli hu lɛ.

Yɛ 1931 mli lɛ, minii bagbo, ni nibii ni ana yɛ enibii amli lɛ ekomɛi ji woji babaoo ni nakai beaŋ Buu Mɔɔ Asafo lɛ sɛinɔtalɔ J. F. Rutherford ŋmala. Mibɔi The Harp of God kɛ Creation woji lɛ kanemɔ, ni beni miyaa nɔ mikaneɔ babaoo lɛ, nɛkɛ minaa kpɛɔ mihe waa akɛ male akɛ Biblia lɛ fiii nibii ni miheɔ miyeɔ kɛ nibii ni mitsɔɔ gbekɛbii lɛ mli babaoo sɛɛ.

Minaa kpɛ mihe waa akɛ male akɛ adesa susuma lɛ gboɔ, ni mɛi babaoo ji mɛi ni eyaŋ ŋwɛi kɛ amɛgboi, ni agbɛnɛ hu, naanɔ piŋmɔ ko bɛ hɛl kɛha mɛi fɔji lɛ. Egba minaa saŋŋ hu beni mina mile akɛ daa Hɔgbaa hejɔɔmɔ gbi ni wɔyeɔ daa otsi lɛ jeee Kristofoi ataomɔ nii lɛ. No hewɔ lɛ mikɛ yiŋkpɛɛ ko ni mli wa waa feemɔ kpe: ákɛ makpɛtɛ Kristendom blema tsɔɔmɔi lɛ ahe, aloo mabɔi Biblia mli anɔkwale lɛ tsɔɔmɔ. Etsɛɛɛ tsɔ ni minyɛ mikpɛ miyiŋ akɛ mikɛ Presbyterian Sɔlemɔ lɛ baafo nɔ fɛɛ nɔ feemɔ mli kwraa.

Agbɛnɛ Mikome Lɛlɛŋ

Miweku, minanemɛi, kɛ mitsutsu sɔlemɔ lɛ mli bii ni le mi lɛ naaa he miishɛɛ kwraa beni miha amɛle miyiŋtoo akɛ mashi sɔlemɔ lɛ ni mitsɔɔŋ nii hu dɔŋŋ yɛ Hɔgbaa skul lɛ. Ni beni amɛna akɛ mikɛ mɛi ni afɔɔ amɛ tsɛmɔ akɛ Kojolɔ Rutherford webii lɛ miibɔ lɛ, no moŋ kwraa wo wiemɔi ni amɛwieɔ kɛyeɔ mihe osheku lɛ mli hewalɛ waa. Ajeee gbɛ akɛ mi efooo tako mli moŋ, shi miweku lɛ mli bii kɛ mitsutsu nanemɛi lɛ kɛ mi bɛ tamɔ bɔ ni tsutsu ni wɔyɔɔ lɛ, kɛ mawie he nakai.

Babaoo ni mikaseɔ nii ni mikwɛɔ ŋmalɛi ni aŋmala yɛ woji ni mikaneɔ lɛ amli lɛ, babaoo ni minaa bɔ ni ehe hiaa ni mashiɛ yɛ faŋŋ mli ji no. Mibana mile akɛ Yehowa Odasefoi yaa shia kɛ shia akɛ amɛ maŋ sɔɔmɔ nitsumɔ lɛ fã. Shi no mli lɛ Odasefonyo ko kwraa bɛ wɔ kpokpaa lɛ nɔ. No hewɔ lɛ, mɔ ko bɛ ni baawo mi hewalɛ loo ebaatsɔɔ mi bɔ ni ashiɛɔ Nyɔŋmɔ Maŋtsɛyeli lɛ he sanekpakpa lɛ ahaa. (Mateo 24:14) Minu he waa akɛ mikome too miyɔɔ.

Shi kɛlɛ, Biblia lɛ famɔ akɛ ashiɛ atsɔɔ mɛi krokomɛi lɛ tee nɔ ejije yɛ mitoiŋ, ni mikpɛ miyiŋ akɛ esa akɛ maje shishi mashiɛ yɛ gbɛ ko nɔ kɛ̃. Yɛ sɔlemɔ babaoo sɛɛ lɛ, mikpɛ miyiŋ akɛ mabɔi mikutsoŋbii lɛ ashiai yaa koni makɛɛ amɛ nɔ ni mibale kɛjɛ minikasemɔi lɛ amli, koni mabɔ mɔdɛŋ matsɔɔ amɛ nibii nɛɛ kɛjɛ amɛ diɛŋtsɛ amɛ-Bibliai amli. Klɛŋklɛŋ shia ni mitee mli ji mitsutsu Hɔgbaa-skul nɔkwɛlɔ lɛ shia. Bɔ ni etseee ehiɛ ehaaa mi kɛ wiemɔi gbohii ni ewie yɛ shimɔ ni mishiɔ sɔlemɔ lɛ hewɔ lɛ efeee shishijee kpakpa kwraa kɛhaaa mi. Shi minu miishɛɛ kanyamɔ kɛ mligbɛ hewalɛ ko ni ekaaa he beni mishiɔ eshia lɛ ni matsa nɔ kɛya shiai krokomɛi lɛ.

Ajeee gbɛ ateee shi awooo mi moŋ, shi minaa kpɛ mihe waa yɛ bɔ ni mɛi ni tsutsu lɛ mikɛ amɛ yaa sɔlemɔ lɛ tseee amɛhiɛ amɛhaaa mi kɛ mitee amɛshia lɛ. Nɔ ni fee mi naakpɛɛ kɛ nijiaŋwujee ji akɛ, mikɛ shitee-kɛ-woo ni naa wa fe fɛɛ kpe kɛjɛ minyɛmi nuu onukpa fe fɛɛ lɛ ŋɔɔ, ni eha mikai Yesu wiemɔi nɛɛ akɛ: “Fɔlɔi tete kɛ nyɛmimɛi kɛ wekumɛi kɛ shieŋtsɛmɛi aaaŋɔ nyɛ aha, . . . ni mɛi fɛɛ aaanyɛ nyɛ yɛ migbɛi lɛ hewɔ.”—Luka 21:16, 17.

Mibale okpɔŋɔ tamɔ waa kɛjɛ migbekɛbiiashi tɔ̃ɔ, no hewɔ lɛ mikpɛ miyiŋ akɛ gbɛ ni yɔɔ oya ni matsɔ nɔ mashɛ gbɔmɛi lɛ ashiai amli ji ni mata okpɔŋɔ nɔ kɛya. Enɛ ye ebua mi ni minyɛ mitee shɔŋŋ kɛyashɛ akrowai ni bɛŋkɛ jɛmɛ lɛ amli. Shi, gbi ko shwane lɛ, mikpɔŋɔ lɛ tɛ ni egbee shi yɛ gbɛ ni nɔ yɔɔ trotro nɔ, ni miyitso tswa shi waa ni ejwa agbo. Be saŋŋ ho, ni misheɔ gbeyei waa akɛ ekolɛ miyi naŋ wala. Yɛ nakai shigbeemɔ lɛ sɛɛ lɛ, kɛ gbɛ lɛ nɔ fɔ aloo enɔ fee trotro lɛ, mikɛ okpɔŋɔ kɛ shwiili fãa gbɛ lɛ moŋ fe ni mata okpɔŋɔ lɛ nɔ.a

Asafo lɛ ni Mikɛna Tsakpaa

Yɛ oshara ni mina nɛɛ sɛɛ be fioo ko lɛ, be-fɛɛ shiɛlɔi, ni amrɔ nɛɛ atsɛɔ amɛ gbɛgbalɔi lɛ akuu ko ba Mount Gambier kpokpaa lɛ nɔ. Enɛ ha mina hegbɛ klɛŋklɛŋ kwraa ni mikɛ nanemɛi heyelilɔi wie hiɛ kɛ hiɛ. Dani amɛbaaya lɛ, amɛwo mi hewalɛ ni miŋma wolo kɛyaha Buu Mɔɔ Asafo lɛ nitsumɔ he nine lɛ ni mibi amɛ bɔ ni mafee ni mikɛ mihe awo maŋ shiɛmɔ nitsumɔ lɛ mli yɛ gbɛjianɔtoo kpakpa naa.

Beni miŋma Asafo lɛ sɛɛ lɛ, minine shɛ woji wuji, woji bibii, kɛ wolo ko ni akala odaseyeli wiemɔi yɛ nɔ lɛ anɔ koni mikɛtsɔɔ mɔ ni miji yɛ shinaai anaa. Minu he akɛ mibɛŋkɛ mimumɔŋ nyɛmimɛi hii kɛ yei lɛ fioo bɔ ni sa, yɛ tsakpaa ni mikɛ nitsumɔ he nine lɛ naa kɛtsɔɔ woji aŋmalamɔ nɔ lɛ hewɔ. Shi beni gbɛgbalɔi akuu lɛ shi jɛmɛ ni amɛtee maŋ ni tsa nɔ lɛ mli lɛ, minu he akɛ eshwɛ mikome too ekoŋŋ fe bei fɛɛ ni eho.

Odaseyeli ni miyaa daa gbi—titri lɛ kɛtsɔ okpɔŋɔ kɛ shwiili bibioo lɛ nɔ—lɛ hewɔ lɛ, mɛi bale mi jogbaŋŋ yɛ nakai kpokpaa lɛ nɔ. Yɛ nakai beaŋ nɔŋŋ hu lɛ, minyɛɔ mitsuɔ mi-kooloi akwɛmɔ nitsumɔ lɛ. No mli lɛ miweku lɛ ekpa shi ni amɛteɔ amɛwoɔ nitsumɔ ni mitsuɔ daa gbi nɛɛ, ni amɛbɔɔɔ mɔdɛŋ dɔŋŋ akɛ amɛaatsi minaa. Mikɛ afii ejwɛ sɔŋŋ sɔmɔ yɛ nɛkɛ gbɛ nɔ akɛ sanekpakpa jajelɔ ni abaptisiko lɛ, ni yɔɔ he ko banee.

Kpee, kɛ Naagbee lɛ Baptisimɔ

Yɛ April 1938 mli lɛ, Nyɛminuu Rutherford ba Australia. Bɔ ni osɔfoi lɛ te shi amɛwo wɔ waa lɛ ha afo hegbɛ ni aha wɔ kɛha Sydney Town Hall kɛ nitsumɔ lɛ mli kwraa. Shi, naagbee kwraa lɛ, wɔnine shɛ gbɛŋmɛɛ nɔ akɛ wɔbaanyɛ wɔkɛ Sports Grounds lɛ atsu nii. Nɛkɛ gbɛjianɔtoo ni anyɛ wɔ nɔ ni wɔtsake nɛɛ he ba sɛɛnamɔ diɛŋtsɛ, ejaakɛ mɛi akpei babaoo baanyɛ aho Sports Grounds ni jɛmɛ da saŋŋ lɛ. Mɛi aaashɛ 12,000 ba, ni eka shi faŋŋ akɛ amɛteŋ mɛi pii lɛ, bɔ ni osɔfoi lɛ te shi amɛwo wɔ kpee lɛ ji nɔ ni tee amɛ miishɛɛ shi lɛ.

Yɛ Nyɛminuu Rutherford saramɔ lɛ gbɛfaŋ hu lɛ, afee kpee ko ni he gbii babaoo yɛ Sydney kpokpaa ko ni bɛŋkɛ jɛmɛ lɛ nɔ. Jɛmɛ ji he ni naagbee lɛ mikɛ nu mli baptisimɔ fee mihenɔjɔɔmɔ kɛha Yehowa Nyɔŋmɔ lɛ he okadi yɛ. Ani obaanyɛ ofee miishɛɛ ni mina akɛ naagbee lɛ minyɛ mikɛ nyɛmimɛi hii kɛ yei ohai abɔ ni jɛ Australia shikpɔŋ agbo nɛɛ he fɛɛ he kpe lɛ he mfoniri okwɛ?

Miku Misɛɛ Kɛtee Mount Gambier Ekoŋŋ

Beni miku misɛɛ kɛtee shia lɛ, minu he waa akɛ eshwɛ mikome too, shi kɛlɛ, mitswa mifai shi fe bei fɛɛ ni eho akɛ matsu nɔ fɛɛ nɔ ni manyɛ yɛ Maŋtsɛyeli nitsumɔ lɛ mli. Etsɛɛɛ kɛkɛ ni mibale Agnew weku lɛ—Hugh, kɛ eŋa, kɛ amɛbii ejwɛ. Amɛyɛ Millicent maŋ lɛ mli, aaafee kilomitai 50 pɛ kɛjɛ Mount Gambier, ni mikɛ okpɔŋɔ kɛ shwiili bibioo lɛ fãa gbɛ kilomitai 50 kɛyaa, kɛ nakai gbɛ nɔŋŋ kɛbaa, koni mikɛ amɛ ayafee daa Biblia mli nikasemɔ. Beni amɛkpɛlɛ anɔkwale lɛ nɔ lɛ, eha mihe shoo-feemɔ lɛ tee kwraa.

Yɛ be fioo sɛɛ lɛ, afee wɔ kuu kɛha odaseyeli ni gbɛjianɔtoo yɔɔ he. Kɛkɛ ni, miishɛɛ sane ji akɛ, minyɛ babɔi sane lɛ he miishɛɛ namɔ, ni ebafata mihe yɛ kilomitai 100 gbɛfaa yaa kɛ baa lɛ mli, koni wɔkɛ kuu hee ni atse lɛ ayakase nii. Kɛjɛ nakai be lɛ mli kɛbaa fɛɛ lɛ, agbɛnɛ Awo woɔ mi hewalɛ ni eyeɔ ebuaa mi be fɛɛ be, eyɛ mli akɛ afii fioo ho dani abaptisi lɛ. Agbɛnɛ jeee mikome too miyɔɔ dɔŋŋ!

Ana gbɛgbalɔi ejwɛ kɛjɛ wɔkuu bibioo lɛ mli, Agnew obalayei etɛ lɛ—Crystal, Estelle, kɛ Betty—kɛ mi. Sɛɛ mli, yɛ 1950 afii lɛ shishijee gbɛ lɛ, obalayei etɛ nɛɛ fɛɛ tee Buu Mɔɔ Biblia Gilead Skul lɛ eko. Aha amɛ nitsumɔ akɛ maŋsɛɛ sanekpakpa shiɛlɔi yɛ India kɛ Sri Lanka, ni amɛsɔmɔ yɛ jɛmɛ aahu kɛbashi nyɛsɛɛ nɛɛ nɔŋŋ, beni eba akɛ Estelle aku esɛɛ kɛba Australia yɛ gbɔmɔtsoŋ hewalɛ mli naagbai komɛi ahewɔ lɛ.

Yɛ January 1941 mli lɛ, agu Yehowa Odasefoi anitsumɔ kwraa yɛ Australia, no hewɔ lɛ, oya nɔŋŋ kɛkɛ ni wɔtsu shihilɛ nɛɛ he nii. Wɔkɛ nɔ fɛɛ nɔ ni wɔkɛtsuɔ nii yɛ sɔɔmɔ nitsumɔ lɛ mli—woji, gramafon bibii ni wɔtswaa, Biblia mli wiemɔi ni akɛwo kpaai anɔ, kɛ nibii krokomɛi—lɛ fɛɛ wo dade adeka agbo ko mli. Kɛkɛ ni wɔkɛ adeka lɛ ma agba ko shishi ni wɔkɛ jwɛi ni wɔkɛhaa kooloi lɛ babaoo shwie nɔ koni akana.

Yɛ naatsii lɛ fɛɛ sɛɛ lɛ, wɔtee nɔ kɛ wɔ shia-kɛ-shia shiɛmɔ lɛ, shi moŋ yɛ ŋaa mli, ni wɔkɛ Biblia lɛ pɛ tsuɔ nii kɛ wɔkɛ shiatsɛmɛi lɛ miiwie. Mikɛ woji tɛtrɛbii kɛ woji bibii lɛ toɔ mi-kpɔŋɔ lɛ nɔtamɔ nɔ̃ lɛ shishi, ni ja mina akɛ mɔ lɛ miijie anɔkwa miishɛɛ kpo yɛ Maŋtsɛyeli sane lɛ he dani mijieɔ lɛ kpo. Yɛ naagbee lɛ, ajie naatsii lɛ yɛ June 1943 mli, ni wɔnyɛ wɔkɛ woji ha ekoŋŋ yɛ faŋŋ mli.

Nitsumɔi Heei

Yɛ 1943 mli lɛ, mikɛ mihe ha akɛ gbɛgbalɔ, ni afi ni nyiɛ sɛɛ lɛ mli lɛ, mishi Mount Gambier kɛtee nitsumɔ kroko nɔ. Klɛŋklɛŋ lɛ, afɔ̃ mi nine akɛ mibasɔmɔ be kukuoo ko yɛ Asafo lɛ nitsumɔ he nine lɛ yɛ Strathfield. Yɛ nitsumɔ nɛɛ sɛɛ lɛ, aha mi nitsumɔi sɔrɔtoi kɛtsara nɔ yɛ maji bibii amli yɛ New South Wales wuoyigbɛ kɛ Victoria anaigbɛ. Shi, nitsumɔi ni aha mi ni mina he sɛɛ waa yɛ mumɔŋ lɛ ekome ji asafo ko ni aha mikɛtsu nii yɛ Melbourne maŋtiase lɛ mli lɛ. Akɛni mijɛ akrowa maŋ bibioo mli hewɔ lɛ, mikase nii babaoo kɛtsɔ sɔɔmɔ ni misɔmɔ yɛ jɛmɛ lɛ nɔ.

Yɛ nitsumɔ ni aha mi yɛ Gippsland jɔɔ mli gbɛ yɛ Victoria kpokpaa nɔ lɛ mli lɛ, mikɛ gbɛgbalɔ kroko ni fata mihe, ni ji Helen Crawford fee Biblia mli nikasemɔi babaoo diɛŋtsɛ, ni etsɛɛɛ kɛkɛ ni atse asafo yɛ jɛmɛ. Nakai kpokpaa lɛ yɛ shikpɔŋkuku agbo ni akrowai pii yɔɔ mli, ni wɔyɛ tsɔne momo ko ni anyɛɛɛ akɛ he afɔ̃ nɔ, ni wɔkɛfaa gbɛ. Bei komɛi lɛ wɔtaa mli, shi bei babaoo ji be ni efiteɔ ni wɔtsiɔ. Kwɛ bɔ ni mishwe waa ni kulɛ mana okpɔŋɔ! Bei komɛi lɛ, mikɛ anɔkwayeli kɛɔ akɛ: “Mikɛ nɔ fɛɛ nɔ baatsake okpɔŋɔ (ja Maŋtsɛyeli lɛ pɛ)!” Ŋmɛnɛ, ayɛ asafoi ni yɔɔ shiŋŋ kɛ Maŋtsɛyeli Asai fɛfɛji yɛ maji pii amli yɛ nakai kpokpaa lɛ nɔ.

Yɛ 1969 mli lɛ, aha mi nitsumɔ yɛ Canberra, ni ji Australia maŋtiase lɛ mli. Odaseyeli yɛ maŋ nɛɛ mli wa ni eyɛ miishɛɛ waa hu, ejaakɛ bei pii lɛ, wɔkɛ gbɔmɛi ni tsuɔ nii yɛ maŋsɛɛ maji anajiaŋdamɔlɔi anitsumɔ hei lɛ kpeɔ. Miisɔmɔ yɛ biɛ lolo, shi yɛ afii fioo ni eho lɛ amli lɛ, mitsuɔ midaseyeli nitsumɔ lɛ yɛ maŋtiase lɛ nitsumɔ hei lɛ amli titri.

Yɛ 1973 mli lɛ, mina hegbɛ ni mitee kpeei wuji komɛi yɛ United States. Miishɛɛ be kroko yɛ mishihilɛ mli hu ji hegbɛ ni mina kɛtee kpee yɛ 1979 mli, ni mikɛyashera shi yɛ Israel kɛ Jordan lɛ. Shisheramɔ yɛ hei diɛŋtsɛ ni atsĩ tã yɛ Biblia lɛ mli kɛ saji ni ba yɛ jɛmɛ lɛ ahesusumɔ ji niiashikpamɔ ko ni kanyaa mɔ henumɔi waa diɛŋtsɛ. Miná bɔ ni Ŋshɔ ni Egbo, ni ŋoo yɔɔ emli nui lɛ amli waa lɛ mli kamɔ yɔɔ ha lɛ hu mli niiashikpamɔ, ni beni wɔyashera shi yɛ Petra yɛ Jordan lɛ, mina hegbɛ mita okpɔŋɔ shikome ekoŋŋ. Enɛ ha mikai mra bei komɛi ni eho beni okpɔŋɔi haa minyɛɔ mikɛ Maŋtsɛyeli shɛɛ sane lɛ shɛɔ hei ni egbɛ eshwa kɛ akrowai ni yɔɔ shɔŋŋ lɛ.

Be-Fɛɛ Sɔɔmɔ ni Tsa nɔ Lolo

Nɔ ni etee nɔ ewo suɔmɔ ni miyɔɔ akɛ matsa nɔ lolo yɛ be-fɛɛ sɔɔmɔ lɛ mli lɛ mli hewalɛ, yɛ mifii ni etee hiɛ lɛ fɛɛ sɛɛ lɛ ji gbɛjianɔtoi krɛdɛɛi tamɔ Gbɛgbamɔ Sɔɔmɔ Skul lɛ kɛ gbɛgbalɔi akpeei ni afeɔ afataa kpokpaa nɔ kpeei ahe lɛ, kɛ agbɛnɛ hu hewalɛwoo ni minaa daa kɛjɛɔ nɔkwɛlɔi gbɛfalɔi adɛŋ lɛ. Manyɛ makɛɛ lɛlɛŋ akɛ Yehowa ejɛ mlihilɛ mli ekwɛ ni eha gbii ni kulɛ mikome too pɛ miyɔɔ lɛ efee blema nii ni eho etee.

Amrɔ nɛɛ miye afii 87, ni yɛ afii 60 ni mikɛsɔmɔ Yehowa lɛ sɛɛ lɛ, miyɛ hewalɛwoo wiemɔi kɛha mɛi krokomɛi ni ekolɛ amɛ hu amɛwieɔ nii ahe waa, ni amɛsumɔɔ heyeli hu waa lɛ: Ba ohe shi oha Yehowa gbɛtsɔɔmɔ be fɛɛ be. Eba akɛ Yehowa aaaye abua wɔ ni wɔye wɔ nii ahe wiemɔ su lɛ nɔ, ni eba akɛ eeekai wɔ daa nɛɛ hu akɛ eyɛ mli akɛ ekolɛ wɔbaanu shoofeemɔ he moŋ, shi ekwaŋ wɔ kɔkɔɔkɔ.

[Shishigbɛ niŋmai]