Shwiemɔ Kɛmiijɛ Asafo lɛ Mli—Gbɛjianɔtoo ni Suɔmɔ Yɔɔ Mli?

“KRƆŊKRƆŊ, krɔŋkrɔŋ, krɔŋkrɔŋ ji Nuntsɔ [Yehowa] Nyɔŋmɔ Ofe lɛ.” (Kpojiemɔ 4:8) Yɛ nakai nibii amlitsɔɔmɔ lɛ kɛ gbeekpamɔ naa lɛ, belɛ Yehowa ji krɔŋkrɔŋ-feemɔ taomɔ nii a-Jɛɛhe. Akɛ enɛɛmɛi emamɔ shi yɛ “ŋmalɛi krɔŋkrɔŋi” lɛ amli, ni gbɛnaa nii ka Kristofoi anɔ akɛ amɛnyiɛ nɛkɛ gbɛtsɔɔmɔi nɛɛ asɛɛ. Yɛ anɔkwale mli lɛ, esa akɛ amɛkwa nɔ fɛɛ nɔ ni he tseee yɛ Yehowa hiɛ.—2 Timoteo 3:15; Yesaia 52:11.

Biblia lɛ kɛ famɔ haa faŋŋ akɛ: “Bɔ ni Mɔ ni tsɛ nyɛ lɛ yɔɔ Krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli; ejaakɛ aŋma akɛ: ‘Nyɛfea krɔŋkrɔŋ, ejaakɛ krɔŋkrɔŋ ji mi.’ ” (1 Petro 1:15, 16) Kɛjɛ be mli ni Kristofoi asafo lɛ ba shihilɛ mli afii ohai 19 ni eho nɛ lɛ, anɔkwa Kristofoi ewuu ta waa koni amɛbaa yi kɛjɛ mumɔŋ kɛ jeŋba mli mujiwoo he.—Yuda 3.

Nɔ Hewɔ ni Yibaamɔ He Hiaa

Nyɔŋmɔ tsuji fɛɛ kɛ jeŋba kɛ mumɔŋ hetsemɔ he kaa lɛ miikpe. Yɛ enɛ hewɔ lɛ, esa ni ate shi awo henyɛlɔi etɛ ko ni he wa lɛ—Satan, eje lɛ, kɛ wɔ esha heloo akɔnɔi lɛ. (Romabii 5:12; 2 Korintobii 2:11; 1 Yohane 5:19) Satan je lɛ baaka bo koni ofee mɔ ni bɛ jeŋba, ebaaka bo koni okpɛlɛ egbɛ̀i lɛ anɔ, ni ekɛ heloo gbɛfaŋ ninamɔ, gbɛ́i, gbɛhe, agbojee, kɛ hewalɛ baaha bo. Shi, mɛi ni etswa amɛfai shi akɛ amɛbaadi anɔkwa jamɔ sɛɛ lɛ baate shi awo nɔ ni Satan kɛhaa lɛ ni amɛhi shi akɛ mɛi ni “eto [amɛ]he kɛjɛ je nɛŋ.” Mɛni hewɔ? Ejaakɛ amɛmiisumɔ ni amɛhi Yehowa gbɛjianɔtoo ni he tse lɛ suɔmɔ kwɛmɔ kɛ yibaamɔ shishi.—Yakobo 1:27; 1 Yohane 2:15-17.

Yehowa eto yelikɛbuamɔ he gbɛjianɔ kɛha Kristofoi asafo lɛ mli mɔ fɛɛ mɔ ni gbeɔ Satan kaai amli yɛ adesa gbɔjɔmɔ hewɔ lɛ. Ahala onukpai ni edara yɛ mumɔŋ koni amɛbu asafo lɛ he ni amɛjɛ suɔmɔ mli amɛye amɛbua mɛi ni tɔ̃ɔ lɛ ni amɛtsake amɛtsui kɛjɛ amɛhe eshai lɛ amli, ni amɛfee tsakemɔi ni he hiaa kɛha mumɔŋ hewalɛnamɔ. Esa ákɛ akɛ tsuishitoo aye abua Kristofonyo fɛɛ Kristofonyo ni kɛ ehe woɔ efɔŋ feemɔ mli lɛ koni etsake etsui ni etsake egbɛi.—Galatabii 6:1, 2; Yakobo 5:13-16.

Bɔ ni Shwiemɔ Ji Nii ni Suɔmɔ Yɔɔ Mli

Esa akɛ abu Yehowa tsuji ni abaptisi amɛ ni jeɔ gbɛ amɛdiɔ gbɛ fɔŋ sɛɛ, ni amɛsumɔɔɔ ni amɛtsake lɛ akɛ amɛtsakeee amɛtsui ni yɛ enɛ hewɔ lɛ amɛjeee mɛi ni akɛ amɛ naa Kristofoi anaanyobɔɔ. (Okɛto 1 Yohane 2:19 he.) Aŋmɛŋ aŋkroaŋkroi ni tamɔ nɛkɛ gbɛ ni amɛhi Kristofoi asafo ni he tse lɛ mli ni amɛwo he muji. Esa akɛ ashwie amɛ kɛjɛ asafo lɛ mli.

Abaanyɛ afee nɔ hewɔ ni esa akɛ ashwieɔ mɛi ni kɛ yiwalɛ nifeemɔ efee amɛsubaŋ kɛjɛɔ asafo lɛ mli lɛ ahe mfoniri kɛtsɔ shihilɛ ni nyiɛ sɛɛ nɛɛ nɔ: Akɛni tutuamɔ kɛ awuiyeli ni akɛbaa nikaselɔi anɔ lɛ efa hewɔ lɛ, The Globe and Mail, ni ji adafitswaa wolo ko ni yɔɔ Toronto, Canada lɛ, bɔ amaniɛ akɛ, skul sɔrɔtoi komɛi efee mla ni “haa ashwieɔ nikaselɔi ni kɛ tawuu nii tsuɔ nii loo amɛkɛwoɔ mɛi ahe gbeyei lɛ kɛjɛɔ skul lɛ mli kwraa.” Ashwieɔ mɔ lɛ koni akɛbu nikaselɔi ni miisumɔ ni nikasemɔ gbɛjianɔtoo lɛ he aba sɛɛnamɔ kɛha amɛ ni awuiyeli nifeemɔ ko bɛ mli lɛ ahe.

Mɛni hewɔ suɔmɔ yɔɔ mli akɛ aaashwie efɔŋ feelɔ ni tsakeee etsui kɛjɛ asafo lɛ mli? Nakai feemɔ ji suɔmɔ ni ayɔɔ kɛha Yehowa kɛ egbɛi lɛ kpojiemɔ. (Lala 97:10) Nifeemɔ nɛɛ tsɔɔ suɔmɔ kɛhaa mɛi ni diɔ jalɛ nifeemɔ sɛɛ lɛ, ejaakɛ ejieɔ mɔ ni baanyɛ ana amɛnɔ hewalɛ fɔŋ lɛ kɛjɛɔ amɛteŋ. Ebaa asafo lɛ krɔŋŋ-feemɔ hu yi. (1 Korintobii 5:1-13) Kɛ aŋmɛ jeŋba shara loo mumɔŋ mujiwoo ni hiɛdɔɔ yɔɔ mli gbɛ ni ehi asafo lɛ mli lɛ, ebaasa asafo muu lɛ fɛɛ he, ni ebaafee nɔ ni esaaa kɛha sɔɔmɔ krɔŋkrɔŋ ni ekɛaaha Yehowa, ni yɔɔ krɔŋkrɔŋ lɛ. Kɛfata he lɛ, efɔŋ feelɔ lɛ shwiemɔ baanyɛ aye abua lɛ ni ena bɔ ni hiɛdɔɔ yɔɔ egbɛduu lɛ mli ha, koni etsake etsui, ni efee tsakemɔi ni he hiaa, ni ahe lɛ kɛba asafo lɛ mli ekoŋŋ.

Bɔ ni Esaa Mɛi Krokomɛi Ahe Ehaa

Kɛ asafo lɛ mli nyo ko fee efɔŋ ni hiɛdɔɔ yɔɔ mli, tamɔ gbalafitemɔ lɛ, ehaaa Yehowa tsui anya. (Abɛi 27:11) Kristofonyo fɛɛ Kristofonyo ni ŋmɛɛɔ ehe ehaa bɔlɛnamɔ mli jeŋba shara lɛ susuuu nii ahe tamɔ bɔ ni Yosef fee, beni Potifar ŋa lɛ bɔ mɔdɛŋ ni eha ekɛ lɛ ana bɔlɛ lɛ. Yosef nifeemɔ ji: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔ hu?” (1 Mose 39:6-12) Yosef kɛ bulɛ ha Yehowa taomɔ nii krɔŋkrɔŋi lɛ, ni ejo foi kɛjɛ shihilɛ lɛ naa. Yɛ gbɛ kroko nɔ lɛ, etamɔ nɔ ni gbalafitelɔ lɛ bɛ suɔmɔ ni fa kɛha Nyɔŋmɔ bɔ ni no aaatsi lɛ gbɛ koni ekagbe eheloo naa akɔnɔ lɛ.—Galatabii 5:19-21.

Mɔ ni abaptisi lɛ ni kuɔ Nyɔŋmɔ kitai amli lɛ susuuu awui kɛ piŋmɔ ni ekɛbaaba ewekumɛi ni heɔ yeɔ lɛ anɔ lɛ he. Henumɔŋ nɔnyɛɛ lɛ fe bɔ ni mɛi komɛi baanyɛ adamɔ naa. Beni Kristofonyo yoo ko kpa shi ena akɛ ebinuu kɛ ehe ewo jeŋba shara mli lɛ, eye awerɛho akɛ: “Etamɔ nɔ ni nyɛmimɛi hii kɛ yei fioo ko pɛ nuɔ bɔ ni eye wɔ awui ni efite wɔ kwraa lɛ shishi, kɛ amɛteŋ mɔ ko po yɛ. . . . Wɔtsui ekumɔ.” Yiŋkɔshikɔshi-feemɔ baanyɛ aba gbɛi kpakpa ni weku muu lɛ fɛɛ yɔɔ lɛ he. Nɔnyɛɛ kɛ fɔyeli ko baahao weku lɛ mli bii ni yeɔ anɔkwa lɛ. Efɔŋ feelɔ lɛ gbɛ gbonyo lɛ kɛ tsuiŋdɔlɛ baa weku lɛ nɔ.

Yelikɛbuamɔ ni Suɔmɔ Yɔɔ Mli Kɛha Weku lɛ Mli Bii

Ehe miihia ni aŋkroaŋkroi ni ashwie amɛ lɛ awekumɛi Kristofoi anɔkwafoi lɛ akai akɛ shwiemɔ ji nii ni suɔmɔ yɔɔ mli kɛ hebuu nɔ fɛɛ. Abɔɔ mɔdɛŋ fɛɛ ni aaanyɛ ni akɛye abua efɔŋ feelɔ lɛ. Shi kɛ efee mɔ ni booo Nyɔŋmɔ toi ni eji henɔwolɔ ni tsakeee etsui lɛ, ehe hiaa ni abu asafo lɛ he, ni nɔ ko bɛ ni aaafee akɛ ja afee nii taakɛ Nyɔŋmɔ Wiemɔ lɛ tsɔɔ ni afee lɛ: “Nyɛjiea mɔ fɔŋ lɛ yɛ nyɛteŋ.” (1 Korintobii 5:13) Taakɛ Odasefonyo ko kɛɛ lɛ, “shwiemɔ kɛmiijɛ asafo lɛ mli lɛ kɔɔ anɔkwa ni aaaye Yehowa lɛ he.”

Kɛ ashwie weku lɛ mli nyo ko lɛ, wekumɛi Kristofoi lɛ nuɔ piŋmɔ he. No hewɔ lɛ, esa akɛ onukpai ni ahala amɛ lɛ afee nɔ ni hi fe fɛɛ ni amɛaanyɛ ni amɛshɛje amɛmii yɛ mumɔŋ. (1 Tesalonikabii 5:14) Onukpai baanyɛ asɔle aha amɛ ni amɛkɛ amɛ asɔle. Bei pii lɛ anyɛɔ ayasaraa nɛkɛ Kristofoi anɔkwafoi nɛɛ ni akɛ amɛ gbaa Ŋmalɛi ni tswaa mɔ maa shi lɛ ahe sane. Esa akɛ tooi lɛ akwɛlɔi lɛ kɛ hegbɛ fɛɛ hegbɛ ni amɛaana atsu nii ni amɛkɛwaje suɔlɔi nɛɛ yɛ mumɔŋ dani Kristofoi akpeei aje shishi kɛ no sɛɛ. Abaanyɛ akɛ hewalɛwoo kroko aha kɛtsɔ amɛhe ni aaafata kɛaaya shiɛmɔ nɔ. (Romabii 1:11, 12) Ehe miihia ni mumɔŋ tookwɛlɔi lɛ ajie suɔmɔ kɛ nɔjwɛŋmɔ ni he hiaa amɛ lɛ kpo amɛha Yehowa tsuji anɔkwafoi nɛɛ.—1 Tesalonikabii 2:7, 8.

Eshafeemɔ gbɛ ni mɔ ko kɔ lɛ jeee nɔ ni adamɔɔ nɔ akuɔ hiɛ ashwieɔ eweku lɛ mli bii ni yeɔ Yehowa anɔkwa lɛ anɔ. Nyɔŋmɔ kpoo Israel Maŋtsɛ fɔŋ Saul, shi David eŋmɛɛɛ gbɛ koni enɛ asa hedɔɔ ni eyɔɔ kɛha Saul bi Yonatan lɛ he. Yɛ anɔkwale mli lɛ, tsakpaa ni ka David kɛ Yonatan teŋ lɛ mli bawa waa. (1 Samuel 15:22, 23; 18:1-3; 20:41) No hewɔ lɛ, esa akɛ mɛi fɛɛ ni yɔɔ asafo lɛ mli lɛ afi amɛ sɛɛ, ni amɛsumɔ Kristofoi ni amɛ wekumɛi feɔ esha amɛshiɔ Yehowa lɛ.

Kwɛ bɔ ni efeŋ nii ni suɔmɔ yɔɔ mli akɛ aaaku hiɛ ashwie amɛnɔ loo akɛ ajieee mlihilɛ kpo atsɔɔɔ anɔkwafoi nɛɛ! Hewalɛwoo krɛdɛɛ he miihia weku lɛ mli bii anɔkwafoi lɛ. Amɛbaanu he akɛ amɛhe efee shoo, ni amɛbaana amɛ shihilɛ lɛ akɛ ewa waa. Ekolɛ obaanyɛ ni ogba amɛ mumɔŋ anɔkwalei komɛi loo niiashikpamɔ ko ni tswaa mɔ maa shi kɛtsɔ tɛlifon nɔ. Kɛ mɔ ni ashwie lɛ lɛ bahere tɛlifon lɛ nɔ lɛ, kɛɛmɔ kɛkɛ akɛ oosumɔ ni okɛ wekunyo Kristofonyo lɛ awie. Obaanyɛ ofɔ nine otsɛ anɔkwafoi ni yɔɔ shia lɛ mli lɛ kɛha hiɛtserɛjiemɔ loo ni amɛbaye nii yɛ oshia. Kɛ okɛ amɛ kpe yɛ jara nɔ lɛ, obaanyɛ okɛ nakai be lɛ atsu nii kɛha naanyobɔɔ ni tswaa mɔ maa shi. Kaimɔ akɛ, Kristofoi anɔkwafoi ni yɔɔ wekumɛi ni ashwie amɛ lɛ ka he amɛji Yehowa gbɛjianɔtoo ni he tse lɛ fa. Amɛbaanyɛ amɛfee mɛi ni atse he kɛjɛ amɛhe, ni amɛnijiaŋ baanyɛ aje wui yɛ gbɛ ni waaa kwraa nɔ. No hewɔ lɛ, ha ohiɛ ahi ohe nɔ ni ojie mlihilɛ kɛ suɔmɔ kpo otsɔɔ amɛ. Yaa nɔ ofee ‘mɛi fɛɛ ni kɛ bo yɔɔ hemɔkɛyeli lɛ mli lɛ’ ejurɔ.—Galatabii 6:10.

Ha Ohiɛ Asɔ Gbɛjianɔ ni Yehowa Eto Lɛ

Kwɛ bɔ ni wɔbaanyɛ wɔda shi wɔha akɛ Yehowa Nyɔŋmɔ jieɔ mɔ hesusumɔ ni mli jɔ kpo ehaa mɔ fɛɛ mɔ ni yɔɔ ejálɔi ajeŋ muu fɛɛ weku lɛ mli lɛ. Etsɔ esafo lɛ nɔ eto gbɛjianɔ yɛ suɔmɔ mli koni eye ebua wɔ ni wɔnyiɛ yɛ ehiɛ yɛ jalɛ gbɛ nɔ. Kɛji akɛ weku lɛ mli nyo ko kɛ eshafeemɔ fee esubaŋ ni esa akɛ ashwie lɛ kɛjɛ asafo lɛ mli po lɛ, gbɛ yɛ ni anyɛɔ akuɔ sɛɛ kɛ etsake etsui lɛlɛŋ. Nɔkwɛmɔ nɔ ni nyiɛ sɛɛ nɛɛ feɔ enɛ he mfoniri:

Onukpai lɛ ebɔ mɔdɛŋ akɛ amɛaaye amɛbua mɔ ko ni wɔbaatsɛ lɛ Anna, shi etsɔ ehe kɛtee zigaret shɛremɔ, daanumɔ, kɛ tsofai fɔji kɛ nitsumɔ he. Etsakeee etsui ni ehiii asafo lɛ mli. Shi etsɛɛɛ ni Anna je shishi enu he akɛ elaaje Yehowa asafo ni he tse lɛ suɔmɔ naanyobɔɔ lɛ, ni esɔle eha lɛ kɛha yelikɛbuamɔ. Ekpɛlɛ nɔ akɛ no mli lɛ enuko bɔ ni onukpai lɛ susuɔ mɛi ni shiɔ asafo lɛ ahe lɛ shishi jogbaŋŋ. Anna je kpeei baa shishi ekoŋŋ, ni enɛ ha ena tsuitsakemɔ. Yɛ no sɛɛ lɛ, ahe lɛ kɛba asafo lɛ hebuu ni suɔmɔ yɔɔ mli lɛ mli ekoŋŋ. Anna miifi Yehowa jeŋba he tɛi ni nɔ kwɔlɔ lɛ asɛɛ ekoŋŋ. Edaa shi yɛ suɔmɔ ni onukpai lɛ jie lɛ kpo lɛ hewɔ, ni ekɛɔ hu akɛ: “Onyɛŋ osusu bɔ ni Kristofoi awoji eye ebua mi babaoo eha lɛ he. Yehowa kwɛɔ wɔ hiamɔ nii anɔ jogbaŋŋ diɛŋtsɛ.”

Hɛɛ, Nyɔŋmɔ eto gbɛjianɔ kɛha mɛi ni ashwie amɛ kɛjɛ asafo lɛ mli, shi amɛtsakeɔ amɛtsui yɛ sɛɛ mli lɛ asɛɛkuu. Wɔna akɛ shwiemɔ diɛŋtsɛ po ji gbɛjianɔtoo ni suɔmɔ yɔɔ mli. Shi kwɛ bɔ ni ehi jogbaŋŋ moŋ akɛ oookwa niiashikpamɔ ni yɔɔ dɔlɛ nɛɛ, kɛtsɔ ohe ni okɛaabɔ wɔ-Nyɔŋmɔ ni yɔɔ krɔŋkrɔŋ lɛ jalɛ gbɛi lɛ ahe daa lɛ nɔ! Eba akɛ wɔɔjie shidaa kpo daa wɔha hegbɛ ni wɔna akɛ wɔɔjie Yehowa yi akɛ egbɛjianɔtoo ni he tse, ni suɔmɔ yɔɔ mli, ni buɔ mɔ he lɛ fa.

[Mfoniri ni yɔɔ baafa 26]

Ani oojie suɔmɔ kpo ootsɔɔ mɛi ni ashwie amɛ kɛjɛ asafo lɛ mli lɛ awekumɛi anɔkwafoi lɛ?