Ani Obaanyɛ Ona Sɛɛyoomɔ Babaoo?
SƐƐYOOMƆ ji “jwɛŋmɔ lɛ hewalɛ loo nyɛmɔ ni etsɔɔ nɔ ekɛyooɔ nɔ kome kɛjɛɔ nɔ kroko he.” Ebaanyɛ efee “ŋaalee ni akɛkojoɔ saji” loo “hewalɛ ni akɛnaa sɔrɔto-feemɔi ni yɔɔ nibii loo susumɔi amli” hu. Nakai Webster’s Universal Dictionary lɛ kɛɔ. Eyɛ faŋŋ akɛ, sɛɛyoomɔ ji su ko ni asumɔɔ waa. Anaa ehe sɛɛnamɔ yɛ Salomo wiemɔi nɛɛ amli: “Ejaakɛ ŋaalee aaabote otsui mli ni nilee aaaŋɔɔ osusuma naa, . . . sane sɛɛyoomɔ aaabu ohe, ni ejieo kɛjɛ gbɛ fɔŋ nɔ.”—Abɛi 2:10-12, NW.
Hɛɛ, sɛɛyoomɔ baaye abua wɔ ni wɔte shi wɔshi “gbɛ fɔŋ,” ni yɔɔ babaoo ŋmɛnɛ lɛ. Ni ekɛ sɛɛnamɔi krokomɛi babaoo hu baa. Akɛ nɔkwɛmɔ nɔ lɛ, bei pii lɛ, fɔlɔi nuɔ ni amɛbii miikɛɛ akɛ, ‘Onuuu mi shishi jogbaŋŋ!’ Kɛ amɛpɛi nii amli fioo lɛ, fɔlɔi ni yooɔ sane sɛɛ lɛ le bɔ ni amɛaafee ni amɛha amɛbii ajie henumɔi kɛ saji ni gbaa amɛnaa lɛ kpo amɛtsɔɔ amɛ. (Abɛi 20:5) Wu ni yɔɔ sɛɛyoomɔ lɛ baabo eŋa toi ni eeena sanesɛɛkɔmɔ yɛ yoo lɛ susumɔi kɛ ehenumɔi ahe moŋ fe ni ekɛ oyaiyeli aaamu saji anaa yɛ gbɛ ni ejaaa nɔ. Ŋa lɛ hu baafee nakai nɔŋŋ yɛ ewu lɛ gbɛfaŋ. Enɛ hewɔ lɛ, “nilee akɛmaa tsu, ni sanesɛɛkɔmɔ akɛhaa edamɔɔ shi.”—Abɛi 24:3.
Sɛɛyoomɔ yeɔ ebuaa mɔ ni etsuɔ shihilɛi ahe nii yɛ omanyeyeli mli. Abɛi 17:27 kɛɔ akɛ: “Mɔ ni wiemɔ ekaaa lɛ, ele nii, ni mɔ ni mumɔ he jɔ lɛ, lɛ ji mɔ ni kɔɔ sane sɛɛ.” Gbɔmɔ ni yɔɔ sɛɛyoomɔ lɛ jeee mɔ ni mli fuɔ oyayaayai, ní ekɛ oyaiyeli aaabote shihilɛ fɛɛ shihilɛ mli ni esusuuu he. Esusuɔ nibii ni baanyɛ ajɛ nifeemɔ ko mli aba lɛ he dani ekɛ ehe woɔ mli. (Luka 14:28, 29) Enaa ekɛ mɛi krokomɛi ateŋ toiŋjɔlɛ mli ŋɔɔmɔ hu ejaakɛ ‘nilee naabu’ kudɔɔ lɛ ni ehalaa ewiemɔi amli jogbaŋŋ. (Abɛi 10:19; 12:8) Shi, nɔ ni he hiaa fe fɛɛ ji akɛ, gbɔmɔ ni yooɔ sane sɛɛ lɛ kɛ heshibaa naa lɛ diɛŋtsɛ efatɔɔi ni ekwɛɔ Nyɔŋmɔ gbɛ kɛhaa gbɛtsɔɔmɔ, shi jeee gbɔmɔ. Enɛ saa Yehowa hiɛ, ni no ji yiŋtoo kroko hewɔ ni esa akɛ wɔna sɛɛyoomɔ lɛ.—Abɛi 2:1-9; Yakobo 4:6.
Sɛɛyoomɔ ni Israel Bɛ Lɛ
Anaa oshara ni baa kɛ akɛ sɛɛyoomɔ tsuuu nii lɛ, yɛ nifeemɔ ko ni ba yɛ Israel yinɔsane shishijee gbɛ lɛ mli. Beni esusuɔ nakai be lɛ he lɛ, lalatsɛ ni akɛ mumɔ tsirɛ lɛ lɛ wie akɛ: “Wɔtsɛmɛi lɛ yooo onaakpɛɛ nii lɛ asɛɛ yɛ Mizraim, amɛkaiii omɔbɔnalɛ babaoo lɛ, shi moŋ amɛtse atua yɛ ŋshɔ ni ji Ŋshɔ Tsuru lɛ naa.”—Lala 106:7.
Beni Mose nyiɛ Israel hiɛ kɛshi Mizraim lɛ, no mli lɛ Yehowa ejie ehewalɛ kɛ efaishitswaa akɛ ebaaha ewebii aye amɛhe lɛ kpo momo, kɛtsɔ haomɔi nyɔŋma ni ekɛba nakai jeŋ hewalɛ kpeteŋkpele lɛ nɔ lɛ nɔ. Beni Farao ŋmɛɛ Israelbii lɛ ahe lɛ sɛɛ lɛ, Mose nyiɛ amɛhiɛ kɛyashɛ Ŋshɔ Tsuru lɛ naa. Shi, Mizraim asraafoi lɛ tiu amɛ kɛ foi. Ebafee tamɔ nɔ ni Israelbii lɛ eka, ni heyeli hee ni amɛna lɛ baahi shi be kukuoo ko kɛkɛ. No hewɔ lɛ nɔ ni aŋma yɛ Biblia lɛ mli lɛ kɛɔ akɛ: “Ni amɛshe gbeyei naakpa; ni Israelbii lɛ bolɔ tsɛ Yehowa.” Ni amɛtsɔ amɛhiɛ amɛha Mose, ni amɛkɛɛ lɛ akɛ: “Mɛɛba okɛ wɔ ye nɛkɛ sane, ni oloo wɔ kɛjɛ Mizraim kɛba biɛ? . . . Shi fãŋ nɔ̃ moŋ ni wɔsɔmɔ Mizraimbii lɛ fe nɔ ni wɔɔbagboi yɛ ŋa lɛ nɔ lɛ!”—2 Mose 14:10-12.
Ekolɛ eeefee tamɔ nɔ ni shishinumɔ yɛ amɛ gbeyeishemɔ lɛ he, ja wɔkai akɛ amɛna Yehowa hewalɛ kpojiemɔi nyɔŋma ni ekaaa lɛ kɛtsɔ hiɛ momo. Amɛ diɛŋtsɛ amɛle nibii ni Mose baakai amɛ yɛ he, aaafee afii 40 sɛɛ lɛ momo, akɛ: “Yehowa kɛ nineshiwalɛ kɛ nine ni akpã mli kɛ gbeyei babaoo kɛ okadii kɛ naakpɛɛ nii jie wɔ kɛjɛ Mizraim.” (5 Mose 26:8) No hewɔ lɛ, taakɛ lalatsɛ lɛ ŋma lɛ, beni Israelbii lɛ te shi amɛwo Mose gbɛtsɔɔmɔ lɛ, ‘amɛkɛ sɛɛyoomɔ tsuuu nii.’ Ni kɛlɛ, Yehowa ye eshiwoo lɛ anɔkwale, ni eye Mizraim hewalɛi lɛ anɔ kunim butuu.—2 Mose 14:19-31.
Wɔ hu wɔhemɔkɛyeli lɛ baanyɛ ayasha shi nakai nɔŋŋ kɛ wɔkɛ ŋwanejee loo yiŋkɔshikɔshi feemɔ kpee kaai anaa. Sɛɛyoomɔ baaye abua wɔ ni wɔkwɛ nii jogbaŋŋ be fɛɛ be, ni wɔkai akɛ Yehowa da kwraa fe mɔ fɛɛ mɔ ni teɔ shi ewoɔ wɔ lɛ. Sɛɛyoomɔ hu baaye abua wɔ ni wɔha nɔ ni Yehowa efee eha wɔ momo lɛ ahi wɔjwɛŋmɔ mli be fɛɛ be. Ebaaye ebua wɔ hu ni wɔhiɛ akakpa anɔkwa sane nɛɛ nɔ, akɛ lɛ ji Mɔ ni “baa mɛi fɛɛ ni sumɔɔ lɛ lɛ ayi.”—Lala 145:18-20.
Mumɔŋ Sɛɛyoomɔ Namɔ
Sɛɛyoomɔ baaa trukaa kɛkɛ yɛ be mli ni wɔdaraa yɛ afii amli lɛ. Esa akɛ wɔbɔ mɔdɛŋ ni wɔna. Nilelɔ Maŋtsɛ Salomo, ni abale lɛ waa yɛ jeŋmaji fɛɛ amli yɛ sɛɛyoomɔ ni eyɔɔ lɛ hewɔ lɛ, wie akɛ: “Ajɔɔ gbɔmɔ ni naa nilee kɛ gbɔmɔ ni naa jwɛŋmɔ lɛ! Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ.” (Abɛi 3:13, 14) Nɛgbɛ Salomo na esɛɛyoomɔ lɛ kɛjɛ? Kɛjɛ Yehowa dɛŋ. Beni Yehowa bi Salomo jɔɔmɔi ni esumɔɔ lɛ, Salomo ha hetoo akɛ: “Ha otsulɔ toiboo tsui, ni mikɛkojo omaŋ lɛ, koni mayoo nɔ ni hi kɛ nɔ ni ehiii.” (1 Maŋtsɛmɛi 3:9) Hɛɛ, Salomo kɛ ehiɛ fɔ̃ Yehowa nɔ akɛ eyelikɛbualɔ. Ebi sɛɛyoomɔ, ni Yehowa ha ena babaoo kɛteke nɔ. Mɛni jɛ mli ba? “Salomo nilee fe Bokagbɛ bii lɛ fɛɛ anilee kɛ Mizraim nilee fɛɛ.”—1 Maŋtsɛmɛi 5:10.
Salomo niiashikpamɔ lɛ tsɔɔ wɔ he ni esa akɛ wɔya, kɛ wɔmiitao sɛɛyoomɔ. Taakɛ Salomo fee lɛ, esa akɛ wɔkɛ wɔhiɛ afɔ̃ Yehowa nɔ. Yɛ mɛɛ gbɛ nɔ? Ojogbaŋŋ, Yehowa kɛ e-Wiemɔ, ni ji Biblia lɛ, ni haa wɔ sɛɛyoomɔ yɛ esusumɔi ahe lɛ eha wɔ. Kɛ wɔmiikane Biblia lɛ, wɔmiitsa nilee jɛɛhe ko ni he yɔɔ sɛɛnamɔ, ni baaha wɔna shishitoo nɔ̃ kɛha mumɔŋ sɛɛyoomɔ namɔ lɛ mli. Esa akɛ wɔjwɛŋ saji ni wɔbuaa naa kɛjɛɔ wɔ Biblia kanemɔ mli lɛ nɔ. No sɛɛ lɛ, wɔbaanyɛ wɔkɛtsu nii ni wɔkɛkpɛ wɔyiŋ yɛ gbɛ ni ja nɔ. Yɛ be ko sɛɛ lɛ, ehaa wɔ sɛɛyoomɔ hewalɛi lɛ daa kɛyaa hiɛ kɛyashɛɔ he ni agbɛnɛ wɔbatsɔmɔɔ ‘mɛi ni edara yɛ jwɛŋmɔ gbɛfaŋ,’ ni amɛnyɛɔ “[amɛleɔ] ekpakpa kɛ efɔŋ mlikpamɔ [loo, amɛyooɔ sɔrɔto ni yɔɔ mli].”—1 Korintobii 14:20; Hebribii 5:14; okɛto 1 Korintobii 2:10 he.
Miishɛɛ sane ji akɛ, wɔbaanyɛ wɔna sɛɛyoomɔ ni Yehowa ha Salomo ná lɛ he sɛɛ lolo. Yɛ mɛɛ gbɛ nɔ? Salomo batsɔ mɔ ni he esa waa yɛ nilee kpojiemɔ mli akɛ abɛbuai, ni yɛ anɔkwale mli lɛ, amɛji nilee ni ajɛ Nyɔŋmɔ mumɔ mli akɛha, ni abua naa yɛ kui bibii amli. Abaa nɛkɛ wiemɔi nɛɛ babaoo yi yɛ Biblia mli wolo ni ji Abɛi lɛ mli. Nakai wolo lɛ kasemɔ yeɔ ebuaa wɔ ni wɔnaa Salomo sɛɛyoomɔ lɛ he sɛɛ, ni wɔ diɛŋtsɛ hu wɔnaa sɛɛyoomɔ.
Wɔbaanyɛ wɔkɛ Biblia kasemɔ woji, tamɔ Buu-Mɔɔ kɛ Awake! woji tɛtrɛbii lɛ atsu nii koni eye ebua wɔ yɛ wɔ Biblia kasemɔ lɛ mli. Nɔ ni fe afii 116 sɔŋŋ nɛ ni Buu-Mɔɔ etswa Yehowa Maŋtsɛyeli lɛ he adafi etsɔɔ gbɔmɛi ni yɔɔ jalɛ tsuii lɛ. Awake! wolo tɛtrɛɛ lɛ kɛ ekrokomɛi ni tsɔ hiɛ lɛ ewie jeŋ shihilɛi ahe aahu kɛjɛ 1919 kɛbaa. Nɛkɛ woji tɛtrɛbii enyɔ nɛɛ pɛiɔ Biblia mli anɔkwalei amli, ni amɛkɛ mumɔŋ sɛɛyoomɔ ni yeɔ ebuaa wɔ ni wɔkɛnaa tɔmɔi lɛ haa wɔ fiofio, ekɔɔɔ he eko akɛ Kristendom tsɔɔ enɛɛmɛi aloo ekolɛ wɔnaa yɛ wɔ diɛŋtsɛ wɔsusumɔi amli.—Abɛi 4:18.
Yelikɛbuamɔ kroko hu ni haa wɔnaa sɛɛyoomɔ ji naanyobɔɔ kpakpa. Maŋtsɛ Salomo abɛi lɛ ekome kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.” (Abɛi 13:20) Eyɛ dɔlɛ waa akɛ Maŋtsɛ Salomo binuu Rehabeam kaiii nɛkɛ abɛbua nɛɛ yɛ eshihilɛ mli be ko ni he hiaa lɛ mli. Yɛ etsɛ gbele sɛɛ lɛ, Israel akutsei lɛ ba eŋɔɔ ni amɛkɛ lɛ bawie koni eha amɛjatsu lɛ afee huyɛɛ fioo eha amɛ. Klɛŋklɛŋ lɛ, Rehabeam kɛ hii onukpai lɛ tee ajina, ni hii nɛɛ jie sɛɛyoomɔ kpo ni amɛwo lɛ hewalɛ ni ebo emaŋbii lɛ atoi. Kɛkɛ ni esaa etee obalahii lɛ hu ŋɔɔ. Mɛnɛɛmɛi tsɔɔ akɛ amɛbɛ niiashikpamɔ ni amɛbɛ sɛɛyoomɔ hu, ni amɛwo Rehabeam hewalɛ ni ekɛ hegbeyeiwoo aha Israelbii lɛ hetoo. Rehabeam bo obalahii lɛ toi. Ni mɛni jɛ mli kɛba? Israel tse atua, ni Rehabeam laaje emaŋtsɛyeli lɛ fã ni da waa.—1 Maŋtsɛmɛi 12:1-17.
Fã ko ni he hiaa waa yɛ sɛɛyoomɔ namɔ mli ji mumɔ krɔŋkrɔŋ lɛ yelikɛbuamɔ taomɔ. Beni etiɔ̃ bɔ ni Yehowa kɛ Israelbii lɛ ye eha, yɛ amɛjiemɔ kɛmiijɛ Mizraim nyɔŋyeli mli lɛ mli lɛ, Biblia ŋmalɔ Nehemia wie akɛ: “Oŋɔ omumɔ kpakpa lɛ ohã, koni etsɔɔ amɛ nii.” (Nehemia 9:20) Yehowa mumɔ lɛ hu baanyɛ eha wɔle nii. Kɛ oosɔle ni Yehowa mumɔ lɛ aha ona sɛɛyoomɔ lɛ, sɔlemɔ kɛ hekɛnɔfɔɔ ejaakɛ Yehowa “haa mɛi fɛɛ faa ni ewieee mɔ ko hiɛ.”—Yakobo 1:5; Mateo 7:7-11; 21:22.
Sɛɛyoomɔ kɛ Sanesɛɛkɔmɔ
Bɔfo Paulo kɛ sɛɛyoomɔ tsu nii beni eshiɛ anɔkwale lɛ etsɔɔ jeŋmajiaŋ bii lɛ. Akɛ nɔkwɛmɔ nɔ lɛ, beni eyɔɔ Ateene lɛ, be ko lɛ, ‘eeho ni ena nibii ni amɛjaa lɛ’ ni eje gbɛ ekwɛ jogbaŋŋ. Amagai ebɔle Paulo he fɛɛ kɛkpe, ni emumɔ mli wo la yɛ emli. Agbɛnɛ eyɛ yiŋkpɛɛ ni esa akɛ efee. Ani esa akɛ ekɔ gbɛ ni yɔɔ shweshweeshwe, ni efee dioo? Aloo ani esa akɛ ewie amaga jamɔ ni egbɛ eshwa he fɛɛ he, ni yɔɔ dɔlɛ waa lɛ he faŋŋ, eyɛ mli moŋ akɛ nakai feemɔ baanyɛ afee oshara waa?
Paulo kɛ sɛɛyoomɔ tsu nii. Ena akɛ ama afɔleshaa latɛ ko ni aŋma nii yɛ he akɛ: “Nyɔŋmɔ ni Aleko lɛ Nɔŋ.” Paulo tsɔ ŋaa gbɛ nɔ ekpɛlɛ bɔ ni amɛtuu amɛhe amɛha amagai ajamɔ lɛ, kɛkɛ ni ekɛ nakai afɔleshaa latɛ lɛ tsu nii akɛ gbɛ ni eeetsɔ nɔ ewie saneyitso ni ji “Nyɔŋmɔ ni fee je lɛ kɛ emli nibii fɛɛ” lɛ he. Hɛɛ, Yehowa ji Nyɔŋmɔ ni amɛleko ehe sane lɛ! Enɛ hewɔ lɛ Paulo tsɔ nɛkɛ gbɛ nɔ eyoo bɔ ni amɛnuɔ sane lɛ he waa amɛhaa, ni enyɛ eye amɛ odase ni sa kadimɔ waa diɛŋtsɛ. Ni mɛni jɛ mli ba? Mɛi saŋŋ kpɛlɛ anɔkwale lɛ nɔ, ni amɛteŋ mɛi komɛi ji “Dionisio, Areopagonyo lɛ hu, kɛ yoo ko ni atsɛɔ lɛ Damari lɛ, kɛ mɛi krokomɛi ni fata amɛhe.” (Bɔfoi lɛ Asaji 17:16-34) Mɛɛ sɛɛyoomɔ he nɔkwɛmɔ nɔ Paulo ji nɛkɛ!
Ŋwanejee ko bɛ he akɛ, sɛɛyoomɔ baaa yɛ gbɛ ni yɔɔ mlɛo nɔ aloo fɔmɔ naa. Shi kɛtsɔ tsuishitoo, sɔlemɔ, mɔdɛŋbɔɔ kɛ ekaa, naanyobɔɔ yɛ nilee mli, Biblia lɛ kasemɔ kɛ enɔjwɛŋmɔ, kɛ ohe ni okɛaafɔ̃ Yehowa mumɔ krɔŋkrɔŋ lɛ nɔ lɛ, bo hu obaanyɛ ona eko.