Nine ni Shɛɔ Gbɔmɛi Sɔrɔtoi Fɛɛ Nɔ yɛ Ŋmɛnɛŋmɛnɛ Beaŋ Athens

BENI bɔfo Paulo yasara Athens (Ateene) aaafee afi 50 Ŋ.B. lɛ, no mli lɛ maŋ lɛ ka he eji jarayeli he ni he hiaa lolo, eyɛ mli akɛ etsutsu anunyam ni eyɔɔ lɛ bɛ dɔŋŋ. Yinɔsane mli niŋmaa ko jaje akɛ: “[Athens] tee nɔ efee Hela mumɔŋ kɛ nitɛŋmɔ maŋtiase, kɛ agbɛnɛ he ni woloŋlelɔi kɛ mɛi ni yɔɔ hewalɛ waa yɛ nakai be lɛ mli lɛ ahiɛ kɔ̃ɔ akɛ amɛaaya amɛyasara jɛmɛ.”

Ekolɛ beni Paulo yɔɔ jɛmɛ lɛ, ena hegbɛ eshiɛ eha Yudafoi, Athens wɔŋjalɔi, kɛ gbɔmɛi ni jɛ hei sɔrɔtoi babaoo. Akɛni eji tsɔɔlɔ ni hiɛ yɔɔ ehe nɔ ni he esa hewɔ lɛ, ekɛɛ yɛ wiemɔ kome ko mli akɛ, Nyɔŋmɔ dɛŋ “wala kɛ mumɔ kɛ nii fɛɛ jɛɔ haa gbɔmɛi fɛɛ,” ni akɛ “la kome eŋɔ-fee gbɔmɛi adesai fɛɛ,” ni akɛ “gbɔmɛi fɛɛ ni yɔɔ he fɛɛ he lɛ . . . atsake amɛtsui,” ejaakɛ E-baakojo “jeŋ muu lɛ fɛɛ.”—Bɔfoi lɛ Asaji 17:25-31. (Wɔma efa ko nɔ mi.)

Shikpɔŋkuku ni Majianɔ Bii Yɔɔ Mli

Athens ebatsɔ maŋtiase ni gbalaa gbɔmɛi kɛjɛɔ he fɛɛ he ekoŋŋ yɛ nyɛsɛɛ afii nyɔŋmai nɛɛ amli. Nɔyeli najiaŋdamɔlɔi kɛ mɛi ni yɔɔ asraafoi anitsumɔ mli eba biɛ akɛ kui ni atsuɔ amɛ kɛhaa nifeemɔ ko lɛ fã. Obalahii kɛ obalayei ni jɛ Afrika kɛ Boka Teŋgbɛ ebahi jɛmɛ akɛ univɛsiti nikaselɔi. Nitsulɔi ni fãa kɛyahiɔ maji krokomɛi amli ni jɛ Afrika, Asia, kɛ Europa Bokagbɛ maji lɛ anɔ eho kɛba biɛ. Filipinbii kɛ mɛi krokomɛi babaoo ni jɛ Asia Wuoyi-bokagbɛ eba ni amɛmiitao nitsumɔ akɛ shiakwɛlɔi. Ni gbɔmɛi ni miitao abobaa he jɛɔ maji ni bɛŋkɛ amɛ lɛ amli kɛ hei ni naagbai yɔɔ yɛ jeŋ fɛɛ lɛ amɛbaa be fɛɛ be.

Shihilɛ nɛɛ kɛ kaa bafɔɔ Maŋtsɛyeli lɛ he sanekpakpa shiɛlɔi ni yɔɔ maŋ lɛ mli lɛ anɔ. Gbɔi ni ebahi jɛmɛ yɛ be kuku mli lɛ ateŋ mɛi pii wieɔ Ŋleshi, shi mɛi komɛi wieɔ amɛmaŋ wiemɔi lɛ pɛ. Nɛkɛ gbɔmɛi nɛɛ jɛ hiŋmɛigbelemɔi kɛ jamɔi sɔrɔtoi pii amli. Obaana mɛi ni kɛɛ amɛji Kristofoi, Muslimbii, Hindubii, Buddhafoi, mɛi ni jaa tsei kɛ tɛi, mɛi ni kɛɛ Nyɔŋmɔ yɛ jio ebɛ jio amɛleee, kɛ mɛi ni kɛɛ Nyɔŋmɔ bɛ, yɛ gbɔi nɛɛ ateŋ. Esa akɛ Yehowa Odasefoi akase gbɛ ni amɛaatsɔ nɔ amɛtsake amɛshiɛmɔ wiemɔi amli koni esa shihilɛi ni nɛkɛ gbɔmɛi nɛɛ jɛ mli lɛ.

Akɛni mɛi heei nɛɛ ateŋ mɛi pii etsɔmɔ shihilɛi ni mli wawai amli hewɔ lɛ, yɛ bei pii amli lɛ amɛbiɔ saji yɛ nɔ ni shihilɛ tsɔɔ kɛ gbɛkpamɔ kɛha wɔsɛɛ be he. Amɛteŋ mɛi komɛi buɔ Biblia lɛ waa, ni ewaaa haaa amɛ akɛ amɛaakpɛlɛ nɔ ni ekɛɔ lɛ nɔ. Shikpɔŋkuku kɛ emli gbɔmɛi ni jɛ shihilɛi sɔrɔtoi amli nɛɛ ateŋ mɛi pii baa amɛhe shi, amɛhe jɔ, ni anɔkwale lɛ he hɔmɔ miiye amɛ. Amɛnuɔ he akɛ amɛyɛ heyeli ni amɛkɛaatao anɔkwale lɛ, ejaakɛ amɛbɛ amɛ weku lɛ masɛi kɛ shihilɛ ni yɔɔ shia lɛ mli dɔŋŋ.

Ato klɛŋklɛŋ Ŋleshi wiemɔ asafo yɛ Athens yɛ 1986 mli koni amɛtsu shikpɔŋkuku nɛɛ mli nii. Shweremɔ ni eba lɛ yɛ naakpɛɛ. Abaptisi mɛi heei aaafee 80 yɛ afii enumɔ ni eho lɛ mli. Nɔ ni ejɛ mli eba ji akɛ, ato Arabik asafo, Poland wiemɔ asafo, kɛ agbɛnɛ yɛ be ko mli lɛ French kuu, yɛ Athens. Mɛi ni jɛ Ŋleshi wiemɔ asafo lɛ mli lɛ ateŋ mɛi komɛi eshi koni amɛyaye amɛbua asafoi kɛ kui ni yɔɔ Tesalonika ni ka kooyigbɛ lɛ, kɛ Heraklion, Crete (Kreta), kɛ agbɛnɛ yɛ Piraeus, Athens lɛjiadaamɔ he lɛ. Ani obaasumɔ ni okɛ maŋsɛɛbii ni bakase anɔkwale lɛ yɛ Athens lɛ ekomɛi akpe?

Jeŋmaji lɛ Fɛɛ Anii ni Jara Wa lɛ Miiba

Afɔ Thomas yɛ Asmara, Eritrea, ni eda akɛ Katoliknyo ni etu ehe eha kwraa. Ebote mɔ kome shihilɔi ashia beni eye afii 15. Ebi onukpai ni kwɛɔ shihilɛ he lɛ nɔ lɛ ateŋ mɔ kome sane akɛ: “Te enyɛɔ ebaa lɛ tɛŋŋ ni Nyɔŋmɔ kome ji Nyɔŋmɔi etɛ lɛ?” Onukpa lɛ ha hetoo akɛ: “Ejaakɛ wɔkpɛlɛɔ nɔ ni paapa lɛ kɛɔ yɛ mumɔŋ nibii ahe lɛ nɔ. Nɔ ni fe fɛɛ lɛ, eji teemɔŋ sane, ni odako bɔ ni eeeha onu shishi.” Beni Thomas ehi mɔ kome shihilɔi ashihilɛ he lɛ afii enumɔ lɛ, eshi jɛmɛ, ni eyiŋ efutu ni enijiaŋ eje wui yɛ sɔlemɔ lɛ jeŋba kɛ tsɔɔmɔi ahewɔ. Ni kɛlɛ, eŋmɛko anɔkwa Nyɔŋmɔ lɛ sɛɛgbɛ taomɔ lɛ he.

Gbi ko beni eyahi Athens lɛ sɛɛ etsɛɛɛ, ni ena Buu-Mɔɔ, ni saneyitso ni yɔɔ sɛɛ ji “Hewalɛnamɔ kɛ Miishɛɛ Baanyɛ Afee Onɔ̃” lɛ ekome yɛ eshinaa naa. Ekane shii abɔ. Ekane yɛ wolo tɛtrɛɛ lɛ nɔŋŋ mli akɛ, esa akɛ wɔtao Nyɔŋmɔ Maŋtsɛyeli lɛ kɛ ejalɛ lɛ klɛŋklɛŋ. (Mateo 6:33) Thomas kula shi ni ebi ni Nyɔŋmɔ atsɔɔ lɛ bɔ ni eeefee enɛ, ni ewo shi akɛ: “Kɛ otsɔɔ mi gbɛ ni matsɔ nɔ matao o-Maŋtsɛyeli lɛ, matuu miwala be mli nyɔji ekpaa ni mikɛkase bɔ ni mafee masɔmɔ bo.” Yɛ no sɛɛ otsi ni ji ejwɛ lɛ, Odasefoi enyɔ yatswa eshinaa. Amrɔ nɔŋŋ ni Thomas kpɛlɛ Biblia kasemɔ nɔ, ni abaptisi lɛ nyɔji nyɔŋma sɛɛ. Ekɛɛ: “Yehowa ha misɔlemɔ lɛ hetoo diɛŋtsɛ, ni ekɛ hegbɛ ha mi koni mafee e-Dasefoi lɛ ateŋ mɔ kome. Agbɛnɛ esuɔmɔ lɛ tsirɛɔ mi koni matao e-Maŋtsɛyeli lɛ kɛ ejalɛ lɛ klɛŋklɛŋ yɛ mishihilɛ mli.”

Beni Odasefoi enyɔ ko shiɛɔ yɛ shia kɛ shia lɛ, amɛna maŋsɛɛ gbɛi ko ni kpɛtɛ shinaa naa ŋmɛlɛ ko masɛi.

Yoo ko gbee bi yɛ tsɔne ni awieɔ kɛtsɔɔ mli lɛ nɔ akɛ: “Mɛni nyɛtaoɔ?”

Odasefoi lɛ ateŋ mɔ kome kɛɛ akɛ amɛmiibɔ mɔdɛŋ ni amɛtao gbɔmɛi ni wieɔ Ŋleshi ni yɔɔ Biblia lɛ he miishɛɛ.

Yoo lɛ bi akɛ: “Mɛni ji nyɛ jamɔ?”

“Yehowa Odasefoi ji wɔ.”

“Ojogbaŋŋ! Nyɛbaa ŋwɛitsu lɛ nɔ.”

Amɛfee nakai, ni beni tsɔne ni kɛ amɛ kwɔ tsu lɛ shinaa lɛ gbele lɛ, amɛna nuu sasaraa ko damɔ shi ni ehiɛ tsɔɔ akɛ esumɔɔɔ sane lɛ. Shi yoo lɛ wie kɛjɛ tsu lɛ mli.

“Ha amɛba mli. Miisumɔ ni mikɛ amɛ awie.”

Ekɛɛ amɛ akɛ efataa ewu lɛ akaŋshii kuu lɛ he kɛfaa gbɛ kɛyaa je lɛŋ he fɛɛ he, ni esɔle yɛ gbi ni tsɔ hiɛ lɛ mli koni ena Yehowa Odasefoi. No hewɔ lɛ, akɛ lɛ je Biblia lɛ kasemɔ shishi amrɔ nɔŋŋ. Akɛni be ni amɛkɛbaahi Greece faaa hewɔ lɛ, amɛto gbɛjianɔ kɛha nikasemɔi etɛ yɛ otsi mli, ni amɛgbe Obaanyɛ Ohi Shi wolo lɛ kasemɔ naa yɛ otsii nyɔŋma pɛ mli.

Akaŋshii be kroko ni nyiɛ sɛɛ lɛ kɛ amɛ ba Greece ekoŋŋ. Ŋa lɛ je enikasemɔ shishi ni ebɔ mɔdɛŋ waa. Yɛ nyɔji komɛi asɛɛ lɛ, eyafata Odasefoi lɛ ahe yɛ shiɛmɔ nitsumɔ lɛ mli akɛ shiɛlɔ ni abaptisiko lɛ, ni etsɛɛɛ ni eje eklɛŋklɛŋ Biblia mli nikasemɔ shishi. Kɛ namɔ? Kɛ ewu, ni hiɛ esɔ Odasefoi lɛ kɛ tsakemɔi ni eba eŋa lɛ shihilɛ mli lɛ jogbaŋŋ lɛ.

Allan, Protestant osɔfo ko binuu da yɛ South Africa. Beni edako kwraa ni ehe eye akɛ Biblia lɛ ji Nyɔŋmɔ kpojiemɔ ni jɛ mumɔŋ. Akɛni etsui enyɔɔɔ emli yɛ ejamɔ lɛ he hewɔ lɛ, ekɛ ehe yawo jeŋ nilee kɛ maŋkwramɔŋ saji amli, shi enɛ ha efee shwɛm fe bei fɛɛ. Beni efa kɛyahi Greece sɛɛ lɛ, bɔ ni enuɔ he akɛ efee shwɛm lɛ tee hiɛ. Enu he akɛ yiŋtoo ko bɛ eshihilɛ mli, ákɛ enyiɛ gbɛ ni kɛ lɛ eyaaa he ko nɔ.

Gbɛkɛ ko ni nɔ ko ba. Allan gba akɛ: “Mikula shi yɛ minakutsei anaa, ni migbele mitsuiŋ miha Nyɔŋmɔ. Yɛ mishihilɛ gbɛ lɛ hewɔ lɛ, mikɛ awerɛho yaafonui kpa Nyɔŋmɔ fai koni enyiɛ mihiɛ kɛya enɔkwa sɛɛnyiɛlɔi lɛ aŋɔɔ. Miwo shi akɛ, manyiɛ yɛ egbɛtsɔɔmɔ la lɛ mli.” Eyaje shwapo ko mli yɛ otsi lɛ nɔŋŋ mli, ni ekɛ nɔtsɛ lɛ, yoo ko ni eji Odasefonyo bɔi sanegbaa. Nakai sanegbaa lɛ fee tsakemɔ be diɛŋtsɛ yɛ Allan shihilɛ mli. “Mina ni aakumɔ hemɔkɛyelii ni misumɔɔ waa lɛ aashwie shi yɛ gbii ni nyiɛ sɛɛ ba lɛ amli: Triniti, hɛl-la, susuma ni gbooo—eka shi faŋŋ akɛ fɛɛ jeee Biblia mli tsɔɔmɔi.” Gbalashihilɛ mli hefatalɔi ko kɛɛ lɛ yɛ Maŋtsɛyeli Asa lɛ nɔ akɛ amɛkɛ lɛ baakase Biblia lɛ. Ekpɛlɛ nɔ ni etee ehiɛ oyayaayai. Allan kɛɛ: “Anɔkwale lɛ ha mifo kɛ miishɛɛ, ni eha miye mihe.” Abaptisi lɛ afi kome sɛɛ. Ŋmɛnɛ, eyɛ miishɛɛ akɛ eesɔmɔ akɛ asafoŋ sɔɔlɔ yɛ maŋ lɛ mli asafo lɛ ekome mli.

Elizabeth jɛ Nigeria, he ni etao Nyɔŋmɔ sɛɛgbɛ yɛ sɔlemɔi sɔrɔtoi amli shi etsui enyɔɔɔ emli. Nɔ ni wo ehe gbeyei waa fe fɛɛ ji naanɔ piŋmɔ yɛ hɛl-la mli tsɔɔmɔ lɛ. Beni ekɛ eweku lɛ ba Athens lɛ, Odasefoi enyɔ ba eshinaa naa, ni aje Biblia lɛ kasemɔ shishi. Elizabeth na miishɛɛ beni ekase akɛ Nyɔŋmɔ efeee gbɔmɛi niseniianii, shi ekɛ hiɛnɔkamɔ kɛha naanɔ wala yɛ paradeiso shikpɔŋ nɔ haa lɛ. No mli lɛ eŋɔ ebi ni gbeɔ yi feɔ ejwɛ hɔ ni eesumɔ ni efite nakai musũ lɛ. Kɛkɛ ni ekase Yehowa jwɛŋmɔ yɛ krɔŋkrɔŋ ni wala ji lɛ he nii. Amrɔ nɛɛ eyɛ biyoo fɛfɛo ko. Elizabeth tee ehiɛ oyayaayai ni etsɛɛɛ ni abaptisi lɛ. Eyɛ mli akɛ eyɛ bii ejwɛ kɛ nitsumɔ ni ekɛ ebe fɛɛ tsuɔ moŋ, shi kɛlɛ enyɛɔ efeɔ gbɛgbalɔi awalɔ nɔ ni miihe ashɛ daa nyɔŋ nɔ. Akɛ bɔ ni ena ewu ni eje Biblia lɛ kasemɔ shishi lɛ ejɔɔ lɛ. Ekɛɔ akɛ: “Yɛ naagbee lɛ, mina anɔkwa Nyɔŋmɔ lɛ kɛ anɔkwa jamɔ lɛ, miida Yehowa kɛ egbɛjianɔtoo ni suɔmɔ yɔɔ mli lɛ shi.”

Akɛ gbɔmɛi ni yɔɔ shikpɔŋkuku ni emli bii jɛ shihilɛi sɔrɔtoi amli nɛɛ ateŋ mɛi pii kpeɔ yɛ gbɛjegbɛ nɔ odaseyeli mli, shi ebiɔ hiɛmiamɔ dani ahaa amɛnaa he miishɛɛ. Nakai eji yɛ obalayoo ko ni atsɛɔ lɛ Sallay ni jɛ Sierra Leone lɛ he. Odasefonyo ko kɛ dɛhiɛmɔ wolo ha lɛ, ehe edrɛs, ni eto gbɛjianɔ koni aba eŋɔɔ. Sallay yɛ he miishɛɛ ni ekpɛlɛ Biblia kasemɔ nɔ, shi yɛ nɔnyɛɛi ni jɛ nitsumɔ mli kɛ naagbai krokomɛi hewɔ lɛ, nikasemɔ lɛ tsaraaa nɔ. Kɛkɛ ni eshi jɛmɛ trukaa ni ekɛ adrɛs hee haaa. Odasefonyo lɛ mia ehiɛ etao lɛ kɛtsɔ etsutsu adrɛs lɛ nɔ, ni yɛ naagbee lɛ, Sallay kɛ shɛɛ maje kɛyaha Odasefonyo lɛ akɛ eba eshia hee lɛ.

Nikasemɔ lɛ bafee nɔ ni tsaraa nɔ babaoo agbɛnɛ eyɛ mli akɛ Sallay hiɛ hɔ́ ni eshwɛ fioo ebaafɔ. Yɛ fufɔo lɛ fɔmɔ sɛɛ lɛ, Sallay batsɔ shiɛlɔ ni abaptisiko lɛ. Enɛɛmɛi fɛɛ baanyɛ afee tamɔ nɔ ko ni yɔɔ mlɛo, shi ebɛ lɛ nakai. Esa akɛ efee klalo leebi 6:30, koni eta bɔs mli ŋmɛlɛtswaa fã ni ekɛ ebi lɛ aya gbekɛbii bibii askul, no sɛɛ lɛ efoɔ bɔs kroko ŋmɛlɛtswaa kome kɛyaa nitsumɔ. Beni egbe ebɛɛmɔ nitsumɔ lɛ naa lɛ, ekuɔ sɛɛ efaa gbɛ kɛbaa eshia. Yɛ gbɛkɛ ni afeɔ kpeei, loo kɛ etee shiɛmɔ lɛ, ekɛ bɔs faa gbɛ ŋmɛlɛtswaa kome kɛyaa kɛbaa, yɛ ewu shitee-kɛ-woo lɛ fɛɛ sɛɛ. Yɛ be mli ni ejieɔ suɔmɔ kɛ tsuishitoo kpo yɛ ehe lɛ, etee ehiɛ kɛyashɛ he ni ejɔɔ ehe nɔ ni abaptisi lɛ. Ni ewu lɛ hu? Etee Kristo gbele lɛ Kaimɔ lɛ shishi, ni ekpɛlɛ nɔ ni akɛ lɛ afee Biblia mli nikasemɔ.

Akɛ Yibii Kpakpai ni Jɛ Mli Ba Ejɔɔ Amɛ

Kɛha gbɔmɛi nɛɛ ateŋ mɛi babaoo lɛ, be fioo pɛ amɛkɛbaahi Athens. Mɛi pii kuɔ amɛsɛɛ kɛyaa amɛmaji amli ni amɛyagbaa sanekpakpa lɛ amɛtsɔɔ amɛ wekumɛi kɛ nanemɛi. Mɛi krokomɛi faa kɛyahiɔ Anaigbɛ maji lɛ amli ni amɛyaa nɔ amɛsɔmɔɔ Yehowa. Mɛi ni hiɔ Greece lɛ yeɔ omanye babaoo yɛ amɛ maŋbii ni efa kɛbahi jɛmɛ lɛ ni amɛyeɔ amɛ odase lɛ mli. Yɛ shihilɛi lɛ ekomɛi amli lɛ, beni gbɔi lɛ efã kɛyahi maŋ kroko mli ni Odasefoi eyana amɛ dani anɔkwale dumɔwui lɛ woɔ yibii.

Enɛɛmɛi fɛɛ yeɔ odase akɛ Yehowa kwɛɛɛ hiɛaŋ. Ekpɛlɛɔ gbɔmɛi ni jɛ jeŋmaji fɛɛ mli ni sheɔ lɛ gbeyei ni sumɔɔ jalɛ nifeemɔ lɛ anɔ. (Bɔfoi lɛ Asaji 10:34, 35) Yɛ gbɔmɛi ni tamɔ gwantɛŋi nɛɛ agbɛfaŋ lɛ, nɔ ni jɛ gbɛ ni amɛfa kɛtee maŋ kroko nɔ kɛha heloonaa nibii ataomɔ lɛ mli ba lɛ kɛ jɔɔmɔi ni fa kwraa fe nɔ ni amɛkpa gbɛ baha amɛ—anɔkwa Nyɔŋmɔ, Yehowa, he nilee, kɛ eshiwoo ni kɔɔ naanɔ wala yɛ jalɛ jeŋ hee ko mli lɛ he. Hɛɛ, Yehowa ejɔɔ mɔdɛŋ ni abɔ koni nine ashɛ mɛi ni wieɔ maŋsɛɛ wiemɔi yɛ ŋmɛnɛŋmɛnɛ beaŋ Athens lɛ nɔ babaoo diɛŋtsɛ!

[Mfonirii ni yɔɔ baafa 16]

Gbɔmɛi ni jɛ maji pii anɔ miibo sanekpakpa lɛ toi yɛ Athens