Miwala Be Mli Hiɛnɔkamɔ—Akɛ Migboŋ Kɔkɔɔkɔ

TAAKƐ HECTOR R. PRIEST GBA

“Anyɛŋ kansa lɛ atsa,” datrɛfonyo lɛ kɛɛ. “Nɔ ko bɛ dɔŋŋ ni wɔbaanyɛ wɔfee wɔha bo.” Ana hela ni yeɔ mi nɛɛ fe afii nyɔŋma ni eho nɛ. Ni kɛlɛ, mihiɛ hiɛnɔkamɔ ni damɔ Biblia lɛ nɔ, akɛ mahi shi kɛya naanɔ yɛ shikpɔŋ nɛɛ nɔ ni migboŋ kɔkɔɔkɔ lɛ mli lolo.—Yohane 11:26.

MIFƆLƆI ji Methodistbii anɔkwafoi ni yaa sɔlemɔ be fɛ be yɛ akrowa maŋ bibioo ko mli, ni ekɛ wɔ weku lɛ ŋmɔ lɛ teŋ jekɛɛɛ tsɔ̃. Afɔ mi yɛ jɔɔ fɛfɛo ko ni ahuɔ yɛ mli, ni ji Wairarapa kpokpaa nɔ, aaafee kilomitai 130 yɛ Wellington kooyi-bokagbɛ, yɛ New Zealand. Wɔjɛɔ jɛmɛ wɔkwɛɔ gɔji ni snoo eha amɛnɔ, kɛ gɔji ateŋ faai ni mli tse, kɛ gɔŋkpɔi bibii babaoo ni tsara nɔ, kɛ shikpɔŋ kplanaa ni baa nii babaoo lɛ kɛ miishɛɛ.

Atsɔɔ wɔ yɛ Methodist Sɔlemɔ lɛ mli akɛ gbɔmɛi kpakpai fɛɛ yaa ŋwɛi, shi gbɔmɛi fɔji lɛ yaa hɛl, ni ji he ko ni akɛ la piŋɔ mɛi yɛ. Minuuu nɔ hewɔ ni kɛji Nyɔŋmɔ miisumɔ ni gbɔmɛi ahi ŋwɛi lɛ, ekɛ amɛ wooo jɛmɛ kɛjɛɛɛ shishijee lɛ shishi. Misheɔ gbele gbeyei be fɛɛ be, ni bei pii lɛ, misusuɔ nɔ hewɔ ni esa akɛ wɔgboi lɛ he. Yɛ 1927 mli, beni miye afii 16 lɛ, wɔ weku lɛ na amanehulu ko. No ji nɔ ni ha mibɔi misanebimɔi lɛ ahetoo taomɔ lɛ.

Mɛni Hewɔ ni Reg Gbo Lɛ?

Beni minyɛmi nuu Reg ye afii 11 lɛ, hela bamɔ lɛ waa. Datrɛfonyo lɛ nyɛɛɛ ana nɔ ni feɔ lɛ, ni no hewɔ lɛ enyɛɛɛ eye ebua lɛ. Awo yatsɛ Methodist osɔfo lɛ kɛba. Ebasɔle eha Reg, shi enɛ nyɛɛɛ ashɛje Awo mii. Yɛ anɔkwale mli lɛ, ekɛɛ osɔfo lɛ akɛ esɔlemɔi lɛ tsuuu nɔ ko kwraa.

Beni Reg gbo lɛ, Awo kɛ mɔ fɛɛ mɔ ni ekɛ lɛ aaakpe lɛ gbaa sane akɛ aleee nɔ ebaana hetooi ni ji anɔkwale kɛha saji ni ebiɔ yɛ nɔ hewɔ ni ebi nuu lɛ gbo lɛ he lɛ lo. Beni ekɛ nitsumɔtsɛ ko gbaa sane yɛ maŋ lɛ mli lɛ, ebi nuu lɛ akɛ ani ele shihilɛ mli ni gbohii lɛ yɔɔ lo. Nuu lɛ leee nɔ ko kwraa yɛ he, shi ekɛɛ lɛ akɛ: “Mɔ ko bashi wolo nɛɛ eha mi ni masumɔ ni mikɛha bo.”

Awo kɛ wolo lɛ tee shia ni ebɔi kanemɔ. Enyɛɛɛ eŋmɛɛ wolo lɛ he efɔ shi. Fiofio kɛkɛ ni bɔ ni ehao yɛ sane lɛ he lɛ batsake. Ekɛɛ weku lɛ akɛ, “No nɛ; anɔkwale lɛ nɛ.” Wolo lɛ gbɛi ji The Divine Plan of the Ages, klɛŋklɛŋ kpo yɛ Studies in the Scriptures wolo lɛ mli. Miyiŋ fee mi kɔshikɔshi fioo kɛjɛ shishijee, ni mika akɛ mawie mashi bɔ ni wolo lɛ wieɔ Bɔlɔ lɛ yiŋtoo he ehaa lɛ. Shi naagbee lɛ, minaa tã kwraa.

Biblia Mli Anɔkwale lɛ nɔ Kpɛlɛmɔ

Misusu akɛ, ‘Kwɛmɔ ní aahi shi kɛya naanɔ, ní agbooo dɔŋŋ!’ Hiɛnɔkamɔ ni tamɔ enɛ ji nɔ ni mɔ ko baakpa gbɛ kɛjɛ Nyɔŋmɔ ni yɔɔ suɔmɔ dɛŋ. Paradeiso shikpɔŋ! Hɛɛ, no pɛpɛɛpɛ mitaoɔ.

Yɛ anɔkwalei ni yɔɔ miishɛɛ nɛɛ kasemɔ sɛɛ lɛ, Awo kɛ nyɛmimɛi yei Kristofoi etɛ ni jɛ Wellington—Nyɛmimɛi yei Thompson, Barton, kɛ Jones—shiɔ shia gbii saŋŋ bei komɛi, ni amɛyagbɛɔ Maŋtsɛyeli dumɔwui lɛ amɛshwãa yɛ shɔŋŋ yɛ akrowai amli. Eyɛ mli akɛ Ataa naaa Awo maŋsɛɛ sanekpakpa jajemɔ mumɔ lɛ eko moŋ, shi efi esɛɛ yɛ enitsumɔ lɛ mli.

Mina nɔmimaa yɛ anɔkwale lɛ he, shi be saŋŋ ho ni nɔ ko bibioo pɛ mifee yɛ mihemɔkɛyeli lɛ he. Yɛ 1935 mli lɛ, mikɛ Rowena Corlett bote gbalashihilɛ mli, ni yɛ be ni sa mli lɛ, ajɔɔ wɔ kɛ biyoo, Enid, kɛ no sɛɛ lɛ, binuu hu, Barry. Mitsuɔ nii akɛ mɔ ko ni heɔ kooloi ni eyahɔ̃ɔ, ni miyaheɔ tooi kɛ tsinai akpei abɔ kɛjɛɔ okwaafoi ni yɔɔ wɔmasɛi lɛ adɛŋ. Kɛ okwaafoi nɛɛ miisumɔ ni wɔwie maŋkwramɔ saji ahe lɛ, minaa he miishɛɛ waa, ejaakɛ mikɛɔ amɛ akɛ: “Adesai amɔdɛŋbɔi nɛɛ eko kwraa bɛ ni baaye omanye. Nyɔŋmɔ Maŋtsɛyeli lɛ ji nɔyeli koome pɛ ni baanyɛ atsu he nii.”

Dɔlɛ sane ji akɛ, tawa kɛ nitsumɔ baka mihe; mikɛ zigar maa minaa be fɛɛ be. Yɛ be ko sɛɛ lɛ, mihewalɛ bɔi shi baa, ni atsĩ minaa yɛ helatsamɔ he kɛ musuŋ naagbai ni waa mihe waa. Akɛɛ mi akɛ mimusuŋ nii ahe efee fala agbo, ni enɛ jɛ tawa ni mishɛreɔ lɛ. Eyɛ mli akɛ mikpa su nɛɛ moŋ, shi bei pii lɛ, milaa ni miishɛre zigar loo zigaret ko ni etaŋ aahu kɛmiiya naanɔ. Kwɛ bɔ ni tawa nyɛɔ ekaa mɔ he ni ehiii kwraa ha!

Ni mikpa tawa shɛremɔ lɛ, mifee tsakemɔi krokomɛi ni he hiaa. Yɛ 1939 mli, beni miye afii 28 lɛ, abaptisi mi yɛ Mangatai Faa ni bɛŋkɛ wɔshia ni yɔɔ akrowa lɛ masɛi lɛ mli. Robert Lazenby, ni kwɛɔ shiɛmɔ nitsumɔ lɛ nɔ yɛ New Zealand lɛ, fã gbɛ kɛjɛ Wellington tɔ̃ɔ kɛba ni ebaha maŋshiɛmɔ lɛ yɛ wɔshia lɛ ni abaptisi mi. Kɛjɛ nakai be lɛ nɔ kɛyaa lɛ, mibatsɔ Yehowa Odasefonyo ni yɔɔ ekaa.

Shiɛmɔ Nitsumɔ lɛ He Gbɛjianɔtoo

Yɛ mibaptisimɔ lɛ sɛɛ lɛ, ahala mi akɛ Eketahuna Asafo lɛ nɔkwɛlɔ. No mli lɛ, miŋa, Rowena, ekpɛlɛko Biblia mli anɔkwale lɛ nɔ lolo. Shi, miha ele akɛ mibafɔ̃ Alf Bryant nine ni ejɛ Pahiatua tɔ̃ɔ kɛba ni ebatsɔɔ mi bɔ ni mafee mashiɛ jogbaŋŋ yɛ shia kɛ shia. Miitao mato shiɛmɔ nitsumɔ lɛ he gbɛjianɔ koni wɔto naa ni wɔtsu wɔ shikpɔŋkuku lɛ mli nii jogbaŋŋ kɛmɔ shi.

Rowena kɛɛ mi akɛ: “Hector, kɛ oje kpo akɛ oyaaye odase yɛ shia kɛ shia lɛ, beni obaaku osɛɛ lɛ, mitee. Mishi bo. Ogbɛnaa nii yɛ biɛ—yɛ shia, kɛ oweku lɛ.”

Mileee nɔ ni mafee. Mikɛ shishashaomɔ saa mihe. Mitee nɔ misusu he yɛ miyiŋ akɛ, ‘Esa akɛ mafee kɛ̃. Miwala damɔ nɔ, ni nakai nɔŋŋ miweku lɛ hu wala damɔ nɔ.’ No hewɔ lɛ mima nɔ mi miha Rowena akɛ misumɔɔɔ ni mafee nɔ ko ni edɔ lɛ yɛ gbɛ ko nɔ. Mikɛɛ lɛ akɛ misumɔɔ lɛ waa diɛŋtsɛ, shi akɛni Yehowa gbɛi kɛ emaŋtsɛyeli lɛ, kɛ wɔ diɛŋtsɛ hu wɔwala he yɛ mli hewɔ lɛ, esa akɛ mashiɛ yɛ nɛkɛ gbɛ nɔ.

Mikɛ Alf tee klɛŋklɛŋ shinaa lɛ naa, ni lɛ tsutsu eje wiemɔ shishi. Shi etsɛɛɛ nɔŋŋ kɛkɛ ni mina akɛ mi moŋ mihe wiemɔ lɛ yɛ enaa, ni miikɛɛ shiatsɛ lɛ akɛ nɔ ni ba yɛ Noa gbii lɛ amli lɛ tamɔ nɔ ni yaa nɔ yɛ wɔgbii nɛɛ amli lɛ pɛpɛɛpɛ, ni no hewɔ lɛ esa akɛ wɔfee nɔ ko koni wɔnyɛ wɔna nɔmimaa yɛ wɔyiwalaheremɔ he. (Mateo 24:37-39) Mishi woji bibii komɛi miha lɛ.

Beni wɔshiɔ jɛmɛ lɛ, Alf kɛɛ mi akɛ: “Nɛgbɛ ona nilee nɛɛ fɛɛ yɛ? Mihe ehiaaa bo. Bo diɛŋtsɛ obaanyɛ oya, koni wɔnyɛ wɔtsu shikpɔŋkuku ni kulɛ mikɛ bo baatsu mli nii lɛ dalɛ toi enyɔ.” No hewɔ lɛ nakai ji bɔ ni wɔfee.

Beni wɔkuɔ wɔsɛɛ kɛbaa shia lɛ, no mli lɛ mileee nɔ ni mɛɔ wɔ. Nɔ ni fee mi naakpɛɛ kɛ miishɛɛ fɛɛ ji akɛ, beni wɔbashɛ lɛ, no mli lɛ Rowena efee tii klalo eha wɔ. Otsii enyɔ sɛɛ lɛ, miŋa bafata mihe yɛ maŋ shiɛmɔ nitsumɔ lɛ mli ni ebafee nɔkwɛmɔ nɔ kpakpa yɛ Kristofoia ekaa kpojiemɔ mli.

Mɛi ni batsɔmɔ Yehowa Odasefoi yɛ wɔ okwaafoi ajɔɔ shikpɔŋ lɛ mli klɛŋklɛŋ lɛ ateŋ mɛi komɛi ji Maud Manser, kɛ ebinuu William, kɛ ebiyoo Ruby. Maud wu ji mɔ ko ni yɔɔ keketee, ni anaa lɛ akɛ mɔ ko ni yɔɔ basabasa fioo. Be ko lɛ, mikɛ Rowena yashɛ amɛŋmɔ lɛ mli ni wɔyaatsɛ Maud kɛya shiɛmɔ. Obalanyo William eto gbɛjianɔ akɛ wɔkɛ ekar lɛ aya, shi etsɛ hu yɛ susumɔi kroko kwraa.

Shihilɛ lɛ mli wa fioo. Mikɛɛ Rowena akɛ ehe wɔ biyoo Enid ni ehiɛ lɛ. Kɛkɛ mi mibote William kar lɛ mli ni mifã tsɔne lɛ oya kɛje kpo kɛjɛ tsu mli he ni akɛtoɔ lɛ, beni Ow. Manser kɛ oyaiyeli bɔɔ mɔdɛŋ ni eŋa tsu lɛ naa shinaa lɛ dani kar lɛ aje kpo. Shi ehe efeee oya. Beni mikɛtee hiɛ saŋŋ yɛ tsɔne nyiɛmɔ he lɛ, wɔyawa, ni mije kpo kɛjɛ kar lɛ mli ni mikɛ Ow. Manser ni mli efu waa lɛ yakpe. Mikɛɛ lɛ akɛ: “Wɔmiiya shiɛmɔ, ni Aw. Manser miifata wɔhe kɛya.” Mikɛ lɛ wie saŋŋ, ni emlifu lɛ naa ba shi fioo bɔ ni sa. Ni misusu nɔ ni ba lɛ he lɛ, kulɛ esa akɛ matsu shihilɛ lɛ he nii yɛ gbɛ kroko nɔ, shi sɛɛ mli lɛ, ebaná Yehowa Odasefoi ahe miishɛɛ waa, eyɛ mli akɛ lɛ diɛŋtsɛ ebatsɔɔɔ Odasefonyo.

No mli lɛ Yehowa webii fioo pɛ yɔɔ yɛ nakai afii lɛ amli, ni wɔna be-fɛɛ sɔɔlɔi ni kɛ wɔ bahi shi yɛ wɔŋmɔ lɛ mli lɛ asaramɔi lɛ ahe miishɛɛ ni wɔna he sɛɛ jogbaŋŋ hu. Nɛkɛ saralɔi nɛɛ ateŋ mɛi komɛi ji Adrian Thompson kɛ enyɛmi yoo Molly, ni amɛyi enyɔ lɛ fɛɛ amɛtee Buu-Mɔɔ Biblia Gilead Skul lɛ shishijee nikasemɔ klas kɛha maŋsɛɛ sanekpakpa shiɛlɔi lɛ eko, ni amɛyasɔmɔ yɛ maji asɛɛ hei ni aha amɛ nitsumɔ yɛ, yɛ Japan kɛ Pakistan.

Ta Be Mli Niiashikpamɔi

Yɛ September 1939 mli lɛ, Jeŋ Ta II je shishi, ni yɛ October 1940 mli lɛ, New Zealand nɔyeli lɛ gu Yehowa Odasefoi anitsumɔ lɛ kwraa. Akɛ wɔ nyɛmimɛi hii Kristofoi lɛ ateŋ mɛi pii tee maŋ lɛŋ kojomɔi hei. Akɛ amɛteŋ mɛi komɛi tee nitsulɔi aŋsarai amli, ni ajie amɛ kwraa kɛjɛ amɛŋamɛi kɛ amɛbii ahe. Beni ta lɛ yaa nɔ lɛ, eyɛ mli akɛ wɔlɛɔ wuɔi moŋ, shi kɛlɛ miisusu akɛ ekolɛ abaatsɛ mi kɛha asraafoi anitsumɔ. Kɛkɛ ni adafitswaa je kpo akɛ ahaŋ okwaafoi ashi amɛ okwaayeli nitsumɔ lɛ kɛha asraafoi anitsumɔ dɔŋŋ.

Mikɛ Rowena tsa wɔ Kristofoi asɔɔmɔ nitsumɔ lɛ nɔ, ni wɔteŋ mɔ fɛɛ mɔ kɛ ŋmɛlɛtswai ni fe 60 woɔ shiɛmɔ nitsumɔ lɛ mli daa nyɔŋ nɔ. Nɛkɛ be nɛɛ mli lɛ, mina hegbɛ mikɛye mibua Odasefoi obalahii ni tee nɔ amɛhi shi akɛ Kristofoi ni kɛ amɛhe wooo maŋ saji amli lɛ. Miyadamɔ shi miha amɛ yɛ Wellington, Palmerston North, Pahiatua, kɛ Masterton saneyeli hei lɛ. Bei pii lɛ, ahaa osɔfo fataa mɛi ni ŋmalaa mɛi agbɛi amɛwoɔ asraafoi anitsumɔ mli lɛ ahe, ni eyɛ miishɛɛ waa akɛ aaakpa sɛɛfimɔ ni amɛkɛhaa ta lɛ mli mɔdɛŋbɔɔ, ni jeee Kristofoi anifeemɔ lɛ he mama.—1 Yohane 3:10-12.

Gbi ko gbɛkɛ beni mikɛ Rowena kaseɔ Buu-Mɔɔ lɛ, polisifoi batutua wɔ yɛ shia trukaa. Wɔ shia mli nibii ni akwɛ mli fɛɛ fitsofitso lɛ ha amɛna akɛ wɔyɛ Biblia kasemɔ woji yɛ wɔshia lɛ. “Abaanyɛ ayawo nyɛ tsuŋ yɛ enɛ he,” taakɛ amɛkɛɛ wɔ lɛ. Beni polisifoi lɛ bote amɛ kar lɛ mli ni amɛbaaya lɛ, amɛna akɛ tsɔne lɛ dade ni haa ewaa lɛ eka mli, no hewɔ lɛ kar lɛ eyaaa kwraa. William Manser ye ebua amɛ kɛsaa kar lɛ, ni wɔnuuu nɔ ko kɛjɛɛɛ hii nɛɛ aŋɔɔ dɔŋŋ.

Beni agu nitsumɔ lɛ, wɔkɛ Biblia kasemɔ woji toɔ tsu ko mli yɛ wɔŋmɔ lɛ mli he ko ni etse ehe banee. Nyɔɔŋ teŋ lɛ, miyaa New Zealand nitsumɔ he nine lɛ ni miyalooɔ woji babaoo miwoɔ mikar lɛ mli obɔ. Kɛkɛ lɛ mikɛba shia mikɛbato tsu ni wɔna ni etse ehe banee nɛɛ mli. Gbi ko gbɛkɛ ni miyashɛ nitsumɔ he nine lɛ ni miyaloo wɔ woji lɛ ekomɛi yɛ teemɔŋ lɛ, trukaa pɛ kɛkɛ ni kanei su yɛ shia lɛ mli fɛɛ! Kɛkɛ ni polisifoi lɛ bo akɛ: “Wɔmɔ bo!” Shi nɔ ni yɔɔ naakpɛɛ ji akɛ, amɛŋmɛɛ mihe ni amɛfeee mi basabasa.

Yɛ 1949 mli lɛ, mikɛ Rowena hɔ̃ɔ ŋmɔ lɛ ni wɔkpɛ wɔyiŋ akɛ wɔbaafee gbɛgbalɔi aahu kɛyashi be mli ni wɔshika lɛ baata. Wɔfã kɛyahi shia ko mli yɛ Masterton ni wɔkɛ Masterton Asafo lɛ tsu nii akɛ gbɛgbalɔi. Beni shɛɔ afii enyɔ lɛ, atse Featherston Asafo lɛ hu, kɛ shiɛlɔi 24 ni yɔɔ ekaa babaoo, ni misɔmɔ yɛ jɛmɛ akɛ onukpai asɛinɔtalɔ. Kɛkɛ ni, yɛ 1953 mli lɛ, mina hegbɛ akɛ mafã gbɛ kɛya United States kɛha Yehowa Odasefoi amajimaji ateŋ kpee ni akɛ gbii kpaanyɔ fee yɛ Yankee Stadium yɛ New York City lɛ eko. Rowena nyɛɛɛ afata mihe kɛya ejaakɛ esa akɛ ekwɛ wɔbiyoo Enid, ni ena aŋsɔ hela lɛ.

Beni miku misɛɛ kɛba New Zealand lɛ, eba lɛ akɛ esa akɛ matao heloonaa nitsumɔ. Wɔku wɔsɛɛ kɛtee Masterton Asafo lɛ mli ekoŋŋ, ni ahala mi yɛ jɛmɛ akɛ onukpai asɛinɔtalɔ. Aaafee nɛkɛ beaŋ lɛ, William Manser hé Little Theater yɛ Masterton, ni enɛ batsɔ klɛŋklɛŋ Maŋtsɛyeli Asa yɛ Wairarapa. Yɛ 1950 afii lɛ amli lɛ, wɔ asafo lɛ na mumɔŋ shweremɔ kɛ yifalɛ babaoo mli ŋɔɔmɔ. No hewɔ lɛ, kɛ kpokpaa nɔkwɛlɔ lɛ basara wɔ lɛ, bei pii lɛ ewoɔ mɛi ni edara yɛ mumɔŋ lɛ hewalɛ ni amɛfã kɛyahi maŋ lɛŋ hei krokomɛi ni amɛyaye amɛbua yɛ shiɛmɔ nitsumɔ lɛ mli yɛ jɛmɛ, ni mɛi babaoo fee nakai.

Wɔ weku lɛ tee nɔ ehi Masterton, ni afii nyɔŋmai abɔ ni nyiɛ sɛɛ lɛ mli lɛ, jeee akɛ mina hegbɛi babaoo yɛ asafo lɛ mli kɛkɛ, shi moŋ mina maŋ kɛ majimaji ateŋ kpeei wuji ashishi nitsumɔ hu mli ŋɔɔmɔ. Rowena kɛ ehe woɔ shiɛmɔ nitsumɔ lɛ mli kɛ ekaa, ni eyeɔ ebuaa mɛi krokomɛi hu be fɛɛ be ni amɛfee nakai.

Hemɔkɛyeli he Kaai Anaadaamɔ

Taakɛ miwie kɛje shishi lɛ, yɛ 1985 mli lɛ, ana akɛ mina kansa hela ni ehiŋ tsamɔ. Kwɛ bɔ ni mikɛ miŋa anɔkwafo, Rowena, kɛ wɔbii lɛ ná ni wɔfata gbɔmɛi akpekpei abɔ ni yɔɔ wala mli bianɛ ni gboiŋ kɔkɔɔkɔ lɛ ahe! Shi datrɛfoi lɛ ha mitee shia ní miyagbo. Shi, klɛŋklɛŋ lɛ, amɛbi mi bɔ ni misusuɔ yɛ hela ni amɛkɛɛ amɛna lɛ he.

Ni mijie amɛ naa akɛ: “Miiya, miyato mitsui shi blɛoo, ni mahiɛ gbɛkpamɔ kpakpa mli.” Lɛlɛŋ, Biblia abɛbua nɛɛ batsɔ miwajemɔ nɔ, akɛ: “Tsui ni mli jɔ lɛ, gbɔmɔtso lɛ yiwala ni.”—Abɛi 14:30.

Kansa he datrɛfoi ni he esa waa lɛ jie nakai Biblia ŋaawoo lɛ yi. Amɛwie akɛ: “Nakai susumɔ lɛ feɔ tsamɔ ni shɛɔ oha mlijaa 90 kɛhaa mɛi ni yeɔ kansa hela lɛ.” Amɛjie yi hu akɛ esa akɛ mana la hewalɛ ni akɛtsaa nakai hela lɛ, otsii kpawo. Miishɛɛ sane ji akɛ, minyɛ mikpee kansa lɛ naa yɛ omanyeyeli mli.

Mikɛ amanehulu kpele ko kpe yɛ nɛkɛ jaramɔ be ni mli wa waa nɛɛ mli. Miŋa anɔkwafo, ni he yɔɔ fɛo lɛ ná hela ni haa lá hoɔ yɛ aŋsɔ mli lɛ eko ni egbo. Mina miishɛjemɔ kɛjɛ anɔkwafoi ni aŋmala amɛhe saji yɛ Ŋmalɛi lɛ amli lɛ anɔkwɛmɔ nii, kɛ bɔ ni Yehowa tsu amɛ naagbai ahe nii eha amɛ beni amɛyaa nɔ amɛhiɛɔ amɛ emuuyeli mli lɛ mli. Enɛ hewɔ lɛ, jeŋ hee lɛ he hiɛnɔkamɔ ni miyɔɔ lɛ tee nɔ emli wa waa.—Romabii 15:4.

Shi kɛlɛ, mihao waa yɛ jwɛŋmɔŋ, ni kulɛ miitao makpa sɔɔmɔ akɛ onukpa. Nyɛmimɛi ni yɔɔ wɔ asafo lɛ mli lɛ wo mi ekaa aahu kɛyashi mina hewalɛ ekoŋŋ ni mikɛtsa nɔ. Nɔ ni ejɛ mli ba ji akɛ, minyɛ misɔmɔ aahu kɛtsa nɔ akɛ Kristofonyo onukpa kɛ nɔkwɛlɔ yɛ afii 57 ni eho lɛ mli.

Miikwɛ Wɔsɛɛ Be kɛ Hiɛnɔkamɔ

Yehowa ni misɔmɔ yɛ afii nɛɛ amli fɛɛ lɛ jeee hegbɛ bibioo. Kwɛ jɔɔmɔi babaoo ni mina! Efeɔ tamɔ be ni etsɛko kwraa, akɛ beni miji gbekɛ nuu ni eye afii 16 lɛ, minu ni minyɛ miiwie waa akɛ: “No nɛ; anɔkwale lɛ nɛ!” Minyɛ hi shi akɛ Odasefonyo anɔkwafo, aahu kɛyashi be mli ni egbo yɛ afi 1979 mli, be mli ni eye fe afii 100. Ebiyoo kɛ ebihii ekpaa lɛ hu batsɔmɔ Odasefoi anɔkwafoi.

Nɔ ni mishweɔ waa ji akɛ, mahi shi ni mana akɛ ajie heguɔgbee ni akɛba Yehowa gbɛi nɔ lɛ kwraa. Ani mana miwala be mli hiɛnɔkamɔ ni fe fɛɛ, akɛ mahi shi ni migbooo kɔkɔɔkɔ lɛ? Ojogbaŋŋ, no lɛ, be ji nɔ ni baatsɔɔ. Shi kɛlɛ, miyɛ hekɛnɔfɔɔ akɛ mɛi pii, hɛɛ, yɛ naagbee lɛ, gbɔmɛi akpekpei abɔ anine baashɛ nakai jɔɔmɔ lɛ nɔ. No hewɔ lɛ bei abɔ ni miyɔɔ wala mli lolo lɛ, mabu gbɛkpamɔ ni miyɔɔ akɛ abaakane mi afata mɛi ni gboiŋ kɔkɔɔkɔ lɛ ahe lɛ akɛ nɔ ko ni jara wa waa kɛha mi.—Yohane 11:26.

[Mfoniri ni yɔɔ baafa 28]

Minyɛ

[Mfoniri ni yɔɔ baafa 28]

Mikɛ miŋa kɛ mibii