Yehowa—Mɔ ni Sumɔɔ Jalɛ kɛ Jalɛ Saneyeli
OBALAYOO fioo ko ni jɛ Sarajevo bi ehe nɔ hewɔ ni esa akɛ gbekɛbii ni yɔɔ emaŋ lɛ mli lɛ apiŋ babaoo nakai. Ekɛɛ: “Wɔfeko nɔ ko. Wɔleee nɔ ni yaa nɔ lɛ he nɔ ko.” Argentina nyɛmɛi ni ehao kɛ afii 15 sɔŋŋ ebua amɛhe naa shii abɔ yɛ Buenos Aires gwabɔɔ hei, koni amɛkɛte shi amɛwo amɛ bihii ni elaaje. Afrikanyo ko ni atsɛɔ lɛ Emmanuel, ni akɛ yiwalɛ gbe enyɛ kɛ enyɛmimɛi yei etɛ yɛ weku mli basabasa feemɔ ko ni fɛ lɛ mli lɛ maa nɔ mi akɛ: “Esa akɛ awo mɔ fɛɛ mɔ nyɔmɔ bɔ ni sa lɛ . . . Wɔmiitao jalɛ saneyeli.”
Jalɛ saneyeli ji Yehowa Nyɔŋmɔ sui titrii lɛ ateŋ ekome. Biblia lɛ kɛɔ akɛ: “Egbɛ̀i fɛɛ jalɛ ni.” Eji anɔkwale akɛ Yehowa “sumɔɔ jalɛ kɛ jalɛ saneyeli.” (5 Mose 32:4; Lala 33:5) Kɛ wɔɔle Nyɔŋmɔ jogbaŋŋ lɛ, esa akɛ wɔnu bɔ ni enuɔ jalɛ saneyeli shishi ehaa lɛ shishi ni wɔkase enɛ.—Hoshea 2:19, 20; Efesobii 5:1.
Ekolɛ bɔ ni adesai susuɔ bɔ ni su nɛɛ ji he amɛhaa lɛ ena bɔ ni wɔsusuɔ jalɛ saneyeli he wɔhaa lɛ nɔ hewalɛ. Yɛ je lɛŋ hei komɛi lɛ, afɔɔ jalɛ saneyeli he mfoniri feemɔ akɛ yoo ni afimɔ ehiŋmɛii ni hiɛ klante kɛ ŋsɛnii. Akɛɛ esa akɛ adesa jalɛ saneyeli afee nɔ ni kwɛɛɛ hiɛaŋ, ni ji akɛ, enaaa ninámɔ loo anaaa enɔ hewalɛ. Esa akɛ ekɛ ŋsɛnii lɛ aŋmɛ fɔ́ ni mɔ ni afolɔɔ enaa lɛ eye loo fɔ́ ni eyeee lɛ pɛpɛɛpɛ. Esa akɛ jalɛ saneyeli kɛ eklante lɛ abu mɛi ni yeee fɔ́ lɛ ahe ni egbala efɔŋ feelɔi atoi.
Wolo, Right and Reason—Ethics in Theory and Practice lɛ kɛɔ akɛ, “jalɛ saneyeli kɔɔ mla, gbɛnaa nii, hegbɛi, kɛ nitsumɔi ahe, ni ekɛ enyɔmɔwoi haa pɛpɛɛpɛ loo yɛ nɔ ni sa mɔ lɛ naa.” Shi Yehowa jalɛ saneyeli yaa shɔŋŋ fe nakai. Wɔbaanyɛ wɔna enɛ kɛtsɔ Yesu Kristo, ni tamɔ eŋwɛi Tsɛ lɛ babaoo lɛ nitsumɔi kɛ sui kpakpai lɛ ahe susumɔ nɔ.—Hebribii 1:3.
Sanekpakpa ŋmalɔ Mateo kɛ Yesaia 42:3 lɛ mli wiemɔi ni kɛɔ nɛkɛ lɛ to Yesu he: “Gala ni amia lɛ, ekuŋ, ni kane mli odonti ni tsoɔ sulii lɛ, egbeŋ, ni eeejie kojomɔ kpo yɛ anɔkwale naa.” Yesu jaje sane ni shɛjeɔ mɔ mii etsɔɔ gbɔmɛi ni tamɔ gala ni amia ni edɔ ni anaanaa nɔ po lɛ. Amɛtamɔ kane mli odonti ni miihe agbo, tamɔ nɔ ni amɛ naagbee wala egbo eta. Yɛ nɔ najiaŋ ni eeekumɔ okadi galai ni egbe kane mli odontii ni tsoɔ sulii lɛ, Yesu na mɛi ni naa nɔ̃ lɛ mɔbɔ, etsɔɔ amɛ nii ni etsa amɛ helai, ni eha Yehowa Nyɔŋmɔ jalɛ saneyeli lɛ fee faŋŋ kɛha amɛ. (Mateo 12:10-21) Taakɛ Yesaia gbalɛ lɛ gba efɔ shi lɛ, nakai jalɛ saneyeli lɛ kanya hiɛnɔkamɔ.
Mɔbɔnalɛ kɛ Yehowa Jalɛ Saneyeli
Mɔbɔnalɛ ji Nyɔŋmɔ jalɛ saneyeli lɛ fã diɛŋtsɛ. Enɛ je kpo yɛ be mli ni Yesu yɔɔ shikpɔŋ nɔ lɛ. Ebadamɔ shi kɛha jalɛ kɛ jalɛ saneyeli he tɛi ni Nyɔŋmɔ efolɔ eshwie shi lɛ pɛpɛɛpɛ yɛ emuuyeli mli. Shi, Yudafoi woloŋmalɔi kɛ Farisifoi lɛ tao ni amɛnine ashɛ jalɛ nɔ kɛtsɔ mlai ni yɔɔ keketee—ni amɛ amɛto amɛteŋ babaoo lɛ asɛɛnyiɛmɔ nɔ. Amɛ mla naa jalɛ saneyeli lɛ jie mɔbɔnalɛ kɛjɛ mli bei pii. Béi ni baka Yesu kɛ Farisifoi lɛ ateŋ lɛ pii kɔɔ sane nɛɛ he: Mɛni ji anɔkwa jalɛ saneyeli kɛ jalɛ?—Mateo 9:10-13; Marko 3:1-5; Luka 7:36-47.
Yesu fee bɔ ni esa akɛ akɛ mɛi krokomɛi aye yɛ gbɛ ni ja kɛ jalɛ gbɛ nɔ lɛ he nɔkwɛmɔ nɔ. Nuu ko ni le Mla lɛ jogbaŋŋ bi Yesu be ko akɛ mɛni he hiaa koni ena naanɔ wala. Yɛ hetoo hamɔ mli lɛ Yesu bi lɛ sane, ni ejie eyi beni eha hetoo akɛ mlai lɛ ateŋ enyɔ ni he hiaa fe fɛɛ ji ni mɔ asumɔ Nyɔŋmɔ kɛ etsui, esusuma, ejwɛŋmɔ, kɛ enyɛmɔ fɛɛ, ni asumɔ naanyo tamɔ bɔ ni asumɔɔ he lɛ. Kɛkɛ ni nuu lɛ bi akɛ: “Namɔ ji minaanyo?” Yesu ha hetoo kɛtsɔ Samarianyo ni na mɔbɔ lɛ abɛbua lɛ nɔ.—Luka 10:25-37
Afee Yehowa jalɛ kɛ jalɛ saneyeli ni mɔbɔnalɛ yɔɔ mli lɛ he nɔkwɛmɔ nɔ yɛ Yesu abɛbua ni kɔɔ Samarianyo lɛ he lɛ mli. Akɛni eye ebua mɔ ko ni eleee lɛ ni epila ni pɛsɛmkunya bɛ mli hewɔ lɛ, Samarianyo lɛ fee nɔ ko ni ja, ni hi, ni mɔbɔnalɛ yɔɔ mli. Yesu diɛŋtsɛ jie nakai mumɔ lɛ nɔŋŋ kpo yɛ be mli ni eyɔɔ shikpɔŋ nɔ lɛ. Eja ni eyeɔ jalɛ sane. Agbɛnɛ hu, ekɛ ewala ha mɛi ni ehia amɛ, adesai eshafeelɔi ni yeee emuu ni yɔɔ piŋmɔ, hela kɛ gbele shishi. Bɔfo Paulo kɛ jalɛ to kpɔmɔ nɔ gbɛjianɔtoo lɛ he. Eŋma akɛ: “Taakɛ bɔ ni atsɔ mɔ kome shigbeemɔ nɔ abu gbɔmɛi fɛɛ fɔ lɛ, nakai nɔŋŋ kɛ̃ atsɔ mɔ kome jalɛ [loo, “jalɛ nifeemɔ,” NW, shishigbɛ niŋmaa] nɔ abu gbɔmɛi fɛɛ wala bem.” (Romabii 5:18) Nɛkɛ “mɔ kome jalɛ” nɛɛ ji Nyɔŋmɔ gbɛ ni etsɔɔ nɔ ehereɔ adesai toibolɔi kɛjɛɔ oshara ni jɛ Adam esha lɛ mli ba, ni jeee amɛ amɛha eba nakai tɛ̃ɛ lɛ mli.
Nyɔŋmɔ jalɛ saneyeli tao ni ekpɔ adesai eshafeelɔi, ni efi jalɛ shishitoo mlai asɛɛ yɛ nakai be kome too lɛ nɔŋŋ mli. Kulɛ esha ni aaaku hiɛ ashwie nɔ lɛ baafee nɔ ni ejaaa ni suɔmɔ hu bɛ mli, ejaakɛ kulɛ ebaawo mlakwamɔ he hewalɛ. Yɛ gbɛ kroko nɔ lɛ, eji Nyɔŋmɔ jalɛ saneyeli lɛ yakɔ nyɔmɔwoo loo toigbalamɔ pɛ he kulɛ, shihilɛ ni adesa baana ehe yɛ mli lɛ baafee nɔ ni hiɛnɔkamɔ bɛ mli. Taakɛ Biblia lɛ tsɔɔ lɛ, “esha dɛŋ nyɔmɔwoo lɛ gbele ni,” ni “jalɔ ko bɛ, mɔ kome folo bɛ.” (Romabii 3:10; 6:23) Yehowa kɛ esuɔmɔ Bi lɛ laaje nɔ ko waa diɛŋtsɛ beni ekɛ eshai ahe afɔleshãa ni sa ha.—1 Yohane 2:1, 2.
Kpɔmɔ nɔ lɛ tsɔɔ akɛ alo ŋwɛi jalɛ saneyeli awo suɔmɔ ni damɔ shishitoo mla nɔ (Hela, a·gaʹpe) mli. Eji anɔkwale akɛ, Nyɔŋmɔ jalɛ saneyeli lɛ ji ejalɛ shishitoo mlai lɛ kɛ nitsumɔ—ejieɔ nɔ ni edamɔ shi kɛha yɛ jeŋba mli lɛ kpo. No hewɔ lɛ, kɛ Nyɔŋmɔ kɛtsu nii lɛ, a·gaʹpe ji suɔmɔ ni ŋwɛi jalɛ saneyeli damɔ nɔ. (Mateo 5:43-48) No hewɔ lɛ kɛ wɔnuɔ Yehowa jalɛ saneyeli shishi lɛ, wɔbaana hekɛnɔfɔɔ kwraa yɛ ekojomɔ yiŋkpɛi amli. Ákɛ “shikpɔŋ fɛɛ nɔ kojolɔ lɛ,” efeɔ nɔ ni ja daa.—1 Mose 18:25; Lala 119:75.
Kasemɔ Yehowa Jalɛ Saneyeli
Biblia lɛ woɔ wɔ ŋaa akɛ “nyɛfea Nyɔŋmɔ kaselɔi.” (Efesobii 5:1) Enɛ tsɔɔ akɛ wɔbaakase ejalɛ saneyeli kɛ esuɔmɔ hu. Shi, akɛni wɔyeee emuu hewɔ lɛ, wɔ gbɛ̀i anɔ kwɔlɔɔɔ tamɔ Yehowa Nyɔŋmɔ nɔ̃. (Yesaia 55:8, 9; Ezekiel 18:25) No hewɔ lɛ, te wɔɔfee tɛŋŋ wɔtsɔɔ akɛ wɔsumɔɔ jalɛ kɛ jalɛ saneyeli? Kɛtsɔ “gbɔmɔ hee ni abɔɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ” ni wɔɔwo lɛ nɔ. (Efesobii 4:24) Kɛkɛ lɛ wɔbaasumɔ nɔ ni Nyɔŋmɔ sumɔɔ, ni wɔnyɛ nɔ ni enyɛ̃ɛɔ. “Anɔkwa jalɛ” kpooɔ basabasa feemɔ, jeŋba shara, muji nitsumɔ, kɛ hemɔkɛyeli kwamɔ, ejaakɛ enɛɛmɛi buleɔ nɔ ni yɔɔ krɔŋkrɔŋ. (Lala 11:5; Efesobii 5:3-5; 2 Timoteo 2:16, 17) Jalɛ saneyeli ni Nyɔŋmɔ gbeyeishemɔ yɔɔ mli lɛ hu tsirɛɔ wɔ koni wɔjie miishɛɛ diɛŋtsɛ kpo yɛ mɛi krokomɛi ahe.—Lala 37:21; Romabii 15:1-3.
Agbɛnɛ hu, kɛ wɔhiɛ sɔɔ bɔ ni mɔbɔnalɛ yɔɔ Nyɔŋmɔ jalɛ saneyeli mli lɛ, wɔbasumɔŋ ni wɔkojo mumɔŋ nyɛmimɛi hii kɛ yei lɛ. Te wɔɔfee tɛŋŋ wɔnu amɛ shishi jogbaŋŋ tamɔ bɔ ni Yehowa feɔ lɛ? Ani wɔdamɔŋ wɔsusumɔ ni ejaaa lɛ nɔ wɔkojoŋ amɛ? No hewɔ lɛ, Yesu bɔ kɔkɔ akɛ: “Nyɛkakojoa koni akakojo nyɛ. Shi nɔ kojomɔ ni nyɛŋɔkojoɔ lɛ, aaaŋɔkojo nyɛ; ni nɔ susumɔ nɔ, ni nyɛŋɔsusuɔ lɛ, aaaŋɔsusu aha nyɛ. Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ, oyooo lɛ? Aloo te aaafee tɛŋŋ ni oookɛɛ onyɛmi akɛ ‘Ha majie kuli lɛ yɛ ohiŋmɛi mli,’ tsɛ mplaŋ yɛ bo diɛŋtsɛ ohiŋmɛi mli. Osatofo, jiemɔ mplaŋ lɛ yɛ bo diɛŋtsɛ ohiŋmɛi mli tsutsu, ni no dani ooona faŋŋ ni ojie kuli lɛ yɛ onyɛmi lɛ hiŋmɛi mli.” (Mateo 7:1-5) Kɛ wɔkɛ anɔkwayeli susu emuu ni wɔ diɛŋtsɛ wɔyeee lɛ he jogbaŋŋ lɛ, ehaŋ wɔkojo saji ni Yehowa baasusu he akɛ amɛjaaa.
Gbɛnaa nii ka asafoŋ onukpai ni ahala amɛ lɛ anɔ akɛ amɛkojo yɛ efɔŋ feemɔ ni hiɛdɔɔ yɔɔ mli lɛ mli. (1 Korintobii 5:12, 13) Kɛ amɛmiifee nakai lɛ, amɛkaiɔ akɛ, Nyɔŋmɔ jalɛ saneyeli sumɔɔ ni ekpã mɔbɔnalɛ mli yɛ he fɛɛ he ni eeehi feemɔ yɛ. Kɛ nɔdaamɔ nɔ ko bɛ kɛha enɛ—yɛ eshafeelɔi ni tsakeee amɛtsui lɛ asane lɛ mli nɛkɛ lɛ—anyɛŋ ana mɔbɔ. Shi onukpai lɛ eshwieee efɔŋ feelɔ nɛɛ kɛjɛɛɛ asafo lɛ mli yɛ oweletɔɔ hewɔ. Amɛhiɛ kãa nɔ akɛ eshwiemɔ lɛ diɛŋtsɛ baaha ena jwɛŋmɔ ekoŋŋ. (Okɛto Ezekiel 18:23 he.) Onukpai lɛ sɔmɔɔ yɛ Kristo yitsoyeli shishi, yɛ jalɛ saneyeli hewɔ, ni nɔ ni fata enɛ he ji ni amɛtamɔ “abobaa he yɛ kɔɔyɔɔ naa.” (Yesaia 32:1, 2) No hewɔ lɛ, esa akɛ amɛfee mɛi ni kwɛɛɛ hiɛaŋ kɛ mɛi ni nuɔ sane shishi.—5 Mose 1:16, 17.
Nyɛdua Dumɔwui yɛ Jalɛ Naa
Beni wɔmɛɔ Nyɔŋmɔ jalɛ jeŋ hee lɛ, esa akɛ ‘wɔtao jalɛ sɛɛ gbɛ’ bɔni afee ni wɔna ŋwɛi duromɔ mli ŋɔɔmɔ. (Zefania 2:3; 2 Petro 3:13) Atsɔɔ jwɛŋmɔ nɛɛ mli fɛfɛo yɛ wiemɔi ni anaa yɛ Hoshea 10:12 lɛ mli: “Nyɛdua nii nyɛhaa nyɛhe yɛ jalɛ mli, nyɛkpaa nii yɛ mɔbɔnalɛ naa! Nyɛhua hayii hu nyɛhaa nyɛhe; ejaakɛ eshɛ be ni akɛtaoɔ Yehowa sɛɛ gbɛ kɛyashi beyinɔ ni eeeba ebanɛ jalɛ eha nyɛ.”
Wɔnaa hegbɛi babaoo yɛ wɔ daa gbi shihilɛi amli ni ‘wɔkɛaatɛo jalɛ dumɔwui,’ taakɛ Yesu kɛ ebɛbua ni kɔɔ Samarianyo ni na mɔbɔ lɛ he lɛ fee he nɔkwɛmɔ nɔ lɛ. Yehowa baakwɛ ni ‘wɔkpa nii yɛ mɔbɔnalɛ naa.’ Kɛ wɔtee nɔ wɔnyiɛ yɛ ‘jalɛ saneyeli gbɛ nɔ’ lɛ, wɔnine baaya nɔ ashɛ nitsɔɔmɔ nɔ yɛ jalɛ mli yɛ Maŋtsɛyeli nɔyeli shishi. (Yesaia 40:14) Beni be hoɔ lɛ, ŋwanejee ko bɛ he akɛ wɔhiɛ baasɔ babaoo akɛ Yehowa ji mɔ ni sumɔɔ jalɛ kɛ jalɛ saneyeli.—Lala 33:4, 5.
[Mfoniri ni yɔɔ baafa 23]
Samarianyo ni na mɔbɔ lɛ feɔ Yehowa jalɛ saneyeli he nɔkwɛmɔ nɔ
[Mfoniri ni yɔɔ baafa 23]
Yesu na mɛi ni afeɔ amɛ niseniianii ni tamɔ galai ni amia lɛ mɔbɔ