Amɛfee Yehowa Suɔmɔnaa Nii
Filipo Baptisi Etiopia Nɔyeli lɛ Mli Onukpa Ko
ETIOPIANYO ko kɛ ebe miitsu nii yɛ nilee mli, beni eta eshwiili mli kɛyaa lɛ. No mli lɛ eekane wolo ko waa—nɔ ko ni klɛŋklɛŋ afii oha lɛ mli gbɛfalɔi fɔɔ feemɔ. Nɛkɛ nuu pɔtɛɛ nɛɛ ji nɔyeli lɛ mli onukpa ko “ni yɔɔ hegbɛ yɛ Etiopiabii amaŋnyɛ Kandake lɛ shishi.”a “Ekwɛɔ ejwetri fɛɛ nɔ”—ni tsɔɔ akɛ, eji maŋsɔɔlɔ ni kwɛɔ shika nɔ. Nɛkɛ nɔyeli lɛ mli onukpa nɛɛ miikane Nyɔŋmɔ Wiemɔ lɛ koni ena nilee.—Bɔfoi lɛ Asaji 8:27, 28.
Mɔ ni bɛŋkɛ jɛmɛ ji Filipo, sanekpakpa shiɛlɔ lɛ. Ŋwɛibɔfo ko etsɔɔ lɛ gbɛ kɛtee nɛkɛ he nɛɛ, ni agbɛnɛ akɛɛ lɛ akɛ: “Yaa ni oyakpɛtɛ shwiili nɛɛ sɛɛ.” (Bɔfoi lɛ Asaji 8:26, 29) Wɔbaanyɛ wɔsusu bɔ ni Filipo baabi ehe lɛ he akɛ, “Shi namɔ ji nɛkɛ nuu nɛɛ? Mɛni ekaneɔ lɛ? Mɛni hewɔ atsɔɔ mi gbɛ kɛtee eŋɔɔ lɛ.”
Beni Filipo joɔ foi yɛ shwiili lɛ masɛi lɛ, enu ni Etiopianyo lɛ miikane nɛkɛ wiemɔi nɛɛ: “Akpala lɛ kɛtee taakɛ toogwantɛŋ ni ayaagbe lɛ, ni bɔ ni toogwantɛŋ bi teɔ dioo yɛ ehetsɔikulɔ hiɛ lɛ, nakai nɔŋŋ etswaaa esɛŋ. Eheshibaa lɛ mli lɛ, ajie ekojomɔ lɛ kɛtee; shi eyinɔ lɛ, namɔ aaagba he sane? Ejaakɛ aŋɔ ewala lɛ kɛjɛ shikpɔŋ lɛ nɔ.”—Bɔfoi lɛ Asaji 8:32, 33.
Amrɔ nɔŋŋ ni Filipo yoo nɔ ni ekaneɔ lɛ. Ejɛ Yesaia niŋmaa lɛ mli. (Yesaia 53:7, 8) Etiopianyo lɛ nuuu nɔ ni ekaneɔ lɛ shishi. Kɛkɛ ni Filipo je sanegbaa shishi kɛtsɔ sanebimɔ nɔ: “Ani oonu nɔ ni okaneɔ lɛ shishi lo?” Etiopianyo lɛ ha hetoo akɛ: “Te mafee tɛŋŋ ni manyɛ hu, akɛ ja mɔ ko tsɔɔ mi?” Kɛkɛ ni ekpa Filipo fai koni ebata eshwiili lɛ mli.—Bɔfoi lɛ Asaji 8:30, 3l.
“Mɛni Tsiɔ Mibaptisimɔ Gbɛ?”
Etiopianyo lɛ kɛɛ Filipo akɛ: “Miikpao fai, namɔ he gbalɔ lɛ wieɔ nɛɛ? Lɛ diɛŋtsɛ ehe aloo mɔ kroko he?” (Bɔfoi lɛ Asaji 8:34) Etiopianyo lɛ yiŋ ni efutu lɛ lɛ bɛ naakpɛɛ, ejaakɛ mɔ ni “gwantɛŋ” loo “tsulɔ,” ni yɔɔ Yesaia gbalɛ lɛ mli lɛ ji lɛ etee teemɔŋ sane kɛjɛ jeeŋmɔ. (Yesaia 53:11) Kwɛ bɔ ni enɛ mli baafee faŋŋ beni Filipo jaje “Yesu he sanekpakpa” lɛ etsɔɔ Etiopianyo lɛ! Yɛ be fioo sɛɛ lɛ, Etiopianyo lɛ kɛɛ: “Naa nu; mɛni tsiɔ mibaptisimɔ gbɛ?” No hewɔ lɛ, amrɔ nɔŋŋ ni Filipo baptisi lɛ yɛ jɛmɛ.—Bɔfoi lɛ Asaji 8:35-38.
Ani nifeemɔ ni aye he oyai tsɔ̃ nɛ? Dabi kwraal Etiopianyo lɛ etsake kɛtee Yudafoi ajamɔ mli.b No hewɔ lɛ, eji Yehowa jalɔ momo ni yɔɔ Ŋmalɛi lɛ ahe nilee, ni Mesia lɛ he gbalɛi fata he. Shi kɛlɛ, nɛkɛ nilee nɛɛ yeko emuu. Amrɔ nɛɛ ni enine eshɛ saji ni he hiaa ni kɔɔ Yesu Kristo nitsumɔ he nɛɛ nɔ lɛ, Etiopianyo lɛ enu nɔ ni Nyɔŋmɔ taoɔ yɛ edɛŋ lɛ shishi, ni efee klalo akɛ ebaatsu he nii. Baptisimɔ sa.—Mateo 28:18-20; 1 Petro 3:21.
Yɛ no sɛɛ lɛ, “Yehowa mumɔ lɛ sha Filipo kɛtee.” Etee nitsumɔ kroko nɔ. Kɛkɛ ni Etiopianyo lɛ “yi gbɛ kɛ nyamɔ.”—Bɔfoi lɛ Asaji 8:39, 40.
Nikasemɔ Kɛha Wɔ
Akɛ Yehowa ŋmɛnɛŋmɛnɛ beaŋ tsuji lɛ, gbɛnaa nii kã wɔnɔ akɛ wɔye wɔbua aŋkroaŋkroi ni yɔɔ tsuijurɔ lɛ ni amɛkase Nyɔŋmɔ Wiemɔ lɛ mli anɔkwale lɛ. Mɛi pii eye omanye yɛ sanekpakpa lɛ ni amɛkɛhaa mɛi krokomɛi lɛ mli, beni amɛfaa gbɛ, loo yɛ gbɛi ni baa trukaa anɔ. Yɛ Maŋtsɛyeli shiɛmɔ nitsumɔ lɛ hewɔ lɛ, daa afi lɛ, gbɔmɛi akpei ohai abɔ kɛ baptisimɔ feɔ amɛ henɔjɔɔmɔ kɛha Yehowa Nyɔŋmɔ lɛ he okadi.
Shi esaaa akɛ mɛi heei lɛ kɛ oyaiyeli boteɔ baptisimɔ mli. Klɛŋklɛŋ Iɛ, esa akɛ amɛna Yehowa Nyɔŋmɔ kɛ e-Bi, Yesu Kristo he anɔkwale nilee. (Yohane 17:3) Kɛkɛ lɛ esa akɛ amɛtsake amɛtsui, ni amɛkpoo jeŋba fɔŋ, ni amɛkpale koni amɛhi shi yɛ tɛi ni Nyɔŋmɔ efolɔ eshwie shi lɛ anaa. (Bɔfoi lɛ Asaji 3:19) Enɛ heɔ be, titri lɛ kɛji akɛ susumɔ kɛ jeŋba gbonyo ehe shi waa yɛ mɔ lɛ mli. Yɛ be mli ni esa akɛ mɛi heei lɛ asusu afɔleshaa ni yɔɔ Kristo kaselɔ ni mɔ ko aaafee lɛ mli lɛ he lɛ, kɛlɛ jɔɔmɔi babaoo jɛɔ mli baa kɛhaa mɛi ni kɛ amɛhe woɔ henɔjɔɔmɔ wekukpaa ni akɛ Yehowa Nyɔŋmɔ naa lɛ mli lɛ. (Okɛto Luka 9:23; 14:25-33 he.) Mɛi ni ji Yehowa Odasefoi lɛ kɛ miishɛɛ tsɔɔ mɛi heei nɛɛ agbɛ kɛyaa gbɛjianɔtoo ni Nyɔŋmɔ kɛtsuɔ nii, koni ekɛtsu esuɔmɔnaa nii ahe nii lɛ mli. (Mateo 24:45-47) Taakɛ Etiopianyo lɛ ji lɛ, mɛnɛɛmɛi amli baafili amɛ yɛ nii ni Nyɔŋmɔ taoɔ yɛ amɛdɛŋ ni amɛhiɔ shi yɛ naa lɛ hewɔ.
[Shishigbɛ niŋmai]
a ‘‘Kandake’’ jeee gbɛi, shi sabala tamɔ (“Farao” kɛ “Kaisare”) ni kɔɔ Etiopia maŋnyɛmɛi ni yeɔ nɔ lɛ ahe.
b Mɛi ni tsakeɔ amɛjamɔ nɛɛ jeee lsraelbii, shi gbɔi ni amɛhala akɛ amɛaaye Mose Mla lɛ nɔ.—3 Mose 24:22.
[Akrabatsa ni yɔɔ baafa 8]
Mɛni Hewɔ Atsɛɔ Lɛ Piafonyo Lɛ?
Atsɛɔ Etiopianyo lɛ akɛ “piafonyo” yɛ sane ni yɔɔ Bɔfoi lɛ Asaji yitso 8 lɛ mli fɛɛ. Shi akɛni Mose Mla lɛ heee nuu ni asa lɛ ewooo asafo lɛ mli hewɔ lɛ, eyɛ faŋŋ akɛ nɛkɛ nuu nɛɛ jeee piafonyo (osai) yɛ wiemɔ lɛ shishinumɔ diɛŋtsɛ naa. (5 Mose 23:1) Hela wiemɔ kɛha “piafonyo” lɛ baanyɛ akɔ gbɔmɔ ni egbɛhe nɔ kwɔ he. No hewɔ lɛ, Etiopianyo lɛ ji nɔyeli mli onukpa yɛ Etiopia maŋnyɛ lɛ shishi.