Nɔ ni Bɔɔ Nii ni “Le Nii Pam” lɛ Baanyɛ Atsɔɔ Wɔ

ŊANII feemɔ, ŋanii jiemɔ, ŋoo jiemɔ, kɛ ŋaa ni akɛnaa nibii ni yɔɔ nu shishi, ji nibii heei ni afee ni adesai le waa yɛ wɔ afii ohai 20 nɛɛ mli. Ni kɛ̃lɛ, amɛyɛ shihilɛ mli, yɛ kooloi aje lɛ mli, afii akpei abɔ ni eho nɛ. Hɛɛ, adesai naa bɔɔ nii ni “le nii pam” nɛɛ ahe nikasemɔ he sɛɛ kɛtsɔɔ amɛ kasemɔ nɔ. (Abɛi 30:24-28; Hiob 12:7-9) Etamɔ nɔ ni kooloi komɛi ebatsɔmɔ adesai atsɔɔlɔi ni ewieee, ni wɔbaanyɛ wɔna amɛhe nibii amlipɛimɔ he miishɛɛ waa. Ani wɔbaanyɛ wɔna kooloi komɛi asui akasemɔ he sɛɛ po? Ojogbaŋŋ, Yesu Kristo kɛ esɛɛnyiɛlɔi lɛ to gwantɛŋi, onufui, okpoi, kɛ baalabii po he. Mɛni yɔɔ ejwɛŋmɔ mli beni ekɛ ekaselɔi lɛ toɔ kooloi nɛɛ ahe lɛ? Nyɛhaa wɔkwɛa.

“Mi Tooi lɛ Nuɔ Migbee”

Atsiɔ tooi atã yɛ Biblia lɛ mli fe shii 200. Taakɛ Smith’s Bible Dictionary lɛ tsɔɔ mli lɛ, “tooi ji kpoofeemɔ, tsuishitoo kɛ heshibaa he okadi.” Akɛ Yesu diɛŋtsɛ to too he, yɛ gbalɛ naa, yɛ Yesaia yitso 53. Belɛ, kwɛ bɔ ni eja akɛ ekɛ esɛɛnyiɛlɔi lɛ aaato nakai kooloo lɛ nɔŋŋ he! Shi mɛɛ tooi asui titri yɔɔ Yesu jwɛŋmɔ mli?

Yesu kɛɛ akɛ: “Mi tooi lɛ nuɔ migbee, ni milɛ amɛ, ni amɛnyiɛɔ misɛɛ.” (Yohane 10:27) Ekɛ enɛ ma bɔ ni kaselɔi lɛ ahe jɔ kɛ bɔ ni amɛsumɔɔ ni amɛnyiɛ esɛɛ lɛ nɔ mi.

Tooi diɛŋtsɛ boɔ amɛ kwɛlɔ toi, ni amɛjɛɔ amɛ suɔmɔ mli amɛnyiɛɔ esɛɛ. Tookwɛlɔ lɛ hu bɛŋkɛɔ too kuu lɛ kpaakpa. Ekolɛ tooi akuu ko baagbɛ ashwã ŋa nɔ, he ni amɛyeɔ nii yɛ lɛ, shi tooi lɛ eko fɛɛ eko hiɔ kuu lɛ mli be fɛɛ be akɛ kuu kome. Wolo, Alles fur das Schaf (Nɔ Fɛɛ Nɔ Kɛha Too Lɛ) tsɔɔ mli akɛ, no hewɔ lɛ, kɛ kooloi yi lɛ nu he akɛ amɛbɛ shweshweeshwe loo amɛmiishe gbeyei lɛ “amɛbaanyɛ amɛbua amɛhe naa kutuu oya.” Kɛ tooi jo oshara naa foi lɛ, amɛfeɔ nakai akɛ kuu, ni amɛwaa yɛ bei komɛi amɛkɛ taoɔ shihilɛ lɛ mli ekoŋŋ. “Foijee fiofio lɛ yeɔ buaa toobii lɛ kɛ mɛi ni bɛ hewalɛ lɛ ni amɛbanina amɛ. Too kuu lɛ po kɛ hebuu krɛdɛɛ haa amɛ.” Mɛni wɔbaanyɛ wɔkase kɛjɛ subaŋ nɛɛ he?

Ŋmɛnɛ, anɔkwa Kristofoi egbɛko amɛshwãko Kristendom jamɔ kui sɔrɔtoi lɛ amli. Shi moŋ, abua amɛ naa afee amɛ kuu kome. Kristofonyo fɛɛ Kristofonyo nuɔ he oshara lɛ—nɛgbɛ ji he ni jálɔ fɛɛ jálɔ taoɔ gbɛtsɔɔmɔ kɛ hebuu kɛjɛɔ? Yɛ Yehowa gbɛjianɔtoo lɛ ni kɛ mumɔŋ shweshweeshwe shihilɛ haa lɛ mli.

Mɛɛ gbɛ nɔ atsɔɔ anaa Biblia mli ŋaawoo? Kɛtsɔ woji tamɔ Buu-Mɔɔ lɛ kɛ ehefatalɔ Awake! lɛ nɔ. Woji tɛtrɛbii nɛɛ kɛ Kristofoi akpeei po kɛ yelikɛbuamɔ krɛdɛɛ haa mɛi ni hiamɔ kroko he hiaa amɛ lɛ, tamɔ toobii kɛ tooi ni bɛ hewalɛ yɛ too kuu ko mli. Akɛ nɔkwɛmɔ nɔ lɛ, agbalaa jwɛŋmɔ kɛyaa fɔlɔ-kome kɛ mɛi ni naa jwɛŋmɔŋ nɔnyɛɛ lɛ anɔ waa. No hewɔ lɛ, kwɛ nilee ni eji akɛ wɔɔkane woji tɛtrɛbii lɛ eko fɛɛ eko, ni wɔya Kristofoi akpeei fɛɛ, ni wɔkɛ nɔ ni wɔkaseɔ lɛ atsu nii! Yɛ nɛkɛ gbɛ nɔ lɛ wɔjieɔ heshibaa kɛ kpɛtɛmɔ ni wɔkpɛtɛɔ Nyɔŋmɔ asafoku lɛ he gbagbalii lɛ kpo.—1 Petro 5:2.

“Nyɛhiɛ Atɛ̃a Tamɔ Onufui ni Nyɛfea Kpoo Tamɔ Okpoi”

Smith’s Bible Dictionary lɛ tsɔɔ akɛ: “Akɛ onufu etsu nii yɛ Bokãgbɛ fɛɛ akɛ toigbele mumɔ lɛ he okadi, kɛha shishitoo mla fɔŋ.” Yɛ gbɛ kroko nɔ lɛ, “mi-kpo” ji suɔmɔ wiemɔ. (Salomo Lalai 5:2) Mɛni yɔɔ Yesu jwɛŋmɔ mli beni ewo esɛɛnyiɛlɔi lɛ hewalɛ ni “amɛhiɛ atɛ̃ tamɔ onufui ni amɛfee kpoo tamɔ okpoi” lɛ?—Mateo 10:16.

Yesu kɛ shiɛmɔ kɛ nitsɔɔmɔ he gbɛtsɔɔmɔ miiha. Ekaselɔi lɛ baakpa mɛi ni baabo amɛ toi kɛ mɛi ni booo amɛ toi gbɛ. Mɛi fioo ko baajie miishɛɛ kpo, ni mɛi krokomɛi baakpoo sanekpakpa lɛ. Mɛi komɛi baawa Nyɔŋmɔ anɔkwa tsuji nɛɛ ayi po. (Mateo 10: 17-23) Te esa akɛ kaselɔi lɛ afee amɛnii yɛ yiwaa he amɛha tɛŋŋ?

Yɛ Das Evangelium des Matthäus (Mateo Sanekpakpa) lɛ mli lɛ, Fritz Rienecker wieɔ kɛkɔɔ Mateo 10:16 lɛ he akɛ: “Esa akɛ akɛ hiɛtɛ̃ɛ . . . emuuyeli, anɔkwayeli, kɛ jalɛ atsá koni ekaba akɛ henyɛlɔi aaaná nɔ ko ni sa nɔ amɛdamɔ amɛwie. Yesu tsuji lɛ yɛ shitee-kɛ-wolɔi ni bɛ mɔbɔnalɛ, ni ejieee mɔ hesusumɔ kpo, ni tutua bɔfoi lɛ be fɛɛ, ni mɔbɔnalɛ ko kwraa bɛ mli kɛ amɛna hegbɛ fioo pɛ lɛ ateŋ. No hewɔ lɛ, ehe miihia—taakɛ onufu ji lɛ—ni amɛkwɛ amɛhe nɔ jogbaŋŋ yɛ amɛ henyɛlɔi ahe, ni amɛsusu shihilɛ lɛ he kɛ hiŋmɛi kɛ jwɛŋmɔ ni yɔɔ oya; koni amɛnyɛ amɛkudɔ shihilɛ lɛ, ni ŋaatsɔɔ loo lakamɔ ko bɛ mli, ni amɛfee krɔŋŋ, ni amɛye anɔkwa yɛ wiemɔ kɛ nifeemɔ mli, ni amɛtsɔɔ akɛ amɛtamɔ okpo.”

Mɛni Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ baanyɛ akase kɛjɛ Yesu wiemɔi ni anaa yɛ Mateo 10:16 lɛ mli? Ŋmɛnɛ, mɛi feɔ amɛnii yɛ sanekpakpa lɛ he taakɛ amɛfee yɛ klɛŋklɛŋ afii oha lɛ mli lɛ pɛpɛɛpɛ. Kɛ amɛkɛ yiwaa miikpe lɛ, ehe hiaa ni anɔkwa Kristofoi kɛ hiɛtɛɛ ni tamɔ onufu nɔ̃ kɛ okpo krɔŋŋ-feemɔ atsu nii. Kristofoi kɛ lakamɔ kɛ anɔkwa ni ayeee tsuuu nii kɔkɔɔkɔ, shi anyɛɛɛ afite amɛ, amɛyɛ krɔŋŋ, ni amɛyeɔ anɔkwa yɛ Maŋtsɛyeli shɛɛ sane lɛ ni amɛjajeɔ amɛtsɔɔ mɛi krokomɛi lɛ mli.

Kɛ wɔɔfee he nɔkwɛmɔ nɔ lɛ: Nanemɛi nitsulɔi ni yɔɔ nitsumɔ he, gbekɛbii ni yaa skul, loo bo diɛŋtsɛ oweku lɛ mli bii po baawie ohemɔkɛyeli, akɛ Yehowa Odasefonyo lɛ he efɔŋ. Ekolɛ, nɔ ni wɔbaafee amrɔ nɔŋŋ ji ni wɔha amɛ hetoo kɛbu amɛ hemɔkɛyeli lɛ fɔ. Shi ani enɛ ja? Dabi kwraa. Kɛ otsɔɔ mɛi ni wieɔ shiɔ bo lɛ akɛ amɛwiemɔ lɛ naaa hewalɛ yɛ ojeŋba kpakpa lɛ nɔ lɛ, amɛbaakpa wiemɔ fɔŋ nɛɛ wiemɔ. Kɛkɛ lɛ obaafee mɔ ni hiɛ etɛ̃ ni kpa ko bɛ ehe—‘ohiɛ atɛ̃ tamɔ onufu ni ofee kpoo tamɔ okpo.’

“Baalabii lɛ Asubaŋ Tamɔ Okpɔŋɔi ni Asaa Kɛyaa Ta”

Wolo tɛtrɛɛ GEO lɛ bɔ amaniɛ akɛ, yɛ 1784 mli lɛ, “baalabii akuu ni da fe fɛɛ yɛ yinɔsane mli ní aŋma, tutua Afrika Wuoyigbɛ maŋ lɛ. Baalabii akuu nɛɛ ha shikpɔŋ ni dalɛ shɛɔ kilomitai 5,200, ni baashɛ Hong Kong dalɛ toi enumɔ nɔ. Smith’s Bible Dictionary kɛɔ akɛ baalabii lɛ “fiteɔ kwɛɛnii waa yɛ maji ni amɛyasaraa nɔ lɛ nɔ.”

Yesu kɛ baalabii ahe ninaa ko tsu nii yɛ ekpojiemɔ ni Nyɔŋmɔ kɛha lɛ ni kɔɔ nibii ni baaba yɛ “Nuntsɔ lɛ gbi lɛ” nɔ lɛ he lɛ mli. Ewie kɛkɔ amɛhe akɛ: “Baalabii lɛ asubaŋ tamɔ okpɔŋɔi ni asaa kɛyaa ta.” (Kpojiemɔ 1:1, 10; 9:3-7) Mɛni okadi nɛɛ tsɔɔ?

Yehowa Odasefoi enu shishi kɛjɛ jeeŋmɔ akɛ, baalabii ni yɔɔ Kpojiemɔ yitso 9 lɛ feɔ Nyɔŋmɔ tsuji ni afɔ amɛ mu ní yɔɔ afii oha nɛɛ mli yɛ shikpɔŋ nɔ lɛ ahe mfoniri.a Akɛ nitsumɔ pɔtɛɛ ko ewo Kristofoi nɛɛ adɛŋ—amɛshiɛ Maŋtsɛyeli shɛɛ sane lɛ yɛ shikpɔŋ lɛ fɛɛ nɔ, ni amɛfee kaselɔi. (Mateo 24:14; 28:19, 20) Enɛ biɔ ni amɛye gbɛtsii nii anɔ kunim, ni amɛkã amɛ nitsumɔ lɛ he. Mɛni baanyɛ afee enɛ he nɔkwɛmɔ nɔ jogbaŋŋ fe baalabii ni anyɛɛɛ aye amɛnɔ kunim lɛ?

Eyɛ mli akɛ, ekɛ sharao fe waotalɔi enyɔ moŋ, shi baalabi fãa gbɛ kɛjɛɔ kilomitai 100 kɛyashiɔ 200 daa gbi. Shiaŋa nɔ baalabii baanyɛ afã gbɛ kɛya kilomitai 71,000. GEO tsɔɔ mli akɛ, “efiji tswaa shii 18 yɛ hiŋmɛitswaa kome mli kɛyashiɔ ŋmɛlɛtswaai 17, yɛ gbi kome mli—nɔ ko ni waamɔ nii ko nyɛŋ afee.” Mɛɛ nitsumɔ ni wa po enɛ ji kɛha kooloo bibioo nɛkɛ!

Akɛ kuu lɛ, Yehowa Odasefoi yɛ shiŋŋ yɛ Maŋtsɛyeli lɛ he sanekpakpa lɛ gbɛɛ kɛ shwamɔ mli. Amɛmiishiɛ bianɛ yɛ shikpɔji fe 230 nɔ. Nyɔŋmɔ tsuji nɛɛ yeɔ naagbai babaoo nɔ kunim, bɔni afee ni amɛna shiɛmɔ nitsumɔ lɛ mli gbɛfaŋnɔ. Mɛɛ naagbai nɛkɛ amɛkɛkpeɔ? Mɛi ahe jwɛŋmɔ fɔŋ namɔ, mla naa naatsii, helai, nijiaŋwujee, kɛ shitee-kɛ-woo ni jɛɔ wekumɛi aŋɔɔ, ji emli fioo ko. Shi nɔ ko nyɛko atsi amɛ hiɛyaa naa. Amɛkɛ amɛhe kpɛtɛɔ nitsumɔ ni Nyɔŋmɔ kɛha amɛ lɛ he.

Yaa Nɔ Ojie Kristofoi Asubaŋi Akpo Otsɔɔ

Hɛɛ, Yesu kɛ esɛɛnyiɛlɔi lɛ to tooi, onufui, okpoi, kɛ baalabii ahe. Enɛ sa jogbaŋŋ kɛha wɔbe nɛɛ. Mɛni hewɔ? Ejaakɛ nibii agbɛjianɔtoo nɛɛ naagbee ebɛŋkɛ, ni naagbai amli wa waa fe bei ni eho.

Akɛni Yesu nɔkwɛmɔ nɔ lɛ mli wiemɔi lɛ yɔɔ amɛjwɛŋmɔ mli hewɔ lɛ, anɔkwa Kristofoi kɛ amɛhe kpɛtɛɔ Nyɔŋmɔ asafoku lɛ he gbagbalii, ni amɛkɛ heshibaa kpɛlɛɔ ŋaawoo ni jɛ Yehowa gbɛjianɔtoo lɛ ŋɔɔ lɛ nɔ. Amɛbuɔ amɛhe be fɛɛ be, ni amɛhiɛ hiɔ amɛhe nɔ yɛ shihilɛi ni baatsi amɛ Kristofoi anitsumɔ naa lɛ ahe, beni amɛhiɔ shi akɛ mɛi ni shwamɔ ko bɛ amɛhe yɛ nibii fɛɛ mli lɛ. Agbɛnɛ hu, amɛkɛ hiɛmiamɔ feɔ Nyɔŋmɔ suɔmɔnaa nii yɛ naagbai ni amɛkɛkpeɔ lɛ amli. Ni amɛyaa nɔ amɛkaseɔ nii kɛjɛɔ bɔɔ nii ni “le nii pam” lɛ aŋɔɔ.

[Shishigbɛ niŋmaa]