Nikasemɔi ni Jɛ Shiwoo Shikpɔŋ lɛ Nɔ ni Anyɛɔ Akɛtsuɔ Nii

SHIWOO Shikpɔŋ ni awie he yɛ Biblia lɛ mli lɛ yɛ sɔrɔto lɛlɛŋ. Wɔnaa shikpɔŋ he nibii sɔrɔtoi babaoo yɛ shikpɔŋ ni efee tamɔ nɔ ni edaaa nɛɛ nɔ. Anaa gɔji ni snoo eha nɔ yɛ kooyigbɛ; ni wuoyigbɛ hei dɔɔ waa. Shikpɔji ni baa nii babaoo, ŋa kpalanaa ni ashi lɛ amaŋfɔ̃, kɛ gɔji ashikpɔŋ kɛha yelitsei kɛ jwɛifɔ kɛha tooi.

Bɔ ni sɔrɔtofeemɔ yɔɔ ekwɔlɛ, kɔɔyɔŋ tsakemɔ, kɛ sũ mli lɛ ŋmɛɔ tsei sɔrɔtoi, tsei pɛmpɛbii, kɛ tsei krokomɛi agbɛ ni amɛkwɛ̃ɔ yɛ jɛmɛ—ni nɔ ni fata he ji ekomɛi ni kwɛ̃ɔ yɛ kpokpai ni nɔ yɔɔ ŋanii nɔ, ekrokomɛi hu daraa yɛ shia-ŋa ni nɔ edɔ waa nɔ, ni ekrokomɛi hu yɛ ni shwereɔ yɛ he ni ŋmlitsai loo tɛsaai yɔɔ. Tsei ahe nilelɔ ko buɔ naa akɛ, abaanyɛ ana tsei sɔrɔtoi 2,600 yɛ jɛmɛ! Klɛŋklɛŋ Israelbii ni kpa shikpɔŋ lɛ nɔ amɛkwɛ bɔ ni eyɔɔ lɛ na enyɛmɔ amrɔ nɔŋŋ. Amɛkɛ weintso yibii kusha ni da aahu akɛ, esa akɛ mɛi enyɔ atere yɛ tso nɔ jɛ jɔɔ ni yɔɔ gɔji lɛ ateŋ ekome ni faa hoɔ yɛ mli waa lɛ mli kɛba! Atsɛ jɔɔ nɛɛ gbɛi akɛ Eshkol, ni eshishi ji “[Wein yibii] Kusha” yɛ gbɛ ni ja nɔ.a—4 Mose 13:21-24.

Shi agbɛnɛ, nyɛhaa wɔkwɛa Shiwoo Shikpɔŋ nɛɛ he adebɔɔ sui ni yɔɔ sɔrɔto kwraa nɛɛ ateŋ ekomɛi jogbaŋŋ, titri lɛ, yɛ efã ni yɔɔ wuoyigbɛ lɛ.

Shephelah

Shiwoo Shikpɔŋ lɛ anaigbɛ ŋshɔnaa lɛ nɔŋŋ ji Mediteranea Ŋshɔ lɛ naa. Aaafee kilomitai 40 kɛmiiya maŋ lɛ mligbɛ ji Shephelah. Wiemɔ “Shephelah” lɛ shishi ji “Jɔɔ Shikpɔŋ,” shi yɛ anɔkwale mli lɛ, ŋmeŋmei anɔ ji jɛmɛ, ni abaanyɛ atsɛ lɛ jɔɔ pɛ kɛ akɛto Yuda gɔji ni yɔɔ bokagbɛ lɛ ahe lɛ.

Kwɛmɔ shikpɔŋ he mfoniri ni yɔɔ afã gbɛ lɛ ni okadi bɔ ni ekɔɔ [Shephelah] Jɔɔ Shikpɔŋ lɛ kɛ shikpɔji ni yɔɔ ehewɔ lɛ ahe ehaa. Nɔ ni yɔɔ bokagbɛ lɛ ji Yuda gɔji lɛ; ni nɔ ni yɔɔ anaigbɛ lɛ ji Filistia ŋshɔnaa kpalanaa lɛ. No hewɔ lɛ, Jɔɔ Shikpɔŋ lɛ tsu nii akɛ he ko ni gbalaa maji ni kɛ amɛhe wuɔ ta lɛ ateŋ, husu ni akɛ gbalaa Nyɔŋmɔ webii kɛ amɛ blema henyɛlɔi lɛ ateŋ yɛ Biblia bei amli. Esa akɛ asraafoi fɛɛ asraafoi ni baatutua maŋ lɛ kɛjɛ anaigbɛ lɛ atsɔ Jɔɔ Shikpɔŋ lɛ nɔ dani amɛbaanyɛ amɛtutua Yerusalem, Israel maŋtiase lɛ.

Sane ni tamɔ nɛkɛ ba yɛ afii ohai nɛɛhu D.Ŋ.B. lɛ mli. Biblia lɛ bɔ amaniɛ akɛ, Aram Maŋtsɛ Hazael “fã kɛba ni ekɛ Gat [eeenyɛ efee Jɔɔ Shikpɔŋ lɛ husu naa] bawuu ni eŋɔ lɛ; ni Hazael ŋɔ ehiɛ eka Yerusalem akɛ eeeba jɛi hu.” Maŋtsɛ Yoash bɔ mɔdɛŋ ni etsi Hazael naa kɛtsɔ nibii ni jara wawai ni ekɔlɔ kɛjɛ sɔlemɔwe lɛ kɛ maŋtsɛ we lɛ ni ekɛha lɛ akɛ nyɔɔŋnii lɛ nɔ. Shi kɛlɛ, sane nɛɛ feɔ bɔ ni Jɔɔ Shikpɔŋ lɛ he hiaa waa kɛha Yerusalem shweshweeshwe feemɔ loo hebuu he mfoniri.—2 Maŋtsɛmɛi 12:18, 19.

Wɔbaanyɛ wɔkase nii ni anyɛɔ atsuɔ he nii kɛjɛ enɛ mli. Hazael miitao ni eye Yerusalem nɔ kunim, shi klɛŋklɛŋ lɛ, esa akɛ etsɔ Jɔɔ Shikpɔŋ lɛ nɔ. Nakai nɔŋŋ Satan Abonsam ‘miihuu eetao’ Nyɔŋmɔ tsuji ‘emi,’ shi bei pii lɛ, esa akɛ etsɔ shikpɔŋ ni gbalaa henyɛlɔi enyɔ ateŋ ni wa waa lɛ nɔ klɛŋklɛŋ—toiboo ni amɛfeɔ amɛhaa Biblia shishitoo mlai, tamɔ nɔ ni kɔɔ naanyobɔɔ fɔŋ kɛ heloonaa ninamɔ sɛɛdii he lɛ nɛkɛ. (1 Petro 5:8; 1 Korintobii 15:33; 1 Timoteo 6:10) Efɔɔ kaa akɛ, Biblia shishitoo mlai ni aŋmɛɛɔ he akɛsaa lɛ ji klɛŋklɛŋ nifeemɔ ni kɛ mɔ yaa eshai ni hiɛdɔɔ yɔɔ mli ni afeɔ lɛ amli. No hewɔ lɛ, ha nakai shikpɔŋ ni gbalaa henyɛlɔi enyɔ ateŋ lɛ afee nɔ ni yɔɔ shweshweeshwe. Nyiɛmɔ Biblia shishitoo mlai asɛɛ ŋmɛnɛ ni okuŋ Nyɔŋmɔ mlai amli wɔ́.

Yuda Gɔji Ashikpɔŋ Lɛ

Kɛ ojɛ Jɔɔ Shikpɔŋ lɛ nɔ obote mli kɛtee ohiɛ saŋŋ lɛ, obaana Yuda gɔji ashikpɔŋ lɛ. Gɔji ashikpɔŋ ni baa ŋmãa, mutso mli mu, kɛ wein kpakpa nɛ. Bɔ ni ekwɔlɛ yɔɔ ha hewɔ lɛ, Yuda ji abobaa he ni nɔ bɛ hu. No hewɔ lɛ, Maŋtsɛ Yotam mamɔ “mɔji kɛ mɔji ni kwɔlɔ” yɛ jɛmɛ. Kɛ naagba ko aaaba lɛ, gbɔmɛi baanyɛ ajo foi kɛya hei nɛɛ kɛha yibaamɔ.—2 Kronika 27:4.

Yerusalem, ni atsɛɔ lɛ hu akɛ Zion lɛ, ji Yuda gɔji ashikpɔŋ lɛ fã ko ni ale waa. Etamɔ nɔ ni Yerusalem yɛ shweshweeshwe, akɛni jɔɔi ni mli kwɔlɔ ebɔle efãi etɛ lɛ hewɔ, ni taakɛ klɛŋklɛŋ afii oha lɛ mli yinɔsaneŋmalɔ Josephus tsɔɔ lɛ, gbogboi sɔrɔtoi etɛ buɔ he. Shi, nibii babaoo he hiaa abobaa he fe gbogboi kɛ tawuu nii ni ekɛaahiɛ ehebuu lɛ mli. Esa akɛ ena nu hu. Enɛ he hiaa yɛ kawoo be mli, ejaakɛ kɛ nu bɛ lɛ, ebaanyɛ maŋbii ni awo amɛhe ka lɛ anɔ ni amɛŋmɛɛ amɛhe amɛha nɔŋŋ.

Yerusalem gbalaa nu kɛjɛɔ Siloam Kpaakpo lɛ mli. Shi, yɛ afii ohai kpaanyɔ D.Ŋ.B., yɛ ka ni Maŋtsɛ Hezekia kpaa gbɛ akɛ Asiriabii baawo hewɔ lɛ, etswa gbogbo ewo Siloam Kpaakpo lɛ he ni ekɛbu he, koni ebaje maŋtiase lɛ mli. Etsimɔ nu hiŋmɛii ni yɔɔ maŋtiase lɛ sɛɛ lɛ, bɔni afee ni ewa kɛha Asiriabii ni woɔ ka lɛ akɛ amɛaana nu amɛnu. (2 Kronika 32:2-5; Yesaia 22:11) Jeee fɛɛ nɛ. Hezekia na gbɛ nɔ ni eeetsɔ ni ekɛgba gbɛ koni nu ni eshwɛ lɛ atsɔ mli kɛba Yerusalem maŋ lɛ mli diɛŋtsɛ!

Yɛ nɔ ni atsɛ lɛ akɛ blema tsɔnei ahe ŋaa nitsumɔ ni fe fɛɛ lɛ ateŋ ekome mli lɛ, Hezekia tsa gbɛ ni nu baatsɔ mli kɛjɛ Gihon nu hiŋmɛi lɛ mli lɛ kɛtee Siloam Kpaakpo lɛ he tɔ̃ɔ.b Ekwɔlɛ feɔ mitai 1.8 kɛ aja mli, ni nɛkɛ nu gbɛ ni atsa nɛɛ kɛlɛ feɔ mitai 533. Bo lɛ susumɔ he okwɛ—nu gbɛ ni feɔ kilomita fã ni atsa kɛtsɔ tɛsaa mli! Ŋmɛnɛ, aaafee afii 2,700 sɛɛ nɛɛ, gbɔi ni basaraa Yerusalem baanyɛ atsɔ̃ tsɔnei ahe nilee he ŋaa, ni ale jogbaŋŋ akɛ Hezekia nujɔɔ nɛɛ mli.—2 Maŋtsɛmɛi 20:20; 2 Kronika 32:30.

Hezekia mɔdɛŋbɔi koni ebu Yerusalem nuŋmai ahe koni eha efa lɛ hu baanyɛ atsɔɔ wɔ nɔ ko ni anyɛɔ atsuɔ he nii. Yehowa ji “wala nu bu.” (Yeremia 2:13) Esusumɔi ni yɔɔ Biblia lɛ mli lɛ haa wala. No hewɔ ni Biblia lɛ kasemɔ yɛ teemɔŋ he hiaa lɛ. Shi hegbɛ kɛha nikasemɔ, kɛ nilee ni jɛɔ mli baa lɛ baŋ oŋɔɔ kɛkɛ. Ehe baahia ni otsa ‘nu jɔɔi’ kɛtsɔ odaa gbi shihilɛ ni wa lɛ mli, koni ona gbɛ kɛha enɛ. (Abɛi 2:1-5; Efesobii 5:15, 16) Kɛ ona oje shishi pɛ lɛ, okɛ ohe akpɛtɛ obe he gbɛjianɔtoo lɛ he, ni oha oteemɔŋ nikasemɔ afee nɔ ni he hiaa bo waa. Kwɛmɔ jogbaŋŋ ni okaha mɔ ko loo nɔ ko miishɔ̃ nu ni jara wa ni anaa nɛɛ kɛmiijɛ odɛŋ.—Filipibii 1:9, 10.

Ŋa Kpataa Shikpɔji Lɛ

Nɔ ni yɔɔ Yuda gɔji lɛ bokagbɛ ji Yuda Ŋa Kpalanaa, ni atsɛɔ lɛ hu akɛ Yeshimon, ni eshishi ji “Shia-ŋa” lɛ. (1 Samuel 23:19, NW, shishigbɛ niŋmaa) Nɔ ni anaa yɛ shikpɔŋ ni nɔ ko nɔ ko ekwɛ̃ɛɛ yɛ nɔ lɛ pɛ ji tɛsaa mli nujɔɔi kɛ tɛsaai gɔgɔmeei kɛ amɛhe kpɔikpɔi ni yɔɔ he ni Ŋoo Ŋshɔ lɛ yɔɔ lɛ. Akɛni ebaa shi kɛ mitai 1,200 yɛ kilomitai 24 pɛ mli hewɔ lɛ, atsi Yuda Ŋa Kpalanaa lɛ hiɛ kɛjɛ kɔɔyɔi ni jɛ anaigbɛ ni kɛ nugbɔnɛmɔ baa lɛ ahe, ni yɛ no hewɔ lɛ, nugbɔnɛmɔ fioo ko pɛ enine shɛɔ nɔ. Ŋwanejee ko bɛ he akɛ, ŋa kpalanaa ni aŋmɛɛɔ Azazel too kpakpo lɛ he kɛyaa jɛmɛ yɛ daa afi Kpatamɔ Gbi lɛ nɔ lɛ nɛ. Jɛmɛ hu David jo Saulo naa foi kɛtee lɛ. Biɛ hu Yesu hi ŋmaa gbii 40 yɛ, ni no sɛɛ nɔŋŋ ni Abonsam ka lɛ lɛ.—3 Mose 16:21, 22; Lala 63, NW, yiteŋgbɛ niŋmaa; Mateo 4:1-11.

Nɔ ni yɔɔ Yuda Ŋa Kpalanaa lɛ wuoyi-anaigbɛ, aaafee kilomitai 160 ji Paran Ŋa Kpalanaa lɛ. Biɛ gbɛ Israel kɛfee eshitoo hei shii abɔ yɛ afii 40 gbɛfaa kɛmiijɛ Mizraim kɛmiiba Shiwoo Shikpɔŋ lɛ nɔ lɛ. (4 Mose 33:1-49) Mose ŋma yɛ “ŋa kpeteŋkpele ni yɔɔ gbeyei . . . he ni onufui ni naa jaraa kɛ nyɔŋmɔŋkrakroi yɔɔ yɛ shikpɔŋ olɛŋlɛ nɔ, he ni nu bɛ lɛ” he. (5 Mose 8:15) Eyɛ naakpɛɛ akɛ Israelbii akpekpei abɔ yi na wala! Ni kɛlɛ, Yehowa waje amɛ.

Eba akɛ enɛ aaafee kaimɔ nɔ akɛ, Yehowa baanyɛ awaje wɔ hu, yɛ jeŋ ni efee shwɛm yɛ mumɔŋ nɛɛ po mli. Hɛɛ, wɔ hu wɔnyiɛɔ yɛ onufui kɛ nyɔŋmɔŋkrakroi ateŋ, eyɛ mli akɛ jeee yɛ kooloi lɛ diɛŋtsɛ ateŋ. Ekolɛ ehe baahia ni wɔkɛ gbɔmɛi ni egbaaa amɛnaa akɛ amɛaafɛ̃ ebɔɔ wiemɔi ni baanyɛ asa wɔsusumɔi ahe yɛ gbɛ ni waaa nɔ lɛ aaaye sharamɔ daa gbi. (Efesobii 5:3, 4; 1 Timoteo 6:20) Esa akɛ ajie mɛi ni bɔɔ mɔdɛŋ akɛ amɛaasɔmɔ Nyɔŋmɔ yɛ gbɛtsii nii nɛɛ anaa lɛ ayi. Amɛ anɔkwayeli lɛ ji odaseyeli ni mli wa akɛ Yehowa miiwaje amɛ lɛlɛŋ.

Karmel Gɔji Lɛ

Gbɛi Karmel lɛ shishi ji “Yeli-tsei.” Nɔ ni eyi shikpɔŋ ni baa nii babaoo, ni kã kɛmiiya kooyigbɛ aaafee kilomitai 50 lɛ nɔ obɔ ji weintromi, mutsei, tsei ni woɔ aduawai. Gɔji ashikpɔŋ nɛɛ ŋshɔnine lɛ yɛ nyam kɛ fɛo fɛɛ fe bɔ ni hiɛ aaakpa nɔ. Yesaia 35:2 wieɔ “Karmel . . . wulamɔ” lɛ he akɛ Israel ni aku sɛɛ akɛ lɛ eba eshikpɔŋ nɔ ekoŋŋ lɛ anunyam ni woɔ yibii lɛ he okadi.

Saji pii ni sa kadimɔ tee nɔ yɛ Karmel. Biɛ ji he ni Elia tswa Baal gbalɔi lɛ mpoa yɛ, ni “Yehowa la lɛ bayi shi” ni ekɛye Ofe ni eji lɛ he odase. Agbɛnɛ hu, Karmel yiteŋ Elia jɛ egbala jwɛŋmɔ kɛtee atatu bibioo ni batsɔ nugbɔnɛmɔ babaoo, ni kɛ nu hɔmɔ ni ba Israel nɔ lɛ ba naagbee yɛ naakpɛɛ gbɛ nɔ lɛ nɔ. (1 Maŋtsɛmɛi 18:17-46) Karmel Gɔŋ lɛ nɔ Elia sɛɛyelɔ Elisha yɔɔ beni Shunem yoo lɛ ba eŋɔɔ ebatao yelikɛbuamɔ kɛha ebi ni egbo, ni no sɛɛ lɛ Elisha tee lɛ shi lɛ.—2 Maŋtsɛmɛi 4:8, 20, 25-37.

Yeli-tsei, mutsei, kɛ wein-tsei yɛ Karmel shikpelekemɔ hei lɛ lolo. Yɛ agbiɛnaa be mli lɛ, nɛkɛ shikpelekemɔ hei nɛɛ yiɔ obɔ kɛ fɔfɔii ni yɔɔ fɛo waa. Salomo kɛɛ Shulam obalayoo fro lɛ akɛ, “oyitso ma onɔ tamɔ Karmel,” ni ekolɛ eetsɔɔ bɔ ni eyiteŋ tsɔi fa babaoo ha loo bɔ ni eyitso woɔ ehe nɔ fɛfɛo kɛjɛɔ ekuɛ nɔ lɛ.—Salomo Lalai 7:5.

Bɔ ni Karmel gɔji lɛ yɔɔ fɛo ha lɛ kaiɔ wɔ bɔ ni Yehowa eha eŋmɛnɛŋmɛnɛ beaŋ jálɔi lɛ ahe efee fɛo yɛ mumɔŋ eha. (Yesaia 35:1, 2) Yehowa Odasefoi yɛ mumɔŋ paradeiso mli lɛlɛŋ, ni amɛkɛ henumɔ ni Maŋtsɛ David, mɔ ni ŋma akɛ: “Mihusu kpãai eyaje he ni yɔɔ fɛo eha mi; hɛɛ, mina gboshinii ni yɔɔ fɛo” lɛ jie lɛ kpo lɛ kpaa gbee.—Lala 16:6.

Eji anɔkwale akɛ, kaai ni mli wawai ni esa akɛ Nyɔŋmɔ mumɔŋ maŋ ni yɔɔ ŋmɛnɛ lɛ kɛkpe lɛ yɛ, taakɛ blema Israelbii lɛ kɛ shitee-kɛ-woo ni jɛ Nyɔŋmɔ henyɛlɔi aŋɔɔ kpe be fɛɛ be lɛ. Ni kɛlɛ, anɔkwa Kristofoi haaa jɔɔmɔi ni Yehowa kɛha—ni Biblia mli anɔkwale la ni yaa hiɛ babaoo, jeŋ muu fɛɛ nyɛmifeemɔ, kɛ hegbɛ ni akɛaana naanɔ wala yɛ paradeiso shikpɔŋ nɔ fata he lɛ aje amɛhiɛ.—Abɛi 4:18; Yohane 3:16; 13:35.

“Etamɔ Yehowa Trom Lɛ”

Blema Shiwoo Shikpɔŋ lɛ yɛ fɛo kɛ́ akwɛ. Atsɔɔ bɔ ni eji jogbaŋŋ akɛ “shikpɔŋ ni fufɔ kɛ wò hoɔ yɛ nɔ.” (1 Mose 13:10; 2 Mose 3:8) Mose tsɛ lɛ “shikpɔŋ kpakpa . . . , shikpɔŋ ni faai kɛ nu bui kɛ kpaakpoi yɔɔ nɔ; ni amɛjɛɔ jɔɔi kɛ gɔji lɛ amli amɛhoɔ lɛ; shikpɔŋ ni ŋmaa kɛ abele kɛ weintsei kɛ agbamitsei kɛ akutu tsei yɔɔ nɔ lɛ, shikpɔŋ ni mutsei kɛ wò yɔɔ nɔ lɛ; shikpɔŋ ni odaaŋ ŋmaa ni oooye lɛ he esɛŋ yɛ nɔ, ni nɔ ko nɔ ko ehiaŋo yɛ jɛi; shikpɔŋ ni tɛi ni yɔɔ mli ji dade, ni oootsa akɔɔble kɛaajɛ enɔ gɔji lɛ amli.”—5 Mose 8:7-9.

Kɛji akɛ Yehowa baanyɛ ni ekɛ shĩa kɛ shikpɔŋ ni yɔɔ fɛo ni nibii babaoo yɔɔ mli nɛkɛ aaaha eblema webii lɛ, belɛ yɛ anɔkwale mli lɛ, ebaanyɛ ni ekɛ anunyam paradeiso ko ni kpeleɔ shikpɔŋ lɛ fɛɛ nɔ—kɛ emli gɔji, jɔɔi, faai, kɛ kpaakpoi aha eŋmɛnɛŋmɛnɛ beaŋ tsuji anɔkwafoi lɛ. Hɛɛ, blema Shiwoo Shikpɔŋ lɛ kɛ emli nibii sɔrɔtoi lɛ fɛɛ ji mumɔŋ paradeiso ni e-Dasefoi lɛ naa mli ŋɔɔmɔ bianɛ lɛ, kɛ wɔsɛɛ be mli jeŋ hee lɛ Paradeiso lɛ ni atsɔɔ hiɛ anaa. Jɛmɛ, shiwoo ni aŋma yɛ Lala 37:29 lɛ baaba mli yɛ: “Jalɔi lɛ, shikpɔŋ lɛ aaatsɔ amɛnɔ̃, ni amɛaahi nɔ daa.” Kɛ Yehowa kɛ nakai Paradeiso shia lɛ ha adesai toibolɔi ni amɛhi nɔ lɛ, kwɛ miishɛɛ ni amɛaana akɛ amɛaakpa emli “tsũi” lɛ fɛɛ mli amɛkwɛ, ni amɛfee nakai hu kɛya naanɔ!

[Shishigbɛ niŋmai]

[Shikpɔŋ he mfoniri ni yɔɔ baafa 4]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

GALILEA

Karmel Gɔŋ

Galilea Ŋshɔ

SAMARIA

SHEPHELAH

Yuda Gɔji

Ŋoo Ŋshɔ

[He ni Sane lɛ Jɛ]

NASA photo

[Shikpɔŋ he mfoniri ni yɔɔ baafa 4]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Shephelah loo jɔɔ shikpɔŋ lɛ ji husu ni kã Nyɔŋmɔ webii kɛ Nyɔŋmɔ henyɛlɔi ateŋ

MI 0 5 10

KM 0 8 16

Filistia Ŋa Kpalanaa

Shephelah

Yuda Gɔji Ashikpɔŋ

Yuda Ŋa Kpalanaa

Rift Jɔɔ

Ŋoo Ŋshɔ

Amon kɛ Moab Shikpɔŋ

[Shikpɔŋ he mfoniri/Mfoniri ni yɔɔ baafa 5]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Hezekia Nu Jɔɔ: ekɛlɛ feɔ mitai 533, ni agba kɛtsɔ tɛsaa mli

Tyropoeon Jɔɔ

Siloam

DAVID MAŊTIASE

Kidron Jɔɔ

Gihon

[Mfonirii ni yɔɔ baafa 6]

David tao abobaa he kɛjo Saul naa foi yɛ Yuda Ŋa Kpalanaa lɛ nɔ. Yɛ sɛɛ mli lɛ, Abonsam ka Yesu yɛ biɛ

[He ni Sane lɛ Jɛ]

Pictorial Archive (Near Eastern History) Est.

[Mfonirii ni yɔɔ baafa 7]

Karmel Gɔŋ lɛ, he ni Elia ba Baal osɔfoi lɛ ashi yɛ lɛ

[He ni Sane lɛ Jɛ]

Pictorial Archive (Near Eastern History) Est.

[Mfonirii ni yɔɔ baafa 8]

“Yehowa, o-Nyɔŋmɔ lɛ kɛo miiya shikpɔŋ kpakpa nɔ, shikpɔŋ ni faai kɛ nu bui kɛ kpaakpo yɔɔ nɔ, ni amɛjɛɔ jɔɔi kɛ gɔji lɛ amli amɛhoɔ lɛ.”—5 Mose 8:7