Epafrodito—Bɔfo Kɛha Filipibii Lɛ — Buu-Mɔɔ INTANƐT NƆ WOJIATOOHE

Epafrodito—Bɔfo Kɛha Filipibii Lɛ

“PAULO ŋma kɛyaha Filipibii lɛ akɛ: “Nyɛherea lɛ atuu yɛ Nuntsɔ lɛ mli, kɛ miishɛɛ sɔŋŋ, ni nyɛbua nɛkɛ gbɔmɛi akɛ mɛi ni sa woo.” Ŋwanejee ko bɛ he akɛ, kɛ́ Kristofonyo nɔkwɛlɔ ko kɛ yijiemɔ wiemɔi wie wɔhe nɛkɛ lɛ, wɔbaana miishɛɛ. (Filipibii 2:29) Shi, namɔ he Paulo wieɔ lɛ? Ni mɛni gbɔmɔ lɛ efee ni haa efeɔ mɔ ni sa yijiemɔ kpakpa nɛkɛ?

Klɛŋklɛŋ sanebimɔ lɛ hetoo ji Epafrodito. Bɔni afee ni wɔha sanebimɔ ni ji enyɔ lɛ hetoo lɛ, nyɛhaa wɔsusua shihilɛi ni kanya Paulo ni ha eŋma nɛkɛ wiemɔi nɛɛ ahe.

Aaafee afi 58 Ŋ.B. lɛ mli ni Filipibii lɛ nu akɛ agbala Paulo yɛ sɔlemɔwe lɛ sɛɛ ni asafo ko ni feɔ basabasa yɛ Yerusalem yi lɛ, ni nɔyelɔi lɛ emɔ lɛ, ni beni awo lɛ tsuŋ ni amɛnyɛko amɛkpɛ amɛyiŋ yɛ ehe lɛ, akɛ lɛ tee Roma ni awo lɛ kɔsɔŋkɔsɔ. (Bɔfoi lɛ Asaji 21:27-33; 24:27; 27:1) Akɛni amɛhao yɛ ehilɛ-kɛhamɔ he hewɔ lɛ, ekolɛ amɛbibii amɛhe nɔ ni amɛbaanyɛ amɛfee amɛha lɛ. Amɛbɛ heloo gbɛfaŋ nibii tsɔ̃, ni amɛkɛ Paulo teŋ jɛkɛ, no hewɔ lɛ, yelikɛbuamɔ fioo ko pɛ amɛbaanyɛ amɛkɛha. Kɛlɛ, henumɔ ni mli wa ni tsirɛ Filipibii lɛ koni amɛfi esɔɔmɔ lɛ sɛɛ yɛ tsutsu lɛ miikanya amɛ lolo; babaoo, ejaakɛ ebaje shihilɛ ni mli wa waa mli.—2 Korintobii 8:1-4; Filipibii 4:16.

Ekolɛ Filipibii lɛ susu kɛji akɛ amɛteŋ mɔ kome baanyɛ ni ekɛ nikeenii ko ayasara Paulo, ni eye ebua lɛ kɛ́ nɔ ko he aaahia lɛ. Shi, eji gbɛfaa ni jɛkɛ ni tɔɔ mɔ, ni oshara baanyɛ aba eyelikɛbuamɔ lɛ he! Joachim Gnilka kɛɛ: “Ekãa he miihia dani anyɛ asara gbokɛlɛfonyo, ni titri lɛ, mɔ ni etamɔ nɔ ni anyɛɛɛ atsɔɔ ‘enɔ fɔŋ feemɔ’ lɛ mli jogbaŋŋ.” Niŋmalɔ Brian Rapske kɛɔ akɛ: “Oshara kroko ni fata he akɛ, akɛ gbokɛlɛfonyo lɛ bɔɔ kpaakpa tsɔ̃ loo anuɔ he ahaa lɛ loo anuɔ esusumɔi ahe lɛ hu yɛ. . . . Trukaa wiemɔ loo nifeemɔ ko baanyɛ atsɔ gbele, jeee kɛha gbokɛlɛfonyo lɛ pɛ, shi kɛha eyelikɛbualɔ lɛ hu.” Namɔ Filipibii lɛ baanyɛ atsu?

Wɔbaanyɛ wɔsusu jogbaŋŋ akɛ, gbɛfaa ni tamɔ nɛkɛ lɛ baanyɛ atee haomɔ kɛ yeyeeye-feemɔ shi, shi, Epafrodito (ni jeee Epafra ni jɛ Kolose lɛ) miisumɔ ni etsu nakai nitsumɔ ni wa lɛ. Kɛ asusu egbɛi, ni Afrodito fata he lɛ he lɛ, ekolɛ ebaanyɛ efee Jeŋmajiaŋnyo ni atsake lɛ kɛba Kristojamɔ mli—fɔlɔi ni amɛtuu amɛhe amɛha nakai Hela suɔmɔ kɛ fɔmɔ nyɔŋmɔ yoo lɛ jalɔi abinuu. Beni Paulo ŋma wolo eyaha Filipibii lɛ koni eda amɛ shi yɛ amɛ ejurɔfeemɔ lɛ hewɔ lɛ, ebaanyɛ etsɔɔ bɔ ni Epafrodito ji akɛ, “nyɛ bɔfo kɛ mihia lɛ he sɔɔlɔ.”—Filipibii 2:25.

Wɔjɛɔ nɔ ni Biblia lɛ wieɔ yɛ Epafrodito he lɛ mli wɔnyɛɔ wɔnuɔ shishi akɛ, yɛ bɔ ni efee klalo akɛ ekɛ ehe aaaha Paulo kɛ lɛ diɛŋtsɛ esafo lɛ sɔɔmɔ lɛ fɛɛ sɛɛ lɛ, Epafrodito yɛ naagbai ni ekolɛ wɔyɔɔ eko lɛ nɔŋŋ eko. Nyɛhaa wɔsusua enɔkwɛmɔ nɔ lɛ he.

“Mihia lɛ He Sɔɔlɔ”

Wɔleee bɔ ni nibii tee nɔ ha lɛ mli fitsofitso, shi, wɔbaanyɛ wɔsusu akɛ, beni Epafrodito yashɛ Roma lɛ, no mli lɛ egbɛfãa lɛ eha etɔ lɛ waa. Ekolɛ efã gbɛ kɛtsɔ Via Egnatia, Roma gbɛjegbɛ ni foɔ mli kɛtsɔɔ Makedonia lɛ. Ekolɛ ebaanyɛ efoŋ kɛtsɔ Adriatik kɛya Italia ŋshɔnine lɛ ‘shishi gbɛ’ ni agbɛnɛ ekwɔ kɛtsɔ Appian Gbɛ lɛ nɔ kɛya Roma. Eji gbɛfãa ni haa etɔɔ mɔ, (kilomitai 1,200, kɛmiiya), ni ebaanyɛ ehe fe nyɔŋ kome.—Kwɛmɔ adeka ni yɔɔ baafa 29 lɛ.

Mɛɛ su Epafrodito kɛje egbɛfaa lɛ shishi? Atsu lɛ koni ekɛ ‘teemɔŋ sɔɔmɔ’ loo lei·tour·giʹa, ayaha Paulo. (Filipibii 2:30) Kɛjɛ shishijee lɛ, nɛkɛ Hela wiemɔ nɛɛ kɔɔ nii ni maŋnyo jɛɔ esuɔmɔ mli etsuɔ ehaa Maŋ lɛ he. Yɛ sɛɛ mli lɛ, ebatsɔ sɔɔmɔ ni Maŋ lɛ nyɛ̃ɛɔ emaŋbii ni he esa titri kɛha no tsumɔ lɛ anɔ koni amɛtsu. Woloŋlelɔ ko wieɔ yɛ wiemɔ nɛɛ kɛ nitsumɔ yɛ Hela Ŋmalɛi lɛ amli lɛ he akɛ: “Kristofonyo lɛ ji nuu ni tsuɔ nii ehaa Nyɔŋmɔ kɛ gbɔmɛi, klɛŋklɛŋ lɛ, eesumɔ ni efee nakai, kɛ etsui muu lɛ fɛɛ, ni nɔ ni ji enyɔ lɛ, enuɔ he akɛ esa akɛ efee nakai, ejaakɛ Kristo suɔmɔ lɛ kɛ gbɛnaa nii fɔɔ enɔ.” Hɛɛ, mɛɛ mumɔ loo su ni nɔ bɛ po Epafrodito jie lɛ kpo nɛkɛ!

‘Ekɛ Esusuma Wo Oshara Mli’

Kɛ wɔkɛ wiemɔ ni wɔma kɛjɛ asɔshwɛmɔ mli aaatsu nii lɛ, Paulo kɛɔ akɛ Epafrodito ‘kɛ esusuma wo [pa·ra·bo·leu·saʹme·nos] oshara mli,’ aloo pɔtɛɛ lɛ, ekɛ ewala “shwɛ asɔ” yɛ Kristo sɔɔmɔ mli. (Filipibii 2:30) Ehe ehiaaa ni wɔsusu akɛ Epafrodito fee nɔ ko ni jwɛŋmɔ bɛ mli; shi moŋ, oshara yɛ esɔɔmɔ krɔŋkrɔŋ lɛ he nitsumɔ he. Ani eka yelikɛbuamɔ sɔɔmɔ lɛ yɛ afi lɛ mli be ni kɔɔyɔŋ tsakemɔ hewɔ lɛ gbɛfãa wa lɛ mli? Ani etee nɔ yɛ mɔdɛŋ ni ebɔ koni egbe naa, yɛ be mli ni ehe baye yɛ gbɛfaa lɛ mli he ko lɛ mli? Yɛ fɛɛ mli lɛ, Epafrodito ‘he ye lɛlɛŋ, ni ebɛŋkɛ gbele etã.’ Ekolɛ eto eyiŋ akɛ ekɛ Paulo baahi shi ni esɔmɔ lɛ, no hewɔ lɛ, eyɛ faŋŋ akɛ bɔfo lɛ miisumɔ ni etsɔɔ nɔ hewɔ ni esa akɛ eku esɛɛ oya fe bɔ ni akpaa gbɛ lɛ mli.—Filipibii 2:27.

Shi kɛlɛ, Epafrodito ji mɔ ko ni yɔɔ ekãa, ni miisumɔ ni ekɛ ehe aha yɛ gbɛ ni pɛsɛmkunya bɛ mli nɔ, bɔni afee ni ekɛ yelikɛbuamɔ abaha mɛi ni ehia amɛ lɛ.

Wɔbaanyɛ wɔbi wɔhe akɛ, ‘Nɛgbɛ manyɛ majɛ misuɔmɔ mli mafee nii kɛyashi, ni mikɛye mabua mimumɔŋ nyɛmimɛi ni yɔɔ shihilɛi ni mli wawai amli lɛ?’ Klalofeemɔ mumɔ ni tamɔ nɛkɛ lɛ jeee nɔ ni Kristofoi baanyɛ ahala kɛ amɛmiisumɔ. Yesu kɛɛ: ‘Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe.’ (Yohane 13:34) Epafrodito tsu esɔɔmɔ lɛ he nii “ni ebɛŋkɛ gbele etã.” Belɛ, Epafrodito ji mɔ ni yɔɔ Kristo “jwɛŋmɔ” ni Paulo wo Filipibii lɛ hewalɛ ni amɛná lɛ he nɔkwɛmɔ nɔ. (Filipibii 2:5, 8, 30, Kingdom Interlinear) Ani wɔbaasaa wɔhe ni wɔya shɔŋŋ nakai?

Ni kɛlɛ, Epafrodito bahao. Mɛni hewɔ?

Ehaomɔ Lɛ

Okɛ ohe awo Epafrodito shihilɛ lɛ mli. Paulo bɔ amaniɛ akɛ: “Eeshwe nyɛ fɛɛ, ni akɛni nyɛnu akɛ ehe miiye hewɔ lɛ, eehao.” (Filipibii 2:26) Epafrodito le akɛ, nyɛmimɛi ni yɔɔ esafo lɛ mli lɛ le akɛ ehe miiye, ni enyɛɛɛ eye ebua Paulo yɛ gbɛ ni amɛhiɛ kã nɔ akɛ eeefee lɛ nɔ. Yɛ anɔkwale mli lɛ, etamɔ nɔ ni Epafrodito eha Paulo ehao babaoo moŋ. Ani ehe bahia ni tsofafeelɔ Luka, Paulo hefatalɔ lɛ, aku ehiɛ eshwie saji krokomɛi anɔ koni ekwɛ Epafrodito?—Filipibii 2:27, 28; Kolosebii 4:14.

Ebaanyɛ eba akɛ yɛ shihilɛ nɛɛ hewɔ lɛ, Epafrodito bote nɔnyɛɛ mli. Ekolɛ esusu akɛ nyɛmimɛi ni yɔɔ esafo lɛ mli lɛ miisusu ehe akɛ mɔ ni he esako. Ekolɛ enu fɔyeli he, ni “eeshwe” ni ena amɛ ni ema anɔkwa ni eyeɔ lɛ nɔ mi eha amɛ. Paulo kɛ Hela wiemɔ ni mli wa waa, a·de·mo·neʹo, ‘aba nɔnyɛɛ shishi’ tsu nii, koni ekɛtsɔɔ Epafrodito shihilɛ lɛ mli. Taakɛ woloŋlelɔ J. B. Lightfoot tsɔɔ lɛ, wiemɔ nɛɛ baanyɛ atsɔɔ “yiŋfutumɔ, he ni ejɔɔɔ mɔ, jwɛŋmɔ ni jeɔ sane nɔ fioo, ni pɛpɛɛpɛ ni aŋmɛɛɛ yɛ gbɔmɔtsoŋ, loo kɛtsɔ jwɛŋmɔŋ haomɔ, tamɔ awerɛho, hiɛgbele, hiɛnɔkamɔ ni feɔ yaka, kɛ ekrokomɛi anɔ lɛ, fata he lɛ kɛbaa.” Gbɛ kroko ko pɛ ni akɛ wiemɔ nɛɛ tsu nii yɛ Hela Ŋmalɛi lɛ amli lɛ kɔɔ Yesu haomɔ yɛ Getsemane trom lɛ mli lɛ he.—Mateo 26:37.

Paulo mu sane naa akɛ, nɔ ni baahi fe fɛɛ ji ni etsu Epafrodito kɛya Filipibii lɛ aŋɔɔ ekoŋŋ, kɛ wolo ni miitsɔɔ amɛ bɔfo lɛ sɛɛkuu ni akpaaa gbɛ lɛ mli. Beni Paulo wie akɛ, “mijwɛŋɔ akɛ ehia akɛ matsu wɔ nyɛmi Epafrodito” lɛ, belɛ ekɛ etsumɔ lɛ he gbɛnaa nii miifɔ lɛ diɛŋtsɛ ehe nɔ, koni ekɛjie susumɔ ko ni aaanyɛ aba akɛ Epafrodito nyɛɛɛ atsu nɔ ko lɛ kɛya. (Filipibii 2:25) Nɔ ni tamɔɔɔ nakai lɛ, bɔni afee ni egbe esɔɔmɔ lɛ naa hewɔ lɛ, shwɛ sharao ni Epafrodito alaaje ewala! Paulo kɛ miishɛɛ jie yi waa akɛ, “nyɛherea lɛ atuu yɛ Nuntsɔ lɛ mli, kɛ miishɛɛ sɔŋŋ, ni nyɛbua nɛkɛ gbɔmɛi akɛ mɛi ni sa woo; ejaakɛ Kristo nitsumɔ lɛ hewɔ lɛ, ebɛŋkɛ gbele kwraa, ni eshɛ ewala efɔ, koni ekɛgbe nɔ ni shwɛɔ nyɛ yɛ sɔɔmɔ ni nyɛkɛaasɔmɔ mi lɛ mli lɛ naa.”—Filipibii 2:29, 30.

“Nyɛbua Nɛkɛ Gbɔmɛi akɛ Mɛi ni Sa Woo”

Esa akɛ hiɛ asɔ hii kɛ yei ni hiɛ jwɛŋmɔ ni Epafrodito hiɛ lɛ nɔŋŋ eko lɛ. Amɛkɛ amɛhe shãa afɔle koni amɛsɔmɔ. Susumɔ mɛi ni kɛ amɛhe eha koni amɛyasɔmɔ yɛ hei ni kɛ amɛmaŋ jɛkɛ, tamɔ maŋsɛɛ sanekpakpa shiɛlɔi, nɔkwɛlɔi gbɛfalɔi, loo yɛ Buu-Mɔɔ Asafo lɛ nitsumɔ he niji lɛ eko mli lɛ ahe okwɛ. Kɛji akɛ gbɔlɛ loo gbɔmɔtsoŋ hewalɛ ni baa shi miitsi mɛi komɛi agbɛ ni amɛnyɛɛɛ amɛfee bɔ ni amɛfee be ko lɛ, amɛsa woo kɛ bulɛ yɛ afii ni amɛkɛsɔmɔ yɛ anɔkwayeli mli lɛ hewɔ.

Ni kɛlɛ, hela ni gbɔjɔɔ mɔ baanyɛ afee nɔnyɛɛ loo fɔyeli henumɔi ajɛɛhe. Mɔ ko baasumɔ ni efee babaoo. Kwɛ bɔ ni ejeɔ mɔ nijiaŋ wui ehaa! Mɛi ni baana amɛhe yɛ shihilɛ ni tamɔ nɛkɛ mli lɛ baanyɛ akase nii kɛjɛ Epafrodito ŋɔɔ. Fɛɛ sɛɛ lɛ, ani lɛ etɔmɔ ha ehe ye lɛ? Dabi! (1 Mose 3:17-19; Romabii 5:12) Epafrodito sumɔ ni esɔmɔ Nyɔŋmɔ kɛ enyɛmimɛi lɛ, shi hela tsĩ nɔ ni ebaanyɛ efee lɛ gbɛ.

Paulo kãaa Epafrodito hiɛ yɛ hela ni nyɛ enɔ lɛ hewɔ, shi moŋ ekɛɛ Filipibii lɛ ni amɛhi emasɛi. Nakai nɔŋŋ esa akɛ wɔshɛje wɔnyɛmimɛi lɛ amii kɛ amɛnijiaŋ je wui. Bei pii lɛ wɔbaanyɛ wɔjie amɛ yi yɛ anɔkwayeli yɛ sɔɔmɔ lɛ mli lɛ he nɔkwɛmɔ nɔ ni amɛfee amɛfɔ shi lɛ hewɔ. Yɛ anɔkwale ni eji akɛ Paulo hiɛ sɔ Epafrodito, ni ewie ehe ekpakpa lɛ nyɛ eshɛje emii, ni ejie ehaomɔ lɛ kɛtee. Wɔ hu wɔbaanyɛ wɔna nɔmimaa akɛ, ‘Nyɔŋmɔ jeee mɔ ni ejaaa ni ehiɛ aaakpa wɔ nitsumɔ kɛ suɔmɔ ni wɔjie lɛ kpo wɔtsɔɔ egbɛi lɛ nɔ, ni akɛ, wɔsɔmɔ krɔŋkrɔŋ bii lɛ ni wɔyaa nɔ wɔsɔmɔɔ amɛ lɛ.’—Hebribii 6:10.

[Akrabatsa ni yɔɔ baafa 29]

Nibii ni Haaa Mɔ Ana Miishɛɛ yɛ Gbɛfaa lɛ Mli

Yɛ nɛkɛ gbii nɛɛ amli lɛ, ekolɛ gbɛfaa yɛ Europa maŋtiasei enyɔ ateŋ, ni tamɔ gbɛ ni Epafrodito fã lɛ biŋ mɔdɛŋbɔɔ babaoo. Abaanyɛ akɛ kɔɔyɔŋ lɛlɛ agbe gbɛfaa lɛ naa yɛ hejɔlɛ mli yɛ ŋmɛlɛtswaa kome loo enyɔ mli. Shi eji sane kroko kwraa akɛ aaafã gbɛ ni tamɔ nɛkɛ yɛ klɛŋklɛŋ afii oha lɛ mli. No mli lɛ, ni aaajɛ he kome kɛya he kroko lɛ bɛ miishɛɛ. Gbɛfalɔ ni nyiɛ baanyɛ aya kilomitai 30-35 gbi kome, yɛ be mli ni ekɛ ehe haa kɔɔyɔŋ tsakemɔ kɛ osharai sɔrɔtoi, ni “ojotswalɔi” fata he.—2 Korintobii 11:26.

Ni hei ni amɛwaa yɛ gbɛkɛnaashi kɛ nibii ni he hiaa amɛ lɛ hu?

Yinɔsaneŋmalɔ Michelangelo Cagiano de Azevedo tsɔɔ mli akɛ, nɔ ni yɔɔ Roma gbɛjegbɛi ahe ji “mansiones, ni ji gbɔiatoo he ni yɔɔ nɔ fɛɛ nɔ, kɛ shwapo, okpɔŋɔi akwɛmɔ hei, kɛ wɔɔhei kɛha amɛ nitsulɔi; mutationes, loo hejɔɔmɔ hei sɔrɔtoi abɔ yɛ mansiones enyɔ ni tsara nɔ teŋ, he ni mɔ ko baanyɛ atsake okpɔŋɔi loo tsɔnei ni etao nibii ni he hiaa lɛ.” Nɛkɛ gbɔiatoo hei nɛɛ ehe gbɛi gbonyo waa, ejaakɛ yaka gbɔmɛi titri fɔɔ jɛmɛ yaa. Yɛ gbɛfalɔi ni amɛtswaa amɛ ojo lɛ sɛɛ lɛ, gbɔiatoo he nɔkwɛlɔi lɛ naa shika kɛjɛɔ ajwamaŋbɔi ahe amɛfataa amɛ shika he. Latin lalafolɔ, Juvenal ni kɛ elalai wieɔ nibii ni ejaaa he lɛ wie akɛ, mɛi ni baana amɛhe akɛ yɛ fimɔ hewɔ lɛ esa akɛ amɛhi gbɔiatoo he ni tamɔ nakai mli lɛ, baana amɛhe akɛ “amɛkamɔ gbɔmɔgbelɔ ni yi wa masɛi yɛ saatso nɔ, ni amɛfutu lɛlɛ mli nitsulɔi, julɔi, kɛ gbokɛlɛfoi ni amɛjo foi, mɛi ni sɛŋɔ mɛi kɛ gbonyo adeka kpɛlɔi ateŋ . . . Amɛ fɛɛ amɛkɛ kpulu kome pɛ nuɔ nii; mɔ ko mɔ ko bɛ lɛ diɛŋtsɛ esaatso, loo okpɔlɔ.” Blema niŋmalɔi krokomɛi wie nu kɛ tsũi ni mli tseee, ni mɛi fa tsɔ̃ yɛ mli, ni mli ewo muji, efee frɔ̃nɔ̃ɔ, ni emli eyimɔ obɔbɔ kɛ ŋmoji lɛ ahe.

[Shikpɔŋ he mfoniri/Mfoniri ni yɔɔ baafa 27]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Roma

[Mfoniri]

Gbɛfalɔ yɛ Roma bei amli

[He ni Sane lɛ Jɛ]