Miishɛjemɔ yɛ Afii Ejwɛ Tawuu Be Mli

MƐI pii na amanehului ni amɛye ohia ni mli wa waa hu, yɛ afii ejwɛ ni akɛwuu ta yɛ tsutsu Yugoslavia shikpɔŋ nɔ lɛ mli. Amɛteŋ mɛi komɛi ji Yehowa Odasefoi ohai abɔ, ni kɛ anɔkwayeli tee nɔ amɛja “miishɛjemɔ fɛɛ Nyɔŋmɔ lɛ.”—2 Korintobii 1:3.

Yɛ Sarajevo lɛ, gbɔmɛi hi jaramɔ shihilɛ kroko mli, yɛ maŋtiase wulu ni awo he ká, ni amɛyɔɔ mli yɛ tawuu be lɛ mli fɛɛ lɛ. Anaaa sarawa hewalɛ, nu, lai, kɛ niyenii. Te Yehowa Odasefoi Asafo ni yɔɔ Sarajevo lɛ fee tɛŋŋ ehi nɛkɛ shihilɛi ni mli wa waa nɛɛ mli? Kristofoi ni jɛ shikpɔji ni bɛŋkɛ jɛmɛ lɛ anɔ lɛ kɛ amɛwala wo oshara mli ni amɛkɛ yelikɛbuamɔ nibii babaoo baha amɛ. (Kwɛmɔ Buu-Mɔɔ, November 1, 1994, baafai 23-7.) Agbɛnɛ hu, nyɛmimɛi ni yɔɔ Sarajevo lɛ kɛ amɛhe jaa nii ni amɛyɔɔ, ni nɔ ni amɛmaa nɔ mi fe fɛɛ ji mumɔŋ nibii ajaa. Yɛ káwoo be lɛ mli lɛ, Kristofonyo nɔkwɛlɔ ko ni jɛ nakai maŋtiase lɛ mli, kɛ amaniɛbɔɔ ni nyiɛ sɛɛ nɛɛ ha:

“Wɔ kpeei ahe hiaa wɔ waa diɛŋtsɛ. Mikɛ miŋa, kɛ mɛi krokomɛi 30 ni fata wɔhe lɛ, nyiɛɔ kilomitai 15 [shitooi 9] kɛyaa kpeei ni wɔnyiɛɔ nakai gbɛ jɛkɛmɔ nɔŋŋ kɛbaa. Bei komɛi lɛ, atswaa adafi akɛ abaaba abahã wɔ nu yɛ bei ni wɔkɛfeɔ kpeei lɛ mli. Mɛni ji nɔ ni nyɛmimɛi lɛ baafee? Ani amɛbaahi shia ni amɛna nu lɛ, aloo amɛbaaya kpeei lɛ? Wɔnyɛmimɛi lɛ sumɔɔ ni amɛya kpeei lɛ. Nyɛmimɛi lɛ yeɔ amɛbuaa amɛhe be fɛɛ be; nɔ fɛɛ nɔ ni amɛyɔɔ lɛ, amɛkɛ amɛhe jaa. Nyɛmi yoo ko ni yɔɔ wɔ asafo lɛ mli lɛ, yɛ maŋ lɛ klotia yɛ koo lɛ masɛi; no hewɔ lɛ lai lɛmɔ yɛ mlɛo fioo kɛha lɛ. Etsuɔ nii hu yɛ he ni ashãa bodobodo yɛ, ni ahãa lɛ ashikishaŋ akɛ enyɔmɔwoo. Kɛji ena hegbɛ lɛ, eshãa bodobodo agbo kome ni ekɛbaa kpeei. Kɛ akpa kpee ni aaje kpo lɛ, ekũɔ eko ehaa mɔ fɛɛ mɔ.

“Ehe miihia waa akɛ nyɛmimɛi hii loo nyɛmimɛi yei lɛ ateŋ mɔ ko kwraa nuuu he akɛ akpoo lɛ. Mɔ ko mɔ ko leee wɔteŋ mɔ ni yelikɛbuamɔ he baahia lɛ yɛ jaramɔ shihilɛ ko mli. Fɛ̃i be mli beni snoo nɛ eshwie gbɛjegbɛi lɛ anɔ, ni nyɛmi yoo ko bɛ hewalɛ lɛ, obalahii ni he wa lɛ kɛ tsɔne ni akɛnyiɛɔ snoo nɔ lɛ eko tsi lɛ kɛba kpee.

“Wɔ fɛɛ wɔkɛ wɔhe woɔ shiɛmɔ nitsumɔ lɛ mli, ni Yehowa ejɔɔ wɔmɔdɛŋbɔi lɛ anɔ. Ena jaramɔ shihilɛ ni wɔyɔɔ mli yɛ Bosnia lɛ, shi ejɔɔ wɔ kɛ shweremɔ babaoo—shweremɔ ni wɔnako pɛŋ dani ta lɛ je shishi.”

Nakai nɔŋŋ hu Yehowa Odasefoi ena shweremɔ babaoo yɛ tsutsu Yugoslavia hei krokomɛi hu ni awuɔ ta yɛ lɛ, yɛ jaramɔ shihilɛi ni mli wa waa lɛ fɛɛ sɛɛ. Amaniɛbɔɔ nɛɛ jɛ Yehowa Odasefoi anitsumɔ he ni yɔɔ Croatia lɛ, ni ekɔɔ Odasefoi akuu ko he: “Nyɛmimɛi ni yɔɔ Velika Kladuša lɛ kɛ jaramɔ shihilɛi ni mli wa waa miikpe. Abatutua maŋ lɛ shii abɔ. Ehe bahia ni nyɛmimɛi lɛ atsɔɔ amɛhe ni amɛkɛwooo ta mli lɛ mli amɛha Croatiabii, Serbiabii, kɛ Muslim asraafoi sɔrɔtoi abɔ. Eji anɔkwale diɛŋtsɛ akɛ, amɛkpee amanehului babaoo naa—tsuŋwoo, yii, hɔmɔ, gbele he oshara. Shi kɛlɛ, amɛ fɛɛ amɛtee nɔ amɛye anɔkwa aahu, ni amɛna hegbɛ ko ni sa kadimɔ waa, ni ji akɛ amɛmiina Yehowa jɔɔmɔ yɛ amɛ nitsumɔi lɛ anɔ.”

Yɛ jaramɔ shihilɛi nɛɛ fɛɛ sɛɛ lɛ, Yehowa Odasefoi ni yɔɔ Velika Kladuša kɛ Bihać ni bɛŋkɛ jɛmɛ lɛ, miiya nɔ amɛmiishwere waa, beni amɛkɛ Nyɔŋmɔ miishɛjemɔ shɛɛ sane lɛ haa amɛkutsoŋbii lɛ kɛ ekãa babaoo lɛ. Maŋtsɛyeli shiɛlɔi 26 ni jɛ hei enyɔ nɛɛ fɛɛ lɛ miifee shia Biblia mli nikasemɔi 39!