Afĩ Jamɔ Mli Heyeli Sɛɛ yɛ Japan

AFII babaoo nɛ ni Yehowa Odasefoi gbekɛbii hii kɛ yei ni ji skulbii ni yɔɔ Japan lɛ kɛ shihilɛ ko ni biɔ yiŋkpɛɛ feemɔ ekpe: Ani esa akɛ amɛnyiɛ amɛhenilee ni Biblia etsɔse lɛ lɛ sɛɛ, loo ani esa akɛ amɛdi skul nikasemɔ gbɛjianɔtoo ni teɔ shi woɔ amɛhenilee lɛ sɛɛ? Mɛni hewɔ ebiɔ yiŋkpɛɛ feemɔ lɛ? Ejaakɛ abɔtirifɔ̃ɔ kɛha hefãmɔ fata kpɔiaŋgbɔlemɔ he nibii ni atsɔɔ amɛ yɛ amɛskul sɔrɔtoi lɛ amli lɛ he. Odasefoi gbekɛbii nɛɛ nuɔ he akɛ nɛkɛ kpɔiaŋgbɔlemɔ nifeemɔi nɛɛ kɛ Biblia shishitoo mlai, tamɔ nɔ ni anaa yɛ Yesaia yitso 2, kuku 4 lɛ kpaaa gbee. Jɛmɛ kaneɔ akɛ: “Amɛkɛ amɛklantei aaasɔ̃ kɔii ni amɛkɛ amɛkplɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”

Akɛni amɛsumɔɔɔ ni amɛkase tawuu mli ŋaai, ni kɔɔ mɔ kroko awuiyeli he hewɔ lɛ, Kristofoi Odasefoi gbekɛbii lɛ tsɔɔ mli amɛha amɛtsɔɔlɔi lɛ akɛ, amɛnyɛŋ amɛjɛ henilee kpakpa mli amɛkɛ amɛhe awo abɔtirifɔ̃ɔ kasemɔ mli. Beni amɛbɔ mɔdɛŋ akɛ amɛaatsɔ̃ skulbii nɛɛ ayiŋ ni amɛkpɛlɛ skul nikasemɔ he gbɛjianɔtoo nɛɛ nɔ lɛ sɛɛ lɛ, yɛ naagbee lɛ, tsɔɔlɔi ni nuɔ sane shishi lɛ ateŋ mɛi pii kpɛlɛ nɔ akɛ amɛbaajie bulɛ kpo yɛ skulbii lɛ ahenileei ahe, ni amɛto skul nifeemɔi krokomɛi ahe gbɛjianɔ amɛha amɛ.

Shi kɛlɛ, tsɔɔlɔi lɛ ekomɛi amli fu, ni skul sɔrɔtoi lɛ ekomɛi ekpɛlɛɛɛ akɛ amɛaaha Odasefoi gbekɛbii nɛɛ yijiemɔ woji ni tsɔɔ akɛ amɛna kpɔiaŋgbɔlemɔ he nikasemɔ. Yɛ 1993 mli lɛ, kɛ hoo lɛ, atsĩ Odasefoi nɛɛhu naa ni amɛkana nikasemɔ mli hiɛyaa, ni anyɛ amɛnɔ ni amɛkpa skulyaa loo ashwie amɛ kɛjɛ skul yɛ amɛhe ni amɛkɛwooo abɔtirifɔ̃ɔ kasemɔ kɛha hefãmɔ mli lɛ hewɔ.

Eyɛ faŋŋ akɛ, be eshɛ ni esa akɛ afã hegbɛ ni gbekɛbii Kristofoi yɔɔ akɛ amɛkase nii yɛ skul, ní amɛŋmɛɛɛ amɛhenilee he ni akɛsaa lɛ he. Skul nikaselɔi enumɔ ni akpɛlɛɛɛ ni amɛya hiɛ kɛya sɛ̃i ni ji enyɔ lɛ nɔ, yɛ Kobe Municipal Industrial Technical College (ni afoɔ lɛ kuku akɛ Kobe Tech) lɛ kpɛ amɛyiŋ akɛ amɛbaaha akwɛ amɛsane lɛ mli yɛ mla naa.

Mɛni Ji Sane Lɛ?

Yɛ 1990 agbiɛnaa be mli, beni ahe skul nikaselɔi enumɔ nɛɛ yɛ Kobe Tech lɛ, amɛtsɔɔ mli amɛha tsɔɔlɔi lɛ akɛ amɛnyɛŋ amɛkɛ amɛhe awo kendo (Japanbii aklante kɛ nɔmɔ) kasemɔi amli, yɛ amɛsusumɔi ni damɔ Biblia nɔ lɛ hewɔ. Kpɔiaŋgbɔlemɔ kasemɔ nɔkwɛlɔi lɛ te shi amɛwo enɛ waa, ni amɛhaaa amɛ gbɛ kroko ni amɛaatsɔ nɔ amɛna yijiemɔ kɛha kpɔiaŋgbɔlemɔ kasemɔ. Yɛ naagbee lɛ, nikaselɔi lɛ yeee kpɔiaŋgbɔlemɔ he nikasemɔ mli omanye, ni eba lɛ akɛ esa akɛ amɛsaa amɛta klɛŋklɛŋ sɛ̃i lɛ nɔ ekoŋŋ (ni ji klɛŋklɛŋ afi nikasemɔ yɛ kɔleji). Yɛ April 1991 mli lɛ, amɛkɛ sane lɛ tee Kobe Kpokpaa nɔ Kojomɔ He, ni amɛkɛɛ akɛ skul lɛ nifeemɔ teɔ shi ewoɔ jamɔ mli heyeli ni ama nɔ mi yɛ amɛmaŋ mla gbɛjianɔtoo wolo lɛ mli lɛ.a

Skul lɛ wie akɛ, kɛ amɛha amɛ nifeemɔi krokomɛi kɛye najiaŋ lɛ, ebaatsɔɔ akɛ amɛmiiye kɛmiibua jamɔ pɔtɛɛ ko pɛ, ni no baate shi awo maŋbii askulyaa he gbɛjianɔtoo ni hiɛaŋkwɛmɔ bɛ mli yɛ jamɔ gbɛfaŋ lɛ. Kɛfata he lɛ, amɛwie hu akɛ amɛbɛ nibii kɛ tsɔɔlɔi ni kɛ kpɔiaŋgbɔlemɔ gbɛjianɔtoo kroko baaha.

Kpokpaa nɔ Kojomɔ He lɛ Yiŋkpɛɛ Hɛle Mɛi ni Nu He lɛ Ashĩ

Beni akwɛɔ sane lɛ mli lɛ, skul nikaselɔi enumɔ lɛ ateŋ mɛi enyɔ shɛɛɛ taomɔ nii ni akɛnaa kpɔiaŋgbɔlemɔ kasemɔ he yijiemɔ wolo lɛ he ekoŋŋ, ni mɛi etɛ ni eshwɛ lɛ shɛ he sharao kɛkɛ, ni atsi amɛ kɛtee sɛ̃i ni tsa nɔ lɛ nɔ. Skul lɛ mlai tsɔɔ akɛ, abaanyɛ ashwie nikaselɔi ni amɛ nikasemɔ mli mɔdɛŋbɔi ehiii, ni amɛkuɔ sɛɛ amɛtaa skul sɛ̃i kome nɔ afii enyɔ kɛtsaraa nɔ, yɛ klɛŋklɛŋ afi lɛ sɛɛ lɛ, kɛjɛ skul lɛ. Enɛ hewɔ lɛ, nikaselɔi enyɔ lɛ ateŋ mɔ kome kpɛ eyiŋ akɛ ebaashi skul lɛ dani ashwie lɛ, shi mɔ kroko lɛ, ni ji Kunihito Kobayashi, ekpɛlɛɛɛ ni eshĩɔ. No hewɔ lɛ ashwie lɛ. Nɔ ni yɔɔ miishɛɛ ji akɛ, ni aja mli lɛ, yibɔ ni Kunihito ná kɛha nibii sɔrɔtoi fɛɛ ni akaseɔ, ní kpɔiaŋgbɔlemɔ ni eyeee omanye yɛ mli, yɛ yibɔ 48 ni ená lɛ hewɔ lɛ fata he lɛ, ji 90.2, yɛ 100 ni ataoɔ lɛ mli. Lɛ eye klɛŋklɛŋ gbɛhe yɛ eklasbii ni ji nikaselɔi 42 lɛ ateŋ.

Yɛ February 22, 1993 lɛ, Kobe Kpokpaa nɔ Kojomɔ He lɛ bu Kobe Tech bem yɛ sane lɛ mli ni ekɛɛ: “Nibii ni skul lɛ fee lɛ ekuuu maŋ mla gbɛjianɔtoo lɛ mli,” eyɛ mli akɛ ekpɛlɛ nɔ akɛ “anyɛŋ aje he ŋwane akɛ atsĩ sãmãlɔi lɛ ajamɔ mli heyeli naa yɛ gbɛ ko nɔ kɛtsɔ skul lɛ taomɔ nii ni biɔ ni amɛkɛ amɛhe awo kendo kasemɔ mli lɛ nɔ.”

Taakɛ Paulo fee yɛ klɛŋklɛŋ afii oha lɛ mli lɛ, sãmãlɔi lɛ kpɛ amɛyiŋ akɛ amɛbaabi ni kojomɔ he ni nɔ kwɔ asaa akwɛ amɛsane lɛ mli ekoŋŋ. (Bɔfoi lɛ Asaji 25:11, 12) Sane lɛ tee Osaka Kojomɔ He Wulu lɛ.

Sãmãlɔi lɛ Asubaŋ ni Pɛsɛmkunya Bɛ Mli

Woloŋlelɔ ko ni ale lɛ, ni ji Nilelɔ Tetsuo Shimomura ni jɛ Tsukuba Univɛsiti lɛ, kpɛlɛ akɛ ebaaye odase akɛ odasefonyo ni he esa jogbaŋŋ yɛ Osaka Kojomɔ He Wulu lɛ. Ákɛ mɔ ni ekase woloŋlee kasemɔ kɛ mla he nii ni ehe esa jogbaŋŋ yɛ mli lɛ, ema nɔ mi akɛ skul lɛ nifeemɔi etsɔɔɔ mɔ hesusumɔ kwraa, yɛ bɔ ni ekɛ nikaselɔi lɛ ye ha lɛ mli. Kunihito Kobayashi tsɔɔ ehenumɔi yɛ kojomɔ he lɛ, ni esubaŋ ni tsɔɔ anɔkwayeli lɛ kanya mɛi ni yɔɔ kojomɔ he lɛ atsuii. Kɛfata he lɛ, yɛ February 22, 1994, beni Kobe Mlalelɔi Akuu lɛ jaje akɛ skul lɛ nifeemɔi tsĩɔ Kunihito jamɔ mli heyeli kɛ hegbɛ hu ni eyɔɔ akɛ ekase nii yɛ skul lɛ naa lɛ, amɛjie yi akɛ skul lɛ asaa ahe lɛ ekoŋŋ.

Beni be ni akɛ kojomɔ yiŋkpɛɛ baahã yɛ Osaka Kojomɔ He Wulu lɛ bɛŋkɛɔ lɛ, obalahii Kristofoi ni sane lɛ kɔɔ amɛhe lɛ fɛɛ he miitswa shi waa akɛ amɛaafata he kɛwuu mla naa ta nɛɛ aahu kɛyashi enaagbee tɔ̃ɔ. Amɛnu he akɛ amɛmiiwuu mla naa ta kɛmiiha Odasefoi gbekɛbii akpei abɔ ni kɛ nakai sane lɛ nɔŋŋ kpeɔ yɛ skul sɔrɔtoi amli yɛ Japan fɛɛ lɛ. Shi akɛni jeee shwiemɔ ashwie amɛ kɛjɛ skul lɛ hewɔ lɛ, eyɛ faŋŋ akɛ eeenyɛ eba akɛ kojomɔ lɛ baafo amɛsane lɛ mli kɛji amɛkɛtee. Ni amɛna akɛ kɛ amɛgbala amɛfaikpamɔ lɛ sɛɛ lɛ, abaamã skul lɛ nifeemɔ ni nilee bɛ mli, ni ji shwiemɔ ni eshwie Kunihito lɛ nɔ mi waa. Enɛ hewɔ lɛ, nikaselɔi lɛ fɛɛ ŋmɛɛ sane lɛ he, ni eshwɛ Kunihito pɛ.

Yɛ December 22, 1994 lɛ, Kojolɔ Nukpa Fe Fɛɛ Reisuke Shimada ni yɔɔ Osaka Kojomɔ He Wulu lɛ, kɛ kojomɔ ni foɔ Kobe Kpokpaa nɔ Kojomɔ He lɛ kojomɔ lɛ mli lɛ hã. Kojomɔ he lɛ tsɔɔ mli akɛ yiŋtoo hewɔ ni Kunihito ekpɛlɛɛɛ ni ekaseɔ kendo lɛ ji anɔkwale, ni nii ni elaajeɔ yɛ enifeemɔ ni damɔ ejamɔ mli hemɔkɛyeli nɔ nɛɛ da waa diɛŋtsɛ. Kojolɔ Nukpa Fe Fɛɛ Shimada wie akɛ kulɛ esa akɛ skul lɛ ato nifeemɔi krokomɛi ahe gbɛjianɔ ni ekɛye najiaŋ. Nɛkɛ kojomɔ yiŋkpɛɛ fɛfɛo nɛɛ tee henumɔi kpakpai ashi yɛ mɛi ni susuɔ adesai ahegbɛi ahe lɛ atsuii amli. Shi, skul lɛ hu saa ekɛ sane lɛ tee Japan Kojomɔ He Wulu Fe Fɛɛ lɛ ni asaa akwɛ mli ekoŋŋ, ni ekɛtsĩ Kunihito skulyaa naa nɔ ni fa fe afi kroko.

Kɛtee Kojomɔ He Wulu Fe Fɛɛ Lɛ

Sane ko ni aŋma yɛ Kobe Shimbun adafitswaa wolo lɛ mli lɛ wie yɛ sɛɛ mli akɛ: “Kulɛ esa akɛ Kobe Maŋtiase Skul Ajinafoi lɛ kɛ skul lɛ ahe Ow. Kobayashi amɛwo skul lɛ mli ekoŋŋ yɛ enɛ sɛɛ [yɛ Osaka Kojomɔ He Wulu lɛ yiŋkpɛɛ lɛ sɛɛ]. . . . Amɛ béi kɛ shitee-kɛ-woo subaŋ ni he ehiaaa lɛ eha nikaselɔ lɛ balahiiaŋ be ni he hiaa waa lɛ miiŋmɛɛ lɛ.” Shi kɛlɛ, Kobe Tech fee shɛii yɛ sane nɛɛ he lolo. Nɔ ni jɛ mli ba ji akɛ, ebatsɔ saneyitso ni aawie he yɛ maŋ muu lɛ fɛɛ adafitswaa woji amli. Tsɔɔlɔi kɛ skul nɔkwɛlɔi ni yɔɔ maŋ lɛŋ fɛɛ kadi nɔ ni yaa nɔ lɛ, ni yiŋkpɛɛ ni baajɛ kojomɔ he ni nɔ kwɔ fe fɛɛ yɛ maŋ lɛ mli lɛ baadamɔ shi daa akɛ mla naa nɔkwɛmɔ nɔ ni mli wa fe fɛɛ kɛha saji ni tamɔ nɛkɛ ni baate shi wɔsɛɛ.

Yɛ January 17, 1995, aaafee be mli ni skul lɛ kɛ sane lɛ tee Kojomɔ He Wulu Fe Fɛɛ lɛ sɛɛ otsi mli lɛ, Kobe shikpɔŋ hosomɔ lɛ sa Ashiya City, he ni Kunihito kɛ eweku lɛ yɔɔ lɛ he. Aaafee leebi ŋmɛji enumɔ kɛ fã, ni ji minitii fioo ko dani shikpɔŋ hosomɔ lɛ baashɛ jɛmɛ lɛ, Kunihito shi shia kɛtee enitsumɔ ni ekɛ be fã tsuɔ lɛ. Eta baisikel nɔ kɛnyiɛ gbɛ ni tsɔɔ Hanshin Gbɛjegbɛ Wulu lɛ shishi lɛ nɔ, ni beni kukrudu lɛ shi lɛ, no mli lɛ eshwɛ fioo ni ebaashɛ he ni kumɔ lɛ. Oya nɔŋŋ kɛkɛ ni eku esɛɛ kɛtee shia ni eyanina ni eshia lɛ klɛŋklɛŋ ŋsɔɔdo lɛ ekumɔ kwraa. Kunihito na akɛ kulɛ ebaanyɛ elaaje ewala kwraa yɛ kukrudu lɛ mli, ni eda Yehowa shi akɛ eŋmɛ lɛ gbɛ ni eje mli. Eji egbo kulɛ, eeenyɛ eba lɛ akɛ, akɛ kendo sane lɛ baaba naagbee ni Kojomɔ He Wulu Fe Fɛɛ lɛ kɛ yiŋkpɛɛ hãko.

Kojomɔ He Wulu Fe Fɛɛ ni yɔɔ Japan lɛ fɔɔ saji ni abi ni akwɛ mli ekoŋŋ lɛ amli kwɛmɔ yɛ niŋmaa mli pɛ, ni amɛkojoɔ akɛ kojomɔ hei ni baa shi lɛ ayiŋkpɛi lɛ ja loo ejaaa. Ja yiŋtoo ni yɔɔ hiɛdɔɔ yɛ ni aaadamɔ nɔ atsake kojomɔ he ni baa shi lɛ yiŋkpɛɛ lɛ, kɛ jeee nakai lɛ atsɛɛɛ sane lɛ kɛha toiboo. Kojomɔ he lɛ etswaaa mɛi ni sane lɛ kɔɔ amɛhe lɛ adafi yɛ gbi ni akɛ yiŋkpɛɛ baaha yɛ sane lɛ he. No hewɔ lɛ Kunihito naa kpɛ ehe waa yɛ March 8, 1996 leebi, beni akɛɛ lɛ akɛ kojomɔ he lɛ kɛ eyiŋkpɛɛ baaha nakai leebi lɛ. Nɔ ni fee lɛ miishɛɛ kɛ mlifilimɔ fɛɛ ji akɛ, ena ele akɛ Kojomɔ He Wulu Fe Fɛɛ lɛ efĩ Osaka Kojomɔ He Wulu lɛ yiŋkpɛɛ lɛ sɛɛ.

Kojolɔi ejwɛ, kɛ Kojolɔ Shinichi Kawai ni ji sɛinɔtalɔ lɛ, fee ekome kɛkojo akɛ “esa akɛ abu skul nifeemɔi ni asusuɔ he lɛ akɛ nɔ ni esaaa kwraa kɛji akɛmiito nɔkwɛmɔ nii ni afee ashwie shi ni akpɛlɛɔ nɔ lɛ he, ni egbaa afã kɛjɛɔ hegbɛi ni eyɔɔ akɛ ekɛ eyiŋkpɛi komɛi tsuɔ nii lɛ he, ni no hewɔ lɛ mla ekpɛlɛɛɛ nɔ.” Kojomɔ he lɛ kpɛlɛ anɔkwayeli ni Kunihito kɛkpoo kendo kasemɔ lɛ nɔ ni ewie akɛ: “Yiŋtoo kpakpa hewɔ ni obalanyo ni akɛ sane eshi lɛ lɛ ekpɛlɛɛɛ ni ekɛ ehe woɔ kendo kasemɔ mli lɛ, ni enɛ kɛ ehemɔkɛyeli lɛ shishitoo diɛŋtsɛ yɛ tsakpaa ni bɛŋkɛ kpaakpa.” Kojomɔ He Wulu Fe Fɛɛ lɛ kojo akɛ kulɛ skul lɛ baanyɛ, ni esa hu akɛ ekɛ gbɛi krokomɛi aha koni ekɛjie bulɛ kpo yɛ mɔ ni akɛ sane eshi lɛ lɛ jamɔ mli hemɔkɛyeli he.

Nibii ni Jɛ Mli Ba lɛ Shɛ Shɔŋŋ

Ŋwanejee ko bɛ he akɛ, yiŋkpɛɛ nɛɛ baafee nɔkwɛmɔ nɔ kpakpa efɔ̃ shi yɛ jamɔ mli heyeli sɛɛfimɔ mli yɛ skul. The Japan Times lɛ wie akɛ: “Kojomɔ lɛ ji klɛŋklɛŋ nɔ ni Kojomɔ He Wulu Fe Fɛɛ lɛ kɛha yɛ skul kɛ jamɔ mli heyeli he sane lɛ he.” Shi kɛlɛ, yiŋkpɛɛ lɛ ejieee sɔ̃ ni kã gbekɛ fɛɛ gbekɛ ni miiya skul lɛ nɔ, akɛ ejɛ lɛ diɛŋtsɛ ehenilee mli ekɔ eshidaamɔ kɛji ekɛ hemɔkɛyeli he kaai miikpe lɛ kɛjɛɛɛ jɛmɛ.

Nilelɔ Masayuki Uchino ni jɛ Tsukuba Univɛsiti lɛ wie akɛ otii titri ni tsirɛ kojolɔi lɛ ni amɛha Kunihito ye kunim yɛ sane lɛ mli lɛ ji akɛ, eji “nikaselɔ anɔkwafo ni enikasemɔ mli mɔdɛŋbɔɔ sa kadimɔ jogbaŋŋ.” Biblia lɛ kɛ ŋaawoo nɛɛ haa Kristofoi ni kɛ amɛhemɔkɛyeli he kaa kpeɔ lɛ akɛ: “Nyɛba nyɛjeŋ jogbaŋŋ yɛ jeŋmajiaŋbii lɛ ateŋ, koni nɔ mli ni amɛwieɔ nyɛhe yɛ akɛ efɔŋfeelɔi lɛ, nyɛ nitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam, yɛ saramɔ gbi lɛ nɔ.” (1 Petro 2:12) Gbekɛbii Kristofoi anɔkwafoi baanyɛ atsɔɔ akɛ amɛshidaamɔ ni damɔ Biblia nɔ lɛ sa bulɛ ni gbɔmɛi lɛ aaana aha amɛ, kɛtsɔ amɛshihilɛ fɛɛ ni amɛaaha ekɛ Biblia shishitoo mla akpa gbee lɛ nɔ.

Yɛ Kojomɔ He Wulu Fe Fɛɛ lɛ yiŋkpɛɛ lɛ sɛɛ lɛ, asaa ahe Kunihito Kobayashi yɛ Kobe Tech ekoŋŋ. No mli lɛ, nikaselɔi ni ahé amɛkɛ Kunihito yɛ skul lɛ yɛ be kome mli lɛ ateŋ mɛi pii egbe amɛ nikasemɔ naa momo. Amrɔ nɛɛ, Kunihito kɛ nikaselɔi ni eye amɛ onukpa afii enumɔ miikase nii. Yɛ je lɛŋ bii pii ahiɛ lɛ, ebalahiiaŋ be afii enumɔ sɔŋŋ ni jara wa lɛ tamɔ nɔ ni afite lɛ. Shi, Kunihito emuuyeli mlihiɛmɔ lɛ jara wa yɛ Yehowa Nyɔŋmɔ hiɛ, ni eka shi faŋŋ akɛ efɔleshaa lɛ efeko efolo.

[Shishigbɛ niŋmaa]

[Mfonirii ni yɔɔ baafa 20]

Abɛku: Kunihito shia yɛ shikpɔŋ hosomɔ lɛ sɛɛ

Shishigbɛ: Kunihito ŋmɛnɛ