Nyɔŋmɔ Ji Mibobaahe kɛ Mihewalɛ

TAAKƐ CHARLOTTE MÜLLER GBA

“Afii nɛɛhu ni okɛhi Hitler shishi lɛ sa yijiemɔ waa,” Komunistnyo kojolɔ lɛ kɛɛ. “Ote shi owo ta lɛlɛŋ, shi amrɔ nɛɛ, oote shi oowo wɔ toiŋjɔlɛ gbɛjianɔtoo lɛ!”

NO MLI lɛ eewie tsuŋ ni Nazibii lɛ wo mi mra mli kɛtsɔ hiɛ lɛ, kɛ kwasafoŋ nɔyeli ni hi shi yɛ German Democratic Republic lɛ he. Klɛŋklɛŋ lɛ, kulɛ mitswaaa misɛŋ, shi sɛɛ mli lɛ, mijie naa akɛ: “Kristofonyo enɔɔɔ yɛ anɔkwa toiŋjɔlɛ he tamɔ bɔ ni mɛi krokomɛi feɔ lɛ. Mibɔɔ mɔdɛŋ akɛ manyiɛ Biblia mli fãmɔ ni akɛha akɛ misumɔ Nyɔŋmɔ kɛ minaanyo lɛ sɛɛ kɛkɛ. Nyɔŋmɔ Wiemɔ lɛ yeɔ ebuaa mi ni mihiɛɔ toiŋjɔlɛ mli yɛ wiemɔ kɛ nifeemɔ fɛɛ mli.”

Nakai gbi lɛ, September 4, 1951 lɛ, Komunistbii lɛ bu mi fɔ ni amɛwo mi tsuŋ afii kpaanyɔ—be ni Nazi nɔyeli lɛ kɛwo mi tsuŋ lɛ fa fe no kɛ afi kome.

Beni National Socialistbii lɛ kɛ Komunistbii lɛ waa wɔ Yehowa Odasefoi lɛ ayi lɛ, mina miishɛjemɔ kɛjɛ Lala 46:2, akɛ: “Naa-Nyɔŋmɔ ji wɔbobaahe kɛ wɔhewalɛ, wɔbuamɔ ni wa ni wɔnaa yɛ fimɔi amli.” Yehowa kome pɛ hã mi hewalɛ ni mikɛdamɔ naa, ni babaoo ni mihaa e-Wiemɔ lɛ tsɔɔ minɔ̃ lɛ, babaoo ni minaa hewalɛ ji no.

Awo Mi Hewalɛ Kɛha Wɔsɛɛ Be

Afɔ mi yɛ afi 1912 yɛ Gotha-Siebleben yɛ Thuringia, Germany. Eyɛ mli akɛ mifɔlɔi ji Protestantbii moŋ, shi mitsɛ tao Biblia mli anɔkwale lɛ kɛ jalɛ nɔyeli. Beni mifɔlɔi yakwɛ “Photo-Drama of Creation” sini lɛ, amɛná miishɛɛ waa.a Ataa ená nɔ ni etao aahu lɛ—Nyɔŋmɔ Maŋtsɛyeli lɛ.

Ataa kɛ Awo, kɛ wɔ, ni ji bii ekpaa lɛ, ŋma wolo kɛjie wɔgbɛi kɛjɛ sɔlemɔ lɛ mli yɛ March 2, 1923. No mli lɛ wɔyɛ Chemnitz maŋtiase lɛ mli yɛ Saxony, ni wɔkɛ Biblia Kaselɔi lɛ bɔi bɔɔ yɛ jɛmɛ. (Minyɛmimɛi hii kɛ yei lɛ ateŋ mɛi etɛ batsɔmɔ Yehowa Odasefoi.)

Ahã Biblia mli ŋmalɛi kɛ anɔkwalei ni jara wa ná minɔ hewalɛ waa yɛ Biblia Kaselɔi lɛ akpeei ashishi, ni enɛɛmɛi hã gbekɛ tsui ni miyɔɔ lɛ bayi obɔ kɛ miishɛɛ. Klɛŋklɛŋ kwraa lɛ, ato gbɛjianɔ ni akɛ gbɛtsɔɔmɔ hãa wɔ Kristofoi gbekɛbii, ni wɔyifalɛ fe 50 lɛ, daa Hɔgbaa, ni mikɛ minyɛmi yoo Käthe nine shɛ enɛ nɔ aahu be saŋŋ. Mɛi ni fata wɔkuu lɛ he lɛ ateŋ mɔ ko ji obalanyo Konrad Franke, ni toɔ nyiɛmɔ kɛ shisharamɔ he gbɛjianɔ ehaa wɔ, ni ekɛ wɔ kaseɔ lala hu lɛ. Yɛ sɛɛ mli, kɛjɛ 1955 kɛbashi 1969 lɛ, Nyɛminuu Franke sɔmɔ akɛ Buu Mɔɔ Asafo lɛ nitsumɔ he nine ni yɔɔ Germany lɛ nɔkwɛlɔ.

Ni 1920 afii lɛ baafee haomɔ afii, bei komɛi lɛ, yɛ Nyɔŋmɔ webii ateŋ po. Akɛni mɛi komɛi ekpɛlɛɛɛ Buu-Mɔɔ lɛ nɔ akɛ “ŋmaa yɛ be ni sa nɔ” dɔŋŋ hewɔ lɛ, amɛte shi amɛwo shia-kɛ-shia shiɛmɔ nitsumɔ lɛ. (Mateo 24:45) Enɛ kɛ hemɔkɛyeli kwamɔ ba. Shi “ŋmaa” nɛɛ nɔŋŋ ji nɔ ni hã wɔ hewalɛ ni he hiaa wɔ waa yɛ nakai beaŋ lɛ. Akɛ nɔkwɛmɔ nɔ lɛ, saji komɛi je kpo yɛ Buu-Mɔɔ lɛ mli, tamɔ “Ajɔɔ Mɛi ni Sheee Gbeyei Lɛ” (1919) kɛ “Namɔ Baawo Yehowa Hiɛ Nyam?” (1926) Miitao ni mawo Yehowa hiɛ nyam kɛtsɔ nitsumɔ ni matsu kɛ ekãa nɔ, no hewɔ lɛ mikɛ Nyɛminuu Rutherford woji wuji kɛ woji bibii lɛ babaoo hã mɛi.

Yɛ March 1933 lɛ, abaptisi mi akɛ Yehowa Odasefoi ateŋ mɔ kome. Nakai afi lɛ mli nɔŋŋ lɛ, agu wɔ sanekpakpa shiɛmɔ nitsumɔ lɛ yɛ Germany. Beni abaptisiɔ wɔ lɛ, akɛ Kpojiemɔ 2:10 hã wɔ akɛ ŋaawoo kɛha wɔsɛɛ be, akɛ: “Kaashe amanehulu ni obaana lɛ eko eko gbeyei. Naa, abonsam baaŋɔ nyɛteŋ mɛi komɛi awo tsuŋ, koni aŋɔka nyɛ, ni nyɛaana amanehulu gbii nyɔŋma. Feemɔ anɔkwafo kɛyashi gbele mli, ni mahão wala akekere lɛ.” Miŋɔ nɛkɛ ŋmalɛ kuku nɛɛ mito mitsui mli, ni mijeee he ŋwane kwraa akɛ kaai ni mli wa waa jwere mihiɛ. Enɛ ba mli anɔkwale hu.

Akɛni wɔweku lɛ kɛ ehe wooo maŋkwramɔ saji amli hewɔ lɛ, wɔ akutsoŋbii lɛ ateŋ mɛi pii kɛ jwɛŋmɔ fɔŋ kwɛɔ wɔ. Yɛ maŋkwramɔŋ oshiki ko ni afɔ̃ lɛ sɛɛ lɛ, Nazi asraafoi akuu ko ni wo amɛ asraafoi atadei badamɔ wɔshia lɛ hiɛ ni amɛbolɔ waa akɛ, “Sɛɛgbɛtsɔɔlɔi yɔɔ biɛ!” Sane ko ni yitso ji “Nyɛkashea Amɛ Gbeyei,” ni je kpo yɛ German Buu-Mɔɔ lɛ mli yɛ December 1933 lɛ, bafee hewalɛwoo nɔ krɛdɛɛ kɛha mi. Miitao ni mahi shi akɛ Yehowa Odasefonyo anɔkwafo, yɛ shihilɛi ni mli wa fe fɛɛ po shishi.

Henyɛlɔi lɛ Ena Amɛtsabaa—Tsuŋwoo

Wɔnyɛ wɔtee nɔ wɔkala Buu-Mɔɔ lɛ yɛ teemɔŋ yɛ Chemnitz aahu kɛbashi 1935 gbo be mli. Kɛjɛ no sɛɛ lɛ, eba lɛ akɛ esa akɛ awó tsɔne ni akɛkalaa woji, ni wɔkɛtsuɔ nii lɛ kɛya Beierfeld, yɛ Sũ Mli Jwetri Gɔji lɛ anɔ, ni akɛtsu nii yɛ jɛmɛ ni akɛfee woji wuji aahu kɛyashi August 1936. Mikɛ Käthe kɛ woji nɛɛ ekomɛi yahãa nyɛmimɛi ni Ataa kɛ amɛ adrɛs eha wɔ lɛ. Nɔ fɛɛ nɔ tee nɔ jogbaŋŋ aahu kɛyashi be ko. Shi etsɛɛɛ kɛkɛ ni Gestapo lɛ bɔi mi gbɔbimɔ, ni yɛ August 1936 mli lɛ, amɛbamɔ mi yɛ shia ni amɛkɛ mi yawo tsuŋ, ni mimɛ yɛ jɛmɛ ni akojo mi.

Yɛ February 1937 lɛ, nyɛmimɛi hii 25 kɛ nyɛmimɛi yei 2—ni mifata he—yapue yɛ kojomɔ he krɛdɛɛ ko hiɛ yɛ Saxony. Amɛwie akɛ Yehowa Odasefoi agbɛjianɔtoo lɛ kɛ amɛhe woɔ maŋjwaa nifeemɔ mli. Awo nakai nyɛmimɛi hii ni kala Buu-Mɔɔ lɛ tsuŋ afii enumɔ. Awo mi tsuŋ afii enyɔ.

Yɛ nɔ najiaŋ ni aaahã maye mihe yɛ mitsuŋwoo lɛ naagbee lɛ, Gestapo lɛ bamɔ mi ekoŋŋ. Amɛkɛɛ kulɛ esa akɛ mikɛ minine awo sanejajemɔ wolo ko ni tsɔɔ akɛ mifeeŋ Yehowa Odasefonyo ni yɔɔ ekãa dɔŋŋ lɛ shishi. Mikɛ shiŋŋ-feemɔ kpoo, ni enɛ hã amɛ onukpa lɛ mli fũ waa, ni ete shi edamɔ shi, ni eŋma wolo ehã akɛ akɛ mi ayawo tsuŋ ekoŋŋ. Wolo ni eŋma ehã lɛ yɔɔ mfoniri lɛ mli lɛ. Aŋmɛɛɛ mi gbɛ ni mana mifɔlɔi po, kɛkɛ ni akɛ mi tee yei agbokɛlɛfoi aŋsara ko mli amrɔ nɔŋŋ yɛ Lichtenburg, yɛ Elbe faa lɛ masɛi. No sɛɛ be fioo ko ni mikɛ Käthe kpe. Ehi gbokɛlɛfoi aŋsara ni yɔɔ Moringen lɛ mli aahu kɛjɛ December 1936, shi beni aŋa nakai gbokɛlɛfoi aŋsara lɛ, ni akɛ lɛ, kɛ nyɛmimɛi yei krokomɛi babaoo hu ba Lichtenburg. No mli lɛ mitsɛ hu yɛ tsuŋwoo mli, ni minaaa lɛ aahu kɛbashi afi 1945 mli.

Yɛ Lichtenburg

Aŋmɛɛɛ mi gbɛ ni miyafata Odasefoi yei krokomɛi lɛ ahe amrɔ nɔŋŋ, ejaakɛ aagbala amɛtoi yɛ yiŋtoo kome loo yiŋtoo kroko hewɔ. Mina gbokɛlɛfoi akui sɔrɔtoi enyɔ, yɛ asai lɛ ekome nɔ—yei ni fɔɔ okpɔlɔi ahe taramɔ, kɛ Odasefoi lɛ, ni ahãa amɛtaraa sɛii bibii anɔ gbi muu fɛɛ, ni ahãaa amɛ niyenii ko kwraa lɛ.b

Mikpɛlɛ nitsumɔ fɛɛ nitsumɔ ni abaahã mi lɛ nɔ amrɔ nɔŋŋ, kɛ hiɛnɔkamɔ akɛ matsɔ gbɛ ko nɔ mana Käthe. Ni nakai pɛpɛɛpɛ ji nɔ ni ba. Ekɛ gbokɛlɛfoi krokomɛi enyɔ eje kpo kɛmiiya ni amɛyatsu nii kɛkɛ ni wɔkpe. Wɔna miishɛɛ kɛteke nɔ, ni mifua lɛ waa diɛŋtsɛ. Shi yoo bulɔ ni kwɛɔ wɔnɔ lɛ yakɛɛ amrɔ nɔŋŋ. Abibii wɔ saji, ni kɛjɛ nakai be lɛ nɔ kɛyaa lɛ, aje gbɛ agbála wɔmli kwraa. Enɛ bawa waa kɛha wɔ fe nine.

Mihiɛ kpaŋ nibii krokomɛi enyɔ ni ba yɛ Lichtenburg lɛ anɔ kɔkɔɔkɔ. Be ko lɛ, eba lɛ akɛ esa akɛ gbokɛlɛfoi lɛ fɛɛ abadamɔ shi yɛ kpo lɛ nɔ ni amɛbo Hitler maŋkwramɔ wiemɔi ni ebaawie yɛ redio lɛ nɔ lɛ toi. Wɔ, Yehowa Odasefoi lɛ kpoo enɛ, ejaakɛ maŋhedɔɔ nifeemɔi baaba sane lɛ mli. No hewɔ lɛ bulɔi lɛ kɛ rɔbai ni nu ni akɛgbeɔ la tsɔɔ mli lɛ mã wɔnɔ, ni amɛkɛ nu ni fɛ̃ɔ waa kɛjɛɔ rɔbai lɛ amli lɛ fɔ wɔ ni amɛnyiɛ wɔ, yei ni wɔbɛ hefãmɔ nɔ ko kwraa lɛ sɛɛ kɛjɛ nsɔɔdo ni ji ejwɛ lɛ nɔ aahu kɛyi shi kɛba kpo lɛ nɔ. Wɔbadamɔ shi yɛ jɛmɛ, ni wɔhe fɛɛ efɔ tsoo.

Be kroko hu lɛ, afã mi, kɛ Gertrud Oehme kɛ Gertel Bürlen, akɛ wɔkɛ kanei ayasaa asraafoi afãlɔ nitsumɔ he yitso lɛ, ejaakɛ Hitler fɔmɔgbi miibɛŋkɛ. Wɔkpoo enɛ feemɔ, ejaakɛ wɔyoo Satan ŋaai ni ekɛbɔɔ mɔdɛŋ akɛ ekɛaatsirɛ wɔ koni ekɛku wɔ emuuyeli mli kɛtsɔ saji ahe ni wɔɔŋmɛɛ yɛ nibii bibii amli ni wɔkɛsaa lɛ anɔ. Akɛ wɔ toigbalamɔ lɛ, ahã wɔ, ni ji nyɛmimɛi yei obalayei bibii lɛ ateŋ mɔ fɛɛ mɔ kome pɛ ye otsii etɛ ni nyiɛ sɛɛ lɛ yɛ tsuŋwoohe bibioo ko ni mli ewo duŋ mli. Shi Yehowa tee nɔ ebɛŋkɛ wɔ kpaakpa, ni efee abobaahe eha wɔ, yɛ he ko ni yɔɔ gbeyei tamɔ nɛkɛ po mli.

Yɛ Ravensbrück

Yɛ May 1939 mli lɛ, ajie gbokɛlɛfoi ni yɔɔ Lichtenburg lɛ kɛtee Ravensbrück gbokɛlɛfoi aŋsara lɛ mli. Ahã mi nitsumɔ yɛ niiahefɔmɔ he lɛ yɛ jɛmɛ, kɛfata Odasefoi nyɛmimɛi yei krokomɛi babaoo ahe. Beni ta lɛ fɛ́ lɛ sɛɛ be fioo ko lɛ, akɛɛ wɔ akɛ esa akɛ wɔkɔlɔ swastika aflaŋaa lɛ ni wɔhiɛ, shi wɔfeee. Nɔ ni jɛ mli ba ji akɛ, akɛ wɔteŋ mɛi enyɔ, ni ji Mielchen Ernst kɛ mi, wo gbokɛlɛfoi atsu ni agbalaa mɛi atoi yɛ mli lɛ mli. No ji toigbalamɔi ni mli wa waa lɛ ateŋ ekome, ni etsɔɔ akɛ esa akɛ wɔtsu nitsumɔ ni wa waa daa gbi, kɛ Hɔgbaa po, ni bɔ ni kɔɔyɔŋ tsakemɔ ji lɛ kɔɔɔ he eko. Bɔ ni afɔɔ feemɔ ji, be ni fa fe fɛɛ ni ayeɔ yɛ jɛmɛ ji nyɔji etɛ, shi wɔhi jɛmɛ afi. Kɛ jeee Yehowa yelikɛbuamɔ kulɛ, miyi naŋ wala kɔkɔɔkɔ.

Yɛ 1942 mli lɛ, agbɔjɔ shihilɛ lɛ mli fioo ahã wɔ gbokɛlɛfoi lɛ, ni ahã mi nitsumɔ akɛ shiakwɛlɔ kɛha SS weku ko ni kɛ ŋsara lɛ jɛkɛɛɛ tsɔ̃. Weku lɛ ŋmɛ mi gbɛ ni miná heyeli fioo ko. Akɛ nɔkwɛmɔ nɔ lɛ, be ko ni mikɛ gbekɛbii lɛ je kpo kɛha shisharamɔ lɛ, mikɛ Josef Rehwald kɛ Gottfried Mehlhorn, ni ji gbokɛlɛfoi enyɔ ni tsɛ kadimɔ nii ni ji mama afaseo su ni hiɛ koji etɛ lɛ kpe, ni minyɛ mikɛ amɛ ná sanegbaa ni woɔ mɔ hewalɛ.c

Ta lɛ Sɛɛ Afii ni Mli Wa Lɛ

Beni maji ni efee ekome kɛwuɔ ta lɛ asraafoi bɛŋkɛɔ wɔ yɛ 1945 mli lɛ, weku ni mitsuɔ nii mihaa amɛ lɛ jo foi, ni eba lɛ akɛ esa akɛ mafata amɛhe. Amɛfata SS wekui krokomɛi lɛ ahe, ni amɛfee kuu wulu kome ni miifã gbɛ kɛmiiya anaigbɛ.

Ta lɛ naagbee gbii fioo lɛ bafee basabasa shihilɛ ni eyi obɔ kɛ oshara. Yɛ naagbee lɛ, wɔkɛ Amerikabii asraafoi komɛi kpe, ni amɛŋmɛ mi gbɛ ni miyaŋma migbɛi yɛ maŋ ni tsa nɔ lɛ mli akɛ mɔ ni eye ehe. Namɛi mikɛkpe yɛ jɛmɛ? Josef Rehwald kɛ Gottfried Mehlhorn. Amɛná amɛle akɛ Odasefoi ni jɛ gbokɛlɛfoi aŋsara ni yɔɔ Sachsenhausen lɛ mli lɛ fɛɛ eyashɛ Schwerin, yɛ nyiɛmɔ ko ni oshara kɛ deŋmegbomɔ yɔɔ mli, ni amɛnyiɛ kɛje gbele mli lɛ hewɔ. No hewɔ lɛ, wɔyi etɛ lɛ fɛɛ wɔyi mli kɛmiiya nakai maŋ, ni jɛkɛmɔ aaafee kilomitai 75 lɛ mli. Kwɛ miishɛɛ ni wɔna yɛ Schwerin beni wɔkɛ nakai nyɛmimɛi anɔkwafoi, ni yi ná wala kɛjɛ gbokɛlɛfoi aŋsarai lɛ amli, ni Konrad Franke fata he lɛ kpe lɛ.

Beni shɛɔ December 1945 lɛ, no mli lɛ maŋ lɛ mli shihilɛ etee hiɛ saŋŋ, aahu akɛ minyɛ mikɛ oketeke fã gbɛ. No hewɔ lɛ, miyi gbɛ kɛmiiba shiãgbɛ! Shi kɛlɛ, gbɛfãa lɛ fã ko ji be ni miye kɛkã oketeke lɛ yiteŋ diɛŋtsɛ, kɛ oketeke lɛ naa atrakwei lɛ naadaamɔ. Beni wɔyashɛ Chemnitz lɛ, miyi mli kɛjɛ oketeke shidaamɔhe lɛ kɛtee he ni wɔhi akɛ weku lɛ. Shi shiã kome po bɛ nakai gbɛjegbɛ, ni Nazi asraafoi badamɔ nɔ be ko ni eho ni amɛbolɔ waa akɛ, “Sɛɛgbɛtsɔɔlɔi yɔɔ biɛ lɛ!” he. Atswa okpɛlɛm ni akɛkumɔ nakai shihilɛhe tsũi lɛ fɛɛ kwraa. Shi, nɔ ni hã mimii shɛ mihe waa ji akɛ, miyanina Awo, Ataa, Käthe, kɛ minyɛmimɛi hii kɛ yei lɛ ni amɛyɛ wala mli.

Shika gbɛfaŋ shihilɛ ni hi Germany yɛ ta lɛ sɛɛ lɛ mli wa waa diɛŋtsɛ. Shi yɛ fɛɛ sɛɛ lɛ, Nyɔŋmɔ webii asafoi lɛ bɔi shweremɔ yɛ Germany maŋ lɛ mli fɛɛ. Buu Mɔɔ Asafo lɛ fee nɔ fɛɛ nɔ ni eeenyɛ ni ekɛwula wɔ kɛha shiɛmɔ nitsumɔ lɛ. Aje nitsumɔ ni atsuɔ yɛ Betel yɛ Magdeburg, ni Nazibii lɛ hã akpa tsumɔ lɛ shishi ekoŋŋ. Yɛ 1946 agbiɛnaa be mli lɛ, afɔ̃ mi nine akɛ mibatsu nii yɛ jɛmɛ, ni ahã mi nitsumɔ yɛ nihoomɔhe lɛ.

Agu Nitsumɔ lɛ, ni Miyaje Tsuŋwoo Mli Ekoŋŋ

Magdeburg yɛ Germany fã ni yaje Komunistbii lɛ akudɔmɔ shishi lɛ mli. Amɛtsĩ wɔ nitsumɔ lɛ naa yɛ August 31, 1950, ni amɛhã akpa nitsumɔ yɛ Magdeburg Betel lɛ. Nɛkɛ gbɛ nɔ tsɔ̃ ni mi-Betel sɔɔmɔ, ni bafee tsɔsemɔ be ni he yɔɔ sɛɛnamɔ waa lɛ, ba naagbee. Miku misɛɛ kɛtee Chemnitz, ni mitswa mifai shi waa yɛ Komunistbii lɛ anɔyeli shishi po akɛ mahiɛ anɔkwale lɛ mli waa, ni majaje Nyɔŋmɔ Maŋtsɛyeli lɛ akɛ adesai ni ehao lɛ ahiɛnɔkamɔ koome pɛ.

Yɛ April 1951 lɛ, mikɛ nyɛmi nuu ko fã gbɛ kɛtee Berlin koni wɔyaloo Buu-Mɔɔ. Beni wɔku wɔsɛɛ kɛba lɛ, wɔnaa kpɛ wɔhe waa kɛ gbeyeishemɔ beni wɔbana akɛ polisifoi ni wo maŋbii atadei ewo oketeke shidaamɔhe ni yɔɔ Chemnitz lɛ he ka lɛ. Eyɛ faŋŋ akɛ amɛmiikpa wɔ gbɛ, ni amɛmɔ̃mɔ̃ wɔ yɛ jɛmɛ amrɔ nɔŋŋ.

Beni wɔyashɛ tsuŋwoohe ni wɔmɛɔ koni aye wɔsane lɛ, no mli lɛ mihiɛ woji ni mãa nɔ mi akɛ Nazibii lɛ ewo mi tsuŋ aahu afii babaoo. No hewɔ lɛ, bulɔi lɛ jie bulɛ kpo amɛtsɔɔ mi. Yei bulɔi onukpai lɛ ateŋ mɔ kome kɛɛ: “Nyɛ Yehowa Odasefoi lɛ jeee gbɔmɛi fɔji; nyɛjeee mɛi ni esa akɛ awoɔ nyɛ tsuŋ.”

Be ko lɛ, eba mitsuŋwoohe bibioo lɛ mli, he ni mikɛ nyɛmimɛi yei krokomɛi enyɔ yɔɔ lɛ, ni ekɛ nɔ ko bawo saatsei lɛ ekome shishi yɛ teemɔŋ. Mɛni ji no? Lɛ diɛŋtsɛ e-Biblia, ni ekɛbahã wɔ. Be kroko hu lɛ, etee mifɔlɔi aŋɔɔ yɛ shia, ejaakɛ he ni amɛyɔɔ lɛ kɛ tsuŋwoohe lɛ jɛkɛɛɛ tsɔ̃. Eyahe Buu-Mɔɔ woji tɛtrɛbii lɛ ekomɛi kɛ niyenii, ni ekɛto egbɔmɔtso lɛ hé ni anaaa, ni ekɛ nɔ fɛɛ nɔ ju shi kɛba mitsuŋwoohe bibioo lɛ mli.

Nɔ kroko hu yɛ ni masumɔ ni makai. Bei komɛi, Hɔgbaa leebi lɛ, wɔlaa wɔ teokrase lalai lɛ waa aahu akɛ gbokɛlɛfoi krokomɛi lɛ kɛ miishɛɛ tswaa amɛdɛ kɛhaa lalai ni wɔlaa lɛ eko fɛɛ eko.

Hewalɛwoo kɛ Yelikɛbuamɔ ni Jɛ Yehowa Ŋɔɔ

Beni ayeɔ wɔ sane yɛ kojomɔ he lɛ yɛ September 4, 1951 mli lɛ, ni kojolɔ lɛ wie wiemɔi ni atsĩ tã yɛ sane nɛɛ shishijee lɛ. Miye be ni akɛwo mi tsuŋ lɛ yɛ Waldheim, no sɛɛ lɛ yɛ Halle, kɛ naagbee lɛ, yɛ Hoheneck. Nɔ kome loo nibii bibii enyɔ komɛi ni ba lɛ baatsɔɔ bɔ ni Nyɔŋmɔ ji abobaahe kɛ hewalɛ kɛha wɔ Yehowa Odasefoi, kɛ bɔ ni e-Wiemɔ lɛ wo wɔ hewalɛ ehã.

Yɛ Waldheim tsuŋwoohe lɛ, Odasefoi nyɛmimɛi yei lɛ fɛɛ buaa amɛhe naa daa yɛ asa kome nɔ, no hewɔ lɛ wɔnyɛɔ wɔfeɔ Kristofoi akpeei. Aŋmɛɛɛ gbɛ ni akɛ pɛnsil kɛ wolo aya asa lɛ nɔ, shi nyɛmimɛi yei lɛ ekomɛi ná mamai bibii komɛi, ni amɛbɔ mɔdɛŋ ni amɛtsara lɛ kakadaŋŋ bɔ ni sa, ni amɛŋma 1953 afi ŋmalɛ lɛ yɛ nɔ, ni ji akɛ: “Nyɛjaa Yehowa yɛ hewulamɔ krɔŋkrɔŋ mli.”—Lala 29:2, American Standard Version.

Yei bulɔi lɛ ateŋ mɔ kome bamɔ̃ wɔ trukaa, ni eyakɛɛ onukpai lɛ nɔŋŋ ni shishashaomɔ ko bɛ mli. Kɛkɛ ni tsuŋwoohe lɛ nɔkwɛlɔ lɛ ba ni ekɛɛ wɔ nyɛmimɛi yei lɛ ateŋ mɛi enyɔ akɛ amɛwo mama lɛ nɔ ni amɛhiɛ. Ni ebi akɛ: “Namɔ fee enɛ? Mɛni ji yiŋtoo hewɔ ni efee?”

Kulɛ nyɛmimɛi yei lɛ ekome miitao ni ewie akɛ lɛ efee koni akɛ shwamɔ lɛ afɔ̃ enɔ, shi wɔwie ablɛbi yɛ wɔteaŋ oya nɔŋŋ, kɛkɛ ni wɔkpɛlɛ nɔ akɛ esa akɛ wɔhã ehe sɔ̃ lɛ akã wɔ fɛɛ wɔnɔ. No hewɔ lɛ, wɔha hetoo akɛ: “Wɔfee koni wɔkɛwo wɔ hemɔkɛyeli hewalɛ.” No hewɔ lɛ ashɔ̃ mama ni wɔŋma nii yɛ nɔ nɛɛ yɛ wɔdɛŋ, ni ahaaa wɔ niyenii akɛ wɔ toigbalamɔ. Shi beni sanegbaa lɛ yaa nɔ lɛ mli fɛɛ lɛ, nyɛmimɛi yei lɛ wó mama lɛ nɔ waa, no hewɔ lɛ ehã ŋmalɛ ni woɔ mɔ hewalɛ waa nɛɛ ka wɔjwɛŋmɔ mli.

Beni aŋã yei atsuŋwoohe ni yɔɔ Waldheim lɛ, ajie wɔ, nyɛmimɛi yei lɛ kɛtee Halle. Aŋmɛɔ wɔ gbɛ yɛ biɛ ni wɔnine shɛɔ jatsũi bibii anɔ, ni mɛni po akpɛ awo tokotai ni mitsɛ kɛmaje mi lɛ mli? Buu-Mɔɔ mli nikasemɔi! Mikaiɔ nɔ ni hiɛ saneyitsei tamɔ “Anyɛɔ Atsũɔ Anɔkwa Suɔmɔ He Nii Diɛŋtsɛ” kɛ “Amale Kɛ Gbele Ba” lɛ waa lolo. Enɛɛmɛi kɛ saji krokomɛi ni aŋmala lɛ bafee saji ni yɔɔ miishɛɛ waa diɛŋtsɛ, ni kɛ ejɛ mɔ kome ŋɔɔ kɛtee mɔ kroko ŋɔɔ yɛ teemɔŋ lɛ, mɔ fɛɛ mɔ ŋmalaa emli otii lɛ ewoɔ wolo mli ehaa ehe.

Beni amɛbatutua wɔ be ko lɛ, bulɔi lɛ ekome na otii ni miŋmala miha mihe, ni mikɛto mi tsatsa bɛle lɛ mli lɛ. Sɛɛ mli lɛ, etsɛ mi koni ebi mi saji, ni ekɛɛ mi akɛ eesumɔ waa ni ele nɔ ni saneyitso ni ji “Hegbɛi ni Yɔɔ Kɛha Mɛi ni Sheɔ Yehowa Gbeyei lɛ yɛ 1955 Mli” lɛ shishinumɔ ji diɛŋtsɛ. Lɛ, ni eji Komunistnyo lɛ, ehao waa yɛ ehiɛnyiɛlɔ Stalin gbele ni ba yɛ afi 1953 mli lɛ he, ni etamɔ nɔ ni ebɛ hiɛnɔkamɔ ko kɛha wɔsɛɛ. Shi wɔ lɛ, hiɛyaa baaba yɛ shihilɛ ni wɔyɔɔ mli yɛ tsuŋwoohe lɛ gbɛfaŋ, yɛ wɔsɛɛ, shi mileee enɛ yɛ nakai beaŋ. Mikɛ hekɛnɔfɔɔ tsɔɔ mli faŋŋ akɛ gbɛkpamɔi ni Yehowa Odasefoi yɔɔ lɛ ji nɔ ni hi fe fɛɛ. Mɛni hewɔ? Mitsɛ wiemɔi asɛɛ kɛjɛ ŋmalɛ ni nikasemɔ lɛ damɔ nɔ lɛ mli, ni ji Lala 112:7, akɛ: “Esheŋ efɔŋ he adafitswai gbeyei: eyɛ tsui, ekɛ ehiɛ fɔ̃ɔ Yehowa nɔ.”—AS.

Yehowa Tee Nɔ Efee Mibobaahe kɛ Mihewalɛ

Hela ko ni mli wa waa ni mɔ̃ mi hewɔ lɛ, ajie mi kɛjɛ tsuŋwoo mli yɛ March 1957, ni ji afii enyɔ dani be ni sa akɛ ajie mi lɛ shɛ. East Germany onukpai lɛ kɛ nɔnyɛɛ ba minɔ ekoŋŋ, yɛ nii ni mitsuɔ yɛ Yehowa sɔɔmɔ mli lɛ hewɔ. No hewɔ lɛ, yɛ May 6, 1957 lɛ, miŋɔ hegbɛ lɛ ni mikɛjo foi kɛtee West Berlin, ni mijɛ jɛmɛ kɛtee West Germany.

Afii babaoo ho dani mina gbɔmɔtsoŋ hewalɛ jogbaŋŋ. Shi miyɛ mumɔŋ niyenii he tsinebaa kpakpa aahu kɛbashi ŋmɛnɛ, ni mikɛ miishɛɛ kpaa Buu-Mɔɔ heei sɔrɔtoi ni baa lɛ eko fɛɛ eko gbɛ. Mipɛiɔ mishihilɛ mli mikwɛɔ yɛ be kɛ bei amli. Ani mijwɛŋmɔ yɛ mumɔŋ nibii anɔ waa lolo? Ani miná subaŋi kpakpai? Ani mihemɔkɛyeli he kaa lɛ bafeɔ yijiemɔ kɛ hiɛnyamwoo kɛhaa Yehowa? Oti ni mã mihiɛ ji ni masa Nyɔŋmɔ hiɛ yɛ nibii fɛɛ mli, koni eya nɔ efee mibobaahe kɛ mihewalɛ kɛya naanɔ.

[Shishigbɛ niŋmai]

[Mfoniri ni yɔɔ baafa 26]

SS ɔfis yɛ Ravensbrück

[He ni Mfoniri ni yɔɔ baafa 26 lɛ Jɛ]

Ŋwɛigbɛ: Stiftung Brandenburgische Gedenkstätten

[Mfoniri ni yɔɔ baafa 26]

Migbɛŋmɛɛ wolo ni mikɛjeɔ kpo kɛyatsuɔ nii yɛ ŋsara lɛ sɛɛ