“Sanemlipɛimɔ Kojomɔ” lɛ Eji Tsɔ̃ɔmɔ ni Damɔ Biblia Nɔ?

OCTOBER 22, 1844 ji gbi ni gbɔmɛi ni amɛyifalɛ shɛɔ 50,000 ni yɔɔ United States Bokagbɛ Ŋshɔ lɛ naa lɛ kɛ ekãa kpa nɔ ko gbɛ waa diɛŋtsɛ. Amɛ mumɔŋ sɔlemɔ hiɛnyiɛlɔ William Miller ekɛɛ akɛ Yesu Kristo baaku esɛɛ eba nakai gbi lɛ nɔŋŋ nɔ. Millerbii, taakɛ atsɛɔ amɛ lɛ, mɛ yɛ amɛ kpeehei lɛ aahu kɛyashi jenamɔ wɛlɛŋŋ. Kɛkɛ ni gbi ni nyiɛ sɛɛ lɛ bashɛ, shi Nuntsɔ lɛ bako. Akɛni amɛ hiɛnɔkamɔ efee yaka hewɔ lɛ, amɛku amɛsɛɛ kɛtee shia, ni kɛjɛ no sɛɛ kɛyaa lɛ, amɛkaiɔ nakai gbi lɛ akɛ “Lakamɔ Kpeteŋkpele” lɛ.

Ni kɛlɛ, etsɛɛɛ ni lakamɔ lɛ hã aná hiɛnɔkamɔ. Obalayoo ko ni atsɛɔ lɛ Ellen Harmon kɔne Millerbii akuu fioo ko yiŋ akɛ Nyɔŋmɔ ejie kpo etsɔɔ lɛ yɛ ninaai amli akɛ be he akɔntaa ni amɛbu lɛ ja. Ehé eye akɛ nifeemɔ ko ni he hiaa waa etee nɔ nakai gbi lɛ—no mli lɛ Kristo ebote “ŋwɛi hekrɔŋkrɔŋ lɛ mli hekrɔŋkrɔŋ fe fɛɛ” lɛ.

No sɛɛ nɔ ni fe afii 10 lɛ, Adventist shiɛlɔ James White (ni kɛ Ellen Harmon ebote gbalashihilɛ mli lɛ) to wiemɔ kuku ko he gbɛjianɔ koni ekɛtsɔɔ bɔ ni Kristo nitsumɔ lɛ ji kɛjɛ October 1844 lɛ mli. White kɛɛ yɛ January 29, 1857 Review and Herald lɛ mli akɛ, Yesu eje “sanemlipɛimɔ kojomɔ” ko shishi. Ni enɛ etee nɔ efee shishitoo hemɔkɛyeli ko yɛ gbɔmɛi aaafee akpekpei kpawo ni tsɛɔ amɛhe Seventh-Day Adventistbii lɛ ateŋ.

Shi kɛlɛ, woloŋlelɔi komɛi ni abuɔ amɛ ni amɛyɔɔ Seventh-Day Adventist (SDA) Sɔlemɔ lɛ mli lɛ etee nɔ amɛsusu kɛ́ “sanemlipɛimɔ kojomɔ” lɛ ji tsɔ̃ɔmɔ ni damɔ Biblia nɔ lɛ he. Mɛni hewɔ amɛsusuɔ saji ahe ekoŋŋ lɛ? Kɛ́ Seventh-Day Adventistnyo ji bo lɛ, sanebimɔ nɛɛ baakɔ ohe. Shi klɛŋklɛŋ lɛ, mɛni ji “sanemlipɛimɔ kojomɔ”?

Mɛni Ni?

Ŋmalɛ ni akɛ he fɔɔ nɔ waa ni atsɛɔ sɛɛ akɛfiɔ tsɔ̃ɔmɔ nɛɛ sɛɛ ji Daniel 8:14. Ekaneɔ akɛ: “Ekɛɛ mi akɛ, Kɛyashi gbii akpei enyɔ kɛ ohai etɛ; no sɛɛ dani abaatsuu hekrɔŋkrɔŋ lɛ he.” (King James Version) Yɛ wiemɔ kuku ni ji “no sɛɛ dani abaatsuu hekrɔŋkrɔŋ lɛ he” (wɔma efã ko nɔ mi.) lɛ hewɔ lɛ, Adventistbii pii kɛ nɛkɛ kuku nɛɛ tsáa 3 Mose wolo lɛ yitso 16 lɛ. Ewieɔ hekrɔŋkrɔŋ ni Yuda osɔfonukpa lɛ tsuuɔ he yɛ Kpatamɔ Gbi lɛ nɔ lɛ he. Amɛkɛ Daniel wiemɔ lɛ hu tsáa Hebribii awolo lɛ yitso 9 ni wieɔ Yesu he akɛ Osɔfonukpa Kpeteŋkpele ni yɔɔ ŋwɛi lɛ. SDA woloŋlelɔ ko kɛɛ akɛ nɛkɛ sane hesusumɔ nɛɛ damɔ “ŋmalɛ ni yeɔ sane he odase” nifeemɔ gbɛ lɛ nɔ. Mɔ ko naa “wiemɔ ko tamɔ hekrɔŋkrɔŋ yɛ Dan. 8:14, nakai wiemɔ lɛ nɔŋŋ yɔɔ 3 Mose wolo lɛ yitso 16, nakai wiemɔ lɛ nɔŋŋ hu yɔɔ Heb. 7, 8, 9,” ni emuɔ sane naa “akɛ amɛ fɛɛ amɛmiiwie nɔ kome too lɛ nɔŋŋ he.”

Adventistbii lɛ susuɔ sane he nɛkɛ akɛ: Blema Israel osɔfoi lɛ kɛ amɛhe wo daa gbi sɔɔmɔ nitsumɔ ko mli yɛ sɔlemɔtsu lɛ mligbɛ he ko ni atsɛɔ lɛ akɛ Krɔŋkrɔŋ lɛ ni haa anáa eshaifaa lɛ mli. Yɛ Kpatamɔ Gbi lɛ nɔ lɛ, osɔfonukpa lɛ kɛ ehe woɔ daa afi sɔɔmɔ nitsumɔ ko mli yɛ Hekrɔŋkrɔŋ Fe Fɛɛ lɛ (sɔlemɔtsu lɛ mligbɛ tɔ̃ɔ lɛ) ni haa agbeɔ eshai lɛ mli. Amɛmuɔ sane naa akɛ, Kristo osɔfoyeli sɔɔmɔ nitsumɔ yɛ ŋwɛi lɛ hiɛ fãi enyɔ. Klɛŋklɛŋ nɔ lɛ je shishi kɛ eŋwɛi yaa yɛ klɛŋklɛŋ afii 100 lɛ mli, ni eba naagbee yɛ 1844, ni no ha ana eshaifaa. Nɔ ni ji enyɔ, loo “kojomɔ fã” lɛ je shishi yɛ October 22, 1844, ni eeya nɔ lolo, ni ebaaha agbe eshai. Mɛɛ gbɛ nɔ atsɔɔ atsuɔ enɛ he nii?

Kɛjɛ 1844 kɛbaa lɛ, akɛɛ Yesu miipɛi mɛi fɛɛ ni kɛɔ akɛ heyelilɔi ji amɛ lɛ ashihilɛ mli nifeemɔi amli (klɛŋklɛŋ lɛ gbohii lɛ anɔ̃, no sɛɛ lɛ mɛi ni hiɛ kamɔ lɛ) koni ekɛle akɛ amɛsa naanɔ walanamɔ lo. Nɛkɛ niiamlipɛimɔ nɛɛ ji “sanemlipɛimɔ kojomɔ” lɛ. Kɛ akojo gbɔmɛi nɛkɛ agbe naa lɛ, agbeɔ mɛi ni yeɔ kaa nɛɛ mli kunim lɛ ahe eshai lɛ kɛjɛɔ woji ni amɛ tsutsu saji yɔɔ mli lɛ amli. Shi, Ellen White tsɔɔ mli akɛ, ‘abaagbe’ mɛi ni yeee kaa lɛ mli kunim lɛ ‘agbɛi kɛjɛ wala wolo lɛ mli.’ No hewɔ lɛ, “no mli lɛ átsɔɔ nɔ ni baaba mɛi fɛɛ nɔ akɛ wala loo gbele.” Kɛbashi jɛmɛ atsuuɔ ŋwɛi hekrɔŋkrɔŋ lɛ he ni Daniel 8:14 baa mli. Enɛ ji nɔ ni Seventh-Day Adventistbii tsɔ̃ɔ. Shi, SDA wolo ni ji Adventist Review lɛ kpɛlɛɔ nɔ akɛ: “Wiemɔ ni ji sanemlipɛimɔ kojomɔ lɛ bɛ Biblia lɛ mli.”

Wiemɔ Tsaramɔ Nɔ ko ni Elaaje

Nɛkɛ tsɔ̃ɔmɔ nɛɛ egba Adventistbii komɛi anaa. Niiamlipɛilɔ ko kɛɛ, “yinɔsane tsɔɔ akɛ, hiɛnyiɛlɔi anɔkwafoi ni yɔɔ wɔkuu lɛ mli lɛ epiŋ yɛ yiŋfutumɔ hewɔ, yɛ be mli ni amɛsusuɔ sanemlipɛimɔ kojomɔ he tsɔ̃ɔmɔ ni wɔkɛhaa yɛ bɔ ni wɔ kusum tsɔɔ lɛ naa lɛ.” Yɛ nyɛsɛɛ afii nɛɛ amli lɛ, ekɛfata he akɛ, piŋmɔ lɛ batsɔ yiŋkɔshikɔshifeemɔ yɛ be mli ni woloŋlelɔi bɔi “akulashiŋi babaoo ni kɔɔ daa hekrɔŋkrɔŋ lɛ shiɛmɔ he sanebimɔ lɛ.” Nyɛhaa wɔpɛia emli enyɔ komɛi amli wɔkwɛa.

Klɛŋklɛŋ akulashiŋ: akɛ Daniel yitso 8 lɛ tsáa 3 Mose wolo lɛ yitso 16 lɛ. Naagbai wuji enyɔ fiteɔ nɛkɛ sane nɔdaamɔ nɔ nɛɛ—wiemɔ kɛ emli wiemɔi kukuji lɛ. Klɛŋklɛŋ lɛ, susumɔ wiemɔ lɛ he. Adventistbii heɔ yeɔ akɛ ‘hekrɔŋkrɔŋ ni atsuu he’ lɛ ni yɔɔ Daniel wolo lɛ yitso 8 lɛ ji ‘hekrɔŋkrɔŋ ni atsuu he’ lɛ ni yɔɔ 3 Mose wolo lɛ yitso 16 lɛ he gbalɛ mlibaa. Etamɔ nɔ ni wiemɔ shishitsɔɔlɔi kpɛlɛ wiemɔ ni je amɛhe nɛɛ anɔ kɛyashi be mli ni amɛkase akɛ, “átsuu he” ni yɔɔ King James Version lɛ mli lɛ ji Hebri feemɔ-wiemɔ tsa·daqʹ (ni eshishi ji “ni aaatsɔ̃ jalɔ”) ni akɛtsu nii yɛ Daniel 8:14 lɛ ni átsɔɔ shishi yɛ gbɛ ni ejaaa nɔ. Nyɔŋmɔ jamɔ he nilelɔ, Anthony A. Hoekema wie akɛ: “Eji dɔlɛ sane akɛ abatsɔɔ nakai wiemɔ lɛ shishi akɛ atsuu he, ejaakɛ akɛ Hebri feemɔ-wiemɔ ni bei pii lɛ atsɔɔ shishi akɛ átsuu he [ta·herʹ] lɛ tsuuu nii yɛ biɛ kwraa.”a Akɛtsu nii yɛ 3 Mose wolo lɛ yitso 16, he ni King James Version lɛ tsɔɔ ta·herʹ sɔrɔtoi lɛ ashishi akɛ “ní atsuu he” kɛ “he atse” hewɔ. (3 Mose 16:19, 30) No hewɔ lɛ, Dr. Hoekema mu sane naa jogbaŋŋ akɛ: “Eji no mli lɛ Daniel miisumɔ ni ewie hetsuumɔ krɛdɛɛ ko ni akɛtsu nii yɛ Kpatamɔ Gbi lɛ nɔ lɛ he kulɛ, ekɛ taheer [ta·herʹ] baatsu nii moŋ fe tsadhaq [tsa·dhaqʹ].” Ni kɛlɛ, tsa·dhaqʹ bɛ 3 Mose wolo lɛ mli, ni ta·herʹ bɛ Daniel wolo lɛ mli. Wiemɔ tsaramɔ nɔ lɛ elaaje.

Emli Sane lɛ Jieɔ lɛ Kpo?

Agbɛnɛ susumɔ emli sane lɛ he okwɛ. Adventistbii tsɔɔ akɛ Daniel 8:14 “sane lɛ shishinumɔ etse ehe banee,” ni ekɛ kukuji ni tsɔ hiɛ lɛ bɛ nɔ ko kwraa feemɔ. Shi ani nɔ ko ni tamɔ nakai baa ojwɛŋmɔ mli beni okaneɔ Daniel 8:9-14 yɛ akrabatsa ni fata he ni yitso ji “Shishinumɔ ni Yɔɔ Daniel 8:14 Sɛɛ” lɛ? Kuku 9 yɔseɔ tutualɔ ko ni ji akolonto bibioo ko. Kukuji 10-12 jieɔ lɛ kpo akɛ tutualɔ nɛɛ baatutua hekrɔŋkrɔŋ lɛ. Kuku 13 biɔ akɛ, ‘Mɛɛ beyinɔ nɔŋŋ tutuamɔ lɛ aaakã he kɛyashi?’ Ni kuku 14 haa hetoo akɛ: “Kɛyashi jenamɔi kɛ jetsɛremɔi akpei-enyɔ kɛ ohai-etɛ, dani aaasaa hekrɔŋkrɔŋ lɛ.” Eyɛ faŋŋ akɛ, kuku 13 teeɔ sanebimɔ ko ni aha hetoo yɛ kuku 14 lɛ shi. Nyɔŋmɔ jamɔ he nilelɔ Desmond Ford kɛɛ: “Kɛ aaajie Dan. 8:14 kɛaajɛ bolɔmɔ [“Mɛɛ beyinɔ nɔŋŋ?” kuku 13] nɛɛ he lɛ, ebaatsɔɔ akɛ ayɛ ŋshɔ hiɛ ni abɛ sɛkɛ ni aleee nɔ hewɔ.”b

Mɛni hewɔ Adventistbii lɛ jieɔ kuku 14 lɛ kɛjɛɔ shishinumɔ ni yɔɔ sɛɛ lɛ mli lɛ? Bɔni afee ni amɛkwa sane naamuu ni egba afa. Emli sane lɛ tsɔɔ akɛ hekrɔŋkrɔŋ lɛ bulemɔ, ni atsĩ tã yɛ kuku 14 lɛ jɛ akolonto bibioo lɛ nifeemɔi. Shi kɛlɛ, “sanemlipɛimɔ kojomɔ” tsɔ̃ɔmɔ lɛ tsɔɔ akɛ hekrɔŋkrɔŋ lɛ bulemɔ lɛ jɛ Kristo nifeemɔi. Akɛɔ akɛ ekɛ heyelilɔi lɛ ahe eshai lɛ yaa ŋwɛi hekrɔŋkrɔŋ lɛ. No hewɔ lɛ mɛni baa, kɛ Adventistbii lɛ kpɛlɛ tsɔ̃ɔmɔ lɛ kɛ shishinumɔ ni yɔɔ sɛɛ lɛ hu nɔ? Dr. Raymond F. Cottrell, Seventh-Day Adventistnyo ni tsutsu ko lɛ efata he kɛŋmaa SDA Bible Commentary lɛ ŋma akɛ: “Kɛ wɔkwa wɔlaka wɔhe akɛ shishitsɔɔmɔ ni SDA lɛ kɛba lɛ pɛiɔ Daniel 8:14 lɛ mli yɛ shishinumɔ ni yɔɔ sɛɛ lɛ naa lɛ, belɛ, kɛtsɔ no nɔ lɛ abaayɔse akolonto bibioo lɛ akɛ Kristo.” Dr. Cottrell kpɛlɛ nɔ yɛ anɔkwale mli akɛ: “Wɔnyɛŋ wɔkɛ shishinumɔ ni yɔɔ sɛɛ lɛ kɛ shishitsɔɔmɔ ni Adventistbii kɛha lɛ fɛɛ atsu nii.” No hewɔ lɛ, yɛ “sanemlipɛimɔ kojomɔ” lɛ gbɛfaŋ lɛ, esa akɛ Adventist Sɔlemɔ lɛ ahala nɔ ni esumɔɔ—amɛkpɛlɛ tsɔ̃ɔmɔ lɛ loo shishinumɔ ni yɔɔ Daniel 8:14 sɛɛ lɛ nɔ. Mɔbɔ sane ji akɛ, ekpɛlɛ tsutsu nɔ̃ lɛ nɔ ni eŋmɛɛ sɛɛkpee nɔ̃ lɛ he. Ebɛ naakpɛɛ akɛ Dr. Cottrell kɛɛ akɛ Biblia kaselɔi ni atsɔɔ amɛ nii lɛ kɛ shwamɔ fɔ̃ɔ Adventistbii lɛ anɔ yɛ nɔ ni “bɛ Ŋmalɛ lɛ mli” kwraa ni “amɛkaneɔ amɛwoɔ Ŋmalɛ lɛ mli” lɛ hewɔ!

Yɛ 1967 lɛ, Dr. Cottrell to hejɔɔmɔ gbi skul nikasemɔ ni kɔɔ Daniel wolo lɛ he lɛ he gbɛjianɔ, ni akɛyaha SDA sɔlemɔi ni yɔɔ jeŋ fɛɛ lɛ. Etsɔɔ akɛ Daniel 8:14 kɔɔ shishinumɔ ni yɔɔ sɛɛ lɛ he, ni ákɛ, jeee heyelilɔi ahe ‘niiahetsuumɔ’ lɛ wieɔ. Nɔ ni sa kadimɔ ji akɛ, nikasemɔ lɛ jie “sanemlipɛimɔ kojomɔ” tã ni atsĩ lɛ kɛjɛ mli kwraa.

Hetoohamɔi Komɛi ni Sa Kadimɔ

Te le ni Adventistnyo lɛ le jogbaŋŋ akɛ nɛkɛ akulashiŋ nɛɛ mli waaa kwraa bɔ ni eeenyɛ efi “sanemlipɛimɔ kojomɔ” tsɔ̃ɔmɔ lɛ sɛɛ lɛ yɔɔ ha tɛŋŋ? Dr. Cottrell bi Adventist jamɔ he nilelɔi lɛ ateŋ hiɛnyiɛlɔi 27 lɛ akɛ, ‘Mɛɛ yiŋtoi ni tsɔɔ nɔ̃ wiemɔ loo shishinumɔ ni yɔɔ sɛɛ nyɛbaanyɛ nyɛkɛha ni tsɔɔ tsakpaa ni kã Daniel wolo lɛ yitso 8 kɛ 3 Mose wolo lɛ yitso 16 lɛ teŋ?’ Mɛni ji hetoo ni amɛkɛha?

“Gbɔmɛi nyɔŋmai enyɔ kɛ kpawo lɛ fɛɛ ma wiemɔ ni bɛ loo yiŋtoi ni tsɔɔ shishinumɔ ni yɔɔ sɛɛ ni bɛ ni baaha akɛ Dan. 8:14 ato nɔ ni akɛ kpatamɔ gbi lɛ fee he mfoniri kɛ sanemlipɛimɔ kojomɔ he lɛ nɔ mi.” Ebi amɛ akɛ, ‘Ani nyɛyɛ yiŋtoi krokomɛi hu hewɔ ni nyɛkɛ enɛ tsáa no lɛ?’ Adventist woloŋlelɔi lɛ ateŋ mɛi pii kɛɛ akɛ amɛbɛ yiŋtoi krokomɛi, mɛi enumɔ ha hetoo akɛ amɛkɛ enɛ tsá, ejaakɛ Ellen White hu fee nakai, ni mɛi enyɔ kɛɛ akɛ amɛkɛ tsɔ̃ɔmɔ lɛ damɔ “nɔ ko ni jie ehe kpo trukaa ni hi” yɛ wiemɔ shishitsɔɔmɔ mli lɛ nɔ. Nyɔŋmɔ jamɔ he nilelɔ Ford kɛɛ: “Saji anaa ni amu tamɔ nɛkɛ ni wɔ woloŋlee ni hi fe fɛɛ lɛ kɛha lɛ maa nɔ mi yɛ nakai gbɛ nɔ akɛ, anyɛŋ awie nɔ ko ni akɛfã wɔ blema tsɔ̃ɔmɔ ni kɔɔ Dan. 8:14 he lɛ he.”

Ani Abaaná Yelikɛbuamɔ ko Kɛjɛ Hebribii Awolo lɛ Mli?

Akulashiŋ ni ji enyɔ: Akɛ Daniel 8:14 etsa Hebribii yitso 9. Nyɔŋmɔ jamɔ he nilelɔ Ford kɛɛ: “Nitsumɔi ni wɔtsu yɛ mra be mli lɛ fɛɛ kɛ Heb. 9 lɛ tsuɔ nii waa yɛ be mli ni atsɔɔ Dan. 8:14 shishi lɛ.” “Lakamɔ Kpeteŋkpele” lɛ sɛɛ kwraa ni tsakpaa nɛɛ je shishi yɛ 1844. Beni Millernyo Hiram Edson taoɔ gbɛtsɔɔmɔ lɛ, eŋmɛɛ e-Biblia lɛ he efɔ̃ okpɔlɔ ko nɔ bɔni afee ni ejɛ nɔ egbee shi koni emli agbele. Mɛni jɛ mli ba? Hebribii awolo lɛ yitsei 8 kɛ 9 naa gbele yɛ ehiɛ. Ford kɛɛ: “Mɛni po baanyɛ afee nɔ ni sa jogbaŋŋ ni baafee nɔ ni Adventistbii lɛ kɛɔ akɛ nɛkɛ yitsei nɛɛ hiɛ 1844 kɛ Dan. 8:14 he shishinumɔ lɛ ahe okadi!”

Dr. Ford kɛfata he yɛ ewolo ni ji Daniel 8:14, the Day of Atonement, and the Investigative Judgment lɛ mli akɛ: “Nakai sanejajemɔ lɛ he hiaa Seventh-day Adventistbii lɛ waa. Heb. 9 . . . pɛ mli abaanyɛ ana . . . hekrɔŋkrɔŋ lɛ he tsɔ̃ɔmɔ ni he hiaa wɔ waa lɛ shishitsɔɔmɔ fitsofitso yɛ.” Hɛɛ, Hebribii awolo yitso 9 ji yitso lɛ ni yɔɔ “Kpaŋmɔ Hee” lɛ mli ni baatsɔɔ 3 Mose wolo lɛ yitso 16 lɛ gbalɛ naa shishitsɔɔmɔ lɛ mli. Shi Adventistbii kɛɔ hu akɛ, Daniel 8:14 ji kuku lɛ ni yɔɔ “Kpaŋmɔ Momo” lɛ mli lɛ ni feɔ nakai. Kɛ wiemɔi enyɔ lɛ fɛɛ ji anɔkwale lɛ, belɛ tsakpaa ko kã Hebribii awolo lɛ yitso 9 kɛ Daniel wolo lɛ yitso 8 lɛ teŋ hu.

Desmond Ford kɛɛ: “Nibii komɛi jeɔ kpo faŋŋ, amrɔ nɔŋŋ ni mɔ ko aaakane Heb. 9 lɛ. Daniel wolo lɛ he ni awieɔ yɛ gbɛ ko nɔ bɛ, ni eka shi faŋŋ akɛ eko kwraa bɛ kɛha Dan. 8:14. . . . Yitso muu lɛ fɛɛ ji 3 Mose 16 kɛ nitsumɔ.” Ekɛɛ: “Anyɛŋ ana wɔ hekrɔŋkrɔŋ lɛ he tsɔ̃ɔmɔ lɛ yɛ Kpaŋmɔ Hee lɛ wolo lɛ pɛ ni wieɔ nɔ ni hekrɔŋkrɔŋ lɛ sɔɔmɔ nitsumɔi lɛ tsɔɔ lɛ mli. Adventist niŋmalɔi ni ale amɛ waa ni yɔɔ jeŋ fɛɛ lɛ ekpɛlɛ enɛ nɔ.” No hewɔ lɛ, akulashiŋ ni ji enyɔ lɛ hu mli waaa kwraa bɔ ni eeenyɛ efi tsɔ̃ɔmɔ ni naagba eba he lɛ sɛɛ.

Shi kɛlɛ, sane naamuu nɛɛ jeee nɔ̃ hee. Dr. Cottrell kɛ afii pii ekɛɛ akɛ, “Sɔlemɔ lɛ mli Biblia he nilelɔi lɛ ebana amɛle naagbai ni akɛtsɔɔ nibii anaa ni Daniel 8:14 kɛ Hebribii 9 lɛ shishitsɔɔmɔ ni wɔkɛhaa yɛ wɔ blemasaji anaa lɛ kɛkpeɔ lɛ jogbaŋŋ.” Aaafee afii 80 ni eho nɛ lɛ, Seventh-Day Adventistnyo E. J. Waggoner ni le nii waa lɛ ŋma akɛ: “Adventistbii atsɔ̃ɔmɔ ni kɔɔ Hekrɔŋkrɔŋ lɛ kɛ ‘Esanemlipɛimɔ Kojomɔ’ he lɛ . . . , ji kpatamɔ lɛ kpoomɔ.” (Confession of Faith) Nɔ ni fe afii 30 ni eho nɛ lɛ, akɛ naagbai ni tamɔ nɛkɛ yaha Gwabɔɔ Kpeteŋkpele lɛ, ni ji SDA Sɔlemɔ lɛ hiɛnyiɛmɔ.

Naagbai kɛ Shihilɛ ko ni Anyɛɛɛ Aje Mli

Gwabɔɔ Kpeteŋkpele lɛ hala ‘Daniel Wolo lɛ Mli Naagbai ahe Ajinafoi Akuu.’ Afee koni eŋma amaniɛbɔɔ ni kɔɔ bɔ ni aaafee ana Daniel 8:14 he naagbai ni ete shi lɛ anaa tsabaa. Ajinafoi akuu lɛ mli bii 14 lɛ kɛ afii enumɔ kase sanebimɔ lɛ he nii, shi amɛnyɛɛɛ amɛfee ekome ni amɛkɛ enɛ naa tsabaa aha. Yɛ 1980 lɛ, ajinafoi akuu lɛ mlinyo ni ji Cottrell kɛɛ akɛ ajinafoi akuu lɛ mli bii babaoo nu he akɛ, “abaanyɛ akɛ” shishitsɔɔmɔ ni Adventistbii lɛ kɛhaa Daniel 8:14 lɛ “ama shi yɛ omanyeyeli mli” kɛtsɔ “susumɔi ni akɛbaa” nɔ, ni ákɛ “esa akɛ hiɛ akpa” naagbai lɛ “anɔ.” Ekɛfata he akɛ: “Kaimɔ akɛ, ajinafoi akuu lɛ gbɛi ji Daniel Wolo lɛ Mli Naagbai ahe Ajinafoi Akuu, ni amɛteŋ mɛi pii miitsɔɔ akɛ wɔhiɛ akpa naagbai lɛ anɔ ni wɔkakɛɛ nɔ ko yɛ he.” Nakai feemɔ baatsɔɔ “kpɛlɛmɔ ni wɔkpɛlɛ akɛ wɔbɛ hetooi ko kwraa ni wɔkɛbaaha.” No hewɔ lɛ, mɛi fioo lɛ sumɔɔɔ ni amɛfĩɔ jwɛŋmɔ ni mɛi babaoo lɛ hiɛ lɛ sɛɛ, ni abɔɔɔ ehe amaniɛ ko ni abaanyɛ ale. Tsɔ̃ɔmɔ lɛ he naagbai lɛ tee nɔ efee nɔ ni anako naa.

Beni Dr. Cottrell wieɔ shihilɛ ni anyɛɛɛ aje mli nɛɛ he lɛ, ekɛɛ: “Wɔhiɛ sane ni atee lɛ shi yɛ Daniel 8:14 lɛ mli lolo ejaakɛ kɛjɛ jeeŋmɔ lɛ wɔsumɔɔɔ ni wɔkɛ anɔkwale ni tsɔɔ akɛ naagba ni tsɔɔ sane mli diɛŋtsɛ yɛ lɛ kpeɔ. Nakai sane ni atee lɛ shi lɛ shiŋ wɔ, shii abɔ ni wɔyaa nɔ wɔfeɔ tamɔ nɔ ni naagba ko bɛ, shii abɔ ni wɔmaa nɔ mi akɛ wɔɔhiɛ wɔyitsei amli akɛ aŋkroaŋkro kɛ kuu fɛɛ, yɛ wɔyiŋ ni wɔtsɔ hiɛ wɔkpɛ momo lɛ naa lɛ.”—Spectrum, wolo ni Association of Adventist Forums ŋma.

Dr. Cottrell woɔ Adventistbii ahewalɛ koni “amɛpɛi susumɔi bibii ni tsɔɔ akɛ nɔ ko ja lɛ, kɛ shishitoo mlai ni tsɔɔ sane mli ni wɔkɛ wɔ shishitsɔɔmɔ edamɔ nɔ lɛ mli ekoŋŋ—kɛha Adventistnyo feemɔ—Ŋmalɛ mli wiemɔ ni anyɛŋ aku hiɛ afɔ nɔ.” Wɔbaawo Adventistbii ahewalɛ koni amɛpɛi tsɔ̃ɔmɔ ni kɔɔ “sanemlipɛimɔ kojomɔ” he lɛ mli, koni amɛna kɛji ekulashiŋi lɛ damɔ Biblia lɛ nɔ shiŋŋ loo edamɔ blemasaji ashishitoo ni bɛ shiŋŋ lɛ nɔ.c Bɔfo Paulo jɛ nilee mli ewo hewalɛ akɛ: “Nyɛkaa nii fiaa nyɛkwɛa, ni nɔ ni hi lɛ nyɛmɔa mli.”—1 Tesalonikabii 5:21.

[Shishigbɛ niŋmai]

[Akrabatsa ni yɔɔ baafa 27]

Daniel 8:14 lɛ Mli Saji

DANIEL 8:9 “Ni akolonto kroko, bibioo ko, je kpo yɛ amɛteŋ ekome he, ni etee nɔ eda kpeteŋkpele diɛŋtsɛ kɛtee wuoyigbɛ kɛ hulushiteehe kɛ Shikpɔŋ Fɛfɛo lɛ nɔ. 10 Ni eda aahu kɛyashi ŋwɛi asafo lɛ he, ni etsirɛ asafo lɛ mli bii lɛ ekomɛi kɛ ŋulamii lɛ ekomɛi etswia shikpɔŋ, ni etee eyanaanaa amɛnɔ. 11 Ni ewo ehe nɔ kɛyashi asafo lɛ Lumɔ lɛ ŋɔɔ, ni ashɔ̃ daa gbi afɔle lɛ yɛ edɛŋ, ni atsi ehekrɔŋkrɔŋ shihilɛhe lɛ atswa shi. 12 Ni fiofio lɛ, aŋɔ asafo ko aha, kɛ daa gbi afɔle lɛ hu, yɛ mlatɔmɔ hewɔ; ni etee nɔ etsi anɔkwale lɛ etswa shikpɔŋ, ni efee, ni eshwere.

“13 Ni minu ni mɔ krɔŋkrɔŋ ko miiwie, ni mɔ krɔŋkrɔŋ kroko tee nɔ ekɛɛ mɔ kome lɛ ni wieɔ lɛ akɛ: ‘Mɛɛ beyinɔ nɔŋŋ daa gbi afɔle lɛ kɛ amaŋfɔfeemɔ mlatɔmɔ lɛ he ninaa lɛ aaakã he kɛyashi, ni aha hekrɔŋkrɔŋ lɛ kɛ asafo lɛ nibii lɛ anaanaa nɔ?’ 14 No hewɔ lɛ ekɛɛ mi akɛ: ‘Kɛyashi jenamɔi kɛ jetsɛremɔi akpei-enyɔ kɛ ohai-etɛ; ni akɛ hekrɔŋkrɔŋ lɛ baaba eshihilɛhe ni sa lɛ mli kɛ̃.’ ”—New World Translation of the Holy Scriptures.