Nyɔŋmɔ Wiemɔ lɛ Hiɔ Shi Kɛyaa Naanɔ
“Wɔ-Nyɔŋmɔ lɛ wiemɔ lɛ, ebaahi shi kɛya naanɔ.”—YESAIA 40:8, NW.
1. (a) Mɛni atsɔɔ yɛ biɛ akɛ “wɔ-Nyɔŋmɔ lɛ wiemɔ lɛ”? (b) Kɛ akɛ adesai ashiwoi to Nyɔŋmɔ wiemɔ lɛ he lɛ mɛni anaa?
ADESAI sumɔɔ ni amɛkɛ amɛhiɛ afɔ̃ hii kɛ yei ni ehe gbɛi lɛ ashiwoi anɔ. Shi yɛ bɔ ni nɛkɛ shiwoi nɛɛ baanyɛ afee nɔ ni sa yɛ gbɔmɛi ni sumɔɔ ni amɛya hiɛ yɛ amɛ shihilɛ mli lɛ ahiɛ lɛ fɛɛ sɛɛ lɛ, kɛ akɛ amɛ to wɔ-Nyɔŋmɔ lɛ wiemɔ lɛ he lɛ, amɛtamɔ fɔfɔii ni ŋalaa. (Lala 146:3, 4) Nɔ ni fe afii 2,700 ni eho nɛ ni Yehowa Nyɔŋmɔ kɛ mumɔ tsirɛ gbalɔ Yesaia koni eŋma akɛ: “Heloo fɛɛ lɛ jwɛi ni, ni ehefɛo lɛ fɛɛ tamɔ ŋanɔ fɔfɔi: . . . Jwɛi gbĩɔ, ni fɔfɔi hu ŋalaa: shi wɔ-Nyɔŋmɔ lɛ wiemɔ lɛ [baahi shi, NW] kɛaatee naanɔ!” (Yesaia 40:6, 8) Mɛni ji nakai “wiemɔ” ni hiɔ shi lɛ? No ji Nyɔŋmɔ wiemɔ ni kɔɔ eyiŋtoo he lɛ. Ŋmɛnɛ, wɔyɛ nakai “wiemɔ” ni áŋma lɛ yɛ Biblia lɛ mli.—1 Petro 1:24, 25.
2. Mɛɛ subaŋi kɛ nifeemɔi ahewɔ Yehowa ha ewiemɔ ni kɔɔ blema Israel kɛ Yuda he lɛ ba mli?
2 Gbɔmɛi ni hi shi yɛ blema Israel gbii lɛ amli lɛ ná anɔkwale ni yɔɔ nɔ ni Yesaia ŋma efɔ̃ shi lɛ mli lɛ mli niiashikpamɔ. Yehowa gba efɔ̃ shi kɛtsɔ egbalɔi lɛ anɔ akɛ, klɛŋklɛŋ lɛ akɛ Israel akutsei nyɔŋma maŋtsɛyeli lɛ, kɛ no sɛɛ lɛ Yuda akutsei enyɔ maŋtsɛyeli lɛ baaya nomŋɔɔ mli yɛ anɔkwa ni amɛyeee lɛ kwraa lɛ hewɔ. (Yeremia 20:4; Amos 5:2, 27) Eyɛ mli akɛ amɛwa Yehowa gbalɔi lɛ ayi, amɛgbegbee amɛ po, amɛshã wolokpo ni Nyɔŋmɔ kɔkɔbɔɔ he shɛɛ sane yɔɔ mli lɛ, ni amɛbi Mizraim koni ekɛ asraafoi abaye abua koni akaha gbalɛ lɛ miiba mli moŋ, shi Yehowa wiemɔ lɛ efeee efolo. (Yeremia 36:1, 2, 21-24; 37:5-10; Luka 13:34) Agbɛnɛ hu, shiwoo ni Nyɔŋmɔ kɛha akɛ ekɛ Yuda shwɛɛnii ni amɛtsake amɛtsui lɛ baaba amɛ shikpɔŋ nɔ ekoŋŋ lɛ ba mli yɛ naakpɛɛ gbɛ nɔ.—Yesaia, yitso 35.
3. (a) Mɛɛ shiwoi ni Yesaia ŋma efɔ̃ shi wɔyɔɔ he miishɛɛ titri? (b) Mɛni hewɔ oheɔ oyeɔ akɛ nɛkɛ nibii nɛɛ baaba mli lɛɛlɛŋ?
3 Yehowa gba efɔ̃ shi kɛtsɔ Yesaia hu nɔ akɛ abaatsɔ Mesia lɛ nɔ aye adesai anɔ yɛ jalɛ naa, abaaná kpɔmɔ kɛjɛ esha kɛ gbele mli, kɛ shikpɔŋ lɛ ni abaatsake lɛ afee lɛ paradeiso. (Yesaia 9:5, 6; 11:1-9; 25:6-8; 35:5-7; 65:17-25) Ani nɛkɛ nibii nɛɛ hu baaba mli? Ŋwanejee ko kwraa bɛ he! ‘Nyɔŋmɔ nyɛŋ emale.’ Eha aŋma egbalɛ wiemɔ lɛ afɔ̃ shi koni wɔna he sɛɛ, ni ékwɛ koni abaa yi.—Tito 1:2; Romabii 15:4.
4. Eyɛ mli akɛ abaaa shishijee Biblia ŋmalɛi lɛ ayi moŋ, shi mɛɛ gbɛ nɔ eji anɔkwale akɛ Nyɔŋmɔ wiemɔ lɛ “hiɛ kã”?
4 Yehowa ebaaa shishijee woji ni eblema niŋmalalɔi lɛ kɛ amɛniji ŋmala nakai gbalɛi lɛ amɛwo mli lɛ ayi. Shi ‘ewiemɔ’ ni ji eyiŋtoo ni éjaje etsɔɔ lɛ, etsɔɔ akɛ eji wiemɔ ni hiɛ kã. Nakai yiŋtoo lɛ yaa hiɛ ni nɔ ko kwraa etsĩii naa, ni beni efeɔ nakai lɛ, gbɔmɛi ni enɛ náa amɛ shihilɛi anɔ hewalɛ lɛ amligbɛ susumɔi kɛ kanyamɔi lɛ bajeɔ kpo faŋŋ. (Hebribii 4:12) Agbɛnɛ hu, yinɔsane ni aŋma afɔ̃ shi lɛ tsɔɔ akɛ ŋwɛi gbɛtsɔɔmɔ tsu Ŋmalɛi ni jɛ mumɔŋ lɛ ayibaamɔ kɛ shishitsɔɔmɔ diɛŋtsɛ lɛ he nii.
Beni Ekɛ Mɔdɛŋ ni Abɔ Koni Akɛtsĩmɔ Nɔ lɛ Kpe
5. (a) Mɛɛ mɔdɛŋ Siria maŋtsɛ ko bɔ koni ekpata Hebri Ŋmalɛi ni jɛ mumɔŋ lɛ hiɛ? (b) Mɛni hewɔ eyeee omanye?
5 Nɔyelɔi ebɔ mɔdɛŋ shii abɔ koni amɛfite niŋmalamɔi ni jɛ mumɔŋ lɛ. Yɛ 168 D.Ŋ.B. lɛ, Siria Maŋtsɛ Antiochus Epiphanes (ni áfee ehe mfoniri yɛ baafa 10 lɛ) ma afɔleshaa latɛ eha Dio yɛ sɔlemɔtsu ni ájɔɔ nɔ aha Yehowa lɛ mli. Etao ‘Mla woji lɛ’ hu, ni eshã nomɛi, ni ejaje etsɔɔ akɛ abaagbe mɔ fɛɛ mɔ ni yɔɔ Ŋmalɛi ni tamɔ nɛkɛ lɛ. Yɛ ekomekomei abɔ ni eshã yɛ Yerusalem kɛ Yudea fɛɛ lɛ sɛɛ lɛ, enyɛɛɛ etsĩmɔ Ŋmalɛi lɛ anɔ kwraa kɛmɔ shi. No mli lɛ Yudafoi amaji lɛ egbɛ eshwa shikpɔji pii anɔ, ni kpeehe fɛɛ kpeehe yɛ lɛ diɛŋtsɛ ewolokpoi ni abua naa.—Okɛto Bɔfoi lɛ Asaji 13:14, 15 he.
6. (a) Mɛɛ mɔdɛŋ abɔ waa diɛŋtsɛ koni akpata Ŋmalɛi ni mra be mli Kristofoi lɛ kɛtsu nii lɛ hiɛ? (b) Mɛni jɛ mli ba?
6 Yɛ 303 Ŋ.B. lɛ, Roma Nɔyelɔ Diocletian hu wo akpɔ koni akumɔ Kristofoi akpeehei ashwie shi koni ‘akɛ la ashã amɛ-Ŋmalɛi lɛ.’ Nakai niiahiɛkpatamɔ lɛ tee nɔ afii nyɔŋma. Eyɛ mli akɛ yiwaa lɛ naa wa waa moŋ, shi Diocletian yeee omanye yɛ Kristojamɔ shishibulemɔ mli, ni Nyɔŋmɔ eŋmɛɛɛ gbɛ hu koni nɔyelɔ lɛ nitsulɔi lɛ akpata E-Wiemɔ ni jɛ mumɔŋ lɛ fɛɛ ni aŋmala lɛ fã kome po hiɛ. Shi shitee-kɛ-wolɔi lɛ jie nɔ ni yɔɔ amɛtsuii amli lɛ kpo amɛtsɔɔ yɛ bɔ ni amɛfee amɛnii amɛha yɛ Nyɔŋmɔ Wiemɔ lɛ jaa kɛhamɔ kɛ shiɛmɔ lɛ naa. Amɛjie amɛhe kpo akɛ hii ni Satan eshwila amɛ ní amɛmiitsu esuɔmɔnaa nii ahe nii.—Yohane 8:44; 1 Yohane 3:10-12.
7. (a) Mɛɛ mɔdɛŋ abɔ koni akɛtsĩmɔ Biblia mli nilee lɛ gbɛɛ kɛ shwamɔ naa yɛ Europa anaigbɛ? (b) Mɛni atsu yɛ Biblia lɛ shishitsɔɔmɔ kɛ ekalamɔ mli?
7 Mɔdɛŋ ni abɔ koni atsĩ Biblia mli nilee lɛ gbɛɛ kɛ shwamɔ naa lɛ hu tee nɔ yɛ gbɛ̀i sɔrɔtoi anɔ. Beni Latin bafee wiemɔ ni awieee dɔŋŋ lɛ, jeee nɔyelɔi ni ji wɔŋjalɔi lɛ ji mɛi ni kɛ ekãa te shi amɛwo Biblia lɛ shishi ni atsɔɔ kɛyaa gbɔmɛi foji lɛ awiemɔi amli lɛ, shi moŋ mɛi ni tsɛɔ amɛhe Kristofoi—Paapa Gregory VII (1073-85) kɛ Paapa Innocent III (1198-1216)—ji mɛi ni fee nakai. Yɛ be mli ni Roma Katolik Gwabɔɔ ni yɔɔ Toulouse yɛ France lɛ bɔɔ mɔdɛŋ koni etsĩ shi ni ateɔ awoɔ sɔlemɔ lɛ hegbɛ lɛ naa lɛ, ewo akpɔ yɛ 1229 mli akɛ, mɔ folo ko nyɛŋ afee mɔ ni yɔɔ Biblia mli woji lɛ yɛ mɛi foji lɛ awiemɔ mli. Akɛ Sanemlipɛimɔ kɛ Yiwalɛ lɛ tsu nii yɛ ekãa naa koni akɛtsu akpɔ lɛ he nii. Ni kɛlɛ, yɛ Sanemlipɛimɔ kɛ Yiwalɛ lɛ sɛɛ afii 400 lɛ, mɛi ni sumɔɔ Nyɔŋmɔ Wiemɔ lɛ etsɔɔ Biblia muu lɛ fɛɛ shishi ni amɛmiijara emli nɔ ni akala ni yɔɔ wiemɔi ni shɛɔ 20 mli lɛ kɛmiiha kɛfata wiemɔi bibii krokomɛi ahe, kɛ efãi wuji ni yɔɔ wiemɔi krokomɛi 16 mli lɛ.
8. Yɛ afii ohai 19 lɛ mli lɛ, no mli lɛ mɛni yaa nɔ yɛ Biblia shishitsɔɔmɔ kɛ ejaa he nitsumɔ lɛ mli yɛ Russia?
8 Jeee Roma Katolik Sɔlemɔ lɛ pɛ bɔ mɔdɛŋ akɛ ehaŋ mɛi foji lɛ ale Biblia lɛ he nɔ ko. Yɛ afii ohai 19 mra be mli lɛ, Pavsky, univɛsiti tsɔɔlɔ ni yɔɔ St. Petersburg Academy of Divinity lɛ tsɔɔ Mateo Sanekpakpa lɛ shishi kɛjɛ Hela mli kɛtee Russia wiemɔ mli. Atsɔɔ Kristofoi a-Hela Ŋmalɛi lɛ ahe woji krokomɛi lɛ hu shishi kɛtee Russia wiemɔ mli, ni Pavsky tsu nii akɛ eŋmalɔ. Aja enɛɛmɛi babaoo diɛŋtsɛ, kɛyashi beni kɛtsɔ sɔlemɔ lɛ nifeemɔ nɔ lɛ, akɔne nɔyelɔ lɛ yiŋ yɛ 1826 mli koni eha akɛ Russian Bible Society lɛ awo Russia Ortodɔks Sɔlemɔ lɛ “Osɔfoi a-Gwabɔɔ Krɔŋkrɔŋ” ni sɛɛ mli lɛ ekɛ ekãa tsĩmɔ enitsumɔi anɔ lɛ nɔkwɛmɔ shishi. Sɛɛ mli lɛ, Pavsky tsɔɔ Hebri Ŋmalɛi lɛ ashishi kɛjɛ Hebri mli kɛtee Russia wiemɔ mli. Aaafee nakai beaŋ nɔŋŋ lɛ, Makarios, Ortodɔks Sɔlemɔ lɛ osɔfonukpa sɛɛmɔ lɛ hu tsɔɔ Hebri Ŋmalɛi lɛ ashishi kɛjɛ Hebri mli kɛtee Russia wiemɔ mli. Agbala amɛyi enyɔ lɛ fɛɛ toi yɛ mɔdɛŋ ni amɛbɔ lɛ hewɔ, ni akɛ saji ashishi ni amɛtsɔɔ lɛ yawo sɔlemɔ lɛ blema saji anitoohei. Sɔlemɔ lɛ tswa efai shi akɛ ebaaha Biblia lɛ ahi blema Slav wiemɔ ni yɛ nakai be lɛ mli lɛ gbɔmɛi foji lɛ kaneee loo amɛnuuu shishi lɛ mli. Beni be shɛ ni anyɛɛɛ atsĩ mɔdɛŋ ni gbɔmɛi lɛ bɔɔ akɛ amɛaaná Biblia mli nilee lɛ naa dɔŋŋ lɛ, no dani “Osɔfoi a-Gwabɔɔ Krɔŋkrɔŋ” lɛ je lɛ diɛŋtsɛ ewiemɔ shishitsɔɔmɔ ni esɔlemɔ lɛ kpɛlɛɔ nɔ lɛ shishi yɛ 1856 mli, ni ekɛ gbɛtsɔɔmɔi ni atsɔ ŋaa gbɛ nɔ ato he gbɛjianɔ koni akɛha wiemɔi ni akɛtsuɔ nii lɛ kɛ sɔlemɔ lɛ susumɔi akpã gbee lɛ fee nakai. No hewɔ lɛ, yɛ Nyɔŋmɔ Wiemɔ lɛ gbɛɛ kɛ shwamɔ naa lɛ, aha sɔrɔtofeemɔ ni yɔɔ jamɔŋ hiɛnyiɛlɔi lɛ akponɔgbɛ nifeemɔi kɛ yiŋtoo diɛŋtsɛ ni amɛhiɛ, taakɛ amɛwiemɔi kɛ nifeemɔi tsɔɔ lɛ bafee faŋŋ.—2 Tesalonikabii 2:3, 4.
Wiemɔ lɛ He ni Abuɔ Kɛjɛɔ Nɔ ni Ejaaa lɛ He
9. Mɛɛ gbɛ nɔ Biblia shishitsɔɔlɔi komɛi jie suɔmɔ ni amɛyɔɔ kɛha Nyɔŋmɔ Wiemɔ lɛ kpo amɛtsɔɔ yɛ?
9 Mɛi ni fata mɛi ni tsɔɔ Ŋmalɛi lɛ ashishi ni amɛŋmala eko lɛ ahe ji hii ni sumɔɔ Nyɔŋmɔ Wiemɔ lɛ waa diɛŋtsɛ ni bɔ mɔdɛŋ waa koni amɛha mɔ fɛɛ mɔ nine ashɛ nɔ lɛ. Afee William Tyndale lá odasefonyo (yɛ 1536) yɛ nɔ ni efee koni aná Biblia lɛ yɛ Ŋleshi wiemɔ mli lɛ hewɔ. Katolik Sanemlipɛimɔ kɛ Yiwalɛ lɛ wo Francisco de Enzinas tsuŋ (yɛ 1544 sɛɛ) yɛ Kristofoi a-Hela Ŋmalɛi lɛ ni etsɔɔ shishi kɛtee Spain wiemɔ mli ni eha akala lɛ hewɔ. Robert Morrison (kɛjɛ 1807 kɛyashi 1818) lɛ kɛ ewala wo oshara mli, ni ekɛtsɔɔ Biblia lɛ shishi kɛtee China wiemɔ mli.
10. Mɛɛ nɔkwɛmɔnii tsɔɔ akɛ wiemɔ shishitsɔɔlɔi yɛ ni nibii komɛi ná amɛnɔ hewalɛ moŋ fe suɔmɔ ni amɛyɔɔ kɛha Nyɔŋmɔ Wiemɔ lɛ?
10 Shi yɛ bei komɛi amli lɛ, saji ahe ni asusuɔ moŋ fe suɔmɔ ni ayɔɔ kɛha Nyɔŋmɔ Wiemɔ lɛ ná mɛi ni ŋmalaa lɛ kɛ wiemɔ shishitsɔɔlɔi lɛ anitsumɔ nɔ hewalɛ. Susumɔ nɔkwɛmɔnii ejwɛ komɛi ahe okwɛ: (1) Samariabii lɛ ma sɔlemɔtsu ko yɛ Gerizim Gɔŋ lɛ nɔ akɛ nɔ ni kɛ Yerusalem sɔlemɔtsu lɛ shiɔ mple. Yɛ nakai nifeemɔ lɛ sɛɛfimɔ naa lɛ, afee tsakemɔ yɛ Samaritan Pentateuch lɛ mli yɛ 2 Mose 20:17. Akɛ fãmɔ ha kɛfata he akɛ, akɛ tɛi ama afɔleshaa latɛ yɛ Gerizim Gɔŋ lɛ nɔ koni ashã afɔlei yɛ jɛmɛ, tamɔ nɔ ni efata Kitai Nyɔŋma lɛ he. (2) Mɔ ni tsɔɔ Daniel wolo lɛ shishi klɛŋklɛŋ ewo Hela Septuagint lɛ mli lɛ gba afã yɛ eshishitsɔɔmɔi lɛ amli. Ekɛ wiemɔi ni esusu akɛ amɛbaatsɔɔ nɔ ni yɔɔ Hebri ŋmalɛ lɛ mli loo ni eha eya hiɛ lɛ wo mli. Ejie saji ni yɔɔ fitsofitso ni esusu akɛ nikanelɔi ekpɛlɛŋ nɔ lɛ kɛjɛ mli. Beni etsɔɔ gbalɛ ni tsɔɔ be ni Mesia lɛ baapue lɛ, ní anaa yɛ Daniel 9:24-27 lɛ shishi lɛ, emale yɛ be sɛɛjɛkɛmɔ ni átsɔɔ lɛ he, ni ekɛ nɔ ko fata he, etsake wiemɔi lɛ, ni ekɛ ekomɛi ye ekrokomɛi anajiaŋ, ni eka shi faŋŋ akɛ, yiŋtoo ni ehiɛ ji ni eha gbalɛ lɛ afee tamɔ nɔ ni fĩɔ Makabii lɛ akaŋshii lɛ sɛɛ. (3) Yɛ afii ohai ejwɛ Ŋ.B. lɛ, Triniti tsɔɔmɔ lɛ hefãlɔ ni yɔɔ ekãa babaoo diɛŋtsɛ lɛ kɛ wiemɔi ni ji “yɛ ŋwɛi, Tsɛ lɛ, Wiemɔ lɛ, kɛ mumɔ krɔŋkrɔŋ lɛ; ni nibii etɛ nɛɛ feɔ ekome” lɛ wo Latin niŋmaa ko mli yɛ faŋŋ mli, tamɔ nɔ ni atsɛ enɛɛmɛi asɛɛ kɛjɛ 1 Yohane 5:7. Sɛɛ mli lɛ akɛ nakai wiemɔ lɛ wo Latin Biblia niŋmaa lɛ nɔŋŋ mli. (4) Louis XIII (1610-43) fã Jacques Corbin yɛ France koni etsɔɔ Biblia lɛ shishi kɛya French wiemɔ mli bɔni afee ni ekɛte shi ewo mɔdɛŋ ni Protestantbii bɔɔ lɛ. Yɛ yiŋtoo ni tamɔ nɛkɛ ni yɔɔ Corbin jwɛŋmɔŋ hewɔ lɛ, ekɛ ŋmalɛ mli wiemɔi komɛi ni atsake mli ni sane ni kɔɔ “Mass afɔleshaa krɔŋkrɔŋ lɛ” he lɛ fata he lɛ wo mli yɛ Bɔfoi lɛ Asaji 13:2.
11. (a) Mɛɛ gbɛ nɔ Nyɔŋmɔ Wiemɔ lɛ tee nɔ ehi shi yɛ anɔkwa ni wiemɔ shishitsɔɔlɔi komɛi yeee lɛ fɛɛ sɛɛ? (b) Blema ŋmalɛi ahe saji enyiɛ yɔɔ ni yeɔ nɔ ni Biblia lɛ kɛɛ yɛ blema lɛ he odase? (Kwɛmɔ akrabatsa lɛ.)
11 Yehowa etsĩii e-Wiemɔ ni afiteɔ lɛ nɛkɛ lɛ naa, ni no tsakeee eyiŋtoo lɛ hu. Mɛɛ hewalɛi enɛ ná? Gerizim Gɔŋ lɛ he saji ni akɛfataa he lɛ haaa Samariabii ajamɔ lɛ afee nɔ ni Nyɔŋmɔ baatsɔ nɔ ekɛjɔɔ adesai. Shi moŋ, odaseyeli ni ekɛha ji akɛ, eyɛ mli akɛ Samariabii ajamɔ lɛ jaje akɛ eheɔ Pentateuch lɛ eyeɔ moŋ, shi anyɛŋ akɛ he afɔ̃ nɔ akɛ ebaatsɔɔ anɔkwale lɛ. (Yohane 4:20-24) Wiemɔi lɛ amli ni atsakeɔ yɛ Septuagint lɛ mli lɛ etsĩii Mesia lɛ naa koni ekaba yɛ be ni agba afɔ̃ shi kɛtsɔ gbalɔ Daniel nɔ lɛ mli. Kɛfata he lɛ, eyɛ mli akɛ no mli lɛ akɛ Septuagint lɛ tsuɔ nii yɛ klɛŋklɛŋ afii oha lɛ mli moŋ, shi odaseyeli tsɔɔ akɛ Yudafoi lɛ sumɔɔ ni amɛnu ni aakane Ŋmalɛi lɛ yɛ Hebri mli yɛ amɛ kpeehei lɛ. Nɔ ni jɛ mli ba ji akɛ, “gbɔmɛi lɛ miikpa gbɛ,” beni gbalɛ lɛ mlibaa bɛŋkɛ lɛ. (Luka 3:15, NW) Yɛ tsakemɔi ni afee yɛ 1 Yohane 5:7 lɛ koni akɛfi Triniti lɛ sɛɛ kɛ Bɔfoi lɛ Asaji 13:2 koni akɛfi Mass lɛ sɛɛ lɛ gbɛfaŋ lɛ, enɛɛmɛi tsakeee nɔ ni ji anɔkwale lɛ. Ni etsɛɛɛ ni akpa lakamɔ wiemɔi lɛ ahe mama kwraa. Biblia lɛ shishijee wiemɔi babaoo ni akɛ niji ŋmala ni fa babaoo lɛ ji nɔ ni akɛtsuɔ nii koni akɛle bɔ ni wiemɔ shishitsɔɔmɔ fɛɛ shishitsɔɔmɔ ja ha.
12. (a) Mɛɛ tsakemɔi ni hiɛdɔɔ yɔɔ mli Biblia shishitsɔɔlɔi komɛi fee? (b) Enɛɛmɛi tee hiɛ kɛyashɛ nɛgbɛ?
12 Mɔdɛŋ krokomɛi ni abɔ koni atsake Ŋmalɛi lɛ kɔɔ kukuji fioo komɛi amli wiemɔi ni aaatsake lɛ he. Enɛɛmɛi bafee nɔ ni tutuaa mɔ diɛŋtsɛ ní anɔkwa Nyɔŋmɔ lɛ ji. Bɔ ni saji amlitsakemɔi lɛ diɛŋtsɛ yɔɔ ha kɛ he ni atsake kɛyashi lɛ kɛ odaseyeli ni yɔɔ faŋŋ haa akɛ, hewalɛ ni feɔ enɛ lɛ jɛ he ko ni yɔɔ hewalɛ kwraa fe adesa fɛɛ adesa loo adesa gbɛjianɔtoo—hɛɛ, hewalɛ lɛ jɛ Yehowa henyɛlɔ ni fe fɛɛ, Satan Abonsam ŋɔɔ. Akɛni wiemɔ shishitsɔɔlɔi kɛ wiemɔ lɛ ŋmalɔi lɛ ŋmɛɛ amɛhe amɛha nakai hewalɛ lɛ hewɔ lɛ—mɛi komɛi kɛ ekãa, ni mɛi krokomɛi kɛ shishashaomɔ—bɔi Nyɔŋmɔ diɛŋtsɛ gbɛi, Yehowa lɛ jiemɔ kɛmiijɛ e-Wiemɔ ni jɛ mumɔŋ lɛ mli yɛ hei akpei abɔ ni ejeɔ kpo yɛ lɛ. Yɛ mra be mli lɛ, mɛi komɛi ni tsɔɔ wiemɔ shishi kɛjɛ Hebri mli kɛtee Hela, Latin, German, Ŋleshi, Italia, kɛ Dutch wiemɔi amli ni mɛi krokomɛi fata he lɛ, jie ŋwɛi gbɛi lɛ kɛjɛ mli kwraa loo amɛha ehi hei fioo komɛi pɛ. Ajie kɛjɛ Kristofoi a-Hela Ŋmalɛi lɛ ni aŋmala lɛ hu mli.
13. Mɛni hewɔ mɔdɛŋ babaoo ni abɔ koni atsake Biblia lɛ ejieee Nyɔŋmɔ gbɛi lɛ kɛjɛɛɛ adesai ajwɛŋmɔŋ?
13 Ni kɛlɛ, nakai gbɛi ni yɔɔ nyam lɛ ejeee adesai ajwɛŋmɔ mli. Mɛi ni tsɔɔ Hebri Ŋmalɛi lɛ ashishi kɛtee Spain wiemɔ, Portugal wiemɔ, German, Ŋleshi, French, kɛ ekrokomɛi babaoo mli lɛ, kɛ Nyɔŋmɔ gbɛi diɛŋtsɛ lɛ wo mli yɛ anɔkwayeli mli. Beni shɛɔ afii ohai 16 lɛ, Nyɔŋmɔ gbɛi diɛŋtsɛ lɛ bɔi kpojee yɛ Kristofoi a-Hela Ŋmalɛi sɔrɔtoi lɛ ashishitsɔɔmɔi ni yɔɔ Hebri mli lɛ amli ekoŋŋ; beni shɛɔ afii ohai 18 lɛ, akɛwo German mli; beni shɛɔ afii ohai 19 lɛ, akɛwo Croat wiemɔ kɛ Ŋleshi wiemɔ mli. Eyɛ mli akɛ ekolɛ gbɔmɛi baabɔ mɔdɛŋ akɛ amɛaatsĩmɔ Nyɔŋmɔ gbɛi nɔ moŋ, shi kɛ “[Yehowa, NW] gbi lɛ” bashɛ shi lɛ, kɛkɛ lɛ, taakɛ Nyɔŋmɔ jajeɔ etsɔɔ lɛ, ‘jeŋmaji lɛ baale akɛ Miji Yehowa.’ Nakai Nyɔŋmɔ yiŋtoo ni ajaje atsɔɔ lɛ efeŋ efolo.—2 Petro 3:10; Ezekiel 38:23; Yesaia 11:9; 55:11.
Shɛɛ Sane lɛ Eyashɛ Je Lɛŋ He Fɛɛ He
14. (a) Beni shɛɔ afii ohai 20 lɛ, Europa wiemɔi enyiɛ mli akala Biblia lɛ awo, ni mɛni jɛ mli ba? (b) Beni shɛɔ afi 1914 naagbee lɛ, Afrika wiemɔi enyiɛ mli Biblia lɛ yɔɔ?
14 Beni shɛɔ afii ohai 20 lɛ shishijee mli lɛ, no mli lɛ ákala Biblia lɛ yɛ Europa wiemɔi 94 mli momo. Eha Biblia kaselɔi ahiɛ ba amɛhe nɔ yɛ nakai je lɛ fã lɛ mli, yɛ anɔkwale ni eji akɛ saji ni haoɔ je lɛ kɛ Jeŋmaji Abei lɛ naagbee lɛ baaba yɛ 1914, ni eka shi faŋŋ akɛ eba mli lɛɛlɛŋ! (Luka 21:24) Dani afi 1914 ni sa kadimɔ lɛ ba naagbee lɛ, no mli lɛ atsɔɔ Biblia muu lɛ loo emli woji lɛ ekomɛi ashishi kɛtee Afrika wiemɔi 157 mli, kɛfata wiemɔi ni akɛtsuɔ nii waa ni ji Ŋleshi, French, kɛ Portugal wiemɔi lɛ ahe. No hewɔ lɛ aná shishitoo nii ni akɛaatsu nii, koni akɛtsɔɔ wiemɔ kui babaoo kɛ maji amli bii ni yɔɔ jɛmɛ ni baa amɛhe shi lɛ Biblia mli anɔkwalei ni haa mɔ yeɔ ehe yɛ mumɔŋ lɛ anii.
15. Yɛ be mli ni naagbee gbii lɛ jeɔ shishi lɛ, no mli lɛ aná Biblia lɛ yɛ gbɔmɛi ni yɔɔ Amerika maji lɛ amli lɛ awiemɔi amli kɛyashɛ nɛgbɛ?
15 Beni je lɛ boteɔ naagbee gbii ni agba afɔ̃ shi lɛ mli lɛ, no mli lɛ ána Biblia lɛ babaoo yɛ Amerika maji amli. Mɛi ni fã kɛjɛ Europa lɛ kɛba yɛ amɛmaŋ wiemɔi sɔrɔtoi lɛ fɛɛ mli. Aje Biblia mli nitsɔɔmɔ he gbɛjianɔtoo ni mli wa shishi, kɛ maŋshiɛmɔi kɛ Biblia he woji ni Majimaji Ateŋ Biblia Kaselɔi, taakɛ ale Yehowa Odasefoi yɛ nakai beaŋ lɛ kala lɛ, ni aja babaoo lɛ. Kɛfata he lɛ, no mli lɛ Biblia nitsumɔ kui miikala Biblia lɛ yɛ wiemɔi krokomɛi 57 mli koni akɛtsu mɛi ni yɔɔ Anaigbɛ Je lɛ Fã lɛ nɔ fɔmɔbii lɛ ahiamɔ nii ahe nii.
16, 17. (a) Beni be shɛ kɛha jeŋ fɛɛ shiɛmɔ nitsumɔ lɛ, no mli lɛ nine eshɛ Biblia lɛ nɔ kɛyashɛ nɛgbɛ? (b) Mɛɛ gbɛ nɔ Biblia lɛ etsɔɔ diɛŋtsɛ akɛ ehi shi, ni eji wolo ni náa mɔ nɔ hewalɛ waa?
16 Beni be shɛ kɛha jeŋ muu fɛɛ sanekpakpa lɛ shiɛmɔ dani ‘naagbee lɛ aba lɛ,’ no mli lɛ, Biblia lɛ jeee nɔ̃ hee kɛha Asia kɛ Pasifik ŋshɔkpɔ lɛ nɔ bii lɛ. (Mateo 24:14) No mli lɛ aakala momo yɛ wiemɔi 232 ni ale waa yɛ nakai je lɛ fã lɛ mli lɛ amli. Ekomɛi ji Bibliai muji; pii ji Kristofoi a-Hela Ŋmalɛi lɛ shishitsɔɔmɔi; ekrokomɛi hu ji Ŋmalɛi Krɔŋkrɔŋi lɛ mli wolo kome.
17 Eka shi faŋŋ akɛ, no mli lɛ Biblia lɛ jeee nɔ ko ni miihi shi akɛ nɔ ni akɛtoɔ blema nibii atoohe kɛkɛ. Yɛ woji ni yɔɔ lɛ fɛɛ ateŋ lɛ, no mli lɛ no ji wolo ko ni atsɔɔ shishi fe fɛɛ eko ni aja babaoo fe fɛɛ eko. Yɛ nakai ŋwɛi duromɔ he odaseyeli lɛ kɛ gbeekpamɔ naa lɛ, nɔ ni aŋma yɛ nakai wolo lɛ mli lɛ miiba mli. Emli tsɔɔmɔi kɛ mumɔ ni fĩɔ sɛɛ lɛ hu miiná gbɔmɛi ni yɔɔ shikpɔji babaoo anɔ lɛ ashihilɛi anɔ hewalɛ kɛmiiya naanɔ. (1 Petro 1:24, 25) Shi babaoo yɛ ni baaba lolo—babaoo diɛŋtsɛ.
Ani Okaiɔ?
◻ Mɛni ji “wɔ-Nyɔŋmɔ lɛ wiemɔ lɛ” ni hiɔ shi kɛyaa naanɔ lɛ?
◻ Mɛɛ mɔdɛŋ abɔ koni akɛkpata Biblia lɛ hiɛ, ni mɛni ejɛ mli eba?
◻ Mɛɛ gbɛ nɔ atsɔ abu Biblia lɛ anɔkwayeli lɛ he?
◻ Mɛɛ gbɛ nɔ atsɔɔ yɛ akɛ Nyɔŋmɔ wiemɔ ni tsɔɔ eyiŋtoo lɛ ji wiemɔ ni hiɛ kã?
[Akrabatsa ni yɔɔ baafa 12]
Ani Wɔle Nɔ ni Biblia lɛ Kɛɛ Diɛŋtsɛ Kɛjɛ Shishijee?
Aaafee Hebri ŋmalɛi ni akɛ niji ŋmala ni shɛɔ 6,000 lɛ yeɔ Hebri Ŋmalɛi lɛ mli saji ahe odase. Enɛɛmɛi ateŋ fioo komɛi jɛ be ni tsɔ Kristofoi abe lɛ hiɛ lɛ mli. Kɛ hoo kwraa lɛ, Hebri Ŋmalɛi muji lɛ 19 ni fiteko jɛ be ni yɔɔ dani afee nikalamɔ tsɔne ni anyɛɔ atsakeɔ eniŋmalamɔ okadii amli lɛ mli. Kɛfata he lɛ, wiemɔi ashishitsɔɔmɔi yɛ ni afee yɛ wiemɔi krokomɛi 28 mli ni jɛ nakai be lɛ nɔŋŋ mli.
Yɛ Kristofoi a-Hela Ŋmalɛi lɛ gbɛfaŋ lɛ, abua aaafee ŋmalɛi 5,000 ni yɔɔ Hela mli lɛ anaa. Afee enɛɛmɛi ateŋ ekome dani 125 Ŋ.B. shɛ, ni tsɔɔ akɛ beni aŋma shishijee nɔ̃ lɛ sɛɛ afii fioo pɛ. Ni efãi lɛ ekomɛi yɛ ni asusu akɛ afee lɛ mra kɛtsɔ hiɛ. Yɛ woji 27 ni jɛ mumɔŋ lɛ ateŋ 22 agbɛfaŋ lɛ, ŋmalɛi ni akɛ niji ŋmala fɛɛ lɛ mli 10 kɛyashi 19 yɛ. Ŋmalɛi muji ni akɛ niji ŋmala lɛ ateŋ nɔ ni faaa kwraa ni afee kɛha Biblia lɛ fã nɛɛ mli lɛ he woji lɛ eko fɛɛ eko lɛ etɛ yɛ—kɛha Kpojiemɔ. Aŋmala Kristofoi a-Hela Ŋmalɛi muu lɛ fɛɛ ateŋ ekome yɛ afii ohai ejwɛ Ŋ.B.
Blema wolo kroko ko kwraa bɛ ni blema saji ahe odaseyeli babaoo ni tamɔ nɛkɛ ema nɔ mi.