Kɛjɛ Nikaselɔi ni Yeɔ Omanye Kɛbatsɔmɔ Maŋsɛɛ Sanekpakpa Shiɛlɔi ni Yeɔ Omanye

“MINYƐƐƐ mahe maye lolo akɛ wɔná hegbɛ nɛɛ!” taakɛ Will kɛ miishɛɛ wie, beni ewieɔ tsɔsemɔ ni ekɛ eŋa, Patsy, ná kɛgbe naa nɔŋŋ ákɛ nikaselɔi ni fata Buu Mɔɔ Biblia Gilead Skul klas ni ji 103 lɛ he lɛ. Zahid kɛ Jeni kɛ lɛ kpãa gbee. “Eji hegbɛ kpele diɛŋtsɛ kɛha wɔ akɛ wɔba eko,” taakɛ amɛwie lɛ. Nikaselɔi lɛ fɛɛ kɛ mɔdɛŋbɔɔ diɛŋtsɛ ekase nii yɛ skul lɛ. Amrɔ nɛɛ amɛmiishwe ni amɛje amɛnitsumɔ akɛ maŋsɛɛ sanekpakpa shiɛlɔi lɛ shishi. Shi klɛŋklɛŋ lɛ, amɛnine shɛ ŋaawoo ni suɔmɔ yɔɔ mli, ni baaye abua amɛ ní amɛye omanye yɛ amɛ maŋsɛɛ sanekpakpa shiɛmɔ nitsumɔi lɛ amli lɛ nɔ, yɛ skul naagbee gbɛjianɔtoo ni afee yɛ September 6, 1997 lɛ mli.

Gbɛjianɔtoo lɛ sɛinɔtalɔ ji Theodore Jaracz, ni ji Nɔyeli Kuu lɛ mli bii lɛ ateŋ mɔ kome. Etsɔɔ mli akɛ—nanemɛi kɛ wekumɛi ni jɛ Canada, Europa, Puerto Rico, kɛ United States hu eba nifeemɔ lɛ shishi—kɛfata Betel weku lɛ kɛ Buu Mɔɔ Asafo lɛ nitsumɔhe niji 48 anajiaŋdamɔlɔi lɛ ahe, koni amɛma amɛsɛɛfimɔ kɛ suɔmɔ nɔ mi amɛha nikaselɔi lɛ. Nyɛminuu Jaracz wie akɛ bei pii lɛ, nibii krokomɛi gbalaa maŋsɛɛ sanekpakpa shiɛlɔi ni Kristendom sɔlemɔi lɛ tsuɔ amɛ lɛ kɛjɛɔ maŋsɛɛ sanekpakpa shiɛmɔ nitsumɔ lɛ he, ni amɛbɔiɔ woloŋlee mli mɔdɛŋbɔi asɛɛtiumɔ loo amɛkɛ amɛhe woɔ maŋkwramɔ saji amli po. Nɔ ni tamɔɔɔ nakai lɛ, mɛi ni egbe Gilead skul lɛ naa lɛ feɔ nɔ ni atsɔse amɛ akɛ amɛfee lɛ. Amɛtsɔɔ gbɔmɛi lɛ Biblia lɛ.

No sɛɛ lɛ Robert Butler ni jɛ Asafo lɛ Brooklyn nitsumɔhe lɛ wie saneyitso ni ji “Hã Ogbɛ lɛ Aye Omanye” lɛ he. Etsɔɔ mli akɛ eyɛ mli akɛ gbɔmɛi susuɔ omanyeyeli he yɛ shika kɛ heloonaa nibii krokomɛi ni ayɔɔ lɛ gbɛfaŋ moŋ, shi nɔ ni hiaa diɛŋtsɛ ji bɔ ni Nyɔŋmɔ susuɔ omanyeyeli he ehaa. Yesu sɔɔmɔ nitsumɔ lɛ ye omanye, jeee akɛni etsake mɛi babaoo kɛbanyiɛ esɛɛ hewɔ, shi moŋ akɛni eye anɔkwa yɛ enitsumɔ lɛ mli lɛ hewɔ. Yesu kɛ hiɛnyamwoo ha Yehowa, ni etee nɔ ehi shi ni je lɛ wooo ehe muji. (Yohane 16:33; 17:4) Enɛɛmɛi ji nibii ni Kristofonyo fɛɛ Kristofonyo baanyɛ afee.

“Nyɛfea Tsuji Nyɛhaa Gbɔmɛi Fɛɛ,” taakɛ Robert Pevy, ní tsutsu ko lɛ eji maŋsɛɛ sanekpakpa shiɛlɔ yɛ Bokagbɛ lɛ wo ŋaa lɛ. Bɔfo Paulo ji maŋsɛɛ sanekpakpa shiɛlɔ ni ye omanye. Mɛni ji nɔ diɛŋtsɛ ni ha eye omanye lɛ? Efee ehe tsulɔ kɛha mɛi fɛɛ. (1 Korintobii 9:19-23) Wielɔ lɛ tsɔɔ mli akɛ: “Mɔ ko ni egbe Gilead nikasemɔ naa, ni yɔɔ nakai su lɛ ebuŋ maŋsɛɛ sanekpakpa shiɛmɔ sɔɔmɔ lɛ akɛ nitsumɔ mli nɔyaa ni ená, nɔ ni ebaatsɔ nɔ ena gbɛhei ni he hiaa waa yɛ gbɛjianɔtoo lɛ mli. Maŋsɛɛ sanekpakpa shiɛlɔ yaa he ni aha lɛ nitsumɔ yɛ lɛ kɛ oti kome pɛ ni ma ehiɛ—koni eyasɔmɔ, ejaakɛ nakai ji bɔ ni tsuji feɔ.”

Beni ehaa eŋaawoo lɛ damɔɔ 2 Korintobii yitsei 3 kɛ 4 nɔ titri lɛ, Gerrit Lösch ni fata Nɔyeli Kuu lɛ he lɛ, wo nikaselɔi lɛ ŋaa akɛ “Nyɛhaa Yehowa Anunyam lɛ Akpɛa Tamɔ Ashwishwɛ.” Ekai amɛ akɛ Nyɔŋmɔ he nilee lɛ tamɔ la ni kpɛɔ haa Kristofonyo lɛ kɛji egbele etsui mli koni la lɛ abote mli lɛ. Wɔhaa nakai la lɛ kpɛɔ kɛtsɔɔ sanekpakpa lɛ shiɛmɔ kɛ jeŋba kpakpa mlihiɛmɔ nɔ. “Bei komɛi lɛ, ekolɛ obaanu he akɛ ojeee mɔ ni sa,” taakɛ ewie lɛ. “Kɛ henumɔi ni tamɔ nakai te shi lɛ, okɛ ohe afɔ̃ Yehowa nɔ, ‘koni hewalɛ ni fa kɛteke nɔ afee Nyɔŋmɔ nɔ.’ ” (2 Korintobii 4:7) Beni etĩɔ Paulo wiemɔi ni aŋma yɛ 2 Korintobii 4:1 lɛ mli lɛ, Nyɛminuu Lösch wo nikaselɔi lɛ ŋaa akɛ: “Onijiaŋ akaje wui yɛ omaŋsɛɛ sanekpakpa shiɛmɔ nitsumɔ lɛ mli. Hã oshwishwɛ lɛ hiɛ atse be fɛɛ be!”

Karl Adams, ni ji Gilead tsɔɔlɔi lɛ ateŋ mɔ kome lɛ, wie saneyitso ko ni yɔɔ miishɛɛ waa, ni ji “Nɛgbɛ Yehowa Yɔɔ?” lɛ he. Sanebimɔ lɛ kɔɔɔ he ni Nyɔŋmɔ yɔɔ diɛŋtsɛ yɛ jeŋ muu lɛ fɛɛ mli lɛ he, shi moŋ ekɔɔ bɔ ni ehe hiaa ni asusu Yehowa jwɛŋmɔ kɛ nibii ni tsɔɔ egbɛtsɔɔmɔi ahe lɛ he. Ekɛɛ: “Kɛ́ mɔ ko ni kɛ afii babaoo esɔmɔ Yehowa aahu po lɛ yaje nɔnyɛɛ shishi lɛ, ekolɛ ehiɛ aaakpa enɛ nɔ.” (Hiob 35:10) Ni wɔ ŋmɛnɛŋmɛnɛ gbii nɛɛ amli hu? Yɛ afi 1942 mli lɛ, gbɛtsɔɔmɔ he bahia Nyɔŋmɔ webii lɛ. Ani no mli lɛ shiɛmɔ nitsumɔ lɛ miiba naagbee, aloo ani nitsumɔ babaoo yɛ lolo ni abaatsu? Mɛni ji Yehowa suɔmɔnaa nii kɛha ewebii lɛ? Beni amɛkaseɔ Nyɔŋmɔ Wiemɔ lɛ, hetoo lɛ bafee faŋŋ. Nyɛminuu Adams tsɔɔ mli akɛ: “Dani nakai afi lɛ baaba naagbee kwraa lɛ, no mli lɛ ato gbɛjianɔ agbe naa kɛha Buu Mɔɔ Biblia Gilead Skul lɛ.” Eka shi faŋŋ akɛ Yehowa ejɔɔ maŋsɛɛ sanekpakpa shiɛlɔi ni nakai skul lɛ etsu kɛtee lɛ anitsumɔ lɛ nɔ.

Mark Noumair ji tsɔɔlɔ ni ji enyɔ ni bawie. Yɛ ewiemɔ, ni yitso ji “Te Okɛ Otalenta lɛ Baatsu Nii Oha Tɛŋŋ?” lɛ mli lɛ, ewo nikaselɔi lɛ hewalɛ ni amɛkɛ tsɔsemɔ ni amɛnine eshɛ nɔ yɛ Gilead lɛ atsu nii amrɔ nɔŋŋ kɛji amɛyashɛ hei ni aha amɛ nitsumɔi heei yɛ lɛ. “Nyɛbɔa mɔdɛŋ akɛ nyɛaajie miishɛɛ kpo yɛ mɛi krokomɛi ahe,” taakɛ ekɛɛ lɛ. “Nyɛkɛ nyɛhe abɔa amɛhe. Nyɛbɔa mɔdɛŋ waa akɛ nyɛaakase maŋbii lɛ akusumii, amɛ yinɔsane, kɛ nibii ni amɛnáa he miishɛɛ. Kɛ nyɛkase amɛwiemɔ lɛ oya lɛ, ebaaha efee mlɛo kɛha nyɛ akɛ nyɛaahi maŋ lɛ mli.”

Nikaselɔi ni Yɔɔ Ekãa lɛ Náa Miishɛɛ yɛ Sɔɔmɔ Nitsumɔ lɛ Mli

Kɛfata amɛhe ni amɛkɛwo amɛnikasemɔ lɛ mli beni amɛyɔɔ Gilead lɛ he lɛ, ahã nikaselɔi lɛ kɛ asafoi 11 ni bɛŋkɛ jɛmɛ lɛ bɔ. Yɛ otsii lɛ anaagbee lɛ, amɛkɛ amɛhe woɔ shiɛmɔ nitsumɔ lɛ mli kɛ ekãa. Wallace Liverance ni fata Gilead tsɔɔlɔi lɛ ahe lɛ, fɔ̃ amɛteŋ mɛi saŋŋ nine kɛba koni amɛbagba toibolɔi lɛ amɛ niiashikpamɔi lɛ ekomɛi. Anaa amɛmiishɛɛ lɛ he odaseyeli beni amɛgbaa niiashikpamɔi ni amɛná beni amɛyeɔ odase yɛ shwapoi bibii anaa, yɛ tsɔnei amaamɔhei, yɛ nitsumɔhei, yɛ gbɛjegbɛi ahe, kɛ agbɛnɛ yɛ shia kɛ shia hu lɛ. Amɛteŋ mɛi komɛi tao gbɛ̀i ni amɛaatsɔ nɔ amɛnine ashɛ gbɔmɛi ni wieɔ maŋsɛɛ wiemɔi, ni yɔɔ amɛ asafo lɛ shikpɔŋkuku lɛ mli ni amɛtsuɔ nii yɛ jɛmɛ lɛ anɔ. Kɛ hoo lɛ, klas ni ji 103 lɛ mli bii lɛ je shia Biblia mli nikasemɔi nyɔŋma shishi ni amɛtsa nɔ yɛ nyɔji enumɔ ni akɛtsɔse amɛ lɛ mli.

Maŋsɛɛ Sanekpakpa Shiɛlɔi ni kɛ Be Babaoo Etsu Nii lɛ Gba Nibii Diɛŋtsɛ ni Ha Amɛye Omanye Lɛ

Yɛ gbɛjianɔtoo lɛ fã ni yɔɔ miishɛɛ nɛɛ sɛɛ lɛ, Patrick Lafranca kɛ William Van de Wall fɔ̃ Nitsumɔhe Niji Ajinafoi Akui amli bii kpawo nine koni amɛbatsɔɔ nibii ni amɛkase yɛ amɛ maŋsɛɛ sanekpakpa shiɛmɔ nitsumɔi lɛ amli kɛha klasbii lɛ asɛɛnamɔ. Amɛwo mɛi ni egbe nikasemɔ naa lɛ ŋaa ni amɛbu amɛ maŋsɛɛ sanekpakpa shiɛmɔ nitsumɔ lɛ akɛ ejɛ Yehowa ŋɔɔ, ni amɛtswa amɛfai shi akɛ amɛbaahi amɛnitsumɔ lɛ mli daa. Amɛwie hewalɛ kpakpa ni maŋsɛɛ sanekpakpa shiɛlɔi ni atsɔse amɛ yɛ Gilead lɛ ená yɛ nitsumɔ lɛ nɔ yɛ shikpɔji krokomɛi anɔ lɛ ahe.

Mɛni eye ebua Nitsumɔhe Nine Ajinafoi Akuu lɛ mli bii nɛɛ ni amɛkɛ afii nyɔŋmai abɔ esɔmɔ akɛ maŋsɛɛ sanekpakpa shiɛlɔi ni yɔɔ miishɛɛ, ni woɔ yibii hu lɛ? Amɛkɛ nyɛmimɛi ni ji maŋbii lɛ tsu nii jogbaŋŋ ni amɛkase nii kɛjɛ amɛŋɔɔ. Amɛbɔi amɛwiemɔ lɛ kasemɔ amrɔ nɔŋŋ beni amɛyashɛ hei ni aha amɛ nitsumɔ yɛ lɛ. Amɛkase bɔ ni amɛaafee tswãa ni amɛtsake amɛhe amɛwo maŋbii lɛ ashihilɛ mli. Charles Eisenhower, ni kɛ Gilead klɛŋklɛŋ klas lɛ gbe nikasemɔ naa, ni ekɛ afii 54 esɔmɔ akɛ maŋsɛɛ sanekpakpa shiɛlɔ lɛ, gba “nibii diɛŋtsɛ” enumɔ ni maŋsɛɛ sanekpakpa shiɛlɔi ni eye omanye lɛ ekase lɛ: (1) Kasemɔ Biblia lɛ daa (2) kasemɔ wiemɔ lɛ, (3) ná ekãa yɛ sɔɔmɔ nitsumɔ lɛ mli, (4) bɔɔ mɔdɛŋ ni toiŋjɔlɛ ahi maŋsɛɛ sanekpakpa shiɛlɔi ashia lɛ mli, kɛ (5) sɔlemɔ daa oha Yehowa. Jeee ŋaawoo ni anyɛɔ akɛtsuɔ nii ni nikaselɔi lɛ anine shɛ nɔ lɛ pɛ ha amɛná miishɛɛ, shi moŋ miishɛɛ ni anaa faŋŋ, ni nɛkɛ maŋsɛɛ sanekpakpa shiɛlɔi ni he ekwakwao nɛɛ ená yɛ Yehowa sɔɔmɔ mli lɛ hu. Taakɛ Armando kɛ Lupe wie lɛ, “amɛyɛ miishɛɛ waa kɛji amɛmiiwie amɛshihilɛ mli saji ahe.”

Yɛ amɛ kɛ sanegbaa lɛ sɛɛ lɛ, ebashwɛ wiemɔ kome. Albert Schroeder, ni fata Nɔyeli Kuu lɛ mli bii ahe lɛ, hala esaneyitso ni ji “Nyɔŋmɔ Wiemɔ lɛ He Tsulɔ Anɔkwafo Jieɔ Anɔkwale lɛ Mli Jwetrii ni Jara Wa lɛ Akpo.” Akɛni Biblia lɛ ji wolo titri ni akaseɔ yɛ Gilead Skul lɛ hewɔ lɛ, nikaselɔi lɛ ná nɔ ni eyɔɔ kɛɛmɔ lɛ he miishɛɛ waa. Nyɛminuu Schroeder tsɔɔ mli akɛ beni aje New World Translation of the Holy Scriptures lɛ he nitsumɔ shishi afii 50 ni eho nɛ lɛ, no mli lɛ Jeŋ Hee Biblia Shishitsɔɔmɔ Ajinafoi Akuu lɛ mli bii ni afɔ amɛ mu lɛ taooo gbɔmɛi anɔkpɛlɛmɔ, shi moŋ amɛkɛ amɛhe fɔ̃ mumɔ krɔŋkrɔŋ lɛ gbɛtsɔɔmɔ nɔ. (Yeremia 17:5-8) Shi, nyɛsɛɛ nɛɛ nɔŋŋ lɛ, hegbɛi komɛi ebayoo tɛ ni nɔ kwɔ waa ni New World Translation lɛ efo efɔ̃ shi lɛ. Woloŋlelɔ ko ŋma yɛ wolo ni eŋma emaje Asafo lɛ mli akɛ: “Kɛ́ mina wolo ko ni aje gbɛ afee lɛ jogbaŋŋ lɛ, miyooɔ, ni nyɛ ‘Jeŋ Hee Biblia Shishitsɔɔmɔ Ajinafoi Akuu’ lɛ etsu amɛnitsumɔ lɛ jogbaŋŋ diɛŋtsɛ.”

Yɛ wiemɔ nɛɛ sɛɛ lɛ, nikaselɔi lɛ anine shɛ amɛ yijiemɔ woji anɔ, ni atswa hei ni aha amɛ nitsumɔ yɛ lɛ he adafi atsɔɔ toibolɔi lɛ. Eji be ni teeɔ henumɔi ashi diɛŋtsɛ kɛha klasbii lɛ. Beni klas lɛ najiaŋdamɔlɔ kaneɔ wolo ni amɛŋma ni amɛkɛjieɔ hiɛsɔɔ kpo lɛ, no mli lɛ mɛi babaoo asɛ̃ mli efimɔ kpɔ ni amɛhiŋmɛii etɛtɛo kɛ yaafonui. Nikaselɔi lɛ ateŋ mɛi komɛi kɛ afii babaoo saa amɛhe kɛha maŋsɛɛ sanekpakpa shiɛmɔ nitsumɔ lɛ. Beni amɛyoo akɛ abaafee Gilead skul lɛ yɛ Ŋleshi wiemɔ mli lɛ, amɛteŋ mɛi fioo ko tee asafoi ni wieɔ Ŋleshi lɛ amli bɔni afee ni bɔ ni amɛwieɔ Ŋleshi Blɔfo amɛhaa lɛ aya hiɛ. Mɛi krokomɛi hu fã kɛyahi hei ni gbɛgbalɔi ahe hiaa babaoo yɛ, yɛ amɛ diɛŋtsɛ amɛmaŋ loo maŋsɛɛ. Ni mɛi krokomɛi hu saa amɛhe kɛtsɔ niiashikpamɔi akanemɔ nɔ, kɛtsɔ nii amlitaomɔ nɔ, aloo kɛtsɔ Asafo lɛ vidio kasɛt ni gbɛi ji To the Ends of the Earth lɛ kwɛmɔ shii abɔ nɔ.

Will kɛ Patsy, ni atsĩ amɛ tã kɛjɛ shishijee lɛ, amii shɛ amɛhe waa, yɛ miishɛɛ diɛŋtsɛ ni ajie lɛ kpo yɛ nikaselɔi lɛ ahe lɛ hewɔ. “Gbɔmɛi ni leee wɔ lɛ po bafua wɔ ni amɛsha wɔ mfoniri. Nɔyeli Kuu lɛ mli bii lɛ ateŋ mɔ kome bata wɔdɛŋ ni ekɛɛ wɔ akɛ, ‘Wɔkɛ nyɛ shiɔ wɔtsitsi!’ ” Ŋwanejee ko bɛ he akɛ, asumɔɔ klasbii ni ji 103 lɛ waa diɛŋtsɛ. Atsɔse amɛ jogbaŋŋ. Skul tsɔsemɔ ni amɛná yɛ Gilead lɛ baaha amɛnyɛ amɛtsake kɛjɛ nikaselɔi ni yeɔ omanye kɛbatsɔmɔ maŋsɛɛ sanekpakpa shiɛlɔi ni yeɔ omanye.

[Akrabatsa ni yɔɔ baafa 22]

Klasbii lɛ Ahe Saji

Maji sɔrɔtoi anɔ ni amɛjɛ kɛba: 9

Maji sɔrɔtoi ni aha amɛ nitsumɔ yɛ mli: 18

Nikaselɔi lɛ ayifalɛ: 48

Mɛi abɔ ni ji gbalashihilɛ mli hefatalɔi: 24

Afii abɔ ni amɛye lɛ mlijaa: 33

Afii abɔ ni amɛkɛhi anɔkwale lɛ mli lɛ mlijaa: 16

Afii abɔ ni amɛkɛsɔmɔ kɛ amɛbe fɛɛ mlijaa: 12

[Mfoniri ni yɔɔ baafa 23]

Buu Mɔɔ Biblia Gilead Skul Klasbii ni Ji 103 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S.

(2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K.

(3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H.

(4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J.

(5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R.

(6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Mfoniri ni yɔɔ baafa 24]

Nɛgbɛ aha wɔ nitsumɔ yɛ?