Ani Asraafoi Ahe Baahia Wɔ Be Fɛɛ Be?
ASRAAFOI efite adesai ashihilɛ mli nibii babaoo ni amɛfite gbɔmɔ miishɛɛ babaoo. No hewɔ lɛ, mɛi komɛi esusu akɛ, ‘Ani adesai anine baanyɛ ashɛ jeŋ shweshweeshwe shihilɛ pɔtɛɛ ni ŋmɛɔ asraafoi aguu gbɛ nɔ gbi ko?’ Amrɔ nɛɛ ni tawuu nibii ni kpataa nibii babaoo hiɛ lɛ nyɛɔ ebuleɔ nibii fɛɛ ni yɔɔ wala mli lɛ shishi lɛ, sanebimɔ lɛ bafeɔ nɔ ni he hiaa waa. Te eyɔɔ diɛŋtsɛ ha tɛŋŋ akɛ aaakpa gbɛ akɛ aaaná jeŋ ni asraafoi bɛ mli?
Nɔkwɛmɔnii babaoo tsɔɔ akɛ kɛ majimaji ateŋ wekukpaai kpakpai ha aná hekɛnɔfɔɔ lɛ, ebaanyɛ eha akpa tawuu nibii kɛ nitsumɔ yɛ gbɛ ko nɔ. Ákɛ nɔkwɛmɔnɔ lɛ, naanyobɔɔ ni kã Canada kɛ United States teŋ lɛ etsɔɔ akɛ, fe afii oha kɛ fã ni eho nɛɛ lɛ, asraafoi lɛ ebuuu amɛ husu ni sɛɛkɛlɛ ji kilomitai 5,000 lɛ he. Norway kɛ Sweden nine eshɛ ekomefeemɔ ni tamɔ nakai nɔ, taakɛ maji krokomɛi babaoo efee lɛ. Ani ekomefeemɔ ni baakã maji fɛɛ ateŋ lɛ nine baanyɛ ashɛ jeŋ ni asraafoi bɛ mli nɔ? Yɛ gbeyei nibii ni ba yɛ Jeŋ Ta I lɛ mli hewɔ lɛ, susumɔ lɛ gbɛ eshwã waa bɔ ni eko bako nakai pɛŋ.
Beni ato toiŋjɔlɛ shishi yɛ afi 1918 lɛ, Versailles toiŋjɔlɛ kpaŋmɔ ni afee lɛ yiŋtoi lɛ ateŋ ekome ji “koni kɛ aaahi lɛ, aje shishi aba tawuu nibii ni maji fɛɛ yɔɔ lɛ fɛɛ shi.” Yɛ afii ni nyiɛ sɛɛ lɛ amli lɛ, shi ni ateɔ awoɔ tawuu bafee nɔ ni ale babaoo. Mɛi komɛi ni teɔ shi woɔ tawuu lɛ tsɔɔ akɛ ta ji nɔ ni ehiii fe fɛɛ ni baanyɛ aba maŋ nɔ, ni no hewɔ lɛ mɔ nɔ kunim ni aaaye lɛ hi fe no. Mɛi ni sumɔɔɔ shi ni ateɔ awoɔ ta lɛ kɛ no kpãaa gbee, ni amɛtsɔɔ mli akɛ yɛ afii ohai abɔ ni eho lɛ amli lɛ, nibii fioo ko pɛ Yudafoi ni yɔɔ akutsei wuji amli lɛ kɛbu amɛhe koni amɛkɛtsĩ tutualɔi anaa, ni kɛlɛ atee nɔ akɛ yiwalɛ nifeemɔ bɔ mɔdɛŋ sɔrɔtoi koni akɛbule amɛshishi. Hegbɛ fioo ko pɛ Afrikabii ná akɛ amɛaadamɔ nɔ amɛtsĩ mɛi ni kɛ amɛ yaha Amerikabii lɛ akɛ nyɔji lɛ anaa, ni kɛlɛ akɛ yiwalɛ fee amɛ niseniianii afii ohai abɔ.
Shi beni Jeŋ Ta II lɛ fɛ́ lɛ, mɛi babaoo ni teɔ shi woɔ ta lɛ mu sane naa akɛ hebuu he miihia maji lɛ. No hewɔ lɛ beni ato Jeŋmaji Ekomefeemɔ lɛ shishi yɛ Jeŋ Ta II lɛ sɛɛ lɛ, awie tawuu nibii ni aaagu lɛ he fioo ko pɛ, ni awie majimaji ateŋ ekomefeemɔ ni akɛaatsĩ tutuamɔ naa lɛ he babaoo. Maji ni kɛ amɛhe ewo mli lɛ ahiɛ kã nɔ akɛ kɛtsɔ no nɔ lɛ shweshweeshwe shihilɛ ni akɛha lɛ baaha maji lɛ aná nɔmimaa akɛ amɛaakpa tawuu nibii kɛ nitsumɔ.
Naagba kroko hu bafee faŋŋ waa. Bei pii lɛ mɔdɛŋ ni maŋ ko bɔɔ koni eha efee shweshweeshwe lɛ haa mɔ ni bɛŋkɛ lɛ lɛ nuɔ he akɛ ebɛ shweshweeshwe. Nifeemɔ ni woɔ nii amli wu ni yaa nɔ kɛtsaraa nɔ nɛɛ ha maji lɛ kɛ amɛhe shi akaŋ yɛ tawuu nibii afeemɔ mli. Shi nyɛsɛɛ nɛɛ nɔŋŋ lɛ, wekukpaai kpakpai ni bakã maji wuji lɛ ateŋ lɛ eha hiɛnɔkamɔ ni ayɔɔ akɛ aaagu tawuu nibii lɛ mli ewa. Shi kɛjɛ no beaŋ kɛbaa nɛɛ, Gulf Ta lɛ kɛ agbɛnɛ naagbai ni yɔɔ tsutsu Yugoslavia lɛ efite hiɛnɔkamɔ ni mɛi pii yɔɔ akɛ aaagu tawuu nibii lɛ. Aaafee afii enumɔ ni eho nɛɛ lɛ, Time wolo tɛtrɛɛ lɛ kɛɛ: “Eyɛ mli akɛ béi lɛ eba naagbee moŋ, shi je lɛ ebafee he ko ni yɔɔ oshara waa moŋ fe he ni oshara fioo ko yɔɔ.”
Suɔmɔ ni Ayɔɔ akɛ Aaaná Jeŋ Fɛɛ “Polisifonyo”
Mɛi babaoo ni susuɔ enɛ he lɛ muɔ sane naa akɛ jeŋ nɔyeli hegbɛ kome kɛ asraafoi ni yɔɔ hewalɛ saŋŋ ni amɛkɛaabu mɔ fɛɛ mɔ he lɛ he miihia adesai. Akɛni Jeŋmaji Ekomefeemɔ gbɛjianɔtoo lɛ loo jeŋ asraafoi ni he wa fe fɛɛ lɛ eko kwraa nyɛɛɛ afee enɛ hewɔ lɛ, mɛi komɛi nuɔ he akɛ hiɛnɔkamɔ fioo ko pɛ yɔɔ kɛha wɔsɛɛ be. Shi kɛ okpɛlɛ Biblia lɛ nɔ akɛ Nyɔŋmɔ Wiemɔ lɛ, ekolɛ obaasusu kɛji Nyɔŋmɔ Ofe lɛ baatsu nii ni he hiaa waa nɛɛ he nii.
Ani Mɔ ni Biblia lɛ tsɛɔ lɛ akɛ “suɔmɔ kɛ hejɔlɛ Nyɔŋmɔ lɛ” kɛ asraafoi ahewalɛ baaha atsu jalɛsaneyeli he nii? Kɛ nakai ni lɛ, mɛɛ asraafoi ekɛbaatsu nii? Ŋmɛnɛŋmɛnɛ asraafoi babaoo jajeɔ akɛ amɛyɛ Nyɔŋmɔ sɛɛfimɔ, shi ani amɛmiitsu Nyɔŋmɔ suɔmɔnaa nii ahe nii lɛɛlɛŋ? Aloo ani Nyɔŋmɔ yɛ gbɛ kroko ni eeetsɔ nɔ ekɛ ehe awo mli ni ekɛ toiŋjɔlɛ kɛ shweshweeshwe shihilɛ aba?—2 Korintobii 13:11.
Nyɔŋmɔ Ofe lɛ tsu klɛŋklɛŋ atuatsemɔ lɛ he nii kɛtsɔ Adam kɛ Hawa ni eshwie amɛ kɛjɛ Eden ni ekɛ kerubim damɔ jɛmɛ koni ekaha amɛku amɛsɛɛ kɛba lɛ nɔ. Etswa eyiŋ ni eto akɛ ebaajie atua fɛɛ ni atseɔ ashiɔ enɔyeli lɛ kɛya lɛ hu he adafi. (1 Mose 3:15) Ani Nyɔŋmɔ kɛ asraafoi baatsu no he nii?
Biblia lɛ gbaa wɔ bei ni Nyɔŋmɔ kɛ asraafoi tsu nii kɛtsu ekojomɔi ahe nii lɛ he sane. Ákɛ nɔkwɛmɔnɔ lɛ, maŋtsɛyelii ni yɔɔ Kanaan shikpɔŋ nɔ lɛ kɛ kooloi ná bɔlɛ, amɛkɛ gbekɛbii shã afɔle, ni amɛwuu tai ni mɔbɔnalɛ ko kwraa bɛ mli. Nyɔŋmɔ wo amɛhiɛkpatamɔ kwraa he akpɔ ni ekɛ Yoshua asraafoi lɛ tsu nii kɛtsu nakai kojomɔ lɛ he nii. (5 Mose 7:1, 2) Nakai nɔŋŋ hu Maŋtsɛ David asraafoi lɛ tsu Nyɔŋmɔ kojomɔ he nii eshi Filistibii lɛ, ni ekɛfee bɔ ni Nyɔŋmɔ baakpata efɔŋfeemɔ fɛɛ hiɛ yɛ enaagbee kojomɔ gbi lɛ nɔ lɛ he nɔkwɛmɔnɔ.
Nakai nibii ni ba lɛ tsɔɔ mɔ nii. Yehowa fee he nɔkwɛmɔnɔ ekɛtsɔɔ akɛ, ebaanyɛ ekɛ asraafoi atsu nii koni ekɛha gbɔmɛi afee shweshweeshwe. Yɛ anɔkwale mli lɛ, Yehowa yɛ asraafoi komɛi ni yɔɔ sɔrɔto kwraa ni baatsu jeŋ muu fɛɛ atua fɛɛ atua ni atseɔ ashiɔ enɔyeli lɛ he nii.
“Yehowa Zebaot”
Biblia lɛ kɛ wiemɔ “Yehowa Zebaot” loo “Yehowa, tai a-Nyɔŋmɔ” (NW) tsuɔ nii fe shii 250. Titri lɛ wiemɔ lɛ tsɔɔ gbɛhe ni Nyɔŋmɔ yɔɔ akɛ mɔ ni yɔɔ ŋwɛibɔfoi asraafoi babaoo anɔ hewalɛ. Yɛ be ko mli lɛ, gbalɔ Mikaia kɛɛ Maŋtsɛmɛi ni ji Ahab kɛ Yehoshafat akɛ: “Mina Yehowa tá esɛi lɛ nɔ, ni ŋwɛi ta lɛ fɛɛ damɔ emasɛi yɛ eninejurɔ kɛ ebɛku.” (1 Maŋtsɛmɛi 22:19) Aawie ŋwɛibɔfoi asraafoi ahe yɛ biɛ. Yehowa kɛ nɛkɛ asraafoi nɛɛ tsu nii kɛbu ewebii ahe. Beni awo Dotan maŋ lɛ he ká lɛ, Elisha sɔɔlɔ lɛ nijiaŋ je wui. Shi kɛlɛ, bɔni afee ni awo lɛ hewalɛ lɛ, Nyɔŋmɔ ha ena emumɔŋ bɔɔnii asraafoi lɛ he naakpɛɛ ninaa. “Yehowa gbele oblanyo lɛ hiŋmɛii, ni ena nii: ni naa, gɔŋ lɛ nɔ eyi tɔ kɛ la okpɔŋɔi kɛ shwiilii.”—2 Maŋtsɛmɛi 6:15-17.
Ani nifeemɔi nɛɛ tsɔɔ akɛ Nyɔŋmɔ fiɔ asraafoi asɛɛ ŋmɛnɛ? Ekolɛ Kristendom asraafoi komɛi baajaje akɛ Nyɔŋmɔ asraafoi ji amɛ. Mɛi babaoo ebi koni osɔfoi ajɔɔ amɛ. Shi bei babaoo lɛ Kristendom asraafoi lɛ kɛ amɛhe wuɔ ta amɛshiɔ nanemɛi heyelilɔi. Afii oha nɛɛ mli jeŋ tai enyɔ lɛ je shishi yɛ asraafoi ni jajeɔ akɛ Kristofoi ji amɛ lɛ ateŋ. Enɛ nyɛŋ afee Nyɔŋmɔ nitsumɔ. (1 Yohane 4:20) Yɛ be mli ni nakai asraafoi lɛ baanyɛ ajaje akɛ amɛwuɔ kɛha toiŋjɔlɛ lɛ, ani Yesu fã esɛɛnyiɛlɔi lɛ akɛ amɛto asraafoi ni tamɔ nɛkɛ ahe gbɛjianɔ bɔni afee ni amɛkɛbɔ mɔdɛŋ akɛ amɛkɛaatsĩ toiŋjɔlɛ ni afiteɔ yɛ je lɛŋ lɛ naa?
Toiŋjɔlɛ mlifoo ni naa wa ba beni basabasafeelɔi akuu ni hiɛ tawuu nii lɛ mɔ Yesu yɛ abɔɔ ni ekɛ ekaselɔi lɛ sɔleɔ yɛ mli lɛ mli lɛ. Kaselɔi lɛ ateŋ mɔ kome kɛ klante bã nuu ko yɛ basabasafeelɔi lɛ ateŋ. Yesu kɛ nakai be lɛ tsu nii kɛtsɔɔ shishitoo mla ko ni he hiaa lɛ mli. Ekɛɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ. Aloo osusuɔ akɛ minyɛŋ mitsɛ fai makpa ni amrɔ nɛɛ nɔŋŋ eeeha mi ŋwɛibɔfoi fe asafoi nyɔŋma kɛ enyɔ?” Yesu yɛ asraafoi babaoo ni ebaanyɛ ekɛ fãmɔ aha amɛ, shi akɛ Petro fatako he akɛ asraafonyo yɛ mli, asaŋ akɛ adesa ko kwraa fatako he. Shi moŋ átsɛ Petro kɛ Yesu sɛɛnyiɛlɔi krokomɛi lɛ koni amɛbafee “gbɔmɛi ahe wolɛi.” (Mateo 4:19; 26:47-53) Ŋmɛlɛtswai fioo komɛi asɛɛ lɛ, Yesu ha shihilɛ lɛ fee faŋŋ eha Pilato. Ekɛɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.” (Yohane 18:36) Ákɛ nɔ ni tamɔɔɔ David maŋtsɛyeli ni ato shishi yɛ shikpɔŋ lɛ nɔ lɛ, Maŋtsɛyeli ni Nyɔŋmɔ kɛha Yesu lɛ yɛ ŋwɛi ni ekɛ toiŋjɔlɛ baaba shikpɔŋ lɛ nɔ.
Nyɔŋmɔ Asraafoi lɛ Tee Ta
Etsɛŋ ni Nyɔŋmɔ asraafoi lɛ baatsu nii. Beni Kpojiemɔ lɛ tsɔɔ bɔ ni ta ni kã wɔhiɛ lɛ baatamɔ aha lɛ mli lɛ, etsɛ Yesu akɛ “Nyɔŋmɔ wiemɔ lɛ.” Wɔkaneɔ akɛ: “Tai ni yɔɔ ŋwɛi lɛ tara okpɔŋɔi yɛji anɔ kɛnyiɛ esɛɛ, ni amɛwo klala yɛŋ ni he tse. Ni tsi ni naa ba jɛɔ edaaŋ, koni ekɛ no atswia jeŋmajiaŋbii lɛ anii.” Biblia lɛ kɛɔ akɛ, nɛkɛ ta nɛɛ kɛ “shikpɔŋ lɛ nɔ maŋtsɛmɛi lɛ kɛ amɛtai” lɛ anaagbee baaba. Yɛ mɛi krokomɛi ni nyɛɛɛ ajie amɛnɔkwayeli kpo amɛtsɔɔ Nyɔŋmɔ lɛ agbɛfaŋ lɛ, gbalɛ lɛ kɛfataa he akɛ: “Mɛi ni shwɛ lɛ, akɛ mɔ ni ta okpɔŋɔ lɛ nɔ lɛ tsi ni jɛɔ edaaŋ lɛ gbe amɛ.” Ahaŋ Satan Abonsam po anyɛ nɔ ko afee. Enɛ baaha aná jeŋ toiŋjɔlɛ ni asraafoi bɛ mli lɛɛlɛŋ.—Kpojiemɔ 19:11-21; 20:1-3.
Feemɔ Jeŋ ni Ta Bɛ Mli lɛ He Mfoniri yɛ Ojwɛŋmɔŋ
Ani obaanyɛ ofee jeŋ ni shweshweeshwe shihilɛ yɔɔ mli aahu akɛ asraafoi ahe ehiaaa yɛ mli lɛ he mfoniri yɛ ojwɛŋmɔŋ? Biblia mli lala ko kɛɔ akɛ: “Nyɛbaa nyɛbakwɛa Yehowa nitsumɔi lɛ, nɔ̃ hiɛkpatamɔ ni eha eba shikpɔŋ lɛ nɔ lɛ! Ehaa tai asɛɛ foɔ kɛyaa shikpɔŋ lɛ naagbeehei lɛ.”—Lala 46:9, 10.
Mɛɛ heyeli enɛ baafee nɛkɛ! Feemɔ nyɛ ni eeenyɛ eba akɛ yɛ naagbee mli lɛ abaajie adesai aweku lɛ kɛjɛ jatsu ni fiteɔ nii ni ji asraafoi kɛ amɛtsɔnei ahe nyɔmɔ ni awoɔ lɛ mli lɛ he mfoniri yɛ ojwɛŋmɔŋ! Gbɔmɛi baanyɛ amɛkɛ amɛhewalɛi atsu nii koni amɛkɛha shihilɛ aya hiɛ aha mɔ fɛɛ mɔ, koni amɛkɛha shikpɔŋ nɔ atse koni asaa adu tsei yɛ nɔ. Abaaná hegbɛi heei ni akɛaafee nibii ni he baaba sɛɛnamɔ yɛ anɔkwayeli mli aha adesai.
Nɛkɛ shiwoo nɛɛ baaná emlibaa yɛ jeŋ fɛɛ: “Anuŋ yiwalɛ he dɔŋŋ yɛ oshikpɔŋ lɛ nɔ, anuŋ fitemɔ loo hiɛkpatamɔ he dɔŋŋ yɛ ohusui lɛ amli.” (Yesaia 60:18) Ebaŋ lɛ gbi ko gbi ko dɔŋŋ akɛ abobalɔi akpekpei abɔ ni nijiaŋ eje wui lɛ aaake yuu kɛjɛ tawuuhei, ni anyɛ amɛ nɔ koni amɛshi amɛshiai kɛ amɛnibii koni amɛyahi nsarai kɛ emli piŋmɔ mli. Ebaŋ lɛ gbi ko gbi ko dɔŋŋ akɛ gbɔmɛi aaaye suɔlɔi ni agbegbei amɛ loo ato amɛ kpa yɛ maji ateŋ béi amli lɛ ahe awerɛho. Yehowa ŋwɛi Maŋtsɛ lɛ baato jeŋ toiŋjɔlɛ ni hiɔ shi daa lɛ shishi. “Jalɔ aaafrɔke yɛ egbii lɛ amli, ni hejɔlɛ aaafa kɛyashi beyinɔ ni nyɔɔŋtsere bɛ dɔŋŋ. Eeekpɔ̃ amɛsusuma kɛaajɛ fifiamɔ kɛ yiwalɛ mli.”—Lala 72:7, 14.
Nɔ ni yɔɔ miishɛɛ babaoo po lɛ, miishɛɛ baahi gbɔmɛi ni ekase akɛ amɛhe tsɛŋ mɛi shi amɛbaakase Nyɔŋmɔ suɔmɔ gbɛ̀i lɛ ateŋ. Nyɔŋmɔ Wiemɔ lɛ gbaa efɔ̃ɔ shi akɛ: “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” Te mɛi ni le Yehowa ni amɛsumɔɔ lɛ lɛ ateŋ ni aaahi lɛ baatamɔ aha tɛŋŋ? Nakai wolo lɛ nɔŋŋ gbaa akɛ: “Nii ni jalɛ lɛ aaatsu ji hejɔlɛ, ni jalɛ lɛ mli sɛɛnamɔ ji hejɔɔmɔ kɛ toiŋjɔlɛ kɛaatee naanɔ; ni mimaŋ lɛ aaahi shi yɛ hejɔlɛ shia, kɛ shihilɛhe ni yɔɔ shweshweeshwe, kɛ hejɔɔmɔhe ni yɔɔ kpoo.”—Yesaia 11:9; 32:17, 18.
Gbɔmɛi ni atswa amɛhemɔkɛyeli ama Biblia mli nilee nɔ lɛ yɔseɔ akɛ Nyɔŋmɔ asraafoi lɛ efee klalo akɛ amɛaatsuu shikpɔŋ lɛ he koni akɛjie mɛi fɛɛ ni nyɛɔ toiŋjɔlɛ lɛ kɛjɛ nɔ. Nɛkɛ nilee nɛɛ haa amɛnáa ekãa koni amɛtsu nɔ ni Biblia lɛ kɛɔ akɛ “aaaba mli akɛ naagbee gbii lɛ amli lɛ” he nii. No ji: “Amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Yesaia 2:2-4.
Gbɔmɛi ni jɛ maji babaoo amli ni amɛbatsɔmɔ Yehowa Odasefoi lɛ etsi amɛhe kɛjɛ ‘tawuu kasemɔ’ he momo. Amɛkɛ amɛhe efɔ̃ Nyɔŋmɔ ŋwɛi asraafoi lɛ ahebuu lɛ nɔ. Kɛtsɔ Biblia lɛ ni okɛ amɛ aaakase lɛ nɔ lɛ, bo hu obaanyɛ oná hekɛnɔfɔɔ ni tamɔ nakai nɔŋŋ.
[He ni Sane lɛ Jɛ]
U.S. National Archives Photo