Abaanyɛ Aná Hekɛnɔfɔ̃ɔ Ekoŋŋ!

EYƐ mli akɛ sane ni eba hekɛnɔfɔ̃ɔ he bianɛ lɛ ji “naagbee gbii lɛ” he okadi moŋ, shi hekɛnɔfɔ̃ɔ ni bɛ lɛ hu bafee faŋŋ yɛ afii akpei abɔ ni eho lɛ mli. (2 Timoteo 3:1) Klɛŋklɛŋ lɛ, eba yɛ he ko ni asusuuu kwraa akɛ eeeba lɛ nakai yɛ jɛmɛ—yɛ paradeiso. Biblia lɛ wieɔ he ni eba yɛ lɛ he akɛ: “Yehowa Nyɔŋmɔ fee trom yɛ Eden yɛ bokagbɛ, ni eŋɔ gbɔmɔ ni eshɔ̃ lɛ eto jɛi. Ni Yehowa Nyɔŋmɔ ha tsei fɛɛ ni kɛ́ akwɛ ni aaaba mɔ tsine ni amɛhi ha yeli hu kwɛ̃ kɛjɛ shikpɔŋ sũ lɛŋ, kɛ wala tso lɛ yɛ trom lɛ teŋ kɛ ekpakpa kɛ efɔŋ lee tso lɛ.”—1 Mose 2:8, 9.

Ŋmalɛ mli kukuji ni nyiɛ sɛɛ lɛ haa anáa nɔ ni enɛ kɛ sane ni eba hekɛnɔfɔ̃ɔ he ŋmɛnɛŋmɛnɛ lɛ yɔɔ feemɔ lɛ he shishinumɔ. Wɔkaneɔ akɛ: “Yehowa Nyɔŋmɔ wo gbɔmɔ lɛ kita ekɛɛ: Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) Ani Adam yɛ nɔ ko ni eeedamɔ nɔ eje nɔ ni Yehowa kɛɛ lɛ he ŋwane?

Wɔkaneɔ kɛtsáa nɔ akɛ: “Onufu le ŋaa fe ŋa nɔ kooloi fɛɛ ni Yehowa Nyɔŋmɔ fee lɛ, ni ekɛɛ yoo lɛ akɛ: Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tseiayibii lɛ fɛɛ eko lɛ? Ni yoo lɛ kɛɛ onufu lɛ akɛ: Trom lɛ mli tseiayibii lɛ eko wɔyeɔ; shi tso ni yɔɔ trom lɛ teŋ lɛ nɔ yibii lɛ ni Nyɔŋmɔ kɛɛ: Nyakayea eko, ni nyɛkataa he tete, koni nyɛkagboi. Ni onufu lɛ kɛɛ yoo lɛ akɛ: Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ. Ni beni yoo lɛ na akɛ tso lɛ hi ha yeli, ni efeɔ hiŋmɛii akɔnɔ, ni tso lɛ baa mɔ tsine, ni etsɔɔ mɔ nii lɛ, etse enɔ yibii lɛ eko ni eye, ni eha ewu ni kɛ lɛ yɔɔ lɛ hu eko, ni eye.”—1 Mose 3:1-6.

Akɛni Adam kɛ Hawa ku amɛhiɛ amɛshwie Nyɔŋmɔ kɔkɔbɔɔ ni yɔɔ faŋŋ lɛ nɔ hewɔ lɛ, amɛjie lɛ kpo amɛtsɔɔ akɛ amɛbɛ hekɛnɔfɔ̃ɔ yɛ Yehowa mli. Amɛfee amɛnii tamɔ Nyɔŋmɔ henyɛlɔ Satan ni kɛ Hawa wie kɛtsɔ onufu diɛŋtsɛ nɔ lɛ. Satan naaa gbɛ ni Yehowa tsɔɔ nɔ eyeɔ nɔ lɛ mli hekɛnɔfɔ̃ɔ. Yɛ enɛ kɛ tsui ni woɔ ehe nɔ ni shweɔ nii wuji hewɔ lɛ, etse atua eshi Nyɔŋmɔ, ni elaka adesai koni amɛfee nakai nɔŋŋ. Etsɔ amɛyiŋ koni amɛsusu akɛ esaaa akɛ akɛ hiɛ fɔ̃ɔ Nyɔŋmɔ nɔ.

Mɛni Jɛ Mli Ba? Wekukpaai ni Miishɛɛ Bɛ Mli

Ekolɛ ona akɛ ewaa kɛhaa aŋkroaŋkroi ni bɛ hiɛkɛnɔfɔ̃ɔ yɛ mɛi krokomɛi amli lɛ akɛ amɛ aaahiɛ naanyobɔi amli. Publilius Syrus, klɛŋklɛŋ afii oha D.Ŋ.B. lɛ mli Latin niŋmalɔ ko ŋma akɛ: “Hekɛnɔfɔ̃ɔ ji nɔ̃ pɛ ni haa naanyobɔɔ mli waa.” Kɛtsɔ Adam kɛ Hawa atuatsemɔ nifeemɔ nɔ lɛ, amɛtsɔɔ akɛ amɛbɛ hiɛkɛnɔfɔ̃ɔ yɛ Nyɔŋmɔ mli. No hewɔ lɛ, eka shi faŋŋ akɛ nɔ ko kwraa bɛ ni Nyɔŋmɔ aaadamɔ nɔ aná hiɛkɛnɔfɔ̃ɔ yɛ amɛmli. Akɛni hiɛkɛnɔfɔ̃ɔ, loo hekɛnɔfɔ̃ɔ fite hewɔ lɛ, klɛŋklɛŋ adesai lɛ laaje Nyɔŋmɔ naanyobɔɔ. Nɔ ko kwraa bɛ ni tsɔɔ akɛ be ko ba ni Yehowa kɛ amɛ wie ekoŋŋ beni ebu amɛ atuatsemɔ lɛ fɔ́ lɛ sɛɛ.

Wekukpaa ni yɔɔ Adam kɛ Hawa teŋ lɛ hu fite. Yehowa bɔ Hawa kɔkɔ akɛ: “Fá maha ohejaramɔ kɛ ohɔŋɔɔ afá; jaramɔ mli ooofɔ bii yɛ, ni owu lɛ sɛɛgbɛ oootao, ni lɛ eeeye onɔ.” (1 Mose 3:16; wɔma efã ko nɔ mi.) The Jerusalem Bible lɛ kɛɛ akɛ: “Ebaaye onɔ nuntsɔ.” Yɛ nɔ najiaŋ ni Adam kɛ yitsoyeli ni suɔmɔ yɔɔ mli aaatsu nii yɛ eŋa lɛ nɔ taakɛ Nyɔŋmɔ taoɔ lɛ, amrɔ nɛɛ ebatsɔ nuntsɔ, ni eeye enɔ nuntsɔ.

Beni amɛfee esha lɛ, Adam bɔ mɔdɛŋ akɛ eeeŋɔ shwamɔ lɛ efɔ eŋa lɛ nɔ. Yɛ ejwɛŋmɔ naa lɛ, nɔ ni yoo lɛ efee hewɔ ni ashwie amɛ kɛjɛ abɔɔ ni yeɔ emuu mli kɛtee shikpɔŋ ni asako nɔ agbeko naa lɛ nɔ, ni abu amɛ fɔ́ akɛ amɛbaatsu nii dɛŋdɛŋ yɛ shihilɛi ni yeko emuu mli dani amɛbaabote sũ mli lɛ. (1 Mose 3:17-19) Wɔbaanyɛ wɔsusu he jogbaŋŋ ni wɔna akɛ enɛ ji nɔ ni kɛ gbeekpamɔ ni bɛ mɛi enyɔ lɛ ateŋ lɛ ba. Ekolɛ Adam fee nii kɛteke nɔ, ni ewie akɛ eboŋ Hawa toi dɔŋŋ. Eeenyɛ efee akɛ, esusu akɛ esane ja akɛ eeekɛɛ lɛ yɛ gbɛ ko nɔ akɛ, ‘Kɛjɛ amrɔ nɛɛ kɛyaa lɛ, miji nɔkwɛlɔ lɛ!’ Yɛ gbɛ kroko nɔ lɛ, ekolɛ Hawa baana akɛ Adam nyɛɛɛ atsu egbɛnaa nii akɛ weku yitso lɛ he nii, ni no hewɔ lɛ no haaa ená hekɛnɔfɔ̃ɔ yɛ emli. Bɔ fɛɛ bɔ ni fee lɛ, akɛni adesai tsɔɔ akɛ amɛbɛ hekɛnɔfɔ̃ɔ yɛ Nyɔŋmɔ mli hewɔ lɛ, amɛlaaje amɛkɛ lɛ teŋ naanyobɔɔ, ni amɛfite wekukpaa ni yɔɔ amɛteŋ lɛ.

Namɔ Wɔbaanyɛ Wɔkɛ Wɔhiɛ Afɔ̃ Enɔ?

Jeee mɔ fɛɛ mɔ ehe hiaa ni wɔná emli hekɛnɔfɔ̃ɔ, taakɛ Adam kɛ Hawa nɔkwɛmɔnɔ lɛ feɔ he mfoniri lɛ. Te wɔɔfee tɛŋŋ wɔle mɔ ni esa akɛ wɔná hekɛnɔfɔ̃ɔ yɛ emli kɛ mɔ ni esaaa akɛ wɔnáa hekɛnɔfɔ̃ɔ yɛ emli?

Lala 146:3 woɔ ŋaa akɛ: “Nyɛkaŋɔa nyɛhiɛ nyɛfɔ̃a lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.” Ni wɔkaneɔ yɛ Yeremia 17:5-7 akɛ: “Alomɔ gbɔmɔ ni ŋɔɔ ehiɛ efɔ̃ɔ adesa nɔ, ni eŋɔɔ heloo efeɔ enine, ni etsui eje Yehowa he lɛ!” Yɛ gbɛ kroko nɔ lɛ, “ajɔɔ gbɔmɔ ni ŋɔɔ ehiɛ efɔ̃ɔ Yehowa nɔ, ni Yehowa ji ehiɛnɔkamɔ lɛ!”

Akpɛlɛɔ nɔ akɛ, jeee be fɛɛ be eji tɔ̃mɔ akɛ aaaná adesai amli hekɛnɔfɔ̃ɔ. Nakai ŋmalɛi lɛ miitsɔɔ sane oti lɛ mli kɛkɛ akɛ ejeee tɔ̃mɔ kɔkɔɔkɔ akɛ aaaná Nyɔŋmɔ mli hekɛnɔfɔ̃ɔ, shi hekɛnɔfɔ̃ɔ ni aaaná yɛ adesai ni yeee emuu lɛ amli lɛ baanyɛ ekɛ mɔ abote amanehulu mli yɛ bei komɛi amli. Ákɛ nɔkwɛmɔnɔ lɛ, gbɔmɛi ni kɛ amɛhiɛ fɔ̃ɔ adesai anɔ koni amɛnine ashɛ nɔ ni Nyɔŋmɔ pɛ baanyɛ afee lɛ nɔ lɛ—ni ji yiwala ni ehereɔ kɛ toiŋjɔlɛ ni yeɔ emuu ni yɔɔ shweshweeshwe ni ekɛhaa lɛ—yaboteɔ nijiaŋwujee mli.—Lala 46:10; 1 Tesalonikabii 5:3.

Yɛ anɔkwale mli lɛ, esa akɛ akɛ he afɔ̃ adesai kɛ adesai agbɛjianɔtoi anɔ kɛyashi he ni amɛfeɔ amɛnii bɔ ni kɛ Nyɔŋmɔ yiŋtoi kpãa gbee ni jieɔ Nyɔŋmɔ jamɔ shishitoo mlai akpo lɛ pɛ nɔ. No hewɔ lɛ, kɛ́ wɔɔwo mɛi krokomɛi hewalɛ koni amɛná hekɛnɔfɔ̃ɔ yɛ wɔmli lɛ, esa akɛ wɔwie anɔkwale, ni wɔye anɔkwa ni wɔfee mɛi ni anyɛɔ akɛ he fɔ̃ɔ amɛnɔ. (Abɛi 12:19; Efesobii 4:25; Hebribii 13:18) Kɛ wɔfee wɔnii yɛ Biblia mli shishitoo mlai kɛ gbeekpamɔ naa lɛ, no dani hiɛkɛnɔfɔ̃ɔ ni mɛi krokomɛi náa yɛ wɔmli lɛ baafee nɔ ni ja ni efee nyɛmɔ kɛ hewalɛwoo jɛɛhe kɛha wɔ fɛɛ.

Hekɛnɔfɔ̃ɔ ni Aaaná Ekoŋŋ

Yehowa Odasefoi yɛ nɔ ni mli wa waa ni amɛaadamɔ nɔ amɛná Nyɔŋmɔ mli hekɛnɔfɔ̃ɔ koni amɛwo mɛi krokomɛi hewalɛ ni amɛfee nakai nɔŋŋ. Yehowa yeɔ anɔkwa ni eji anɔkwafo, mɔ ni abaanyɛ akɛ he afɔ̃ enɔ be fɛɛ be koni efee nɔ ni ewie lɛ, ejaakɛ “Nyɔŋmɔ nyɛŋ emale.” Hekɛnɔfɔ̃ɔ ni aaaná yɛ Nyɔŋmɔ ni yɔɔ suɔmɔ lɛ mli lɛ haŋ nine anyɛ shi kɔkɔɔkɔ.—Hebribii 6:18; Lala 94:14; Yesaia 46:9-11; 1 Yohane 4:8.

Aawo gbɔmɛi ni efee ekome yɛ Yehowa mli hekɛnɔfɔ̃ɔ ni amɛná hewɔ ni amɛhiɔ shi yɛ eshishitoo mlai anaa lɛ hewalɛ waa koni amɛná hekɛnɔfɔ̃ɔ yɛ amɛteŋ mɔ fɛɛ mɔ mli. Kwɛ bɔ ni eji miishɛɛ akɛ aaaná gbɔmɛi ni abaanyɛ akɛ he afɔ̃ amɛnɔ yɛ jeŋ ni sane eba hekɛnɔfɔ̃ɔ he yɛ mli lɛ mli! Kwɛ bɔ ni je lɛ baafee srɔto kɛ́ wɔɔnyɛ wɔná hekɛnɔfɔ̃ɔ kwraa yɛ nɔ ni mɔ fɛɛ mɔ kɛɔ loo efeɔ lɛ mli! Nakai ebaaba lɛ yɛ jeŋ hee ni baa ni Nyɔŋmɔ ewo shi yɛ he lɛ mli. Sane baŋ hekɛnɔfɔ̃ɔ he kɔkɔɔkɔ dɔŋŋ!

Ani obaasumɔ ni ohi shi yɛ nakai beaŋ? Kɛ nakai lɛ, Yehowa Odasefoi miifɔ̃ nine kɛmiitsɛ bo koni obawaje hekɛnɔfɔ̃ɔ ni oyɔɔ yɛ Nyɔŋmɔ kɛ eshiwoi amli lɛ, kɛtsɔ nibii babaoo ni oookase yɛ nɔ ni etaoɔ kɛha wala namɔ mli lɛ nɔ. Biblia lɛ kasemɔ lɛ kɛ odaseyeli haa ni tsɔɔ akɛ Nyɔŋmɔ yɛ, ni ákɛ eyɛ adesai ahilɛ-kɛhamɔ he miishɛɛ, ni ákɛ etsɛŋ ni ebaatsɔ e-Maŋtsɛyeli lɛ nɔ ejie je lɛŋ naagbai kɛya. Gbɔmɛi akpekpei abɔ ekase bɔ ni amɛaafee amɛná hekɛnɔfɔ̃ɔ yɛ Nyɔŋmɔ kɛ e-Wiemɔ ni ji Biblia lɛ mli. Yehowa Odasefoi kɛ miishɛɛ baafee Biblia kasemɔ he gbɛjianɔtoo ni amɛheee nɔ ko yɛ he yɛ maŋ shiɛmɔ mli lɛ he nɔkwɛmɔnɔ amɛtsɔɔ bo. Aloo ŋmaa mɛi ni fee wolo tɛtrɛɛ nɛɛ kɛha saji babaoo.

[Wiemɔ ni akɔ ni akɛmiitsu nii ni yɔɔ baafa 5]

Nyɔŋmɔ mli hekɛnɔfɔ̃ɔ ni abɛ lɛ fiteɔ adesai ateŋ wekukpaai

[Wiemɔ ni akɔ ni akɛmiitsu nii ni yɔɔ baafa 6]

Esa akɛ aná hekɛnɔfɔ̃ɔ yɛ adesai amli kɛyashi he ni bɔ ni amɛfeɔ amɛnii amɛhaa lɛ kɛ Nyɔŋmɔ jamɔ shishitoo mlai kpãa gbee pɛ nɔ