Betel Maŋtiase Kpakpa kɛ Efɔŋ Lɛ

MAŊTIASEI komɛi baheɔ gbɛi waa—loo abaleɔ amɛ waa kɛ nɔ fɔŋ feemɔ—yɛ nibii ni ba yɛ amɛ mli lɛ hewɔ. Shi kɛlɛ, Betel yɛ srɔto yɛ gbɛ nɔ akɛ abale lɛ akɛ ekpakpa kɛ efɔŋ fɛɛ. Blematsɛ Yakob tsɛ́ maŋtiase lɛ akɛ Betel, ni shishi ji “Nyɔŋmɔ We.” Shi yɛ afii akpe ko sɛɛ lɛ, gbalɔ Hoshea tsɛ́ maŋtiase lɛ akɛ “Awuiyeli Shia.” Te fee tɛŋŋ ni maŋtiase nɛɛ tsake kɛjɛ ekpakpa kɛtee efɔŋ? Ni mɛni wɔbaanyɛ wɔkase kɛjɛ eyinɔsane lɛ mli?

Betel ni akɛfataa Nyɔŋmɔ webii ahe lɛ je shishi yɛ afi 1943 D.Ŋ.B. beni Abraham yɔɔ wala mli lolo lɛ. Yɛ nakai beaŋ lɛ, ale maŋtiase lɛ akɛ Luz, ni ji eshishijee Kanaan gbɛi lɛ. Eyɛ gɔŋ shikpɔŋ ko ni kɛ Yerusalem kooyigbɛ lɛ jɛkɛmɔ aaashɛ kilomitai 17 lɛ nɔ. Feemɔ Abraham kɛ enyɛmi bi Lot he mfoniri yɛ ojwɛŋmɔ mli okwɛ, ní amɛdamɔ he ko ni hi jogbaŋŋ yɛ gɔji ni yɔɔ Betel masɛi lɛ ayiteŋ shɔŋŋ ni amɛmiikwɛ Yordan Jɔɔ lɛ shishigbɛ shikpɔŋ kplanaa ni baa nii lɛ kɛmiijɛ jɛmɛ. Abraham kɛ naajɔlɛ gbala Lot jwɛŋmɔ kɛba bɔ ni ewa akɛ amɛaatsɔɔ hei ni esa akɛ amɛ kooloi babaoo lɛ aye nii yɛ lɛ nɔ: “Ofainɛ, kaaha béi miiba mikɛo teŋ, kɛ mikooloo kwɛlɔi lɛ kɛ okooloo kwɛlɔi lɛ ateŋ; shi nyɛmimɛi ji wɔ. Ani jeee shikpɔŋ muu lɛ fɛɛ kã ohiɛ nɛɛ? Miikpao fai, tse ohe kɛjɛ mihe; kɛji okɔ abɛkugbɛ lɛ, no lɛ makɔ ninejurɔgbɛ, ni kɛji okɔ ninejurɔgbɛ lɛ, no lɛ makɔ abɛkugbɛ.”—1 Mose 13:3-11.

Abraham emaaa ehegbɛi anɔ mi koni ehala klɛŋklɛŋ. Yɛ no najiaŋ lɛ, eŋmɛ nuu lɛ ni eye lɛ onukpa lɛ gbɛ koni ehala he ni hi fe fɛɛ. Wɔbaanyɛ wɔkase Abraham su kpakpa lɛ. Wɔbaanyɛ wɔba béi saji ashi kɛtsɔ hiɛ ni wɔɔtsɔ wɔwie yɛ naajɔlɛ mli lɛ nɔ, ní wɔkafee pɛsɛmkunya.—Romabii 12:18.

Yɛ afii komɛi asɛɛ beni Abraham nabi Yakob yashi buu yɛ Luz lɛ, ela lamɔ ko ni ekaaa. Ena “atswere ko ma shikpɔŋ, ni eyiteŋ yashi ŋwɛi, ni naa, Nyɔŋmɔ bɔfoi miikwɔ miikpeleke. Ni naa, Yehowa damɔ yiteŋ.” (1 Mose 28:11-19; okɛto Yohane 1:51 he.) Lamɔ lɛ hiɛ shishinumɔ ko ni he hiaa. Bɔfoi ni Yakob na lɛ baasɔmɔ lɛ koni ekɛha eseshi lɛ he shiwoo ni Nyɔŋmɔ kɛha lɛ lɛ aba mli. Yehowa gbɛhe ni awo nɔ yɛ atswere lɛ yiteŋ lɛ tsɔɔ akɛ ebaakudɔ bɔfoi lɛ yɛ nitsumɔ nɛɛ mli.

Nɛkɛ ŋwɛi sɛɛfimɔ ni ama nɔ mi nɛɛ tsirɛ Yakob waa. Beni ehiɛ tsɛ̃ kɛjɛ lamɔ lɛ mli lɛ, etsɛ́ jɛmɛ akɛ Betel, ni shishi ji “Nyɔŋmɔ We,” ni ekã Yehowa kita akɛ: “Nibii fɛɛ ni oooha mi lɛ, maŋɔ mlijaai nyɔŋma mli ekome mahao.”a (1 Mose 28:20-22) Beni eyɔse akɛ nɔ fɛɛ nɔ ni eyɔɔ lɛ jɛ Nyɔŋmɔ ŋɔɔ lɛ, esumɔ koni ekɛ emli eko ni hi saŋŋ aha akɛ nɔ ni ekɛtsɔɔ ehiɛsɔɔ ni eyɔɔ.

Ŋmɛnɛ hu Kristofoi yɛ bɔfoi ni miisɔmɔ yɛ amɛgbɛfaŋ. (Lala 91:11; Hebribii 1:14) Amɛ hu amɛbaanyɛ amɛjie hiɛsɔɔ ni amɛyɔɔ kɛha amɛjɔɔmɔi lɛ fɛɛ kpo kɛtsɔ ‘Nyɔŋmɔ shi ni amɛaada babaoo kɛteke nɔ’ lɛ nɔ.—2 Korintobii 9:11, 12.

Yɛ be ni sa mli lɛ, Yakob seshibii lɛ batsɔ maŋ. Yoshua ni ji amɛhiɛnyiɛlɔ lɛ ye Betel maŋtsɛ wɔŋjalɔ lɛ nɔ kunim yɛ be ni bɛŋkɛ Kanaan kunimyeli lɛ shishijee mli. (Yoshua 12:16) Yɛ Kojolɔi lɛ abeaŋ lɛ, gbalɔyoo Debora hi shi yɛ Betel masɛi ni ejaje Yehowa wiemɔ lɛ etsɔɔ gbɔmɛi lɛ. Samuel hu yaa Betel daa yɛ be mli ni ekojoɔ Israel maŋ lɛ.—Kojolɔi 4:4, 5; 1 Samuel 7:15, 16.

Betel Batsɔ Hemɔkɛyeli Kwamɔ Shikwɛ̃ɛhe

Shi Betel ni akɛfataa jamɔ krɔŋŋ he lɛ ba naagbee yɛ be mli ni aja Maŋtsɛyeli lɛ mli lɛ sɛɛ yɛ afi 997 D.Ŋ.B. lɛ. Maŋtsɛ Yerobeam fee Betel akɛ tsina amaga jamɔ shikwɛ̃ɛhe, tsina amaga ni asusu akɛ edamɔ shi kɛha Yehowa lɛ. (1 Maŋtsɛmɛi 12:25-29) No hewɔ ni beni egbaa Betel hiɛkpatamɔ lɛ, Hoshea tsɛ́ lɛ akɛ “Bet-Awen,” ni shishi ji “Awuiyeli Shia.”—Hoshea 10:5, 8.

Eyɛ mli akɛ Betel ebatsɔ mumɔŋ awuiyeli shikwɛ̃ɛhe moŋ, shi nifeemɔi ni yaa nɔ yɛ jɛmɛ lɛ etee nɔ ekɛ nikasemɔi ni he hiaa eha. (Romabii 15:4) Nikasemɔ ni tamɔ nakai lɛ ateŋ ekome kɔɔ gbalɔ ko ni atsĩii egbɛi atã ni atsu lɛ kɛjɛ Yuda kɛtee Betel koni eyagba afɔleshaalatɛi kɛ osɔfoi ni yɔɔ jɛmɛ lɛ ahiɛkpatamɔ he sane etsɔɔ lɛ he. Yehowa kɛɛ lɛ koni eku esɛɛ kɛya Yuda hu—ní kɛ wuoyigbɛ lɛ jɛkɛmɔ shɛɔ kilomitai fioo lɛ—ní eyeee nii loo enuuu nu. Nɛkɛ gbalɔ nɛɛ kɛ ekãa gba yɛ Yerobeam, Israel maŋtsɛ lɛ hiɛ, ni etsɛ́ koni efɔŋ aba Betel afɔleshaalatɛ lɛ nɔ. Shi egbo Nyɔŋmɔ nɔ toi kɛtsɔ nii ni eye yɛ Betel gbalɔ nuumo ko shia lɛ hewɔ. Mɛni hewɔ? Gbalɔ nuumo lɛ kɛ apasa tsɔɔ mli akɛ Yehowa bɔfo ko efã lɛ koni ejie gbɔfeemɔ kpo etsɔɔ naanyo gbalɔ ko. Toigbele ni gbalɔ ni jɛ Yuda lɛ fee lɛ ha egbo ni eshɛko egbele be.—1 Maŋtsɛmɛi 13:1-25.

Kɛ naanyo heyelilɔ ko kɛ susumɔ ba akɛ wɔfee nɔ ko ni etamɔ nɔ ni ejaaa lɛ, te esa akɛ wɔfee wɔnii wɔha tɛŋŋ? Kaimɔ akɛ ŋaawoo ni jwɛŋmɔ kpakpa yɔɔ sɛɛ lɛ po baanyɛ aye awui kɛ́ eji nɔ ni ejaaa. (Okɛto Mateo 16:21-23 he.) Kɛ wɔtao gbɛtsɔɔmɔ kɛjɛ Yehowa ŋɔɔ kɛtsɔ sɔlemɔ kɛ e-Wiemɔ lɛ kasemɔ nɔ lɛ, wɔbaawii wɔhe kɛjɛ gbalɔ ni atsĩii egbɛi atã lɛ tɔ̃mɔ ni yɔɔ mɔbɔ lɛ he.—Abɛi 19:21; 1 Yohane 4:1.

Aaafee afii 150 komɛi asɛɛ lɛ, gbalɔ Amos hu fã gbɛ kɛtee kooyigbɛ koni eyagba eshi Betel. Amos kɛ ekãa wie eshi etoibolɔi ní ejieee naanyobɔɔ su kpo lɛ, ni osɔfo Amazia, mɔ ni kɛ henɔwomɔ kɛɛ Amos koni ‘ejo foi ni eya Yuda shikpɔŋ lɛ nɔ’ lɛ fata he. Shi Amos kɛɛ Amazia hiɛkpatamɔi ni baaba osɔfo lɛ diɛŋtsɛ shiabii lɛ anɔ ni gbeyeishemɔ ko bɛ mli. (Amos 5:4-6; 7:10-17) Enɔkwɛmɔnɔ lɛ kaiɔ wɔ akɛ Yehowa baanyɛ ewaje esɔɔlɔi ni baa amɛhe shi lɛ.—1 Korintobii 1:26, 27.

Naagbee lɛ, Maŋtsɛ Yosia anɔkwafo ni jɛ Yuda lɛ kumɔ ‘afɔleshaalatɛ lɛ ni yɔɔ Betel lɛ, eshã he grɔŋŋ lɛ ni eshimɔ lɛ mlumlu, ni eshã Ashera lɛ.’ (2 Maŋtsɛmɛi 23:15, 16) Onukpai ni yɔɔ ŋmɛnɛ lɛ baanyɛ amɛkase enɔkwɛmɔnɔ kpakpa lɛ kɛtsɔ ekãa ni amɛkɛaanyiɛ Nyɔŋmɔ gbɛtsɔɔmɔi asɛɛ lɛ nɔ kɛ hiɛ ni amɛaanyiɛ yɛ asafo lɛ ni aaaha ehe atse lɛ mli.

Nibii ni ba yɛ Betel yinɔsane nɛɛ mli lɛ feɔ nɔ ni jɛ jalɛnifeemɔ kɛ awuiyeli mli kɛba, kɛ nɔ ni jɛ Yehowa toiboo kɛ etoigbele mli kɛba lɛ he mfoniri. Yɛ afii komɛi ni tsɔ hiɛ lɛ mli lɛ, Mose kɛ nɛkɛ nii amli halamɔ nɛɛ fɔ̃ Israel maŋ lɛ hiɛ akɛ: “Ŋmɛnɛ gbi nɛɛ mikɛ wala kɛ ekpakpa, gbele kɛ efɔŋ miishwie ohiɛ.” (5 Mose 30:15, 16) Betel yinɔsane lɛ he ni wɔɔsusu lɛ baawo wɔ hewalɛ koni wɔna wɔ diɛŋtsɛ wɔhe yɛ “Nyɔŋmɔ We” ni ji anɔkwa jamɔhe lɛ mli moŋ fe ni wɔɔna wɔhe yɛ “Awuiyeli Shia” lɛ mli.

[Shishigbɛ niŋmai]

[Mfoniri ni yɔɔ baafa 23]

Betel amaŋfɔfeemɔhe, he ni Yerobeam to tsina amaga jamɔ shikwɛ̃ɛhe shishi yɛ lɛ