Ani Obaanyɛ Ohe Biblia lɛ Oye?

BIBLIA lɛ mli hemɔkɛyeli kã he eji nɔ ko ni egbɛ eshwã yɛ ŋmɛnɛŋmɛnɛ jeŋ nɛɛ po mli. Ákɛ nɔkwɛmɔnɔ lɛ, yɛ nyɛsɛɛ nɛɛ Niiamlitaomɔ ko ni afee ni akɛbibii Amɛrikabii saji lɛ mli lɛ, mɛi oha mlijaa 80 tsɔɔ akɛ amɛheɔ amɛyeɔ akɛ Biblia lɛ ji Nyɔŋmɔ Wiemɔ. Kɛji akɛ yibɔ lɛ yaa hiɛ waa tamɔ nakai yɛ he ni oyɔɔ lɛ aloo etamɔɔɔ nakai jio lɛ, obaanyɛ onu shishi akɛ mɛi ni tamɔ nakai ni heɔ amɛyeɔ lɛ miikpa gbɛ akɛ atsɔɔ amɛ Biblia lɛ yɛ sɔlemɔ lɛ mli. Shi bei pii lɛ, atsɔɔɔ amɛ. Ákɛ nɔkwɛmɔnɔ lɛ, susumɔ tsɔɔmɔ ni kɔɔ susuma lɛ toigbalamɔ yɛ gbele sɛɛ lɛ he okwɛ.

Ani atsɔɔ hetsuumɔhe aloo hɛl la ni tsoɔ grigri he sane lɛ yɛ Biblia lɛ mli he ko? Ŋmɛnɛ, nilelɔi pii ni yɔɔ Kristendom lɛ baaha hetoo akɛ dabi. New Catholic Encyclopedia lɛ kɛɔ akɛ: “Anaa yɛ naagbee kwraa akɛ, Katolik tsɔɔmɔ ni kɔɔ hetsuumɔhe lɛ he lɛ ji nɔ ni damɔ blemasane nɔ, jeee Ŋmalɛ Krɔŋkrɔŋ lɛ nɔ.” Yɛ nɔ ni kɔɔ hɛl he lɛ, A Dictionary of Christian Theology lɛ wie akɛ: “Wɔnaaa yɛ Kpaŋmɔ Hee lɛ mli akɛ hɛl la fata blema tsɔɔmɔi lɛ ahe.”

Yɛ anɔkwale mli lɛ, nyɛsɛɛ nɛɛ, mɛi ni ahala ni tsuɔ tsɔɔmɔi ahe nii ni yɔɔ Church of England lɛ ŋmala saneyitsei yɛ woji anɔ, beni amɛjie yi akɛ akpoo hɛl la tsɔɔmɔ lɛ kwraa kɛmɔ shi lɛ. Dr. Tom Wright, ni ji Litchfield Sɔlemɔ lɛ mli osɔfo lɛ kɛɛ akɛ, jwɛŋmɔ ni ana be ko ni eho yɛ hɛl he lɛ “ha Nyɔŋmɔ tsɔ kooloo ko ni he yɔɔ gbeyei ni amɛkɛfite mɛi babaoo.” Amaniɛbɔɔ ní mɛi ni akɛ nitsumɔ wo amɛdɛŋ lɛ kɛha lɛ tsɔɔ akɛ, hɛl “bɛ shihilɛ mli kwraa.”a Nakai nɔŋŋ, New Catholic Encyclopedia lɛ wie kɛkɔ jwɛŋmɔ ni Katolikbii hiɛ lɛ he akɛ: “Nyɔŋmɔjamɔ he nilelɔi ni yɔɔ ŋmɛnɛ lɛ tsuɔ hɛl he naagba lɛ he nii yɛ gbɛ ni tsiɔ ehe kɛjɛɔ Nyɔŋmɔ he kwraa.”

Yɛ anɔkwale mli lɛ, nɔ ni Biblia lɛ tsɔɔ yɛ susuma lɛ he lɛ teɔ shi ewoɔ tsɔɔmɔi ni kɔɔ hetsuumɔhe kɛ hɛl la he. Biblia lɛ fɔɔ susuma lɛ he wiemɔ akɛ egboɔ. “Susuma ni feɔ esha lɛ, lɛ nɔŋŋ eeegbo!” (Ezekiel 18:4; okɛ King James shishitsɔɔmɔ lɛ ato Catholic Douay shishitsɔɔmɔ lɛ he.) Taakɛ Biblia lɛ tsɔɔ lɛ, gbohii lɛ leee nɔ ko nɔ ko, amɛnuuu piŋmɔ ko he. “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.” (Jajelɔ 9:5) Hiɛnɔkamɔ ni Biblia lɛ kɛhaa gbohii lɛ ji wɔsɛɛ gbohiiashitee. Beni Yesu naanyo Lazaro gbo lɛ, Yesu kɛ gbele to wɔ̀ he. Lazaro nyɛmiyoo Marta jie hiɛnɔkamɔ ni atsɔɔ yɛ Biblia lɛ mli lɛ kpo etsɔɔ beni ejaje akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” Yesu tsɔ shi ni etée Lazaro kɛjɛ gbohii ateŋ koni ehi shi kɛyashi be ko lɛ nɔ ekɛma nakai hiɛnɔkamɔ kɛha adesai lɛ nɔ mi.—Yohane 5:28, 29; 11:11-14, 24, 44.

Yinɔsaneŋmalɔi tsɔɔ akɛ, tsɔɔmɔ ní atsɔɔ akɛ gbɔmɔ yɛ susuma ní gbooo ní esoro lɛ lɛ jeee nɔ ni yɔɔ Biblia lɛ mli, shi moŋ ejɛ Hela jeŋ nilelɔi aŋɔɔ. New Catholic Encyclopedia lɛ tsɔɔ akɛ, blema Hebribii lɛ susuuu akɛ akɛ gbɔmɔtso ni anaa kɛ susuma ni anaaa fee gbɔmɔ. Ewie Hebribii ahemɔkɛyeli lɛ he akɛ: “Beni wala mumɔ lɛ bote klɛŋklɛŋ gbɔmɔ ni Nyɔŋmɔ kɛ sũ shɔ̃ lɛ lɛ mli nɔŋŋ pɛ kɛkɛ ni etsɔ ‘wala susuma’ (1 Mose 2.7). Asusuuu akɛ gbele ji nɔ ko ni gbalaa nibii srɔtoi enyɔ ni yɔɔ gbɔmɔ mli lɛ mli, taakɛ Hela jeŋ nilee tsɔɔ lɛ; wala mumɔ ni amuɔ lɛ jeɔ gbɔmɔ lɛ mli ni eshiɔ lɛ akɛ ‘gbonyo ni yɔɔ’ (3 Mose 21.11; 4 Mose 6.6; 19.13). Yɛ sane lɛ eko fɛɛ eko mli lɛ, wiemɔ ‘ni yɔɔ’ lɛ baafee Hebri [neʹphesh] lɛ ni afɔɔ shishitsɔɔmɔ akɛ ‘susuma’ lɛ, shi yɛ anɔkwale mli lɛ, etamɔ gbɔmɔ lɛ nɔŋŋ lɛ.”

Nakai ɛnsaiklopedia lɛ nɔŋŋ tsɔɔ akɛ, nyɛsɛɛ nɛɛ, Katolik nilelɔi lɛ “emɔ mli akɛ Kpaŋmɔ Hee lɛ etsɔɔɔ akɛ susuma lɛ gbooo yɛ Hela nifeemɔ [Hela] shishinumɔ naa.” Ekɛfata he akɛ: “Tsabaa ni fe fɛɛ ni aaaná aha naagba lɛ jeee nɔ ko ni abaaná yɛ jeŋ nilee susumɔi amli tamɔ eji yɛ nikeenii ni fe fɛɛ ni ji Gbohiiashitee lɛ.”

Biblia lɛ Aloo Kusum Nifeemɔ?

Belɛ, te fee tɛŋŋ ni susumɔi ni jɛɛɛ Biblia lɛ mli lɛ yabote sɔlemɔ lɛ tsɔɔmɔi amli? Sɔlemɔi pii kɛɔ akɛ Biblia lɛ ji nɔ̃ titri ni amɛkɛtsuɔ nii. Ákɛ nɔkwɛmɔnɔ lɛ, etsɛko tsɔ ni Paapa John Paul II lɛ wie bɔ ni ehe hiaa ni “anɔkwafoi lɛ akpɛlɛ” Ŋmalɛi lɛ “anɔ kwraa kɛmɔ shi akɛ eji anɔkwale, kɛ agbɛnɛ hu ákɛ wɔhemɔkɛyeli lɛ nɔdaamɔ nɔ.” Shi kɛlɛ, mɛi babaoo kpɛlɛɔ nɔ akɛ tsɔɔmɔi ni atsɔɔ yɛ Kristendom ŋmɛnɛ lɛ jeee nɔ ni anaa yɛ klɛŋklɛŋ afii oha lɛ mli Kristofoi lɛ ahe. Sɔlemɔi pii susuɔ akɛ tsakemɔi lɛ fata hiɛyaa ni yaa nɔ fiofio yɛ sɔlemɔ lɛ tsɔɔmɔi amli lɛ he. Ni kɛlɛ, Katolik Sɔlemɔ lɛ ekɔ gbɛhe ni tsɔɔ akɛ, sɔlemɔ lɛ mli kusumii nifeemɔi lɛ tamɔ nɔ ni yɔɔ Ŋmalɛi lɛ amli lɛ nɔŋŋ. New Catholic Encyclopedia lɛ kɛɔ akɛ, sɔlemɔ lɛ “hiɛ jwɛŋmɔ lɛ akɛ jeee Ŋmalɛ nɔ pɛ anɔkwale ni amɛhiɛ lɛ damɔɔ, shi kusum nifeemɔ hu fata he, ni asaŋ jeee yɛ kusum nifeemɔ hu pɛ naa, shi moŋ Ŋmalɛi lɛ hu fata he.”

Yɛ yinɔsane he susumɔ naa lɛ, sɔlemɔi lɛ kɛ nɔ ni damɔ blemasane nɔ pɛ lɛ eto Ŋmalɛ naa tsɔɔmɔi anajiaŋ. Yɛ anɔkwale mli lɛ, bianɛ lɛ sɔlemɔi pii hiɛ jwɛŋmɔ akɛ Biblia lɛ tsɔɔmɔi lɛ ejaaa. Ákɛ nɔkwɛmɔnɔ lɛ, New Catholic Encyclopedia lɛ kɛɔ akɛ, “kɛji akɛ saji ni Biblia lɛ ewie he lɛ babaoo miito ŋmɛnɛŋmɛnɛ nilee ni ayɔɔ yɛ jeŋ nilee kɛ yinɔsane he lɛ, anaa yɛ faŋŋ mli akɛ ejeee anɔkwale kwraa.” Beni ewieɔ Biblia mli tsɔɔmɔ ni tsɔɔ akɛ gbohii lɛ leee nɔ ko nɔ ko lɛ he lɛ, ekɛfata he akɛ: “Yɛ jamɔŋ saji amli po lɛ, Kpaŋmɔ Momo lɛ yeɔ he odase akɛ, nilee ni ayɔɔ . . . yɛ shihilɛ yɛ gbele sɛɛ lɛ yeko emuu.” Ɛnsaiklopedia lɛ tsɛ Lala 6:5, (kuku 6 yɛ Bibliai komɛi amli) akɛ enɛ he nɔkwɛmɔnɔ: “Akaiii bo yɛ gbele mli; gbohiiaje [loo Hades] hu, namɔ aaadao shi yɛ jɛi?” Protestant osɔfoi akui komɛi etsɔɔɔ dɔŋŋ akɛ tɔmɔi bɛ Biblia lɛ mli. Yɛ gbɛ kroko nɔ lɛ, Katolik Sɔlemɔ lɛ heɔ eyeɔ akɛ eyɛ hewalɛ, aloo nitsɔɔmɔ hewalɛ, kɛtsɔ gbɛ ni etsɔɔ nɔ etsɔɔ nibii ni yɔɔ Biblia lɛ mli lɛ nɔ. Shi ekolɛ obaabi akɛ, ‘Ni kɛ etamɔ nɔ ni nii ni amɛtsɔɔ lɛ teɔ shi ewoɔ Ŋmalɛi lɛ hu?’

Bɔ ni Ŋmalɛi lɛ Ahe Hiaa Ha

Yesu tsɛ́ Ŋmalɛi lɛ ayisɛɛ shii abɔ akɛ nɔ ni yɔɔ hewalɛ, ni bei pii lɛ, ejeɔ otii ni ewieɔ he lɛ ashishi kɛ wiemɔ ni ji: “Aŋma akɛ.” (Mateo 4:4, 7, 10; Luka 19:46) Lɛɛlɛŋ, beni Yesu wie adesai agbalashihilɛ mli sane he lɛ, egbalaaa jwɛŋmɔ kɛyaaa Hela jeŋ nilee susumɔi anɔ, shi moŋ egbala jwɛŋmɔ kɛtee Mose Klɛŋklɛŋ Wolo lɛ mli saji lɛ anɔ. (1 Mose 1:27; 2:24; Mateo 19:3-9) Eyɛ faŋŋ akɛ Yesu bu Ŋmalɛi lɛ akɛ amɛjɛ Nyɔŋmɔ ŋɔɔ, ni akɛ eji anɔkwale. Esɔle eha Nyɔŋmɔ akɛ: “Owiemɔ lɛ anɔkwaleŋ.”—Yohane 17:17.b

Biblia lɛ ŋma bɔ ni Yesu bu jamɔ mli hiɛnyiɛlɔi ni yɔɔ ebeaŋ lɛ fɔ lɛ he sane efɔ̃ shi akɛ: “Gbɛ po nyɛje nyɛkwa Nyɔŋmɔ kitã lɛ, koni nyɛye nyɛblemasane lɛ nɔ. . . . Ni nyɛgu Nyɔŋmɔ wiemɔ lɛ yɛ nyɛblemasane ni nyɛkɛba jeŋ lɛ hewɔ.” (Marko 7:6-13) Nakai nɔŋŋ bɔfo Paulo te shi ewo nɔnyɛɛ koni eha Hela jeŋ nilee aloo amɛ blemasaji ni ejaaa lɛ akabote etsɔɔmɔ lɛ mli. Ewo ŋaa akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yakashishiumɔ akaŋɔ nyɛ nom, yɛ gbɔmɛi ablemasaji . . . lɛ anaa.” (Kolosebii 2:8; 1 Korintobii 1:22, 23; 2:1-13) Blemasaji loo tsɔɔmɔi komɛi yɛ ni Paulo wo Kristofoi lɛ hewalɛ koni amɛhiɛ mli, shi enɛɛmɛi damɔ Ŋmalɛi lɛ anɔ, ni amɛkɛ amɛ kpãa gbee kwraa kɛmɔɔ shi. (2 Tesalonikabii 2:13-15) Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi . . . koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17; wɔma efã ko nɔ mi.

Paulo tsɔ hiɛ ena akɛ mɛi miikpalaŋ kɛmiijɛ Ŋmalɛi lɛ ahe. Ebɔ Timoteo kɔkɔ akɛ: “Be ko baaba ni amɛkpɛlɛŋ tsamɔ tsɔɔmɔ lɛ dɔŋŋ, . . . ni amɛaakpala anɔkwale lɛ yɛ amɛtoii asɛɛ.” Ewo Timoteo hewalɛ akɛ: “Shi bo lɛ, ohiɛ akã shi yɛ nii fɛɛ mli.” (2 Timoteo 4:3-5) Shi yɛ mɛɛ gbɛ nɔ? Gbɛ kome ji akɛ, ni wɔɔhiɛ “jwɛŋmɔ ni ja.” Hela wiemɔ komekomei ashishitsɔɔmɔ wolo ko tsɔɔ nɛkɛ Biblia mli wiemɔ nɛɛ shishi akɛ, “suɔmɔ mli ni ajɛɔ akaseɔ nɔ ko, ni abuɔ lɛ pɛpɛɛpɛ.” Luka kɛ nɛkɛ wiemɔ nɛɛ tsu nii ni ekɛtsɔɔ bɔ ni Paulo toibolɔi ni hi shi yɛ klɛŋklɛŋ afii oha lɛ mli yɛ Beroia lɛ yɔɔ ha. Paulo tsɔɔmɔi lɛ ji nɔ hee kɛha amɛ, ni amɛsumɔɔɔ akɛ ashishiu amɛ. Beni Luka jieɔ amɛyi lɛ eŋma akɛ: “[Beroiabii] lɛ hiɛ jwɛŋmɔ ni ja fe mɛi ni yɔɔ Tesalonika lɛ, ejaakɛ amɛjɛ amɛyitsoŋ fɛɛ amɛmɔ wiemɔ lɛ mli, ni amɛpɛiɔ Ŋmalɛi lɛ amli daa gbi amɛkwɛɔ akɛ nibii nɛɛ yɛ mli nakai lo.” Akɛni Beroiabii lɛ hiɛ jwɛŋmɔ ni ja hewɔ lɛ, amɛjeee nii ahe ŋwane, ni amɛfeee amɛnii akɛ mɛi ni sumɔɔɔ akɛ amɛheɔ nɔ ko kwraa amɛyeɔ. Shi moŋ nɔ ni jɛ niiamlipɛimɔ ni amɛfee yɛ anɔkwaleyeli lɛ mli ba ji akɛ, “amɛteŋ mɛi pii he ye.”—Bɔfoi lɛ Asaji 17:11, 12, NW.

Biblia lɛ ni Ahiɔ Shi yɛ Naa lɛ Mli Sɛɛnamɔi

Akɛ bɔ ni mra be mli Kristofoi lɛ kpɛtɛɔ Biblia lɛ he kɛ he-kɛ-afɔleshaa suɔmɔ kpo ni amɛjieɔ lɛ kadiɔ amɛ. Shi kɛlɛ, ŋmɛnɛ, mɛi pii “hiɛ Nyɔŋmɔ jamɔ su, shi amɛkwa emli hewalɛ lɛ.” (2 Timoteo 3:5) Kristojamɔ su fɛɛ su ni akɛtsuɔ nii ŋmɛnɛ, ní ejieee anɔkwayeli kpo etsɔɔɔ taakɛ eji kɛjɛ shishijee lɛ, nyɛŋ ená hewalɛ kpakpa ni baaye abua gbɔmɛi lɛ yɛ amɛshihilɛi amli. Ani enɛ baanyɛ aye abua wɔ koni wɔtsɔɔ nɔ hewɔ ni Kristendom bii lɛ ateŋ mɛi babaoo ni wɔnaa nɛɛ kɛ amɛhe woɔ awuiyeli, jeŋba shara, weku mligbalamɔi, kɛ heloonaa nii asɛɛdii mli lɛ? Yɛ “Kristofoi” ashikpɔji komɛi anɔ lɛ, aawu akutseiaŋ tai ni yɔɔ gbeyei po yɛ jamɔ kome too lɛ nɔŋŋ mli bii lɛ ateŋ.

Ani jwɛŋmɔ ni ja ni Beroiabii lɛ hiɛ lɛ egbo? Ani gbɔmɛi akuu ko yɛ ŋmɛnɛ ni heɔ Biblia lɛ amɛyeɔ, ni amɛhiɔ shi yɛ naa?

Encyclopedia Canadiana lɛ wie akɛ: “Yehowa Odasefoi anitsumɔ lɛ ji blema Kristojamɔ ni Yesu kɛ ekaselɔi lɛ tsu he nii yɛ wɔbe nɛɛ mli klɛŋklɛŋ afii ohai enyɔ lɛ mli lɛ ni jeɔ shishi ehee ni atoɔ shishi ekoŋŋ.” Beni New Catholic Encyclopedia lɛ wieɔ Odasefoi lɛ ahe lɛ, ekɛɛ akɛ: “Amɛbuɔ Biblia lɛ akɛ no pɛ ji amɛhemɔkɛyeli lɛ jɛɛhe, kɛ nɔ ni kudɔɔ amɛjeŋba.”

Ŋwanejee ko kwraa bɛ he akɛ enɛ ji yiŋtoo titri hewɔ ni ale Yehowa Odasefoi yɛ jeŋ fɛɛ yɛ mumɔŋ nɔyaa, toiŋjɔlɛ, kɛ miishɛɛ ni amɛnáa lɛ hewɔ lɛ. No hewɔ lɛ wɔmiiwo wɔnikanelɔi lɛ hewalɛ koni amɛkase Biblia lɛ mli tsɔɔmɔi ni jɛ mumɔŋ ni tsaa mɔ lɛ he nii babaoo. Nilee babaoo ni wɔɔná lɛ, baanyɛ aha wɔkɛ wɔhiɛ afɔ̃ Biblia lɛ nɔ kwraa ni wɔná hemɔkɛyeli ni mli wa waa yɛ Nyɔŋmɔ mli. Hemɔkɛyeli ni tamɔ nɛkɛ ní abɔɔ mɔdɛŋ koni aná lɛ kɛ naanɔ sɛɛnamɔi baa.

[Shishigbɛ niŋmai]

[Mfoniri ni yɔɔ baafa 6]

Bɔfo Paulo kɛ mɛi krokomɛi shiɛ yɛ jara nɔ

[Mfoniri ni yɔɔ baafa 7]

Yehowa Odasefoi ‘buɔ Biblia lɛ akɛ no pɛ ji amɛhemɔkɛyeli lɛ jɛɛhe, kɛ nɔ ni kudɔɔ amɛjeŋba’