Anyɛɔ Amɛ yɛ Amɛhemɔkɛyeli lɛ Hewɔ
“Mɛi fɛɛ aaanyɛ nyɛ yɛ migbɛi lɛ hewɔ.”—MATEO 10:22.
1, 2. Ani obaanyɛ ogba shihilɛ mli niiashikpamɔi komɛi ní Yehowa Odasefoi kɛkpe yɛ amɛjamɔ mli hemɔkɛyelii ni amɛhiɔ shi yɛ naa lɛ hewɔ?
AMƆ shwapo mli nitsulɔ anɔkwafo ko ni jɛ Crete ŋshɔkpɔ lɛ nɔ lɛ shii nyɔŋmai abɔ ni akɛ lɛ tee Greek kojomɔhei shii abɔ. Eye nɔ ni fe afii ekpaa yɛ tsuŋwoo mli, ni atserɛ ekɛ eŋa kɛ ebii enumɔ lɛ ateŋ kwraa. Yɛ Japan lɛ ashwie nikaselɔ ko ni eye afii 17 lɛ kɛjɛ skul, eyɛ mli akɛ ebaa ejeŋ jogbaŋŋ ni ele nii hu fe nikaselɔi 42 ni ekɛyɔɔ klas lɛ ateŋ mɔ fɛɛ mɔ. Yɛ France lɛ ashwie mɛi nyɔŋmai abɔ kɛjɛ amɛnitsumɔi amli, eyɛ mli akɛ ale amɛ jogbaŋŋ akɛ mɛi ni kɛ mɔdɛŋbɔɔ kɛ miishɛɛ tsuɔ amɛnitsumɔi jogbaŋŋ. Mɛɛ nɔ̃ kome ko anaa faŋŋ yɛ shihilɛ mli niiashikpamɔi ni ba diɛŋtsɛ nɛɛ amli?
2 Mɛi ni awieɔ amɛhe nɛɛ fɛɛ ji Yehowa Odasefoi. Mɛɛ “efɔŋ” amɛfee? Klɛŋklɛŋ kwraa lɛ, amɛhiɔ shi yɛ amɛjamɔ mli hemɔkɛyelii lɛ anaa. Yɛ Yesu Kristo tsɔɔmɔi lɛ atoiboo mli lɛ, shwapo mli nitsulɔ lɛ kɛ mɛi krokomɛi gbaa ehemɔkɛyeli lɛ he sane. (Mateo 28:19, 20) Adamɔ Greek mla ko ni be eho, ni haa shiɛmɔ ni akɛtsakeɔ mɔ hemɔkɛyeli lɛ feɔ mlatɔmɔ nii lɛ nɔ titri ni abu lɛ fɔ́. Ashwie nikaselɔ lɛ akɛni ehenilee ní akɛ Biblia etsɔse lɛ lɛ eŋmɛɛɛ lɛ gbɛ ni ekɛ ehe awo kendo (Japanbii aklante kɛ nɔmɔ) kasemɔi ni anyɛɔ amɛnɔ ní amɛkase lɛ mli lɛ hewɔ. (Yesaia 2:4) Ni aha mɛi ni ashwie amɛ kɛjɛ amɛnitsumɔi amli yɛ France lɛ le akɛ, yiŋtoo titri hewɔ ni ashwie amɛ lɛ jɛ jiemɔ ni amɛjie amɛhe kpo akɛ Yehowa Odasefoi lɛ hewɔ.
3. Mɛni hewɔ amanehulu kpele ni anaa yɛ adesai krokomɛi adɛŋ lɛ ji nɔ ko ni efɔɔɔ kaa kɛha Yehowa Odasefoi ateŋ mɛi babaoo lɛ?
3 Niiashikpamɔi ni naa wa waa tamɔ nɛkɛ ji nɔ ni Yehowa Odasefoi ni yɔɔ maji komɛi amli lɛ kɛkpe yɛ wɔbei nɛɛ amli. Shi, yɛ Yehowa Odasefoi babaoo agbɛfaŋ lɛ, amanehulu kpele ni anaa kɛjɛɔ adesai krokomɛi adɛŋ lɛ ji nɔ ko ni efɔɔɔ kaa. Ale Yehowa webii yɛ jeŋ fɛɛ yɛ amɛ jeŋba kpakpa lɛ hewɔ—gbɛi kpakpa ni haaa mɔ ko mɔ ko aná yiŋtoo kpakpa ni eeedamɔ nɔ etao akɛ eeefee amɛ efɔŋ. (1 Petro 2:11, 12) Amɛkɛ amɛhe wooo yinɔkpaŋmɔi loo jeŋba ni yeɔ awui mli. (1 Petro 4:15) Nɔ ni tamɔɔɔ nakai lɛ, amɛbɔɔ mɔdɛŋ ní amɛhi shi yɛ ŋaa ni Biblia lɛ woɔ akɛ aba he shi aha Nyɔŋmɔ klɛŋklɛŋ, no sɛɛ lɛ maŋ nɔyelii lɛ hu lɛ naa. Amɛwoɔ too ni mla biɔ ni amɛwo lɛ, ni amɛbɔɔ mɔdɛŋ akɛ ‘amɛkɛ gbɔmɛi fɛɛ aaahi shi yɛ toiŋjɔlɛ mli.’ (Romabii 12:18; 13:6, 7; 1 Petro 2:13-17) Amɛwoɔ hewalɛ ní aná bulɛ kɛha mla, weku shihilɛ kpakpa, kɛ jeŋba kpakpa, yɛ amɛ Biblia mli tsɔsemɔ nitsumɔ lɛ mli. Nɔyelii babaoo ejie amɛyi yɛ bɔ ni amɛji maŋbii ni yeɔ mla nɔ lɛ hewɔ. (Romabii 13:3) Ni kɛlɛ, taakɛ shishijee kuku lɛ tsɔɔ lɛ, bei komɛi lɛ amɛbafeɔ mɛi ni ateɔ shi awoɔ amɛ—yɛ shikpɔji komɛi anɔ lɛ, nɔyelii tsĩɔ amɛnaa po. Ani esa akɛ enɛ afee wɔ naakpɛɛ?
Nɔ ni Kaselɔfeemɔ “Biɔ”
4. Taakɛ Yesu wie lɛ, mɛni mɔ ko baanyɛ akpa gbɛ kɛji ebatsɔ ekaselɔ?
4 Yesu Kristo shiii yiŋkɔshikɔshifeemɔ ko yɛ nɔ ni ekaselɔ ni mɔ ko baafee lɛ biɔ lɛ he. Ekɛɛ ekaselɔi lɛ akɛ: “Nyɔŋ efeee enuntsɔ. Kɛ́ amɛwa mi yi lɛ, amɛaawa nyɛ hu yi.” Anyɛ Yesu “yakatswaa.” (Yohane 15:18-20, 25; Lala 69:5; Luka 23:22) Ekaselɔi lɛ hu baanyɛ akpa gbɛ akɛ abaafee amɛ nakai nɔŋŋ—shitee-kɛ-woo ni shishinumɔ ko bɛ he. Ebɔ amɛ kɔkɔ nɔ ni fe shikome akɛ: “Aaanyɛ nyɛ.”—Mateo 10:22; 24:9.
5, 6. (a) Mɛɛ yiŋtoo hewɔ Yesu wo mɛi ni baafee esɛɛnyiɛlɔi wɔsɛɛ lɛ hewalɛ ní ‘amɛbu naa amɛkwɛ’ lɛ? (b) Belɛ, mɛni hewɔ kɛ́ wɔkɛ shitee-kɛ-woo kpe lɛ, esaaa akɛ wɔhiɛ feɔ wɔ yaa lɛ?
5 No hewɔ lɛ, Yesu wo mɛi ni baafee esɛɛnyiɛlɔi wɔsɛɛ lɛ hewalɛ ní ‘amɛsusu’ nɔ ni kaselɔfeemɔ “biɔ” lɛ he. (Luka 14:28, Revised Standard Version) Mɛni hewɔ? Jeee koni amɛkpɛ amɛyiŋ akɛ esa akɛ amɛtsɔmɔ esɛɛnyiɛlɔi loo esaaa, shi moŋ koni amɛtswa amɛfai shi akɛ amɛaatsu nɔ ni ebiɔ lɛ he nii. Esa akɛ wɔfee klalo akɛ wɔɔdamɔ kaai loo amanehului ni fataa hegbɛ nɛɛ he kɛbaa lɛ anaa. (Luka 14:27) Mɔ ko mɔ ko enyɛɛɛ wɔnɔ ní wɔsɔmɔ Yehowa akɛ Kristo sɛɛnyiɛlɔ. Eji yiŋkpɛɛ ni jɛ wɔ diɛŋtsɛ wɔsuɔmɔ mli; eji yiŋkpɛɛ hu ni damɔ nilee nɔ. Wɔle momo akɛ kɛfata jɔɔmɔi ní wɔɔná mli ŋɔɔmɔ kɛjɛ wɔkɛ Nyɔŋmɔ teŋ henɔjɔɔmɔ wekukpaa ni wɔɔbote mli lɛ he lɛ, “aaanyɛ” wɔ hu. No hewɔ lɛ, kɛ́ wɔkɛ shitee-kɛ-woo kpe lɛ, wɔhiɛ efeee wɔ yaa. ‘Wɔbu naa wɔkwɛ,’ ni wɔsaa wɔhe jogbaŋŋ akɛ wɔbaatsu he nii kɛmɔ shi.—1 Petro 4:12-14.
6 Mɛni hewɔ mɛi komɛi, ní maŋ nɔyelɔi komɛi fata he lɛ, sumɔɔ ní amɛte shi amɛwo anɔkwa Kristofoi lɛ? Kɛha hetoo lɛ, ebaahi jogbaŋŋ akɛ wɔtao Ŋ.B. klɛŋklɛŋ afii oha lɛ mli jamɔ kui enyɔ komɛi amli wɔkwɛ. Anyɛɔ kui enyɔ lɛ fɛɛ—shi yɛ yiŋtoi ni yɔɔ srɔto kwraa hewɔ.
Amɛnyɛɔ Mɔ ni Anyɛɔ Amɛ Hu
7, 8. Mɛɛ tsɔɔmɔi jieɔ bulɛ ni abɛ kɛha Jeŋmajiaŋbii lɛ kpo, ni mɛɛ su ko baje kpo yɛ Yudafoi lɛ ateŋ yɛ enɛ hewɔ?
7 Beni shɛɔ Ŋ.B. klɛŋklɛŋ afii oha lɛ mli lɛ, no mli lɛ Israel yɛ Roma nɔyeli shishi, ni Yuda jamɔ, ní ji Yudafoi ajamɔ gbɛjianɔtoo lɛ yɛ hiɛnyiɛlɔi yiwalɔi tamɔ woloŋmalɔi lɛ kɛ Farisifoi lɛ akudɔmɔ shishi kwraa yɛ gbɛ ko nɔ. (Mateo 23:2-4) Nɛkɛ hiɛnyiɛlɔi ni yɔɔ shɛii yɛ jamɔ he nɛɛ ŋɔ Mose Mla lɛ mli akpɔi ni biɔ ní amɛtsi amɛhe kɛjɛ jeŋmaji lɛ ahe lɛ, ni amɛtsɔmɔ lɛ ni ebabi ní akaná bulɛ aha mɛi ni jeee Yudafoi lɛ. Yɛ nakai feemɔ mli lɛ, amɛbaná jamɔ ko ni woɔ hewalɛ ní aná hetsɛ̃ kɛha Jeŋmajiaŋbii lɛ, ni no ha Jeŋmajiaŋbii lɛ hu baná nyɛɛ kɛ hetsɛ̃ kɛha amɛ.
8 Ewaaa kɛha Yudafoi ahiɛnyiɛlɔi lɛ akɛ amɛaashiɛ bulɛ ní amɛbɛ kɛha Jeŋmajiaŋbii lɛ, ejaakɛ no mli lɛ Yudafoi lɛ buɔ Jeŋmajiaŋbii lɛ akɛ bɔɔnii ni anyaŋeɔ. Jamɔ mli hiɛnyiɛlɔi lɛ tsɔɔ akɛ esaaa akɛ Yudafonyo yoo kome pɛ kɛ Jeŋmajiaŋbii hiɔ hekome, ejaakɛ “asusuɔ akɛ amɛbɔɔ nyenyeŋtswi.” Esaaa akɛ Yudanyo “kome pɛ kɛ amɛ hiɔ hekome ejaakɛ asusuɔ akɛ amɛshwieɔ lá shi.” Anyɛŋ anu tsina fufɔ ni Jeŋmajiaŋnyo ŋa, ja Yudanyo ko yɛ jɛmɛ ni eekwɛ lɛ beni eŋaa fufɔ lɛ. Yudafoi lɛ tsɔ hewalɛ ní amɛhiɛnyiɛlɔi lɛ ná yɛ amɛnɔ lɛ nɔ amɛtsi amɛhe kɛtee sɛɛ fɛlɛŋŋ ni amɛfee shɛii yɛ amɛhe ni amɛtsi nɛɛ mli.—Okɛto Yohane 4:9 he.
9. Mɛni jɛ Yudafoi ajamɔ mli hiɛnyiɛlɔi lɛ atsɔɔmɔ ni kɔɔ mɛi ni amɛjeee Yudafoi lɛ ahe lɛ mli ba?
9 Tsɔɔmɔi ni tamɔ nɛkɛ, ní kɔɔ mɛi ni jeee Yudafoi lɛ ahe lɛ haaa wekukpaa kpakpa aba Yudafoi lɛ kɛ Jeŋmajiaŋbii lɛ ateŋ. Ebaha Jeŋmajiaŋbii lɛ babu Yudafoi lɛ akɛ mɛi ni nyɛɔ adesai fɛɛ. Romanyo yinɔsaneŋmalɔ Tacitus (ní afɔ lɛ aaafee afi 56 Ŋ.B. lɛ) wie Yudafoi lɛ ahe akɛ “amɛbuɔ adesai ni eshwɛ lɛ kɛ hetsɛ̃ fɛɛ ni anáa ahaa henyɛlɔi lɛ.” Tacitus wie hu akɛ atsɔɔ Jeŋmajiaŋbii ni batsɔmɔ mɛi ni atsake amɛ kɛba Yuda jamɔ lɛ mli lɛ ní amɛkwa amɛmaji, ní amɛbu amɛweku kɛ amɛnanemɛi akɛ mɛi ni he bɛ sɛɛnamɔ ko kwraa. Yɛ bei babaoo mli lɛ, Romabii lɛ ŋmɛɔ Yudafoi lɛ, ní amɛyi fá saŋŋ bɔ ni ehiŋ amɛ tutuamɔ yɛ omanyeyeli mli lɛ agbɛ. Shi Yudafoi lɛ atuatsemɔ ni ba yɛ afi 66 Ŋ.B. lɛ ha Romabii lɛ kɛ oweletɔɔ ní mli wa ba amɛnɔ, ni no kɛ Yerusalem hiɛkpatamɔ ba yɛ afi 70 Ŋ.B.
10, 11. (a) Mɛni Mose Mla lɛ biɔ yɛ bɔ ni esa akɛ akɛ gbɔi aye aha lɛ gbɛfaŋ? (b) Mɛni wɔkaseɔ kɛjɛɔ nɔ ni ba Yuda jamɔ nɔ lɛ mli?
10 Kɛ́ akɛ nakai susumɔ ni amɛhiɛ yɛ gbɔi ahe lɛ to jamɔ gbɛ ni atsɔɔ yɛ Mose Mla lɛ mli lɛ he lɛ, te anaa tɛŋŋ? Mla lɛ wo hewalɛ ní amɛtsi amɛhe kɛjɛ jeŋmaji lɛ ahe moŋ, shi afee enɛ koni akɛbu Israelbii lɛ ahe, titri lɛ amɛjamɔ ni he tse lɛ. (Yoshua 23:6-8) Kɛ́ nakai po lɛ, Mla lɛ bi ní akɛ gbɔi aye yɛ jalɛsaneyeli kɛ gbɛ kpakpa nɔ, ní ajie gbɔfeemɔ kpo atsɔɔ amɛ—bei abɔ ni amɛjeee gbɛ amɛgbooo Israel mlai anɔ toi lɛ. (3 Mose 24:22) Akɛni amɛgba afã kɛjɛ shishinumɔ diɛŋtsɛ ni nilee yɔɔ mli, ní anaa faŋŋ yɛ Mla ni kɔɔ gbɔi ahe lɛ mli lɛ he hewɔ lɛ, Yudafoi ajamɔ mli hiɛnyiɛlɔi ni hi shi yɛ Yesu gbii lɛ amli lɛ kɛ jamɔ gbɛ ko ni woɔ nyɛɛ he hewalɛ, ní no hu anyɛɔ lɛ ba. Yɛ naagbee lɛ, klɛŋklɛŋ afii oha lɛ mli Yudafoi amaŋ lɛ laaje Yehowa hiɛ duromɔ.—Mateo 23:38.
11 Ani nikasemɔ ko yɛ enɛ mli kɛha wɔ? Hɛɛ, nikasemɔ yɛ mli. Su ni haa abuɔ he jalɔ kɛ mɔ ni nɔ kwɔ fe mɛi krokomɛi, ní haaa abu mɛi ni kɛ wɔjamɔ mli hemɔkɛyelii kpãaa gbee lɛ, ejieee Yehowa jamɔ ni he tse lɛ kpo etsɔɔɔ yɛ gbɛ ni ja kɛmɔ shi nɔ, ni esaaa ehiɛ hu. Susumɔ Kristofoi anɔkwafoi ni hi shi yɛ klɛŋklɛŋ afii oha lɛ mli lɛ ahe okwɛ. Amɛnyɛɛɛ mɛi ni jeee Kristofoi lɛ, ni amɛtseee Roma hiɛ atua hu. Shi kɛlɛ, amɛji ‘mɛi ni anyɛɔ amɛ.’ Mɛni hewɔ? Ni namɛi nyɛ amɛ lɛ?
Mra Be Mli Kristofoi Lɛ —Namɛi Nyɛ Amɛ Lɛ?
12. Eyɛ faŋŋ yɛ Ŋmalɛi lɛ amli akɛ Yesu miitao ni esɛɛnyiɛlɔi lɛ aná mɛi ni amɛjeee Kristofoi lɛ ahe jwɛŋmɔ ni ŋmɛɔ pɛpɛɛpɛ yɛ mɛɛ gbɛ nɔ?
12 Eyɛ faŋŋ yɛ Yesu tsɔɔmɔi lɛ amli akɛ eetao ni ekaselɔi lɛ aná mɛi ni jeee Kristofoi lɛ ahe jwɛŋmɔ ni ŋmɛɔ pɛpɛɛpɛ. Yɛ gbɛ ko nɔ lɛ, ewie akɛ esɛɛnyiɛlɔi lɛ baatsi amɛhe kɛjɛ je lɛ he—ni tsɔɔ akɛ, amɛbaakpoo subaŋi kɛ jeŋba ni teɔ shi woɔ Yehowa jalɛ gbɛ̀i lɛ kwraa. Amɛbaahi shi akɛ mɛi ni kɛ amɛhe wooo ta kɛ maŋkwramɔ saji amli. (Yohane 17:14, 16) Yɛ gbɛ kroko nɔ lɛ, yɛ nɔ najiaŋ ni eeewo bulɛ ni abɛ kɛha mɛi ni amɛjeee Kristofoi lɛ he hewalɛ lɛ, Yesu kɛɛ esɛɛnyiɛlɔi akɛ ‘amɛsumɔ amɛhenyɛlɔi.’ (Mateo 5:44) Bɔfo Paulo wo Kristofoi hewalɛ akɛ: “Kɛji hɔmɔ miiye ohenyɛlɔ lɛ, ha lɛ nii eye; kɛji kumai miiye lɛ lɛ, ha lɛ nu enu.” (Romabii 12:20) Ekɛɛ Kristofoi hu ní ‘amɛfee mɛi fɛɛ ejurɔ.’—Galatabii 6:10.
13. Mɛni hewɔ Yudafoi ajamɔ mli hiɛnyiɛlɔi lɛ te shi amɛwo Kristo kaselɔi lɛ waa nakai lɛ?
13 Ni kɛlɛ, etsɛɛɛ ni Kristo kaselɔi lɛ na amɛhe akɛ ‘mɛi ni náa nyɛɛ’ kɛjɛɔ jɛɛhei etɛ. Klɛŋklɛŋ jɛɛhe ji Yudafoi ajamɔ mli hiɛnyiɛlɔi lɛ. Ebɛ naakpɛɛ akɛ amɛjwɛŋmɔ tee Kristofoi lɛ anɔ oya! Kristofoi lɛ yɛ jeŋba kɛ anɔkwayeli he shishitoo mlai ni nɔ kwɔlɔ, ni amɛkɛ ekãa ni mli wa jaje shɛɛ sane ni kanyaa hiɛnɔkamɔ lɛ amɛtsɔɔ. Mɛi akpei abɔ kwa Yuda jamɔ ni amɛkpɛlɛ Kristojamɔ nɔ. (Bɔfoi lɛ Asaji 2:41; 4:4; 6:7) Yɛ Yudafoi ajamɔ mli hiɛnyiɛlɔi lɛ ahiɛ lɛ, Yesu kaselɔi Yudafoi lɛ jeee mɛi komɛi fe hemɔkɛyeli kwalɔi kɛkɛ! (Okɛto Bɔfoi lɛ Asaji 13:45 he.) Nɛkɛ hiɛnyiɛlɔi ni mli fũ nɛɛ nu he akɛ Kristojamɔ miifite amɛ blema saji lɛ. Hɛɛ, ekpɛlɛɛɛ susumɔ ni amɛyɔɔ yɛ Jeŋmajiaŋbii lɛ ahe lɛ nɔ po! Kɛjɛ afi 36 Ŋ.B. kɛbaa lɛ, Jeŋmajiaŋbii lɛ baanyɛ atsɔmɔ Kristofoi, ni amɛkɛ Yudafoi Kristofoi lɛ baahiɛ hemɔkɛyeli kome, ni amɛkɛ amɛ baaná hegbɛi amli ŋɔɔmɔ pɛpɛɛpɛ.—Bɔfoi lɛ Asaji 10:34, 35.
14, 15. (a) Mɛni hewɔ Kristofoi ná nyɛɛ kɛjɛ wɔŋjalɔi aŋɔɔ lɛ? Okɛ nɔkwɛmɔnɔ ko ahã. (b) Mra be mli Kristofoi lɛ batsɔmɔ ‘mɛi ni anyɛɔ amɛ’ kɛjɛ mɛɛ kuu ni ji etɛ ŋɔɔ?
14 Nɔ ni ji enyɔ lɛ, Kristofoi ná nyɛɛ kɛjɛ wɔŋjalɔi lɛ aŋɔɔ. Ákɛ nɔkwɛmɔnɔ lɛ, nyɔŋmɔyoo Artemi gbatsui ni akɛ jwiɛtɛi shwieɔ yɛ blema Efeso lɛ ji nitsumɔ ko ni sɛɛnamɔ yɔɔ he waa. Shi beni Paulo shiɛ yɛ jɛmɛ lɛ, Efesobii lɛ ateŋ mɛi babaoo bo lɛ toi, ni amɛkwa Artemi jamɔ lɛ kwraa. Akɛni amɛnitsumɔ lɛ he miiba oshara hewɔ lɛ, jwiɛtɛi ŋaalɔi lɛ bɔi basabasafeemɔ. (Bɔfoi lɛ Asaji 19:24-41) Nɔ ko ni tamɔ nakai ba beni Kristojamɔ gbɛ eshwã kɛtee Bitinia (amrɔ nɛɛ Turkey kooyi-anaigbɛ) lɛ sɛɛ. Beni agbe Kristofoi a-Hela Ŋmalɛi lɛ anaa lɛ sɛɛ be fioo ko lɛ, Bitinia amralo, ni ji Pliny Bibioo lɛ bɔ amaniɛ akɛ aakpa wɔŋjalɔi asɔlemɔtsũi lɛ amli yaa kwraa, ni ákɛ kooloi ni akɛbashãa afɔle lɛ aniyenii ni ahɔ̃ɔ lɛ nɔ egbɔ kwraa. Ashwá Kristofoi yɛ enɛ he—ni awa amɛ yi—akɛni amɛjamɔ lɛ eŋmɛɛɛ kooloi afɔleshãai kɛ amagai agbɛ lɛ hewɔ. (Hebribii 10:1-9; 1 Yohane 5:21) Eyɛ faŋŋ akɛ, Kristojamɔ gbɛɛ-kɛ-shwãmɔ lɛ sa shihilɛi komɛi ni kɔɔ wɔŋjamɔ ní mɛi komɛi náa he sɛɛ lɛ ahe, ni mɛi ni laaje amɛ jarayeli kɛ shika fɛɛ lɛ amli fu yɛ enɛ he.
15 Nɔ ni ji etɛ lɛ, Kristofoi batsɔmɔ ‘mɛi ni’ Romabii ni sumɔɔ maŋhedɔɔ lɛ ‘nyɛɔ amɛ.’ Klɛŋklɛŋ lɛ, kulɛ Romabii lɛ le Kristofoi lɛ akɛ jamɔ kuu bibioo ko, ekolɛ mɛi ni yɔɔ shɛii yɛ jamɔ he. Shi kɛlɛ, yɛ be ko sɛɛ lɛ, tsɛmɔ folo kɛkɛ ní mɔ ko baatsɛ ehe Kristofonyo lɛ batsɔ tɔmɔ ní akɛ gbele gbalaa mɔ toi yɛ he. Mɛni hewɔ esa akɛ ana maŋbii anɔkwafoi ni hiɔ shi akɛ Kristofoi lɛ akɛ mɛi ni esa akɛ akɛ yiwaa kɛ gbele aba amɛnɔ?
Mra Be Mli Kristofoi Lɛ—Mɛni Hewɔ Anyɛ Amɛ yɛ Romabii Aje lɛ Mli Lɛ?
16. Kristofoi tsi amɛhe kɛjɛ je lɛ he yɛ mɛɛ gbɛ̀i anɔ, ni mɛni hewɔ enɛ hã amɛfee mɛi ni asumɔɔɔ amɛsane yɛ Romabii aje lɛ mli lɛ?
16 Klɛŋklɛŋ lɛ, anyɛ Kristofoi yɛ Romabii aje lɛ mli yɛ amɛjamɔ mli hemɔkɛyelii ni amɛhiɔ shi yɛ naa lɛ hewɔ. Ákɛ nɔkwɛmɔnɔ lɛ, amɛtsi amɛhe kwraa kɛjɛ je lɛ he. (Yohane 15:19) No hewɔ lɛ amɛhiɛɛɛ maŋkwramɔŋ gbɛhei, ni amɛkɛ amɛhe wooo asraafoi anitsumɔ mli. Enɛ hewɔ lɛ, afee amɛhe “mfoniri akɛ gbɔmɛi ni egboi kɛha je lɛ, ni amɛhe bɛ sɛɛnamɔ ko kɛha shihilɛ mli nɔ fɛɛ nɔ,” taakɛ yinɔsaneŋmalɔ Augustus Neander kɛɛ lɛ. Je lɛ fã ni amɛjeee lɛ hu tsɔɔ akɛ amɛtsiɔ amɛhe kɛjɛɔ Romabii ajeŋ ni ekpɔtɔ lɛ gbɛ̀i fɔji lɛ ahe. “Kristofoi akutsei bibii lɛ kɛ amɛ krɔŋŋfeemɔ kɛ hetsemɔ shihilɛ lɛ miihao wɔŋjamɔ je lɛ ni ŋɔɔmɔyeli he miishɛɛ eye amɛ sɛkɛ lɛ,” taakɛ yinɔsaneŋmalɔ Will Durant tsɔɔ mli lɛ. (1 Petro 4:3, 4) Ekolɛ Romabii lɛ ka akɛ amɛaatsĩ mɛi ni haa amɛhenilee haoɔ amɛ lɛ anaa kɛtsɔ yiwaa kɛ gbele ni amɛkɛbaa Kristofoi anɔ lɛ nɔ.
17. Mɛni tsɔɔ akɛ klɛŋklɛŋ afii oha lɛ mli Kristofoi lɛ ashiɛmɔ nitsumɔ lɛ mɔ shi jogbaŋŋ?
17 Klɛŋklɛŋ afii oha lɛ mli Kristofoi lɛ shiɛ Nyɔŋmɔ Maŋtsɛyeli lɛ he sanekpakpa lɛ kɛ ekãa ni naa baaa shi. (Mateo 24:14) Beni shɛɔ aaafee afi 60 Ŋ.B. lɛ, no mli lɛ Paulo baanyɛ akɛɛ akɛ ‘ashiɛ sanekpakpa lɛ atsɔɔ bɔɔnii fɛɛ ni yɔɔ ŋwɛi shishi lɛ.’ (Kolosebii 1:23) Beni klɛŋklɛŋ afii oha lɛ baa naagbee lɛ, no mli lɛ Yesu sɛɛnyiɛlɔi lɛ efee mɛi kaselɔi yɛ Roma Maŋtsɛyeli lɛ mli fɛɛ—yɛ Asia, Europa, kɛ Afrika! “Kaisare we lɛ” mli bii lɛ ekomɛi po batsɔmɔ Kristofoi.a (Filipibii 4:22) Nɛkɛ ekãa ni amɛkɛshiɛ nɛɛ tée mɛi amlifu shi. Neander kɛɛ akɛ: “Kristojamɔ kã he eshwere fiofio yɛ gbɔmɛi ni yɔɔ shihilɛi srɔtoi fɛɛ amli lɛ ateŋ, ni eka akɛ ebaabutu maŋ lɛ jamɔ.”
18. Hetuu-kɛhamɔ ní Kristofoi kɛha Yehowa kome pɛ lɛ haaa Roma nɔyeli lɛ asumɔ amɛ sane kwraa yɛ mɛɛ gbɛ nɔ?
18 Yesu sɛɛnyiɛlɔi lɛ kɛ hetuu-kɛhamɔ fɛɛ haa Yehowa pɛ. (Mateo 4:8-10) Ekolɛ amɛjamɔ lɛ fã nɛɛ titri hewɔ ni Roma nɔyeli lɛ sumɔɔɔ amɛ sane kwraa lɛ. Romabii lɛ ŋmɛɔ jamɔi krokomɛi agbɛ, bei abɔ ní nakai jamɔi lɛ amli bii lɛ kɛ amɛhe woɔ maŋtsɛ jamɔ lɛ hu mli lɛ. Mra be mli Kristofoi lɛ nyɛŋ amɛkɛ amɛhe awo jamɔ ni tamɔ nɛkɛ mli kɔkɔɔkɔ. Amɛbuɔ amɛhe akɛ mɛi ni baabu amɛhe akɔntaa amɛha nɔyeli hegbɛ ni nɔ kwɔ kwraa fe Roma Maŋ lɛ, ni ji Yehowa Nyɔŋmɔ. (Bɔfoi lɛ Asaji 5:29) Enɛ hewɔ lɛ, bɔ fɛɛ bɔ ni Kristofonyo ko ji maŋnyo kpakpa yɛ nibii krokomɛi fɛɛ amli lɛ fɛɛ sɛɛ lɛ, abuɔ lɛ akɛ Maŋ lɛ henyɛlɔ.
19, 20. (a) Namɛi ji mɛi titri ni je anɔkwa Kristofoi aheguɔgbee wiemɔi ni agbɛ ashwã lɛ shishi? (b) Mɛɛ amale naafolɔmɔi akɛshi Kristofoi?
19 Yiŋtoo kroko hu yɛ ní ha Kristofoi anɔkwafoi batsɔmɔ ‘mɛi ni anyɛɔ amɛ’ yɛ Romabii aje lɛ mli lɛ: No ji akɛ, ahé heguɔgbee wiemɔi ní akɛshiɔ amɛ lɛ aye yɛ gbɛ ni waaa nɔ, ni Yudafoi ajamɔ mli hiɛnyiɛlɔi lɛ ji mɛi titri ni je heguɔgbee wiemɔi ni akɛshiɔ amɛ nɛɛ shishi. (Bɔfoi lɛ Asaji 17:5-8) Aaafee afi 60 loo 61 Ŋ.B., beni Paulo yɔɔ Roma ní emɛɔ ni Maŋtsɛ Wulu Nero abakojo lɛ lɛ, Yudafoi ahiɛnyiɛlɔi lɛ wie Kristofoi lɛ ahe akɛ: “Nɛkɛ kuu fã nɛɛ wɔle akɛ awieɔ he efɔŋ yɛ he fɛɛ he.” (Bɔfoi lɛ Asaji 28:22) Ŋwanejee ko bɛ he akɛ Nero nuɔ heguɔgbee wiemɔi ni awieɔ ashiɔ amɛ lɛ. Yɛ afi 64 Ŋ.B., beni ashwá lɛ yɛ la ni shã Roma butuu lɛ he lɛ, abɔ amaniɛ akɛ Nero hala Kristofoi, ní awieɔ amɛhe efɔŋ momo lɛ ni ekɛ naafolɔmɔ kɛ shwamɔ lɛ fɔ̃ amɛnɔ. Etamɔ nɔ ni enɛ kɛ yiwaa ni naa wa waa ní akɛkpɛ yiŋ akɛ akɛbaakpata Kristofoi fɛɛ ahiɛ lɛ ba.
20 Bei pii lɛ, amale naafolɔmɔi ni akɛshiɔ Kristofoi lɛ ji amalei diɛŋtsɛ kɛ amɛhemɔkɛyelii ní atsɔmɔ lɛ ní akɛfutu. Akɛni amɛheɔ Nyɔŋmɔ kome pɛ amɛyeɔ ní amɛjaaa maŋtsɛ lɛ hewɔ lɛ, abuɔ amɛ akɛ mɛi ni heee yeee akɛ Nyɔŋmɔ yɛ. Akɛni weku mli bii ni amɛjeee Kristofoi lɛ ekomɛi teɔ shi woɔ amɛwekumɛi Kristofoi lɛ hewɔ lɛ, afolɔ Kristofoi lɛ anaa akɛ amɛfiteɔ wekui. (Mateo 10:21) Atsɛ́ amɛ akɛ mɛi ni yeɔ gbɔmɔ loo, ni enɛ ji naafolɔmɔ ko ní, taakɛ mɛi komɛi kɛɔ lɛ, edamɔ Yesu wiemɔi ni ewie yɛ Nuntsɔ lɛ Gbɛkɛnaashi Niyenii lɛ shishi lɛ he shishinumɔ ni ejaaa nɔ.—Mateo 26:26-28.
21. Mɛɛ yiŋtoi enyɔ hewɔ ni Kristofoi ji ‘mɛi ni anyɛɔ amɛ’ lɛ?
21 No hewɔ lɛ, Kristofoi anɔkwafoi batsɔmɔ ‘mɛi ni’ Romabii lɛ ‘nyɛɔ amɛ’ yɛ yiŋtoi titrii enyɔ hewɔ: (1) amɛhemɔkɛyelii kɛ nifeemɔi ni damɔ Biblia lɛ nɔ lɛ, kɛ (2) amale naafolɔmɔi ní akɛshiɔ amɛ lɛ. Bɔ fɛɛ bɔ ni yiŋtoo lɛ ji lɛ, oti koome pɛ mã shitee-kɛ-wolɔi lɛ ahiɛ—Kristojamɔ nɔnyɛɛ. Yɛ anɔkwale mli lɛ, mɛi diɛŋtsɛ ni woɔ yiwaa ní akɛbaa Kristofoi anɔ lɛ he hewalɛ ji shitee-kɛ-wolɔi ni he wa fe adesai, mumɔi fɔji ní anaaa amɛ lɛ.—Efesobii 6:12.
22. (a) Mɛɛ nɔkwɛmɔnɔ tsɔɔ akɛ Yehowa Odasefoi bɔɔ mɔdɛŋ akɛ ‘amɛaafee mɛi fɛɛ ejurɔ’? (Kwɛmɔ akrabatsa ni yɔɔ baafa 11 lɛ.) (b) Mɛni abaasusu he yɛ nikasemɔ ni nyiɛ sɛɛ lɛ mli?
22 Taakɛ mra be mli Kristofoi lɛ ji lɛ, Yehowa Odasefoi ni yɔɔ ŋmɛnɛŋmɛnɛ beaŋ lɛ etsɔmɔ ‘mɛi ni anyɛɔ amɛ’ yɛ shikpɔji babaoo nɔ. Ni kɛlɛ amɛnyɛɛɛ mɛi ni jeee Odasefoi lɛ; ni amɛfeko hei ni ajɛɔ ateɔ shi awoɔ maŋ nɔyelii lɛ hu dã. Nɔ ni tamɔɔɔ nakai lɛ, ale amɛ yɛ jeŋ fɛɛ akɛ amɛjieɔ anɔkwa suɔmɔ ní tekeɔ shihilɛi srɔtoi, hewolo nɔ sui, kɛ adesai awekui amli husui fɛɛ lɛ kpo. Belɛ, mɛni hewɔ ni awaa amɛ yi lɛ mɔ? Ni te amɛfeɔ amɛnii yɛ shitee-kɛ-woo he amɛhaa tɛŋŋ? Abaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
[Shishigbɛ niŋmai]
a Wiemɔ “Kaisare we” lɛ kɔɔɔ Nero, ní no mli lɛ, lɛ eyeɔ maŋtsɛ lɛ weku kɔkrɔɔ lɛ mli bii ahe doo. Shi moŋ, ekolɛ ekɔɔ tsuji ní sɔmɔɔ yɛ shĩa kɛ onukpai ni amɛgbɛhei anɔ kwɔlɔɔɔ tsɔ, ní ekolɛ amɛtsuɔ shĩa mli nitsumɔi komɛi tamɔ nihoomɔ kɛ shĩa mli kwramɔ amɛhaa maŋtsɛmɛi aweku lɛ kɛ nitsulɔi lɛ ahe.
Te Obaaha Hetoo Tɛŋŋ?
◻ Mɛni hewɔ Yesu wo mɛi ni baafee esɛɛnyiɛlɔi wɔsɛɛ lɛ hewalɛ ní amɛsusu kaselɔfeemɔ he gbɛnaa lɛ he lɛ?
◻ Mɛɛ hewalɛ susumɔ ni ayɔɔ yɛ mɛi ni amɛjeee Yudafoi lɛ ahe lɛ ná yɛ Yuda jamɔ nɔ, ni mɛni wɔkaseɔ kɛjɛɔ enɛ mli?
◻ Mra be mli Kristofoi anɔkwafoi lɛ kɛ shitee-kɛ-woo kpe kɛjɛ mɛɛ jɛɛhei etɛ?
◻ Mɛɛ yiŋtoi titrii ahewɔ ni mra be mli Kristofoi lɛ fee ‘mɛi ni’ Romabii lɛ ‘nyɛɔ amɛ’ lɛ?
[Akrabatsa ni yɔɔ baafa 11]
‘Ejurɔ ni Wɔɔfee Mɛi Fɛɛ’
Yehowa Odasefoi bɔɔ mɔdɛŋ akɛ amɛaabo ŋaawoo ní Biblia lɛ kɛhaa akɛ ‘wɔfee mɛi fɛɛ ejurɔ’ lɛ toi. (Galatabii 6:10) Yɛ hiamɔ bei amli lɛ, naanyo suɔmɔ kanyaa amɛ ni amɛyeɔ amɛbuaa mɛi ni kɛ amɛjamɔ mli susumɔi kpãaa gbee lɛ. Ákɛ nɔkwɛmɔnɔ lɛ, beni amanehulu shihilɛ lɛ yaa nɔ yɛ Rwanda yɛ afi 1994 mli lɛ, Odasefoi ni jɛ Europa kɛ amɛhe hã akɛ amɛbaaya Afrika ní amɛyaye amɛbua kɛ yelikɛbuamɔ nitsumɔi. Ato nsarai kɛ helatsamɔhei bibii ahe gbɛjianɔ jogbaŋŋ oya nɔŋŋ bɔni afee ni amɛkɛ yelikɛbuamɔ aha. Akɛ niyenii, atadei, kɛ kuntui babaoo diɛŋtsɛ wo kɔɔyɔŋ lɛji amli kɛyaha amɛ. Abobalɔi ni ná nɛkɛ yelikɛbuamɔ nitsumɔ nɛɛ he sɛɛ lɛ ayifalɛ fe Odasefoi ni yɔɔ nakai kpokpaa lɛ nɔ lɛ ayifalɛ toi etɛ.
[Mfoniri ni yɔɔ baafa 9]
Klɛŋklɛŋ afii oha lɛ mli Kristofoi lɛ kɛ ekãa ni naa baaa shi shiɛ sanekpakpa lɛ