Sanekpakpa lɛ Hebuu yɛ Mla Naa

SHII ABƆ ni gbɔmɔ yaa nɔ emaa maŋtiasei lɛ, eyaa nɔ etswaa gbogboi. Titri lɛ, nɛkɛ gbogboi nɛɛ ji hebuu nibii yɛ gbii ni eho lɛ amli. Hefalɔi nyɛɔ amɛwuɔ ta kɛjɛɔ husu nɛɛ nɔ, ní amɛkɛbu gbogboi lɛ ahe koni tutualɔi akakumɔ loo amɛkatsa shishi. Jeee akɛ maŋtiase lɛ mli bii náa hebuu kɛkɛ, shi mɛi ni yɔɔ maji ni bɔle he lɛ hu náa abobaahe yɛ gbogboi afabaŋi lɛ amli yɛ bei pii amli.—2 Samuel 11:20-24; Yesaia 25:12.

Nɔ ni tamɔ nakai lɛ, Yehowa Odasefoi efee gbogbo—mla naa gbogbo—ní ji hebuu nɔ̃. Jeee akɛ atswa gbogbo nɛɛ koni akɛha Odasefoi atsi amɛhe kɛjɛ mɛi krokomɛi lɛ ahe, ejaakɛ ale Yehowa Odasefoi akɛ gbɔmɛi ni yɔɔ mɛi ahe miishɛɛ, ní jieɔ naanyobɔɔ su kpo. Shi moŋ ewajeɔ heyelii ni he hiaa lɛ he mla naa nɔmimaa saji lɛ mli ehaa mɛi fɛɛ. Yɛ nakai beaŋ nɔŋŋ lɛ, ebuɔ Odasefoi lɛ amla naa hegbɛi ahe koni amɛnyɛ amɛtsu amɛjamɔ lɛ he nii kwraa. (Okɛto Mateo 5:14-16 he.) Enɛ baabu gbɛ ni amɛtsɔɔ nɔ amɛkɛ jamɔ haa lɛ he kɛ hegbɛ ni amɛyɔɔ akɛ amɛaashiɛ Nyɔŋmɔ Maŋtsɛyeli lɛ he sanekpakpa lɛ he. Mɛni ji nɛkɛ gbogbo nɛɛ, ni te átswa lɛ áha tɛŋŋ?

Mla Naa Hebuu Gbogbo ko ni Atswaa

Eyɛ mli akɛ Yehowa Odasefoi náa jamɔŋ heyeli mli ŋɔɔmɔ yɛ shikpɔji babaoo anɔ moŋ, shi yɛ maji komɛi amli lɛ amɛbafee mɛi ni atutuaa amɛ yɛ gbɛ ni ejaaa nɔ. Kɛ awie ashi heyeli ni amɛyɔɔ akɛ amɛkɛ jamɔ aaaha kɛtsɔ henaabuamɔ kutuu loo shiɛmɔ yɛ shia kɛ shia nɔ lɛ, amɛtiuɔ saji asɛɛ yɛ mla naa. Mla naa saji ni kɔɔ Odasefoi ahe lɛ etee hiɛ waa yɛ akpei amli yɛ shikpɔŋ nɔ fɛɛ.a Jeee fɛɛ aye kunim yɛ mli. Shi kɛ́ saneyelihei bibii fee yiŋkpɛɛ ko eshi amɛ lɛ, bei pii lɛ amɛhaa ayeɔ sane lɛ ekoŋŋ yɛ saneyelihei wuji. Mɛni jɛɔ mli baa?

Yɛ afii ohai 20 lɛ mli afii nyɔŋmai abɔ lɛ mli fɛɛ lɛ, mla naa kunim ni aye yɛ shikpɔji babaoo nɔ lɛ, efee nɔkwɛmɔnii ni anyɛɔ akɛ he fɔ̃ɔ nɔ, ni Yehowa Odasefoi kɛtsu nii yɛ saji ni nyiɛ sɛɛ ba lɛ mli. Taakɛ bɔ ni ŋtayaai loo tɛi ni feɔ gbogbo yɔɔ lɛ, nɛkɛ yiŋkpɛi ni hi jogbaŋŋ nɛɛ feɔ mla naa hebuu gbogbo. Odasefoi lɛ etee nɔ amɛwu kɛjɛ gbogbo nɔkwɛmɔnɔ nɛɛ nɔ kɛfã jamɔŋ heyeli ni amɛkɛaatsu amɛjamɔ lɛ he nii lɛ he.

Ákɛ nɔkwɛmɔnɔ lɛ, susumɔ Murdock kɛ Pennsylvania Maŋ Fɛɛ Teŋ Saneyeli ni United States Supreme Court (United States Saneyelihe Wulu ni Fe Fɛɛ) lɛ fee yiŋkpɛɛ yɛ he yɛ May 3, 1943 lɛ he okwɛ. Sanebimɔ ni atee lɛ shi yɛ sane lɛ mli lɛ ji enɛ: Ani esa akɛ Yehowa Odasefoi ahe jarayeli nihɔɔmɔ he gbɛŋmɛɛ wolo kɛha amɛjamɔŋ woji lɛ jaa? Yehowa Odasefoi ma nɔ mi akɛ esaaa akɛ akpaa gbɛ akɛ amɛbaafee nakai. Amɛshiɛmɔ nitsumɔ lɛ jeee—ni akɛtsuko nii pɛŋ akɛ—jarayeli. Jeee amɛyiŋtoo ji akɛ amɛaaná sɛɛ yɛ shika gbɛfaŋ, shi moŋ koni amɛshiɛ sanekpakpa lɛ. (Mateo 10:8; 2 Korintobii 2:17) Yɛ Murdock yiŋkpɛɛ ni afee lɛ mli lɛ, Saneyelihe lɛ kɛ Odasefoi lɛ kpã gbee, ni amɛtsɔɔ mli akɛ shika fɛɛ shika ni aaakpa gbɛ akɛ amɛaawo yɛ gbɛŋmɛɛ wolo he tooyeli he akɛ nɔ ni he hiaa kɛha jamɔŋ woji ajaa lɛ teɔ shi ewoɔ mla.b Nɛkɛ yiŋkpɛɛ nɛɛ ha aná nɔkwɛmɔnɔ ko ni he hiaa, ni Odasefoi lɛ kɛtsu nii yɛ omanyeyeli mli akɛ hegbɛ yɛ saji babaoo mli kɛjɛ no sɛɛ kɛbaa. Murdock yiŋkpɛɛ lɛ efee ŋtayaa ko ni wa waa yɛ mla naa hebuu gbogbo lɛ he.

Saji ni tamɔ nɛkɛ efee babaoo koni ekɛbu jamɔŋ heyeli he eha gbɔmɛi fɛɛ. Yɛ nɔ ni Odasefoi lɛ fee koni amɛkɛfã maŋ hegbɛi ahe yɛ United States lɛ he lɛ, University of Cincinnati Law Review lɛ kɛɛ: “Yehowa Odasefoi ená mla gbɛjianɔtoo lɛ nɔ hewalɛ waa diɛŋtsɛ, titri lɛ, kɛtsɔ wiemɔ kɛ jamɔŋ hegbɛ ni amɛhaa eyaa hiɛ babaoo lɛ nɔ.”

Gbogbo lɛ Wajemɔ

Yɛ mla naa kunimyeli lɛ eko fɛɛ eko mli lɛ, gbogbo lɛ bafeɔ nɔ ni mli waa daa. Susumɔ yiŋkpɛi ni afee yɛ afi 1990 afii lɛ amli lɛ ni he ba sɛɛnamɔ kɛha Yehowa Odasefoi kɛ agbɛnɛ mɛi krokomɛi fɛɛ ni sumɔɔ heyeli, ni amɛyɔɔ je lɛŋ fɛɛ lɛ ateŋ fioo ko he okwɛ.

Greece. Yɛ May 25, 1993 lɛ, European Court of Human Rights fi hegbɛ ni Greece maŋnyo yɔɔ akɛ eeetsɔɔ mɛi krokomɛi ejamɔŋ hemɔkɛyelii lɛ sɛɛ. Sane lɛ kɔɔ Minos Kokkinakis, ní no mli lɛ eye afii 84 lɛ he. Ákɛ Yehowa Odasefoi lɛ ateŋ mɔ kome lɛ, ámɔ Kokkinakis nɔ ni fa fe shii 60 kɛjɛ afi 1938 kɛbaa, áha ebapue yɛ Greece saneyelihei shii 18, ni éye nɔ ni fa fe afii ekpaa yɛ tsuŋwoo mli. Ábu lɛ fɔ́, titri lɛ, yɛ afi 1930 afii lɛ amli yɛ Greece mla ni teɔ shi eshiɔ jamɔ ni atsakeɔ mɔ ko kɛbaa mli lɛ naa—mla ni ha amɔmɔ Yehowa Odasefoi aaafee 20,000 kɛjɛ afi 1938 kɛyashi afi 1992 lɛ. Yiŋkpɛɛ ni European Court lɛ kɛha lɛ ji akɛ, Greece nɔyeli lɛ ete shi ewo Kokkinakis jamɔŋ heyeli lɛ, ni saneyelihe lɛ ha awo lɛ shika ni ji dɔlai 14,400 he nyɔmɔ kɛto lɛ najiaŋ. Yɛ yiŋkpɛɛ ni Saneyelihe lɛ fee lɛ mli lɛ, etsɔɔ akɛ Yehowa Odasefoi ji “jamɔ ni ale” jogbaŋŋ.—Kwɛmɔ September 1, 1993 Buu-Mɔɔ lɛ baafai 27-31.

Mexico. Yɛ July 16, 1992 lɛ, atee hiɛ waa yɛ jamɔŋ heyeli hefamɔ mli yɛ Mexico. Yɛ nakai gbi lɛ nɔ lɛ, ato Law of Religious Associations and Public Worship mla lɛ shishi. Kɛtsɔ mla nɛɛ nɔ lɛ, jamɔŋ kuu ko baanyɛ aná mla naa gbɛhe akɛ jamɔ gbɛjianɔtoo kɛtsɔ jamɔ lɛ gbɛi ni ehe baahia ni akɛwo woji amli lɛ nɔ. Tsutsu ko lɛ, taakɛ maŋ lɛ mli jamɔi ji lɛ, Yehowa Odasefoi yɛ shihilɛ mli diɛŋtsɛ, shi amɛbɛ mla naa hegbɛ. Yɛ April 13, 1993 lɛ, Odasefoi lɛ bi koni akɛ amɛgbɛi awo woji amli. Miishɛɛ sane ji akɛ, yɛ May 7, 1993 lɛ, amɛbafee mɛi ni akɛ amɛgbɛi ewo woji amli akɛ La Torre del Vigía, A. R., kɛ Los Testigos de Jehová en México, A. R., ni enyɔ lɛ fɛɛ ji jamɔŋ kui srɔtoi.—Kwɛmɔ July 22, 1994 Awake! lɛ baafai 12-14.

Brazil. Yɛ November 1990 lɛ, Brazil National Institute of Social Security (INSS) lɛ ha Buu Mɔɔ Asafo lɛ nitsumɔhe nine lɛ le akɛ, abuŋ sɔɔlɔi ni kɛ amɛhe eha yɛ Betel (Yehowa Odasefoi anitsumɔhe niji lɛ gbɛi) lɛ dɔŋŋ akɛ jamɔŋ sɔɔlɔi, ni no hewɔ lɛ amɛbajeɔ Brazil nitsulɔi ni awoɔ amɛ nyɔmɔ lɛ mlai ashishi. Odasefoi lɛ ha aye yiŋkpɛɛ lɛ he sane ekoŋŋ. Yɛ June 7, 1996 lɛ, Judicial Advisory of the Office of the Attorney General ni yɔɔ Brasília lɛ fee yiŋkpɛɛ ko ni fiɔ gbɛhe ni sɔɔlɔi ni yɔɔ Betel lɛ yɔɔ akɛ mla naa jamɔŋ gbɛjianɔtoo mli bii, ni jeee nitsulɔi ni awoɔ amɛ nyɔmɔ.

Japan. Yɛ March 8, 1996 lɛ, Supreme Court of Japan lɛ fee yiŋkpɛɛ ko ni kɔɔ jamɔŋ tsɔsemɔ kɛ heyeli sane he—koni ehe aba sɛɛnamɔ aha mɔ fɛɛ mɔ yɛ Japan. Saneyelihe lɛ kɛ gbeekpamɔ fee yiŋkpɛɛ akɛ Kobe Municipal Industrial Technical College lɛ tɔ̃ mla lɛ nɔ yɛ Kunihito Kobayashi ni eshwie lɛ lɛ hewɔ, yɛ ehe ni ekɛwooo tawuu kasemɔ mli tsɔsemɔ mli lɛ hewɔ. Nɛkɛ yiŋkpɛɛfeemɔ be nɛɛ ji klɛŋklɛŋ be ni Supreme Court lɛ efee yiŋkpɛɛ ni damɔ jamɔŋ heyeli ni Japan Mla Gbɛjianɔtoo lɛ ma nɔ mi lɛ nɔ. Yɛ nɛkɛ Odasefonyo gbekɛ nɛɛ henilee ni Biblia etsɔse lɛ lɛ hewɔ lɛ, enu he akɛ nɛkɛ nii ni akɛ gbɔmɔtso kaseɔ lɛ kɛ Biblia mli shishitoo mlai tamɔ nɔ ni anaa yɛ Yesaia 2:4 kpãaa gbee, nɔ ni kɛɔ akɛ: “Amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!” Yiŋkpɛɛ ni Saneyelihe lɛ fee lɛ fee nɔkwɛmɔnɔ efɔ̃ shi kɛha saji ni baaba wɔsɛɛ ko.—Kwɛmɔ November 1, 1996 Buu-Mɔɔ lɛ baafai 19-21.

Yɛ February 9, 1998 mli lɛ, Tokyo High Court lɛ fee yiŋkpɛɛ ko ni sa kadimɔ waa ni miifĩ hegbɛ ni Odasefonyo ko ni atsɛɔ lɛ Misae Takeda lɛ yɔɔ ni ekɛaakpoo tsofafeemɔ mli tsamɔ ni kɛ Biblia mli famɔ ni tsɔɔ akɛ ‘ahi lá’ lɛ kpãaa gbee lɛ sɛɛ. (Bɔfoi lɛ Asaji 15:28, 29) Akɛ sane nɛɛ etee Supreme Court lɛ koni aye ekoŋŋ yɛ jɛmɛ, ni kɛ́ abaafi High Court lɛ yiŋkpɛɛ sɛɛ lɛ, abaaná ale.

Philippines. Yɛ yiŋkpɛɛ ko ni afee yɛ March 1, 1993 lɛ, Philippine Supreme Court lɛ kɛ gbeekpamɔ kpɛ yiŋ kɛfã Yehowa Odasefoi ahe yɛ sane ni kɔɔ gbekɛbii Odasefoi ni ashwie amɛ kɛjɛ skul lɛ he akɛni amɛkɛ bulɛ tsɔɔ akɛ amɛŋaŋ aflaŋaa lɛ hewɔ.

Saneyelihe lɛ yiŋkpɛɛ fɛɛ ni hi lɛ tamɔ tɛ loo ŋtayaa ni akɛfata he koni akɛwaje mla naa gbogbo lɛ ni buɔ hegbɛi ni jeee Yehowa Odasefoi pɛ yɔɔ shi agbɛnɛ gbɔmɛi fɛɛ yɔɔ lɛ hu he.

Gbogbo lɛ Hebuu

Áŋma Yehowa Odasefoi ni yɔɔ shikpɔji 153 nɔ lɛ gbɛi yɛ mla wolo mli, ni amɛmiiná heyelii babaoo mli ŋɔɔmɔ yɛ gbɛ ni ja nɔ, taakɛ jamɔi krokomɛi ni akpɛlɛɔ amɛnɔ lɛ hu ji lɛ. Yɛ afii nyɔŋmai abɔ yiwaa kɛ nitsumɔ lɛ ni agu yɛ Europa Bokagbɛ kɛ tsutsu Soviet Union lɛ sɛɛ lɛ, akpɛlɛ Yehowa Odasefoi anɔ yɛ mla naa agbɛnɛ yɛ maji tamɔ Albania, Belarus, Czech Republic, Georgia, Hungary, Kazakstan, Kyrgyzstan, Romania, kɛ Slovakia. Shi kɛlɛ, yɛ shikpɔji komɛi anɔ ŋmɛnɛ, ni Europa Anaigbɛ maji komɛi ni ejɛ jeeŋmɔ amɛto kojomɔ gbɛjianɔtoi amɛma shi lɛ fata he lɛ, aawie aashi hegbɛi ni Yehowa Odasefoi yɔɔ lɛ waa diɛŋtsɛ loo aahe amɛ hegbɛ kɛmiijɛ amɛdɛŋ kwraa. Shitee-kɛ-wolɔi kɛ ekãa bɔɔ mɔdɛŋ waa koni ‘amɛtsɔ mla nɔ amɛye sane fɔŋ’ amɛshi Odasefoi. (Lala 94:20) Te mɛnɛɛmɛi hereɔ nɔ amɛhaa tɛŋŋ?c

Yehowa Odasefoi miisumɔ ni amɛkɛ nɔyelii fɛɛ afee ekome, shi amɛmiisumɔ hu ni amɛná mla naa heyeli koni amɛtsu amɛjamɔ lɛ he nii. Eji amɛhemɔkɛyeli ni ma shi shiŋŋ akɛ mla fɛɛ mla loo saneyelihe yiŋkpɛi fɛɛ ni abaafee ni baagu amɛ kɛjɛ Nyɔŋmɔ famɔi atoiboo nɔ—ni famɔ ni tsɔɔ akɛ ashiɛ sanekpakpa lɛ fata he lɛ—teɔ shi ewoɔ mla. (Marko 13:10) Kɛ anyɛŋ aná gbeekpamɔ ni kɛ toiŋjɔlɛ baa lɛ, Yehowa Odasefoi kɛ ekãa baafã amɛhe yɛ mla naa nifeemɔi amli, yɛ be mli ni amɛtiuɔ gbɛi srɔtoi fɛɛ ni he hiaa ni akɛaaye sane lɛ ekoŋŋ koni amɛná mla naa hebuu kɛha hegbɛ ni Nyɔŋmɔ kɛha amɛ lɛ koni amɛtsu amɛjamɔ lɛ he nii. Yehowa Odasefoi yɛ hekɛnɔfɔ̃ɔ kwraa yɛ Nyɔŋmɔ shiwoo nɛɛ mli akɛ: “Tawuu nii ni asɔ̃ɔ ashiɔo lɛ eko eko nyɛŋ nɔ ko afee.”—Yesaia 54:17.

[Shishigbɛ niŋmai]

[Akrabatsa ni yɔɔ baafa 21]

Hegbɛi ni Yehowa Odasefoi Yɔɔ lɛ Hebuu

Yiwaa ni akɛbaa Yehowa Odasefoi anɔ lɛ eha ámɔmɔ amɛ kɛtee kojolɔi kɛ maŋ onukpai ahiɛ yɛ jeŋ fɛɛ. (Luka 21:12, 13) Yehowa Odasefoi kɛ ekãa etsu nii waa yɛ mla naa ni amɛkɛbu hegbɛi ni amɛyɔɔ lɛ he. Saneyelihe mli kunim srɔtoi ni aye yɛ shikpɔji babaoo nɔ lɛ eye ebua koni akɛbu mla naa heyeli ni Yehowa Odasefoi yɔɔ lɛ he, ni nɔ ni fata he ji hegbɛ ni amɛyɔɔ akɛ:

◻ amɛaashiɛ yɛ shia kɛ shia ni naatsĩi ni akɛbaa jarayeli nihɔɔlɔi anɔ lɛ náaa amɛnɔ hewalɛ—Murdock kɛ Pennsylvania Maŋ Fɛɛ Teŋ Saneyeli, U.S. Supreme Court (1943); Kokkinakis kɛ Greece Teŋ Saneyeli, European Court of Human Rights (ECHR) (1993).

◻ amɛaabua amɛhe naa kɛha jamɔ ni mɔ ko kwraa gbaaa amɛnaa—Manoussakis kɛ Mɛi Krokomɛi lɛ kɛ Greece Teŋ Saneyeli, ECHR (1996).

◻ amɛaatsɔɔ bɔ ni amɛbaanyɛ amɛjie bulɛ kpo amɛha maŋ aflaŋaa loo okadi lɛ yɛ henilee kpakpa naa—West Virginia State Board of Education v. Barnette, U.S. Supreme Court (1943); Supreme Court of the Philippines (1993); Supreme Court of India (1986).

◻ amɛaakpoo asraafoi anitsumɔ ni teɔ shi ewoɔ amɛ Kristofoi ahenilee—Georgiadis kɛ Greece Teŋ Saneyeli, ECHR (1997).

◻ amɛaahala tsofafeemɔi kɛ tsofai ni eteee shi ewooo amɛhenilee—Malette kɛ Shulman Teŋ Saneyeli, Ontario, Canada, Appeal Court (1990); Watch Tower kɛ E.L.A. Teŋ Saneyeli, Superior Court, San Juan, Puerto Rico (1995); Fosmire v. Nicoleau, New York, U.S.A., Court of Appeals (1990).

◻ amɛaatsɔse amɛbii yɛ amɛhemɔkɛyelii ni damɔ Biblia nɔ lɛ naa, kɛ́ awie ashi hemɔkɛyelii nɛɛ yɛ gbekɛbii akwɛmɔ he béi amli po—St-Laurent kɛ Soucy Teŋ Saneyeli, Supreme Court of Canada (1997); Hoffmann kɛ Austria Teŋ Saneyeli, ECHR (1993).

◻ amɛaaná mla naa nitsumɔi ni ahaaa amɛwo too taakɛ bɔ ni ahaaa nitsumɔi ni jamɔi krokomɛi ni akpɛlɛ amɛnɔ lɛ kɛtsuɔ nii lɛ wooo too lɛ koni amɛkɛtsu nii—Mɛi kɛ Haring Teŋ Saneyeli, New York, U.S.A., Court of Appeals (1960).

◻ aaaha mɛi ni ahala amɛ awo be-fɛɛ sɔɔmɔ nitsumɔ krɛdɛɛ lɛ eko mli lɛ awo too fioo taakɛ bɔ ni jamɔi krokomɛi lɛ abe-fɛɛ jamɔŋ nitsulɔi lɛ woɔ lɛ—Brazil’s National Institute of Social Security, Brasília, (1996).

[Mfoniri ni yɔɔ baafa 20]

Minos Kokkinakis kɛ eŋa

[Mfoniri ni yɔɔ baafa 20]

Kunihito Kobayashi

[He ni Mfoniri ni yɔɔ baafa 19 lɛ Jɛ]

The Complete Encyclopedia of Illustration/J. G. Heck