Yiŋkpɛɛ ni Akɛhalaa Nɔ ni Asumɔɔ

JEEE mɔ ko mɔ ko, akɛ ja Mɔ ni fe mɔ fɛɛ mɔ yɛ jeŋ muu fɛɛ lɛ ji mɔ ni fiɔ nihalamɔ ni ajɛɔ nilee mli afeɔ lɛ sɛɛ. Lɛ ji wɔ-Bɔlɔ lɛ. Akɛni eyɛ gbɔmɔ hiamɔ nii ahe nilee babaoo diɛŋtsɛ hewɔ lɛ, ejɛɔ mlihilɛ mli ekɛ tsɔsemɔ haa, ebɔɔ kɔkɔ, ni ekɛ nilee gbɛ ni esa akɛ anyiɛ nɔ he gbɛtsɔɔmɔ haa. Shi kɛlɛ, ejieɔ bulɛ kpo ehaa heyeli ni akɛfeɔ nɔ fɛɛ nɔ ni asumɔɔ ni ekɛha ebɔɔ nii ni yɔɔ nilee lɛ. Mose, ni ji Nyɔŋmɔ gbalɔ lɛ jie bɔ ni eji lɛ kpo etsɔɔ: “Miitsɛ ŋwɛi kɛ shikpɔŋ ŋmɛnɛ ní amɛbaye nyɛhe odase akɛ mikɛ wala kɛ gbele, jɔɔmɔ kɛ loomɔ eshwie nyɛhiɛ; no hewɔ lɛ kɔ wala, koni bo kɛ oseshi fɛɛ ayi aná wala.”—5 Mose 30:19.

Nɛkɛ shishitoo mla nɛɛ kɔɔ tsofafeemɔ he nikasemɔ he. Aakpɛlɛ susumɔ ni tsɔɔ nilee ni mɔ ko jɛɔ mli ekpɛɔ eyiŋ, aloo bɔ ni esa akɛ sanegbaa kɛha gbeekpamɔ aba lɛ nɔ fiofio yɛ Japan, kɛ shikpɔji krokomɛi anɔ, ni ji hei ni afɔɔɔ nakai feemɔ yɛ jɛmɛ yɛ be ko ni eho lɛ mli lɛ. Dr. Michitaro Nakamura kɛ nɛkɛ sanemlitsɔɔmɔ ni kɔɔ sanegbaa kɛha gbeekpamɔ nɛɛ ha: “Eji jwɛŋmɔ ni ahiɛ, akɛ datrɛfonyo lɛ kɛ wiemɔ ni shishinumɔ waaa aaatsɔɔ hela lɛ, kɛ nɔ ni baanyɛ ajɛ mli aba, tsofafeemɔ gbɛ ni akɛbaatsu nii, kɛ nibii ni baanyɛ ajɛ mli aba lɛ mli etsɔɔ helatsɛ lɛ, ni ejie bulɛ kpo eha hegbɛ ni helatsɛ lɛ yɔɔ akɛ ekpɛɔ yiŋ ehaa lɛ diɛŋtsɛ ehe yɛ nɔ ni kɔɔ tsofafeemɔ gbɛ ni akɛaatsu lɛ he lɛ.”—Japan Medical Journal.

Afii abɔ ni eho nɛ lɛ, Japan datrɛfoi kɛ yiŋtoi srɔtoi ahewɔ ni amɛteɔ shi amɛwoɔ nɛkɛ gbɛ ni atsɔɔ nɔ atsaa helatsɛmɛi nɛɛ eha, ni saneyelihei lɛ sumɔɔ ní amɛtsi tsofafeemɔ mli saji amɛto. Enɛ hewɔ lɛ, February 9, 1998 bafee tsakemɔ gbi ko, beni Kojolɔ Nukpa Takeo Inaba ni yɔɔ Tokyo High Court (Tokyo Saneyelihe Wulu) lɛ kɛ yiŋkpɛɛ kɛha nilee ko mli ni ajɛɔ ahalaa nɔ ni asumɔɔ lɛ ha koni akɛtsu nii lɛ. Mɛni ji nakai yiŋkpɛɛ lɛ, ni mɛɛ sane ha akɛ sane lɛ tee saneyelihei lɛ?

Yɛ July 1992 mli lɛ, Misae Takeda ni ji Yehowa Odasefonyo ni eye afii 63 tee Institute of Medical Science Hospital ni yɔɔ University of Tokyo lɛ. No mli lɛ datrɛfoi ena akɛ heloo mli fala ni gbooo efee emlɛbo, ni ehe miihia ni afee lɛ opireshɛn. Akɛni eesumɔ ni efee toiboo waa eha Biblia mli famɔ ni teɔ shi ewoɔ lá ni akɛtsuɔ nii yɛ gbɛ ni ejaaa nɔ hewɔ lɛ, eha efee faŋŋ kɛha edatrɛfoi lɛ akɛ, eesumɔ ni akɛ helatsamɔ ni lá bɛ mli pɛ atsa lɛ. (1 Mose 9:3, 4; Bɔfoi lɛ Asaji 15:29) Datrɛfoi lɛ kɛ amɛnine wo wolo ni tsɔɔ sɔ̃ ni aaajie amɛ kɛaajɛ mli lɛ shishi, ni haa amɛ, kɛ helatsamɔhe lɛ yeɔ amɛhe kwraa kɛjɛɔ sɔ̃ ni amɛaatere yɛ nɔ ni baajɛ eyiŋ ni ekpɛ lɛ mli aba lɛ mli. Amɛma nɔ mi amɛha lɛ akɛ amɛkɛbaatsu nii.

Shi kɛlɛ, yɛ opireshɛn lɛ sɛɛ, beni Misae hiɛ tserɛko lɛ lolo lɛ, agbala lá awo emli—esoro no kwraa yɛ nɔ ni esumɔɔ ni afee ni egbala mli fitsofitso etsɔɔ lɛ he. Mɔdɛŋ ni abɔ koni akana akɛ agbala lá awo emli ni ahako efeemɔ hegbɛ lɛ je kpo, helatsamɔhe lɛ mli nitsulɔ ko yabɔ adafitswalɔi amaniɛ. Taakɛ obaanu shishi lɛ, nɛkɛ Kristofonyo yoo anɔkwafo nɛɛ hao waa diɛŋtsɛ, beni ená ele akɛ agbala lá awo emli, ni ehako hegbɛ nɛɛ. Ekɛ ehe fɔ̃ helatsamɔhe lɛ mli nitsulɔi lɛ anɔ, ni ehe eye akɛ amɛkɛ amɛ wiemɔ lɛ baatsu nii, ní amɛjie bulɛ kpo amɛtsɔɔ ejamɔŋ hemɔkɛyeli lɛ. Yɛ henumɔŋ piŋmɔ ni ená yɛ datrɛfonyo kɛ helatsɛ teŋ wekukpaa ni akɛtsuuu nii kwraa nɛɛ, kɛ hiɛnɔkamɔ ni eyɔɔ akɛ eeeto gbɛjianɔ ko ni baaha mɛi krokomɛi atsi amɛhe kɛjɛ tsofafeemɔ mli nifeemɔ ni esaaa ni tamɔ nɛkɛ nɔŋŋ he hewɔ lɛ, ekɛ sane lɛ tee saneyelihe.

Maŋ Toiŋjɔlɛ kɛ Jeŋbai

Kojolɔi etɛ ni yɔɔ Tokyo District Court (Tokyo Kpokpaa nɔ Saneyelihe) lɛ bo sane lɛ toi ni amɛwo mla kɛfĩ datrɛfoi lɛ asɛɛ, kɛkɛ ni amɛte shi amɛwo hegbɛ ni ayɔɔ kɛha sanegbaa kɛha gbeekpamɔ lɛ. Yɛ yiŋkpɛɛ ni amɛfee lɛ mli lɛ, yɛ March 12, 1997 lɛ, amɛwie akɛ ejaaa akɛ aaabɔ mɔdɛŋ ko kwraa ni akɛ mɔ ko abote kpaŋmɔ ko, ni tsɔɔ akɛ akɛ lá tsuŋ nii kwraa yɛ mɔ tsamɔ mli lɛ mli. Jwɛŋmɔ ni amɛhiɛ ji akɛ, ebaatsɔɔ kojo ryozokua lɛ mlikuu, aloo maŋ tɛi ni afolɔ aha datrɛfoi akɛ amɛkɛ mɔ ko akpã gbee krɛdɛɛ ko akɛ amɛkɛ lá tsuŋ nii kɛji akɛ jaramɔ shihilɛ je shishi po lɛ mlikuu. Jwɛŋmɔ ni amɛhiɛ ji akɛ, eji sɔ̃ diɛŋtsɛ ni kã datrɛfonyo nɔ akɛ ehereɔ mɔ yiwala yɛ gbɛ ni hi fe fɛɛ nɔ bɔ ni ebaanyɛ, no hewɔ lɛ kpaŋmɔ ni tamɔ nɛkɛ jeee nɔ ni ja kɛjɛ shishijee, ni helatsɛ lɛ jamɔŋ hemɔkɛyeli kɔɔɔ he eko. Amɛtsɔɔ akɛ, yɛ naagbee kwraa lɛ, esa akɛ akɛ datrɛfonyo nitsumɔ he jwɛŋmɔ ni ekɛbaaha lɛ atsu nii fe nɔ fɛɛ nɔ ni helatsɛ ko baabi kɛtsɔ hiɛ koni akɛtsu nii yɛ tsofafeemɔ mli lɛ.

Kɛfata he lɛ, kojolɔi lɛ tsɔɔ mli akɛ, yɛ nakai susumɔi lɛ nɔŋŋ naa lɛ, eyɛ mli akɛ aakpa gbɛ akɛ datrɛfonyo lɛ baatsɔɔ bɔ ni ebaatsu he nii eha, nɔ ni baajɛ mli aba, kɛ naagbai ni baajɛ opireshɛn ni akɛɛ abaafee lɛ mli lɛ mli aba moŋ, “shi ewieŋ kɛji akɛ ekɛ lá baatsu nii aloo ekɛtsuŋ nii.” Kojomɔ ni amɛkɛha ji akɛ: “Anyɛŋ atsɔɔ akɛ eji nɔ ni mla eŋmɛɛɛ gbɛ, aloo ejaaa akɛ datrɛfoi lɛ ni ji Mɛi ni Asãmã lɛ nu nɔ ni Sãmãlɔ lɛ sumɔɔ ni afee aha lɛ lɛ shishi, akɛ esumɔŋ ni agbala lá awo emli ni bɔni shihilɛ lɛ ji lɛ kɔɔɔ he eko, ni amɛfee tamɔ nɔ ni amɛkɛ nɔ ni esumɔɔ ni afee lɛ baatsu nii, ni no hewɔ lɛ eha ekpɛlɛ opireshɛnfeemɔ lɛ nɔ lɛ.” Bɔni asusuɔ ji akɛ, eji datrɛfoi lɛ fee amɛ nii yɛ gbɛ kroko nɔ kulɛ, ekolɛ helatsɛ lɛ baanyɛ akpoo opireshɛn lɛ, ni ebaashi helatsamɔhe lɛ kɛya.

Nakai sane jajemɔ ni akɛha yɛ saneyelihe lɛ, ha mɛi ni fiɔ sanegbaa kɛha gbeekpamɔ sɛɛ lɛ ahe jɔ̃ amɛhe, ni amɛnaa kpɛ amɛhe. Beni Nilelɔ Takao Yamada, ni ji hegbɛ ni fe fɛɛ yɛ maŋ mla mli lɛ wieɔ yiŋkpɛɛ ni afee yɛ Takeda sane lɛ mli lɛ he lɛ, kɛ bɔ ni esa akɛ akɛ sanegbaa kɛha gbeekpamɔ atsu nii aha yɛ Japan lɛ, eŋma akɛ: “Kɛ aŋmɛ gbɛ ni akɛ yiŋkpɛɛ nɛɛ he susumɔ lɛ atsu nii lɛ, no lɛ, akɛ lá ni agbalaa awoɔ mɔ mli ni akpoɔ, kɛ sanegbaa kɛha gbeekpamɔ ni ji shishitoo mla lɛ baakpa nitsumɔ fiofio.” (Mla naa wolo Hogaku Kyoshitsu) Ekɛ wiemɔi ni yɔɔ shiŋŋ gu lá ni anyɛ enɔ ni agbala awo emli lɛ, akɛ eji “hekɛnɔfɔɔ mlikuu ni naa wa, ni etamɔ tutuamɔ ni atutuaa mɔ ko trukaa lɛ pɛpɛɛpɛ.” Nilelɔ Yamada kɛfata he akɛ, “esaaa akɛ akpɛlɛɔ” nifeemɔ ni tamɔ nɛkɛ ni akɛfiteɔ hekɛnɔfɔɔ lɛ “nɔ kɔkɔɔkɔ.”

Misae ekãafeemɔ ni shishashaomɔ yɔɔ mli lɛ ha ewa akɛ eeeha ale yɛ maŋ fɛɛ hiɛ. Shi akɛni eyɔse gbɛfaŋnɔ ni eeená yɛ Yehowa gbɛi lɛ, kɛ ejalɛ shishitoo tɛi ni kɔɔ krɔŋkrɔŋ ni lá ji lɛ hefamɔ hewɔ lɛ, etswa efai shi akɛ eeetsu egbɛfaŋnɔ he nii. Eŋma wolo eyaha elɔyafonyo lɛ akɛ: “Mihe bɛ sɛɛnamɔ fe sũ, mibaa shi kwraa.” Efeɔ mi naakpɛɛ akɛ akɛ gbɔmɔ ni tamɔ mi ni he esako tsu nii. Shi kɛ́ mifee nɔ̃ pɛpɛɛpɛ ni Yehowa—mɔ ni baanyɛ aha tɛi abolɔ lɛ—kɛɛɔ lɛ, no lɛ, ebaawo mi hewalɛ.” (Mateo 10:18; Luka 19:40) Beni edamɔ odaseyeli adeka lɛ mli yɛ nakai gbi lɛ nɔ lɛ, ekɛ gbeeŋ kpokpomɔ tsɔɔ bɔ ni ena nɔ̃ yɛ henumɔŋ akɛni alaka lɛ lɛ hewɔ. “Minu he akɛ abule mi, tamɔ yoo ko ni ato lɛ kabonaa.” Odaseyeli ni ekɛha yɛ nakai gbi lɛ ha mɛi babaoo ni yɔɔ saneyelihe lɛ fo.

Naakpɛɛ Hewalɛwoo

Yɛ Kpokpaa nɔ Kojomɔhe lɛ yiŋkpɛɛ lɛ hewɔ lɛ, akɛ sane lɛ ha amrɔ nɔŋŋ koni ayaye yɛ Kojomɔhe Wulu lɛ. Aje naataamɔi lɛ ashishi yɛ July 1997 mli yɛ saneyelihe ni akɛ sane lɛ ha koni aye ekoŋŋ yɛ jɛmɛ lɛ, ni amrɔ nɛɛ lɛ, Misae efee vii moŋ, shi ekɛ faishitswaa ta shwiili mli yɛ jɛmɛ. Kansa lɛ eku sɛɛ eba ekoŋŋ, ni eegbɔjɔ lɛ kwraa. Misae ná ekãa waa diɛŋtsɛ, beni kojolɔ nukpa lɛ kɛ enane ma shi ni ekpaaa gbɛ, ni ekɛtsɔɔ gbɛtsɔɔmɔ ni saneyelihe lɛ kɛbaatsu nii lɛ mli faŋŋ lɛ. Eha efee faŋŋ akɛ, saneyelihe lɛ ni akɛ sane lɛ ebaha lɛ yeli ekoŋŋ lɛ kɛ sane naamuu ni saneyelihe bibioo lɛ kɛha lɛ kpãaa gbee—akɛ datrɛfonyo ko yɛ hegbɛ akɛ ekpoɔ helatsɛ lɛ suɔmɔnaa nii, ni efee enii tamɔ nɔ ni ekɛbaatsu nii, shi ekpɛ eyiŋ yɛ teemɔŋ akɛ ebaafee nɔ kroko lɛ. Kojolɔ nukpa lɛ kɛɛ akɛ saneyelihe lɛ fĩŋ gbɛjianɔtoo ni hegbɛ ni yeɔ nɔ lɛ kɛtsuɔ nii ni ekɛkudɔɔ nibii ni mɛi ni yɔɔ eshishi lɛ feɔ lɛ, ni ji “Shirashimu bekarazu, yorashimu beshi,”b ni eshishi ji, “buu amɛ akɛ amɛleee nɔ ko, kɛ mɛi ni kɛ amɛhe fɔ̃ɔ” datrɛfoi anɔ lɛ sɛɛ. Sɛɛ mli lɛ, Misae kɛɛ akɛ: “Miná kojolɔ lɛ wiemɔ ni hiɛaŋkwɛmɔ bɛ mli, ni esoro no kwraa yɛ tsutsu sane jajemɔ ni Kpokpaa nɔ Saneyelihe lɛ kɛha lɛ he miishɛɛ waa.” Ekɛfata he akɛ: “Enɛ he fai mikpaa Yehowa.”

Misae je mli yɛ nyɔŋ ni nyiɛ sɛɛ lɛ mli, ní wekumɛi ni sumɔɔ lɛ, kɛ helatsamɔhe mli nitsulɔi ni jɛ helatsamɔhe kroko, he ni anu ehemɔkɛyelii ni jɛ anɔkwayeli mli shishi yɛ, ni ajie bulɛ kpo yɛ he lɛ ebɔle ehe kɛkpe. Eyɛ mli akɛ egbele lɛ dɔ ebinuu Masami kɛ weku lɛ mli bii krokomɛi waa diɛŋtsɛ moŋ, shi amɛtswa amɛfai shi akɛ amɛbaakwɛ koni aye sane lɛ ni agbe naa yɛ nɔ ni esumɔɔ ni afee lɛ kɛ gbeekpamɔ naa.

Yiŋkpɛɛ Lɛ

Yɛ naagbee lɛ, yɛ February 9, 1998 lɛ, kojolɔi etɛ lɛ ni yɔɔ Kojomɔhe Wulu lɛ kɛ amɛ sane jajemɔ lɛ ha, ni amɛgbala yiŋkpɛɛ ni kojomɔhe bibioo lɛ kɛha lɛ sɛɛ. Saneyelihe tsũ bibioo lɛ mli yi obɔ kɛ adafitswalɔi, woloŋlelɔi, kɛ mɛi krokomɛi ni enyiɛ sane ni ayeɔ lɛ sɛɛ yɛ anɔkwale mli lɛ. Adafitswaa woji ni ale jogbaŋŋ kɛ tɛlivishiŋ nitsumɔhei bɔ yiŋkpɛɛ ni afee lɛ he amaniɛ. Saneyitsei ni akɛha lɛ ekomɛi kaneɔ akɛ: “Saneyelihe: Helatsɛmɛi Baanyɛ Akpoo Tsofafeemɔ”; “Kojomɔhe Wulu: Lá ni Agbalaa Awoɔ Mɔ Mli Ji Hegbɛ ni Mɔ Ko Yɔɔ lɛ Fitemɔ”; “Datrɛfonyo ni Nyɛ Mɔ Ko Nɔ Eha Lɛ Lá lɛ Eye Fɔ yɛ Saneyelihe”; kɛ “Awo Yehowa Odasefonyo Nyɔmɔ yɛ Lá ni Agbala Awo Emli lɛ Hewɔ.”

Woji ni aŋmala kɛbɔ yiŋkpɛɛ ni afee lɛ he amaniɛ lɛ ja, ni ehi jogbaŋŋ diɛŋtsɛ. The Daily Yomiuri lɛ bɔ amaniɛ akɛ: “Kojolɔ Takeo Inaba kɛɛ ejaaa gbɛ akɛ datrɛfoi aaafee nɔ ko ni helatsɛ sumɔɔɔ.” Adafitswaa wolo lɛ tsɔɔ yɛ faŋŋ mli hu akɛ: “Datrɛfoi ni [gbala lá amɛwo emli] lɛ haaa lɛ hegbɛ ni ehala tsofafeemɔ mli nɔ ni esumɔɔ.”

Asahi Shimbun lɛ tsɔɔ mli akɛ, eyɛ mli akɛ yɛ sane nɛɛ mli lɛ, saneyelihe lɛ nu he akɛ odaseyeli ni fa saŋŋ bɛ ni tsɔɔ akɛ kpaŋmɔ ko yɛ ni tsɔɔ akɛ mɛi enyɔ lɛ kpɛlɛ akɛ akɛ lá tsuŋ nii kɛ eba lɛ akɛ mɔ baagbo po moŋ nɛ, shi kojolɔi lɛ kɛ saneyelihe bibioo lɛ kpãaa gbee yɛ bɔ ni kpaŋmɔ ni tamɔ nɛkɛ lɛ ja yɛ mla naa hewɔ: “Kɛji akɛ ŋaawoo ni hi jogbaŋŋ lɛ he gbeekpamɔ yɛ mɛi enyɔ ni ekɔɔ amɛhe lɛ ateŋ akɛ esaaa akɛ agbalaa lá awoɔ mɔ lɛ mli yɛ shihilɛ fɛɛ shihilɛ mli lɛ, Saneyelihe nɛɛ eteee shi ewooo maŋ toiŋjɔlɛ, ni no hewɔ lɛ ejaaa.” Kɛfata he lɛ, adafitswaa wolo lɛ tsɔɔ susumɔ ni kojolɔi lɛ hiɛ lɛ mli akɛ, “adesa fɛɛ adesa yɛ gbi ni ekɛbaagbo, ni aŋkroaŋkro baanyɛ akpɛ eyiŋ yɛ nifeemɔ ni baatsɔ nakai be ni ekɛbaagbo lɛ hiɛ.”

Yɛ anɔkwale mli lɛ, Yehowa Odasefoi etao sane nɛɛ mli, ni amɛheɔ amɛyeɔ akɛ amɛmiihala gbɛ ni hi fe fɛɛ ni amɛaatsɔ nɔ amɛhi shi. Nɔ ni fata he ji osharai ni jɛɔ lá ni agbalaa awoɔ mɔ mli baa lɛ ni akpoɔ, ni yɛ no najiaŋ lɛ amɛkpɛlɛɔ tsofafeemɔi ni akɛ lá tsuuu nii yɛ mli ni akɛtsuɔ nii waa yɛ shikpɔji pii anɔ ni kɛ Nyɔŋmɔ mla lɛ kpãa gbee lɛ nɔ. (Bɔfoi lɛ Asaji 21:25) Japannyo ko, ni ji nɔyeli gbɛjianɔtoo mlai ahe nilelɔ ni ale waa lɛ tsɔɔ mli akɛ: “Yɛ anɔkwale mli lɛ, kpoomɔ ni akpoɔ [lá ni agbalaa awoɔ mɔ mli lɛ] tsofafeemɔ ni ayeɔ he sane lɛ etsɔɔɔ ‘gbɛ ni aaatsɔ nɔ agbo’ shi moŋ akɛ, gbɛ ni aaatsɔ nɔ ahi wala mli.”

Esa akɛ yiŋkpɛɛ ni Kojomɔhe Wulu lɛ kɛha lɛ ahɛle datrɛfoi ashi, koni amɛle akɛ, jeee nilee mli hegbɛi ni amɛyɔɔ lɛ fɛɛ akɛtsuɔ nii, taakɛ ekolɛ mɛi komɛi baasusu lɛ. Ni esa akɛ eha helatsamɔhei atsu jeŋba he gbɛtsɔɔmɔi ahe nii. Eyɛ mli akɛ mɛi babaoo ekpɛlɛ saneyelihe lɛ sane jajemɔ lɛ nɔ, ni ewo helatsɛmɛi ni nyɛɛɛ afã amɛnaa yɛ tsofafeemɔ mli hegbɛ ni amɛyɔɔ lɛ he lɛ hewalɛ moŋ, shi jeee kui lɛ fɛɛ ekpɛlɛ nɔ kɛ amɛtsui fɛɛ. Maŋ helatsamɔhe lɛ kɛ datrɛfoi etɛ lɛ ebi koni ayaye sane lɛ ekoŋŋ yɛ Kojomɔhe Wulu ni Fe Fɛɛ lɛ. No hewɔ lɛ, esa akɛ wɔmɛ koni wɔkwɛ akɛ Japan saneyelihe ni fe fɛɛ lɛ hu baafi hegbɛ ni helatsɛ yɔɔ lɛ sɛɛ lo, taakɛ jeŋ muu fɛɛ Maŋtsɛ lɛ fiɔ sɛɛ lɛ.

[Shishigbɛ niŋmai]