Kristofoi Asafo Lɛ Yelikɛbuamɔ Hewalɛwoo Jɛɛhe

POPI, ni ji yoo ko ni kpaako eye afii 20 lɛ nijiaŋ eje wui yɛ weku shihilɛ ni yɔɔ dɔlɛ ni kɔɔ sanegbaa ni bɛ ekɛ efɔlɔi ateŋ lɛ hewɔ.a Beni ejie etsuiŋ saji fɛɛ kpo etsɔɔ Kristofonyo onukpa ko kɛ eŋa sɛɛ lɛ, eŋma amɛ akɛ: “Miida nyɛ shi babaoo yɛ be ni nyɛŋɔ ni nyɛkɛ mi gba sane lɛ hewɔ. Nyɛleee bɔ ni mihiɛ esɔ bɔ ni nyɛsusuɔ mihe nyɛhaa lɛ. Miida Yehowa shi akɛ eha mi gbɔmɛi ni manyɛ mikɛ mihe afɔ̃ amɛnɔ ni mikɛ amɛ agba sane.”

Toula, ní wu gbo nyɛsɛɛ nɛɛ ni hiɛ gbekɛbii enyɔ ni eye afii nyɔŋma kɛ etɛ kɛyaa lɛ bote henumɔŋ naagbai kɛ shika he naagbai amli. Kristofoi gbalashilɛ mli hefatalɔi komɛi ni yɔɔ asafo lɛ mli lɛ yasara lɛ kɛ ebii lɛ ni amɛwo amɛ hewalɛ. Beni ekɛ omanyeli ekpee eshihilɛ lɛ naa sɛɛ lɛ, ekɛ wolo maje amɛ ni ekɛɛ: “Mikaiɔ nyɛ daa yɛ misɔlemɔi amli. Mikaiɔ shii abɔ ni nyɛye nyɛbua mi ni nyɛfi misɛɛ lɛ.”[1]

Ani bei komɛi lɛ, onuɔ he akɛ je nɛɛ nɔnyɛɛ ni yaa nɔ efaa lɛ eha ‘ojatsui fe’ bo? (Mateo 11:28) Ani ‘be kɛ nibii ni baa trukaa ni aleee’ lɛ eha oná shihilɛ mli niiashikpamɔi ni yɔɔ dɔlɛ? (Jajelɔ 9:​11) Belɛ, jeee okome pɛ oyɔɔ. Shi taakɛ bɔ ni mɛi akpei abɔ ni ehao lɛ ena momo lɛ, bo hu obaanyɛ oná yelikɛbuamɔ ni sa yɛ Yehowa Odasefoi a-Kristofoi asafo lɛ mli. Yɛ klɛŋklɛŋ afii oha Ŋ.B. lɛ mli lɛ, bɔfo Paulo na akɛ nanemɛi heyelilɔi komɛi titri ji “tsuiwoo” nɔ̃ kɛha lɛ. (Kolosebii 4:​10, 11) Bo hu obaanyɛ oná yelikɛbuamɔ ni tamɔ nakai nɔŋŋ.

Sɛɛfimɔ kɛ Yelikɛbuamɔ

Yɛ Kristofoi a-Hela Ŋmalɛi lɛ amli lɛ, atsɔɔ wiemɔ “asafo” lɛ shishi kɛjɛ Hela wiemɔ ek·kle·siʹa ni shishi ji gbɔmɛi akuu ko ni atsɛ amɛ kutuu lɛ mli. Ekomfeemɔ kɛ sɛɛfimɔ he jwɛŋmɔi ji nɔ ni yɔɔ nakai wiemɔ lɛ mli.

Kristofoi asafo lɛ fiɔ Nyɔŋmɔ Wiemɔ lɛ sɛɛ ni ejajeɔ e-Maŋtsɛyeli lɛ he sanekpakpa lɛ. (1 Timoteo 3:​15; 1 Petro 2:9) Shi kɛlɛ, asafo lɛ hu kɛ mumɔŋ sɛɛfimɔ kɛ yelikɛbuamɔ haa mɛi ni yɔɔ mli lɛ. Emli ji he ni mɔ ko baanyɛ aná nanemɛi akuu ko ni sumɔɔ mɔ, ni susuɔ mɛi ahe yɛ, kɛ mɛi ni efee klalo ni miisumɔ koni amɛye amɛbua mɛi krokomɛi ni amɛshɛje amɛmii yɛ haomɔ bei amli lɛ.​—2 Korintobii 7:​5-7.

Yehowa jálɔi ená hebuu kɛ shweshweeshwe shihilɛ yɛ esafo lɛ mli be fɛɛ be. Lalatsɛ lɛ tsɔɔ mli akɛ, ená miishɛɛ kɛ shweshweeshwe shihilɛ henumɔ yɛ Nyɔŋmɔ webii ni abua amɛnaa lɛ ateŋ. (Lala 27:​4, 5; 55:15; 122:⁠1) Nakai nɔŋŋ ŋmɛnɛ, Kristofoi asafo lɛ feɔ nanemɛi heyelilɔi akuu ni tswaa mɔ emaa shi ni woɔ amɛhe hewalɛ.​—Abɛi 13:20; Romabii 1:​11, 12.

Átsɔɔ asafo lɛ mli bii lɛ koni ‘amɛfee mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.’ (Galatabii 6:​10) Biblia mli tsɔsemɔ ni amɛnine shɛɔ nɔ lɛ tsirɛɔ amɛ ni amɛjieɔ nyɛmimɛi asuɔmɔ kɛ mɔ hedɔɔ kpo amɛtsɔɔ amɛhe. (Romabii 12:10; 1 Petro 3:8) Akanyaa mumɔŋ nyɛmimɛi hii kɛ yei ni yɔɔ asafo lɛ mli lɛ koni amɛmli ajɔ, amɛfee kpoo, ni amɛná musuŋtsɔlɛ. (Efesobii 4:3) Yɛ nɔ najiaŋ ni amɛaafee jálɔi kɛkɛ lɛ, amɛjieɔ suɔmɔ kpo amɛtsɔɔ mɛi krokomɛi.​—Yakobo 1:​27.

No hewɔ lɛ, mɛi ni ehao lɛ naa shihilɛ ni suɔmɔ yɔɔ mli tamɔ weku nɔ yɛ asafo lɛ mli. (Marko 10:​29, 30) Lé ni amɛleɔ akɛ amɛfata kuu ni efee ekome ni yɔɔ suɔmɔ lɛ he lɛ kanyaa amɛ. (Lala 133:​1-3) “Tsulɔ anɔkwafo kɛ nilelɔ” lɛ tsɔɔ asafo lɛ nɔ ekɛ mumɔŋ ‘niyenii haa yɛ be ni sa nɔ.’​—Mateo 24:45.

Yelikɛbuamɔ ni Nɔkwɛlɔi ni Yɔɔ Suɔmɔ lɛ Kɛhaa

Kristofoi asafo lɛ mli bii lɛ baanyɛ akpa gbɛ akɛ, amɛbaana nɔkwɛlɔi ni yɔɔ suɔmɔ, ni yɔɔ sane shishinumɔ, ni he esa ni kɛ mumɔŋ sɛɛfimɔ kɛ hewalɛwoo baaha. Tookwɛlɔi ni hiɛ nakai sui lɛ tamɔ “abobaahe yɛ kɔɔyɔɔ naa kɛ teemɔhe yɛ nugbɔnɛmɔ naa.” (Yesaia 32:​1, 2) Onukpai loo nɔkwɛlɔi ni ajɛ mumɔŋ ahala amɛ lɛ kwɛɔ Nyɔŋmɔ webii ni tamɔ tooi lɛ anɔ, amɛwoɔ mɛi ni he yeɔ ni amɛhao lɛ hewalɛ, ni amɛbɔɔ mɔdɛŋ koni amɛye amɛbua mɛi ni etɔ̃ lɛ koni amɛsaa amɛdamɔ shi ekoŋŋ.​—Lala 100:3; 1 Petro 5:​2, 3.

Eji anɔkwale akɛ, asafo lɛ mli onukpai akuu lɛ jeee tsofafeelɔi ni he esa, ni baanyɛ atsa gbɔmɔtsoŋ kɛ jwɛŋmɔŋ hewalɛnamɔ mli naagbai ni nanemɛi heyelilɔi kɛkpeɔ lɛ. Yɛ nɛkɛ nibii agbɛjianɔtoo nɛɛ mli lɛ, mɛi ni he yeɔ lɛ ‘ehia tsofatsɛ’ lolo. (Luka 5:​31) Shi kɛlɛ, nakai tookwɛlɔi lɛ baanyɛ aye abua mɛi ni ehia amɛ yɛ mumɔŋ lɛ. (Yakobo 5:​14, 15) Yɛ he ni ebaahi lɛ, onukpai lɛ toɔ yelikɛbuamɔi krokomɛi ahe gbɛjianɔ hu.​—Yakobo 2:​15, 16.

Namɔ haa atoɔ nakai gbɛjianɔ ni suɔmɔ yɔɔ mli nɛɛ? Yehowa Nyɔŋmɔ diɛŋtsɛ! Gbalɔ Ezekiel fee Yehowa he mfoniri ni eejaje akɛ: “Madi mitooi lɛ asɛɛ, ni matao amɛsɛɛgbɛ. . . . Majie amɛ kɛjɛ he fɛɛ he ni amɛgbɛ amɛshwã kɛtee . . . Mi diɛŋtsɛ malɛ mitooi lɛ, ni maha amɛbumɔ shi.” Nyɔŋmɔ susuɔ tooi ni bɛ hewalɛ ni egbɔjɔ lɛ hu ahe.​—Ezekiel 34:​11, 12, 15, 16.

Yelikɛbuamɔ Diɛŋtsɛ ni Akɛhaa yɛ Be ni Sa Mli

Ani yelikɛbuamɔ diɛŋtsɛ yɛ Kristofoi asafo lɛ mli? Hɛɛ, ni niiashikpamɔi ni nyiɛ sɛɛ nɛɛ tsɔɔ shihilɛi srɔtoi amli ni asafo lɛ kɛ yelikɛbuamɔ haa lɛ mli.

◆ Suɔlɔ ko gbele. Hela ko ni ehiii tsamɔ gbe Anna wu. Ekɛɛ akɛ: “Kɛjɛ nakai beaŋ kɛbaa nɛɛ, Kristofoi nyɛmimɛi akuu lɛ ejie suɔmɔ kpo amɛtsɔɔ mi. Sɛɛfimɔ kɛ hewalɛwoo wiemɔi ni minanemɛi heyelilɔi lɛ jie lɛ kpo kɛtsara nɔ, ni fuamɔi ni jɛ tsuiŋ fata he lɛ haaa mahao, shi moŋ eha miwo mitsui, ni miida Yehowa shi. Amɛsuɔmɔ lɛ eha minu sɛɛfimɔ kpele he, ewo mi hewalɛ waa, minu he akɛ akwɛ mi yɛ mlihilɛ mli.”[2] Ekolɛ, bo hu oná suɔlɔ ko gbele mli niiashikpamɔ ko ni piŋɔ mɔ. Yɛ nakai bei amli lɛ, asafo lɛ mli bii lɛ baanyɛ amɛkɛ miishɛɛjemɔ kɛ henumɔŋ sɛɛfimɔ ni he hiaa babaoo aha.

◆ Hela. Arthur, ni ji nɔkwɛlɔ gbɛfalɔ ni jɛ Poland lɛ yasaraa asafoi ni yɔɔ Central Asia lɛ ni ewoɔ amɛ hewalɛ yɛ mumɔŋ daa. Yɛ nɛkɛ saramɔi nɛɛ ateŋ eko mli lɛ, ehe baye fioo, ni saji ni hiɛdɔɔ yɔɔ mli ba etsamɔ lɛ he. Arthur kɛ hiɛsɔɔ babaoo kɛɛ akɛ: “Miisumɔ ni magba nyɛ bɔ ni nyɛmimɛi hii kɛ yei ni yɔɔ [Kazakhstan maŋtiase lɛ] mli lɛ kwɛ mi amɛha lɛ he sane. Nyɛmimɛi hii kɛ yei, ni mileee amɛteŋ mɛi pii​—⁠ni mɛi ni yɔɔ he miishɛɛ lɛ po fata he lɛ​—baha mi shika, niyenii, kɛ tsofa. . . . Ni amɛfee enɛ kɛ miishɛɛ babaoo.

“Feemɔ bɔ ni minu he miha beni minine shɛ wolo kotoku ni shika kɛ wolo ni nyiɛ sɛɛ lɛ hɔ mli lɛ he mfoniri okwɛ: ‘Suɔmɔ Nyɛminuu, mikɛ suɔmɔ ŋamɔi miimaje bo. Awo ke mi shika koni mikɛhe ais krim, shi mikpɛ mli akɛ mikɛbaaha bo koni okɛhe tsofa. Ofainɛ ná hewalɛ oya. Yehowa miisumɔ ni wɔhi shi ni wɔtsɛ. Ohe awao. Ni okɛɛ wɔ saji ni ŋɔɔ babaoo ni tsɔɔ mɔ nii. Vova.’ ”[3] Hɛɛ, taakɛ atsɔɔ yɛ sane nɛɛ mli lɛ, gbekɛbii kɛ onukpai ni yɔɔ asafo lɛ mli lɛ baanyɛ amɛkɛ yelikɛbuamɔ hewalɛwoo aha yɛ hela bei amli.​—Filipibii 2:​25-​29.

◆ Nɔnyɛɛ. Teri sumɔɔ ni esɔmɔ akɛ gbɛgbalɔ loo be-fɛɛ Maŋtsɛyeli jajelɔ. Shi kɛlɛ, yɛ naagbai komɛi ahewɔ lɛ, ehe bahia ni efɔ̃ɔ gbɛgbamɔ nitsumɔ lɛ. Ekɛɛ akɛ: “Minu fɔyeli babaoo he akɛni miisumɔ ni masɔmɔ yɛ nɛkɛ gbɛhe nɛɛ mli ni minyɛɛɛ maye afi kome po yɛ mli lɛ hewɔ.” Teri he eye yɛ gbɛ ni ejaaa nɔ akɛ, Yehowa nɔkpɛlɛmɔ ni eeená lɛ damɔ sɔɔmɔ nitsumɔ babaoo ni ekɛbaaha lɛ pɛ nɔ. (Okɛto Marko 12:​41-​44 he.) Akɛni ehao hewɔ lɛ, etse ehe banee. Shi nakai be lɛ mli lɛ, ená yelikɛbuamɔ ni shɛjeɔ mɔ mii kɛjɛ asafo lɛ mli.

Teri kɛɛ akɛ: “Nyɛmiyoo gbɛgbalɔ onukpa ko baye ebua mi ni ebo mi toi beni mijieɔ mihenumɔi akpo lɛ. Beni mishi eshia lɛ, minu he tamɔ nɔ ni awo jatsu ko yɛ minɔ. Kɛjɛ no nɔ kɛyaa lɛ, nyɛmiyoo gbɛgbalɔ nɛɛ kɛ ewu ni ji asafoŋ onukpa lɛ kɛ yelikɛbuamɔ ni he hiaa babaoo eha mi. Amɛtswaa mi tɛlifoŋ daa amɛbiɔ mi bɔ ni miyɔɔ. . . . Amɛha mi hegbɛ koni bei komɛi lɛ, mafata amɛhe kɛfee amɛweku nikasemɔ lɛ, ni eha mina bɔ ni ehe hiaa ni wekui aya nɔ afee ekome.”

Ewaaa akɛ mɛi babaoo​—ní Kristofoi ni ejɔɔ amɛhe nɔ po fata he lɛ​—baahao, amɛnijiaŋ baaje wui, ni amɛbaafee shooo. Kwɛ bɔ ni esa akɛ wɔkɛ shidaa aha akɛ, wɔbaanyɛ wɔná yelikɛbuamɔ ni suɔmɔ yɔɔ mli, ni pɛsɛmkunya bɛ mli yɛ Nyɔŋmɔ asafo lɛ mli![4]​—1 Tesalonikabii 5:​14.

◆ Amanehului kɛ osharai. Okɛ ohe awo weku kɛ emli bii ejwɛ ni laaje nɔ fɛɛ nɔ ni amɛyɔɔ beni amɛshia sha lɛ shihilɛ mli okwɛ. Etsɛɛɛ ni amɛna nɔ ni amɛtsɛ lɛ akɛ, “niiashikpamɔ ni woɔ mɔ hewalɛ ni baaná wɔnɔ hewalɛ kɛyashi naanɔ, ni haa wɔnaa anɔkwa suɔmɔ ni yɔɔ Yehowa webii ateŋ lɛ.” Amɛtsɔɔ mli akɛ: “Wɔnaa kpɛ wɔhe waa beni etsɛɛɛ nɔŋŋ lɛ, wɔmɔmuŋ nyɛmimɛi hii kɛ yei tswa wɔ tɛlifoŋ amɛjie sɛɛfimɔ kɛ ŋkɔmɔ ni amɛyeɔ wɔ lɛ kpo. Tɛlifoŋ lɛ gbɛɛ kɛtsara nɔ. Mɔ fɛɛ mɔ anɔkwa mɔ he susumɔ kɛ suɔmɔ lɛ tsirɛ wɔ aahu akɛ wɔfo hiɛsɔɔ yaafo.”

Etsɛɛɛ tsɔ ni onukpai ni yɔɔ asafo lɛ mli lɛ to nyɛmimɛi akuu wulu ko he gbɛjianɔ, ni yɛ gbii fioo ko sɛɛ lɛ, amɛma shia hee ko amɛha nɛkɛ weku nɛɛ. Akutsoŋnyo ko kɛɛ akɛ: “Esa akɛ ona! Gbɔmɛi srɔtoi fɛɛ miitsu nii yɛ jɛmɛ​—hii, yei, mɛidiji, Hispanikbii!” Enɛ ji nyɛmimɛi asuɔmɔ he odaseyeli ni yɔɔ faŋŋ.​—Yohane 13:35.

Nanemɛi Kristofoi lɛ hu kɛ atadei, niyenii, kɛ shika ha weku lɛ. Tsɛ lɛ wie akɛ: “No mli lɛ, Blonya be mli ni beni mɔ fɛɛ mɔ kɛ nɔ ko keɔ lɛ mli, shi wɔbaanyɛ wɔkɛ anɔkwayeli akɛɛ akɛ, mɔ ko mɔ ko náaa nakai anɔkwa mlihilɛ, ejurɔfeemɔ ni yɔɔ naakpɛɛ lɛ mli ŋɔɔmɔ ni wɔná lɛ eko.” Ni amɛkɛfata he akɛ: “Fiofio lɛ, la lɛ he kaimɔ lɛ miilaaje ni akɛ mlihilɛ nifeemɔ kɛ nanemɛi kpakpai ahe kaimɔi ni asumɔɔ miiye najiaŋ. Wɔmiida Yehowa, wɔ ŋwɛi Tsɛ ni yɔɔ suɔmɔ lɛ shi akɛ wɔyɛ nyɛmimɛi aweku ni yɔɔ naakpɛɛ ni efee ekome yɛ shikpɔŋ lɛ nɔ, ni wɔhiɛ esɔ babaoo akɛ wɔfata he!”[5]

Eji anɔkwale akɛ, nifeemɔ ni tamɔ nɛkɛ nyɛŋ aba nɔ loo akpa lɛ gbɛ yɛ oshara fɛɛ oshara ni tamɔ nakai mli. Shi eka shi faŋŋ akɛ, shihilɛ nɛɛ feɔ sɛɛfimɔ ni ekolɛ asafo lɛ kɛbaaha lɛ he mfoniri.

Nilee ni Jɛ Ŋwɛi

Mɛi babaoo ená yelikɛbuamɔ kɛ hewalɛwoo jɛɛhe kroko yɛ Kristofoi asafo lɛ mli. Mɛni ji no? Woji ni “tsulɔ anɔkwafo kɛ nilelɔ” lɛ eto he gbɛjianɔ lɛ. Enɛɛmɛi ateŋ nɔ ni ale waa ji woji tɛtrɛbii ni ji Buu-Mɔɔ kɛ Awake! lɛ. Bɔni afee ni ekɛ ŋaawoo ni nilee yɔɔ mli kɛ tsɔsemɔ ni anyɛɔ atsuɔ he nii aha lɛ, nɛkɛ woji nɛɛ kɛ amɛhe fɔ̃ɔ ŋwɛi nilee ni anaa yɛ Biblia lɛ mli lɛ nɔ titri. (Lala 119:105) Akɛ saji tamɔ jwɛŋmɔŋ nɔnyɛɛ, saji ni haa mɔ ko ni afee lɛ niiseniianii lɛ he jɔɔ lɛ, shihilɛ kɛ shika he naagbai srɔtoi, kaai ni oblahii kɛ oblayei kɛkpeɔ, kɛ naagbai pɔtɛɛ ni maji ni kpaako amɛnáa hiɛyaa lɛ kɛkpeɔ ní atao mli ní akɛhe fɔ̃ɔ nɔ lɛ fataa Ŋmalɛ mli saji ahe ni akɛhaa. Nɔ ni fe fɛɛ lɛ, nɛkɛ woji nɛɛ woɔ Nyɔŋmɔ gbɛ akɛ shihilɛ gbɛ ni hi fe fɛɛ lɛ nɔ.​—Yesaia 30:20, 21.

Daa afi lɛ, Buu Mɔɔ Asafo lɛ nine shɛɔ woji ni akɛtsɔɔ hiɛsɔɔ ni ayɔɔ lɛ mli lɛ nɔ. Ákɛ nɔkwɛmɔnɔ lɛ, oblanyo ko ni yɔɔ Russia lɛ ŋma Awake! mli sane ko ni kɔɔ mɔ he gbee he akɛ: “Yɛ bɔ ni mihaoɔ hewɔ lɛ, . . . Misusu mi he ni magbe lɛ he shii abɔ. Sane nɛɛ wo hemɔkɛyeli ni miyɔɔ akɛ Nyɔŋmɔ baaye ebua mi koni matsu minaagbai lɛ ahe nii lɛ mli hewalɛ. Eesumɔ ni mahi shi. Miida lɛ shi yɛ yelikɛbuamɔ ni etsɔ sane nɛɛ nɔ ekɛha mi lɛ hewɔ.”[6]

Kɛ́ ewa kɛha bo akɛ obaakpee je nɛŋ naagbai ni naa wa ni anyɛɛɛ he nɔ ko afee ni yaa nɔ emli waa daa nɛɛ lɛ naa lɛ, obaanyɛ oná nɔmimaa akɛ shweshweeshwe shihilɛ he ko yɛ Kristofoi asafo lɛ mli. Eji anɔkwale akɛ, kɛ́ nibii agbɛjianɔtoo ni suɔmɔ bɛ mli nɛɛ ni tamɔ shia-ŋa gbiŋ lɛ miiŋa omli nu lɛ, obaanyɛ oná nu ni haa mɔ hewalɛ ekoŋŋ yɛ Yehowa gbɛjianɔtoo lɛ mli. Yɛ be mli ni oná yelikɛbuamɔ ni tamɔ nɛkɛ mli niiashikpamɔ sɛɛ lɛ, bo hu obaanyɛ owie wiemɔ ni Kristofonyo yoo ko ni kɛ omanyeli damɔ ewu hela ni mli wa naa lɛ wie ni eŋma akɛ: “Yɛ suɔmɔ ni ajie lɛ kpo atsɔɔ wɔ kɛ kwɛ ni akwɛ wɔ lɛ hewɔ lɛ, minuɔ he tamɔ nɔ ni Yehowa hiɛ wɔ yɛ edɛŋ ni ekɛ wɔ tsɔ nɛkɛ naagba nɛɛ mli. Kwɛ bɔ ni midaa shi akɛ mi ji Yehowa gbɛjianɔtoo ni yɔɔ nyam nɛɛ fã!”[7]

[Shishigbɛ niŋmai]

[Caption on page 26]

Wɔbaanyɛ wɔkɛ yelikɛbuamɔ hewalɛwoo aha mɛi ni he yeɔ, mɛi ni agbo yɛ amɛ nɔ, kɛ mɛi krokomɛi