Ha Oshihilɛ Aye Omanye!
“Ajɔɔ gbɔmɔ ni enyiɛɛɛ mɛi fɔji ajina mli . . . Nɔ fɛɛ nɔ ni efeɔ lɛ shwereɔ.”—LALA 1:1, 3.
1. (a) Te oblahii kɛ oblayei babaoo ni yɔɔ je lɛŋ lɛ susuɔ omanyeyeli he amɛhaa tɛŋŋ? (b) Te Biblia lɛ wieɔ mɔ ko ní eye omanye lɛ he ehaa tɛŋŋ?
OMANYEYELI—mɛni nakai wiemɔ lɛ tsɔɔ kɛha bo? “Oti ni he hiaa fe fɛɛ ní mikɛma mihiɛ ji ni maye omanye yɛ nitsumɔ mli,” taakɛ oblanyo fioo ko kɛɛ lɛ.[1] Oblayoo fioo ko hu kɛɛ akɛ: “Oti ni mishweɔ fe fɛɛ ji ní maná weku ni yɔɔ miishɛɛ.”[2] Shi oblayoo kroko hu kɛɛ akɛ: “Mishwelɛ ji ní maná mi diɛŋtsɛ mishihilɛhe fɛfɛo, kɛ kar fɛfɛo . . . Misusu mi diɛŋtsɛ mihe pɛ.”[3] Naagba lɛ ji akɛ, jeee shika, loo weku, loo shihilɛ be mli nitsumɔ kpakpa nɔ adamɔɔ asusuɔ anɔkwa omanyeyeli he. Wɔkaneɔ yɛ Lala 1:1-3 lɛ akɛ: “Ajɔɔ gbɔmɔ ni enyiɛɛɛ mɛi fɔji ajina mli . . . Yehowa mla lɛ he emii shɛɔ yɛ . . . Nɔ fɛɛ nɔ ni efeɔ lɛ shwereɔ.”
2. Nɛgbɛ anaa omanyeyeli diɛŋtsɛ yɛ, ni mɛni ji gbɛ pɛ ní atsɔɔ nɔ ní nine shɛɔ nɔ?
2 Biblia lɛ kɛ nɔ ko ní adesa ko nyɛŋ ekaha lɛ he shiwoo miiha yɛ biɛ—no ji anɔkwa omanyeyeli! Shi jeee shika gbɛfaŋ sɛɛnamɔ he ewieɔ lɛ. Biblia lɛ diɛŋtsɛ bɔɔ kɔkɔ akɛ: “Nibii fɔji fɛɛ ashishifã ji shika suɔmɔ.” (1 Timoteo 6:10) Anaa omanyeyeli diɛŋtsɛ yɛ Nyɔŋmɔ hiɛ ní asaa lɛ mli—ni Yehowa mla lɛ sɛɛnyiɛmɔ fata enɛ he. Enɛ pɛ baanyɛ ekɛ tsui ní nyɔɔ mɔ mli diɛŋtsɛ kɛ anɔkwa miishɛɛnamɔ aba! Ekolɛ susumɔ ni ji Yehowa mla shishi ní aaahi kɛ kɛɛmɔ ní aaakɛɛ bo nɔ ni ofee lɛ tamɔɔɔ nɔ ni anáa he miishɛɛ. Ni kɛlɛ, Yesu wie akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ.” (Mateo 5:3, NW) Kɛji ole jio, oleee jio, abɔ bo ákɛ mɔ ko ni yɔɔ mumɔŋ hiamɔ nii—ni nɔ ni fata enɛ he ji hiamɔ ni mli wa waa ákɛ olé Nyɔŋmɔ ní onu eyiŋtoi ashishi. No hewɔ lɛ, ja otsu nakai hiamɔ nii lɛ ahe nii, ní onyiɛ “Yehowa mla lɛ” sɛɛ dani obaanyɛ oná anɔkwa miishɛɛ mli niiashikpamɔ.
Nɔ Hewɔ ní Nyɔŋmɔ Mlai Ahe Hiaa Wɔ
3. Mɛni hewɔ esa akɛ wɔná miishɛɛ akɛ wɔɔha Yehowa ‘ajaje wɔnajifaamɔi’ lɛ?
3 Gbalɔ Yeremia ŋma akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Enɛ ji anɔkwale yɛ adesai, gbekɛbii kɛ onukpai fɛɛ he. Jeee akɛ wɔbɛ nilee, niiashikpamɔ, kɛ ŋaalee ní wɔkɛaakudɔ wɔ diɛŋtsɛ wɔnajifaamɔi kɛkɛ; shi moŋ wɔbɛ hegbɛ ko kwraa ní wɔkɛaafee nakai. Biblia lɛ kɛɔ yɛ Kpojiemɔ 4:11 lɛ akɛ: “[Yehowa, NW], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” Ákɛ wɔ-Bɔlɔ lɛ, Yehowa ji “wala nubu.” (Lala 36:10) Enɛ hewɔ lɛ, ele bɔ ni esa akɛ wɔkɛ wɔwala atsu nii aha, fe mɔ fɛɛ mɔ. No hewɔ lɛ, ewo mlai, jeee ní ekɛfite wɔmiishɛɛnamɔ, shi moŋ ní ekɛye ebua wɔ koni wɔná he sɛɛ. (Yesaia 48:17) Kɛ́ oku Nyɔŋmɔ mla mli lɛ, obu ohe fɔ́ akɛ onine baanyɛ shi yɛ naagbee.
4. Mɛni hewɔ oblahii kɛ oblayei babaoo fiteɔ amɛshihilɛ lɛ?
4 Ákɛ nɔkwɛmɔnɔ lɛ, ani osusu nɔ hewɔ ní oblahii kɛ oblayei babaoo fiteɔ amɛshihilɛ kɛtsɔɔ tsofai fɔji, jeŋba shara, kɛ nibii fɔji krokomɛi anɔ lɛ he dã? Lala 36:2, 3 lɛ tsɔɔ mli akɛ: “Nɔ ni mɔ fɔŋ lɛ nɔtɔmɔ lɛ kɛɔ yɛ mitsui mli ji akɛ: Nyɔŋmɔ gbeyeishemɔ kome folo bɛ ehiɛ. Ejaakɛ elakaa ehe yɛ lɛ diɛŋtsɛ ehiŋmɛiiaŋ, akɛ anaŋ enɔsha lɛ ní aaanyaŋe.” Akɛni amɛbɛ “Nyɔŋmɔ gbeyeishemɔ” kpakpa hewɔ lɛ, oblahii kɛ oblayei babaoo lakaa amɛhe ni amɛheɔ amɛyeɔ akɛ nɔ ko kwraa jɛŋ jeŋba ni yɔɔ oshara ní amɛkɔɔ lɛ mli kɛbaŋ. Shi, yɛ naagbee lɛ, esa akɛ amɛkɛ shishitoo mla ní tsakeee nɛɛ akpe, akɛ: “Nɔ̃ pɛ ní gbɔmɔ dũɔ lɛ, no nɔŋŋ ebaakpa hu. Ejaakɛ mɔ ni dũɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni dũɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.”—Galatabii 6:7, 8.
‘Gbii lɛ Akanemɔ’
5, 6. (a) Mɛni hewɔ esa akɛ oblahii kɛ oblayei ‘akane amɛgbii lɛ,’ ni nakai ní amɛaafee lɛ tsɔɔ mɛni? (b) Mɛni ‘kaimɔ ní wɔɔkai wɔ-Bɔlɔ lɛ’ tsɔɔ?
5 Mɛɛ gbɛ nɔ oootsɔ oha oshihilɛ aye omanye ní ‘okpa naanɔ wala’? Mose ŋma akɛ: “Wɔfii amli gbii lɛ, afii nyɔŋmai kpawo ni, ni kɛ́ efá aahu lɛ, afii nyɔŋmai kpaanyɔ . . . Ehoɔ oyá, ni wɔfilikiɔ kɛyaa.” (Lala 90:10) Kɛ́ obaasusu gbele he kwraa lɛ, ejeee nɔ ni obaafɔ feemɔ. Yɛ anɔkwale mli lɛ, oblahii kɛ oblayei babaoo feɔ amɛnii tamɔ nɔ ni anyɛŋ akpata amɛhiɛ. Shi Mose kɛ anɔkwa sane ni yɔɔ dɔlɛ, ni ji bɔ ni wala sɛɛ kɛɛɛ kwraa lɛ fɔ̃ɔ wɔhiɛ kpetekpelee. Nɔmimaa bɛ ákɛ wɔbaahi shi ní wɔye afii 70 loo 80 po. “Be kɛ nibii ní aleee ní baa trukaa” baanyɛ afo mɛi ni darako yɛ afii amli ní amɛyɔɔ hewalɛ lɛ po awala sɛɛ. (Jajelɔ 9:11, NW) Belɛ, te okɛ wala ní jara wa, ní onáa mli ŋɔɔmɔ bianɛ lɛ baatsu nii oha tɛŋŋ? Mose sɔle akɛ: “Tsɔɔmɔ wɔ wɔgbii lɛ kanemɔ, beni afee ni wɔná nilee tsui!”—Lala 90:12.
6 Mɛni ogbii ní oookane lɛ tsɔɔ? Etsɔɔɔ akɛ esa akɛ oha afii abɔ ní ekolɛ obaaye lɛ ahé ojwɛŋmɔ fɛɛ be fɛɛ be. Mose miisɔle ní Yehowa atsɔɔ E-webii lɛ bɔ ni amɛkɛ amɛgbii ní eshwɛ lɛ baatsu nii amɛha koni ekɛ woo aha Lɛ. Ani okaneɔ owala gbii lɛ—ni obuɔ gbi fɛɛ gbi akɛ nɔ ko ní jara wa ní esa akɛ okɛtsu nii ní okɛjie Nyɔŋmɔ yi? Biblia lɛ kɛ hewalɛwoo nɛɛ haa oblahii kɛ oblayei lɛ akɛ: “Jiemɔ awerɛho kɛjɛ otsui mli, ni oha nɔ fɔŋ aje oheloo mli; shi gbekɛbiiashi kɛ oblahiiaŋ lɛ yakayaka nii ni! Asaŋ kaimɔ obɔlɔ lɛ yɛ oblahiaŋ gbii lɛ amli.” (Jajelɔ 11:10–12:1) Kaimɔ ní wɔɔkai wɔ-Bɔlɛ lɛ tsɔɔ babaoo fe wɔhiɛ ní kpaŋ nɔ akɛ eyɛ kɛkɛ. Beni efɔŋfeelɔ lɛ kpá Yesu fai akɛ, “Kaimɔ mi, beni oooba yɛ omaŋtsɛyeli lɛ mli lɛ,” no mli lɛ eetao ní Yesu afee babaoo fe egbɛi ní eeekai kɛkɛ. Eetao ní Yesu afee nɔ ko, ní etee lɛ shi! (Luka 23:42; okɛto 1 Mose 40:14, 23; Hiob 14:13 he.) Yɛ nakai gbɛ nɔ nɔŋŋ lɛ, kaimɔ ní aaakai Yehowa lɛ biɔ nifeemɔ, ní aaafee nɔ ni saa ehiɛ. Ani abaanyɛ akɛɛ akɛ ookai Yehowa?
Kwa Efɔŋfeelɔi Ahe Awuŋayeli
7. Mɛni hewɔ oblahii kɛ oblayei komɛi halaa akɛ amɛhiɛ aaakpa amɛ-Bɔlɔ lɛ nɔ lɛ? Okɛ ehe nɔkwɛmɔnɔ aha.
7 Oblahii kɛ oblayei babaoo ehala akɛ amɛhiɛ baakpa Yehowa nɔ ejaakɛ amɛnuɔ he akɛ Odasefoi ni amɛaatsɔmɔ lɛ kɛ naatsii babaoo tsɔ baaba amɛnɔ. Nyɛmi nuu ko ni yɔɔ Spain lɛ kaiɔ bɔ ni enu he eha beni eji oblanyo ni eye afii nyɔŋma kɛ etɛ kɛyaa lɛ akɛ: “Je lɛ gbala mi ejaakɛ anɔkwale lɛ baafee tamɔ nɔ ni wa ní yɔɔ kpɛŋŋ kɛha mi. Etsɔɔ shitamɔ, nikasemɔ, kpeeiyaa, tai ní mafi, ni nɛkɛ nibii nɛɛ jeee nibii ní mináa he miishɛɛ.”[4] Ani bei komɛi lɛ onuɔ he akɛ nibii komɛi miiŋmɛɛ bo akɛni osɔmɔɔ Nyɔŋmɔ lɛ hewɔ? Ekolɛ eeefee bo naakpɛɛ akɛ ooole akɛ Biblia ŋmalɔi lɛ ateŋ mɔ kome ná nakai henumɔi lɛ amli niiashikpamɔ. Ofainɛ gbelemɔ o-Biblia lɛ ní okane Lala 73.
8. Mɛni hewɔ Asaf ‘ye hewolɔi lɛ ahe awuŋa’ lɛ?
8 Nyɛhaa wɔpɛia lala nɛɛ mli kɛyaa hiɛ fioo wɔkwɛa. Kukuji 2 kɛ 3 lɛ kɛɔ akɛ: “Shi mi lɛ, shwɛ fioo ní minaji agbá afã, shwɛ sharao ní minaji ashane. Ejaakɛ, beni mina bɔ ni mɛi fɔji shwereɔ lɛ, miye hewolɔi lɛ ahe awuŋa.” Taakɛ lala nɛɛ yiteŋgbɛ niŋmaa lɛ tsɔɔ lɛ, Asaf ji mɔ ni ŋma lala lɛ. Eji Levinyo lalafolɔ, ni ekɛ Maŋtsɛ David hi shi yɛ be kome mli. (1 Kronika 25:1, 2; 2 Kronika 29:30) Eyɛ mli akɛ ená hegbɛ fɛfɛo ákɛ eeesɔmɔ yɛ Nyɔŋmɔ sɔlemɔwe lɛ moŋ, shi ‘eye’ hii ní kɛ amɛmlakwamɔ nifeemɔi lɛ shwãa lɛ “ahe awuŋa.” Efee tamɔ nɔ ni nibii miiya nɔ jogbaŋŋ kɛha amɛ; anaa akɛ amɛnáa toiŋjɔlɛ kɛ shweshweeshwe shihilɛ mli ŋɔɔmɔ. Yɛ anɔkwale mli lɛ, nɔ ni tamɔ omanye ní amɛyeɔ lɛ ‘jieɔ amɛtsuiŋ jwɛŋmɔi lɛ akpo.’ (Kukuji 5, 7) “Amɛfaa amɛhe” amɛwieɔ amɛ amimyeli nifeemɔi lɛ ahe, ni tsɔɔ akɛ, amɛwieɔ he yɛ henɔwomɔ mli. (Kuku 8) ‘Amɛhaa amɛnaabu yasaa ŋwɛi he ni amɛlilɛi kpeleɔ shikpɔŋ lɛ nɔ fɛɛ,’ ni amɛbɛ bulɛ kɛha mɔ ko mɔ ko—yɛ ŋwɛi loo shikpɔŋ nɔ.—Kuku 9.
9. Kristofoi oblahii kɛ oblayei komɛi baanyɛ anu he ŋmɛnɛ taakɛ Asaf nu he lɛ yɛ mɛɛ gbɛ nɔ?
9 Ekolɛ abaanyɛ awie nakai nɔŋŋ yɛ otipɛŋfoi ni okɛ amɛ yaa skul lɛ ahe. Ekolɛ obaanu ní amɛkɛ amɛbɔlɛnamɔ nifeemɔi fɔji, amɛ okpɔlɔŋmɛɛi kɛ hoofeemɔi, kɛ amɛhe ní amɛkɛwoɔ dãatɔɔ kɛ tsofai fɔji kɛ nitsumɔ mli lɛ miishwã ní efeee amɛ hiɛgbele. Kɛ́ okɛ amɛshihilɛ ní amɛkɛɔ akɛ amɛnáa miishɛɛ yɛ mli lɛ to gbɛ fintɔ̃ɔ ní esa akɛ onyiɛ nɔ ákɛ Kristofonyo lɛ he lɛ, ekolɛ obaanu he yɛ bei komɛi amli akɛ ‘oye hewolɔi lɛ ahe awuŋa.’ (Mateo 7:13, 14) Asaf diɛŋtsɛ yashɛ he ní agbɛnɛ ekɛ gbee ní wa wie akɛ: “Lɛɛlɛŋ, yakatswaa po mitsumɔ mitsui mli ni mifɔ́ midɛ yɛ bemyeli mli; ejaakɛ minaa nɔ̃ daa jenamɔ.” (Kukuji 13, 14) Hɛɛ, ebɔi sɛɛnamɔ ni yɔɔ Nyɔŋmɔ sɔɔmɔ kɛ jalɛ shihilɛ mli lɛ he sanebimɔ.
10, 11. (a) Mɛni ha Asaf tsake bɔ ni esusuɔ nii ahe ehaa lɛ? (b) Efɔŋfeelɔi nyiɛ “hei ní shamɔɔ trotro” yɛ mɛɛ gbɛ nɔ? Okɛ ehe nɔkwɛmɔnɔ ko aha.
10 Heniianaa lɛ, Asaf eyaaa nɔ ehiii nijiaŋwujee shihilɛ nɛɛ mli be kakadaŋŋ. Ehe fee oya ni eyoo akɛ nɔ ni tamɔ toiŋjɔlɛ ní mɛi fɔji lɛ náa mli ŋɔɔmɔ lɛ jeee nɔ ko nɔ ko fe lakamɔ ko kɛkɛ—ni eji toiŋjɔlɛ ni sɛɛ etsɛŋ hu! Ekɛ gbee ní wa wie akɛ: “Hɛɛ, okɛ amɛ eto hei ní shamɔɔ trotro, oŋɔɔ amɛ otswiaa shi, ni amɛkumɔɔ dukuduku. Kwɛ bɔ ni amɛtsɔmɔ amaŋfɔ hiŋmɛitswaa! Aloo amɛ kɛtee, ŋmiŋmi sɔŋŋ eha amɛtã kwraa.” (Kukuji 18, 19) Otipɛŋfoi lɛ ateŋ mɛi babaoo hu nyiɛ “hei ní shamɔɔ trotro.” Be fioo sɛɛ loo sɛɛ mli lɛ, amɛbaaná amɛjeŋba ní Nyɔŋmɔ gbeyeishemɔ bɛ mli lɛ he nyɔmɔwoo, ni ekolɛ nɔ ni baajɛ mli aba ji hɔŋɔɔ ní ataooo, bɔlɛnamɔ mli tsɛŋemɔ hela, kɛ tsuŋwoo loo gbele tete po! Nɔ ni ehiii fe fɛɛ ji akɛ, amɛtsiɔ amɛhe kɛjɛɔ Nyɔŋmɔ he kwraa.—Yakobo 4:4.
11 Odasefonyo oblayoo fioo ko ni yɔɔ Spain lɛ diɛŋtsɛ na anɔkwale nɛɛ. Beni eji oblayoo fioo lɛ, no mli lɛ eyɛ jeŋbai enyɔ shihilɛ mli, ni ekɛ oblahii kɛ oblayei akuu ko ní bɛ Nyɔŋmɔ gbeyeishemɔ kwraa lɛ bɔɔ gbagbalii. Etsɛɛɛ tsɔ, kɛkɛ ni ebaná suɔmɔ eha oblahii lɛ ateŋ mɔ kome—mɔ ko ní tsofai fɔji kɛ nitsumɔ eka ehe. Eyɛ mli akɛ lɛ diɛŋtsɛ lɛ, etsi ehe kɛjɛ tsofai fɔji lɛ ahe moŋ, shi eheɔ tsofai fɔji nɛɛ ehaa oblanyo lɛ. Etsɔɔ mli akɛ: “Miyeɔ mibuaa lɛ po ni ekɛ abui lɛ gbuɔ ehe.” Heniianaa lɛ, nyɛmi yoo nɛɛ hiɛ batserɛ lɛ, ni eku esɛɛ kɛba mumɔŋ hewalɛ kpakpa mli ekoŋŋ. Shi kwɛ bɔ ni ehe jɔ̃ ehe hã beni ená ele yɛ be kplaŋŋ sɛɛ akɛ enaanyo gbekɛ nuu ní kɛ tsofai fɔji lɛ tsuɔ nii lɛ egbo kɛ AIDS lɛ.[5] Hɛɛ, taakɛ lalatsɛ lɛ kɛɛ lɛ, gbɔmɛi ni bɛ Nyɔŋmɔ gbeyeishemɔ lɛ nyiɛ “hei ní shamɔɔ trotro.” Ekolɛ amɛteŋ mɛi komɛi baagboi kpatu ní amɛkpaaa gbɛ, yɛ amɛjeŋba shara shihilɛ lɛ hewɔ. Amɛteŋ mɛi ní eshwɛ lɛ, kɛ́ amɛtsakeee amɛgbɛ̀i lɛ, no lɛ “beni aaajie Nuntsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuntsɔ Yesu Kristo sanekpakpa lɛ toi lɛ anɔ lɛ,” amɛkɛ lɛ baakpe yɛ wɔsɛɛ be ni ebɛŋkɛ kpaakpa lɛ mli.—2 Tesalonikabii 1:7, 8.
12. Oblanyo fioo ko ni yɔɔ Japan lɛ bana bɔ ni nilee bɛ mli akɛ aaaye efɔŋfeelɔi ahe awuŋa lɛ yɛ mɛɛ gbɛ nɔ?
12 Belɛ, kwɛ bɔ ni nilee bɛ mli kwraa akɛ aaaye “mɛi ni leee Nyɔŋmɔ” lɛ ahe awuŋa! Yɛ anɔkwale mli lɛ, mɛi ni le Yehowa ní amɛyɔɔ hiɛnɔkamɔ akɛ amɛbaahi shi kɛya naanɔ lɛ moŋ esa akɛ aye amɛhe awuŋa. Nyɛmi nuu fioo ko ni yɔɔ Japan lɛ bayɔse enɛ jogbaŋŋ. Beni eji oblanyo fioo lɛ, no mli lɛ, lɛ hu “eetao heyeli babaoo.” Etsɔɔ mli akɛ: “Misusu akɛ nɔ ko miiŋmɛɛ mi waa diɛŋtsɛ. Kɛkɛ ni miyoo bɔ ni mishihilɛ baaji ehã kɛji mibɛ anɔkwale lɛ mli. Mina mihe akɛ mahi shi afii 70 loo 80 pɛ kɛkɛ lɛ migbo. Shi Yehowa kɛ naanɔ wala he hiɛnɔkamɔ haa! Enɛ ní miyoo lɛ ye ebua mi ni mihiɛ basɔ nɔ ni miyɔɔ diɛŋtsɛ lɛ waa.”[6] Ni kɛ́ nakai po lɛ, ebɛ mlɛo akɛ aaahi shi akɛ anɔkwafo, yɛ be mli ní gbɔmɛi ni ebɔle bo kɛkpe lɛ enyiɛɛɛ Nyɔŋmɔ mlai asɛɛ lɛ. Mɛni ji nibii komɛi ní obaanyɛ ofee ní okɛte shi oshi nakai nɔnyɛɛi lɛ?
Kwɛmɔ Nanemɛi ní Obɔɔ lɛ Jogbaŋŋ!
13, 14. Mɛni hewɔ ehe hiaa ní wɔhala nii amli yɛ naanyobɔi agbɛfaŋ lɛ?
13 Nyɛhaa wɔkwɛa bɔ ni awie gbɔmɔ ni yeɔ omanye lɛ he aha, ní aŋma afɔ̃ shi yɛ Lala 1:1-3 lɛ ekoŋŋ: “Ajɔɔ gbɔmɔ ni enyiɛɛɛ mɛi fɔji ajina mli, ni edamɔɔɔ eshafeelɔi agbɛ nɔ, ni etaaa hefɛoyelɔi ataramɔhe, shi moŋ Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ! Etamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpɔŋ; ni nɔ fɛɛ nɔ ni efeɔ lɛ shwereɔ.”
14 Kadimɔ klɛŋklɛŋ kwraa akɛ onanemɛi náa gbɛfaŋnɔ kpele yɛ enɛ mli. Abɛi 13:20 lɛ kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeená amane.” Enɛ etsɔɔɔ akɛ esaaa akɛ wɔjieɔ suɔmɔ kpo wɔtsɔɔ gbekɛbii krokomɛi ni jeee Yehowa Odasefoi lɛ, ní wɔnyɛ amɛ, loo wɔkabu amɛ. Biblia lɛ woɔ wɔ hewalɛ ní wɔjie suɔmɔ kpo wɔtsɔɔ wɔnanemɛi adesai ní ‘wɔkɛ gbɔmɛi fɛɛ ahi shi yɛ toiŋjɔlɛ mli.’ (Romabii 12:18; Mateo 22:39) Shi, kɛ́ okɛ mɛi ní enyiɛɛɛ tɛi ní Biblia lɛ efolɔ eshwie shi lɛ asɛɛ lɛ miibɔ gbagbalii lɛ, ekolɛ obaana akɛ ‘oonyiɛ amɛ ajina mli.’
Sɛɛnamɔi ni Yɔɔ Biblia Kanemɔ Mli
15. Oblahii kɛ oblayei baanyɛ aná suɔmɔ kɛha Biblia kanemɔ yɛ mɛɛ gbɛ nɔ?
15 Lalatsɛ lɛ wie hu akɛ gbɔmɔ ní yeɔ omanye lɛ náa Nyɔŋmɔ mla lɛ kanemɔ “shwane kɛ nyɔɔŋ” he miishɛɛ. (Lala 1:1, 2) Wɔkpɛlɛɔ nɔ akɛ Biblia lɛ kanemɔ bɛ mlɛo, ni “nibii komɛi ashishinamɔ miijara” yɛ mli. (2 Petro 3:16) Shi ehe ehiaaa ni Biblia kanemɔ afee deŋmegbomɔ. Obaanyɛ ‘oshwe’ Nyɔŋmɔ Wiemɔ “lɛ mli fufɔ krɔŋŋ lɛ.” (1 Petro 2:2) Bɔɔ mɔdɛŋ akɛ oookane fioo ko pɛ daa gbi. Kɛ́ otii komɛi yɛ mli ní onuuu shishi lɛ, taomɔ nakai otii lɛ amli. Yɛ sɛɛ mli lɛ, susumɔ nɔ ni okane lɛ he okwɛ. (Lala 77:12, 13Ga Bible) Kɛ́ onaagba ji ojwɛŋmɔ ní nyɛɛɛ ahi nɔ ni okaneɔ lɛ nɔ lɛ, no lɛ bɔɔ mɔdɛŋ ní okane lɛ waa ní ‘ojwɛŋ he.’ Yɛ be ko sɛɛ lɛ, eka shi faŋŋ akɛ suɔmɔ ní oyɔɔ kɛha Biblia kanemɔ lɛ mli baawa. Nyɛmi yoo fioo ko ni yɔɔ Brazil lɛ kaiɔ akɛ: “Efee tamɔ nɔ ni Yehowa kɛ mi teŋ jɛkɛ be fɛɛ be. Shi nyɔji saŋŋ ní eho nɛɛ, mitee hiɛ waa yɛ miteemɔŋ nikasemɔ kɛ Biblia kanemɔ mli. Amrɔ nɛɛ minuɔ he akɛ mikɛ Yehowa teŋ wekukpaa lɛ mli ewa waa. Eji mɔ ni yɔɔ diɛŋtsɛ kɛha mi.”[7]
16. Mɛɛ gbɛ nɔ wɔɔtsɔ ní asafoŋ kpeei ahe aba sɛɛnamɔ aha wɔ babaoo?
16 Asafoŋ kpeeiyaa hu he miihia kɛha omumɔŋ dalɛ. Kɛ́ ‘okwɛɔ ní ahi yɛ bɔ ni onuɔ lɛ hewɔ’ lɛ, no lɛ obaanyɛ oná hewalɛwoo babaoo. (Luka 8:18) Ani bei komɛi lɛ onuɔ he akɛ kpeei lɛ bɛ miishɛɛ? Ojogbaŋŋ, bi ohe akɛ, ‘Mɛni mifeɔ koni mikɛha kpeei lɛ afee miishɛɛ? Ani miboɔ toi? Ani mitsɔɔ hiɛ mikaseɔ? Ani mihaa saji ahetoo?’ Ejaakɛ, Biblia lɛ kɛɔ wɔ akɛ “wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni . . . wɔwowoo wɔhe ŋaa.” (Hebribii 10:24, 25) Kɛ́ ooonyɛ ofee enɛ lɛ, no lɛ esa akɛ okɛ ohe awo mli! Shi kɛlɛ, dani okɛ ohe baawo mli lɛ, ja otsɔ hiɛ osaa ohe dã. Nyɛmi yoo fioo ko kpɛlɛ nɔ akɛ: “Kɛ́ otsɔ hiɛ osáa ohe lɛ, efeɔ mlɛo kwraa diɛŋtsɛ akɛ okɛ ohe baawo kpeei lɛ mli.”[8]
Nyɔŋmɔ Gbɛ lɛ Sɛɛnyiɛmɔ Haa Mɔ Yeɔ Omanye
17. Mɔ ni kɛ mɔdɛŋbɔɔ kaneɔ Biblia lɛ ‘tamɔ tso ni atɛo yɛ faai atoi’ yɛ mɛɛ gbɛ nɔ?
17 Lalatsɛ lɛ tee nɔ ewie gbɔmɔ ní yeɔ omanye lɛ he akɛ etamɔ “tso ni atɛo yɛ faai atoi.” Ekolɛ faai ní awieɔ he lɛ miitsɔɔ nu jɔɔi ní agbála ní akɛshwieɔ ŋmɔ mli tsei anɔ nu. (Yesaia 44:4)[9] Biblia lɛ kanemɔ daa gbi tamɔ nɔ ni okɛ ohe ekpɛtɛ niyenii kɛ numɔnii jɛɛhe ko ni sɛɛ efooo gbi ko gbi ko lɛ he. (Yeremia 17:8) Onine baanyɛ ashɛ hewalɛ ní he hiaa bo koni onyɛ okpee kaai kɛ jaramɔ shihilɛi anaa lɛ nɔ daa gbi. Akɛni okase bɔ ni Yehowa susuɔ saji ahe ehaa lɛ hewɔ lɛ, obaaná nilee ni he hiaa bo lɛ koni onyɛ ofee yiŋkpɛi ni nilee yɔɔ mli.
18. Mɛni baanyɛ ama nɔ mi akɛ oblanyo loo oblayoo baaye omanye yɛ Yehowa sɔɔmɔ mli?
18 Bei komɛi lɛ, ekolɛ Yehowa sɔɔmɔ baafee tamɔ nɔ ni wa. Shi kaanu he kɔkɔɔkɔ akɛ ewa fe bɔ ni obaanyɛ otsu he nii. (5 Mose 30:11) Biblia lɛ woɔ bo shi akɛ yɛ naagbee lɛ, ‘nɔ fɛɛ nɔ ni ofeɔ lɛ baashwere,’ bei abɔ ní oti titri ni ma ohiɛ lɛ ji ní osa Yehowa hiɛ, ní oha etsui anya lɛ! (Abɛi 27:11) Ni kaimɔ akɛ, jeee okome pɛ oyɔɔ. Oyɛ Yehowa kɛ Yesu Kristo sɛɛfimɔ. (Mateo 28:20; Hebribii 13:5) Amɛle nɔnyɛɛi ní okɛkpeɔ, ni amɛkwaŋ bo kɔkɔɔkɔ. (Lala 55:23Ga Bible) Oyɛ ‘nyɛmimɛi asafo muu lɛ fɛɛ’ sɛɛfimɔ, kɛ ofɔlɔi hu asɛɛfimɔ kɛji akɛ amɛsheɔ Nyɔŋmɔ gbeyei. (1 Petro 2:17) Sɛɛfimɔ ní oyɔɔ nɛɛ, kɛ ofaishitswaa kɛ omɔdɛŋbɔɔ lɛ hewɔ lɛ, obaanyɛ oná shihilɛ ní yeɔ omanye mli ŋɔɔmɔ, jeee bianɛ kɛkɛ, shi moŋ kɛmiiya naanɔ hu!
Sanebimɔi Kɛha Emlitĩi
◻ Mɛni ji omanyeyeli diɛŋtsɛ?
◻ Mɛni hewɔ ehe hiaa ní Yehowa akudɔ wɔnajifaamɔi lɛ?
◻ Oblahii kɛ oblayei baanyɛ ‘akane amɛgbii lɛ’ yɛ mɛɛ gbɛ nɔ?
◻ Mɛni hewɔ nilee bɛ mli akɛ aaaye efɔŋfeelɔi ahe awuŋa lɛ?
◻ Daa gbi Biblia kanemɔ kɛ kpeeiyaa daa baanyɛ aye abua oblahii kɛ oblayei ní amɛná shihilɛ ní yeɔ omanye mli ŋɔɔmɔ yɛ mɛɛ gbɛ nɔ?
[Mfoniri ni yɔɔ baafa 20]
Akɛni amɛbɛ “Nyɔŋmɔ gbeyeishemɔ” kpakpa hewɔ lɛ, oblahii kɛ oblayei babaoo kɛ amɛhe woɔ jeŋba ni kpataa mɔ hiɛ mli
[Mfoniri ni yɔɔ baafa 22]
Bei pii lɛ, oblahii kɛ oblayei lɛ ahiɛ kpaa nɔ akɛ nɔ ko baajɛ amɛnifeemɔi lɛ amli kɛba
[Mfoniri ni yɔɔ baafa 23]
Kasemɔ bɔ ni ooofee ní oná suɔmɔ kɛha Biblia kanemɔ
[Mfoniri ni yɔɔ baafa 23]
Kɛ́ okɛ ohe woɔ kpeei amli lɛ, ebaaha oná he miishɛɛ