Ná Okɛ Yehowa Teŋ Naanyobɔɔ ni Mli Wa
KASELƆ Yakobo ŋma akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:8) Ni lalatsɛ David la akɛ: “Yehowa jieɔ eyitsoŋ sane etsɔɔ mɛi ní sheɔ lɛ lɛ.” (Lala 25:14) Eka shi faŋŋ akɛ, Yehowa Nyɔŋmɔ miitao ni wɔná wɔkɛ lɛ teŋ naanyobɔɔ ni mli wa. Shi kɛlɛ, jeee mɔ fɛɛ mɔ ní jáa Nyɔŋmɔ ni eboɔ emlai lɛ atoi lɛ nuɔ he diɛŋtsɛ akɛ ebɛŋkɛ lɛ kpaakpa.
Ni bo hu? Ani oyɛ okɛ Nyɔŋmɔ teŋ wekukpaa ni yɔɔ gbagbalii? Ŋwanejee ko bɛ he akɛ oosumɔ ni obɛŋkɛ lɛ gbagbalii. Mɛɛ gbɛ nɔ wɔɔtsɔ wɔná wɔkɛ Nyɔŋmɔ teŋ naanyobɔɔ ni mli wa? Mɛni enɛ baatsɔɔ kɛha wɔ? Biblia mli wolo ni ji Abɛi lɛ yitso etɛ lɛ kɛ hetoo lɛ haa.
Jiemɔ Mlihilɛ kɛ Anɔkwayeli Kpo
Blema Israel Maŋtsɛ Salomo je Abɛi yitso etɛ lɛ shishi kɛ wiemɔi nɛɛ akɛ: “Mibi, ohiɛ akakpa mimla lɛ nɔ, shi ha otsui ato mikitãi lɛ! Ejaakɛ gbii asɛɛjɛkɛmɔ kɛ wala afii kɛ hejɔlɛ amɛaaŋɔfata he amɛhao.” (Abɛi 3:1, 2) Akɛni Nyɔŋmɔ mumɔ ji nɔ ni tsirɛ Salomo ni eŋma enɛ hewɔ lɛ, nɛkɛ tsɛ ŋaawoo nɛɛ jɛ Yehowa Nyɔŋmɔ diɛŋtsɛ ŋɔɔ ni ékɛha wɔ. Aawo wɔ ŋaa yɛ biɛ koni wɔkɛ kaimɔi ni Nyɔŋmɔ kɛhaa wɔ lɛ atsu nii—emla lɛ, aloo etsɔɔmɔi lɛ, kɛ ekitai lɛ—ni yɔɔ Biblia lɛ mli lɛ. Kɛji akɛ wɔfee enɛ lɛ, no lɛ, ‘gbii asɛɛjɛkɛmɔ kɛ wala afii kɛ hejɔlɛ amɛaaŋɔfata he amɛha’ wɔ. Hɛɛ, amrɔ nɛɛ po lɛ, wɔbaanyɛ wɔná shihilɛ mli toiŋjɔlɛ mli ŋɔɔmɔ, ni wɔbaanyɛ wɔtsi wɔhe kɛjɛ nibii ni kɛ mɔ woɔ oshara mli, ni gbeɔ mɔ oya ni baa efɔŋfeelɔi anɔ lɛ he. Kɛfata he lɛ, wɔbaanyɛ wɔná hiɛnɔkamɔ akɛ wɔbaaná naanɔ wala yɛ toiŋjɔlɛ jeŋ hee ko mli.—Abɛi 1:24-31; 2:21, 22.
Salomo tsa nɔ akɛ: “Kaaha mlihilɛ kɛ anɔkwale miishio; ŋɔɔ fi okuɛ, ŋmaa yɛ otsuiŋ tao lɛ nɔ: no dani oooná nyam kɛ buu kpakpa yɛ Nyɔŋmɔ kɛ gbɔmɛi ahiɛ.”—Abɛi 3:3, 4.
Wiemɔ “mlihilɛ” lɛ shishinumɔ diɛŋtsɛ ji “suɔmɔ yɛ anɔkwale mli” ni etsɔɔ jalɛ kɛ ekomefeemɔ. Ani wɔtswa wɔfai shi akɛ wɔbaakã he wɔkpɛtɛ Yehowa he gbagbalii ni nɔ ni baajɛ mli aba lɛ kɔɔɔ he eko? Ani wɔjieɔ mlihilɛ kpo wɔtsɔɔ wɔnanemɛi heyelilɔi yɛ wɔ kɛ amɛteŋ naanyobɔɔ mli? Ani wɔfeɔ wɔnii yɛ gbɛ ni aaaha wɔkɛ amɛ abɔ gbagbalii? Ani wɔhaa ‘mlihilɛ mla kãa wɔlilɛi anɔ’ yɛ wɔkɛ amɛ sharamɔ mli daa gbi yɛ shihilɛi ni wawai ashishi po?—Abɛi 31:26.
Akɛni Yehowa mlihilɛ fa babaoo hewɔ lɛ, ‘eŋɔfaa mra.’ (Lala 86:5) Kɛ́ wɔtsake wɔtsui yɛ tsutsu eshai ni wɔfee lɛ hewɔ, ni amrɔ nɛɛ lɛ wɔmiijaje wɔgbɛi lɛ, no lɛ, aaama nɔ mi aaha wɔ akɛ wɔbaaná “hejɔɔmɔ yinɔ” kɛjɛ Yehowa dɛŋ. (Bɔfoi lɛ Asaji 3:20) Ani Esaaa akɛ wɔkaseɔ wɔ-Nyɔŋmɔ lɛ kɛtsɔ mɛi krokomɛi ahe eshai ní wɔkɛaake amɛ lɛ nɔ?—Mateo 6:14, 15.
Yehowa ji “Nyɔŋmɔ anɔkwafo,” ni eesumɔ ni mɛi ni sumɔɔ akɛ amɛná amɛ kɛ lɛ teŋ naanyobɔɔ ni mli wa lɛ aye ‘anɔkwa.’ (Lala 31:6) Ani wɔbaanyɛ wɔkpa gbɛ akɛ Yehowa baatsɔ wɔnaanyo kɛji akɛ wɔhiɔ shihilɛ srɔtoi enyɔ mli—soro bɔ ni wɔfeɔ wɔnii wɔhaa kɛji wɔyɛ Kristofoi nanemɛi ateŋ, ni wɔfeɔ nɔ kroko kɛji akɛ amɛbɛ wɔmasɛi—tamɔ hii “osatofoi” ni kɛ amɛsubaŋ diɛŋtsɛ teeɔ lɛ? (Lala 26:4, NW) Kwɛ buuluufeemɔ ni eeeji akɛni Yehowa lɛ “ateee bɔɔnɔ ko yɛ ehiɛ” lɛ hewɔ lɛ!—Hebribii 4:13.
Esa akɛ wɔbu mlihilɛ kɛ anɔkwale tamɔ kuɛnii ni jara wa waa diɛŋtsɛ ni ‘akɛfi wɔsɛ̃’ ejaakɛ amɛyeɔ amɛbuaa wɔ ni ‘wɔnáa Nyɔŋmɔ kɛ gbɔmɛi ahiɛduromɔ.’ Esaaa akɛ wɔjieɔ nɛkɛ sui nɛɛ kpo yɛ kponɔgbɛ kɛkɛ, shi moŋ esa akɛ wɔkpɛ ‘wɔwo wɔtsui tao lɛ nɔ,’ ni efee wɔmligbɛ su.
Ná Yehowa Mli Hekɛnɔfɔɔ ni Mli Wa Waa
Maŋtsɛ nilelɔ lɛ tsa nɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”—Abɛi 3:5, 6.
Yɛ anɔkwale mli lɛ Yehowa ji mɔ ni esa akɛ wɔkɛ wɔhe fɔ̃ɔ enɔ kwraa. Ákɛ Bɔlɔ lɛ, eyɛ “hewalɛ kpele” ni lɛ eŋɔɔ “nyɛmɔ kpele” jɛɔ kɛbaa. (Yesaia 40:26, 29) Enyɛɔ etsuɔ nibii fɛɛ ni ekpɛ eyiŋ akɛ ebaafee lɛ he nii. Ejaakɛ egbɛi lɛ diɛŋtsɛ shishi ji “Mɔ ni Haa Ebaa Mli,” ni enɛ haa wɔnáa hekɛnɔfɔɔ yɛ nyɛmɔ ni eyɔɔ ni ekɛtsuɔ eshiwoo he nii lɛ mli! Anɔkwale ni eji akɛ “Nyɔŋmɔ nyɛŋ emale” lɛ haa ebafeɔ anɔkwafo he nɔkwɛmɔnɔ ni fe fɛɛ. (Hebribii 6:18) Suɔmɔ ji esui lɛ ateŋ nɔ ni fe fɛɛ. (1 Yohane 4:8) ‘Eja yɛ egbɛi fiaa mli, ni durolɔ ji lɛ yɛ enitsumɔi fiaa mli.’ (Lala 145:17) Kɛ wɔnyɛɛɛ wɔkɛ wɔhe afɔ̃ Nyɔŋmɔ nɔ lɛ, belɛ namɔ nɔ wɔbaanyɛ wɔkɛ wɔhe afɔ̃ mɔ? Yɛ anɔkwale mli lɛ, dani wɔɔná emli hekɛnɔfɔɔ lɛ, belɛ ehe miihia ni ‘wɔsa wɔnaa wɔkwɛ, ni wɔna akɛ Yehowa hi’ kɛtsɔ nii ni wɔkaseɔ yɛ Biblia lɛ mli lɛ ni wɔkɛaatsu nii yɛ wɔ diɛŋtsɛ wɔshihilɛ mli, kɛ ni wɔɔjwɛŋ nibii kpakpai ni enɛ kɛbaa lɛ nɔ.—Lala 34:8.
Mɛɛ gbɛ nɔ ‘wɔɔkai Yehowa yɛ wɔgbɛi fɛɛ mli’ yɛ? Mumɔ tsirɛ lalatsɛ lɛ ni ekɛɛ akɛ: “Matsĩ Yehowa nifeemɔ nii lɛ atã, hɛɛ, makai oblema naakpɛɛ nii lɛ.” (Lala 77:12) Akɛni anaaa Nyɔŋmɔ hewɔ lɛ, naakpɛɛ nibii wuji ni efee eha ewebii lɛ anɔ ni wɔɔjwɛŋ lɛ he miihia koni wɔná wɔkɛ lɛ teŋ wekukpaa ni yɔɔ gbagbalii.
Sɔlemɔ ji gbɛ ko ni he hiaa ni wɔɔtsɔ nɔ wɔkai Yehowa. Maŋtsɛ David tee nɔ etsɛ Yehowa “daa jenamɔ!” (Lala 86:3) Beni David ji foijelɔ ni yɔɔ ŋa nɔ lɛ, esɔle jenamɔ fɛɛ. (Lala 63:6, 7) Bɔfo Paulo wo ŋaa akɛ: ‘Nyɛsɔlea daa yɛ mumɔ mli.’ (Efesobii 6:18) Shii enyiɛ wɔsɔleɔ? Ani wɔnáa wɔkɛ Nyɔŋmɔ teŋ wekukpaa mli ŋɔɔmɔ kɛjɛɔ wɔtsui mli? Ani wɔkpaa lɛ fai ni eye ebua wɔ kɛji akɛ wɔkɛ kaa miikpe? Ani wɔbiɔ edɛŋ gbɛtsɔɔmɔ dani wɔkpɛɔ wɔyiŋ wɔfeɔ nɔ ko ni he hiaa? Sɔlemɔ ni wɔsɔleɔ yɛ anɔkwale mli lɛ haa Yehowa sumɔɔ wɔsane. Ni wɔyɛ nɔmimaa akɛ ebaabo wɔ toi ni ‘eeejaje wɔtempɔŋi lɛ’ eha wɔ.
Kwɛ bɔ ni ebaafee nɔ ni nilee bɛ mli akɛ ‘wɔkɛ wɔhe aaakpasa wɔ diɛŋtsɛ wɔjwɛŋmɔ’ aloo gbɔmɛi ni ale amɛ waa yɛ je lɛŋ yɛ be mli ni wɔbaanyɛ wɔkɛ wɔhe afɔ̃ Yehowa nɔ kwraa moŋ! Salomo kɛɛ akɛ: “Kaabu ohe nilelɔ.” Yɛ no najiaŋ lɛ ewo ŋaa akɛ: “She Yehowa gbeyei, ni oje efɔŋ he! No aaawo olaŋmɔ hewalɛ, ni eeeha owui amli awao.” (Abɛi 3:7, 8) Esa akɛ gbeyeishemɔ kpakpa ni anáa akɛ afeŋ nɔ ko ni esaaa Nyɔŋmɔ hiɛ lɛ akudɔ wɔnifeemɔi, susumɔi, kɛ henumɔi. Woo ni gbeyeishemɔ tamɔ nɛkɛ yɔɔ mli lɛ baatsĩ wɔnaa kɛjɛ nɔ fɔŋ feemɔ he, ni eji mumɔŋ tsamɔ kɛ nɔ ni haa anáa miishɛɛ.
Okɛ Onii ni Fe Fɛɛ lɛ Aha Yehowa
Mɛɛ gbɛ kroko nɔ wɔɔtsɔ wɔbɛŋkɛ Nyɔŋmɔ? Maŋtsɛ lɛ kɛ gbɛtsɔɔmɔ ha akɛ: “Okɛ onii ni oyɔɔ kɛ onibaanii fɛɛ mli klɛŋklɛŋ nii awo Yehowa hiɛ nyam.” (Abɛi 3:9) Yehowa ni wɔɔwo ehiɛ nyam lɛ tsɔɔ akɛ, esa akɛ wɔjie bulɛ ni mli kwɔ kpo wɔtsɔɔ lɛ, ni wɔwo ehiɛ nyam yɛ maŋ, kɛtsɔ wɔhe ni wɔkɛaawo egbɛi lɛ jajemɔ yɛ faŋŋ mli lɛ nɔ, ni wɔfĩ sɛɛ hu. Wɔnii ni jara wa ni wɔkɛwoɔ Yehowa hiɛ nyam lɛ ji wɔbe, wɔnilee, wɔhewalɛ, kɛ wɔ heloonaa nibii ni wɔyɔɔ. Esa akɛ enɛɛmɛi afee klɛŋklɛŋ nii—nibii ni hi fe fɛɛ. Ani esaaa akɛ bɔ ni wɔkɛ wɔnibii ni wɔyɔɔ lɛ tsuɔ nii wɔhaa lɛ tsɔɔ bɔ ni wɔtswa wɔfai shi akɛ ‘wɔbaatao maŋtsɛyeli lɛ kɛ Nyɔŋmɔ jalɛ lɛ tsutsu’?—Mateo 6:33.
Wɔnibii ni jara wawai ni wɔkɛaawo Yehowa hiɛ nyam lɛ efeee efolo. Salomo ma nɔ mi akɛ: “No dani oboŋoi lɛ aaayimɔ obɔbɔ, ni oweinbui lɛ aaafɛlɛ kɛ wein hee.” (Abɛi 3:10) Eyɛ mli akɛ mumɔŋ ninamɔ diɛŋtsɛ kɛ heloonaa ninamɔ baaa moŋ, shi wɔnibii ni wɔkɛaatsu nii kɛwo Yehowa hiɛ nyamɔ lɛ kɛ jɔɔmɔ babaoo baa. Nyɔŋmɔ suɔmɔnaa nifeemɔ ji “niyenii” ni wajeɔ Yesu. (Yohane 4:34) Nakai nɔŋŋ eji kɛji wɔkɛ wɔhe wo shiɛmɔ kɛ kaselɔi-afeemɔ nitsumɔ ni woɔ Yehowa hiɛ nyam lɛ hu mli lɛ, ewajeɔ wɔ. Kɛ wɔkã he wɔtsu nakai nitsumɔ lɛ, wɔmumɔŋ nitoohei lɛ baayimɔ obɔbɔ. Wɔ miishɛɛ lɛ—ni wein hee damɔ shi kɛha lɛ lɛ—baayi kɛteke nɔ.
Ani wɔhu wɔkwɛɛɛ Yehowa gbɛ, ni wɔsɔleee wɔhaaa lɛ koni wɔná heloonaa niyenii bɔ ni sa kɛha gbi fɛɛ gbi? (Mateo 6:11) Yɛ anɔkwale mli lɛ nibii fɛɛ ni wɔyɔɔ lɛ jɛ wɔŋwɛi Tsɛ ni yɔɔ suɔmɔ lɛ ŋɔɔ. Yehowa baaya nɔ ejɔɔ wɔ lolo kɛyashi wɔkɛ wɔnibii ni jara wawai lɛ aaajie eyi.—1 Korintobii 4:7.
Kpɛlɛmɔ Yehowa Tsɔsemɔ Nɔ
Israel maŋtsɛ lɛ yɔse bɔ ni Yehowa ni akɛ lɛ aaabɔ gbagbalii lɛ he hiaa ha ni ewo ŋaa akɛ: “Mibi, kaagbe Yehowa tsɔsemɔ lɛ he guɔ, ni kaaha ekãmɔ lɛ miije otsine; ejaakɛ mɔ ni Yehowa sumɔɔ lɛ, lɛ ekãa, tamɔ bɔ ni tsɛ feɔ ebi ni eyɔɔ ehe tsui lɛ!”—Abɛi 3:11, 12.
Eyɛ mli akɛ ebaawa akɛ wɔɔkpɛlɛ tsɔsemɔ nɔ. Bɔfo Paulo ŋma akɛ: “Tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ ni, shi dɔlɛ nɔ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehãa mɛi ní etsɔ nɔ ekase nɔ ko lɛ” (Hebribii 12:11) Hiɛkamɔ kɛ tsɔsemɔ ji tsɔsemɔ ni he hiaa lɛ fã ni haa wɔbɛŋkɛɔ Nyɔŋmɔ. Tsɔsemɔ ni Yehowa kɛhaa lɛ—kɛ wɔnine shɛɔ nɔ kɛjɛɔ fɔlɔi adɛŋ jio, Kristofoi asafo lɛ mli jio, aloo kɛtsɔ Ŋmalɛi lɛ anɔ jwɛŋmɔ yɛ be mli ni wɔfeɔ wɔteemɔŋ nikasemɔ jio—etsɔɔ suɔmɔ ni eyɔɔ kɛha wɔ. Eji nilee gbɛ akɛ wɔɔkpɛlɛ nɔ.
Ná Nilee kɛ Sane Sɛɛyoomɔ Daa
Yɛ no sɛɛ lɛ, Salomo ma bɔ ni nilee kɛ sane sɛɛyoomɔ he hiaa ha yɛ mɔ kɛ Nyɔŋmɔ teŋ wekukpaa ni yɔɔ gbagbalii mli lɛ nɔ mi. Ejaje akɛ: “Miishɛɛ ji gbɔmɔ ni náa nilee, kɛ gbɔmɔ ni náa sane sɛɛyoomɔ! Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. . . . Walatso ji lɛ ha mɛi ni mɔɔ emli lɛ, ni mɔ ni hiɛɔ emli lɛ eyɛ miishɛɛ.”—Abɛi 3:13-18, NW.
Beni maŋtsɛ lɛ kaiɔ wɔ ni wɔjie nilee kɛ sane sɛɛyoomɔ kpo yɛ Yehowa naakpɛɛ nitsumɔi lɛ amli lɛ, ejaje akɛ: “Ŋaa Yehowa kɛto shikpɔŋ lɛ shishi, eŋɔ ŋwɛi ema shi yɛ jwɛŋmɔ naa. . . . Mibi, kaaha amɛmiije ohiɛ. Ŋɔɔ ŋaawoo ni hi kɛ jwɛŋmɔ oto, ni amɛaatsɔ wala amɛha osusuma kɛ wulamɔnɔ ha okuɛ.”—Abɛi 3:19-22.
Nilee kɛ sane sɛɛyoomɔ ji Nyɔŋmɔ gbeyeishemɔ sui. Ehe ehiaaa ni wɔná sui nɛɛ kɛkɛ, shi moŋ esa akɛ wɔhiɛ mli kpɛŋŋ ni wɔkaŋmɛɛ he yɛ mɔdɛŋ ni wɔbɔɔ yɛ Ŋmalɛi lɛ akasemɔ kɛ amɛkɛ nitsumɔ mli lɛ. Salomo kɛtsa nɔ akɛ: “No dani ooonyiɛ ogbɛ lɛ nɔ shweshweeshwe, ni otɛŋ onane. Kɛ oho okã shi lɛ, osheŋ gbeyei, shi oookã shi, ni owɔ lɛ aaaŋɔɔ.”—Abɛi 3:23, 24.
Hɛɛ wɔbaanyɛ wɔnyiɛ ni wɔsheee gbeyei, ni wɔbaawɔ yɛ toiŋjɔlɛ mli yɛ be mli ni wɔmɛɔ “trukaa hiɛkpatamɔ” ni baa Satan jeŋ fɔŋ lɛ nɔ tamɔ julɔ baa lɛ. (1 Tesalonikabii 5:2, 3; 1 Yohane 5:19) Kɛ́ amanehulu kpeteŋkpele ni ebɛŋkɛ kpaakpa lɛ ba po lɛ, wɔbaanyɛ wɔná nɛkɛ nɔmimaa nɛɛ akɛ: “Ebɛ akɛ oooshe trukaa hekpokpomɔ kɛ mɛi fɔji ahiɛkpatamɔ ni baa lɛ gbeyei. Ejaakɛ Yehowa aaatsɔ ohiɛkɛnɔfɔɔ, ni eeebu onane he kɛaajɛ mɔmɔ mli.”—Abɛi 3:25, 26; Mateo 24:21.
Feemɔ Ekpakpa
Salomo wo ŋaa akɛ: “Mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli lɛ.” (Abɛi 3:27) Mɛi krokomɛi ekpakpa ni wɔɔfee lɛ tsɔɔ akɛ, wɔkɛ wɔnibii ni wɔyɔɔ lɛ baaye ebua amɛ, ni afeɔ enɛ yɛ gbɛi srɔtoi anɔ. Shi ani yelikɛbuamɔ ni wɔkɛaaha mɛi krokomɛi koni amɛná amɛkɛ anɔkwa Nyɔŋmɔ lɛ teŋ wekukpaa lɛ jeee nɔ ni hi fe fɛɛ ni wɔbaanyɛ wɔfee ni wɔkɛye wɔbua amɛ yɛ “naagbee be” nɛɛ mli. (Daniel 12:4) Belɛ gbii nɛɛ ji be ni esa akɛ wɔjieɔ ekãafeemɔ kpo yɛ Maŋtsɛyeli shiɛmɔ nitsumɔ lɛ kɛ kaselɔ-feemɔ nitsumɔ lɛ mli.—Mateo 28:19, 20.
Maŋtsɛ lɛ tee nɔ etsɔɔ nifeemɔi komɛi ni esa akɛ wɔtsi wɔhe kɛjɛ he, ni ekɛɛ akɛ: “Kaakɛɛ onaanyo akɛ: ‘Yaa ni oba, ni wɔ́ ni maha,’ kɛ oyɛ eko yɛ onine nɔ lɛ. Kaato onaanyo he ŋaa fɔŋ, beni lɛ lɛ ejwɛŋɔ akɛ eyɛ shweshweeshwe yɛ omasɛi lɛ. Okɛ mɔ ko akabe yakatswaa, kɛji efekoo efɔŋ ko lɛ. Ohiɛ akakɔ yiwalɔ ko nɔ, ni kaakɔ egbɛi lɛ amli eko eko.”—Abɛi 3:28-31.
Beni Salomo muɔ nɔ hewɔ ni ekɛ ŋaawoo nɛɛ haa lɛ naa lɛ, ekɛɛ akɛ: “Ejaakɛ Yehowa miihi kutumpɔfo; shi mɛi ni ja ekɛbɔɔ. Yehowa loomɔ kã mɔ fɔŋ we lɛ nɔ; shi ejɔɔ jalɔi ashihilɛhe lɛ. Eyeɔ hefɛoyelɔi ahe fɛo, shi eduroɔ heshibalɔi. Nilelɔi agbɛfaŋnɔ ji anunyam, shi kwashiai aaatere hiɛgbele.”—Abɛi 3:32-35.
Kɛ́ wɔmiitao ni wɔná wɔkɛ Yehowa teŋ wekukpaa ni yɔɔ gbagbalii mli ŋɔɔmɔ lɛ, belɛ esaaa akɛ wɔtsɔɔ awuiyeli ŋaai fɔji. (Abɛi 6:16-19) Ja wɔfee nɔ ni sa yɛ Nyɔŋmɔ hiɛ dani wɔbaaná ehiɛ duromɔ kɛ jɔɔmɔ. Ekolɛ mɛi krokomɛi ni kwɛɔ wɔ ni naa akɛ wɔnifeemɔ kɛ Nyɔŋmɔ he nilee kpãa gbee lɛ kɛ hiɛnyamwoo ni wɔkpaaa gbɛ baaha wɔ. Belɛ, nyɛhaa wɔtsia wɔhe kɛjɛa awuiyeli kɛ basabasafeemɔ jeŋ nɛɛ ŋaa fɔŋ gbɛi lɛ ahe. Lɛɛlɛŋ, nyɛhaa wɔtiua jalɛ sɛɛ gbɛ, ni wɔná wɔkɛ Yehowa teŋ wekukpaa ni yɔɔ gbagbalii!
[Mfonirii ni yɔɔ baafa 25]
“Okɛ onii ni jara wa lɛ awo Yehowa hiɛ nyam”