Te Ofeɔ Tɛŋŋ Osaa Béi?

WƆKƐ gbɔmɛi ni hiɛ sui srɔtoi sharaa daa gbi. Bei pii lɛ, enɛ haa wɔnáa miishɛɛ kɛ hegbɛi heei. Bei komɛi amli lɛ, eteeɔ béi ashi hu, ni beni ekomɛi yɔɔ hiɛdɔɔ lɛ, ekomɛi lɛ amɛji wɔdaa gbi shihilɛ mli gbeekpãamɔ bibii komɛi ni eyabaaa kɛkɛ. Bɔ fɛɛ bɔ ni amɛtamɔ lɛ, bɔ ni wɔtsuɔ wɔbéi ahe nii wɔhaa lɛ náa wɔnɔ hewalɛ yɛ jwɛŋmɔŋ, henumɔŋ, kɛ mumɔŋ.

Kɛji wɔfee nɔ fɛɛ nɔ ni wɔɔnyɛ yɛ wɔ hewalɛ mli ni wɔkɛsaa béi lɛ, ebaaha wɔná shihilɛ kpakpa mli ŋɔɔmɔ kɛ wɔkɛ mɛi krokomɛi ateŋ wekukpaa ni toiŋjɔlɛ yɔɔ mli babaoo. Blema abɛbua ko kɛɛ akɛ: “Tsui ni mli jɔ lɛ, gbɔmɔtso lɛ yiwala ni; shi awuŋayeli lɛ, wuiaŋ sharamɔ ni.”—Abɛi 14:30.

Shi nɔ ni tamɔɔɔ nakai lɛ, ekɛ anɔkwa wiemɔ nɛɛ kpãa gbee akɛ: “Mɔ ni nyɛɛɛ emumɔ nɔ eye lɛ, etamɔ maŋ ni akumɔ ni gbogbo bɛ he.” (Abɛi 25:28) Wɔteŋ namɔ baasumɔ ni eŋmɛ gbɛ ni susumɔi gbohii ni baanyɛ eha efee nii yɛ gbɛ̀i ni ejaa nɔ—gbɛ̀i ni baanyɛ aye lɛ kɛ mɛi krokomɛi awui lɛ aná enɔ hewalɛ? Mlifu ni anyɛɛɛ nɔ aye lɛ baanyɛ afee nakai pɛpɛɛpɛ. Yɛ Yesu Gɔŋ nɔ Shiɛmɔ lɛ mli lɛ, ejie yi akɛ wɔpɛi wɔsui, ni baanyɛ aná bɔ ni wɔsaa béi ni baa wɔkɛ mɛi krokomɛi ateŋ lɛ mli lɛ nɔ hewalɛ lɛ mli. (Mateo 7:3-5) Yɛ nɔ najiaŋ ni wɔɔwie mɛi krokomɛi ahe nyanyaanya lɛ, esa akɛ wɔsusu bɔ ni wɔɔfee wɔná wɔkɛ mɛi ni hiɛ susumɔi srɔtoi ni jɛ shihilɛi srɔtoi amli lɛ ateŋ naanyobɔɔ kpakpa ni wɔhiɛ mli lɛ he.

Wɔsu

Nɔ̃ klɛŋklɛŋ ni wɔɔfee ni wɔkɛsaa nɔ ni tamɔ béi loo béi diɛŋtsɛ lɛ ji ni wɔyɔse akɛ wɔbaanyɛ wɔná susumɔi kɛ sui ni ejaaa. Ŋmalɛi lɛ kaiɔ wɔ akɛ wɔ fɛɛ wɔfee esha ‘ni Nyɔŋmɔ anunyam lɛ ebɔ wɔ.’ (Romabii 3:23) Kɛfata he lɛ, sɛɛyoomɔ baajie lɛ kpo akɛ nɔ ni kɛ wɔ naagba lɛ ba lɛ jɛɛɛ mɔ kroko lɛ. Yɛ enɛ gbɛfaŋ lɛ, nyɛhaa wɔsusua Yona niiashikpamɔ lɛ he wɔkwɛa.

Yɛ Yehowa famɔ naa lɛ, Yona yi mli kɛtee Ninive maŋtiase lɛ mli koni eyashiɛ Nyɔŋmɔ kojomɔ ni etsɛŋ ni ekɛbaaba emli bii lɛ anɔ lɛ. Miishɛɛ nɔ̃ ni jɛ mli kɛba ji akɛ, Ninive maŋtiase lɛ mli bii lɛ fɛɛ tsake amɛtsui ni amɛhe anɔkwa Nyɔŋmɔ lɛ amɛye. (Yona 3:5-10) Yehowa na akɛ amɛtsui tsakemɔ su lɛ sa eshaifaa, no hewɔ lɛ ebaa amɛyi. “Shi enɛ eŋɔɔɔ Yona naa kwraa, ni emli wo la.” (Yona 4:1) Bɔ ni Yona here Yehowa mɔbɔnalɛ lɛ nɔ lɛ yɛ naakpɛɛ. Mɛni hewɔ esa akɛ Yona mli awo la awo Yehowa? Ekolɛ, Yona susu ehenumɔi ahe babaoo tsɔ, ni esusu akɛ hiɛnyam ni eyɔɔ yɛ maŋ lɛ hiɛ lɛ eŋmɛɛ lɛ. Ehiɛ esɔɔɔ Yehowa mɔbɔnalɛ lɛ. Yehowa jɛ mlihilɛ mli eha Yona na nɔkwɛmɔnɔ ko ni abaanyɛ akase mli niiashikpamɔ ni no ye ebua lɛ ni etsake esu, ni ena bɔ ni Nyɔŋmɔ mɔbɔnalɛ lɛ jara wa ha. (Yona 4:7-11) Eyɛ faŋŋ akɛ, ehe bahia ni Yona atsake esu, shi jeee Yehowa.

Bei komɛi lɛ, ani wɔ hu ehe baahia ni wɔtsake wɔ diɛŋtsɛ wɔsu yɛ sane ko he? Bɔfo Paulo woɔ wɔ ŋaa akɛ: “Mɔ fɛɛ mɔ kɛ woo aha enaanyo tsutsu.” (Romabii 12:10) Mɛni etsɔɔ lɛ? Yɛ gbɛ kroko nɔ lɛ, eewo wɔ hewalɛ ni wɔkɛ hiɛshikamɔ atsu nii ni wɔkɛ Kristofoi krokomɛi aye yɛ bulɛ ni mli kwɔ kɛ woo mli. Nɔ ni fata enɛ he ji yɔsemɔ ni wɔɔyɔse akɛ aŋkro fɛɛ aŋkro yɛ nihalamɔ heyeli mli hegbɛ. Paulo kaiɔ wɔ hu akɛ: “Mɔ fɛɛ mɔ aaatere lɛ diɛŋtsɛ ejatsu.” (Galatabii 6:5) No hewɔ lɛ, dani béi lɛ baafɛ lɛ, kwɛ bɔ ni nilee yɔɔ mli akɛ wɔɔsusu he kɛji ehe miihia ni wɔtsake wɔsui lɛ nɛkɛ! Esa akɛ wɔtsu nii dɛŋdɛŋ ni wɔkɛjie Yehowa susumɔi akpo ni wɔtao wɔkɛ mɛi ni sumɔɔ Nyɔŋmɔ yɛ anɔkwale mli lɛɛlɛŋ lɛ ateŋ toiŋjɔlɛ.—Yesaia 55:8, 9.

Bɔ ni Wɔtsuɔ He Nii

Ŋɔɔ lɛ akɛ gbekɛbii enyɔ miipele shwɛmɔ nɔ̃ kome too lɛ nɔŋŋ he, mɔ fɛɛ mɔ miigbala waa kɛ susumɔ akɛ enine baashɛ nɔ. Mlifu wiemɔi baanyɛ afata niiahepelemɔ lɛ he kɛyashi naagbee lɛ amɛteŋ mɔ kome baaŋmɛɛ he loo mɔ kroko ni jɛ sɛɛ kɛ ehe baawo mli.

Sane ni yɔɔ Mose Klɛŋklɛŋ Wolo lɛ mli lɛ gbaa wɔ akɛ Abraham nu akɛ naataamɔ eba ekooloi akwɛlɔi kɛ ewɔfase Lot nɔ lɛ teŋ. Abraham ŋɔ hegbɛ lɛ klɛŋklɛŋ ni ekɛyanina Lot ni ekɛɛ: “Ofainɛ, kaaha béi miiba mikɛo teŋ, kɛ mikooloo kwɛlɔi lɛ kɛ okooloo kwɛlɔi lɛ ateŋ; shi nyɛmimɛi ji wɔ.” Abraham tswa efai shi akɛ ehaŋ béi ko afite amɛwekukpaa lɛ. Mɛɛ nyɔmɔ ewo yɛ he? Efee klalo akɛ ekɛ enihalamɔ hegbɛ ni eyɔɔ akɛ onukpa lɛ baashã afɔle; eesumɔ ni eŋmɛɛ nɔ ko he. Abraham ŋmɛ Lot gbɛ koni ehala he ni esumɔɔ ní ekɛ eshiabii kɛ ekoolooi lɛ ayahi. Yɛ be ni sa mli lɛ, Lot hala Sodom kɛ Gomora he ni yɔɔ frɔ̃frɔ̃ lɛ eha ehe. Abraham kɛ Lot gbála mli yɛ toiŋjɔlɛ mli.—1 Mose 13:5-12.

Bɔni afee ni wɔhiɛ wɔkɛ mɛi krokomɛi ateŋ wekukpaa ni toiŋjɔlɛ yɔɔ mli lɛ mli lɛ, ani wɔfee klalo akɛ wɔbaafee nii yɛ mumɔ ni Abraham jie lɛ kpo lɛ mli? Nɛkɛ Biblia mli sane nɛɛ feɔ nɔkwɛmɔnɔ kpakpa ni sa kasemɔ ehaa wɔ yɛ be mli ni atsuɔ béi he nii lɛ. Abraham kpa fai akɛ: “Kaaha béi miiba mikɛo teŋ.” Nɔ ni Abraham sumɔɔ yɛ anɔkwale mli ji, ni amɛna naa yɛ toiŋjɔlɛ mli. Eyɛ faŋŋ akɛ, nakai ninefɔɔ akɛ ahiɛ toiŋjɔlɛ wekukpaa mli lɛ baaye abua koni akɛjie shishinumɔ ni eyabaaa lɛ kɛje jɛmɛ. Kɛkɛ ni Abraham kɛ wiemɔ nɛɛ mu naa akɛ: “Shi nyɛmimɛi ji wɔ.” Mɛni hewɔ esa akɛ ekɛ wekukpaa ni jara wa nɛɛ ashã afɔle yɛ mɔ aŋkro nii ni etaoɔ loo henɔwomɔ hewɔ? Abraham ha nɔ ni he hiaa lɛ hi ejwɛŋmɔ mli. Efee enɛ kɛ woo kɛ bulɛ ni eyɔɔ kɛhaa ehe, ni yɛ nakai beaŋ nɔŋŋ lɛ ekɛ woo ha ewɔfase lɛ.

Yɛ be mli ni shihilɛi komɛi baanyɛ ate shi ni ehe baahia ni mɛi ni yɔɔ sɛɛ lɛ aba mli bɔni afee ni akɛsaa béi lɛ, kwɛ bɔ ni ebaahi kɛji atsu sane lɛ he nii yɛ teemɔŋ! Yesu woɔ wɔ hewalɛ ni wɔ klɛŋklɛŋ wɔya ni wɔyatao wɔkɛ wɔnyɛmimɛi lɛ ateŋ toiŋjɔlɛ, ni wɔkpa fai kɛji ehe baahia.a (Mateo 5:23, 24) Ebaabi heshibaa, loo heshibaa jwɛŋmɔ, shi Petro ŋma akɛ: “Nyɛbaa nyɛhe shi nyɛhaa nyɛhe ni nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Petro 5:5) Bɔ ni wɔkɛ wɔnanemɛi jálɔi yeɔ haa lɛ saa wɔkɛ Nyɔŋmɔ teŋ wekukpaa lɛ he tɛ̃ɛ.—1 Yohane 4:20.

Yɛ Kristofoi asafo lɛ mli lɛ, ekolɛ, abaabi ni wɔŋmɛɛ hegbɛ ko he bɔni afee ni wɔhiɛ toiŋjɔlɛ mli. Mɛi ni kɛ Yehowa Odasefoi lɛ bɔɔ lɛ ateŋ mɛi babaoo eba Nyɔŋmɔ anɔkwa jalɔi aweku lɛ mli yɛ nyɛsɛɛ afii enumɔ ni eho lɛ mli. Mɛɛ nyamɔ enɛ haa wɔtsui nyaa nɛkɛ! Bɔ ni wɔfeɔ wɔnii wɔhaa lɛ náa mɛnɛɛmɛi kɛ mɛi krokomɛi ni yɔɔ asafo lɛ mli lɛ anɔ hewalɛ. Enɛ ji yiŋtoo kpakpa hewɔ ni esa akɛ wɔsusu hiɛtserɛjiemɔ, shwɛmɔi, shihilɛ mli nifeemɔi, loo nitsumɔ ni wɔhalaa lɛ he jogbaŋŋ lɛ, ni wɔsusu bɔ ni mɛi krokomɛi baabu wɔ lɛ he. Ani anuŋ wɔnifeemɔi loo wɔwiemɔi komɛi ashishi ni no hewɔ lɛ, ebaaha mɛi krokomɛi anane atɔtɔ?

Bɔfo Paulo kaiɔ wɔ akɛ: “Wɔyɛ nibii fɛɛ hegbɛ, shi jeee nibii fɛɛ hi; wɔyɛ nibii fɛɛ hegbɛ, shi jeee nibii fɛɛ haa mɔ nane mɔɔ shi. Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.” (1 Korintobii 10:23, 24) Ákɛ Kristofoi lɛ, wɔsumɔɔ ni wɔtswa suɔmɔ kɛ ekomefeemɔ ni yɔɔ Kristofoi anyɛmifeemɔ lɛ mli lɛ wɔma shi yɛ anɔkwale mli.—Lala 133:1; Yohane 13:34, 35.

Wiemɔi ni Tsaa Mɔ

Wiemɔi baanyɛ aná mɔ ko nɔ hewalɛ kpakpa. “Naajɔlɛ wiemɔi tamɔ wo agbaku, amɛŋɔɔ susuma naa, ni amɛhaa wui náa hewalɛ.” (Abɛi 16:24) Sane ni agba ni kɔɔ Gideon ni tsĩ béi ni baanyɛ aba ekɛ Efraimbii lɛ naa lɛ tsɔɔ akɛ, abɛbua nɛɛ ji anɔkwale.

Gideon, ni kɛ Midianbii lɛ miiwuu ta waa lɛ tsɛ́ Efraim akutso lɛ ni amɛbaye amɛbua. Shi kɛlɛ, beni ta lɛ eba naagbee sɛɛ lɛ, Efraimbii lɛ tsɔ amɛhe amɛha Gideon ni amɛwie nyanyaanya akɛ etsɛɛɛ amɛ kɛjɛɛɛ ta lɛ shishijee mli. Nɔ ni aŋma afɔ̃ shi lɛ tsɔɔ akɛ “amɛkɛ lɛ kojo waa diɛŋtsɛ.” Gideon ha hetoo akɛ: “Mɛni mifee ní kɛ nyɛ nɔ̃ lɛ ye egbɔ? Efraim weinyibii akpɛkpɛo ni eye lɛ, nto efe Abiezer weinyibii ni etse lɛ fɛɛ? Nyɔŋmɔ eŋɔ Oreb kɛ Zeeb, Midian lumɛi lɛ, ewo nyɛdɛŋ; ni mɛni minyɛ mifee ni kɛ nyɛnɔ̃ lɛ ye egbɔ?” (Kojolɔi 8:1-3) Kɛtsɔ ewiemɔi ni ahala lɛ jogbaŋŋ, ni yɔɔ blɛoo lɛ nɔ lɛ, Gideon tsĩ nɔ ni kulɛ ebaanyɛ efee akutseiaŋ ta ni baakpata nii ahiɛ lɛ naa. Ekolɛ, mɛi ni yɔɔ Efraim akutso lɛ mli lɛ yɛ he ni abuɔ fe nine kɛ henɔwomɔ he naagba. Shi kɛlɛ, enɛ etsĩii Gideon naa kɛjɛɛɛ mɔdɛŋ ni eeebɔ koni eha toiŋjɔlɛ aba. Ani wɔbaanyɛ wɔfee nakai nɔŋŋ.

Mlifu baanyɛ ate shi yɛ mɛi krokomɛi amli ni ebaatee ekɛ mɛi krokomɛi ateŋ béi shi. Kpɛlɛmɔ amɛhenumɔi anɔ, ni obɔ mɔdɛŋ ni onu amɛsusumɔi ashishi. Ani ekolɛ, wɔ wɔha amɛnuɔ he nakai yɛ gbɛ ko nɔ? Kɛji nakai ni lɛ, mɛni hewɔ wɔkpɛlɛɛɛ nɔ ni wɔfee ni wɔkɛha naagba lɛ ba lɛ nɔ, ni wɔtsɔɔ bɔ ni edɔ wɔ akɛ wɔkɛ nɔ ko efata naagba lɛ he lɛ. Wiemɔi fioo ni asusu he jogbaŋŋ lɛ baanyɛ asaa wekukpaa ni efite lɛ. (Yakobo 3:4) Wɔ nɔmimaa wiemɔi ni mlihilɛ yɔɔ mli lɛ ji nɔ kɛkɛ ni he baahia mɛi komɛi ni ekolɛ, amɛmli efu lɛ. Biblia lɛ kɛɔ akɛ “Kɛ lai tã lɛ, la gboɔ.” (Abɛi 26:20) Hɛɛ, kɛji akɛ wiemɔi ni asusu he jogbaŋŋ ha yɛ mumɔ kpakpa mli lɛ, ebaanyɛ eku “mlila naa” ni ebaafee nɔ ni tsaa mɔ.—Abɛi 15:1.

Bɔfo Paulo jieɔ yi akɛ: “Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.” (Romabii 12:18) Eji anɔkwale akɛ wɔnyɛŋ wɔkudɔ mɛi krokomɛi ahenumɔi, shi wɔbaanyɛ wɔtsu wɔgbɛfaŋnɔ koni wɔha toiŋjɔlɛ ahi shi. Yɛ nɔ najiaŋ ni wɔɔŋmɛɛ wɔhe wɔha wɔ diɛŋtsɛ wɔnifeemɔi loo mɛi krokomɛi anɔ ni yeee emuu lɛ, wɔbaanyɛ wɔfee nii amrɔ nɔŋŋ koni wɔkɛ Biblia shishitoo mlai ni ato shishi jogbaŋŋ lɛ atsu nii. Kɛji wɔtsu béi ahe nii yɛ gbɛ ni Yehowa fãa wɔ akɛ wɔfee lɛ nɔ lɛ, ebaaha wɔná naanɔ toiŋjɔlɛ kɛ miishɛɛ.—Yesaia 48:17.

[Shishigbɛ niŋmaa]

[Mfoniri ni yɔɔ baafa 24]

Ani wɔmaa nɔ mi doo ní afee nii yɛ wɔgbɛ nɔ?

[Mfoniri ni yɔɔ baafa 25]

Abraham fee nɔkwɛmɔnɔ kpakpa efɔ̃ shi yɛ ehe ni eŋmɛɛ koni ekɛsaa béi lɛ mli