Buu Ohenilee He

EYƐ gbeyei waa akɛ aaaná susumɔ ko ni tsɔɔ akɛ aaatá kɔɔyɔŋ lɛlɛ ko mli kɛya yɛ be mli ni nibii ni atswa awo emli kɔmpiuta lɛ mli lɛ ejaaa. Bo lɛ susumɔ he nɛkɛ moŋ okwɛ akɛ, mɔ ko etsake nɔ ko yɛ kɔɔyɔŋ lɛlɛ gbɛtsɔɔmɔ he gbɛjianɔtoo lɛ mli aloo eje gbɛ etswa nɔ ko ni ejaaa ewo mli! Ojogbaŋŋ, yɛ mfonirifeemɔŋ gbɛ nɔ lɛ, nakai pɛpɛɛpɛ ji nɔ ni mɔ ko bɔɔ mɔdɛŋ koni efee ohenilee. Etswa efai shi akɛ eeefite ojeŋba gbɛtsɔɔmɔ he gbɛjianɔtoo lɛ. Eyiŋtoo ji koni eha ote shi owo Nyɔŋmɔ!—Hiob 2:2-5; Yohane 8:44.

Namɔ ji nakai nifitelɔ ni ehiii kwraa nɛɛ? Atsɛ́ɔ lɛ yɛ Biblia lɛ mli akɛ “blema onufu lɛ ní atsɛɔ lɛ diabolo [naafolɔlɔ loo abonsam] lɛ kɛ satan [henyɛlɔ] lɛ ní shishiuɔ jeŋ muu lɛ fɛɛ lɛ.” (Kpojiemɔ 12:9, wɔma efã ko nɔ mi.) Ana ni eefee nɔ ko yɛ Eden abɔɔ lɛ mli, kɛtsɔ susumɔ ni lakaa mɔ ni ekɛtsu nii, ní ekɛkɔne Hawa yiŋ koni eku ehiɛ eshwie nɔ ni ele akɛ eja lɛ nɔ koni etse atua eshi Nyɔŋmɔ. (1 Mose 3:1-6, 16-19) Kɛjɛ nakai beaŋ kɛbaa nɛɛ, Satan eto nifeemɔi wuji komɛi ni akɛlakaa mɔ lɛ ahiɛyaa he gbɛjianɔ koni ekɛnyiɛ gbɔmɛi fɛɛ ahiɛ kɛte shi awo Nyɔŋmɔ. Nɛkɛ gbɛjianɔtoi nɛɛ amli nɔ ni ehiii fe fɛɛ ji apasa jamɔ.—2 Korintobii 11:14, 15.

Apasa Jamɔ Fiteɔ Henilee

Anaa apasa jamɔ yɛ Biblia wolo ni ji Kpojiemɔ lɛ mli akɛ okadifeemɔŋ ajwamaŋ ni atsɛ́ɔ lɛ Babilon Kpeteŋkpele. Etsɔɔmɔi lɛ efite mɛi babaoo ajeŋba mli henumɔ nii ni eha amɛnyɛ̃ mɛi ni esoro amɛhemɔkɛyelii lɛ ni amɛfee amɛ niseniianii po. Yɛ anɔkwale mli lɛ, taakɛ Kpojiemɔ tsɔɔ mli lɛ, Nyɔŋmɔ haa apasa jamɔ feɔ mɔ titri ni baabu akɔntaa yɛ “mɛi fɛɛ ni agbe yɛ shikpɔŋ nɔ lɛ” alá ní Nyɔŋmɔ diɛŋtsɛ webii anɔ̃ fata he lɛ hewɔ.—Kpojiemɔ 17:1-6; 18:3, 24.

Yesu bɔ ekaselɔi lɛ kɔkɔ ni tsɔɔ bɔ ni apasa jamɔ baafite mɛi komɛi ajeŋba gbɛtsɔɔmɔ he mlai lɛ, beni ekɛɛ akɛ: “Be baaba tete, ní mɔ fɛɛ mɔ ni gbeɔ nyɛ lɛ aaasusu akɛ ekɛmiijá Nyɔŋmɔ.” Kwɛ bɔ ni aŋkroaŋkroi yiwalɔi nɛɛ eshwila yɛ jeŋba mli amɛha! Yesu kɛɛ: “Amɛleee tsɛ lɛ loo mi hu.” (Yohane 16:2, 3, wɔma efã ko nɔ mi.) Beni Yesu wie nakai wiemɔi lɛ, etsɛɛɛ ni agbe lɛ diɛŋtsɛ yɛ jamɔŋ hiɛnyiɛlɔi komɛi afamɔ naa, mɛi ni nyɛ amɛha amɛ awuiyeli lɛ kɛ amɛhenilee kpã gbee lɛ. (Yohane 11:47-50) Nɔ ni tamɔɔɔ nakai lɛ, Yesu kɛɛ akɛ suɔmɔ ni yɔɔ enɔkwa sɛɛnyiɛlɔi lɛ ateŋ lɛ ji nɔ ni akɛyɔseɔ amɛ. Shi amɛsuɔmɔ lɛ yaa shɔŋŋ babaoo lolo, ejaakɛ amɛkpãa mli aahu kɛyashɛɔ amɛhenyɛlɔi lɛ anɔ.—Mateo 5:44-48; Yohane 13:35.

Gbɛ kroko ni apasa jamɔ etsɔ nɔ kɛfite mɛi babaoo ahenilee ji kɛtsɔ nɔ ni egbɛ eshwã lɛ ni ekɛbaa jeŋba fɛɛ jeŋba nɔ loo nakai ni efeee lɛ nɔ. Beni bɔfo Paulo gbaa enɛ he sane efɔ̃ɔ shi lɛ, ekɛɛ: “Be ko baaba ni amɛkpɛlɛŋ tsamɔ tsɔɔmɔ lɛ dɔŋŋ, shi moŋ amɛaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa, ejaakɛ amɛtoiiaŋ miifɛ̃lɛ̃ amɛ.”—2 Timoteo 4:3.

Gbii-etɛ nɛɛ, jamɔŋ hiɛnyiɛlɔi lɛ fɛ̃lɛ̃ɔ mɛi atoiiaŋ kɛtsɔ kɛɛmɔ ni amɛkɛɔ amɛ akɛ Nyɔŋmɔ baanyɛ akpɛlɛ bɔlɛnamɔ ni yaa nɔ yɛ gbalashihilɛ sɛɛ lɛ nɔ lɛ. Mɛi krokomɛi hu kpɛlɛɔ nuu ni kɛ nuu náa bɔlɛ nifeemɔi anɔ. Yɛ anɔkwale mli lɛ, osɔfoi komɛi kɛ amɛhe woɔ nuu ni kɛ nuu náa bɔlɛ nifeemɔ lɛ mli waa diɛŋtsɛ. Sane ko ni je kpo yɛ Britain adafitswaa wolo The Times lɛ mli lɛ kɛɛ akɛ, ahala “osɔfoi hii nyɔŋma kɛ etɛ ni kɛ amɛhe náa bɔlɛ” lɛ koni amɛná gbɛfaŋnɔ yɛ Church of England lɛ Asafoŋ Onukpai Akpee Wulu lɛ shishi. Beni sɔlemɔ mli hiɛnyiɛlɔi lɛ kpooɔ Biblia mli jeŋba, ni nɔ ko fioo ko pɛ amɛsɔlemɔi lɛ feɔ yɛ he lɛ, mɛɛ tɛi ni afolɔ ashwie shi esa akɛ sɔlemɔ lɛ mli bii kɛtsu nii? Ebɛ naakpɛɛ akɛ mɛi akpekpei abɔ ayiŋ efutu kwraa.

Kwɛ bɔ ni ehi jogbaŋŋ akɛ aaaha jeŋba ni tamɔ kane kɛ mumɔŋ anɔkwalei ni atsɔɔ yɛ Biblia lɛ mli lɛ aaakudɔ mɔ! (Lala 43:3; Yohane 17:17) Ákɛ nɔkwɛmɔnɔ lɛ, Biblia lɛ tsɔɔ akɛ ajwamaŋbɔlɔi loo gbalafitelɔi “anine shɛŋ Nyɔŋmɔ maŋtsɛyeli lɛ nɔ.” (1 Korintobii 6:9, 10) Ekɛɔ wɔ akɛ hii kɛ yei ni tsakeɔ ‘nɔ ni ato ni afeɔ lɛ hiɛ kɛha nɔ ni afeee lɛ’ ‘miitsu hiɛgbejianii’ yɛ Nyɔŋmɔ hiɛ. (Romabii 1:26, 27, 32) Nɛkɛ jeŋba mli anɔkwalei nɛɛ jeee gbɔmɛi ni yeee emuu lɛ amalei; enɛɛmɛi ji tɛi ni Nyɔŋmɔ efolɔ eshwie shi ni jɛ mumɔŋ, ni eguuu kɔkɔɔkɔ. (Galatabii 1:8; 2 Timoteo 3:16) Shi Satan yɛ gbɛ̀i krokomɛi hu ni etsɔɔ nɔ efiteɔ henilee.

Halamɔ Hiɛtserɛjiemɔ Mli

Eji nɔ kome akɛ aaanyɛ mɔ ko nɔ ni efee efɔŋ, shi eji nɔ kroko kwraa akɛ aaaha esumɔ akɛ ekɛ ehe aaawo nifeemɔ ni tamɔ nakai mli. Enɛ ji oti ni ma “je lɛŋ lumɔ lɛ” ni ji Satan hiɛ. Bɔni afee ni eha esusumɔ ni efite lɛ aka kwashiai loo mɛi ni kwɛɛɛ amɛhe nɔ jogbaŋŋ—titri lɛ mɛi ni abaanyɛ atutua amɛ babaoo ni ji oblahii kɛ oblayei—lɛ ajwɛŋmɔ kɛ tsuii amli lɛ, ekɛ nifeemɔ gbɛ̀i tamɔ woji, sinii, lala, kɔmpiuta shwɛmɔi ni esaaa, kɛ Internet lɛ nɔ hei ni jieɔ mɛi ahe efoji lɛ tsuɔ nii.—Yohane 14:30; Efesobii 2:2.

Amaniɛbɔɔ ko ni yɔɔ wolo tɛtrɛɛ ni ji Pediatrics lɛ mli lɛ kɛɛ akɛ: “Oblahii kɛ oblayei [ni yɔɔ United States] lɛ kwɛɔ aaafee awuiyeli nifeemɔi 10000 daa afi, ni yiwalɛ nifeemɔ ni naa wa waa ni ajieɔ atsɔɔ gbekɛbii lɛ fa babaoo diɛŋtsɛ.” Amaniɛbɔɔ lɛ tsɔɔ mli hu akɛ “daa afi lɛ, mɛi ni yeko afii nyɔŋmai enyɔ lɛ kwɛɔ bɔlɛnamɔ he nibii, hiɛshishwiemɔi, kɛ hefɛoyelii aaashɛ 15000.” Ekɛɛ akɛ, “nɔ ni fa fe bɔlɛnamɔ mli nifeemɔi 8 yɛ ŋmɛlɛtswaa kome mli, ní fa fe nɔ ni ba yɛ afi 1976 lɛ mli lɛ toi ejwɛ ji nɔ ni anaa” yɛ gbɛkɛnaashi ni ji be mli ni mɛi kɛkwɛɔ tɛlivishiŋ fe fɛɛ lɛ po mli. Ebɛ naakpɛɛ akɛ, niiamlipɛimɔ lɛ tsɔɔ mli hu akɛ “wiemɔ shara miiya hiɛ waa nakai nɔŋŋ hu.” Ni kɛlɛ, Biblia lɛ kɛ jeŋ nilee he nikasemɔi babaoo lɛ bɔɔ kɔkɔ akɛ nii ni tamɔ nɛkɛ ni akɛwoɔ jwɛŋmɔ mli lɛ tsakeɔ gbɔmɛi lɛ kɛfiteɔ amɛ kwraa. No hewɔ lɛ kɛ́ oosumɔ ni osa Nyɔŋmɔ hiɛ lɛɛlɛŋ ni oná he sɛɛ lɛ, bó Abɛi 4:23 (NW) lɛ toi, nɔ ni kɛɔ akɛ: “Buu otsui he, ejaakɛ no mli wala jɛɔ.”—Yesaia 48:17.

Lalai ni egbɛ eshwã lɛ babaoo hu fiteɔ henilee lɛ. Amaniɛbɔɔ ko ni yɔɔ Australia adafitswaa wolo The Sunday Mail lɛ mli lɛ bɔ kɔkɔ akɛ, lalatsɛ ko ni aheɔ elalai waa yɛ Anaigbɛ shikpɔji komɛi anɔ lɛ “bɔ mɔdɛŋ jogbaŋŋ diɛŋtsɛ koni eha mɛi ahe ajɔ̃ amɛhe.” Nɔ ni aŋma lɛ kɛɛ akɛ “elalai lɛ woɔ tsofai fɔ̃ji, wekunyo ni bɛŋkɛ kpaakpa ni akɛnáa bɔlɛ kɛ kabonaatoo hiɛ nyam,” ni “lalai ni eláa ji nɔ ni kɔɔ eŋa ni eeegbe kɛ egbonyo lɛ ni eeeshɛ efɔ̃ kpaakpo mli lɛ he.” Lalai lɛ mli wiemɔi lɛ ekomɛi yɛ nyaŋemɔ tsɔ bɔ ni aaanyɛ atsĩ tã yɛ biɛ. Ni kɛlɛ, elala lɛ ha ená juromɔ nii wuji. Ani obaasumɔ ni odũ susumɔi ni fiteɔ mɔ jeŋba tamɔ nɔ ni atsĩ tã yɛ yiteŋgbɛ lɛ owo ojwɛŋmɔ kɛ otsui mli, kɛ́ eji nɔ ni akɛ lala esaa he fɛfɛo po? Eka shi faŋŋ akɛ dabi, ejaakɛ mɛi ni feɔ nii yɛ gbɛ ni tamɔ nɛkɛ nɔ lɛ woɔ amɛhenilee he muji ni yɛ naagbee lɛ, ehaa “tsui fɔŋ” boteɔ amɛmli, ni ehaa amɛtsɔmɔɔ Nyɔŋmɔ henyɛlɔi.—Hebribii 3:12; Mateo 12:33-35.

No hewɔ lɛ okɛ nilee ahala hiɛtserɛjiemɔ mli. Biblia lɛ woɔ wɔ hewalɛ akɛ: “Nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!”—Filipibii 4:8.

Naanyobɔi Náa Ohenilee Nɔ Hewalɛ

Ákɛ gbekɛbii lɛ, Neil kɛ Franz kɛ Kristofoi anɔkwafoi ná naanyobɔɔ kpakpa mli ŋɔɔmɔ.a Shi Neil kɛɛ akɛ, etsɛɛɛ ni “mikɛ nanemɛi gbohii bɔi bɔɔ.” Nɔ ni jɛ mli ba yɛ sɛɛ mli ni ha eshwa ehe diɛŋtsɛ ji, awuiyeli kɛ tsuŋwoo. Franz sane lɛ tamɔ nakai nɔŋŋ. Eye awerɛho akɛ: “Misusu akɛ kulɛ manyɛ mikɛ je lɛŋ oblahii kɛ oblayei abɔ ni amɛnáaa minɔ hewalɛ. Shi taakɛ Galatabii 6:7 kɛɔ lɛ, ‘Nyɔŋmɔ lɛ, aliii lɛ yaka. Ejaakɛ nɔ̃ pɛ ní gbɔmɔ dũɔ lɛ, no nɔŋŋ ebaakpa hu.’ Miná kɛtsɔ niiashikpamɔ ni mli wa nɔ akɛ misane ejaaa ni Yehowa sane ja. Awo mi tsuŋ miwala gbii abɔ fɛɛ yɛ esha ni mifee lɛ hewɔ.”

Bei pii lɛ gbɔmɛi ni tamɔ Neil kɛ Franz kɛ amɛhe wooo awuiyeli mli trukaa; yɛ shishijee mli lɛ, amɛsusuɔ akɛ esaaa akɛ akɛ he woɔ mli kwraa. Kplaŋmɔ lɛ baa fiofio, ni bei pii lɛ nɔ ni baa klɛŋklɛŋ ji nanemɛi fɔ̃ji ni akɛbɔɔ. (1 Korintobii 15:33) Ekolɛ tsofai fɔ̃ji kɛ nitsumɔ kɛ dãatɔɔ baanyiɛ sɛɛ. Yɛ anɔkwale mli lɛ, awie henilee he yɛ gbɛ ni ja nɔ akɛ “subaŋ lɛ fã ko ni futuɔ dãa.” Kɛjɛ no sɛɛ kɛbaa lɛ, no bafeɔ gbɛ bibioo ko pɛ ni atsɔɔ nɔ kɛyaboteɔ awuiyeli loo jeŋba shara mli.

Belɛ mɛni hewɔ mɔ ni okɛ ohe woɔ klɛŋklɛŋ nifeemɔ lɛ mli? Yɛ no najiaŋ lɛ, okɛ mɛi ni le nii ni sumɔɔ Nyɔŋmɔ lɛɛlɛŋ lɛ abɔ. Amɛbaaye amɛbua bo kɛwaje ohenilee koni etsɔɔ bo gbɛ jogbaŋŋ, ni ebaajie bo kɛjɛ piŋmɔi babaoo mli. (Abɛi 13:20) Eyɛ mli akɛ Neil kɛ Franz yɛ tsuŋwoo mli lolo moŋ, shi amrɔ nɛɛ, amɛnaa akɛ amɛhenilee lɛ ji ŋwɛi nikeenii ni esa akɛ atsɔse lɛ jogbaŋŋ, hɛɛ, ni efee nɔ ni jara wa. Kɛfata he lɛ, amɛmiibɔ mɔdɛŋ waa koni amɛná amɛkɛ amɛ-Nyɔŋmɔ ni ji Yehowa lɛ teŋ wekukpaa kpakpa. Ná nilee, ní okase nii kɛjɛ amɛtɔmɔi amli.—Abɛi 22:3.

Buu Ohenilee He

Kɛ wɔná suɔmɔ wɔha Nyɔŋmɔ kɛ emli hemɔkɛyeli ni ehe gbeyeishemɔ kpakpa fata he lɛ, wɔtsɔɔ akɛ wɔmiisumɔ ni wɔbu wɔhenilee he. (Abɛi 8:13; 1 Yohane 5:3) Biblia lɛ jieɔ lɛ kpo akɛ, henilee ni nibii ni náa mɔ nɔ hewalɛ nɛɛ bɛ mli lɛ bɛ jeŋba kpakpa yɛ bei babaoo mli. Ákɛ nɔkwɛmɔnɔ lɛ, Lala 14:1 wieɔ mɛi ni kɛɔ yɛ amɛtsuiŋ akɛ: “Nyɔŋmɔ ko bɛ” lɛ ahe. Yɛ mɛɛ gbɛ nɔ hemɔkɛyeli ni abɛ nɛɛ náa amɛjeŋba nɔ hewalɛ? Kuku lɛ kɛɔ kɛtsáa nɔ akɛ: “Amɛfite, amɛnifeemɔ nii lɛ yɛ nyaŋemɔ.”

Gbɔmɛi ni bɛ Nyɔŋmɔ mli anɔkwa hemɔkɛyeli lɛ hu bɛ hiɛnɔkamɔ ni mli wa kɛha wɔsɛɛ be kpakpa. No hewɔ lɛ, amɛsumɔɔ ni amɛhi shi amɛha ŋmɛnɛ, ni amɛkɛ amɛhe woɔ amɛheloo naa akɔnɔi amli. Shishitoo mla ni amɛkɛtsuɔ nii ji: “Nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi!” (1 Korintobii 15:32) Yɛ gbɛ kroko nɔ lɛ, je lɛŋ miishɛɛnamɔ nibii ni sɛɛ etsɛɛɛ lɛ gbalaaa mɛi ni amɛhiɛ yɔɔ naanɔ wala he juromɔnɔ lɛ nɔ lɛ ajwɛŋmɔ. Taakɛ kɔɔyɔŋ nyiɛmɔ he kɔmpiuta ni ja lɛ ji lɛ, amɛhenilee ni atsɔse lɛ haa amɛhiɔ toiboo ni afeɔ ahaa Nyɔŋmɔ yɛ anɔkwayeli mli lɛ gbɛ lɛ nɔ pɛpɛɛpɛ.—Filipibii 3:8.

Bɔni afee ni ohenilee ahiɛ ehewalɛ lɛ mli pɛpɛɛpɛ lɛ, Nyɔŋmɔ Wiemɔ lɛ mli gbɛtsɔɔmɔ daa he miihia lɛ. Biblia lɛ kɛɔ wɔ akɛ abaanyɛ aná gbɛtsɔɔmɔ ni tamɔ nakai beni ekɛɛ yɛ mfonirifeemɔŋ gbɛ nɔ akɛ: “Otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ́ jio, abɛkugbɛ nyɛtsɔ́ jio.” (Yesaia 30:21) No hewɔ lɛ too be oma shi daa kɛha Biblia kanemɔ. Enɛ baawaje bo ni ebaawo bo hewalɛ be mli ni opeleɔ koni ofee nɔ ni ja aloo be mli ni haomɔ kɛ yeyeeyefeemɔ ni woɔ mɔ he gbeyei lɛ miihe aba onɔ. Ná nɔmimaa akɛ Yehowa baakudɔ bo yɛ jeŋba mli kɛ mumɔŋ kɛ́ okɛ ohiɛ fɔ̃ enɔ kwraa. Hɛɛ, kasemɔ lalatsɛ lɛ, mɔ ni ŋma akɛ: “Mikɛ Yehowa toɔ mihiɛ daa: ní eyɔɔ mininejurɔ nɔ nɛɛ, mididãŋ.” (Lala 16:8; 55:23)

[Shishigbɛ niŋmaa]

[Mfonirii ni yɔɔ baafa 5]

Apasa jamɔ ni awie he yɛ Biblia lɛ mli ákɛ “Babilon Kpeteŋkpele lɛ” gbeɔ mɛi babaoo ahenilee

[He ni Sane lɛ Jɛ]

Osɔfo ni miijɔɔ asraafoi: U.S. Army photo

[Mfonirii ni yɔɔ baafa 6]

Awuiyeli kɛ jeŋba shara ni oookwɛ lɛ baafite ohenilee

[Mfoniri ni yɔɔ baafa 7]

Gbɛtsɔɔmɔ ni jɛɔ Nyɔŋmɔ Wiemɔ lɛ mli daa lɛ baabu ohenilee he