Obaanyɛ Okpoo Mumɔŋ Tsui Hela ni Baa Trukaa Lɛ

Kpɔiaŋgbɔlelɔi ni bɔɔ mɔdɛŋ fe fɛɛ yɛ je lɛŋ lɛ ateŋ mɔ ko ní he esa jogbaŋŋ diɛŋtsɛ ni eyɔɔ gbɔmɔtsoŋ hewalɛ jogbaŋŋ lɛ gbee shi trukaa ni egbo beni ekaa ekpɔiaŋ ekwɛɔ lɛ. Kpɔiaŋgbɔlelɔ lɛ ji Sergei Grinkov ni ená shika tsuru juromɔnɔ shii enyɔ yɛ Olympic shwɛmɔ mli ákɛ mɔ ni shwɛɔ yɛ ais nɔ, ní enitsumɔ ba naagbee beni kpaako kwraa ebɔi hiɛyaa lɛ—beni éye afii 28 pɛ lɛ. Mɛɛ oshara nɛ! Mɛni kɛ enɛ ba? Tsui hela ni baa trukaa lɛ. Nɔ ni akɛɛ ji akɛ egbele lɛ ba trukaa ni akpaaa gbɛ kwraa ejaakɛ anaaa okadi ko kwraa ni tsɔɔ akɛ eeye tsui hela. Ni kɛlɛ, hela mlipɛilɔi na akɛ etsui eda agbo ni efãji wuji lɛ amli etsĩ waa diɛŋtsɛ.

YƐ BE mli ni eeenyɛ efee akɛ tsui helai babaoo ni baa trukaa lɛ ní anaaa ehe okadi ko lɛ, tsofafeemɔ nitsumɔ mli onukpai kɛɔ akɛ efɔɔɔ kaa. Anɔkwa sane lɛ ji akɛ bei pii lɛ akuɔ hiɛ ashwieɔ okadii ni tamɔ nɛkɛ kɛ nibii ni kɛ hela nɛɛ baa lɛ nɔ, tamɔ mu ni anyɛɛɛ amu, shwilɛ tɔtɔrɔɔ, kɛ tsitsi ni waa mɔ he lɛ. Nɔ ni jɛɔ mli baa ji akɛ, kɛ́ mɛi lɛ ateŋ mɛi babaoo gboiii be mli ni amɛtsui hela lɛ eba trukaa po lɛ, amɛbatsɔmɔɔ kpajelɔi kwraa yɛ amɛwala be ni eshwɛ lɛ mli.

Tsofafeelɔi ni yɔɔ ŋmɛnɛ lɛ ateŋ mɛi babaoo etsɔɔ akɛ tsui hela ni baa trukaa lɛ naatsĩi biɔ ni mɔ akwɛ eniyeli kɛ eshihilɛ gbɛ hu mli jogbaŋŋ ni eha akɛ tsofafeemɔ apɛi ehewalɛnamɔ mli yɛ be kɛ bei amli.a Nifeemɔ gbɛ̀i ni tamɔ nɛkɛ kɛ anɔkwa suɔmɔ ni ayɔɔ akɛ aaafee tsakemɔi yɛ hei ni ehe hiaa yɛ lɛ, baaye ebua waa koni eha mɔ lɛ aye ehe kɛjɛ osharai ni jɛɔ tsui hela ni baa trukaa mli kɛbaa lɛ mli.

Shi kɛlɛ, wɔtsui lɛ fã kroko hu yɛ ni esa akɛ akwɛ lɛ jogbaŋŋ fe enɛ kwraa po. Biblia lɛ bɔɔ kɔkɔ akɛ: “Ohiɛ akã otsui he fe nii fɛɛ; ejaakɛ no mli wala jɛɔ.” (Abɛi 4:23) Yɛ anɔkwale mli lɛ, nɛkɛ ŋmalɛ nɛɛ miiwie mfonirifeemɔŋ tsui lɛ he titri. Henɔkwɛmɔ jogbaŋŋ he miihia koni ebu wɔtsui lɛ diɛŋtsɛ he, shi ehe miihia waa fe nɛkɛ akɛ wɔɔkwɛ jogbaŋŋ kɛ́ wɔmiisumɔ ni wɔbu wɔ mfonirifeemɔŋ tsui lɛ he koni helai ni baanyɛ agbe wɔ yɛ mumɔŋ lɛ akamɔmɔ wɔ.

Mfonirifeemɔŋ Tsui Hela ni Baa Trukaa lɛ He Saji

Taakɛ eji yɛ gbɔmɔtsoŋ tsui hela gbɛfaŋ lɛ, gbɛ̀i ni hi fe fɛɛ ni aaatsɔ nɔ atsĩ tsui hela ko ni baa trukaa lɛ naa kɛ́ aaawie yɛ mumɔŋ gbɛfaŋ lɛ ji ní akase nibii ni kɛbaa lɛ he nii koni agbɛnɛ akwɛ bɔ ni aaafee ni akɛtsu nii. No hewɔ lɛ, nyɛhaa wɔsusua nibii komɛi ni kɛ naagbai baa tsui lɛ he lɛ he—tsui lɛ diɛŋtsɛ kɛ mfonirifeemɔŋ nɔ̃ lɛ.

Niyenii. Eji nɔ ko ni akpɛlɛɔ nɔ yɛ he fɛɛ he akɛ, eyɛ mli akɛ fɔ niyenii ŋɔɔ waa moŋ, shi hewalɛ fioo ko pɛ ekɛhaa gbɔmɔtso lɛ kɛ́ eeebalɛ nakai po. Yɛ nakai gbɛ nɔ nɔŋŋ lɛ, jwɛŋmɔŋ fɔ niyenii lɛ namɔ waaa kwraa ni eyeli ŋɔɔ, shi eyeɔ mɔ lɛ mumɔŋ hewalɛnamɔ awui. Nɔ ni atsɔɔ ŋaa gbɛ nɔ ayeɔ he jara yɛ adafitswaa saji amli ni efa babaoo ji saji ni tsɔɔ bɔlɛnamɔ ni esaaa kɛ tsofai fɔ̃ji ni akɛtsuɔ nii, awuiyeli kɛ ashwai anifeemɔ. Niyenii ni tamɔ nɛkɛ ni mɔ ko aaaye awo ejwɛŋmɔ mli lɛ nyɛɔ eyeɔ mfonirifeemɔŋ tsui lɛ awui. Nyɔŋmɔ Wiemɔ lɛ bɔ kɔkɔ akɛ: “Nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:16, 17.

Niyenii kpakpai, tamɔ aduawai kɛ yeli baai ŋmɔji eŋɔɔɔ mɔ ni sumɔɔ fɔ niyenii waa lɛ naa tsɔ̃. Nakai nɔŋŋ ekolɛ mumɔŋ niyenii kpakpa ni hi baaŋɔɔ mɔ ni bei pii lɛ eyeɔ je lɛŋ nibii ni akɛhaa lɛ ewoɔ ejwɛŋmɔ kɛ etsui mli lɛ naa fioo ko pɛ. Ekolɛ ebaaya nɔ eye Nyɔŋmɔ Wiemɔ lɛ mli “fufɔ” lɛ kɛyashi be ko. (Hebribii 5:13) Enáaa mumɔŋ dalɛ ni he hiaa koni ekɛtsu mumɔŋ gbɛnaa nii bibii ahe nii yɛ Kristofoi asafo lɛ kɛ sɔɔmɔ nitsumɔ lɛ mli yɛ be kakadaŋŋ mli. (Mateo 24:14; 28:19; Hebribii 10:24, 25) Mɛi komɛi ni yɔɔ nakai shihilɛ mli lɛ eha amɛmumɔŋ hewalɛ lɛ eba shi aahu akɛ amɛbatsɔmɔ Odasefoi ni kɛ amɛhe wooo shiɛmɔ nitsumɔ lɛ mli dɔŋŋ!

Oshara kroko hu ji akɛ kponɔgbɛ nii baanyɛ alaka mɔ. Kristofoi anitsumɔi ni afeɔ lɛ hiɛaŋhiɛaŋ lɛ baanyɛ atsĩmɔ mfonirifeemɔŋ tsui ni jeŋ nilee ni akɛtaoɔ heloonaa nii babaoo lɛ mli ni akɛ he woɔ yɛ teemɔŋ loo hiɛtserɛjiemɔ ni tsɔɔ jeŋba shara, awuiyeli loo ashwai nifeemɔ fiteɔ lɛ lɛ tɔmɔi ni fáa babaoo naa. Mumɔŋ niyenii tamɔ nɛkɛ ni tɔmɔ yɔɔ he lɛ baanyɛ afee tamɔ nɔ ni náa mɔ mumɔŋ shidaamɔ nɔ hewalɛ fioo, shi ebaanyɛ efite mfonirifeemɔŋ tsui lɛ tamɔ bɔ ni niyenii ni hewalɛ bɛ mli lɛ baanyɛ aha fãji wuji lɛ amli awa ni efite tsui diɛŋtsɛ lɛ. Yesu bɔ kɔkɔ eshi akɔnɔi gbohii ni mɔ haa eboteɔ etsui mli lɛ. Ekɛɛ akɛ: “Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” (Mateo 5:28) Hɛɛ, mumɔŋ niyenii ni hewalɛ bɛ mli baanyɛ eha mɔ aná mumɔŋ tsui hela ni baa trukaa lɛ eko. Ni kɛlɛ, nibii krokomɛi yɛ ni esa akɛ asusu he lolo.

Kpɔiaŋgbɔlemɔ. Nɔ ni ale jogbaŋŋ ji akɛ kpɔiaŋgbɔlemɔ ni akɛ he wooo mli yɛ shihilɛ mli lɛ baanyɛ eha aná tsui helai ni baa trukaa. Nakai nɔŋŋ mumɔŋ kpɔiaŋgbɔlemɔ ni akɛ he wooo mli lɛ baanyɛ ekɛ naagbai ni mli wawai aba. Ákɛ nɔkwɛmɔnɔ lɛ, ekolɛ mɔ ko kɛ ehe baawo Kristofoi asɔɔmɔ nitsumɔ lɛ mli yɛ gbɛ ko nɔ shi ekolɛ ebaasumɔ ni ekɛ ehe awo mli taakɛ nɔ ni aaanyɛ atsɛ no akɛ eji ogbɔjɔ shihilɛ, ni mɔdɛŋ fioo ko pɛ ebaabɔ loo ebɔŋ mɔdɛŋ kwraa akɛ eeetsɔ “nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.” (2 Timoteo 2:15) Aloo ekolɛ mɔ ko baaya Kristofoi akpeei lɛ ekomɛi shi, ekolɛ nɔ ko fioo ko pɛ ebaafee koni ekɛsaa ehe kɛha enɛ ni ekɛ ehe awo mli. Ekolɛ ekɛ mumɔŋ oti ko kwraa emaŋ ehiɛ loo enaŋ akɔnɔ loo miishɛɛ kɛhaŋ mumɔŋ nibii. Yɛ naagbee lɛ, mumɔŋ kpɔiaŋgbɔlemɔ ni ekɛ ehe wooo mli lɛ gbɔjɔɔ loo egbeɔ hemɔkɛyeli ni ekolɛ ená yɛ be ko mli lɛ po. (Yakobo 2:26) Bɔfo Paulo yɔse oshara nɛɛ beni eŋmaa kɛyaha Hebri Kristofoi ní eka shi faŋŋ akɛ amɛteŋ mɛi komɛi kɛ amɛhe wooo mumɔŋ kpɔiaŋgbɔlemɔ mli lɛ. Susumɔ kɔkɔbɔɔ ni ekɛha amɛ, yɛ bɔ ni enɛ baanyɛ aná amɛmumɔŋ shidaamɔ nɔ hewalɛ lɛ he okwɛ. “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkalɔ lɛ, he; shi moŋ nyɛwiea nyɛtsɔɔtsɔɔa nyɛhe gbi fɛɛ gbi ní atsɛɔ lɛ ŋmɛnɛ lɛ, koni akɛ esha shishiumɔ lɛ akawaje nyɛteŋ mɔ ko.”—Hebribii 3:12, 13.

Nɔnyɛɛ. Ni kɛlɛ, nɔ kroko hu ni kɛ gbɔmɔtsoŋ tsui helai ni baa trukaa lɛ baa waa diɛŋtsɛ ji nɔnyɛɛ ni baa fe nine lɛ. Yɛ nakai gbɛ nɔ nɔŋŋ lɛ, nɔnyɛɛ loo ‘shihilɛ mli haomɔi’ lɛ baanyɛ agbe mfonirifeemɔŋ tsui lɛ yɛ gbɛ ni waaa nɔ, ní eha mɔ ni enɛ baa enɔ lɛ afɔ̃ɔ Nyɔŋmɔ jamɔ kwraa po. Yesu kɔkɔbɔɔ ni kɔɔ enɛ he lɛ yɛ ebe naa pɛpɛɛpɛ, akɛ: “Nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ-ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne.” (Luka 21:34, 35) Nɔnyɛɛ hu baanyɛ aba wɔ mfonirifeemɔŋ tsui lɛ nɔ kɛ́ wɔye wɔtsui yɛ teemɔŋ esha ko hewɔ yɛ be kakadaŋŋ mli lɛ. Maŋtsɛ David kase nii kɛjɛ niiashikpamɔ ni piŋmɔ ni jɛ nakai nɔnyɛɛ ni yeɔ awui lɛ mli lɛ kɛbaa lɛ mli beni ekɛɛ akɛ: “Mihe esha lɛ hewɔ lɛ hewalɛ ko bɛ miwui amli. Ejaakɛ minishaianii lɛ esu mi; amɛtamɔ jatsu tsiŋmoo ni tsii fe mi.”—Lala 38:4, 5.

Hekɛnɔfɔɔ fe nine. Mɛi babaoo ni amɛtsui hela baa trukaa lɛ yɛ hekɛnɔfɔɔ waa yɛ bɔ ni amɛgbɔmɔtsoŋ hewalɛnamɔ ji ha lɛ he beni eshwɛ fioo ni amɛtsui hela lɛ aaaba trukaa lɛ. Bei pii lɛ, ajieɔ tsofafeemɔ mlipɛimɔ lɛ kɛjɛɔ jwɛŋmɔ mli loo ayeɔ he fɛo po akɛ ehe ehiaaa kwraa. Nakai nɔŋŋ ekolɛ mɛi komɛi baasusu akɛ akɛni be kakadaŋŋ nɛ kɛjɛ beni amɛtsɔmɔ Kristofoi hewɔ lɛ, nɔ ko kwraa bɛ ni baaba amɛnɔ. Ekolɛ amɛbaaku amɛhiɛ amɛshwie amɛhe shi ni amɛaaba amɛha mumɔŋ tsofafeemɔ mlipɛimɔ lɛ nɔ aahu kɛyashi beni oshara ko aaaba. Ehe miihia ni aha ŋaawoo kpakpa ni akɛhaa kɛshiɔ hekɛnɔfɔɔ ni anáa fe nine lɛ ahi jwɛŋmɔ mli taakɛ bɔfo Paulo kɛhaa lɛ, akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” Nilee yɛ mli akɛ wɔɔyɔse emuu ni wɔyeee lɛ koni wɔpɛi wɔmli yɛ mumɔŋ yɛ be kɛ beaŋ wɔkwɛ.—1 Korintobii 10:12; Abɛi 28:14.

Kaaku Ohiɛ Oshwie Kɔkɔbɔɔ He Okadii Anɔ

Ŋmalɛi lɛ susuɔ mfonirifeemɔŋ tsui shihilɛ lɛ he waa diɛŋtsɛ yɛ yiŋtoo kpakpa hewɔ. Wɔkaneɔ yɛ Yeremia 17:9, 10 lɛ akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale? Mi, Yehowa, mitaoɔ tsuiŋ, mikaa sabai mikwɛɔ, koni maha mɔ fɛɛ mɔ yɛ egbɛ̀i kɛ enifeemɔ nii ayibii lɛ anaa!” Shi yɛ wɔtsui lɛ ni wɔɔpɛi mli wɔkwɛ lɛ sɛɛ lɛ, Yehowa jɛɔ suɔmɔ mli etoɔ gbɛjianɔ hu koni eye ebua wɔ ni wɔfee tsofafeemɔ mlipɛimɔ ni he hiaa.

Kɛtsɔ “tsulɔ anɔkwafo kɛ nilelɔ” lɛ nɔ lɛ, ahaa wɔ kaimɔi ni yɔɔ ebe naa. (Mateo 24:45) Ákɛ nɔkwɛmɔnɔ lɛ, gbɛ̀i ni mɔɔ shi fe fɛɛ lɛ ateŋ ekome ni abaanyɛ atsɔ nɔ alaka wɔ mfonirifeemɔŋ tsui lɛ ji wɔhe ni wɔkɛaawo je lɛŋ nibii ahe yaka yiŋsusumɔi amli lɛ. Enɛɛmɛi ji jwɛŋmɔŋ mfonirifeemɔi, yiŋsusumɔi, jwɛŋmɔ ni kpaa shi kɛkɛ ni anyɛɛɛ akɛ he afɔ̃ nɔ. Nibii ni tamɔ enɛɛmɛi baanyɛ aye awui waa, titri lɛ kɛ́ amɛha aná susumɔi ni he tseee. No hewɔ lɛ, esa akɛ wɔkpoo enɛɛmɛi kwraa. Kɛ wɔná nyɛ̃ɛ wɔha mlakwamɔ taakɛ Yesu fee lɛ, wɔbaabu wɔjwɛŋmɔ he kɛjɛ je lɛŋ yaka yiŋsusumɔi ni wɔɔná lɛ he.—Hebribii 1:8, 9.

Kɛfata he lɛ, wɔyɛ onukpai ni yɔɔ suɔmɔ yɛ Kristofoi asafo lɛ mli. Yɛ be mli ni eka shi faŋŋ akɛ wɔhiɛ sɔɔ bɔ ni mɛi krokomɛi susuɔ wɔhe lɛ, gbɛnaa nii ni kã wɔnɔ koni wɔtsu wɔ mfonirifeemɔŋ tsui lɛ he nii lɛ kã wɔteŋ mɔ fɛɛ mɔ nɔ yɛ naagbee mli. Ekã wɔnɔ aŋkroaŋkro koni ‘wɔka nii fiaa wɔkwɛ’ ni ‘wɔka wɔ diɛŋtsɛ wɔhe wɔkwɛ be fɛɛ be akɛ wɔyɛ hemɔkɛyeli lɛ mli lo.’—1 Tesalonikabii 5:21; 2 Korintobii 13:5.

Buu Tsui lɛ He

Biblia mli shishitoo mla ni tsɔɔ akɛ “nɔ̃ pɛ ní gbɔmɔ dũɔ lɛ, no nɔŋŋ ebaakpa hu” lɛ kɔɔ wɔ mfonirifeemɔŋ tsui lɛ hewalɛnamɔ hu he. (Galatabii 6:7) Bei pii lɛ, nɔ ni feɔ tamɔ mumɔŋ oshara ni baa trukaa lɛ bafeɔ nɔ ni jɛɔ teemɔŋ esha ni akɛ he ewo mli aahu be kakadaŋŋ yɛ nifeemɔi ni fiteɔ mɔ yɛ mumɔŋ lɛ mli lɛ mli kɛbaa, tamɔ mfonirii ni mɛi hiɛ amɛhe efoji yɛ mli lɛ akwɛmɔ, heloonaa nii ni adiɔ sɛɛ fe nine loo gbɛihemɔ loo hewalɛ ni ataoɔ aná.

No hewɔ lɛ, bɔni afee ni mɔ abu tsui lɛ he lɛ, ehe miihia ni ekwɛ mumɔŋ niyenii ni eyeɔ lɛ jogbaŋŋ. Ha jwɛŋmɔ lɛ kɛ tsui lɛ niyenii kɛtsɔ Nyɔŋmɔ Wiemɔ lɛ ni oooye lɛ nɔ. Kpoomɔ mumɔŋ fɔ niyenii ni nine shɛɔ nɔ amrɔ nɔŋŋ ni ŋɔɔ heloo lɛ naa waa ni nɔ ni jɛɔ mli baa nɔŋŋ pɛ ji mfonirifeemɔŋ tsui ni nuuu nii ahe lɛ. Lalatsɛ lɛ kɛ ŋaawoo ni hi jogbaŋŋ—ni ehi yɛ tsofafeemɔ mli—ni tamɔ enɛ ha akɛ: “Amɛtsui eti tamɔ fɔ; shi mi lɛ, omla lɛ he mimii shɛɔ.”—Lala 119:70.

Kɛ teemɔŋ esha ko yɛ ni ehi shi aahu lɛ, bɔɔ mɔdɛŋ ni ojie yɛ ohe oshwie, kɛ jeee nakai lɛ ebaatsimɔ mfonirifeemɔŋ fãji wuji ni oyɔɔ lɛ mli. Kɛ je lɛ fee tamɔ nɔ ni ebɔi bo fɛo feemɔ ni efee tamɔ nɔ ni kɛ miishɛɛ kɛ nyamɔ babaoo baaha lɛ, susumɔ ŋaawoo ni nilee yɔɔ mli ni bɔfo Paulo kɛha lɛ he waa diɛŋtsɛ. Eŋma akɛ: “Anyɛmimɛi, nɔ ni mikɛɔ ji akɛ, be lɛ faaa dɔŋŋ; nɔ ni eshwɛ ji akɛ, mɛi ni . . . tsuɔ je nɛɛ he nii lɛ afee tamɔ mɛi ni tsuuu he nii: ejaakɛ je nɛŋ subaŋ lɛ hoɔ yaa.” (1 Korintobii 7:29-31) Ni kɛ́ heloonaa ninamɔ aaabɔi otsinebaa lɛ, okɛ Hiob wiemɔi nɛɛ ato otsui mli, akɛ: “Kɛji miŋɔ shika mifee mibobaa nɔ̃, ní mitsɛ́ shika krɔŋŋ akɛ mihiɛnɔkamɔ lɛ, no hu ji nɔ̃ sha ní sa akɛ kojolɔi awo he nyɔmɔ; ejaakɛ kulɛ mikwá Mawu ní yɔɔ ŋwɛi lɛ.”—Hiob 31:24, 28; Lala 62:11; 1 Timoteo 6:9, 10.

Beni Biblia lɛ tsɔɔ hiɛdɔɔ ni yɔɔ ŋaawoo ni damɔ Biblia nɔ ní akuɔ hiɛ ashwieɔ nɔ be fɛɛ be lɛ, ebɔ kɔkɔ akɛ: “Mɔ ni afɔɔ lɛ kamɔ ni ekuɛŋ ti lɛ, trukaa aaakumɔ lɛ ni tsabaa bɛ.” (Abɛi 29:1) Nɔ ni tamɔɔɔ enɛ lɛ, kɛ́ wɔkwɛ wɔ mfonirifeemɔŋ tsui lɛ jogbaŋŋ lɛ, wɔbaanyɛ wɔná miishɛɛ kɛ jwɛŋmɔŋ toiŋjɔlɛ ni jɛɔ shihilɛ ni ato he gbɛjianɔ jogbaŋŋ ni bɛ haŋtsii mli kɛbaa lɛ. Enɛ efee anɔkwa Kristofonyo nifeemɔ gbɛ ni ajieɔ yi ahaa be fɛɛ be. Akɛ mumɔ kanya bɔfo Paulo koni eŋma akɛ: “Shi lɛɛlɛŋ, ninamɔ kpeteŋkpele ji Nyɔŋmɔ-jamɔ, kɛji mɔ ko mii shɛ enii ahe lɛ. Ejaakɛ wɔkɛ nɔ ko nɔ ko baaa je nɛŋ, no hewɔ lɛ eyɛ faŋŋ akɛ wɔnyɛŋ wɔkɛ nɔ ko aya hu. Shi kɛ́ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he.”—1 Timoteo 6:6-8.

Hɛɛ, wɔhe ni wɔɔtsɔse ni wɔhi shi yɛ Nyɔŋmɔ-jamɔ hetuu-kɛhamɔ nifeemɔ mli lɛ baaha wɔná mfonirifeemɔŋ tsui ni yɔɔ hewalɛ kpakpa. Kɛ wɔkwɛ wɔmumɔŋ niyenii jogbaŋŋ lɛ, wɔhaŋ je nɛŋ nifitemɔ gbɛ̀i kɛ susumɔ lɛ afite wɔ wɔmumɔŋ shidaamɔ loo ni eye wɔmumɔŋ shidaamɔ lɛ awui ko kwraa. Nɔ ni fe fɛɛ lɛ, kɛ́ wɔkpɛlɛ gbɛjianɔ ni Yehowa toɔ kɛtsɔɔ esafo lɛ nɔ lɛ nɔ lɛ, eba akɛ wɔɔha apɛi wɔ mfonirifeemɔŋ tsui lɛ mli be fɛɛ be. Kɛ wɔkɛ ekãa tsu enɛ he nii lɛ ebaaye ebua wɔ waa koni wɔkwa naagbai ni yɔɔ mɔbɔ ni jɛɔ mumɔŋ tsui hela ni baa trukaa lɛ mli kɛbaa lɛ.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 10]

MUMƆŊ NIYENII NI EHIII LƐ BAANYƐ AFITE MFONIRIFEEMƆŊ TSUI LƐ TAMƆ BƆ NI NIYENII NI HEWALƐ BƐ MLI LƐ BAANYƐ AHA FÃJI WUJI LƐ AMLI AWA NI EFITE TSUI DIƐŊTSƐ LƐ

[Wiemɔ ni akɔ ni akɛmiitsu nii ni yɔɔ baafa 10]

MUMƆŊ KPƆIAŊGBƆLEMƆ NI AKƐ HE WOOO MLI LƐ BAANYƐ EKƐ NAAGBAI NI MLI WAWAI ABA

[Wiemɔ ni akɔ ni akɛmiitsu nii ni yɔɔ baafa 11]

‘SHIHILƐ MLI HAOMƆI’ LƐ BAANYƐ AGBE MFONIRIFEEMƆŊ TSUI LƐ YƐ GBƐ NI WAAA NƆ

[Mfoniri ni yɔɔ baafa 11]

Wɔhiɛ ni wɔɔku wɔshwie wɔmumɔŋ hewalɛnamɔ nɔ lɛ baanyɛ ekɛ piŋmɔi babaoo aba wɔnɔ

[Mfonirii ni yɔɔ baafa 13]

Mumɔŋ sui kpakpai ni wɔɔná lɛ buɔ mfonirifeemɔŋ tsui lɛ he

[He ni Mfoniri ni yɔɔ baafa 9 lɛ Jɛ]

AP Photo/David Longstreath